Pi’ira’a misiōni
Pene 1 : Fa’atupu i tā ’oe fā misiōnare

« Pene 1 : Fa’atupu i tā ’oe fā misiōnare », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 1 », ’Ia poro haere i tā’u nei ’Evanelia

Dan Jones e poro ra

Dan Jones, te hō’ē o te mau misiōnare pūai roa a’e i roto i teie tau tu’ura’a ’Evanelia, tē poro ra i te ’evanelia i te fenua nō Gales.

© 1993 Clark Kelley Price. ’Eiaha e nene’i fa’ahou.

Pene 1

Fa’atupu i tā ’oe fā misiōnare

Tā ’oe fā : E ani manihini ia vetahi ē ’ia haere mai i te Mesia ra nā roto i te tauturura’a ia rātou ’ia fa’ari’i i te ’evanelia tei fa’aho’i-fa’ahou-hia mai, nā roto i te fa’aro’o ia Iesu Mesia ’e tāna tāra’ehara, te tātarahapara’a, te bāpetizora’a, te fa’ari’ira’a i te hōro’a nō te Vārua Maita’i, ’e te fa’a’oroma’ira’a ē tae noa atu i te hope’a.

’A feruri na

  • E aha tā’u fā ’ei misiōnare ?

  • E aha te ha’amanara’a ’e te mana e tae mai nā roto i tō’u pi’ira’a ?

  • Nāhea vau ’ia turu’i, ’ia ’ite, ’e ’ia ha’api’i i te ta’ata ma te pe’e i te Vārua ?

  • E aha te ʼevanelia a Iesu Mesia ?

  • E aha te poro’i a te Fa’aho’i-fa’ahou-ra’a mai ? Nō te aha e mea faufa’a roa te reira ?

  • E aha tā’u hōpoi’a nō te ha’amau ’e nō te patu i te ’Ēkālesia a Iesu Mesia ?

  • Nāhea vau ’ia ’ite ē e misiōnare manuia vau ?

’Ua fa’auehia ’oe ’ia ha’api’i i te ta’ata i te ’evanelia a Iesu Mesia i fa’aho’i-fa’ahou-hia mai

’Ua ’āua-ha’a’ati-hia ’oe e te ta’ata. Tē fārerei nei ’oe ia rātou i ni’a i te purūmu ’e tē rātere nei ’oe i rotopū ia rātou. Tē haere nei ’oe e fārerei ia rātou i roto i tō rātou fare ’e tē tū’ati nei ’oe ia rātou i ni’a i te natirara. E mau tamari’i rātou pā’āto’a nā te Atua—tō ’oe mau taea’e ’e tō ’oe mau tuahine. Tē here nei te Atua ia rātou mai iāna e here nei ia ’outou.

E rave rahi o teie mau ta’ata e ’imi nei i te fā i roto i te orara’a. Tē ha’ape’ape’a nei rātou i tō rātou ananahi ’e nō tō rātou ’utuāfare. E mea ti’a ia rātou ’ia ’ite ē, e tamari’i rātou nā te Atua ’e e melo nō tōna ’utuāfare mure ’ore. Tē hina’aro nei rātou ia ’ite i te hau i roto i teie nei ao e tauiui hānoa te mau faufa’a. Tē hina’aro nei rātou i « te hau i roto i teie nei ao ’e te ora mure ’ore i roto i te ao a muri atu » (Te Ha’api’ira’a Tumu ’e te mau Fafaura’a 59:23).

E rave rahi « o tei fa’a’erehia i te parau mau nō te mea ’aita rātou i ’ite i te vāhi te reira e ’itehia mai ai » (Te Ha’api’ira’a Tumu ’e te mau Fafaura’a 123:12). Nā te ’evanelia a Iesu Mesia, tei fa’aho’i-fa’ahou-hia mai nā roto i te peropheta ’o Iosepha Semita, e hōro’a mai i te parau mau mure ’ore. Tē ha’amāha nei teie parau mau i te mau hina’aro pae vārua o te mau ta’ata ’e tē tauturu nei ia rātou i te fa’atupu i tō rātou mau hina’aro hōhonu roa.

’Ei ti’a ha’amanahia nō Iesu Mesia, tē ha’api’i nei ’oe ē « e tae mai te fa’aorara’a nā roto i te Mesia Mo’a » (2 Nephi 2:6). Tē ani manihini nei ’oe i te ta’ata ’ia haere mai i te Mesia ’e ’ia fa’afāriuhia rātou iāna ra ’e i tāna ’evanelia tei fa’aho’i-fa’ahou-hia mai. Nā roto i te fa’ari’ira’a i tā ’oe tītaura’a manihini, e rahi atu ïa tō rātou ’oa’oara’a, tō rātou ti’aturira’a, te hau ’e tā rātou fā.

Nō te haere mai i te Fa’aora, e tītauhia i te ta’ata ’ia fa’atupu i te fa’aro’o i roto iāna. E nehenehe ’oe e tauturu ia rātou ’ia fa’atupu i teie fa’aro’o mai te mea ’oe :

  • E ha’api’i ia rātou i te ’evanelia a Iesu Mesia i fa’aho’ihia mai ’e e parau pāpū i te parau mau nō te reira.

  • E ani ia rātou ’ia fafau i tō rātou ora ’ia au i tāna mau ha’api’ira’a.

  • E ’āpe’e ’e e tauturu ia rātou ’ia ’ohipa i ni’a i te mau fafaura’a tā rātou i rave.

  • E tauturu ia rātou ’ia ’ite i te mau ’ohipa e fa’ari’i ai rātou i te fa’aurura’a a te Vārua Maita’i (hi’o 1 Nephi 10:17–19).

E arata’i te fa’aro’o ia Iesu Mesia i te ta’ata ’ia tātarahapa. Nā roto i te tara-’ē-ra’a i tā tātou mau hara, ’ua fa’ati’a ’o Iesu i te tātarahapara’a. ’Ia tātarahapa ana’e te ta’ata, e tāmāhia rātou i te hara ’e e ha’afātata atu rātou i te Metua i te ao ra ’e ia Iesu Mesia. E ’ite rātou i te ’oa’oa ’e te hau i te fa’ari’ira’a i te fa’a’orera’a hara.

E fa’aineine te tātarahapara’a i te mau ta’ata nō te fafaura’a o te bāpetizora’a ’e te hōro’a nō te Vārua Maita’i. ’Ua parau te Fa’aora ē, « ’a haere mai iā’u nei,’e ’ia bāpetizohia i tō’u nei i’oa, ’ia ha’amo’ahia ’outou nā roto i te fa’ari’ira’a i te Vārua Maita’i, ’ia ti’a ia ’outou ’ia ti’a mai ma te pōra’o ’ore i mua iā’u i te mahana hope’a ra » (3 Nephi 27:20).

’Ia tupu ana’e tō ’oe māramarama ’e tō ’oe ’itera’a pāpū nō te Fa’aora ’e tāna tāra’ehara, e tupu tō ’oe hina’aro i te rahi ’ia fa’a’ite i te ’evanelia. E ’ite ’oe, mai ia Lehi i nā reira, i te « mea faufa’a […] roa ’ia fa’a’itehia teie nei mau mea i tō te ao nei » (2 Nephi 2:8).

Te ’ōrama nō te tumu rā’au no te ora

The Tree of Life [Te tumu rā’au o te ora], nā Damir Krivenko.

Ha’api’ira’a ta’ata hō’ē ’e ha’api’ira’a ’e te hoa misiōnare

’A hi’opo’a i te hōho’a nei ’a tuatāpapa ai ’oe i te ’ōrama o te rā’au o te ora i roto i te 1 Nephi 8 ’e 11.

  • E aha tā te tumu rā’au no te ora e fa’ahōho’a ra i roto i teie ’ōrama ? (Hi’o 1 Nephi 11:21–23.)

  • E aha tā Lehi i hina’aro roa i muri mai i tōna ’amura’a i te hotu ? (Hi’o 1 Nephi 8:10–18.)

  • I roto i te ’ōrama, e aha tē tītauhia i te mau ta’ata ’ia rave nō te ’amu i te hotu ? E aha tē tītauhia ia tātou ’ia rave nō te fa’ari’i i te mau ha’amaita’ira’a ato’a nō te tāra’ehara a te Fa’aora ? Nāhea te mau parau fafau ’e te mau fafaura’a i te tauturu ia tātou ’ia fa’ari’i i teie mau ha’amaita’ira’a ?

  • Nāhea ’oe e tauturu ai ia vetahi ’ē ’ia ’amu i te mau hotu o te ’evanelia ?

Te ha’amanara’a ’e te mana o tō ’oe pi’ira’a

’Ua pi’ihia ’e ’ua fa’ata’ahia ’oe nō te « [porora’a] atu i te mau parau ’oa’oa nō te poupou rahi, ’oia ho’i te ’evanelia mure ’ore (Te Ha’api’ira’a Tumu ’e te mau Fafaura’a 79:1). Mai te mau tamāroa a Mosia, e nehenehe ’oe e ha’api’i i te ta’ata ma te ha’amanara’a ’e te mana o te Atua (hi’o Alama 17:2–3).

I raro a’e i te fa’aterera’a a te Mesia, ’ua fa’aho’ihia mai te ha’amanara’a nō te poro haere i te ’evanelia nā roto i te peropheta Iosepha Semita. I tō ’oe fa’ata’ara’ahia ’ei misiōnare, ’ua fa’ari’i ’oe i taua ha’amanara’a ra. E ’āpe’ehia te reira i te ti’ara’a, te tura ’e te hōpoi’a nō te ti’a atu nō te Fatu ’e nō te ha’api’ira’a i te ta’ata i tāna ’evanelia.

E ’āpe’e-ato’a-hia mai teie ha’amanara’a i te tahi hōpoi’a ’ia ora ti’amā noa nō tō ’oe pi’ira’a. ’A feruri i tō ’oe fa’ata’ara’a ’ei fa’ata’ara’a mau. ’A fa’aātea ia ’oe i te hara ’e i te mau mea ’ī’ino ato’a ’e te faufau. ’A fa’aātea ’ē ia ’oe i te mau peu ’e te ferurira’a a tō teie nei ao. ’A pe’e i te mau ture i roto i Te mau ture misiōnare nō te mau pipi a Iesu Mesia. ’Ei ti’a nō te Fatu, « ’ei ha’apa’ora’a nā tei fa’aro’o ra » (1 Timoteo 4:12). ’A fa’atura i te i’oa o Iesu Mesia nā roto i tā ’oe mau ’ohipa ’e tā ’oe mau parau.

Ta’a ’ē noa atu te ha’amanara’a, e tītauhia te mana pae vārua nō te rave i tō ’oe pi’ira’a. E hōro’a te Atua i te mana pae vārua ia ’oe mai te mea e ’ohipa tāmau ’oe nō te ha’apūai i tō ’oe ’itera’a pāpū nōna, nō Iesu Mesia, ’e nō te mau parau mau o te ’evanelia tā ’oe e ha’api’i. E hōro’a ’oia i te mana pae vārua ’ia pure ’oe, ’ia ha’api’i ’oe i te mau pāpa’ira’a mo’a, ’e ’ia ’imi ’oe i te rāve’a nō te fa’atupu i tā ’oe fā misiōnare. E hōro’a ’oia i te mana pae vārua ’a tūtava ai ’oe i te ha’apa’o i tāna mau fa’auera’a ’e te mau fafaura’a tā ’oe i rave ’a fa’ari’i ai i te mau ’ōro’a nō te fa’aorara’a (hi’o Te Ha’api’ira’a Tumu ’e te mau Fafaura’a 35:24).

E nehenehe te mana pae vārua e fa’a’itehia mai mai te mea ’oe :

Heheura’a pāpa’ira’a mo’a

Nāhea ’oe i te fa’ari’i ’e i te ha’apūai i te ’itera’a pāpū ?

Nāhea ’oe i te fa’ari’i i te mana pae vārua ?

Ha’api’ira’a ta’ata hō’ē

’A hi’opo’a ’e ’a feruri i te mau fafaura’a i muri nei ’o tā ’oe i rave i mua i te Atua. ’A tai’o māite i te mau ha’amaita’ira’a tā te Atua i fafau i te feiā ’o tei ha’apa’o i teie mau fafaura’a. ’A feruri i te mau ha’amaita’ira’a tā ’oe i fa’ari’i nā roto i tō ’oe ha’apa’ora’a i te reira. ’A pāpa’i i te mau mana’o e tae mai, i roto i tā ’oe buka tuatāpapara’a ha’api’ira’a.

Te bāpetizora’a ’e te ha’amaura’a

Te fa’atōro’ara’a i te Autahu’ara’a (nō te mau peresibutero)

Te ’ōro’a hiero

  • Ora i te ture nō te ha’apa’o.

  • Ha’apa’o i te ture nō te tusia.

  • Ha’apa’o i te ture nō te ’evanelia a Iesu Mesia.

  • Ha’apa’o i te ture nō te vi’ivi’i ’ore.

  • Ha’apa’o i te ture nō te ha’amo’ara’a.

  • (Hi’o Buka arata’i rahi, 27.2.)

Ha’api’ira’a ta’ata hō’ē ’e ha’api’ira’a ’e te hoa misiōnare

’A tai’o i te Ioane 15:1–16. Nāhea te Mesia e riro ai ’ei vine ? Nāhea ’outou e riro ai ’ei ’āma’a nō taua vine ra ? E aha te tā’amura’a e vai ra i rotopū i tō ’outou pi’ira’a ’e teie aura’a ?

’A tai’o i tā ’outou parau tāvinira’a. ’A pāpa’i i tō ’outou mau mana’o ’e tō ’outou mau ferurira’a nō ni’a i tā ’outou e tai’o ra. I te mau taime ato’a e tuatāpapa ai ’outou i teie pene, ’a feruri ’ia nā ni’a iho ’outou i te ravera’a. ’A tāpa’o e nāfea tō ’outou mau mana’o hōhonu e taui atu i te roara’a o te tau.

Ha’api’ira’a ta’ata hō’ē

’A tai’o māite i Te Ha’api’ira’a Tumu ’e te mau Fafaura’a 109:13–15, 21–30, 38–39, 55–57. E mau tuha’a teie mau ’īrava nō roto mai i te pure fa’auruhia a te peropheta Iosepha Semita nō te hiero nō Kirtland.

’A pāpa’i i te tahi tāpura nō te mau ha’amaita’ira’a tā Iosepha Semita i ani nō te feiā ha’apa’o maita’i tei fa’ari’i i tō rātou ’ōro’a hiero i roto i te fare mo’a o te Fatu. ’E aha tō ’oe mau mana’o nō ni’a i teie mau ha’amaita’ira’a ?

Tītau ’ia pārahi mai te Vārua Maita’i ia ’oe ra

’Ua fa’ari’i ’oe i te hōro’a nō te Vārua Maita’i i te ha’amaura’ahia ’oe ’ei melo nō te ’Ēkālesia. ’Ei misiōnare—’e i te roara’a o tō ’oe orara’a—te hō’ē mea tei tītaurahi-roa-hia, ’o te vaira’a ïa te Vārua Maita’i i pīha’i iho ia ’oe (hi’o i te 1 Nephi 10:17 ; 3 Nephi 19:9). Te Vārua Maita’i, ’o te toru ïa o te melo nō te Atuara’a.

E arata’i, e ha’api’i ’e e tāmāhanahana te Vārua Maita’i ia ’oe. E tāmā ’e e ha’amo’a ’oia ia ’oe. E parau pāpū ’oia i te parau mau ’e e fa’a’ite pāpū ’oia nō te Metua ’e te Tamaiti. E fa’atupu ’oia i tō ’oe fa’afāriura’a ’e te fa’afāriura’a o te feiā ’o tā ’oe e ha’api’i. (Hi’o 3 Nephi 27:20 ; 28:11 ; Etera 12:41 ; Moroni 8:26 ; 10:5 ; Ioane 15:26.)

E fa’a’ite te Vārua Maita’i « ’ia ’outou i te mau mea ato’a tā ’outou e rave » (2 Nephi 32:5). E fa’arahi ’oia i tō ’oe mau ’aravihi ’e tā ’oe tāvinira’a, hau atu ā i tā ’oe e nehenehe e rave ia ’oe iho.

Te ’imira’a ’ia vai te Vārua Maita’i ia ’oe ra, ’ia riro ïa ’ei hō’ē o tō ’oe mau hina’aro pāpū roa e ti’a ai. E fa’ari’i ’oe i tōna auhoara’a ’ia :

Peresideni Russell M. Nelson

« Tē tāparu nei au ia ’outou ’ia fa’arahi atu ā i tō ’outou ’aravihi pae vārua nō te fa’ari’i i te heheura’a […] ’A mā’iti ia rave i te ’ohipa pae vārua tītauhia nō te fāna’o i te hōro’a nō te Vārua Maita’i, nō te fa’aro’o pinepine a’e ’e fa’aro’o pāpū a’e, i te reo o te Vārua » (Russell M. Nelson, « Heheura’a nō te ’Ēkālesia, heheura’a nō tō tātou orara’a », Liahona, Mē 2018, 96).

Ha’api’i ’ia ’ite mau ē, nā te Vārua terā

E rave maita’i atu ā ’oe i tā ’oe fā misiōnare mai te mea e ha’api’i ’oe ’ia māramarama ’e ’ia pe’e i te arata’ira’a a te Vārua Maita’i. I te rahira’a o te taime e paraparau te Vārua ma te marū, i roto i tō ’oe ferurira’a ’e tō ’oe mau mana’o. ’A tūtava i te ’imi, i te ’ite ’e i te pe’e i teie mau muhumuhu patatoa. E tae mai te reira nā roto i te mau rāve’a e rave rau (hi’o pene 4 ; hi’o ato’a Te Ha’api’ira’a Tumu ’e te mau Fafaura’a 8:2–3 ; 11:12–14 ; Galatia 5:22–23).

Ha’api’i i te ta’ata ma te pe’e i te Vārua

Te ’evanelia a Iesu Mesia ’o te « mana ïa o te Atua, ’ia ora te feiā ato’a i fa’aro’o ra » (Roma 1:16). Nō reira ïa e tītauhia ai i te poro’i nō te Fa’aho’ira’a mai o te ’evanelia ’ia ha’api’ihia ma te mana hanahana—te mana o te Vārua Maita’i.

’Ua parau te Fatu : « E hōro’ahia atu te Vārua ia ’outou nā roto i te pure fa’aro’o ; ’e mai te mea e’ita ’outou e fa’ari’i i te Vārua, ’eiaha roa ïa ’outou e ha’api’i atu » (Te Ha’api’ira’a Tumu ’e te mau Fafaura’a 42:14 ; hi’o ato’a 50:13–14, 17–22). ’A ha’api’i ai ’oe nā roto i te mana o te Vārua Maita’i e :

E ha’amaita’i rahi mai te Fatu ia ’oe mai te mea ē, e ’imi ’oe, e turu’i, ’e e ha’api’i ’oe nā roto i te Vārua Maita’i (hi’o pene 4 ’e 10).

One by One [Ta’ihō’ē], nā Walter Rane

Te ’evanelia a te Mesia ’e te ha’api’ira’a tumu a te Mesia

Nā te ’evanelia a Iesu Mesia e fa’ata’a i tā ’oe parau poro’i ’e i tā ’oe fā. Nō roto mai i te reira te « e aha » ’e te « nō te aha » ’o tā ’oe tāvinira’a misiōnare. Tei roto i tāna ’evanelia te tā’āto’ara’a o te ha’api’ira’a tumu, te mau parau tumu, te mau ture, te mau fa’auera’a, te mau ’ōro’a, ’e te mau fafaura’a e tītauhia nō te fa’aorara’a ’e nō te fa’ateiteira’a.

Te parau poro’i o te ’evanelia ’oia ho’i e nehenehe tā tātou e fa’ari’i i te mana tāra’ehara o Iesu Mesia nā roto i te fa’a’ohipara’a i te fa’aro’o iāna, te tātarahapara’a, te bāpetizora’a, te fa’ari’ira’a i te hōro’a nō te Vārua Maita’i, ’e te fa’a’oroma’ira’a ē tae noa atu i te hope’a (hi’o 3 Nephi 27:13–22).

’Ua parau-ato’a-hia te reira te ha’api’ira’a tumu a te Mesia. Te orara’a i teie ha’api’ira’a tumu, ’o te huru ïa tātou e haere ai i te Mesia ’ia fa’aorahia (hi’o 1 Nephi 15:14). ’Ua ha’api’i-pāpū-hia te reira i roto i te Buka a Moromona (hi’o 2 Nephi 31 ; 32:1–6 ; 3 Nephi 11:31–40). Tā ’oe fā ’o tē tauturura’a ïa i te mau ta’ata ’ia haere mai i te Mesia nā roto i te tauturura’a ia rātou ’ia ora i tāna ha’api’ira’a tumu.

Hyrum Smith

« ’A poro i te mau parau tumu mātāmua o te ’evanelia—’a poro fa’ahou ā i te reira ; e ’ite ’outou ē, i terā mahana ’e terā mahana, e heheuhia mai ia ’outou te mau mana’o ’āpī ’e te tahi atu ā māramarama. E nehenehe ’outou e fa’arahi i te reira ’ia ta’a maita’i ia ’outou te reira. E nehenehe ïa ʼoutou e haʼamāramarama atu ā i te reira i te feiā tā ʼoutou e haʼapiʼi atu » (Hyrum Smith, i roto i te ’Ā’amu, 1838-1856, buka E-1 [1 nō Tiurai 1843–30 ’Ēperēra 1844], 1994, josephsmithpapers.org).

Heheura’a pāpa’ira’a mo’a

E aha tā te mau pāpa’ira’a mo’a ’e te parau poro’i i muri nei e ha’api’i nei nō ni’a i te ’evanelia a Iesu Mesia ’e te ha’api’ira’a tumu a te Mesia ? ’A pāpa’i i te mau mana’o i roto i tā ’oe buka tuatāpapara’a ha’api’ira’a nō te tauturu ia ’oe ’ia māramarama ’e ’ia ha’amana’o.

The Converting Power of the Book of Mormon [Te mana fa’afāriu o te Buka a Moromona], nā Ben Sowards

Fa’aro’o ia Iesu Mesia

’O te fa’aro’o te niu nō te tahi atu mau parau tumu o te ’evanelia. E parau tumu te reira nō te ’ohipa ’e nō te mana.

Tītauhia i tō tātou fa’aro’o ’ia ha’atumuhia i ni’a ia Iesu Mesia nō te arata’i ia tātou i te fa’aorara’a. ’Ua ha’api’i te Fa’aora : « I aroha mai te Atua i tō te ao, ’e ’ua tae roa i te hōro’a mai i tāna Tamaiti Fānau Tahi, ia ’ore ’ia pohe tē fa’aro’o iāna ra, ’ia roa’a rā te ora mure ’ore » (Ioane 3:16).

Te fa’aro’o ia Iesu Mesia, ’o te ti’aturira’a ïa ē, ’o ’oia ana’e te Tamaiti Fānau Tahi a te Atua. ’O te ti’aturira’a ïa iāna ’ei Fa’aora ’e ’ei Tāra’ehara nō tātou (hi’o Mosia 3:17 ; 4:6–10 ; Alama 5:7–15). ’O te ti’aturi-hope-roa-ra’a ïa iāna ’e i tāna parau, tāna mau ha’api’ira’a ’e tāna mau fafaura’a. E tupu tō tātou fa’aro’o i te Mesia i te rahi ’ia pe’e ana’e tātou i tāna mau ha’api’ira’a ’e tōna hi’ora’a ma te ’ā’au hina’aro mau (hi’o 2 Nephi 31:6–13 ; 3 Nephi 27:21–22).

’Ei misiōnare, ’a tauturu i te mau ta’ata ’ia rave i te parau fafau ’e ’ia tāpe’a i te reira, ’o tē patu i tō rātou fa’aro’o ia Iesu Mesia. E fa’aineine teie mau fafaura’a ia rātou ’ia fa’ari’i i te mau ’ōro’a ’e ’ia rave ’e ’ia ha’apa’o i te mau fafaura’a mo’a ’e te Atua.

Tātarahapara’a

E arata’i te fa’aro’o ia Iesu Mesia i te tātarahapara’a (hi’o Helamana 14:13). ’Ua riro te tātarahapara’a ’ei rāve’a nō te fāriu atu i te Atua ra ’e te fāriu-’ē-ra’a i te hara. ’Ia tātarahapa ana’e tātou, e taui ïa tā tātou mau ’ohipa, tō tātou mau hina’aro ’e tō tātou mau mana’o ’ia au i te hina’aro o te Atua.

Nā roto i tāna tusia tāra’ehara, ’ua ’aufau te Fa’aora i te ho’o nō tā tātou mau hara (hi’o Mosia 15:9 ; Alama 34:15–17). Mai te mea e tātarahapa tātou, e fa’a’orehia tā tātou mau hara nā roto ia Iesu Mesia ’e tāna tusia, i te mea ē, e tītau ’oia i tōna mau ti’ara’a tahiti’a nō tei tātarahapa (hi’o Moroni 7:27–28). ’Ia au i te mau parau a te peropheta Lehi, « ’ua tae tō tātou ora […] nā roto i te mau maita’i rahi, ’e te aroha, ’e te maita’i ho’i nō te Mesia Mo’a » (2 Nephi 2:6, 8).

’Ua hau atu te tātarahapara’a i te rave-noa-ra’a i te fa’aotira’a pāpū ’ia taui i te hō’ē peu ’e ’aore rā ’ia upo’oti’a i ni’a i te hō’ē paruparu. Te tātarahapara’a ’o te fāriura’a mau ïa i te Mesia ra, ’o tei hōro’a mai ia tātou i te mana nō te ’ite i te hō’ē « fa’ahuru-’ē-ra’a rahi » i roto i tō tātou ’ā’au (hi’o Alama 5:12–14). Tei roto ato’a ïa te ha’eha’a nō te ha’apa’o i te parau a te Vārua ’e nō te auraro i te hina’aro o te Atua. ’Ia tātarahapa tātou, e fa’arahi tātou i tā tātou parau fafau ’ia tāvini i te Atua ’e ’ia ha’apa’o i tāna mau fa’auera’a. E fānau-fa’ahou-hia tātou i te pae vārua i roto i te Mesia.

Te tātarahapara’a ’o te hō’ē ïa parau tumu maita’i ’o tē ’āfa’i mai i te ’oa’oa ’e te hau. E arata’i te reira ia tātou « i raro a’e i te mana nō te Tāra’ehara, ’e i te fa’aorara’a o tō [tātou] vārua » (Helamana 5:11).

Ma te taiā ’ore ’e te here, ’a tauturu i te mau ta’ata ’ia māramarama ē nō te aha e ti’a ai ia rātou ’ia tātarahapa. Nā roto i te anira’a i te mau ta’ata tā ’oe e ha’api’i ’ia rave i te mau fafaura’a, tē ani ra ïa ’oe ia rātou ’ia tātarahapa ma te pūpū ia rātou i te tīa’ira’a.

Heheura’a pāpa’ira’a mo’a

E aha te ha’api’ira’a tā ’oe e nehenehe e ’apo mai i roto i te mau pāpa’ira’a mo’a i muri nei nō ni’a i te porora’a i te tātarahapa ?

Bāpetizora’a

E fa’aineine te fa’aro’o ia Iesu Mesia ’e te tātarahapara’a ia tātou nō te ’ōro’a nō te bāpetizora’a. « Te mau hotu mātāmua nō te tātarahapara’a ’o te bāpetizora’a ïa » (Moroni 8:25). E tomo tātou i te ’ūputa nō te ora mure ’ore ’ia bāpetizo-utuhi-ana’e-hia tātou e te hō’ē ta’ata tei mau i te ha’amanara’a a te Atua.

’Ia bāpetizohia ana’e tātou, e rave tātou i te hō’ē fafaura’a i mua i te Atua. Mai te mea e ha’apa’o tātou i teie fafaura’a, e parau fafau mai te Atua ē e hōro’a mai ’oia i te auhoara’a o te Vārua Maita’i, e fa’a’ore ’oia i tā tātou mau hara, ’e e hōro’a ’oia i te ti’ara’a melo i roto i te ’Ēkālesia a Iesu Mesia (hi’o Te Ha’api’ira’a Tumu ’e te mau Fafaura’a 20:77, 79 ; Moroni 6:4). E ha’aputuputuhia tātou i te Fatu ’e e fānau-vārua-hia tātou nā roto i teie ’ōro’a ’oa’oa ’e te tīa’ira’a rahi.

Te bāpetizora’a ’e te ha’amaura’a i te feiā tā ’oe e ha’api’i, ’o te tumu mau ïa nō tā ’oe fā. ’A tauturu ia rātou ’ia māramarama ē nō te fa’ari’i i te bāpetizora’a, tītauhia ia rātou ’ia ha’apa’o i te mau tītaura’a o Te Ha’api’ira’a Tumu ’e te mau Fafaura’a 20:37.

Ha’api’ira’a ’e te hoa misiōnare

Mā’imi i te mau pāpa’ira’a mo’a i muri nei :

’Ia au i tā ’oe tai’ora’a i te mau pāpa’ira’a mo’a i ni’a nei, ’a fa’anaho mai e piti tāpura :

  1. Te mau tītaura’a nō te bāpetizora’a

  2. Te mau fafaura’a e ravehia i te bāpetizora’a

’A ’āparau e tō ’oe hoa misiōnare e nāhea i te ha’api’i i te reira ia vetahi ’ē.

Ha’amaura’a ’e te hōro’a nō te Vārua Maita’i

E piti tuha’a tō te bāpetizora’a : te bāpetizora’a i roto i te pape ’e te bāpetizora’a Vārua. I muri a’e i te bāpetizora’a i te pape, e rave-hope-hia te bāpetizora’a ’ia ha’amauhia tātou nā roto i te tu’ura’a rima a te hō’ē ta’ata tei mau i te ha’amanara’a a te Atua. Nā roto i te ha’amaura’a, e nehenehe tātou e fa’ari’i i te hōro’a nō te Vārua Maita’i ’e te matarara’a o tā tātou mau hara.

’Ua ha’api’i te peropheta Iosepha Semita : « Te bāpetizora’a i te pape ’o te ’āfara’a ïa o te bāpetizora’a, ’e ’aita tōna e faufa’a mai te mea ’aita te tahi ’āfa—’oia ho’i, te bāpetizora’a a te Vārua Maita’i » (Te mau Haʼapiʼiraʼa a te mau Peresideni o te ʼĒkālesia : Iosepha Semita [2007], 95).

’Ua ha’api’i ’o Alama : « ’Ia fānau-fa’ahou-hia te mau ta’ata ato’a e ti’a ai, ’oia ïa, ’ia fānauhia i te Atua ra, ’ia tauihia mai tō rātou huru tāhuti ’e te huru hi’ara’a, ’ei huru parauti’a, ’ia fa’aorahia e te Atua, ’ia riro ’ei tamari’i tamāroa ’e ’ei tamari’i tamāhine nāna ; ’e nā roto i te reira, e riro rātou ’ei ta’ata fa’a’āpīhia » (Mosia 27:25–26).

Nō te ta’ata tātarahapa, ’ua riro te bāpetizora’a i te pape ’e te Vārua mai te tahi fānau-fa’ahou-ra’a i te pae vārua.

Heheura’a pāpa’ira’a mo’a

E aha te tahi mau ha’amaita’ira’a nō te fa’ari’ira’a i te hōro’a nō te Vārua Maita’i ?

Nō te aha tātou e hina’aro ai i te hōro’a nō te Vārua Maita’i ?

Fa’a’oroma’i ē tae noa atu i te hope’a

Te pe’era’a ia Iesu Mesia, e parau fafau ïa nō te orara’a tā’āto’a. E fa’a’oroma’i tātou ē tae noa atu i te hope’a ’a tāmau noa ai tātou i te fa’a’ohipa i te fa’aro’o i te Mesia ’e e tātarahapa i te mau mahana ato’a ’e e fa’ari’i i te mau ’ōro’a ’e te mau fafaura’a ato’a o te ’evanelia ’e e ha’apa’o i taua mau fafaura’a ra ’e e tāpe’a i te auhoara’a o te Vārua Maita’i. Tei roto ato’a te fa’a’āpīra’a i te mau fafaura’a tā tātou i rave maoti te ravera’a i te ’ōro’a mo’a.

The Lord Is My Shepherd [’O Iehova tō’u tīa’i], nā Yongsung Kim

The Lord Is My Shepherd [’O Iehova tō’u tīa’i], nā Yongsung Kim. Hōho’a hō-mai-hia e Havenlight.

Te ’evanelia—Tō tātou ’ē’a ho’ira’a i tō tātou Metua i te ao ra

E nehenehe te ’evanelia a Iesu Mesia e taui i te huru o tō tātou orara’a ’e ’o vai tā tātou e riro mai. E ’ere te reira mau parau tumu i te mau ta’ahira’a ’o tā tātou e rave i te hō’ē noa taime i roto i te orara’a. ’Ia nā ni’a iho noa tātou i te nā reira i te roara’a o tō tātou orara’a, e ha’afātata atu ā te reira ia tātou i te Atua ’e e riro mai te reira ’ei hōho’a fa’anahora’a ho’ona roa atu ā nō te orara’a. E hōpoi mai te reira i te hau, te fa’aorara’a ’e te fa’a’orera’a hara. Tē fa’ata’a ato’a nei ho’i te reira i te ’ē’a tā te Metua i te ao ra i hōro’a ia tātou nō te fa’ari’i i te ora mure ’ore i pīha’i iho iāna.

E arata’i te ’evanelia a Iesu Mesia i tā ’oe ’ohipa ’ei misiōnare. E rōtahi ato’a te reira i tā ’oe mau tauto’ora’a. E tauturu i te ta’ata ’ia roa’a tō rātou fa’aro’o ia Iesu Mesia nō te tātarahapa (hi’o Alama 34:15–17). E ha’api’i atu ’e e parau pāpū atu ē ’ua fa’aho’i-fa’ahou-hia mai te ’īra’a o te ’evanelia a Iesu Mesia ’e te ha’amanara’a o te autahu’ara’a. E ani i te mau ta’ata ’ia bāpetizo ’e ’ia ora i te mau ha’api’ira’a a te Fa’aora.

E ha’amaita’i te ’evanelia a Iesu Mesia i te mau tamari’i ato’a a te Atua

Nō te mau tamari’i ato’a a te Atua te ’evanelia a Iesu Mesia. Tē ha’api’i mai nei te mau pāpa’ira’a mo’a ē « hō’ē ana’e rātou » i mua i te Atua. Tē ani nei ’oia « ia rātou ato’a ’ia haere mai iāna ra ’e ’ia fa’ari’i i tōna maita’i ; ’e ’aita roa ’oia e pāto’i i te hō’ē ’ia haere mai iāna ra » (2 Nephi 26:33).

E ha’amaita’i te ’evanelia ia tātou i roto i tō tātou orara’a tāhuti nei ’e i roto i te orara’a a muri atu. E rahi atu tō tātou ’oa’oa—’ei ta’ata hō’ē ’e ’ei ’utuāfare—’ia ora ana’e tātou mai te au i te mau ha’api’ira’a a Iesu Mesia (hi’o Mosia 2:41 ; « Te ’Utuāfare : E Poro’i i tō te ao nei », ChurchofJesusChrist.org). Nā te orara’a i te ’evanelia e fa’ahōhonu i tō tātou ’oa’oa, e fa’auru i tā tātou mau ’ohipa, ’e e ha’afaufa’a i tō tātou mau tā’amura’a.

Te hō’ē parau rahi o te ’evanelia i fa’aho’ihia mai, maori rā, e tuha’a tātou pā’āto’a nō te ’utuāfare o te Atua. E mau tamāroa ’e e mau tamāhine here tātou nāna. Noa atu te huru o tō tātou orara’a ’utuāfare i ni’a i te fenua nei, e melo tātou tāta’itahi nō te ’utuāfare o te Atua.

Te tahi ato’a tuha’a rahi o tā tātou poro’i maori rā e nehenehe te mau ’utuāfare e tā’atihia ē a muri noa atu. ’Ua ha’amauhia te ’utuāfare e te Atua. ’Ua ha’api’i te mau peropheta nō te mau mahana hope’a nei :

« E fa’ati’a te fa’anahora’a hanahana nō te ’oa’oa a te [Metua i te ao ra] i te mau aura’a ’utuāfare ’ia vai tāmau noa i ’ō atu i te pohe. Nā te mau ’ōro’a ’e te mau fafaura’a mo’a o te ti’a ’ia ravehia i roto i te mau hiero mo’a e fa’ati’a i te ta’ata ’ia ho’i fa’ahou atu i mua i te aro o te Atua, ’e ’ia tā’atihia te mau ’utuāfare e amuri noa atu » (« Te ’Utuāfare : E Poro’i i tō te Ao nei »).

E rave rahi te ta’ata ’aore re’a rāve’a tā rātou nō te fa’aipoipo ’e nō te fāna’o i te mau tā’amura’a ’utuāfare. E rave rahi tei fa’aruru i te fa’ata’ara’a ’e i te tahi atu vaira’a fifi i roto i te ’utuāfare. Terā rā, tē ha’amaita’i nei te ’evanelia ia tātou tāta’itahi, noa atu te huru o tō tātou orara’a ’utuāfare. Mai te mea e ha’apa’o maita’i tātou, e hōro’a mai te Atua ia tātou i te rāve’a nō te fa’ari’i i te mau ha’amaita’ira’a o te hō’ē ’utuāfare here, i roto ānei i teie orara’a ’e ’aore rā, i roto i te orara’a a muri atu (hi’o Mosia 2:41).

Te parau poro’i nō te Fa’aho’i-fa’ahou-hia mai : Te niu nō te fa’aro’o

Noa atu te vāhi i reira ’oe e tāvini ai ’e ’aore rā e ha’api’i ai, ’a ha’atumu i tā ’oe ha’api’ira’a i ni’a ia Iesu Mesia ’e i ni’a i te Fa’aho’i-fa’ahou-ra’a-hia mai tāna ’evanelia. ’A tuatāpapa ai ’oe i te ha’api’ira’a tumu i roto i te mau ha’api’ira’a a te mau misiōnare, e ’ite ’oe ē e poro’i ’ōtahi tā tātou : ’O Iesu te Mesia, tō tātou Fa’aora ’e Tāra’ehara. Nā roto i te hō’ē peropheta ora, ’ua fa’aho’i fa’ahou mai te Metua i te ao ra i te ’ite nō ni’a i tāna fa’anahora’a nō tō tātou fa’aorara’a. ’Ua ha’atumuhia teie fa’anahora’a i ni’a ia Iesu Mesia. Nā roto i tāna tusia tāra’ehara, ’ua ha’amatarafa’ati’a Iesu i te rāve’a nō tātou pā’āto’a ’ia fa’aorahia i te hara ’e i te pohe, ’e ’ia ho’i fa’ahou i te Metua i te ao ra.

’A tauturu i te mau ta’ata tā ’oe e ha’api’i ’ia māramarama i te mau mea i muri nei :

  • ’O te Atua tō tātou Metua i te ao ra. ’Ua here hope roa ’oia ia tātou. E tamari’i te ta’ata tāta’itahi i ni’a i te fenua nei nā te Atua ’e e melo nō tōna ’utuāfare.

  • ’Ua hōro’a mai te Metua i te ao ra i te hō’ē fa’anahora’a nō tātou nō te fa’ari’i i te tāhuti ’ore ’e te ora mure ’ore, ’o tāna ïa mau ha’amaita’ira’a rahi roa a’e (hi’o Mosia 1:39). ’Ua haere mai tātou i te fenua nei nō te ha’api’i, nō te haere i mua, ’e nō te fa’aineine nō te ’īra’a o tāna mau ha’amaita’ira’a.

  • ’Ei tuha’a nō tāna fa’anahora’a, ’ua hōro’a mai te Metua i te ao ra i te mau fa’auera’a nō te arata’i ia tātou i roto i teie orara’a ’e nō te tauturu ia tātou ’ia ho’i fa’ahou iāna ra (hi’o, ’ei hi’ora’a, Exodo 20:3–17).

  • I roto i teie orara’a, e hara ’e e pohe tātou pā’āto’a. Nō te aroha o te Metua i te ao ra ia tātou, ’ua tono mai ’oia i tāna Tamaiti, ’o Iesu Mesia nō te fa’aora ia tātou i te hara ’e i te pohe.

  • Maoti te tusia tāra’ehara a Iesu, e nehenehe tātou ’ia tāmāhia i tā tātou mau hara mai te mea e tātarahapa tātou ’e ’ia bāpetizohia ’e ’ia ha’amauhia. E hōro’a mai te reira i te hau ia tātou ’e e fa’ati’a ia tātou ’ia ho’i fa’ahou i mua i te aro o te Atua ’e e fa’ari’i i te ’īra’a o te ’oa’oa.

  • Maoti te ti’afa’ahoura’a o Iesu, e ti’afa’ahou mai tātou pā’āto’a i muri mai i te pohera’a. ’Oia ho’i e ’āmui-fa’ahou-hia te tino ’e te vārua o te mau ta’ata tāta’itahi ’e e ora ē a muri noa atu.

  • I te roara’a o te ’ā’amu o te Bibilia, ’ua heheu mai te Fatu i tāna ’evanelia ’e ’ua fa’anaho i tāna ’Ēkālesia nā roto i te mau peropheta. E rave rahi taime, ’ua pāto’i te mau ta’ata i te reira. ’Ua ha’amata te peu nō te tāivara’a i te ’evanelia ’e te tītaura’a ’ia fa’aho’i-fa’ahou-hia mai te reira i te tau o te Faufa’a Tahito.

  • I muri mai i te pohera’a ’e te ti’afa’ahoura’a o te Fa’aora, ’ua arata’i tāna mau ’āpōsetolo i te ’Ēkālesia nō te hōʼē tau. I te pae hope’a, ’ua pohe rātou, ’ua mo’e te ha’amanara’a autahu’ara’a, ’e ’ua tupu fa’ahou ā te tahi tāivara’a i te mau ha’api’ira’a a te Fa’aora. ’Ua taui te ta’ata i te ha’api’ira’a tumu ’e te mau ’ōro’a.

  • ’Ua fa’aho’i-fa’ahou-hia mai te ’evanelia a Iesu Mesia e te Metua i te ao ra nā roto i te peropheta Iosepha Semita. ’Ua fā mai te Metua i te ao ra ’e ’o Iesu Mesia ia Iosepha i te tau fa’atupura’a rā’au nō te matahiti 1820. I muri mai ’ua fa’ari’i ’o Iosepha Semita i te ha’amanara’a nō te autahu’ara’a ’e ’ua arata’ihia ’oia nō te fa’ati’a fa’ahou i te ’Ēkālesia a Iesu Mesia i ni’a iho i te fenua.

E ha’api’i ē e ’ere te ’Ēkālesia a Iesu Mesia i te tahi atu ha’apa’ora’a fa’aro’o. E ’ere ato’a te reira i te ’Ēkālesia Marite. ’Aita, e fa’aho’i-fa’ahou-ra’a rā nō te « ’īra’a o [te] ’evanelia » a Iesu Mesia (Te Ha’api’ira’a Tumu ’e te mau Fafaura’a 1:23). E ’ore roa te reira e ’īriti-’ē-fa’ahou-hia mai ni’a atu i te fenua nei.

Tē fa’a’ite pāpū nei Te Buka a Moromona : Te tahi fa’ahou ’ite nō Iesu Mesia, nō Iesu Mesia ’e tāna misiōni hanahana ’ei Fa’aora nō teie nei ao. E ’itera’a pāpū pūai ato’a ’oia ē ’ua fa’aho’i fa’ahou mai ’o Iesu Mesia i tāna ’evanelia ’e i tāna ’Ēkālesia nā roto i te peropheta ra Iosepha Semita. E ani manihini ’e e tauturu i te mau ta’ata ’ia tai’o i te Buka a Moromona ’e ’ia pure nō ni’a i tāna parau poro’i.

’A ti’aturi i te fafaura’a fa’ahiahia roa i roto i te Moroni 10:3–5. ’A fa’aitoito i te mau ta’ata ’ia ani i te Atua ma te ’ā’au tae ’e te mana’o pāpū ē e parau nā te Atua ānei te Buka a Moromona. Te purera’a ma te ’ā’au tae mau, ’o te hina’arora’a ïa e rave mai te au i te pāhonora’a e tae mai nā roto i te ’itera’a pāpū o te Vārua Maita’i. E riro mai teie ’itera’a ’ei niu nō te fa’aro’o o te ta’ata ē, ’ua fa’aho’i fa’ahou mai te Mesia i tāna ’Ēkālesia. ’A tauturu i te feiā tā ’oe e ha’api’i ra ’ia ’imi i te ha’apāpūra’a vārua.

Heheura’a pāpa’ira’a mo’a

Nāhea ’oe ’ia fa’a’ohipa i te Buka a Moromona i roto i te ’ohipa misiōnare ?

Ha’api’ira’a ta’ata hō’ē

’A feruri na e pāpa’i ’oe i te hō’ē paratarāfa nō ni’a i te parau poro’i o te Fa’aho’i-fa’ahou-ra’a i ni’a i te rāve’a ha’apararera’a sōtiare ’e ’aore rā, te mau rāve’a ha’apararera’a o te fenua iho. I roto i tā ’oe buka tuatāpapara’a ha’api’ira’a, ’a pāpa’i i te hō’ē upo’o parau ’o tē fa’a’ite e aha te parau poro’i tumu. I muri iho, ’a pāpa’i i te mau mana’o i tō ’oe ferurira’a ’e i tō ’oe ’ā’au nō ni’a i taua parau poro’i ra. ’A fa’ata’a e mea nāhea te ’itera’a maitai a’e i te tauira’a i te huru o tō ’oe orara’a ’e te huru nō tō ’oe hi’ora’a i te ao e hā’ati nei ia ’oe.

Te fa’ati’ara’a ’e te fa’arahira’a i te ’Ēkālesia

I tō Iesu Mesia fa’aho’ira’a mai i tāna ’Ēkālesia, ’ua fa’aue ’oia i te peropheta ra ia Iosepha Semita ’e i te tahi atu mau ta’ata ’ia « fa’ati’a » ’e ’ia « fa’arahi » i te reira (Te Ha’api’ira’a Tumu ’e te mau Fafaura’a 31:7 ; 39:13). E fa’ati’ahia ’e e fa’arahihia te ’Ēkālesia ’ia bāpetizohia ’e ’ia ha’amauhia te mau ta’ata e ’itera’a pāpū tō rātou, ’o tē ha’apa’o i tā rātou mau fafaura’a, ’o tē fa’aineine nō te haere i te hiero, ’e ’o tē tauturu i te ha’apūaira’a i tā rātou mau pāroita ’e ’aore rā ’āma’a.

ta’ata e pure ra

’Ei misiōnare, e tauturu ’oe i te fa’ati’a ’e i te fa’arahi i te ’Ēkālesia a te Fa’aora. E rave rau rāve’a nō te rave i te reira. E nehenehe ’oe e turu i te mau melo ’ia fa’a’ite ana’e rātou i te ’evanelia nā roto i te mau parau tumu nō te here, te fa’a’itera’a, ’e te tītau-manihini-ra’a (hi’o Buka arata’i rahi, 23.1). E nehenehe ’oe e tauturu i te mau ta’ata ’ia fa’ari’i i te bāpetizora’a ’e ’ia tupu atu ā i te rahi i roto i tō rātou fa’aro’o. E nehenehe ’oe e tauturu i te mau melo ’āpī ’ia ha’amātau i tō rātou orara’a ’āpī ’e ’ia tāmau noa i te tupura’a i te rahi i te pae vārua. E nehenehe ato’a ’oe e tauturu i te mau melo e ho’i mai nei nō te ha’apūai i tō rātou fa’aro’o ia Iesu Mesia.

E tupu te mau melo ’āpī ’e te mau melo e ho’i mai nei i te rahi, i roto i te ’itera’a pāpū ’e te fa’aro’o, ’a ’ite ai rātou i te ’evanelia i te ’ohipara’a i roto i tō rātou orara’a. Nō te rave fa’aoti i te reira, e mea faufa’a ia rātou ’ia :

  • Fāna’o i te auhoara’a o te mau melo nō te ’Ēkālesia.

  • fa’ari’i i te hō’ē hōpoi’a i roto i te ’Ēkālesia.

  • Fa’a’amuhia i te parau a te Atua.

(Hi’o Gordon B. Hinckley, « Converts and Young Men [Fa’afāriuhia ’e Feiā ’Āpī Tamāroa] », Ensign, Mē 1997, 47.)

E mea ti’a i te mau misiōnare, te feiā fa’atere i reira, ’e te tahi atu ā mau melo o te ’Ēkālesia ’ia fa’ari’i poupou i te fāna’ora’a ’ia aupuru ’e ’ia ha’apūai i te mau melo ’āpī ’e te melo e ho’i mai nei. Nā teie tāvinira’a e tauturu ’ia « tāpe’a ia rātou i ni’a i te ’ē’a ti’a » (Moroni 6:4).

Haere i mua ma te rave i te maita’i

I te roara’a o tāna tāvinira’a i te tāhuti nei, ’ua tāvini te Fa’aora ia vetahi ’ē. ’Ua haere ’oia i terā ’e tera vāhi ma te « hāmani maita’i haere ra » ’e te « a’ora’a i te parau maita’i [te ’ēvanēlia] » (Te ’Ohipa 10:38 ; Mataio 4:23). ’A pe’e ai ’oe i tāna hi’ora’a, e ’itea ia ’oe te mau ta’ata tā ’oe e nehenehe e tāvini ’e ’o tē fa’ari’i mai ia ’outou.

Nā roto i te tāvinira’a, e fa’atupu ’oe i nā ture rahi e piti, te hina’arora’a i te Atua ’e te arohara’a i tō ’oe ta’ata tupu (hi’o Mataio 22:36–40 ; 25:40 ; Mosia 2:17). Nā roto i te tāvinira’a, e nehenehe ’oe, ’e vetahi ato’a, e ’āmui mai ma te pūai ’e te fa’aurura’a.

’Ei misiōnare, e rave ’oe i te ’ohipa tāvinira’a e tārenahia i te mau hepetoma ato’a (hi’o Te mau ture misiōnare, 2.7 ’e 7.2, nō te mau ha’amāramaramara’a ’e te mau arata’ira’a). I raro a’e i te arata’ira’a a tō ’outou peresideni misiōni, e ’itehia paha ia ’outou te mau rāve’a nō te tāvini i roto i te ’oire nā roto i te fa’anahora’a JustServe (i te vāhi ’ua fa’ati’ahia te reira) ’e te mau tauto’ora’a tauturu a te ’Ēkālesia i te ao nei ’e te ’ati.

I te roara’a o te mahana, ’a pure ’e ’a ’imi i te mau rāve’a tārena-’ore-hia nō te rave i te maita’i. ’A fa’aro’o i te Vārua nō te ’ite i te mau rāve’a nō te rave i te mau ’ohipa na’ina’i hāmani maita’i tā ’oe e nehenehe e pūpū atu.

Peresideni Gordon B. Hinckley

« Hina’aro ānei ’outou i te ’oa’oa ? ’Eiaha ïa e ha’apa’o ia ’outou iho ’e ’a ha’amo’e ia ’outou i roto i teie ’ohipa rahi. ’A hōro’a i tā ’outou mau tūtavara’a nō te tauturu i te mau ta’ata […] ’A ti’a fa’a’āfaro, ’a fa’ateitei ia rātou tei paruparu te mau turi ’āvae, ’a fa’a’eta’eta i te mau rima e tārere ra. ’A ora i te ’evanelia a Iesu Mesia » (Gordon B. Hinckley, Te Mau Ha’api’ira’a a te mau Peresideni o te ’Ēkālesia : Gordon B. Hinckley [2016], 209).

Heheura’a pāpa’ira’a mo’a

E aha te vaira’a o te tāvinira’a i roto i te orara’a o te Fa’aora ?

E aha te vaira’a o te tāvinira’a i roto i te misiōni a Amona ’e a Aarona ?

E aha tā te Fatu e ani nei ia ’oe ’ia rave ?

Te hō’ē misiōnare manuia

Tō ’oe manuiara’a ’ei misiōnare, tei te huru nā mua ïa o tō ’oe hina’aro ’e tā ’oe parau fafau ’ia ’imi, ’ia ha’api’i, ’ia bāpetizo, ’e ’ia ha’amau i te feiā fa’afāriuhia, ’e ’ia tauturu ia rātou ’ia riro ’ei pipi ha’apa’o maita’i nā te Mesia ’e ’ei melo nō tāna ’Ēkālesia (hi’o Alama 41:3).

’Aita tō ’oe manuiara’a e fa’ata’ahia nā ni’a i te rahira’a ta’ata tā ’oe e ha’api’i ’e ’aore rā te rahira’a ta’ata tā ’oe e tauturu ’ia hōpoi mai i te bāpetizora’a. ’Aita ato’a te reira e fa’ata’ahia nā ni’a i te mau ti’ara’a fa’atere e mauhia.

’Aita tō ’oe manuiara’a e fa’ata’ahia nā ni’a i te huru te ta’ata e fa’ari’i ia ’oe, i tā ’oe mau tītaura’a manihini ’e i tā ’oe mau ’ohipa hāmani maita’i ’e te ’ā’au ateate. E ti’amāra’a tō te ta’ata ’ia mā’iti e fa’ari’i ’e ’aore rā ’aita i te parau poro’i o te ’evanelia. Tā ’oe hōpoi’a ’o tē ha’api’i ïa ma te māramarama ’e te pūai ’ia nehenehe ia rātou ’ia rave i te hō’ē mā’itira’a māramarama ’o tē ha’amaita’i ia rātou.

’A feruri na i te parabole a te Fa’aora nō ni’a i te mau tārēni i roto i te Mataio 25:14–28. ’Ua fa’ahiahia te fatu fare, ’o tē ti’a nei nō te Fatu, i tōna nā tāvini ha’apa’o maita’i noa atu te fāito ta’a ’ē o tā rāua mau ō (hi’o Mataio 25:21, 23). ’Ua hōro’a ato’a ’oia ia rāua i te hō’ē ā utu’a maita’i, ma te ani manihini ia rāua ’ia tomo « i roto i te ’oa’oara’a a tō ’oe fatu » nō te mea ’ua fa’arahi rāua i te mea tā rāua i fa’ari’i.

’Ua hōro’a mai te Atua ia ’oe i te mau tārēni ’e te mau hōro’a e fa’a’ohipa nō te tāvini iāna. E mea ta’a ’ē tā ’oe mau tārēni ’e tā ’oe mau hōro’a i tā vetahi. ’Ia ’ite mai ’oe ē e mea faufa’a teie mau mea ato’a, ’e tae noa atu te mau mea ’itea-’ore-hia. Mai te mea ē e pūpū ’oe i tā ’oe mau tārēni ’e te mau hōro’a iāna, e fa’arahi ïa ’oia i te reira ma te fa’atupu i te semeio i te mea tā ’oe e pūpū.

’A ha’apae i te fa’aau ia ’oe i ni’a i te tahi atu mau misionare ’e ’ia fāito i te hope’a ’ite-mata-hia o tā ’oe mau tauto’ora’a i ni’a i tā rātou. Pinepine te fa’aaura’a i ni’a i te tahi i te fa’atupu i te fa’ahope’ara’a ’ino, mai te tō’aru’arura’a ’e ’aore rā te te’ote’o. ’E pinepine ato’a te fa’aaura’a i ni’a i te tahi i te fa’ahahi ’ē. Tā te Fatu e hina’aro maori rā tā ’oe tauto’ora’a maita’i roa a’e—nō te « tāvini iāna ma tō ’outou ’ā’au ato’a, tō ’outou pūai, tō ’outou mana’o ’e tō ’outou itoito ho’i » (Te Ha’api’ira’a Tumu ’e te mau Fafaura’a 4:2 ; reta tei fa’ahuru ’ēhia).

E riro ’oe i te ha’aparuparu mai te mea ’aita te ta’ata e fa’ari’i i te ’evanelia i terā iho ā taime. I te tahi taime e tupu mai te mana’o paruparu. ’Ua tupu ato’a te mana’o paruparu i roto i te mau misiōnare ’e te mau peropheta rahi o te mau pāpa’ira’a mo’a (hi’o 2 Nephi 4:17–19 ; Alama 26:27). I taua mau taime ra, ’a pe’e i te hi’ora’a o Nephi nā roto i te fāriura’a i ni’a i te Fatu, te ti’aturira’a iāna, te purera’a nō te ani i te pūai, ’e te ha’amana’ora’a i te mau mea maitata’i tāna i rave nō ’oe (hi’o 2 Nephi 4:16–35).

piti misiōnare e pure ra

’Ia fāriu ’oe i ni’a i te Fatu i roto i tō ’oe mau fifi, ’ua parau fafau mai ’oia ē : « E fa’a’eta’eta vau ia ’oe ; ’oia ïa, e tauturu vau ia ’oe ; ’oia ïa, e mau vau ia ’oe » (Isaia 41:10). Nā roto i te fa’a’ohipara’a i te fa’aro’o i te Mesia, e ’itehia ia ’oe te hau ’e te tāmarūra’a ’ā’au i roto i tā ’oe mau tauto’ora’a. E tauturu te fa’aro’o ia ’oe ’ia haere ti’a atu i mua ’e ’ia tāmau noa i roto i te mau hina’aro ti’a.

’A fa’atumu noa i ni’a i tā ’oe parau fafau i te Mesia ’e tā ’oe fā misiōnare—’eiaha rā i ni’a i te mau hope’a ’ite-mata-hia. E’ita teie mau hope’a e ’ite-’oi’oi-hia. I taua ato’a taime ra, ’a tāpe’a noa i te fāito tītaura’a teitei noa atu te mau fifi tā ’oe e fa’aruru ra. Nā te fāito tītaura’a teitei e fa’arahi i tō ’oe manuia, tō ’oe hina’aro ’e tō ’oe ’aravihi ’ia pe’e i te Vārua.

Teie i raro nei te tahi mau rāve’a nō te hi’opo’a i tā ’oe parau fafau i te Fatu ’e tā ’oe mau tauto’ora’a ’ia manuia ’ei misiōnare.

’Ia fa’aitoito hope roa ’oe, pēnei a’e e tae noa mai te mana’o ’ino’ino i te ’ohipa manuia ’ore, e ’ere rā i te mana’o ’ino’ino i tā ’oe iho ’ohipa. E nehenehe ’oe e ’ite pāpū ē ’ua māuruuru te Fatu, ’ia putapū ana’e ’oe i te Vārua i te ’ohipara’a nā roto ia ’oe.

Heheura’a pāpa’ira’a mo’a

E aha te mana’o o te mau tāvini a te Fatu nō ni’a i te ’ohipa ? Nāhea te mau tāvini a te Fatu i te fa’auru i te feiā tā rātou e tāvini nei ? E aha tō ’oe mana’o nō ni’a i te ’ohipa ?

Ha’api’ira’a ta’ata hō’ē

  • Tai’o i te Helamana 10:1–5 ’e te 3 Nephi 7:17–18. E aha te mana’o o te Fatu nō ni’a i teie mau misiōnare ’e tā rātou tāvinira’a ?

  • ’A feruri i te mau tauto’ora’a misiōnare a Abinadi ’e Amona (hi’o Mosia 11–18 ; Alama 17–20 ; 23–24). Nō te aha nā misiōnare e piti i fa’ari’ihia ai e te Fatu noa atu ē, e mea ta’a ’ē te fa’ahope’ara’a iho o tā rāua mau tauto’ora’a ?

  • ’A pāpa’i i te mea tā ’oe e ha’api’i i roto i tā ’oe buka tuatāpapara’a ha’api’ira’a.

Mana’o nō te ha’api’i ’e nō te rave

Ha’api’ira’a ta’ata hō’ē

Ha’api’ira’a ’e te hoa misiōnare, ’e tāuiuira’a hoa

  • ’A mā’iti i te hō’ē o te mau misiōnare fa’ahiahia i muri nei, ’e ’a tai’o i te mau pāpa’ira’a mo’a i tāpurahia. ’A tai’o ai ’outou, ’a ’āparau e mea nāhea teie misionare (1) i te ta’ara’a ’e i te ha’apa’ora’a i tōna pi’ira’a, (2) i te fa’a’itera’a i tōna huru ’e tōna hina’aro i te ’ohipa, ’e (3) i te tauturura’a ia vetahi ’ē ’ia fa’ari’i i te ’evanelia.

  • ’A mā’iti e piti hīmene purera’a nō ni’a i te Fa’aho’i-fa’ahou-ra’a o te ’evanelia. ’A tai’o ’e ’aore rā ’a hīmene i te mau hīmene. ’A ’āparau i te aura’a o te mau parau.

’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni

  • ’A ani e piti ’e ’aore rā e toru feiā fa’afāriu-’āpī-hia ’ia fa’a’ite mai i te fa’afāriura’ahia mai rātou. E aha tō rātou mana’o nō ni’a i te mau misiōnare ? E aha tō rātou mana’o nō ni’a i te mau mea tā te mau misiōnare i ha’api’i ? E aha te mea tei tauturu ia rātou ’ia tāpe’a i tā rātou parau fafau ? E aha te mea tei fa’auru pūai roa a’e i tō rātou fa’afāriura’a ?

  • E rave rahi mahana hou a’e i te rurura’a, ’a ani i e rave rahi misiōnare ’ia feruri hōhonu i ni’a i te mau uira’a e mā’itihia i roto i te « ’A feruri na » i te ’ōmuara’a o te pene. ’A ani i te misiōnare tāta’itahi ’ia fa’aineine i te hō’ē a’ora’a e piti e ’aore rā e toru minuti te maoro nō ni’a i te uira’a i hōro’ahia ia rātou. I roto i te ’āpo’ora’a mata’eina’a ’e ’aore rā te ’āmuira’a ārea misiōnare, ’a ani i te mau misiōnare ’ia hōro’a mai i tā rātou a’ora’a. ’I muri iho i te mau a’ora’a, ’a ’āparau e aha te ha’api’ira’a i i’apohia mai ’e nāhea te reira e fa’a’ohipahia ai i roto i te ’ohipa misiōnare.

  • ’A vāhi i te mau misiōnare ’ei maha pupu. ’A ani i te mau pupu tāta’itahi ’ia tāpura mai i te mau parau mau ato’a, te mau fafaura’a ’e te mau ’ōro’a tā rātou e nehenehe e feruri, ’o tei fa’aho’i-fa’ahou-hia mai ’e tei heheuhia mai nā roto i te peropheta Iosepha Semita. ’A ani i te pupu tāta’itahi ’ia fa’a’ite mai i tā rātou tāpura. ’A ani i te mau misiōnare ’ia fa’a’ite ē ’ua nāhea te hō’ē o te mau parau mau tei heheuhia mai nā roto i te Fa’aho’i-fa’ahou-ra’a, i te ha’amaita’ira’a i tō rātou orara’a.

  • ’A ’āparau e aha te aura’a ’ia riro ’ei misiōnare manuia. ’A ani i te mau misiōnare ’ia hōro’a i te tahi hi’ora’a pāpū.

Feiā fa’atere misiōni ’e nā tauturu nō te misiōni

  • I roto i te mau uiuira’a ’e ’aore rā te tāu’ara’a parau ’e te mau misiōnare, ’a ani ia rātou ’ia fa’a’ite mai ia ’outou :

    • Tō rātou ’itera’a pāpū nō Iesu Mesia.

    • Tō rātou ’itera’a pāpū nō te ’evanelia tei fa’aho’i-fa’ahou-hia mai ’e te misiōni a Iosepha Semita.

    • Tō rātou ’itera’a pāpū nō te Buka a Moromona.

    • Tō rātou mana’o nō ni’a i tā rātou fā ’ei misiōnare.

  • ’A ani manihini i te mau misiōnare ’ia pāpa’i i roto i tā rātou buka ’ā’amu tuatāpapara’a e aha tā rātou e mana’o ra ē, ’o te tahi mau fā nō tā rātou misiōni. I roto i te hō’ē uiuira’a ’e ’aore rā i roto i te tahi ’āparaura’a, ’a ani ia rātou ’ia fa’a’ite mai i te mea tā rātou i pāpa’i.

  • Hāpono i te tahi rata ha’amāuruurura’a i te mau melo ’āpī.