Akó—Taimi Lōloa Tahá: Miniti ʻe 45

Fealēleaʻaki ki he ʻAho Ní:

1 Totongi e Vahehongofulú mo e Ngaahi Foakí

graphic of financial success map

Mape Lavameʻa ʻi he Fatongia Tauhi ʻo e Ngaahi Meʻa Fakapaʻangá

Aleaʻi:ʻOkú ke pehē ko e hā ʻoku hoko ai e “totongi vahehongofulú mo e ngaahi foakí” ko e maluʻi ʻuluaki ia ʻi he Mape Lavameʻa ʻo e Fatongia Tauhi ʻo e Ngaahi Meʻa Fakapaʻangá?

Lau:Kuo ʻosi faleʻi ʻa e kāingalotu ʻo e Siasí ke nau totongi e vahehongofulú mo e ngaahi foakí kimuʻa pea toki totongi ʻenau ngaahi fakamole kehé, ʻo aʻu ki he ngaahi fie maʻú. Naʻe akoʻi ʻe ʻEletā Dallin H. Oaks, “Ko e totongi vahehongofulú ko ha siviʻi ia ʻo e ngaahi meʻa mahuʻingá” (“Tithing,” Ensign, May 1994, 35). ʻI hoʻo fakahaaʻi ki he ʻOtuá e ngaahi meʻa ʻokú ke fakamuʻomuʻá, ʻokú ke fakaava ai ha ngaahi faingamālie lahi ange ke Ne tāpuakiʻi koe. ʻOku faʻa fakamamafaʻi ʻe he folofolá kuo pau ke fakahoko ʻa e meʻa kotoa pē ʻi hono hokohoko totonú (Hangē ko ʻení, vakai, 1 Kolinitō 14:40, Mōsaia 4:27, mo e Tokāteline mo e Ngaahi Fuakava 93:43.)

Naʻe akoʻi ʻe Palesiteni Heber J. Grant, “Ko e kakai tangata mo fafine kuo nau faitotonu kakato ki he ʻOtuá, ʻa ia kuo nau totongi ʻenau vahehongofulú, … kuo foaki kiate kinautolu ʻe he ʻOtuá ʻa e poto ke nau lava ʻo levaʻi ʻa e vahehongofulu ʻe hiva ʻoku toé, pea kuo nau fakamahuʻinga lahi ia, pea kuo nau fakaʻaongaʻi ia ki ha ngaahi meʻa lahi ange ʻi he meʻa ne nau mei maʻu ka ne taʻeʻoua ʻenau faitotonu ki he ʻEikí” (ʻi he Conference Report, Apr. 1912, 30).

Aleaʻi:ʻOkú ke pehē ʻoku tokoniʻi fēfē koe ʻi hono ʻuluaki totongi e vahehongofulú, ke ke fakaʻaongaʻi lelei ange ai ʻa e vahehongofulu ʻe hiva ʻoku toé mei he paʻanga ʻokú ke maʻú?

1. Liliu Hoʻo Founga ki Hono Levaʻi ʻo e Paʻangá

Lau:Koeʻuhí ke ke ʻuluaki totongi e vahehongofulú mo e ngaahi foakí, mahalo naʻa fie maʻu ke liliu hoʻo founga ki hono levaʻi ʻo e paʻangá. ʻOku faʻa uesia ʻe he ngaahi fakamole lolotonga ki he nofó hoʻo malava ke fakahū ha paʻanga talifaki ki he kahaʻú pea fokotuʻu mo ha maluʻi fakapaʻangá. ʻOku muimui ha kakai tokolahi ki he founga ko ʻení ʻi he fatongia tauhi paʻangá: ʻoku nau tomuʻa totongi ʻenau ngaahi fie maʻu vivilí, hangē ko e meʻakaí, falé, fefonongaʻakí, mo e tokangaekina ʻo e moʻuí, pea toki fakakaukau leva ke fakahū ha paʻanga talifaki mo totongi vahehongofulu ʻaki e toengá. ʻOku ʻoatu e foungá ni ʻi he fakatātā ko ʻení.

common approach graphic

Lau:Neongo ʻoku angamaheni ʻaki e founga ko ʻení, ka ʻoku ʻi ai ha founga lelei ange ki he fatongia tauhi paʻangá: Ko hoʻo maʻu pē hoʻo paʻanga hū maí, ʻuluaki totongi hoʻo vahehongofulú pea tuku mavahe leva ha paʻanga ki ho kahaʻú—tatau ai pē kapau ʻoku siʻisiʻi. Pea toki fakaʻaongaʻi leva ʻa e toengá (ko e konga lahi ia hoʻo paʻanga hū maí) ke totongi ʻaki e fakamole ki he nofó. ʻOku ʻoatu e foungá ni ʻi he fakatātā ʻi laló.

self-reliant approach graphic

Aleaʻi:Ko e hā ha ngaahi faikehekehe ʻi he ongo founga ko ʻení? Ko e hā ʻoku tokolahi ai e kakai ʻoku nau fakaʻaongaʻi ʻa e founga angamahení ʻi he fatongia tauhi ʻo e meʻa fakapaʻangá?

Lau:Te tau fakaʻaongaʻi ʻa e fakatātā ʻo e hina siā ʻi laló, mo ha fanga foʻi maka, mo e ʻoneʻone ke fakahaaʻi e fakapotopoto ʻo e ʻuluaki tuku mavahe ha paʻanga maʻá e ʻEikí pea mo hotau kahaʻú (vakai, Stephen R. Covey, A. Roger Merrill mo Rebecca R. Merrill, First Things First: To Live, to Love, to Learn, to Leave a Legacy [1994], 88–89).

ʻOku fakafofongaʻi ʻe he foʻi hina siaá ʻetau paʻanga hū maí: ko ha maʻuʻanga tokoni ʻoku fakangatangata hono lahí. ʻOku kehekehe ʻetau hina siā takitaha, ka ko e tefitoʻi moʻoni ʻoku fakamatalaʻi hení ʻoku tatau pē ki he tokotaha kotoa. ʻI he taimi ʻoku faʻo ai ki he foʻi siaá, ʻoku fakafofongaʻi ʻe he maká mo e ʻoneʻoné ʻa e ngaahi founga te tau lava ʻo fakaʻaongaʻi ai ʻetau paʻangá. ʻI he sīpinga ko ʻení, ʻoku fakafofongaʻi ʻe he fanga foʻi maka fōlalahí mo fōīkí ʻetau ngaahi meʻa mahuʻinga ʻi ha vahaʻa taimi lōloá—tuku mavahe ha paʻanga maʻá e ʻEikí mo hotau kahaʻú—pea ʻoku fakafofongaʻi leva ʻe he ʻoneʻoné ʻa ʻetau ngaahi fie maʻu mo e fakaʻamu he taimi ní.

Tau faʻo ʻa e ngaahi meʻa ko ʻení ki he foʻi hina siaá ʻo ngāue ʻaki ʻa e founga angamaheni ki he fatongia tauhi ʻo e meʻa fakapaʻangá.

common approach jars

Lau:Fakatokangaʻi ko e taimi ʻokú ke ʻuluaki lingi ai ʻa e ʻoneʻoné, ʻoku ʻikai ha feituʻu ʻe ʻatā ke hao kotoa ki ai e makamaká ki loto.

Tau fakaʻaongaʻi leva he taimí ni ʻa e founga tauhi ʻo e meʻa fakapaʻanga ʻi he moʻui fakafalala pē kiate kitá ke faʻo ʻaki e hina siaá.

self-reliant approach jars

Lau:Fakatokangaʻi kapau te ke ʻuluaki faʻo ʻa e makamaká, ʻoku kei ʻatā pē ha feituʻu ke hao kotoa ki ai ʻa e ʻoneʻoné.

Aleaʻi:ʻOku felāveʻi fēfē ʻa e fakatātā ko ʻeni ki he foʻi hina siaá mo e totongi vahehongofulú pea mo e fakahū ha paʻangá? Ko e hā naʻe hao kotoa ai ʻa e ʻū meʻá ʻi he founga hono uá? ʻOku hoko fēfē hono ʻuluaki faʻo ʻo e makamaká ki he foʻi hina siaá ko ha sīpinga ʻo e fakahaaʻi ʻo e tuí?

Lau:Te ke toutou ako ʻi he kalasi ko ʻení ki hono fakaʻaongaʻi e founga tauhi paʻanga ʻo e moʻui fakafalala pē kiate kitá. Neongo ʻe ngali faingataʻa ke muimui ʻi he founga ko ʻeni ʻo e moʻui fakafalala pē kiate kitá, ka ʻe tokoni ia ke ke mateuteu lelei ange ki he kahaʻú. ʻOku fakanatula pē ke te hohaʻa naʻa ʻikai lahi feʻunga e paʻangá ki he ngaahi fie maʻu lolotongá kapau te te ʻuluaki totongi vahehongofulu mo fakahū ha paʻanga. Ko hano siviʻi ia ʻo e tuí. Naʻe talaange ʻe ha pīsope fakapotopoto ki ha taha papi ului foʻou, “Kapau ko e ʻuhinga ʻo e ʻikai te ke totongi vahehongofulú ke totongi e vaí pe ko e ʻuhilá, totongi hoʻo vahehongofulú. Kapau ko e ʻuhinga ʻo e ʻikai te ke totongi vahehongofulú ke totongi ho falé, totongi hoʻo vahehongofulú. Pea kapau ko e ʻuhinga ʻo e ʻikai te ke totongi vahehongofulú ko e ʻikai te ke maʻu ha paʻanga feʻunga ke fafanga ho fāmilí, totongi hoʻo vahehongofulú. ʻE ʻikai liʻaki koe ʻe he ʻEikí” (ʻi he Aaron L. West, “Sacred Transformation,” Ensign, Dec. 2012, 38).

ʻI hoʻo muimuiʻi ko ia hoʻo ngaahi fakamolé, kuó ke ngali maʻu foki mo ha paʻanga hū mai. Fakakaukau ki he founga ʻokú ke lolotonga levaʻi ai hoʻo paʻangá mo e founga te ke lava ai ʻo fakaleleiʻi ke ke tomuʻa totongi hoʻo vahehongofulú pea mo ho kahaʻú. Ko e taha hoʻo ngaahi tukupā ʻi he uike ní, ke fakaʻaongaʻi e ngaahi tefitoʻi moʻoni ko ʻení pea hoko atu hono muimuiʻi hoʻo paʻanga hū maí mo hoʻo ngaahi fakamole he uike ní.

Neongo ʻoku fie maʻu ho tui kia Sīsū Kalaisí ʻi hoʻo fakaʻaongaʻi ʻa e founga tauhi paʻanga ʻo e moʻui fakafalala pē kiate kitá, ka ʻokú ne toe fie maʻu foki ke ngāueʻaki e ngaahi pōtoʻi ngāue fakapaʻanga ʻoku tāú. ʻI he uike kahaʻú, te ke kamata leva ke ʻilo kānokato ki hono fakaʻaongaʻi fakapotopoto e patisetí, ʻa ia ʻe tokoni ke ke mapuleʻi hoʻo fakamolé pea mo totongi hoʻo paʻangá ke totongi kotoa hoʻo ngaahi fakamolé.

Aleaʻi:ʻE liliu fēfē hoʻo moʻuí ʻi hono ʻuluaki totongi e vahehongofulú mo e fakahū ha paʻangá?

2. Totongi e Vahehongofulú mo e Ngaahi Foakí

Lau:Naʻe akoʻi ʻe Palesiteni James E. Faust ʻo e Kau Palesitenisī ʻUluakí, “ʻOku faingofua pē fono ʻo e vahehongofulú. ʻOku tau totongi ʻa e vahehongofulu ʻe taha ʻo ʻetau tupu fakafoʻituituí ʻi he taʻu. Kuo ʻosi fakaʻuhingaʻi ʻa e tupú ʻe he Kau Palesitenisī ʻUluakí ko e paʻanga hū mai. Ko e peseti ʻe 10 ʻo ʻetau paʻanga hū mai fakafoʻituituí ko e meʻa pē ia ʻatautolu pea mo hotau ʻOtuá. … Hangē ko e fakamatala ʻa ha papi ului ʻi Kōlea: ‘ʻI he vahehongofulú, ʻe tatau ai pē ia pe ʻokú ke koloaʻia pe masiva. … Kapau ʻokú ke maʻu ha paʻanga lahi, ʻokú ke totongi ʻa e peseti ʻe 10. Kapau ʻoku siʻisiʻi, ʻokú ke kei totongi pē peseti ʻe 10’” (“Opening the Windows of Heaven,” Ensign, Nov. 1998, 59).

Mamataʻi:ʻOku maʻu ʻa e vitiō “Uitou ʻo Salifatí [Widow of Zarephath]” ʻi he srs.lds.org/videos. (ʻIkai ha vitiō? Lau ʻa e peesi 49.)

Aleaʻi:Ko e hā naʻe foaki ai ʻe he uitou ʻo Salifatí ʻene meʻa fakaʻosí ki he palōfita ko ʻIlaisiaá? Naʻá ke mei lava nai ʻo fai pehē? Ko e hā te ke fai pehē pe taʻe fai pehē aí?

Lau:Naʻe ʻiloa ʻa e fono ʻo e vahehongofulú talu mei he ngaahi kuonga ʻo e Fuakava Motuʻá. ʻOku tau lau ʻi he tohi ʻa Malakaí, kapau te tau totongi ʻetau vahehongofulú, ʻe fakaava ʻe he ʻEikí ʻa e “ngaahi matapā ʻo e langí” maʻatautolu (vakai, Malakai 3:10).

Naʻe akoʻi ʻe ʻEletā David A. Bednar, “ʻOku fuʻu fakamaama ʻaupito ʻa e ʻīmisi ʻo e ‘matapā’ ʻo e langí ʻa ia naʻe fakaʻaongaʻi ʻe Malakaí. ʻOku fakaʻatā ʻe he matapaá ʻa e maama fakanatulá ke hū ki ha fale. ʻI he founga tatau pē, ʻoku huaʻi mai ʻa e maama mo e fakakaukau fakalaumālie ʻi he matapā ʻo e langí pea ki heʻetau moʻuí ʻi heʻetau tauhi e fono ʻo e vahehongofulú. … Mahalo te tau fie maʻu ha tokoni mo lotua ke maʻu ha ngāue maʻuʻanga moʻui feʻunga. … [ʻE lava ʻe he] meʻafoaki fakalaumālie ʻo e ʻatamai ʻiloʻiló … ʻo fakaivia kitautolu ke tau ʻiloʻi ʻa e ngaahi faingamālie ki he ngāué ʻa ia ʻe ʻikai fakatokangaʻi ʻe he kakai kehé. … Mahalo te tau holi mo ngāue totonu ke hiki ʻetau vahé ʻi heʻetau ngāue maʻuʻanga moʻuí ke tau tokonaki lelei ange ʻa e ngaahi fie maʻu ʻo e moʻuí. … [Pe ʻi ha ngaahi meʻa ʻe niʻihi] te tau fie maʻu mo ʻamanaki atu ki ha vahe lahi ange, ka ko e tāpuaki ʻoku tau maʻu ʻi he matapā ʻo e langí mahalo pē ʻe lahi ange ʻene malava ke liliu hotau tūkungá kae ʻikai ko ʻetau ʻamanaki ke hanga ʻe ha taha pe meʻa kehe ʻo liliu hotau tūkungá” (“Ko e Ngaahi Matapā ʻo e Langí,’ Ensign pe Liahona, Nōvema 2013, 18).

Aleaʻi:Ko e hā ha ngaahi founga kuo tataki ai koe ʻe he fakamaama fakalaumālié (pe fakahā fakafoʻituituí) ke liliu ho ngaahi tūkungá?

Ko e Fono ʻo e ʻAukaí

Lau:“Ko hono tauhi ʻo e ʻaho ʻaukai totonú ʻoku kau ai ʻa e ʻikai ke maʻu ha meʻatokoni mo ha inu ʻi ha houa-kai hokohoko ʻe ua ʻi ha vahaʻataimi ko e houa ʻe 24, kau ʻi he houalotu ʻaukai mo e fakamoʻoní, mo fai ha foaki ʻaukai lahi ke tokoni ʻi hono tauhi ʻo kinautolu ʻoku faingataʻaʻiá.” (Tohi Tuʻutuʻuni Fika 2: Ko Hono Puleʻi ʻo e Siasí [2010] 21.1.17).

ʻOku fakaʻaongaʻi ʻa e foaki ʻaukaí ke tokoniʻi ʻa kinautolu ʻoku paeá mo masivá. ʻE hanga ʻe he foaki ʻaukai lahí ʻo fakatupulaki ʻetau malava ke moʻui fakafalala pē kiate kitautolú.

Naʻe akoʻi ʻe ʻEletā Jeffrey R. Holland “ʻOku ou fakamoʻoni ki he ngaahi maná, fakalaumālie mo fakatuʻasino fakatouʻosi, ʻa ia ʻoku maʻu ʻe kinautolu ʻoku nau moʻui ʻaki e fono ʻo e ʻaukaí. … Fakamahuʻingaʻi muʻa e faingamālie toputapu ko iá he māhina kotoa pē, pea foaki lahi ʻi hoʻomou ʻaukaí pea mo e ngaahi foaki ʻofa fakaetangata, fakaako, mo fakaefaifekau kotoa pē ʻo fakatatau mo homou ngaahi tūkungá . ʻOku ou palōmesi atu ʻe ʻofa lahi ʻa e ʻOtuá kiate koe, pea ʻe ui ho hingoá ko e monūʻia ʻo lauikuonga, ʻe kinautolu ʻoku maʻu tokoni meiate koé” (“ʻIkai ko e Kau Kolekole Kotoa pē Kitautolu?” Ensign pe Liahona, Nōvema 2014, 42).

Aleaʻi:Ko e hā te ke lava ʻo fai ke fakalakalaka hoʻo ʻaukaí?

Aleaʻi ʻa e Vahehongofulú mo e Ngaahi Foakí ʻi Hoʻomou Fakataha Alēlea FAKAFĀMILÍ

Lau:Lolotonga hoʻomou fakataha alēlea fakafāmili ʻo e uike ní, aleaʻi hono ʻaonga ʻo e totongi vahehongofulú mo e tuku ha paʻanga ke fakahū ʻi he maʻu pē hoʻo paʻanga hū maí. Fakapapauʻi mo ho malí ʻa e founga ke fakalakalaka ai hoʻomo ʻaukaí.

Mahalo te mo fie fakaʻaongaʻi ʻa e “Sīpinga Fealēleaʻaki ʻi he Fakataha Alēlea Fakafāmilí” ʻi laló.

Sīpinga ʻo e Fealēleaʻaki ʻi he Fakataha Alēlea FAKAFĀMILÍ

Fakapapauʻi ke kamata mo fakaʻosi ʻaki ha lotu ke fakaafeʻi ʻa e Laumālié.

Konga 1: Toe Vakaiʻi

• ʻOkú ke totongi vahehongofulu kakato mo totonu?

• ʻOkú ke foaki ha paʻanga ʻaukai ʻoku lahi?

• ʻOku fēfē hoʻo muimuiʻi hoʻo paʻanga hū maí mo e ngaahi fakamolé (vakai, vahe 1)?

Konga 2: Palani

• Ko e hā te ke lava ʻo fai ke ke totongi kakato mo totonu ai ho vahehongofulú?

• ʻOkú ke pehē ko e hā ha foaki ʻaukai ʻoku lahí?

• Te ke fakatupulaki fēfē hoʻo ʻaukaí?

• Te ke lava fēfē ke ngāue ʻaki e founga tauhi paʻanga ʻo e moʻui fakafalala pē kiate kitá (vakai, peesi 39–40)?

ʻEkitivitī (miniti ʻe 10)

Tali moʻoni ʻa e ngaahi fehuʻi takitaha ko ʻení:

Ko e Hā ʻEku Ongoʻi ki he Aʻusia Ko ʻEní?	ʻIkai ʻaupito	Taimi pē ʻe niʻihi	Taimi lahi	Maʻu pē
ʻE lipooti ʻe he mēmipa kotoa ʻo e kulupú ʻa ʻene ngaahi tukupaá.	□	□	□	□
ʻOku kamata ʻemau kulupú ʻi he taimi pea fakaʻosi ʻi he taimi totonu.	□	□	□	□
ʻOku ou ongoʻi vāofi mo e kau mēmipa ʻo ʻeku kulupú.	□	□	□	□
ʻOku ou ongoʻi ʻa e Laumālié ʻi heʻemau ngaahi fakataha fakakulupú.	□	□	□	□
ʻOku vahevahe tatau pē e kau mai ʻa e tokotaha kotoa ʻi he kulupú.	□	□	□	□
ʻOku ou ongoʻi ʻoku ou fakalakalaka ki he moʻui fakafalala pē kiate kitá.	□	□	□	□
ʻOku ou ongoʻi ʻoku ʻofaʻi au ʻe he kau mēmipa ʻo ʻeku kulupú.	□	□	□	□

Aleaʻi:Ko e hā te tau lava ʻo fai ke fakaleleiʻi ai ʻetau aʻusia fakakulupú?

Naʻe MATUʻAKI Faingofua!

ʻI ha efiafi ʻe taha ʻi ʻapi naʻá ku fakapapau ai mo hoku uaifí ʻi he hili ha fakataha fakakulupu, ke ma kamata vaheʻi ha paʻanga ke fakahū kimuʻa peá ma toki totongi e ngaahi fakamole ki heʻemau nofó. Naʻe talanoa mo ha taha ʻi heʻemau kautaha kulētiti ʻiunioní [credit union] he ʻaho pē hono hokó, pea naʻa nau talaange te nau lava ʻo toʻo fakahangatonu ha konga ʻo ʻema vahe kotoa pē ki he ʻakauni sieké pea mo ha konga—ko e hā pē mahuʻinga te ma loto ki aí—ki he ʻakauni talifakí. ʻI he taimi ní, ko e taimi kotoa pē ʻoku ou vahe ai, ʻoku hū fakahangatonu pē ia ki ha ongo ʻakauni kehekehe. Naʻe mātuʻaki faingofua! Kuo hoko he taimí ni ʻa e fakahaofi ha paʻangá ko ha meʻa he ʻikai ke ma toe hela hono fakakaukauʻi!