« Pene 3 : Tītau i te ’ite ’e ha’api’i i te ta’ata i te ’Evanelia a Iesu Mesia », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Tītau i te ’ite ’e ha’api’i i te ta’ata i te ’Evanelia a Iesu Mesia », ’Ia poro haere i tā’u nei ’Evanelia
Pene 3
Tītau i te ’ite ’e ha’api’i i te ta’ata i te ’Evanelia a Iesu Mesia
I roto i te mau ha’api’ira’a nō teie pene tē vai nei te ha’api’ira’a tumu, te mau parau tumu, ’e te mau fa’auera’a faufa’a roa o te ’evanelia a Iesu Mesia. Teie te mau ha’api’ira’a tā te mau peropheta ’e te mau ’āpōsetolo ora i fa’aue ia ’oe ’ia ’apo mai ’e ’ia ha’api’i atu. ’Ua fa’anahohia te reira i’ō nei ’ia ti’a ia ’oe ’ia tauturu ia vetahi ’ē ’ia māramarama maita’i i te ha’api’ira’a tumu a te Mesia.
Te tuha’a mātāmua i roto i teie pene ’o te anira’a ïa ’ia bāpetizo. I roto i te toe’a o te pene ’o teie ïa e maha ha’api’ira’a i muri nei :
’A tai’o i te mau pāpa’ira’a mo’a ’e ’a poihere i te ha’api’ira’a tumu i roto i te mau ha’api’ira’a tata’itahi. Mai te mea e nā reira ’oe, e fa’a’ite pāpū mai te Vārua i te parau mau ’o tā ’oe e ha’api’i ra. E tauturu mai ’oia ia ’oe ’ia ’ite i te mea e parau ’e te ’ohipa e rave nō te tauturu ia vetahi ’ē ’ia fa’ari’i i te ’itera’a pāpū nō te parau mau. (Hi’o Te Ha’api’ira’a Tumu ’e te mau Fafaura’a 84:45.)
E rahi atu ā tō rātou ’ite i te Fa’aora ’a rave ai rātou i te mea tāna i ani ia rātou ’ia rave. ’A tu’u i te tītaura’a manihini i roto i te ha’api’ira’a tāta’itahi ’e ’a tauturu i te ta’ata ’ia ha’apa’o i tā rātou parau fafau. ’Ia ha’apa’o ana’e te ta’ata i tā rātou mau parau fafau, e ha’amata ïa rātou i te ora i te ’evanelia a Iesu Mesia ’e e fa’aineine rātou i te rave i te mau fafaura’a ’e te Atua.
’A ha’api’i i te tā’āto’ara’a o te mau ha’api’ira’a nā mua ’e i muri a’e i te bāpetizora’a. Nā te mau misiōnare rave tāmau e fa’atere i te mau ha’api’ira’a i nā taime e piti. E ’āmui mai te mau misiōnare pāroita ’e ’aore rā te tahi atu mau melo mai te mea e nehenehe. Hi’o i te pene 10 ’e te 13 nō te mau ha’amāramaramara’a nō ni’a i te fa’aōra’a i te mau melo i roto i te mau ha’api’ira’a.
Fa’aineine i te ha’api’i i te ta’ata
’A fa’aineine ai ’oe i te ha’api’i i te ta’ata, ’a hi’o i te mau ha’amāramaramara’a o te ta’ata tāta’itahi i roto i te fa’aaura’a rorouira nō te ’Ia poro haere i tā’u nei ’Evanelia. ’A fa’aineine i te hō’ē fa’anahora’a ha’api’ira’a niuhia i ni’a i te mau hina’aro o te ta’ata. ’A feruri i te mea e ti’a iāna ’ia ’ite ’e ’ia fa’ari’i i roto i tā ’outou hāhaerera’a ha’api’ira’a. E fa’arahi te Vārua i tā ’outou mau tauto’ora’a ’a rave ai ’outou i te taime nō te fa’aineine ’e nō te fa’anaho.
Teie te tahi mau uira’a nō ’oe ’e nō tō ’oe hoa misiōnare e feruri māite nā roto i te pure ’a fa’aineine ai i te ha’api’i i te ta’ata.
-
E aha te tītaura’a manihini e fa’atae atu nō te tauturu i te ta’ata ’ia patu i tōna fa’aro’o i te Mesia ’e nō te haerera’a i mua ? Te mau tītaura’a manihini ’o te rāve’a ïa nō te tauturu i te mau ta’ata ’ia tātarahapa ’e ’ia ’ite i « te mana nō te Tāra’ehara » (Helamana 5:11). ’A hi’o i te haerera’a i mua o te ta’ata, tōna vaira’a ’e te mau mea e tītauhia nōna. I muri iho, ’a tu’u mai i te hō’ē tītaura’a manihini, ’e ’aore rā hau atu, i roto i tā ’oe fa’anahora’a ha’api’ira’a.
-
E aha te ha’api’ira’a tumu ’e te mau parau tumu e tauturu i te ta’ata ’ia ha’apa’o i te parau fafau tā tātou i ani ia rātou ’ia rave ? ’A fa’aoti maoti te pure e aha te ha’api’ira’a tumu ’e te mau parau tumu e tauturu i te ta’ata ’ia māramarama nō te aha e mea faufa’a ai nō rātou ’e nō te Fatu ’ia ha’apa’o rātou i tā rātou parau fafau.
-
Nāhea tātou i te tauturu i te ta’ata ’ia ha’api’i mai i te ha’api’ira’a tumu ? Nō te fa’aineine i te ha’api’i i te ha’api’ira’a tumu, nō te fa’anaho ’e nō te ha’apoto i te mea tā ’outou e ha’api’i i te ta’ata mai roto mai i te mau ha’api’ira’a 1–4. ’A hi’o e aha te mau uira’a, te mau pāpa’ira’a mo’a, te mau hi’ora’a, ’e te mau rāve’a ha’apararera’a tano ’o tē tauturu i te ta’ata ’ia māramarama i te mea tā ’oe e ha’api’i. Hi’o i te pene 10 nō te mau ha’amāramaramara’a nō ni’a i te ha’amaita’ira’a i tā ’oe ha’api’ira’a.
-
E aha te mau ha’amaita’ira’a tā te Atua i parau nō te ta’ata e fa’ari’i ’e e ha’apa’o i tāna mau parau fafau ? ’A ha’api’i ai ’oe i te ha’api’ira’a tumu, ’a hi’o e aha te mau ha’amaita’ira’a tā te Atua i parau fafau mai. ’Ia ha’api’i ana’e ’oe, ’a parau fafau i te mau ha’amaita’ira’a ’e ’a fa’a’ite pāpū nō te reira.
-
’O vai te mau melo e nehenehe e ’āmui mai ? I roto i te rurura’a fa’aaura’a tāhepetoma, ’a fa’aoti ’o vai te mau melo e nehenehe e tauturu ia ’oe ’ia ha’api’i ’e ’ia turu i te ta’ata. Hou i te ha’api’ira’a, ’a paraparau nō ni’a i te ’āmuira’a mai rātou. Hi’o i te pene 10.
-
E aha tā tātou e nehenehe e rave nō te tauturu i te ta’ata ’ia ha’apa’o i tā rātou parau fafau i te taime e vaiiho atu tātou ia rātou ? ’A ’āpe’e ia rātou maoti te tahi fārereira’a poto tāmahana, nō te tauturu i te ta’ata ’ia ha’apa’o i tā rātou parau fafau. ’A ’imi i te mau rāve’a nō te fa’aō mai i te mau melo nō te tauturu i te feiā tā ’outou e ha’api’i ra ’ia ha’apa’o i tā rātou parau fafau. I roto i taua fārereira’a ra, e nehenehe e tai’o i te hō’ē pene nō te Buka a Moromona ’e ’aore rā te tahi atu pāpa’ira’a mo’a. Mai te mea ’aita te hō’ē ta’ata e ha’apa’o ra i tāna parau fafau, e mea maita’i a’e ’ia tauturu iāna ’ia rave i te reira hou ’a tu’u ai i te tahi atu ā. Hi’o i te pene 11.
-
Nāhea tātou e tauturu atu ā ia rātou i muri mai ? ’Ia ’oti te taime ha’api’ira’a tāta’itahi, ’a feruri i te mea i tupu nō te feiā tā ’oe i ha’api’i. Tē tupu rahi ra ānei tō rātou fa’aro’o nō te Mesia ? Tē putapū ra ānei rātou i te Vārua ? Tē tātarahapa ānei rātou ma te rave ’e ma te ha’apa’o i te parau fafau ? Tē pure ra ānei rātou, tē tai’o ra ānei i te Buka a Moromona, ’e tē haere mai ra ānei rātou i te purera’a ? ’A fa’aineine i te tahi fa’anahora’a nō te tauturu ia rātou.
’A ha’api’i i te ta’ata ma tō ’oe ’ā’au, mai tei arata’ihia e te Vārua
I te tā’āto’ara’a o te mau taea’e misiōnare ’e te mau tuahine misiōnare, ’ua parau te Peresidenira’a Mātāmua ’e te Pupu nō te Tino ’Ahuru ma Piti ʼĀpōsetolo :
« Tā tātou fā ’o te ha’api’ira’a ïa i te parau poro’i o te ’evanelia tei fa’aho’i-fa’ahou-hia mai, i te huru rāve’a e ti’a ai i te Vārua ’ia arata’i i te mau misiōnare ’e te feiā e ha’api’ihia ra. E mea faufa’a ’ia ’apo mai i te mau atamanava o [te mau ha’api’ira’a], ’eiaha rā ’ia ha’api’ihia mai te hō’ē vauvaura’a tāmau ’ā’au. ’Ia ti’amā te misiōnare ’ia fa’a’ohipa i tāna iho mau parau ’ia au i te fa’aurura’a a te Vārua. ’Eiaha ’oia e parau noa i te parau tāmau-’ā’au-hia, e paraparau rā ’oia ma tōna ’ā’au ’e tāna iho mau parau. E nehenehe ’oia e ’ōpae i te ’āna’ira’a o te mau ha’api’ira’a, ma te hōro’a i te mea i fa’auruhia iāna ’ia rave, ’ia au i te ’ana’anatae ’e te mau hina’aro o te [ta’ata]. Ma te fa’ahiti i tōna iho ti’aturira’a ’e tāna iho mau parau, e ti’a iāna ’ia fa’a’ite i tōna ’itera’a pāpū i te parau mau o tāna mau ha’api’ira’a. »
’A ha’api’i ’e ’a tu’u i te tītaura’a manihini mai te au i te mau hina’aro tāta’itahi
Tei ia ’oe ra te mā’itira’a ’ia ha’api’i i te mau ha’api’ira’a i te huru rāve’a e tauturu i te ta’ata ’ia fa’aineine maita’i nō te bāpetizora’a ’e te ha’amaura’a. Te ha’api’ira’a tā ’oe e ha’api’i ’e te taime ’oe e ha’api’i, ’e te maorora’a o te reira, tei te huru mau ïa i te hina’aro o te ta’ata tā ’oe e ha’api’i ’e te arata’ira’a a te Vārua. ’Ei hi’ora’a, ’ia ha’api’i ana’e ’oe i te ta’ata e ’ere i te keresetiano, e ha’amata ’oe nā roto i te tauturura’a ia rātou i te fa’atupu i te hō’ē tū’atira’a ’e te Metua i te ao ra ’e te māramaramara’a i tāna fa’anahora’a (hi’o « Ha’api’i i te mau ta’ata e ’ere i te Keresetiano » i roto i te pene 10).
’A vaiiho i te Vārua ’ia arata’i ia ’oe i te mau tītaura’a manihini e tu’u atu ’e te taime e tu’u i te reira. E nehenehe te tītaura’a manihini tano i te taime tano e fa’auru i te ta’ata ’ia rave i te mau mea ’o tē patu i tō rātou fa’aro’o. E nehenehe i teie mau ’ohipa e arata’i i te hō’ē tauira’a rahi o te ’ā’au (hi’o Mosia 5:2 ; Alama 5:12–14).
’A ha’api’i i te ta’ata i te mau ha’api’ira’a ’ōhie ’e te māramarama ’e te poto. I te rahira’a o te taime, e’ita te hō’ē fārereira’a ha’api’ira’a e hau atu i te 30 minuti te maoro, ’e e nehenehe ’oe e ha’api’i i te hō’ē ta’ata i roto noa e 5 minuti.
Tei ’itehia nei, e tītauhia e rave rahi fārereira’a nō te ha’api’i i te mau parau tumu i roto i te hō’ē ha’api’ira’a. E ta’a maita’i a’e te ta’ata i tā ’oe parau poro’i mai te mea e ha’api’i ’oe i te ha’api’ira’a poto, e ha’api’i pinepine ’oe, ’e e ha’api’i ’oe i te mau tuha’a iti.
Heheura’a pāpa’ira’a mo’a
E aha tei fa’auruhia ia ’oe ’ia ha’api’i i te ta’ata ?
Nō te aha e mea faufa’a ai ’ia ha’api’i i te ha’api’ira’a tumu i roto i te mau ha’api’ira’a ?