Akó—Taimi Lōloa Tahá: Miniti ʻe 45

Fealēleaʻaki ki he ʻAho Ní:

5 HOKOHOKO ATU ʻA E FOAKÍ PEA Tāpuekina ʻa e Niʻihi Kehé

Mape Lavameʻa ʻo e Fatongia Tauhi Paʻangá

1. Vahevahe ʻa e Ngaahi Tefitoʻi Moʻoni ʻo e Moʻui Fakafalala pē Kiate Kitá mo ho Fāmilí mo e Ngaahi Kaungāmeʻá

Vahevahe ʻa e Ngaahi Tefitoʻi Moʻoni ʻo e Moʻui Fakafalala Fakalaumālie pē Kiate Kitá

Lau:Ko e taimi ʻoku tau moʻui fakafalala fakalaumālie ai pē kiate kitautolú, ko hotau fatongiá leva ke tokoniʻi ʻa e niʻihi kehé ke nau lava ʻo moʻui fakafalala fakalaumālie pē kiate kinautolu. ʻOku tau lau ʻi he Tokāteline mo e Ngaahi Fuakavá, “Pea kapau ʻoku ʻi ai ha taha ʻiate kimoutolu ʻoku mālohi ʻi he Laumālié, tuku ke ne ʻave mo ia ʻa e tokotaha ʻoku vaivaí, koeʻuhí ke fakamāʻoniʻoniʻi ia ʻi he angamalū kotoa pē, koeʻuhí ke ne hoko ʻo mālohi foki” (T&F 84:106). ʻOku tohi ʻe Pita ʻa e meʻa tatau pē ʻi he Fuakava Foʻoú, “Pea hangē kuo maʻu taki taha ʻa e foakí, ke pehē hono fengāueʻaki ia ʻiate kimoutolú, ʻo taau mo e kau tauhi lelei ʻo e ʻofa lahi ʻa e ʻOtuá” (1 Pita 4:10).

Aleaʻi:ʻOku kaunga fēfē ʻa e ngaahi akonaki ko ʻení kiate koe? Kuo tāpuekina fēfē hoʻo moʻuí ʻe he ngaahi tefitoʻi moʻoni ʻo e moʻui fakafalala pē kiate kita ʻi he Ko Hoku Fakavaʻé ? ʻOku ʻuhinga ki he hā ke moʻui fakafalala fakalaumālie pē kiate kita?

Fakamatalaʻi ʻa e Ngaahi Tefitoʻi Moʻoni ʻo e Moʻui Fakafalala Fakatuʻasino pē Kiate Kitá

Lau:Ko e taimi ʻoku tau moʻui fakafalala fakatuʻasino ai pē kiate kitautolú, ko hotau fatongiá leva ke tokoniʻi ʻa e niʻihi kehé ke nau lava mo kinautolu ʻo moʻui fakafalala fakatuʻasino pē kiate kinautolu. Ko e taha ʻo e ngaahi founga lelei taha ke tokoniʻi ai ʻa e niʻihi kehé ke nau moʻui fakafalalala pē kiate kinautolú ko e tokoni mo foaki ki he niʻihi kehé. ʻOku ʻi ai ʻa e fefakafalalaʻaki ʻiate kinautolu ʻoku maʻu ʻa e meʻá mo kinautolu ʻoku ʻikaí. ʻOku hanga ʻe he foakí, ʻo hākeakiʻi ʻa e masivá pea ngaohi ʻa e koloaʻiá ke anga fakatōkilalo. ʻI hono fai ʻo e foakí, ʻoku fakamāʻoniʻoniʻi ai ʻa kinaua fakatouʻosi. ʻI hono tukuange ʻo e kakai masivá mei he hopoaté mo e ngaahi haʻisia ʻo e nofo masivá, ʻoku nau hoko leva ko ha kakai tauʻatāina ʻo lava ai ke nau aʻusia kakato ʻa e ngaahi meʻa ʻoku nau malavá, fakatuʻasino mo fakalaumālie fakatouʻosi. ʻI he foaki ʻa e kakai koloaʻiá mei heʻenau ngaahi koloa hulú, ʻoku nau kau ai ʻi he tefitoʻi moʻoni taʻengata ʻo e foakí. Ko e taimi pē kuo kakato ai ha taha, pe moʻui fakafalala pē kiate ia, ʻoku ala atu leva ʻo tokoni ki he niʻihi kehé, pea ʻoku toe vilo leva ʻa e foʻi siakalé ʻiate ia pē” (“The Celestial Nature of Self-Reliance,” Ensign, Nov. 1982, 93).

Aleaʻi:Ko e hā ʻene kaunga ʻa e kupuʻi lea ko ʻení kiate koé? Ko hai ʻa e paeá? Te ke lava fēfē ke tokoniʻi ʻa e paeá pe ko kinautolu ʻoku masiva ʻi hoʻo moʻuÍ?

Fakalaulauloto:Tuku ha kiʻi taimi ke ke fakalaulauloto ai ki he fehuʻi ko ʻení: Ko hai ʻoku ou ʻiloʻi ʻokú ne fie maʻu ke Moʻui Fakafalala Fakapaʻanga pē Kiate Ia? Te u vahevahe fēfē ia mo kinautolu? Hiki ʻa e ngaahi hingoá mo e ngaahi palani ke vahevahé ʻi lalo.

Vilitaki Atu ʻi he Tui

Lau:Tangane e Ngāue! Kuó ke fakakakato ʻa e ngaahi fakataha fakakulupu ki he Moʻui Fakafalala Fakapaʻanga Fakafoʻituitui pē Kiate Kitá. Hiki ʻa e feituʻu ʻokú ke nofo aí mo e founga ʻokú ke palani ke hoko atu ai hoʻo fakalakalaká ʻi he tēpile ʻi laló, ke fakafuofuaʻi hoʻo fakalakalaká.

ʻEkitivitī (miniti ʻe 10)

Vakaiʻi fakafoʻituitui ʻa e Mape Lavameʻa ʻi he Fatongia Tauhi ʻo e Ngaahi Meʻa Fakapaʻangá, pea fakalaulauloto ki he fakalakalaka kuó ke fakahoko he uike ʻe 12 kuo toki ʻosí. Fakakaukau ki he sitepu hono hoko ʻi hoʻo fonongá, pea fakafonu ʻa e tēpile ʻi laló.

Kaveingá	ʻIo pe ʻIkai	Fakalakalaka ki he ʻAho Ní/Ngaahi Sitepu Hokó
ʻOku ou ongoʻi faaitaha mo hoku malí pea mo e ʻEikí ʻi heʻeku ngaahi meʻa fakapaʻangá.
ʻOku ou tukupā ke moʻui fakafalala pē kiate au.
ʻOku ou falala kia Sīsū Kalaisi.
ʻOku ou totongi vahe hongofulu kakato mo foaki ʻaukai.
ʻOku ʻikai ke u moʻui fakafalala ki he fāmilí, siasí, pea mo e puleʻangá.
ʻOku ou vakaiʻi mo muimui maʻu pē ki heʻeku patisetí.
ʻOku ʻi ai ʻeku paʻanga fakatuʻupakē ki he māhina ʻe taha.
ʻOku ʻikai haku moʻua pe ʻoku ou lolotonga totongi fakalahi ke fai mo ʻosi hoku moʻuá.
ʻOku ʻi ai ʻeku paʻanga fakatuʻupakē ki ha māhina ʻe tolu ki he ono.
ʻOku ʻi ai ʻeku maluʻi feʻunga (hangē ko e maluʻi moʻui leleí, maluʻi moʻuí, maluʻi meʻalelé, mo e maluʻi faingataʻaʻia fakaesinó).
ʻOku ou fakahū maʻu pē ha paʻanga mo ʻinivesi ki he kahaʻú.

Aleaʻi:Ko e hā haʻo fakalakalaka he uike ʻe 12 kuo hilí, ke ke hoko ai ko ha tauhi fakapotopoto mo faivelenga ʻi hoʻo ngaahi meʻa fakapaʻangá?

Lau:Ko e lahi e ngaahi meʻa kuo tau aleaʻí he ʻikai ke lava ʻo fakahoko ia ʻi he uike pē ʻe 12. Ka, ʻoku ʻosi totonu ke ke fakatupulaki ʻa e ngaahi tōʻonga moʻui ke hoko atu hoʻo fakalakalaká ki ha tuʻunga lavameʻa ʻi he tauhi ʻo e meʻa fakapaʻangá. Hoko atu ʻo fakahoko maʻu pē e ngaahi fakataha alēlea fakafāmilí. Hoko atu ʻi hono toe fakamanatu ʻo e ngaahi vahe ʻi he tohi ngāue ko ʻení. Pea hoko atu ke ngāueʻi hoʻo ngaahi taumuʻa fakapaʻanga ʻokú ke fakamuʻomuʻá. Tukupā ke muimui he “Ngaahi Sitepu Hokó” ʻa ia naʻá ke hiki ʻi he kōlomu fakaʻosi ʻo e sivi ʻi he ngaahi peesi kimuʻá.

Fakalaulauloto:Tuku ha miniti ʻe nima ke ke fakakaukau ai ki he fehuʻi ko ʻení pea hiki hoʻo fakakaukaú ʻi lalo: Ko e hā ʻa e ngaahi meʻa mahuʻinga taha kuó u ako ʻi he uike ʻe 12 kuo hilí?

ʻEkitivitī (miniti ʻe 20–30.)

Fevahevaheʻaki fakakulupu ʻa e ngaahi fakamoʻoni, ngaahi aʻusia, ngaahi meʻa kuo mou akó, pea mo e ngaahi founga kuo tāpuekina ai kimoutolu ʻe he ʻEikí ʻi he uike ʻe 12 kuo hilí.