« Pene 5 : Fa’a’ohipa i te mana o te Buka a Moromona », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 5 », ’Ia poro haere i tā’u Nei ’Evanelia

Pene 5

Fa’a’ohipa i te mana o te Buka a Moromona

’’A feruri na

Nāhea te Buka a Moromona i riro ai ’ei ’ōfa’i tumu nō tā tātou ha’apa’ora’a ?
Nō te aha e mana rahi tō te Buka a Moromona i roto i te ’ohipa nō te fa’afāriura’a ?
E aha tā te Buka a Moromona e ha’api’i nei nō ni’a ia Iesu Mesia ?
Nāhea vau i te fa’a’ohipa i te Buka a Moromona nō te tauturu iā’u ’e ia vetahi ’ē, ’ia ha’afātata atu ā vau i te Atua ?
Mea nāhea te Buka a Moromona e pāhono ai i te mau uira’a o te ’ā’au ?
Nāhea vau i te tauturu i te mau ta’ata ’ia tai’o ’e ’ia fa’ari’i i te ’itera’a pāpū nō te Buka a Moromona ?

Te Buka a Moromona, ’āpitihia ’e te Vārua, ’o tā ’oe ïa mauiha’a pūai roa a’e i roto i te fa’afāriura’a. E buka teie nō te fa’ati’ara’a tau tahito ’e te mo’a tei pāpa’ihia nō te ha’apāpū i te mau ta’ata ato’a ē ’o Iesu te Mesia (hi’o te ’Api upo’o parau o te Buka a Moromona). Mai tā te upo’o parau iti e fa’a’ite ra, « te tahi fa’ahou ’ite nō Iesu Mesia ». E fa’a’itera’a pāpū maita’i ato’a te reira ē, ’ua pi’i te Atua ia Iosepha Semita te peropheta ’e ’ua fa’aho’i-fa’ahou-mai i te ’evanelia a Iesu Mesia nā roto iāna.

Te Buka a Moromona ’o te ’ōfa’i tumu ïa nō tā tātou ha’apa’ora’a.

’Ua ha’apāpū Iosepha Semita ē, te Buka a Moromona ’o te « ’ōfa’i tumu nō tā tātou ha’apa’ora’a » (’ōmuara’a o te Buka a Moromona). I te tahi atu vāhi, ’ua parau ’oia : « ’A ’īriti i te Buka a Moromona ’e te mau heheura’a ’e, tei hea tā tātou ha’apa’ora’a fa’aro’o ? ’Aita hō’ē a’e tā tātou » (Te mau ha’api’ira’a a te mau peresideni o te ’Ēkālesia : Iosepha Semita [2007], 196).

Te hō’ē ’āpou o te hō’ē ïa huru hāmanira’a fare pautuutu tē vai ra te mau tuha’a tei tara’ihia mai te mau poro te tāhatuhia te tahi i ni’a i te tahi. Te tuha’a i rōpū, ’aore rā te ’ōfa’i tumu, e mea rarahi a’e ’oia i te tahi atu mau turu ’e e tāpe’a māite i te rahira’a.

’Ua parau te peresideni Ezra Taft Benson, te Buka a Moromona o te ’ōfa’i tumu ïa nō tā tātou ha’apa’ora’a fa’aro’o i roto i nā toru huru :

’Ite nō te Mesia. « Te Buka a Moromona ’o te ’ōfa’i tumu ïa nō tō tātou ’itera’a pāpū nō Iesu Mesia, ’o ’oia iho te ’ōfa’i tihi nō te mau mea ato’a tā tātou e rave nei. Tē fa’a’ite nei te reira i tōna vaira’a mau ma te pūai ’e ateate ».

Te ’īra’a o te ha’api’ira’a tumu. « Nā te Fatu iho i parau ē, tei roto i te Buka a Moromona te ‘’īra’a o te ’evanelia a Iesu Mesia’ [Te Ha’api’ira’a Tumu ’e te mau Fafaura’a 20:9 ; 27:5]. … I roto i te Buka a Moromona, e ’ite mai tātou i te ’īra’a o [te ha’api’ira’a tumu] e tītauhia nō tō tātou fa’aorara’a. ’E tē ha’api’i nei [te reira] ma te māramarama ’e te ’ōhie, ’ia nehenehe ato’a i te mau tamari’i ’ia ha’api’i mai i te mau ’ē’a nō te fa’aorara’a ’e te fa’ateiteira’a.

Te niu o te ’itera’a pāpū. « Mai te ’āpou ’o tē marua mai ’ia ’īriti-ana’e-hia te ’ōfa’i tāpe’a fana, mai te reira ato’a te tā’āto’ara’a o te ’Ēkālesia ’ia tāpe’a ’aore rā e marua mai te au i te parau mau o te Buka a Moromona […] Mai te mea e parau mau te Buka a Moromona […] e ti’a roa ’ia fa’ari’i i te mau ha’apāpūra’a o te Fa’aho’i-fa’ahou-ra’a ». (Te mau ha’api’ira’a a te mau peresideni o te ’Ēkālesia : Ezra Taft Benson [2014], 129, 131, 128.)

Te roa’ara’a te ’itera’a pāpū ē te Buka a Moromona e parau na te Atua, e nehenehe tātou e ’ite ē e peropheta Iosepha Semita. Nā roto iāna, ’ua fa’aho’ihia mai te mana o te autahu’ara’a o te Atua e te mau ve’a nō te ra’i mai. ’Ua fa’ati’a ato’a te Atua ia Iosepha Semita ’ia fa’anaho fa’ahou i te ’Ēkālesia a Iesu Mesia. Tē tāmau noa nei te heheura’a i teienei mahana nā roto i te mau peropheta ora.

E mea faufa’a roa te Buka a Moromona nō te fa’afāriura’a o te ta’ata iho

Hō’ē tuha’a faufa’a mau o te fa’afāriura’a ’oia ho’i te fa’ari’ira’a i te hō’ē ’itera’a pāpū nā roto i te mana o te Vārua Maita’i ē, e parau mau te Buka a Moromona. ’A tai’o ai ’e ’a ’imi ai ’oe ma te ’ā’au tae i te reira, e putapū ’oe i tō te reira mau parau ’ia fa’arahi i tō ’oe vaerua. E ha’amāramarama tāna mau parau i tō ’oe hāro’aro’ara’a o te orara’a nei, nō te ’ōpura’a a te Atua, ’e nō Iesu Mesia (hi’o Alama 32:28). ’A pure nō te buka ma te ’ā’au tae ’e te fa’aro’o i te Mesia. ’A nā reira ai ’oe, e fa’ari’i ’oe i te hō’ē ’itera’a pāpū nā roto i te Vārua Maita’i ē, e parau teie nā te Atua (hi’o Moroni 10: 4– 5).

E nehenehe tō ’oe iho ’itera’a pāpū o te Buka a Moromona e arata’i i te fa’aro’o hōhonu ’e e vai ’āueue ’ore i roto i tōna mana nō te tauturu ia vetahi ’ia fa’afāriuhia. Tauturu i te feiā tā ’oe e ha’api’i nei ’ia ’ite i te māramarama tā te reira e ha’aputapū mai ma te tai’ora’a i te reira ma te hina’aro mau. ’A ha’apāpū i tō te reira ’itera’a pāpū pūai nō Iesu Mesia. ’A fa’aitoito ia rātou ’ia pure nō te fa’ari’i i tō rātou iho ’itera’a pāpū ē, e parau mau te buka.

E fa’aitoito i te ta’ata ’ia ’imi i te ’itera’a pāpū nō ’ō mai i te Vārua Maita’i nō ni’a i te Buka a Moromona, ’o te reira fā tumu mau nō tā ’oe ha’api’ira’a. E nehenehe te Buka a Moromona e taui i tō rātou orara’a e a muri noa atu.

E fa’a’ohipa i te Buka a Moromona nō te ha’api’i i te ’evanelia a Iesu Mesia.

’Ua parau te peropheta Iosepha Semita, « te Buka a Moromona ’o te buka tano roa a’e ïa i roto i te mau buka ato’a i ni’a i te fenua nei » (’Ōmuara’a o te Buka a Moromona). Tē fa’a’ite pāpū nei ’oia nō te Mesia ’e e ha’api’i māramarama nei i tāna ha’api’ira’a tumu (hi’o 2 Nephi 31 ; 32:1–6 ; 3 Nephi 11:31–39 ; 27:13–22). Tē ha’api’i nei te reira i te ’īra’a o tāna ’evanelia. Te mau parau tumu mātāmua ’e te mau ’ōro’a o te ’evanelia, tei ha’api’ihia i roto i te Buka a Moromona ’o te ’ē’a ïa e haere atu i te hō’ē orara’a ’auhune.

E fa’a’ohipa i te Buka a Moromona ’ei rāve’a tumu nō te ha’api’i i te ’evanelia tei fa’aho’ihia mai. I roto i te tāpura i muri nei, ’ua tu’uhia i roto te tahi mau parau mau o te Buka a moromona ’o tā ’oe e ha’api’i atu.

Ha’api’ira’a misiōnare i roto i te pene 3	Ha’api’ira’a tumu	Fa’ahorora’a
Ha’api’ira’a misiōnare i roto i te pene 3 Te poro’i nō te fa’aho’i-fa’ahou-ra’a mai o te ’Evanelia a Iesu Mesia	Ha’api’ira’a tumu Te nātura o te Atua, te tāvinira’a a te Fa’aora ’e te Tāra’ehara, te tāivara’a, te fa’aho’i-fa’ahou-ra’a mai, Iosepha Semita, te ha’amanara’a o te autahu’ara’a	Fa’ahorora’a 1 Nephi 12–14 2 Nephi 3 ; 26–29 Mosia 2–5
Ha’api’ira’a misiōnare i roto i te pene 3 Te fa’anahora’a nō te fa’aorara’a a te Metua i te ao ra	Ha’api’ira’a tumu Te « fa’anahora’a rahi a te Atua mure ’ore », ’oia ato’a te hi’ara’a o Adamu ’e Eva, te tāra’ehara a Iesu Mesia, te ti’afa’ahoura’a, ’e te ha’avāra’a	Fa’ahorora’a 2 Nephi 2 ; 9 Mosia 3 ; 15–16 Alama 12 ; 34:9 ; 40–42
Ha’api’ira’a misiōnare i roto i te pene 3 Te ’Evanelia a Iesu Mesia	Ha’api’ira’a tumu Te fa’aro’o ia Iesu Mesia, te tātarahapa, te bāpetizora’a, te hōro’ara’a i te Vārua Maita’i, ’e te tāpe’a-māite-ra’a ē tae noa atu i te hope’a	Fa’ahorora’a 2 Nephi 31–32 3 Nephi 11 ; 27:13–22
Ha’api’ira’a misiōnare i roto i te pene 3 Te rirora’a ’ei pipi nā Iesu Mesia nō te orara’a tā’āto’a	Ha’api’ira’a tumu Te mau ’ōro’a mai te bāpetizora’a, te fa’atōro’ara’a i te autahu’ara’a, ’e te ’ōro’a mo’a	Fa’ahorora’a 3 Nephi 11:22–28 ; 18 Moroni 2–6

’Imira’a pāpa’ira’a mo’a

E aha tā te Fa’aora i parau nō ni’a i te Buka a Moromona ?

Tē fa’a’ite pāpū nei te Buka a Moromona nō te Mesia

Te fā tumu o te Buka a Moromona ’o tē fa’a’ite-pāpū-ra’a ïa nō Iesu Mesia. Tē ha’apāpū nei te reira i te vaira’a mau o tōna orara’a, tāna misiōni, tōna ti’afa’ahoura’a ’e tōna mana. Tē ha’api’i nei te reira i te ha’api’ira’a tumu nō ni’a i te Mesia ’e tāna Tāra’ehara.

E rave rahi peropheta tei fa’ahereherehia tā rātou mau pāpa’i i roto i te Buka a Moromona, tei ’ite mata roa atu i te Mesia. Te taea’e o Iareda, Nephi ’e Iakoba, ’ua ’ite mata i te Mesia hou ’oia ’a fānauhia mai ai. E nāho’a ta’ata tei reira rātou i te tau tāvinira’a a te Fa’aora i rotopū i te mau ’āti Nephi (hi’o 3 Nephi 11–28). I muri iho, ’ua ’ite mata Moromona ’e ’o Moroni i te Mesia tei ti’afa’ahou (hi’o Moromona 1:15 ; Etera 12:39).

’A tai’o ai ’e ’a pure ai te ta’ata nō te Buka a Moromona, e ’ite maita’i a’e rātou i te Fa’aora ’e e rave i te ’itera’a nō tōna here. E tupu rātou i te rahi i roto i tō rātou ’itera’a pāpū nōna. E ’ite mai rātou nāhea i te haere mai iāna ra ’e ’ia fa’aorahia. (Hi’o 1 Nephi 15:14–15.)

« Tē hōro’a nei te Buka a Moromona i te māramaramara’a hope roa a’e ’e te mana nō ni’a i te tāra’ehara a Iesu Mesia, ’o tē ’ore e ’itehia i te tahi atu vāhi. Tē ha’api’i nei te reira i te aura’a mau nō te fānau-fa’ahou-ra’a.… ’Ua ’ite tātou nō te aha tei te fenua nei tātou. Tē ha’api’i-mana-rahi-hia nei te reira mau parau, ’e tē vai atu ra, i roto i te Buka a Moromona, ’e ’ua ha’apāpū i te mana’o, hau atu i te tahi buka ’ē. Te ’īra’a o te mana o te ’evanelia a Iesu Mesia tei roto ïa i te Buka a Moromona » (Russell M. Nelson, « Te Buka a Moromona : E aha te huru tō ’outou orara’a ’āhani ’aita te reira ? » Liahona, Novema 2017, 62).

Ha’api’ira’a ta’ata hō’ē

I te roara’a o tā ’oe misiōni, ’a pāpa’i i te mau pāhonora’a i te mau uira’a i muri nei i roto i tā ’oe buka tāmahana :

E aha tā ’oe i ’apo mai nō ni’a ia Iesu Mesia nō roto mai i tā ’oe tuatāpapara’a i te Buka a Moromona ?
Mea nāhea tā ’oe tuatāpapara’a i te Buka a Moromona i te fa’aitoitora’a i tō ’oe ’itera’a pāpū nō Iesu Mesia ?
Nāhea ’oe e nehenehe ai e fa’a’ohipa i te Buka a Moromona, nō te tauturu i te ta’ata ia ha’apūai i tō rātou ’itera’a pāpū ?

’Imira’a pāpa’ira’a mo’a

E aha te mau tumu tā te mau peropheta o te Buka a Moromona i hōro’a mai nō te pāpa’ira’a i tā rātou pāpa’a parau ?

Ha’api’ira’a ta’ata hō’ē ’e ha’api’ira’a ’e te hoa misiōnare

’Ua pāpa’ihia te Buka a Moromona « ’ei fa’a’ite pāpū i te [ta’ata ato’a] ’o Iesu te Mesia » (’api upo’o parau o te Buka a Moromona). Te tāpura i muri nei, ’ua tu’uhia i roto te tahi mau pene o te Buka a Moromona ’o tē fa’a’ite pāpū nei i te orara’a, te mau ha’api’ira’a, ’e te misiōni a Iesu Mesia. ’A mā’iti i te mau tuha’a nō te tuatāpapa i te roara’a o tā ’oe misiōni.

Hau atu, e feruri ato’a i te mau hina’aro o te ta’ata tā ’oe e ha’api’i nei. ’A fa’anaho i te tai’o i te tahi o teie mau tuha’a ’e ’o rātou nō te ha’apūai i tō rātou māramarama ’e tō rātou ’itera’a pāpū nō te Fa’aora.

’Api upo’o parau ’e te ’ōmuara’a	’A fa’ata’a māramarama maita’i i te fā o te Buka a Moromona.
1 Nephi 10–11	Te fa’a’ite pāpū nei Lehi ’e ’o Nephi nō te Fa’aora.
2 Nephi 2 ; 9	Tē fa’a’ite pāpū nei Lehi ’e ’o Iakoba nō Iesu Mesia ’e tāna Tāra’ehara.
2 Nephi 31–33	Tē ha’api’i nei Nephi i te ha’api’ira’a tumu a te Mesia.
Mosia 2–5	Tē fa’a’ite pāpū nei te ari’i Beniamina nō te Mesia.
Alama 5 ; 7	Tē fa’a’ite pāpū nei Alama nō te Fa’aora.
Alama 36	’Ua ora Alama i te mana tāra’ehara a te Mesia.
3 Nephi 9–10	Tē ani nei te Fa’aora i te mau ta’ata ’ia haere iāna ra.
3 Nephi 11–18	Tē ha’api’i nei te Fa’aora i te mau ’ati Nephi nō te Metua ’e nō tāna ha’api’ira’a tumu.
3 Nephi 27	Tē ha’api’i nei te Fa’aora i tāna ʼevanelia.
Etera 12	Tē ha’api’i nei Etera ’e o Moroni ē, te fa’aro’o ia Iesu Mesia o te hō’ē ïa parau tumu nō te ’ohipa ’e te mana.
Moroni 7–8	Tē ha’api’i nei Moromona nō te here ateate o te Mesia ’e tāna tāra’ehara.
Moroni 10	Tē ani manihini nei Moroni i te tā’āto’ara’a ’ia haere mai i te Mesia ra ’e ’ia maita’i roa i roto iāna.

E tauturu te Buka a Moromona ia tātou ’ia ha’afātata atu i te Atua.

Nō ni’a i te Buka a Moromona, ’ua parau te peropheta Iosepha Semita ē, « e ha’afātata-rahi-hia a’e te hō’ē ta’ata i te Atua nā roto i te ha’apa’ora’a i te mau ha’api’ira’a nō taua buka ra i tō te tahi ’ē atu buka » (’ōmuara’a o te Buka a Moromona). Ma te ha’api’ira’a ’e te ani-manihini-ra’a tāmau i te ta’ata ’ia ora i te mau parau tumu o te Buka a Moromona, tē tauturu nei ïa ’outou ia rātou ’ia fa’ananea i te fa’aro’o ia Iesu Mesia ’e ’ia ha’afātata atu i te Atua.

E patu te Buka a Moromona i te ’itera’a pāpū ’e e fa’atupu i te heheura’a o te ta’ata iho. ’A fa’a’ohipa i te Buka a Moromona nō te tauturu i te ta’ata ’ia roa’a te ’itera’a pae vārua, te ’itera’a pāpū iho ā rā nō ’ō mai i te Vārua Maita’i ē, teie iho buka e parau ïa nā te Atua.

’A hōro’a ’ei ’ohipa mātāmua roa i te mau tuha’a o te Buka a Moromona, ’ia ha’api’i ana’e ’oe. E mana fa’afāriu tō rātou nā roto i te Vārua Maita’i. ’Ia ha’api’i ana’e ’oe i te ’evanelia ma te fa’a’ohipara’a i te Buka a Moromona, e tāvevo tā ’oe ha’api’ira’a ma te mana ’e te māramarama i roto i te ’ā’au ’e te ferurira’a.

’Ua ha’api’i te peresideni Gordon B. Hinckley ē, « te feiā ato’a tei tai’o [i te Buka a Moromona] ma te pure, te mea ’ona ānei ’aore rā te mea veve, tei roa’a te ha’api’ira’a ’aore rā ’aita, ’ua tupu ïa i te rahi i raro a’e i tōna mana ». ’Ua ha’api’i ato’a ’oia ē :

« Ma te fē’a’a ’ore, tē fafau atu nei au ia ’outou ē, mai te mea e tai’o ’outou i te Buka a Moromona ma te pure, noa atu te rahira’a taime tō ’outou tai’ora’a i te reira nā mua a’enei, e tomo mai te hō’ē fāito hau o te Vārua o te Fatu i roto i tō ’outou ’ā’au. E tae mai te hō’ē fa’aotira’a pūai nō te haere ma te ha’apa’o i tāna mau fa’auera’a, ’e e tae mai te ’itera’a pāpū pūai a’e nō tē orara’a mau o te Tamaiti a te Atua » (« The Power of the Book of Mormon [Te pūai o te Buka a Moromona] », Ensign, 1988, 6).

E pāhono nei te Buka a Moromona i te mau uira’a o te vairau

E nehenehe te tai’ora’a i te Buka a Moromona ma te arata’ihia e te Vārua e tauturu i te ta’ata ’ia fa’ari’i i te mau pāhonora’a ’aore rā i te mau mana’o i tā rātou iho mau uira’as—’aore rā te mau uira’a o te vairua. Tauturu i te ta’ata ’ia hi’o nāhea te mau ha’api’ira’a i roto i te Buka a Moromona i te pāhono i te mau uira’a o te orara’a.

Vetahi o teie mau uira’a ’ua tāpurahia i raro nei, ’āpe’ehia e te mau ’īrava fa’ahorora’a o te Buka a Moromona tāna e pāhono nei.

Tē vai mau ānei te Atua ? ’O vai te Atua ? (Mosia 4:9 ; Alama 18:24–40 ; 22:4–23 ; 30:44)
’Ua mātau ānei te Atua iā’u ’e tē ara nei ānei ’oia i ni’a iā’u ? Nāhea vau e putapū ai i tōna here ? Nāhea vau e ’ite ai ’ua piri roa atu vau iāna ? (2 Nephi 26:24 ; Mosia 4:9–12 ; Enosa 1:1–12 ; Alama 18:32 ; Moroni 10:32–33)
E aha te fā o te orara’a ? (2 Nephi 2:25 ; Alama 34:32)
Nō te aha e mea pa’ari te orara’a i te tahi taime ? Nāhea vau e ’ite ai i te pūai i roto i te mau taime fifi ? (1 Nephi 17:3 ; 2 Nephi 4:20–21 ; Alama 36:3 ; Etera 12:27)
Nāhea vau e ’ite ai i te hau i te mau taime hepohepo ? (Mosia 24:13–15 ; Helamana 5:47)
Nāhea e nehenehe ai iā’u ’ia ’oa’oa rahi atu ā ? (Mosia 2:41 ; Alama 22:15–16)
Nāhea vau e nehenehe ai e riro ’ei ta’ata maita’i a’e ? (Mosia 26:30–31 ; Alama 5:12–13 ; 7:23–24 ; Etera 12:27)
Nāhea vau e ’ite ai i te fa’a’orera’a hara a te Atua ? (Enosa 1:2–8 ; Alama 36:17–21)
E aha te mea e tupu i muri a’e i te pohe ? (2 Nephi 9:3–6, 11–13 ; Alama 11:42–44 ; 40:11)

E hōro’a ato’a mai te Buka a Moromona i te arata’ira’a nō ni’a i te tahi atu mau uira’a faufa’a roa mai teie :

Nāhea vau i te ha’amaita’i i te au maita’i pae vārua o tō’u ’utuāfare ? (1 Nephi 1:1 ; 8:36–38 ; Mosia 2:5–6 ; 4:14–15 ; 3 Nephi 18:21)
Nāhea vau i te tauturu i tā’u mau tamari’i ’ia roa’a mai te pūai nō te pāto’i i te fa’ahemara’a ? (1 Nephi 15:23–25 ; Helamana 5:12 ; 3 Nephi 18:15, 18–21, 24–25)
Nāhea te ha’apa’ora’a i te mau fa’auera’a a te Atua i te tauturu iā’u ’ia roa’a te hō’ē orara’a ’oa’oa a’e, ’e te auhune a’e ? (2 Nephi 2:25–28 ; 4:35 ; Mosia 2:41 ; 4 Nephi 1:15–18)

« E ti’a i te mau misiōnare ’ia ’ite maita’i i te fa’a’ohipa i te Buka a Moromona nō te pāhono i tā rātou iho mau uira’a, ’ia ti’a ia rātou i te fa’a’ohipa i te reira ma te ’aravihi nō te tauturu ia vetahi ’ē ’ia ha’api’i mai ’ia rave ato’a mai te reira. … E ti’a ia rātou ’ia fa’ariro i te mana o te Buka a Moromona ’ei tuha’a nō rātou iho i roto i te ha’api’ira’a i te ’evanelia i fa’aho’ihia mai, a tahi, te fa’a’ohipara’a i te reira i roto i tō rātou orara’a ’e i muri iho, te fa’a’itera’a i te reira i te feiā tā rātou e ha’api’i ra » (Dallin H. Oaks, « Counsel for Mission Leaders », seminar for new mission leaders [Rurura’a nā te feiā fa’atere misiōni ’āpī], 25 nō Tīunu 2022).

Ha’api’ira’a ta’ata hō’ē ’e ha’api’ira’a ’e te hoa misiōnare

Tāpura i te mau uira’a nō te vairua tā ’oe e vai ra ’aore rā tā ’outou i fa’aro’o nā roto mai ia vetahi ’ē. ’Ite mai i te mau ’īrava i roto i te Buka a Moromona ’o tē tauturu i te pāhono i te reira mau uira’a. Pāpa’i i te mau mana’o ’e te mau fa’atorora’a o te Buka a Moromona i roto i tā ’outou buka tāmahana. Fa’a’ohipa i te reira ’a ha’api’i ai ’outou.

Tē turu nei te Buka a Moromona ’e te Bibilia i te tahi ’e te tahi.

’Ua parau te Fatu « ’ia ha’api’i i te mau parau tumu nō tā’u nei ’evanelia, ’o tei fa’a’itehia i roto i te Bibilia ’e te Buka a Moromona, ’e tei roto ho’i i te reira te ’īra’a o te ’evanelia » (Te Ha’api’ira’a Tumu ’e te mau Fafaura’a 42:12). Tē ti’aturi nei te feiā mo’a i te mau mahana hope’a nei ē, « te Bibilia ra o te parau ïa a te Atua, ’ia ti’a te ’īritira’ahia » (Te mau Hīro’a fa’aro’o 1:8 ; hi’o ato’a 1 Nephi 13:29). E pāpa’ira’a mo’a te Bibilia. E hoa pāpa’ira’a mo’a te Buka a Moromona tei roto te ’īra’a o te ’evanelia a Iesu Mesia.

E fa’arahope te Bibilia ’e te Buka a Moromona ’e e fa’a’ona i te tahi ’e te tahi (hi’o Ezekiela 37:16–17 ; 1 Nephi 13:40 ; Moromona 7:8–9). Nā buka e piti o te pāpa’ira’a mo’a e mau putu parau ïa nō te mau ha’api’ira’a tei pāpa’ihia e te mau peropheta nō te ’anotau tahito. Tē fa’ati’a nei te Bibilia i te mau tupura’a ’ohipa a te Atua ’e te nūna’a nō te mau pae hitia’a o te ra o te ao nei, e rave rahi tauatini matahiti i ma’iri i teienei. Tē fa’ati’a nei te Buka a Moromona te tupura’a ’ohipa a te Atua ’e te nūna’a nō te fenua Amerika tahito ’ua hau atu i te hō’ē tauatini matahiti.

ta’ata e fa’a’ū ra i te mau pāpa’ira’a mo’a

Te mea faufa’a atu ā, tē fa’a’ite hope nei te Bibilia ’e te Buka a Moromona i roto i te ’itera’a pāpū te tahi i te tahi nō Iesu Mesia. Tē fa’ati’a nei te Bibilia i te ’ā’amu nō te fānaura’a o te Fa’aora, tāna misiōni i te tāhuti nei, ’e te Tāra’ehara––’oia ato’a i tōna pohera’a ’e te Ti’afa’ahoura’a. Tei roto i te Buka a Moromona te mau tohura’a nō te fānaura’a o te Fa’aora ’e tāna misiōni, te mau ha’api’ira’a nō ni’a i tāna Tāra’ehara, ’e te ’ā’amu nō tāna tāvinira’a i te fenua Amerika. Tē ha’apāpū nei te Buka a Moromona ’e tē fa’a’ā’ano nei i te ’itera’a pāpū o te Bibilia ē, ’o Iesu ana’e te Tamaiti Fānau Tahi a te Atua ’e te Fa’aora o te ao nei.

Tē ha’api’i nei rāua to’opiti te Bibilia ’e te Buka a Moromona i te ture nō te mau ’ite : « tei te vaha o nā ’ite to’opiti ’e e to’otoru ra e riro ai te mau mea ato’a na ’ei parau mau » (2 Korinetia 13:1 ; hi’o ato’a 2 Nephi 11:2–3). ’Ia au i teie ture, tē fa’a’ite pāpū nei nā buka pāpa’ira’a mo’a to’opiti nō Iesu Mesia (hi’o 2 Nephi 29:8).

Ha’api’ira’a ta’ata hō’ē ’e ha’api’ira’a ’e te hoa misiōnare

’Ite mai i te mau ’īrava fa’atoro nō ni’a i te mau tumu parau i muri nei i roto i te Buka a Moromona ’e te Bibilia. ’Ua hōro’ahia te mau hi’ora’a i roto i te mau pāruru i muri a’e i te tumu parau tāta’itahi. ’A tu’u mai i tā ’oe iho mau ’īrava ’e te mau tumu parau.

Peropheta (Iakoba 4:4–6 ; Amosa 3:7)
Tāivara’a (2 Nephi 28 ; 2 Timoteo 4:3–4)
Fa’aho’i-fa’ahou-ra’a mai (1 Nephi 13:34–42 ; Te ’Ohipa 3:19–21)
E mau tamari’i tātou pā’āto’a nā te Atua (1 Nephi 17:36 ; Te ’Ohipa 17:29)

Tauturu i te ta’ata ’ia tai’o ’e ’ia hāro’aro’a i te Buka a Moromona

Te feiā tei ’ore i tai’o ’aore rā tei ’ore i māramarama i te Buka a Moromona, e fifi rātou nō te fa’ari’i i te hō’ē ’itera’a pāpū nō te parau mau o te reira. E nehenehe ’oe e tauturu ia rātou ’ia hāro’aro’a i te buka ma te tai’ora’a nā muri ia rātou. Tai’o i roto i te taime fārereira’a ha’api’ira’a, i te taime hāhaerera’a e fārerei, ’aore rā nā roto te ihi anoa ha’a. E nehenehe ato’a ’oe e fa’anaho i te mau melo ’ia tai’o nā muri ia rātou. E tauturu ato’a te māta’ita’ira’a i te hō’ē video nō te Buka a Moromona, i muri iho e tai’o i te mau pene e tū’ati.

E pure nō te fa’ari’i i te tauturu ’a mā’iti ai ’oe i te mau tuha’a e pāhono i te mau mana’ona’ora’a ’e i te mau hina’aro o te ta’ata. Tai’o ’e e ’āparau i te mau tuha’a poto noa, mai te 1 Nephi 3:7 ’aore rā Mosia 2:17. Tai’o ’e e ’āparau ato’a i te mau tuha’a roa ri’i a’e ’aore rā mau pene tā’āto’a, mai te 2 Nephi 31, Alma 7, ’aore rā 3 Nephi 18. ’A fa’aitoito i te ta’ata ’ia tai’o i te Buka a Moromona, mai te ha’amatara’a mai, ’oia ato’a te mau ’itera’a pāpū nō nā toru ’e e va’u ’ite ’e te ’itera’a pāpū o te peropheta Iosepha Semita.

’A feruri i te mau mana’o tauturu i muri nei ’a tai’o ai ’oe i te Buka a Moromona ’e te ta’ata :

Pure hou ’a tai’o ai. Ani i te tauturu ’ia māramarama. Pure ’ia fa’a’ite pāpū te Vārua Maita’i ia rātou ē, e parau mau te reira.
Tai’o hō’ē i muri mai i te tahi. Tai’o ma te hō’ē terera’a ’eiaha rātou ’ia fifi. Fa’ata’a maita’i i te mau ta’o ’e te mau pereota mātau-’ore-hia.
E fa’aea ma’a taime iti nō te ’āparau i ni’a i te mea e tai’ohia ra.
’A fa’ata’a i te vāhi ’e te tupura’a o te ’ā’amu o te tuha’a, mai teie te huru, ’o vai tē paraparau nei, mai te hea te huru o te ta’ata, ’e e aha te tupura’a o te ’ohipa. Mai te peu tē vai ra te hō’ē video nō te Buka a Moromona e au i te paraparaura’a, ’a fa’a’ite atu i te reira.
’A ha’apāpū i te mau parau poro’i ’aore rā mau ha’api’ira’a tumu niu nō te mā’imi mai.
Fa’a’ite i tō ’oe iho ’itera’a pāpū ’e te mau mana’o tano, te mau nino’a mana’o ’e te mau ’ohipa i tupu nō ’oe iho.
Ha’api’i ’āfaro i te ha’api’ira’a tumu nō roto mai i te mau parau a te mau peropheta nō te Buka a Moromona. E tauturu te reira ia rātou ’ia putapū i te mana pae vārua o te buka.
’A tauturu i te ta’ata « ’ia fa’aau » i mea tā rātou e tai’o nei i tō rātou iho orara’a (1 Nephi 19:23). Tauturu ia rātou ’ia hi’o, nāhea te pāpa’ira’a mo’a e tū’ati ai ia rātou iho.

’A fa’a’ohipa ai ’oe i teie mau parau tumu, e tauturu ’oe i te mau ta’ata ’ia fa’ananea i te ’aravihi ’e te hina’aro mau ’ia tai’o i te Buka a Moromona nō rātou iho. ’A ha’apāpū ē, te tai’ora’a i te buka i te mau mahana ato’a e tāviri ïa nō te haere ti’a atu i mua i te bāpetizora’a ’e i te fa’afāriura’a tau maoro.

Tūru’i i ni’a i te fafaura’a i roto te Moroni 10:3–5. E fa’aitoito i te ta’ata ’ia tai’o i te Buka a Moromona ma te hina’aro mau ’e ’ia pure ma te ’ā’au tae nō te ’ite ē, e parau mau ānei te reira. ’A fa’ata’a ē, te aura’a ma te ’ā’au tae, ’ia ineine ïa nō te ha’a mai te au i te pāhonora’a tei fa’ari’ihia nā roto mai i te Vārua Maita’i. Te ta’ata ato’a e tai’o ma te hina’aro mau ’e te pure ma te ’ā’au tae nō te Buka a Moromona, e nehenehe e ’ite i te parau mau o te reira nā roto i te mana o te Vārua Maita’i.

E ti’a ato’a ia ’oe e fa’a’ohipa pinepine i teie fafaura’a nō te ha’apūai i tō ’oe iho ’itera’a pāpū nō te Buka a Moromona. E hōro’a mai tō ’oe ’itera’a pāpū i te ha’apāpūra’a ē, te feiā e fa’a’ohipa i teie fafaura’a e fa’ari’i ïa rātou i te ’itera’a pāpū ē, e parau a te Atua te buka.

Fa’a’ohipa i te Buka a Moromona i roto i te mau tuha’a ato’a o tā ’oe ’ohipa.

Te Buka a Moromona ’o te hō’ē ïa puna pūai mau nō te fa’afāriura’a. ’A fa’a’ohipa i te reira ’ei rāve’a tumu nō te ha’api’i i te parau mau i fa’aho’ihia mai. ’Ua parau te peresideni Russell M. Nelson :

« E ’ohipa mana rahi e tupu ’ia ’imi te hō’ē tamari’i nā te Atua ’ia ’ite rahi atu ā nō ni’a iāna ’e tāna Tamaiti here. ’Aita atu e vāhi i ha’api’i-māramarama-hia ’e i ha’api’i-mana-rahi-hia te reira mau parau mau, maori rā i roto i te Buka a Moromona […]

« ’Ia feruri au i te Buka a Moromona, tē feruri rā vau i te ta’o mana. Te mau parau mau o te Buka a Moromona e mana tōna nō te fa’aora i te ma’i, nō te tāmāhanahana, nō te fa’aho’i mai, nō te aupuru, nō te ha’apūai, nō te fa’anā ’e nō te fa’a’oa’oa i tō tātou vairua ».(« Te Buka a Moromona : E aha te huru tō ’outou orara’a ’āhani ’aita te reira ? » 61, 62).

’Ia tai’o ana’e ’oe i te Buka a Moromona ’e te ta’ata, ’a fa’a’ite i tō ’oe ’itera’a pāpū nō te mana pae vārua tā ’oe i putapū ’a tai’o ai ’oe i te reira. Ha’apāpū i ni’a i te faufa’a rahi o te ’itera’a pāpū nō Iesu Mesia ’e tāna Tāra’ehara. Fa’a’ite i te mau ’īrava ’o tē nehenehe e tauturu i te ta’ata ’ia putapū i te here o te Fa’aora. Tauturu ia rātou ’ia ’ite nāhea rātou ’ia ’ite maita’i a’e i te Fa’aora i roto i teie mau ’api.

Tai’o te mau ’īrava ’o tē fa’ateitei ’e ’o tē ha’apūai i te ta’ata. Fa’atumu i ni’a i tō rātou mau hina’aro. Fa’a’ite i te tahi mau hi’ora’a, e mea nāhea te mau ha’api’ira’a i roto i te Buka a Moromona e pāhono i tō ’oe orara’a i teie mahana.

’A ha’amana’o

Te Buka a Moromona ’o te ’ōfa’i tumu ïa nō tō tātou ’itera’a nō te Mesia, nō tā tātou ha’api’ira’a tumu, ’e nō tō tātou ’itera’a pāpū.
Tē ha’api’i māramarama nei te Buka a Moromona i te ha’api’ira’a tumu e vai ra i roto i te mau ha’api’ira’a misiōnare.
E pāhono te Buka a Moromona i te mau uira’a a te vairua ta’ata.
E tai’o pinepine i te Buka a Moromona nā muri i te ta’ata tā ’oe e ha’api’i nei. ’A tauturu ia rātou ’ia tai’o rātou iho i te mau mahana ato’a ’e ’ia fa’a’ohipa i te mea tā ’outou e tai’o nei.
’A ti’aturi i te fafaura’a a te Fatu ē, te ta’ata e tai’o ’e e pure ma te ’ā’au tae nō te Buka a Moromona, e ’ite i tōna parau mau nā roto i te Vārua Maita’i.

Mana’o nō te ha’api’i ’e nō te ravea

Ha’api’ira’a ta’ata hō’ē

Tai’o 2 Nephi 2 ; 9 ; 30 ; 31 ; 32. Fa’arēni i te fa’ahorora’a tāta’itahi nō ni’a ia Iesu Mesia. Hāmani i te hō’ē tāpura nō te mau i’oa ta’a ’ē ’e te mau pi’ira’a o te Mesia i roto i teie mau pene. Tāpa’o i tāna mau parau i fa’ahiti. Ha’afaufa’a i tōna mau huru ’e tāna mau ’ohipa.
’A tai’o ai ’oe i te mau mahana ato’a i te Buka a Moromona, ’a pāpa’i i roto i tā ’oe buka tāmahana i te mau ’īrava e mea faufa’a ta’a ’ē nō ’oe. Pāpa’i nāhea ’oe i te fa’a’ohipa i te reira i roto i tō ’oe iho orara’a.
Pāpa’i i roto i tā ’oe buka tāmahana i te mea tā ’oe i putapī i te taime mātāmua ’oe ’a fa’ari’i ai i te hō’ē ’itera’a pāpū pae vārua ē, e parau mau te Buka a Moromona.
Pāpa’i i nā uira’a e toru i muri nei i roto i tā ’oe buka tāmahana. I te roara’a o tā ’oe misiōni, ’a tu’u i te mau pāhonora’a i teie mau uira’a.
- Mai te aha tō’u orara’a ’aita ana’e te Buka a Moromona ?
- E aha te mea e’ita vau e ’ite ’aita ana’e te Buka a Moromona ?
- E aha te mea e’ita e roa’a iā’u ’aita ana’e te Buka a Moromona ?
Tai’o i te ha’api’ira’a i ni’a i te mou’a i roto te Mataio 5–7 ’e te ha’api’ira’a a te Mesia i te hiero i roto te 3 Nephi 12–14. Nāhea te tai’o-’āmui-ra’a i te reira i te tauturu iā’u ’ia māramarama maita’i a’e i te mau ha’api’ira’a a te Fa’aora ?
’A tuatāpapa i te mau hi’ora’a ato’a o te Buka a Moromona nō ni’a i te ta’ata e pure rā. I roto i tā ’oe buka tāmahana, ’a pāpa’i i te mea tā ’oe i ’apo mai nō ni’a i te pure i roto i te Buka a Moromona.
Nā roto mai i te pene o mau upo’o parau o te Mosia 11–16, ’a pāpa’i i te hō’ē ha’apotora’a nō te mea tā Abinadi i ha’api’i. ’Ia oti, e tai’o i teie mau pene ’e ’a fa’ananea atu ā i tā ’oe ha’apotora’a.
Nā roto mai i te pene o mau upo’o parau o te Mosia 2–5, ’a pāpa’i i te hō’ē ha’apotora’a nō te mea tā te ari’i Beniamina i ha’api’i. ’Ia oti, e tai’o i teie mau pene ’e e fa’ananea atu ā i tā ’oe ha’apotora’a.

Ha’api’ira’a ’e te hoa misiōnare, ’e tāuiuira’a hoa

Tai’o ’āmui i te mau tuha’a o te Buka a Moromona. Fa’a’ite i te mea tā ’outou i ’apo mai ’e i putapū. ’Āparau nāhea ’outou i te fa’a’ohipa i te reira i roto i tō ’outou orara’a.
Tai’o ’āmui te Alama 26 ’e te 29. Fa’a’ite i tō ’outou mana’o nō ni’a i tā ’outou misiōni. Pāpa’i i tō ’outou mau nino’a mana’o i roto i tā ’outou buka tāmahana.
Tai’o Alama 37:9 ’e e tau’aparau nō te faufa’a rahi mau o te mau pāpa’ira’a mo’a nō Amona ’e tōna mau hoa misiōnare. ’Ite mai i te mau fa’ahorora’a e fa’ata’a nei mea nāhea rātou i te fa’a’ohipara’a i te mau pāpa’ira’a mo’a.
Tai’o Alama 11–14, hō’ē i roto ia ’outou e ha’uti i te ti’ara’a o Alama ’aore rā o Amuleka, ’e te tahi atu e ha’uti i te ti’ara’a o te mau ta’ata ’ino. Tau’aparau nāhea teie mau misiōnare i te pāhonora’a i te mau uira’a fifi.

’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni

Ha’api’ipi’i i te fa’a’ohipa i te Buka a Moromona i roto i te mau rāve’a i fa’ahitihia i roto i te upo’o parau tumu o teie pene.
’A tāpura i te mau uira’a i hiti mai nā roto mai i te feiā tā ’outou e ha’api’i nei. ’A fa’ata’a tāta’itahi i te reira, nāhea ’outou i te pāhonora’a i teie mau uira’a ma te fa’a’ohipa i te Buka a Moromona.
Tai’o ’āmui i te mau tuha’a o te Buka a Moromona. Fa’a’ite i te mau ’itera’a, te nino’a mana’o ’e te ’itera’a pāpū.
Ha’api’ipi’i i te fa’a’ohipa i te Buka a Moromona nō te ha’apāpūra’a i te parau poro’i nō te Fa’aho’i-fa’ahou-ra’a mai.
E ani i te mau misiōnare ’ia fa’a’ite mai i te mau ’itera’a, nō roto i te reira ’ua tauturu te Buka a Moromona ia rātou ’oia ato’a te feiā tā rātou e ha’api’i nei, i roto i te ’ohipa o te fa’afāriura’a.
E ani te mau misiōnare ’ia fa’a’ite mai i te hō’ē pāpa’ira’a mo’a o te Buka a Moromona au-roa-hia, ’o tei tauturu i te pāhonora’a i te hō’ē uira’a o te vairua.
E ani i te hō’ē melo fa’afariuhia ’ia fa’a’ite mai i te ti’ara’a o te Buka a Moromona i roto i tōna fa’afāriura’a.

Feiā fa’atere misiōni ’e nā tauturu misiōni

Ha’api’i i te mau misiōnare nāhea ’ia fa’a’ohipa i te Buka a Moromona nō te ha’apāpū i te parau mau o te parau poro’i o te Fa’aho’i-fa’ahou-ra’a mai.
Tai’o 1 Nephi 1 ’e te mau misiōnare ’e ’a fa’aau i te reira ’e te ’itera’a o Iosepha Semita.
’Ōpere i te mau misiōnare i te hō’ē nene’i hōho’a ’āpī o te Buka a Moromona. E ani ia rātou ’ia tai’o ’e ’ia tāpa’opa’o i roto i te buka e piti taime i roto i nā tau tauira’a e piti ’aore rā e toru i muri nei.
- I roto i te tai’ora’a mātāmua, e ani ia rātou ’ia tāpa’o i te mau vāhi e fa’atoro ’aore rā e fa’a’ite pāpū nei nō Iesu Mesia.
- I roto i te tai’ora’a piti, e ani ia rātou ’ia tāpa’o i te mau parau tumu ’e te mau ha’api’ira’a tumu o te ’evanelia.
E ani i te mau misiōnare ’ia fa’a’ite mai i te mea tā rātou i ’apo mai ’e i putapū. ’Ua faʼata’a mai Elder Ronald A. Rasband nāhea teie tai’ora’a i te Buka a Moromona i te ha’aputapūra’a iāna ’ei misiōnare :

« E hau atu tā’u tai’ora’a i te tāpa’opa’ora’a noa i te mau ’īrava. Ma te tai’ora’a tāta’itahi o te Buka a Moromona, mai te ha’amatara’a e tae atu i te hope’a, ’ua fa’a’īhia vau i te here hōhonu nō te Fatu. ’Ua putapū vau i te ’ite nō te parau mau o tāna mau ha’api’ira’a tei a’a hōhonu roa i roto iā’u, nā reira ato’a te tano o te reira nō « teie nei mahana ». ’Ua tano roa te upo’o parau o teie buka : ‘Te tahi fa’ahou ’ite nō Iesu Mesia.’ Nā roto i teie tuatāpapara’a ’e te ’ite pae vārua tei fa’ari’ihia i riro ai au ’ei misiōnare nō te Buka a Moromona ’e ’ei pipi nā Iesu Mesia ». (« Teie nei mahana », Liahona, Novema 2022, 25).

Tītau manihini i te mau misiōnare ’ia fa’a’ite mai ia ’outou i te mau pāpa’ira’a mo’a o te Buka a Moromona tei riro ’ei mea faufa’a nō rātou i roto i tō rātou orara’a.
’Ite mai i te mau uira’a o te vairua o te ta’ata i roto i tā ’outou misiōni. Tītau manihini i te mau misiōnare ’ia ’ite mai i te mau ’īrava i roto i te Buka a Moromona ’o tē tauturu i te pāhonora’a i te reira mau uira’a.