Ngaahi Maʻuʻanga Tokoní
Ko e Founga ʻo e Silá
Ko e founga ʻo e sila paʻangá ʻoku faingofua: ko ʻene ʻosi pē hoʻo vahé, fakahū leva ʻa e lahi ʻo e paʻanga naʻe vaheʻi ke fakamole ki he tuʻunga takitaha he patisetí ki hono silá.
Hangē ko ʻení, tau pehē naʻá ke patiseti ʻa e 400 ki he “koloa meʻakaí” he māhiná ni. Ko e taimi te ke maʻu ai hoʻo vahe ki he māhiná pe ki he ngaahi uike siʻi ka hokó, fakahū (ʻa e paʻanga) ko iá ki he sila kuo ʻosi fakahingoa ko e “Ngaahi koloa meʻakaí.” He ʻikai ha paʻanga—pea ʻoku ʻuhinga moʻoni ʻeni he ʻikai ha paʻanga—ʻe toʻo mei he silá tuku kehe pē ke fakatau ʻaki ha meʻakai. Kapau te ke ʻalu ki he falekoloá peá ke fakatokangaʻi naʻe ngalo ʻa e silá ʻi ʻapi, foki ʻo ʻomi ʻa e silá! Hiki ha lekooti (ʻi ha kiʻi pepa tohi) ʻo e ngaahi fakamole kotoa pē, ke ke lava ʻo toki vakaiʻi ʻamui he lolotonga ʻo e fakataha alēlea fakafāmilí ke ne fakamanatu atu pe ʻoku ʻalu ki fē hoʻo paʻangá.
Fakahū ki ha sila ʻe taha ʻa e lahi kuo patiseti ki hoʻomou fefonongaʻakí. Te ke toʻo mei he sila ko ʻení, ʻo ka taau, ʻa e konga ʻoku fie maʻu ki he ngaahi fakamole ko iá pea muimuiʻi ʻa e fakamolé takitaha ʻi hoʻo kiʻi pepa tohí.
Vahevahe hoʻo patisetí ʻi he foungá ni: totongi fale nofoʻangá pe mōkisí ʻi he sila ʻe taha; vaí, ʻuhilá, mo e kasá ʻi he taha; vahehongofulú mo e ngaahi foakí ʻi he taha; meʻa fakafaitoʻó ʻi he taha; maluʻí ʻi he taha; pea pehē atu ai pē—ʻi honau ngaahi sila takitaha.
Ko e taimi kotoa pē ʻokú ke vahe aí, fakahū ʻa e lahi totonu ʻo hoʻo patiseti fakamāhiná ki he sila takitaha ke tatau ʻa e lahi fakakātoa ʻoku faʻo ki he sila takitaha mo e lahi naʻe ʻuluaki fokotuʻu ʻi he patisetí.
ʻOua naʻá ke fakamole ʻo laka hake ʻi he meʻa naʻá ke patisetí. Ko ʻene ʻosi pē silá, ko ʻene ʻosí ia! Kapau ko ha meʻa ia kuo pau ke ke fakamole lahi ange ai, ʻe pau ke ke toʻo ia mei ha sila ʻe taha. ʻI he ngaahi fuofua māhiná ʻe fie maʻu ai ke fai ha ngaahi feliliuaki. Lolotonga iá, ʻoku totonu ke ke maʻu ha ʻata totonu ange pe ʻoku feʻunga e fika ʻi hoʻo patisetí—te ke ʻilo ʻa e ʻavalisi totonú ʻi ha māhina nai ʻe ua.
ʻOku fakaʻaongaʻi ʻe ha niʻihi ia ʻa e founga ʻo e silá ki ha faʻahinga meʻa pē. ʻOku fakaʻaongaʻi ʻe ha niʻihi ʻa e founga fakapaʻanga ko ʻení ki he ngaahi meʻa ʻokú ne fakataueleʻi kinautolu ke nau fakamole lahi, pe ko ē ʻoku faingofua ke ʻikai toe lava ʻo muimuiʻi pe ʻikai toe mapuleʻí, hangē ko e meʻakaí, ngaahi falekaí, fakafiefiá, penisiní, mo e valá. Ka ʻi ai ha toenga, ʻoku totonu ke ʻave ia ki hoʻo meʻa fakapaʻanga ʻoku fakamuʻomuʻá.
Foki ki he peesi 77
Ngaahi Founga Fakakomipiutá
Kapau ʻoku fakataueleʻi koe ke ke fakamole lahi ange ʻi hoʻo sio ki he lahi ʻo e paʻangá, mahalo ko e fili lelei taha kiate koé ke fakaʻaongaʻi ha kaati fakamoʻua. Hangē ko e founga ʻo e sila paʻangá, ʻoku toho ʻa e kaati fakamoʻuá mei he paʻanga kuo ʻosi ʻi hoʻo ʻakauni pangikeé.
Ko e taimi ʻoku fakaʻaongaʻi ai ha kaati fakamoʻua, ʻoku mahuʻinga ke muimuiʻi hoʻo ngaahi fakamolé koeʻuhí he ʻoku ʻikai hangē ko e founga ʻo e sila paʻangá. ʻOku ʻikai ha vahevahe mahino ʻi he kaati fakamoʻuá ki he ngaahi patisetí. Te ke lava pē ʻo lekooti hoʻo ngaahi fakamolé ʻaki ha peni mo ha pepa pe ha telefoni toʻotoʻo pe komipiuta.
ʻOku lahi ha ngaahi polokalama ki he telefoni toʻotoʻó pe ngaahi meʻa fakaʻilekitulōnika toʻotoʻo kehé, ki hono levaʻi ʻo e meʻa fakapaʻangá. ʻE lava ʻe he ngaahi polokalama ko ʻení ʻo tauhi mo fokotuʻutuʻu e fakamatalá maʻau, pea ke toki hū ki ai ʻi hoʻo komipiuta ʻi ʻapí pe ngaahi meʻangāue fakaʻilekitulōnika kehé.
Fakamoleki ha taimi ʻi he uiké ni ke kumi ʻa e polokalama lelei taha ʻoku maʻu ʻi homou lea fakafonuá mo homou feituʻú, ʻo fakaʻaongaʻi ʻa e “money management” “personal finance tools” pe ko e “budgeting apps” ke kumi ʻaki. ʻOku lahi ha ngaahi polokalama lelei ʻaupito ʻoku taʻe-totongi pe maʻamaʻa ʻaupito.
Manatuʻi, ke tauhi ke malu hoʻo ngaahi fakamatala paʻangá, toki hū pē ki hoʻo ngaahi fakamatala paʻanga fakafoʻituituí mei he komipiuta pe telefoni pē ʻaʻaú, kae ʻikai mei ha komipiuta ki he kakaí.
Foki ki he peesi 78.