Ko Hoku Fakavaʻé: Fekumi ki he ʻIló—Taimi Lōloa Tahá: Miniti ʻe 20
-
Fakalaulauloto:ʻOku fokotuʻu fēfē ʻe he akó ʻa e faingamālié?
-
Mamataʻi:“Ako ki ha Tuʻunga Moʻui ʻoku Lelei Ange [Education for a Better Life],” maʻu ʻi he srs.lds.org/videos. (ʻIkai ha vitiō? Lau ʻa e peesi 165.)
Ako ki ha Tuʻunga Moʻui ʻOku Lelei Angé
Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.
ʻĪmisistill from Education for a Better LifeʻEletā Joseph W. Sitati: ʻI heʻeku taʻu 13 naʻá ku nofo ʻi he feituʻu ʻuta ʻo Keniá. Naʻe masiva ʻaupito ʻa e kakaí. Ka ko kinautolu ne lava ke nau maʻu ʻa e ngaahi meʻa naʻe saiʻia ai ʻa e niʻihi kehé ko kinautolu ia ne ako leleí. Naʻe mahino kiate au ko e akó ʻa e kī ki ha tuʻunga moʻui ʻoku lelei angé.
Naʻe toutou haʻu ha fakakaukau kiate au ke u ʻalu ʻo talanoa ki he puleako ʻi ha taha ʻo e ngaahi ʻapiako naʻá ku fuʻu fie ako aí. Naʻá ku fie maʻu ai e pasikala ʻeku tangataʻeikí ki he fononga ko ʻení ʻa ia naʻe feʻunga mo ha vaeuaʻi ʻaho. Naʻe teʻeki tuʻotaha haʻaku mavahe ki tuʻa mei hoku koló. Naʻe ʻikai ke fuʻu lelei ʻeku lea faka-Pilitāniá, pea ko e puleakó ko ha tangata pālangi. Ne teʻeki ke u fetaulaki pe talanoa hangatonu mo ha pālangi kimuʻa, pea naʻe hoko ʻeni ko ha fakakaukau fakalotofoʻi.
Ne ʻi ai ha meʻa ʻiate au naʻá ne toutou ueʻi au mo talamai ke u fai ʻeni, ko ia ai naʻá ku fononga atu ke sio ki he puleakó. ʻI heʻeku sio kiate iá naʻe lava ke u tala ʻene ʻohovale ke sio ki ha kiʻi tamasiʻi siʻisiʻi ʻoku tuʻu hangē ha sōtiá ʻi muʻa ʻiate ia. Naʻá ne fofonga ʻofa, ko ia naʻá ku loto lahi ai. Naʻá ku talaange ki ai ʻeku fuʻu fie ako ʻi heʻene akoʻangá pea te u fiefia ʻaupito kapau ʻe lava ke ne fakahū au. Naʻá ne pehē mai leva, “Sai, te ta sio ki ai ʻi hono maʻu mai e ola ʻo e siví.” Ne u pehē ange, “Mālō, tangataʻeiki.” Ne siʻi he miniti ʻe faá kuó u ʻosi ʻi tuʻa au mei he ʻōfisí.
Ko e miniti ʻe fā naʻá ku ʻi he ʻōfisí aí ʻa e ngaahi miniti mahuʻinga taha ʻi heʻeku moʻuí. Ko au tokotaha pē mei heʻeku ako lautohí naʻe fili ki he taha ʻo e ngaahi akoʻanga lelei taha ʻi homau ʻēliá. Koeʻuhí ko hono ʻomi ʻe he tangata lelei ko ʻení ʻa e faingamālié ni naʻá ku houngaʻia ai, pea naʻá ne ueʻi au ke u feinga ke hoko ko e tokotaha ako lelei taha ʻi heʻeku kalasí.
Naʻe fakaava ai ha ngaahi faingamālie foʻou ke u hū ai ki ha toe ʻapiako lelei ʻe taha pea mei ai ke teuteu hū ki he ʻunivēsití. ʻI heʻeku akó naʻe malava ai ke maʻu hoku malí he ʻunivēsití. Ne u lava ai ke kumi ha ngāue he fonuá. Lolotonga ʻema nofo ʻi Nailopí, ne ma fetaulaki ai mo ha ongomātuʻa faifekau naʻá na fakaafeʻi kimaua ki hona ʻapi nofoʻangá, ʻa ia ne nau fakataha ai mo kinautolu ko e kau mēmipa ʻo e Siasí. Kapau ne ʻikai ke u ʻi Nailopi he taimi ko iá, ne ʻikai ke u mei maʻu ʻa e ongoongoleleí. Koeʻuhí naʻá ku ʻi ha ngāue lelei ne u lava ai ʻo ngāue ʻi he Siasí.
ʻOku ou fakamoʻoni ko e akó ʻa e kī ki he moʻui fakafalala pē kiate kitá. Te ne fakaava ha ngaahi founga lahi kiate koe ke ke lava ai ʻo tokonaki fakatuʻasino maʻau pē mo ke moʻui fakafalala fakalaumālie ange foki kiate koe pē.
Foki ki he peesi 162.
-
Aleaʻi:Ko e hā naʻe fie maʻu ʻe ʻEletā Joseph W. Sitati heʻene kei taʻu 13? Ko e hā naʻá ne fai ki aí?
-
Lau:Tokateline mo e Ngaahi Fuakava 88: 118–19 mo e lea ʻa Palesiteni Gordon B. Hinckley (ʻi he toʻomataʻú)
-
Fakalaulauloto:Ko e hā ha ngaahi fakakaukau mo ha ngaahi ongo kuó ke maʻu mei he Laumālie Māʻoniʻoní fekauʻaki mo hano fakaleleiʻi hoʻo moʻuí?
-
Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké ni. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha.
-
Fakakakato e ngaahi taumuʻa ko ʻení mo e ngaahi ʻekitivitī fakahinohinó.
-
Fakaʻosi hono tohi hoʻo palani “kāpasa ʻo e moʻuí” pea aleaʻi ia mo ho fāmilí.
-
Kole ha taha ke hoko ko ha tokotaha fai fakahinohino kiate koe pea fokotuʻu ha taimi ke mo fakataha ai.
-
ʻEkitivitī—Fokotuʻu e Ngaahi Taumuʻá
Sitepu 1: Lau ʻa e lea ʻa Palesiteni Howard W. Hunter (he toʻomataʻú). ʻOku fakafou ʻi heʻetau ngaahi taumuʻá, ʻa hono liliu ko ia ʻo ʻetau ngaahi ʻamanakí ke hoko ko ha ngāué.
“Ko e ongoongolelei ʻeni ʻo e fakatomalá, pea ʻoku fie maʻu ke tau fakatomala mo faʻa fakalelei. Ko hono moʻoní, ʻoku totonu ke hoko maʻu pē ʻa e fakatomalá, fokotuʻu tukupaá, mo e fokotuʻu taumuʻá ko ha meʻa ʻoku toutou fakahoko. … ʻOku ou fakaongoongoleleiʻi ʻa e foungá ni.”
Howard W. Hunter, “The Dauntless Spirit of Resolution” (Brigham Young University devotional, Jan. 5, 1992), 2, speeches.byu.edu
Ko e ngaahi taumuʻá ʻoku totonu ke:
-
Mahino mo lava ke fuatautau.
-
Tohi pea fakapipiki ia ʻi ha feituʻu te ke lava ʻo sio fakaʻaho ki aí.
-
ʻOsi fokotuʻu e taimi ke fakakakato aí.
-
Fokotuʻu ha ngaahi ngāue pau ke fakahoko ke ikunaʻi ʻa e taumuʻá.
-
Toutou vakaiʻi, lipooti, mo fakatonutonu.
Sitepu 2: Hiki ʻi ha laʻi pepa makehe, ha taumuʻa ʻe ua pe tolu te ne lava ʻo tokoniʻi koe ke ikunaʻi hoʻo kāpasa moʻuí. Muimui he sīpinga ʻi laló. Fakapipiki ʻa e laʻipepá ʻi ha feituʻu te ke lava ʻo sio fakaʻaho ki aí.
Taumuʻá |
Ko e hā hono ʻuhingá? |
Ngaahi Sitepu Pau ke Aʻusia ai e Taumuʻá |
Taimi Tēpilé |
Ko Hai Te u Lipooti Ki Ai ʻEku Fakalakalaká? |
---|---|---|---|---|
SĪPINGA: Lau ʻa e Tohi ʻa Molomoná he miniti ʻe 30 he ʻaho kotoa pē. |
Koeʻuhí ke u lava ʻo maʻu ha fakahinohino fakaʻaho mei he Laumālie Māʻoniʻoní. |
1. ʻĀ hake he 6:30 pongipongi he ʻaho kotoa pē. 2. Lau konga kimuʻa he kai pongipongí. 3. Lekooti ʻeku fakalakalaká ʻi ha laʻi saati. |
Te u vakaiʻi ʻeku fakalakalaká he pō kotoa kimuʻa peá u mohé. |
Te u vahevahe ʻeku saati fakalakalaká mo ha mēmipa ʻo e fāmilí he Sāpate takitaha. |
ʻEkitivitī—Kumi ha Tokotaha Fai Fakahinohino
Sitepu 1: Lau ʻa e lea ʻa ʻEletā Robert D. Hales (he toʻomataʻú). ʻOku kalasi kehekehe ʻa e kau fai fakahinohinó. Mahalo te ke fie maʻu ha taha ʻoku lahi ʻene taukeí ke tali hoʻo ngaahi fehuʻí—ha taha kuó ne ʻosi fai ʻa ia ʻokú ke fie fakahokó. ʻE lava pē ke hoko ʻa e kau fai fakahinohino kehé ko ha ngaahi kaungāmeʻa pe mēmipa ʻo e fāmilí. Ko ha kakai ʻeni ʻoku nau loto lelei ke fakamoleki ha taimi lahi ange hono poupouʻi koe ke fakahoko ha ngaahi liliu ʻi hoʻo moʻuí mo ʻai koe ke ke haʻisia ki hoʻo fakalakalaká.
“ʻI heʻeku kei talavoú, ne u kumi faleʻi mei heʻeku mātuʻá mo ha kau faiako faivelenga mo falalaʻanga. Ko e taha ai ko ha taki lakanga fakataulaʻeiki; ko e taha ko ha faiako ne falala kiate au. … Filifili ʻi he faʻa lotu ha kau faifaleʻi ʻoku nau fakakaukauʻi hoʻo lelei fakalaumālié.”
Robert D. Hales, “Ko e Fehangahangai mo e Faingataʻa ʻo e Māmaní he ʻAho Ní,” Ensign pe Liahona, Nōvema 2015, 46
Sitepu 2: Fakakaukau ki he faʻahinga tokoni ʻokú ke fie maʻú. Hiki ha lisi ʻo e kakai ʻe lava ke nau hoko ko hoʻo kau fai fakahinohino. Fakalaulauloto mo lotu fekauʻaki mo hoʻo lisí.
Sitepu 3: Tali ʻa e ngaahi fehuʻi ʻi laló ke kamata ʻaki hoʻo vā fetuʻutaki mo e fai fakahinohinó. Ke fakaafeʻi ha tokotaha ke hoko ko hoʻo fai fakahinohinó, te ke lava ʻo kole ange, “ʻOku ou feinga ke liliu ʻeku moʻuí. Te ke loto fiemālie ke tokoniʻi au?”
Ko ʻeku Fai Fakahinohinó |
---|
Ko hai ʻokú ke loto ke hoko ko e tokotaha fai fakahinohino kiate koé? |
Ko e fē taimi te ke kole ange ki ai ke hoko ko e tokotaha fai fakahinohino kiate koé? |
Ko e fē ha taimi te mo lava ai ʻo fakataha ke vahevahe hoʻo “kāpasa moʻuí” mo e ngaahi taumuʻá? |
Ko e hā e tuʻo lahi ʻokú ke loto ke fakataha ai mo hoʻo fai fakahinohinó? |
Sitepu 4: Manatuʻi ʻokú ke haʻisia ki hoʻo “kāpasa moʻuí.” Ko hoʻo fetaulaki mo hoʻo fai fakahinohinó:
-
Vakaiʻi hoʻo fakalakalaká.
-
Vakaiʻi e ngaahi maka tūkiaʻanga ki hoʻo fakalakalaká pea mo e meʻa ʻokú ke fai ke ikunaʻi ai kinautolú.
-
Vakaiʻi tonu ʻa e meʻa ʻokú ke palani ke fai kimuʻa peá ke toe fakataha mo hoʻo fai fakahinohinó.