Ko Hoku Fakavaʻé: Maʻu ʻa e Ngaahi Ouau Fakatemipalé—Taimi Lōloa Tahá: Miniti ʻe 20

Fakalaulauloto:Ko e hā ha niʻihi ʻo e ngaahi meʻa mahuʻinga taha kiate koé?

Mamataʻi:ʻOku maʻu ʻa e “Ko e Fakahoko ʻa e Meʻa ʻOku Mahuʻinga Tahá [Doing What Matters Most],” ʻi he srs.lds.org/videos. (ʻIkai ha vitiō? Lau ʻa e peesi (00) 201

Ko e Fakahoko ʻa e Meʻa ʻOku Mahuʻinga Tahá

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

Tokotaha Fakamatalá: Naʻe tō ha vakapuna ʻi Folōlita ʻi ha pō fakapoʻuli ʻe taha ʻi Tīsema. Naʻe mate ai ha kakai ʻe toko 100 tupu. Naʻe maile pē ʻe 20 mei he feituʻu naʻa nau mei hao ki aí.

Palesiteni DIETER F. UCHTDORF: Hili e fakatuʻutāmakí, naʻe feinga ʻa e kau fakatotoló ke ʻilo ʻa e tupuʻangá. Naʻe ʻosi tukuange fakalelei hifo pē ʻa e nāunau ia ʻoku tō ʻaki ʻe he vakapuná. Naʻe fakaʻofoʻofa ʻaupito pē ʻa e tafaʻaki fakamīsini ia ʻo e vaká. Naʻe ngāue lelei ʻa e meʻa kotoa pē—tuku kehe pē ha meʻa ʻe taha: ko ha foʻi ʻuhila ʻe taha naʻe pā. Naʻe hanga ʻe he kiʻi foʻi ʻuhila ko iá—ʻa ia ʻoku sēniti nai ʻe 20 hono mahuʻingá—ʻo kamataʻi ha ngaahi meʻa lalahi ne iku ke mole fakamamahi ai ha moʻui ʻa ha kakai ʻe toko 100 tupu.

ʻOku mahino, naʻe ʻikai ko e foʻi ʻuhilá naʻá ne fakatupu ʻa e fakatuʻutāmakí; naʻe hoko ia he naʻe tukutaha e tokanga ʻa e kau ngāué ia ʻi ha meʻa naʻe ʻikai fuʻu mahuʻinga he taimi ko iá, kae ngalo ʻiate kinautolu ʻa e meʻa mahuʻinga tahá.

ʻOku ʻikai ko e kau pailaté pē ʻoku nau faʻa fakahehema ke tukutaha ʻenau tokangá ʻi he ngaahi meʻa ʻoku ʻikai mahuʻingá. ʻOku tau ʻi ha tuʻunga fakatuʻutāmaki kotoa. ʻOku tukutaha nai hoʻomou fakakaukaú mo e lotó ʻi he ngaahi meʻa muna mo laulaunoa ʻoku fuonounoú, pe ko e ngaahi meʻa ʻoku mahuʻinga tahá?

“ʻOku Tau Fai ha Ngāue Lahi pea ʻOku ʻIkai ke Tau Faʻa ʻAlu Hifo,” Ensign pe Liahona, Mē 2009, 59–60.

Foki ki he peesi 200

Aleaʻi:Ko e hā ha ngaahi meʻa laulaunoa ʻoku nau tohoakiʻi kitautolu mei he fakalakalaká? ʻE lava fēfē ke tokoniʻi kitautolu ʻe he ngaahi ouau ʻo e ongoongoleleí?

Lau:Tokāteline mo e Ngaahi Fuakava 84:20 mo e lea ʻa Palesiteni Boyd K. Packer (ʻi he toʻomataʻú)

“ʻOku fakahā ʻi hono ngaahi ouaú ʻa e mālohi ʻo e anga faka-ʻOtuá.”

Tokāteline mo e Ngaahi Fuakava 84:20

“ʻE tāpuakiʻi kitautolu ʻe he ʻEikí ʻi heʻetau fakahoko ʻa e ngāue ouau toputapu ʻo e temipalé. He ʻikai fakangatangata ʻa e ngaahi tāpuaki ʻi aí ki heʻetau ngāue ʻi he temipalé. ʻE tāpuakiʻi kitautolu ʻi heʻetau ngaahi ngāué kotoa. Te tau taau ai ke maʻu e tokanga ʻa e ʻEikí ki heʻetau ngaahi ngāué, fakalaumālie mo fakatuʻasino fakatouʻosi.

Boyd K. Packer, The Holy Temple (1980), 182

Aleaʻi:ʻI heʻetau feinga ke moʻui fakafalala pē kiate kitautolú, ko e hā ʻoku mahuʻinga ai ke tau taau mo e temipalé?

ʻEkitivitií

Sitepu 1: Lau mo hao hoa ʻa e kupuʻi lea ʻa ʻEletā Quentin L. Cook (ʻi toʻomataʻú) pea mo e ngaahi potu-folofola ko ʻení. Laineʻi ‘a e ngaahi tāpuaki kuo talaʻofa maʻa kinautolu ʻoku lotu ʻi he temipalé.

“ʻE lelei kiate kitautolu kapau te tau ako ʻa e vahe 109 ʻo e Tokāteline mo e Ngaahi Fuakavá pea mo muimui ki he naʻinaʻi ʻa Palesiteni [Hauati W.] Hanitaá ‘ke fokotuʻu ʻa e temipale ʻo e ʻEikí ko e fakaʻilonga maʻongoʻonga ʻo [ʻetau] hoko ko e mēmipá.’”

Quentin L. Cook, “Sio Kiate Koe ʻi he Loto Temipalé,” Ensign pe Liahona, Mē 2016, 99; toʻo mei he Ngaahi Akonaki ʻa e Kau Palesiteni ʻo e Siasí: Hauati W. Hanitā (2015), 178

“Ko ia, ʻoku fakahā ʻi hono ngaahi ouaú ʻa e mālohi ʻo e anga faka-ʻOtuá” (T&F 84:20).

“Pea ke nau tupu hake ʻi hoʻo ʻafió, ʻo maʻu ʻa hono kakato ʻo e Laumālie Māʻoniʻoní, pea fokotuʻutuʻu ʻa kinautolu ʻo fakatatau ki hoʻo ngaahi fonó, pea teuteuʻi ʻa kinautolu ke maʻu ʻa e ngaahi meʻa ʻaonga kotoa pē” (T&F 109:15).

“Pea ko e taimi ʻe maumau-fono ai ʻa ho kakaí, ha taha pē ʻiate kinautolu, ke nau fakatomala fakatoʻotoʻo pea tafoki mai ki hoʻo ʻafió, ʻo ʻiloʻi ʻa e ʻofá ʻi ho ʻaó, pea fakafoki ʻa kinautolu ki he ngaahi tāpuaki kuó ke tuʻutuʻuni ke lilingi hifo kiate kinautolu ʻe ʻapasia ki hoʻo ʻafió ʻi ho falé” (T&F 109:21).

“Pea ʻoku mau kole ki hoʻo ʻafió, ʻe Tamai Māʻoniʻoni, ke ʻalu atu ʻa hoʻo kau tamaioʻeikí mei he falé ni kuo fakamahafu ʻa kinautolu ʻaki ho mālohí, pea ke ʻiate kinautolu ʻa ho huafá, pea ke takatakai ʻiate kinautolu ʻa ho nāunaú, pea ke tokangaʻi ʻa kinautolu ʻe hoʻo kau ʻāngeló” (T&F 109:22).

“‘Oku mau kole ki hoʻo ʻafió, ʻe Tamai Māʻoniʻoni, … ke ʻoua naʻa ʻaonga ha mahafu tau kuo ngaohi ke tauʻi ʻa kinautolu” (T&F 109:24–25).

Sitepu 2: Fakalaulauloto fakafoʻituitui, “Ko e hā ʻoku fie maʻu ke liliu ʻi heʻeku moʻuí ke lahi ange ai ʻeku kau ʻi he ngaahi ouau ʻo e temipalé?”

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāué takitaha:

• Kapau ʻoku ʻi ai haʻo lekomeni temipale, fokotuʻu ha ʻaho ke ke ʻalu ai ki he temipalé.

• Kapau ʻoku ʻikai ke ʻi ai haʻo lekomeni temipale, talanoa mo hoʻo pīsopé pe palesiteni fakakoló ki ha founga te ke lava ai ʻo teuteu ke maʻu ho ngaahi ouau fakatemipalé.

• Vahevahe ʻa e meʻa kuó ke ako fekauʻaki mo e ngaahi ouau ʻo e temipalé mo ho fāmilí pe ngaahi kaungāmeʻá.