Ngaahi Maʻuʻanga Tokoní

Ngaahi Fakataha Alēlea Fakafāmilí

Naʻe vahevahe ʻeni ʻe ʻEletā M. Russell Ballard fekauʻaki mo e ngaahi fakataha alēlea fakafāmilí:

“ʻOku ou tui ko e fakataha alēleá ko e founga lelei taha ia ke maʻu ai ha ngaahi ola moʻoni. ʻIkai ngata ai, ʻoku ou ʻiloʻi ko e fakataha alēleá ko e founga ia ʻa e ʻEikí pea naʻá ne fakatupu ʻa e meʻa kotoa pē ʻi he ʻunivēsí ʻo fakafou ʻi ha fakataha alēlea fakalangi, hangē ko ia ʻoku fakamatala ʻi he folofola māʻoniʻoní.

“Neongo ia, kuo teʻeki ai ke u teitei lea ʻi ha konifelenisi lahi fekauʻaki mo e meʻa tefito mo mahuʻinga tahá—mahalo ko e mahuʻinga tahá ia—ʻi he ngaahi fakataha alēlea kotoa pē: ʻa ia ko e fakataha alēlea fakafāmilí.

“ʻOku fie maʻu ke ʻi ai maʻu pē ha fakataha alēlea fakafāmilí. Ko hono moʻoní, ʻoku nau taʻengata. Ne tau kau ki ha fakataha alēlea fakafāmili ʻi he maama fakalaumālié, ʻi heʻetau nofo mo ʻetau mātuʻa fakalangí ʻo hoko ko ʻena fānau fakalaumālie.

“ʻI he taimi ʻoku fakahoko ai ʻa e fakataha alēlea fakafāmilí ʻi he ʻofa mo e anga faka-Kalaisí, te ne fakafepakiʻi ʻe ia e ivi ʻo e tekinolosia fakaonopooni ʻokú ne faʻa tohoakiʻi ʻetau tokangá mei hano fakamoleki ha taimi mahuʻinga he feohi mo e niʻihi kehé pea ʻe ala ʻomi ai e koví ki hotau ʻapí.

“Kātaki ʻo manatuʻi ʻoku kehe ʻa e fakataha alēlea fakafāmilí ia mei he efiafi fakafāmili ia ʻi ʻapi ʻoku fai ʻi he efiafi Mōnité. ʻOku nofotaha pē efiafi fakafāmili ʻi ʻapí ʻi hono akoʻi ʻo e ongoongoleleí mo e ngaahi ʻekitivitī fakafāmilí. Ka ko e fakataha alēlea fakafāmilí ia ʻe lava ke fakahoko ʻi ha faʻahinga ʻaho pē he uiké, pea ʻoku meimei ko ha fakataha ia ʻoku—fefakafanongoʻaki ai e ongomātuʻá pea ki heʻena fānaú foki.

“ʻOku ou tui ʻoku ʻi ai ha faʻahinga fakataha alēlea fakafāmili ʻe fā.

ʻUluakí, ko ha fakataha alēlea fakafāmili fakalūkufua ʻoku kau ki ai e fāmilí kotoa.
Uá, ko ha fakataha alēlea fakafāmili pule ʻoku kau ki ai e tamaí mo e faʻeé.
Tolú, ko ha fakataha alēlea fakafāmili fakangatangata ʻoku kau ki ai e ongo mātuʻá mo ha taha ʻo e fānaú.
Faá, ko ha fakataha alēlea fakafāmili fakafoʻituitui ʻoku kau ki ai ha taha ʻo e mātuʻá mo ha taha ʻo e fānaú.

(“Ngaahi Fakataha Alēlea Fakafāmilí,” Ensign pe Liahona, Mē 2016, 63)

Foki ki he peesi 27