« Pene 13 : Tāhō’ē ’e te feiā fa’atere ’e te mau melo nō te ha’amau i te ’Ēkālesia », ’Ia poro haere i tā’u nei ’Evanelia : E arata’i nō te fa’a’itera’a i te ’Evanelia a Iesu Mesia (2023)

« Pene 13 », ’Ia poro haere i tā’u nei ’Evanelia

Pene 13

Tāhō’ē ’e te feiā fa’atere ’e te mau melo nō te ha’amau i te ’Ēkālesia

’A feruri na

Nāhea vau ’ia ’ohipa ’e te feiā fa’atere ’e te mau melo nō te pāroita nō te ha’amau i te ’Ēkālesia ?
E aha te mau hopoi’a a te feiā fa’a’tere nō te titi ’e te pāroita i roto i te ’ohipa misiōnare ?
E aha te ’ohipa e tupu i roto i te rurura’a fa’aaura’a tāhepetoma ’e te feiā fa’a’tere nō te pāroita ?
Nāhea vau i te turu i te feiā fa’atere ’ia fa’a’ite i te ’evanelia ’e ’ia ha’apūai i te mau melo ’āpī ’e tei ho’i mai ?

E ha’a ’āmui te mau misiōnare ’e te feiā fa’atere o te fenua ’e te mau melo nō te ’ite mai i te ta’ata nō te ha’api’i ’e nō te arata’i ia rātou i te Fa’aora ra. ’Ua tāhō’ehia ’oe e tō ’oe here i te Atua ’e i tāna mau tamari’i. E fa’arahi ’oia i tā ’oe mau tauto’ora’a i te fāito e ’ohipa ai ’oe ma te tāhō’ē ’e te feiā fa’atere ’e te mau melo o te fenua. Te ravera’a i te ’ohipa ’e o rātou e tuha’a faufa’a roa ïa nō tā ’oe mau fā ’e mau ’ōpuara’a.

’A ha’amātau ai ’e ’a here ai ’oe i te feiā fa’atere ’e te mau melo o te fenua, e ’ite mai ’oe i te mau rāve’a nō te turu ia rātou i roto i tō rātou pi’ira’a ’e mau tauto’ora’a misiōnare. ’A pupu atu i tā ’oe mau ō ’e mau tārēni nō te fa’ateitei ’e nō te ha’apūai ia rātou e ti’a ai.

E fa’ata’a teie pene e nāhea ’oe ’ia ha’a ’e te mau melo i roto i te fa’a’itera’a i te ’evanelia ’e ’ia ha’apūai i te mau melo ’āpī ’e tei ho’i mai. Nō te ha’amāramaramara’a hau atu, ’a hi’o pene 23 nō te Buka arata’i rahi.

Ha’api’ira’a ta’ata hō’ē ’e ha’api’ira’a ’e te hoa misiōnare

’A hi’o fa’ahou i te ’ā’amu nō te fa’afāriura’a o te ari’i Lamoni, tāna vahine ’e tōna nuna’a i roto te Alama 18–19.

E aha te ti’ara’a o Abisa i roto i teie fa’afāriura’a ? E aha tāna e nehenehe e rave ē ’aita e ti’a ia Amona e rave ?
E aha tā ’oe i ’apo mai nā roto mai i tōna hi’ora’a nō ni’a i te ’ohipa-’āmui-ra’a te mau melo ’e te mau misiōnare ?

’A feruri i teie atu hi’ora’a nō te mau melo e tauturu nei i te ’ohipa misiōnare :

Amuleka (Alama 10:1–11).
Peresilia ’e Akuila (Te ’Ohipa 18:24–28)
Te vahine nō Samaria (Ioane 4:5–30, 39–42)

Nāhea ’oe i te fa’aitoito i te feiā fa’atere ’e i te mau melo ’ia pe’e i tō rātou hi’ora’a ?

Patu i te tā’amura’a ’e te feiā fa’atere ’e te mau melo o te fenua

E mau ’āpiti te feiā fa’atere ’e te mau melo o te ’Ēkālesia o te fenua nō ’oe i roto i te ’ohipa a te Atua. ’A patu i te tā’amura’a ’o tē tauturu ia ’oe ’ia ha’a ’āmui nō te ’āfa’i i te ’evanelia tei fa’aho’ihia mai i te mau tamari’i a te Metua i te ao ra. E nehenehe teie tā’amura’a e ha’amaita’i ia ’oe nō te toe’a o tō ’oe orara’a.

’A patu i te ti’aturi ’e te auhoara’a pāpū ’e te feiā fa’atere ’e te mau melo o te fenua. ’A haere atu e fārerei ia rātou ’e ’ia ha’api’i mai nō ni’a i tō rātou ’utuāfare, tō rātou orara’a i ma’iri, mau fa’a’ana’anataera’a, ’e tō rātou ’itera’a rau nō te ’Ēkālesia. ’Ia ’ana’anatae mau i tō rātou orara’a.

’Ia haere ’oe e fārerei, ’a rave i te reira ma te hō’ē fā pāpū maita’i. ’A fa’a’ite atu ē, tē rohi pāpū nei ’oe i roto i te ’ohipa nō te ’itera’a mai ’e te ha’api’ira’a. ’A fa’atura i tō rātou taime ’e tā rātou tāpura ’ohipa.

’Ia haere ’oe e fārerei ’aore rā e ha’api’i i te ’evanelia i tō rātou fare, ’a ’imi i te tauturu ia rātou ’ia ha’apūai i tō rātou fa’aro’o. ’A ’imi nā roto i te pure ’ia vai mai te Vārua ia ’oe. ’A fa’a’ite i te mau ’itera’a tā ’oe e vai ra nō te ’ohipa misiōnare i roto i tā ’oe tuha’a fenua.

Turura’a i te feiā fa’atere o te fenua i roto i tō rātou ti’ara’a

Vetahi mau pi’ira’a o te feiā fa’atere tē vai ra te mau hōpoi’a nō te ’ohipa misiōnare. Te māramaramara’a i teie mau hōpoi’a e tauturu ia ’oe ’ia turu i teie mau ta’ata fa’atere. Te mau fa’a’itera’a i muri nei nō roto mai ïa i te pene 23 i roto i te Buka arata’i rahi.

Peresideni titi : Tē mau nei i te mau tāviri nō te autahu’ara’a i roto i te titi nō te fa’a’itera’a i te ’evanelia ’e nō te ha’apūaira’a i te mau melo ’āpī ’e tei ho’i mai. E hōro’a ’oia ’e tōna nā tauturu i te arata’ira’a rahi nō teie mau tauto’ora’a.

’Episekōpora’a : E fa’aau ’e te peresidenira’a pupu peresibutero ’e Sōtaiete Tauturu ’a arata’i ai rātou i te mau tauto’ora’a a te pāroita nō te fa’a’ite i te ’evanelia ’e nō te ha’apūai i te mau melo ’āpō ’e tei ho’i mai.

Peresideni pupu peresibutero ’e te Sōtaiete tauturu : E arata’i i te mau tauto’ora’a tāmau a te pāroita i te mau mahana ato’a nō te fa’a’ite i te ’evanelia ’e nō te ha’apūai i te mau melo ’āpī ’e tei ho’i mai. E ’ohipa ’āmui rātou nō te fa’atere i teie mau tauto’ora’a ’e te ’āpo’ora’a pāroita, i raro a’e i te fa’aaura’a a te ’episekōpo. Hi’o Buka arata’i rahi, 8.2.3 ’e 9.2.3.

Te fa’atere misiōni pāroita (mai te mea ’ua pi’ihia) E fa’aau i te ’ohipa a te mau melo ’e te feiā fa’atere o te pāroita, te mau misiōnare pāroita ’e te mau misiōnare rave tāmau. ’Aita ana’e te fa’atere misiōni pāroita i pi’ihia, nā te hō’ē melo nō te peresidenira’a pupu peresibutero e amo i teie ti’ara’a. Hi’o Buka arata’i rahi, 23.5.3

E ui pinepine ’ia ’oe iho, « ’ua riro ānei au ’ei ha’amaita’ira’a nō te feiā fa’atere o te fenua ? » ’A fa’ananea i te hō’ē huru mai teie « Nāhea vau e nehenehe ai e tauturu ? »

Ha’api’ira’a ’e te hoa misiōnare

Fa’ata’a i te tāime nō te haere e fārerei poto i te hō’ē ta’ata fa’atere nō te pāroita. E ui atu e nāhea ’oe e nehenehe e tauturu maita’i atu iāna ? ’A hāmani i te mau ’ōpuara’a nō te ha’amaita’i atu.

Rurura’a fa’aaura’a tāhepetoma

Fa’aaura’a ’e te feiā fa’atere—tei roto te feiā fa’atere o te feiā ’āpī—e mea faufa’a nō te tāhō’ē mai i roto i tā ’oe mau tauto’ora’a misiōnare. ’Ia pi’i-ana’e-hia te hō’ē fa’atere misiōni pāroita, e arata’i ’oia i te mau rurura’a fa’aaura’a tāhepetoma. ’Aita ana’e, nā te melo o te peresidenira’a o te pupu peresibutero tei fa’ata’ahia nō teie ti’ara’a e arata’i.

I roto i teie mau rurura’a poto pāpū ’ore, e fa’aau te feiā fa’atere o te fenua ’e ’oe i te mau tauto’ora’a nō te fa’a’ite i te ’evanelia ’e nō te ha’apūai i te mau melo ’āpī ’e tei ho’i mai (hi’o Buka arata’i rahi, 23.4). E nehenehe te mau rurura’a e fa’atupuhia ma te mau ta’ata ’aore rā nā te ātea. E nehenehe ato’a te fa’aaura’a e fa’atupuhia ma te tahi atu rāve’a i roto i te hepetoma, nā te rāve’a niuniu, te hāponora’a te mau poro’i ’e te ratauira.

« Te hō’ē tauto’ora’a ’e te hō’ē fa’atumura’a tāhō’ē i reira te fa’anahora’a misiōnare ’e te fa’ata’ara’a i te fā e ’āna’i ai i ni’a i te fa’anahora’a ’e te fa’ata’ara’a i te mau fā a te pāroita ’aore rā a te ’āma’a, e nehenehe e riro ’ei mea faufa’a roa nō te rave manuia i te ’ohipa nō te ha’aputuputura’a ia ’Īserā’era » (Quentin L. Cook, « Purpose and Planning », seminaire nā te feiā fa’atere misiōni, 25 nō Tiunu 2019)

Fa’aineine nō te rurura’a fa’aaura’a tāhepetoma

’A turu i te feiā fa’atere nō te pāroita, ma te fa’aineinera’a ia ’oe nō te ’āmui atu i roto i te rurura’a fa’aaura’a tāhepetoma. Hou te rurura’a, ’a rave i te tāime i roto i te ha’api’ira’a ’e te hoa misiōnare nō te ’āparau e nāhea ’oe e ’āmui atu ma te ’aravihi.

’A tāpe’a i tā ’oe mau parau fa’a’ite ma te tano i roto i te fa’aaura’a rorouira ’Ia poro haere i tā’u nei ’Evanelia, ’ia roa’a tamau noa i te feiā fa’atere te mau ha’amāramaramara’a pāpū nō ni’a i te feiā e ha’a nei i pīha’i iho ia ’oe. ’A fa’aineine ia ’oe nō te fa’a’ite i te mau tītaura’a nō te mau rurura’a i ma’iri.

’A ’āmui mai i roto i te rurura’a fa’aaura’a tāhepetoma

’Ua fa’ata’ahia te mau rurura’a fa’aaura’a tāhepetoma nō te fa’atumu i ni’a i te mau hina’aro o te mau ta’ata tāta’itahi. I roto i te rurura’a, ’a vauvau atu e nāhea ’oe i te turu atu i te mau melo nō te pāroita, ’oia ato’a te feiā ’āpī, ’ia pāhono i te mau hina’aro o te mau ta’ata tāta’itahi.

E tāpo’i te rurura’a fa’aaura’a tāhepetoma i te rahira’a taime i nā maha tumu parau i muri nei :

Nāhea tātou i te tauturu i te feiā tei ha’api’ihia ? Mau tumu parau e ti’a ’ia ’āparauhia :

’O vai te mau melo e nehenehe e ’āmui mai i roto i te mau ha’api’ira’a i te hepetoma e haere mai nei ? Nā vai e ani manihini ia rātou ’ia ’āmui mai ?
E aha te mau tītaura’a nō te feiā ’o tei ha’api’ihia ? Nāhea te mau melo e nehenehe ai e tauturu ?
E aha te mau hina’arohia o te feiā tei fa’ata’a i te tai’o mahana nō te bāpetizora’a ? ’Ua fa’ata’ahia ānei te bāpetizora’a ? (Hi’o « Te purera’a bāpetizora’a » i roto i te pene 12.

Nāhea tātou i te tauturu i te feiā tei bāpetizo-’āpī-hia iho nei ? Mau tumu parau e ti’a ’ia ’āparauhia :

’Ō vai te mau melo ’āpī i roto i tō rātou matahiti mātāmua i te ōra’a mai, e haere mai nei i te purera’a ’ōro’a ? Nāhea tātou i te tauturu i te feiā ’aita e haere mai nei ?
’Ō vai te mau melo ’āpī e hoa tō rātou i roto i te pāroita ? Nāhea te mau taea’e ’e te mau tuahine aupuru e nehenehe ai e tauturu ? Nāhea te mau pupu ’e te mau piha feiā ’āpī e nehenehe ai e tauturu ?
’Ō vai te mau melo ’āpī e ’ohipa ’aore rā e pi’ira’a tō rātou ?
Nāhea tātou i te tauturu i te mau melo ’āpī ’ia ha’amata i te mā’imi i tō rātou mau tupuna tei pohe, ’ia nehenehe te mau ’ōro’a nō te hiero ’ia ravehia nō rātou ? E parau fa’ati’a nō te hiero ānei tā te mau melo ’āpī ? Mai te peu e mea fātata i te hō’ē hiero, nāhea tātou i te tauturu ia rātou ’ia haere i te hiero nō te rave i te bāpetizora’a nō teie mau tupuna ?
E aha te mau ha’api’ira’a i roto i te pene 3 e tītauhia ’ia ha’api’i-fa’ahou-hia ? Nāhea te mau melo e nehenehe ai e ’āmui mai ?
Hi’o fa’ahou Tō’u ’ē’a nō te fafaura’a nō te nu’ura’a i mua o te melo ’āpī tāta’itahi.

Nāhea tātou i te tauturu i te mau melo e ho’i mai nei ? Mau tumu parau e ti’a ’ia ’āparauhia :

’Ō vai te mau ’utuāfare ’āfa melo, e nehenehe te mau misiōnare e haere e fārerei ’e e ha’api’i atu ?
’Ō vai te mau melo tei ho’i mai, e nehenehe te mau misiōnare e haere e fārerei ’e e ha’api’i atu ?
’Ō vai te mau melo tei ho’i mai ’e e hoa tō rātou i roto i te pāroita ’e e rāve’a pāpū maita’i nō te tāvini ?
Nāhea tātou i te tauturu i teie mau melo ?

Nāhea tātou ’ia ’ite hau atu ā mai i te ta’ata nō te ha’api’i ? Mau tumu parau e ti’a ’ia ’āparauhia :

Nāhea tātou i te tauturu i te ta’ata tāta’itahi, ’oia ato’a te feiā ’āpī, ’e te mau ’utuāfare ’ia fa’a’ohipa i te mau parau tumu ’ia here, ’ia fa’a’ite, ’e ’ia ani manihini ? (Hi’o « Tāhō’ē ’e te mau melo » i roto te pene 9.)
Nāhea tātou i te tauturu i te mau melo, ’oia ato’a te feiā fa’atere o te Paraimere, ’ia ani manihini i tō rātou mau hoa i te mau fa’a’oa’oara’a a te pāroita ?

Ha’api’ira’a ’e te hoa misiōnare

Mata’ita’i i te video nō te hō’ē rurura’a fa’aaura’a tāhepetoma i roto te Buka arata’i rahi, 23.4. E aha tā ōrua i ’apo mai ’e ’o tā ’oe e nehenehe e fa’a’ohipa i roto i te rurura’a fa’aaura’a tāhepetoma i muri nei ? Nāhea ’oe i te fa’aineine maita’i a’e nō te ’āparau i te mau hina’aro ’e ’ia fa’anaho ’e te feiā fa’atere o te pāroita ? I roto i tā ’oe rurura’a nō te fa’anahora’a i muri nei, ’a ha’amau i te mau fā nō ni’a e nāhea ’oe i te ha’amaita’i atu.

Turu i te fa’anahora’a a te pāroita nō te fa’a’itera’a i te ’Evanelia

E hāmani te ’āpo’ora’a pāroita i te hō’ē ’ōpuara’a ’ōhie nō te fa’a’itera’a i te ’evanelia (hi’o Buka arata’i rahi, 23.5.6). ’A ha’amātau mai ’e teie ’ōpuara’a. I roto i te mau rurura’a fa’aaura’a tāhepetoma, ’a ’imi mai i te rāve’a nō te tauturu i te feiā fa’atere ’ia tāpae i tā rātou mau fā. ’A fa’a’ite tāmau noa i te feiā fa’atere, e aha tā ’oe e rave nei nō te tauturu i te mau melo i roto i te fa’a’itera’a i te ’evanelia.

Mai te peu e anihia ’ōruā ’ia ’āmui atu i te ’āpo’ora’a pāroita, ’ia vai ineine ’oe nō te fa’a’ite poto i te nu’ura’a i mua o te feiā tā ’oe e ha’api’i nei ’e i ni’a i te mau tītaura’a ’o tā ’oe i fa’ari’i (hi’o Buka arata’i rahi, 29.2.5). ’A hi’o i teie rāve’a ’ei tāime nō te ha’apūai atu i te ti’aturira’a o te feiā fa’atere.

E fa’atano i ni’a i te mau hina’aro o te tuha’a fenua

E mau hina’aro ta’a ’ē mau tō te ’āma’a ’e te pāroita tāta’itahi ’o tā ’oe e ti’a ’ia fa’atano atu. E nehenehe ’oe e tāvini i roto i te hō’ē ’āma’a na’ina’i ’aore rā i roto i te hō’ē pāroita feiā ’āpī pa’ari, ’aore rā e rave rau pāroita. E rave rahi tō vetahi feiā fa’atere ’itera’a ’e tō vetahi e mea iti ïa. E rave rahi a’e tō vetahi feiā fa’atere taime i tō te tahi.

’A ’imi i te mau rāve’a nō te tauturu i te feiā fa’atere o te fenua. E nehenehe rātou e ani mai ia ’ōruā ’ia turu i te mau melo i roto i tā rātou fa’auera’a nō te aupurura’a. E nehenehe rātou e ani mai ia ’ōruā ’ia fa’aitoito i te mau melo ’āpī ’ia ani manihini i tō rātou mau hoa ’ia haere mai i te purera’a. E nehenehe ’ōruā e hōro’a i te mau mana’o faufa’a mau nō ni’a i te ’ohipa misiōnare, ’a ha’api’i noa mai ai te feiā fa’atere ’e te mau melo i te mau rāve’a nō te fa’a’ite i te ’evanelia.

I te vāhi e mea ’āpī ā te ’Ēkālesia, e nehenehe te feiā fa’atere o te ’āma’a e ani ia ’oe ’ia tauturu i te mau melo ’āpī ’ia māramarama maita’i, e mea nāhea te Fatu i te fa’anahora’a i tāna ’Ēkālesia.

Penei a’e e mea ta’a ’ē tā ’oe ’ohipa ’e te feiā fa’atere i roto i te mau vāhi ta’a ’ē, e mea tītauhia rā teie mau ’ohipara’a ato’a nō te ha’amaita’ira’a i te ta’ata hō’ē ’e te ha’amaura’a i te ’Ēkālesia a te Fatu.

Tauturu i te mau melo ’e te feiā fa’atere ’ia here, ’ia fa’a’ite ’e ’ia ani manihini

E fa’aitoito i te mau melo ’ia fa’a’ite i te ’evanelia ma te ’ōhie ’e te au māite. Tē hōro’a nei te Buka arata’i rahi i te ha’api’ira’a ’e te mau video nō te tauturu i te mau melo ’e te feiā fa’atere ’ia rave i te reira ma te orara’a i te parau tumu ’ia here, ’ia fa’a’ite ’e ’ia ani manihini (hi’o Buka arata’i rahi, 23.1.1, 23.1.2, ’e 23.1.3). ’A tāpe’a i teie mau parau tumu i roto i te ferurira’a ’a ’ohipa ai ’oe ’e te feiā fa’atere.

E riro ’oe ’ei ha’amaita’ira’a nō te feiā fa’atere ’a turu ai ’oe i tā rātou mau tauto’ora’a i roto i teie ’ohipa. I reira, e tauturu tō rātou hi’ora’a i te mau melo ’ia fa’aō rahi mai ā i roto i te fa’a’itera’a i te ’evanelia ’e te ha’apūaira’a i te mau melo ’āpī ’e tei ho’i mai.

Hi’o « Tāho’ē ’e te mau melo », i roto te pene 9 nō te mau mana’o nō ni’a turura’a i te mau melo i roto i tā rātou mau tautoʼoraʼa nō te faʼaʼite i te ʼevanelia.

’Imira’a pāpa’ira’a mo’a.

Tuatāpapa i te mau ’īrava i muri nei. Mea nāhea tō te Fa’aora ’e tāna mau pipi herera’a, fa’a’itera’a, ’e ani-manihini-ra’a ? E aha te mau ’ohipa tā teie mau hi’ora’a i fa’auru mai i roto i tā ’oe ha’api’ira’a ? Nāhea ’oe e nehenehe ai e tauturu i te mau melo ’ia fa’a’ite i te ’evanelia ma te ’ōhie ’e te au māite.

Here

Fa’a’ite

Ani manihini

I te mau taime ato’a ’a tuatāpapa ai ’oe, ’a pāpa’i i te mea tā ’oe i ’apo mai.

Turu i te feiā fa’atere i roto i te ha’apūaira’a i te mau melo ’āpī

’Ia bāpetizo-ana’e-hia ’e ’ia ha’amau-ana’e hia te ta’ata, e riro mai rātou ’ei « hō’ē ato’a rā ’oire ’e te feiā mo’a, ’e nō te fēti’i o te Atua » (Ephesia 2:19 ; hi’o ato’a 1 Korinetia 12:12–27). ’A ’ohipa ’e te feiā fa’atere o te fenua nō te tauturu i te mau melo ’āpī « ’ia fa’a’amuhia rātou i te parau maita’i a te Atua, nō te tāpe’a ia rātou i ni’a i te ’ē’a ti’a, ma te ti’aturi noa i te mau maita’i rahi o te Mesia » (Moroni 6:4).

« Tē tomo mai nei te feiā fa’afāriuhia i roto i te ’Ēkālesia ma te ’ana’anatae nō te mea tā rātou i ’ite mai. ’E e ti’a ia tātou ’ia ha’amau ’oi’oi i ni’a i taua ’ana’anatae ra […] E nehenehe te mau misiōnare e tauturu ’ia ha’afārerei ’e ’ia tū’ati mai i te ta’ata tā rātou e ha’api’i nei ’e te mau melo ’āpī i te mau melo itoito ’o te niuniu atu ia rātou, ’o te fa’aro’o atu ia rātou, ’o te arata’i atu ia rātou ’e ’o te fa’ari’i poupou mai ia rātou i te fare pure, hou rātou ’a bāpetizohia ai […] ’A aupuru ai tātou i te feiā e tomo mai i roto i te pape nō te bāpetizora’a, e ’ite rahi mai ā tātou i te mau tamari’i a te Atua ’ia tāpe’a māite e tae noa atu i te hope’a ’e ’ia fa’ari’i i te ora mure ’ore » (Ulisses S. Soares, « Convert Retention », ha’api’ira’a nā te feiā fa’atere misiōni, 25 nō Tiunu 2018)

Tauturu i te mau melo ’āpī ’ia haere i te purera’a ’ōro’a

E ti’ara’a faufa’a roa tō ’oe i roto i te tauturura’a i te mau melo ’āpī ’ia haere mai i te purera’a. ’A ’ohipa ’e te feiā fa’atere nō te ha’apapū ē, e tauturu ’oe ’aore rā te mau melo ia rātou ’ia haere mai i te purera’a. Te fa’a’itera’a tāviri e fa’atoro nei i te taera’a mai te hō’ē melo ’āpī i te purera’a ’ōro’a, e tauturu ia ’oe ’e i te feiā fa’atere o te pāroita ’ia hi’o, i te taime e hina’aro ai ’oia i te fa’aitoitora’a hau atu ā.

E mea pāpū roa, e tāmau noa te mau melo ’āpī i te haere mai i te purera’a ’ōro’a ’e ’ia rave i te ’ōro’a mo’a, mai te mea e hoa pāpū tō rātou i roto i te pāroita. E tauturu ia rātou ’ia putapū i te hō’ē nino’a mana’o nō te rirora’a, i te mau taime ihoā rā o tō rātou matahiti mātāmua o te orara’a ’ia au i te ’evanelia. (Hi’o Te Ha’api’ira’a Tumu ’e te mau Fafaura’a 84:106, 108.)

Ha’api’i fa’ahou i te mau ha’api’ira’a i roto i te pene 3

Tauturu i te mau melo ’āpī ’ia tāmau noa i te ha’apūai i tō rātou fa’aro’o i roto i te Fa’aora ia Iesu Mesia ’e i tāna ’evanelia. E a’a hōhonu maita’i atu te mau parau mau ’e te mau parau tumu nō te ’evanelia, ’a tāmau noa ai te mau melo ’āpī i te ha’api’i mai nā roto i te Vārua.

I muri a’e i te ha’amaura’a, ’a ha’api’i fa’ahou i te mau ha’api’ira’a misiōnare. Nā ’oe e rave te fa’aterera’a i te ha’api’ira’a. Nō reira, ’a fa’anaho ’e te feiā fa’atere o te pāroita, ’ia nehenehe i te mau misiōnare pāroita ’aore rā i te tahi atu mau melo ’ia ’āmui mai. E rāve’a faufa’a roa te ha’api’i fa’ahoura’a i te mau ha’api’ira’a i roto te pene 3, nō te tauturu i te mau melo ’āpī « ’ia fa’a’amuhia rātou i te parau maita’i a te Atua ra » (Moroni 6:4). ’A ha’api’i ai ’oe, ’a fa’aitoito i te mau melo ’āpī ’ia ha’apa’o i te mau tītaura’a ato’a i roto i te mau ha’api’ira’a.

Tai’o i te mau pāpa’ira’a mo’a ’e te mau melo ’āpī, te Buka a Moromona ihoā rā, ’e ’a ha’api’i i te mau parau tumu o te ’evanelia. ’A tauturu ia rātou ’ia fa’a’ite i te ’evanelia i tō rātou mau hoa ’e mau feti’i. E mau hina’aro ta’a ’ē tō te melo ’āpī tāta’itahi, ’e e nehenehe ’oe e tauturu ’iāna ’ia ’ite ē ’ua herehia ’e ’ua fa’ari’i-maita’i-hia ’oia.

Parau fa’a’ite nō te nu’ura’a i ni’a i te ’ē’a nō te fafaura’a ’e Tō’u ’ē’a nō te fafaura’a

Mai ia ’oe, tē vai ra tā te feiā fa’atere o te fenua te mau mātēria nō tā rātou mau tauto’ora’a misiōnare. Hō’ē o te reira ’o te parau fa’a’ite ïa nō te nu’ura’a i ni’a i te ’ē’a nō te fafaura’a [Covenant Path Progress report], e vai ra i roto i te fa’aaura’a rorouira a te feiā fa’atere ’e te pāpa’i parau (DDG) ’aore rā mauiha’a a te melo. E fa’ati’a teie parau fa’a’ite i te feiā fa’atere o te fenua ’ia hi’o i te mau ’itera’a rau faufa’a roa ’o tā te hō’ē ta’ata e hina’aro nō te tāmau noa i te nu’u i mua i ni’a i te ’ē’a nō te fafaura’a, nā mua a’e ’e i muri mai i te bāpetizora’a.

Tō’u ’e’a nō te fafaura’a ’o te hō’ē ïa mātēria nō te tauturu i te mau melo ’āpī « ’ia vai tāmau noa [tō rātou] fa’aro’o ia Iesu Mesia ’e ’ia ’ite ē e melo mau rātou i roto i te ’Ēkālesia » (Tō’u ’ē’a nō te fafaura’a, iv). E fa’aō mai te reira i te mau melo ’āpī i te mau fa’a’oa’oara’a ’e i te mau rāve’a, mai te ’ā’amu ’utuāfare ’e te tauturura’a i te mau tupuna tei pohe ’ia fa’ari’i i te mau ’ōro’a mo’a i roto i te hiero. ’A fa’aitoito i te mau melo o te fenua ’ia arata’i i te mau melo ’āpī nā roto i teie mau ’itera’a rau. ’A hōro’a mai i te turura’a mai tei anihia mai.

Ha’api’ira’a ta’ata hō’ē ’e ha’api’ira’a ’e te hoa misiōnare

’A tītau i te ’ite Tō’u ’ē’a nō te fafaura’a. E aha tā ’oe i ’apo mai nō ni’a i tō ’oe ti’ara’a i roto i te tauturura’a i te mau melo ’ia ha’apūai i te mau melo fa’afāriu ’āpī ? Nāhea ’oe i te turu i te mau tauto’ora’a a te ’āpo’ora’a pāroita ? I te mau tāime ato’a ’a tītau ai ’oe i te ’ite i teie pene, ’a pāpa’i i te mea tā ’oe i ’apo mai.

Turu i te feiā fa’atere o te fenua i roto i te ha’apūaira’a i te mau melo tei ho’i mai

E mā’iti te tahi mau melo ’ia fa’a’ea i te ’āmui mai i roto i te ’Ēkālesia. E tūtava te feiā fa’atere o te fenua ’e te tahi atu mau melo i te ha’amau i te tā’amura’a pāutuutu ’e rātou ’e ’ia rae’ahia rātou. ’Ua parau te Fa’aora :

« E tāmau ā hoʼi ʼoutou i te poihere i taua huru taʼata ra ; ʼaita hoʼi ʼoutou i ʼite ʼo te hoʼi mai rātou ’e ’o te tātarahapa, ʼe ’o te haere mai iāʼu ma te ʼāʼau hinaʼaro mau, ʼe nāʼu e faʼaora ia rātou, ʼe ʼua riro ʼoutou ʼei rāveʼa nō te hōpoi atu i te fa’aorara’a ia rātou » (3 Nephi 18:32).

E nehenehe te feiā fa’atere o te fenua e ani ia ’oe ’ia tauturu i te mau melo tei ho’i mai, ’ia patu i tō rātou fa’aro’o. Pinepine teie mau tītaura’a e tupu i pīha’i iho i te mau ’utuāfare ’afa melo. Feruri nā roto i te pure, nāhea ’oe e nehenehe ai e ani manihini i te Vārua i roto i te mau ’utuāfare o te mau melo tei ho’i mai, ’a ha’api’i ai ’oe ia rātou i te mau parau tumu o te ’evanelia ’e ma te ani ia rātou ’ia ora i te reira. ’A fa’a’ite i te autaea’era’a ’e te aroha nō tō rātou mau ha’ape’ape’ara’a.

Mai te peu e tano te tupura’a, ’a ha’api’i i te ’evanelia i te mau melo o te ’utuāfare tei ’ore ā i bāpetizohia. E nehenehe tō ’oe here ’e tā ’oe turu e tauturu ia rātou ’ia fa’ahōhonu i tō rātou fa’aro’o i te Mesia ’e ’ia fa’arahi i tō rātou hina’aro ’ia rave ’e ’ia ha’apa’o i te mau fafaura’a.

’A fa’aau ’e te feiā fa’atere o te fenua, ’ia ha’a ana’e ’oe ’e te mau melo tei ho’i mai. E nehenehe teie mau tauto’ora’a e riro ’ei tupura’a tau maoro i ni’a i te ta’ata ’e ni’a i te ’āmuira’a o te fenua.

’Imira’a pāpa’ira’a mo’a

E aha tā Iesu Mesia i ha’api’i nō ni’a i te tauturura’a i te feiā e fifi nei paha ?

’Ua ha’api’i Alama ’e ’o Amuleka e rave rahi feiā tei fa’aātea ’ē ia rātou i te ’Ēkālesia. E aha tā ’oe e nehenehe e ’apo mai nā roto mai i tō rāua mau ’itera’a nō ni’a i te ha’apūaira’a i te mau melo tei ho’i mai ?

Mana’o nō te ha’api’i ’e nō te rave

Ha’api’ira’a ta’ata hō’ē

Fa’a’ohipa i te fa’a’aura’a rorouira ’Ia poro haere i tā’u nei ’Evanelia nō te fa’anaho i te mau ’āparaura’a ’e te mau melo ’āpī ’e te mau melo tei ho’i mai tei taui i tō rātou orara’a ’e tē haere mai nei i te purera’a. E aha te mea tei tauturu rahi a’e ia rātou ? E pāpa’i i roto i tā ’oe buka tāmahana, tō ’oe mau mana’o nō ni’a i te ’ohipa tei tupu nō rātou. E aha tā ’oe i ’apo mai ’o tē tauturu ia ’oe ’ia ha’a ’e te feiā tā ’oe e ha’api’i nei i teienei ?
Tītau i te ’ite 2 Nephi 31:18–20, Alama 26:1–7, Alama 32:32–43, ’e Moroni 6. Pāpa’i e aha tā ’oe e ’apo mai nā roto mai i teie mau ’īrava nō ni’a i te ha’apūaira’a i te mau melo ’āpī.

Ha’api’ira’a ’e te hoa misiōnare, ’e tāuiuira’a hoa

’A tai’o ’e ’a tau’aparau te pene 23 i roto i te Buka arata’i rahi. Nāhea ’oe ’ia turu i te feiā fa’atere o te fenua i roto i tā rātou mau hōpoi’a ?
I roto i te mau rurura’a fa’aaura’a tāhepetoma, ’a ui i te feiā fa’atere o te pāroita tē vai ra ānei te mau melo tei ho’i mai i roto i te reira tuha’a fenua, ’o tā rātou e hina’aro ē ’ia haere atu ’oe e fārerei i teie hepetoma. ’A haere ai ’oe e ia rātou, ’a ’imi i te patu i tō rātou fa’aro’o ia Iesu Mesia.
’A ’ite mai i te feiā ato’a tei bāpetizohia ’e tei ha’amauhia i te matahiti i ma’iri a’e nei. ’A hi’o fa’ahou i te parau fa’a’ite o te hō’ē o rātou ’e ’a ’āparau e nāhea ’oe e nehenehe ai e ’ohipa ’e te feiā fa’atere, i roto i te rurura’a fa’aaura’a tāhepetoma i muri nei, nō te tauturu i teie ta’ata. ’A pāpa’i i tō ’oe mau mana’o ’e mau rāve’a i roto i te fa’aaura’a rorouira ’Ia poro haere i tā’u nei ’Evanelia. ’A tāpiti noa i teie ravera’a nō te mau melo ato’a tei fa’afāriu-’āpī-hia i roto i tō ’oe tuha’a fenua.

’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni

E ani i te hō’ē ’episekōpo ’aore rā i te tahi atu ta’ata fa’atere o te pāroita ’ia parau mai nō ni’a i te ha’apūaira’a i te mau melo ’āpī ’e ’o tei ho’i mai. E ani i teie ta’ata ’ia ha’apāpū mai e nāhea te mau misiōnare e nehenehe ai e tauturu.
E tau’aparau i te mau parabole nō te māmoe mo’e, te diderama i mo’e ’e te tamaiti pūhura (hi’o Luka15). E ani i te mau misiōnare ’ia fa’a’ite mai e aha tā rātou i ’apo mai, ’e e nāhea rātou ’ia fa’a’ohipa i te reira i roto i tā rātou ’ohipa misiōnare.

Feiā fa’atere misiōni ’e nā tauturu misiōni

E ’ohipa ’e te feiā fa’atere o te fenua nō te fa’aitoito ia rātou ’ia tauturu i te mau melo ’āpī :
- ’Ia fa’atōro’ahia i te hō’ē tōro’a o te ’autahu’ara’a (nō te mau tāne i ti’a te matahiti).
- ’Ia fa’ata’ahia ’ei taea’e aupuru (’e ’ei tuahine aupuru nō te mau vahine).
- ’Ia fa’ari’i i te hō’ē parau fa’ati’a nō te hiero ’e ’ia bāpetizohia i roto i te hiero nō tō rātou mau tupuna i pohe.
- ’Ia fa’aineine i te i’oa o te hō’ē tupuna tei pohe nō te ’āfa’i atu i te hiero.
- ’Ia fa’ari’i i te hō’ē hōpoi’a ’aore rā te pi’ira’a ’ia tāvini i roto i tā rātou pāroita ’aore rā ’āma’a ?
I roto i te fa’aaura’a ’e te peresideni titi, ’a ha’api’i i te feiā fa’atere o te fenua, nāhea ’ia fa’atupu i te hō’ē rurura’a fa’aaura’a tāhepetoma ’aravihi.
I te tahi tāime, ’a rave i te hi’opo’ara’a i pīha’i iho i te mau melo ’āpī nō te ’ite mai e aha tō rātou huru ’e nāhea te mau misiōnare ’e te mau melo e nehenehe ai e tauturu ia rātou.
’A ani i te mau melo ’āpī ’ia ’āparau atu i te mau misiōnare ’e ’ia fa’a’ite atu i tō rātou mau ’itera’a i roto i te ’Ēkālesia.