« Pene 4 : ’Imi ’e tūru’i i ni’a i te Vārua », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Pene 4 : ’Imi ’e tūru’i i ni’a i te Vārua », ’Ia poro haere i tā’u nei ’Evanelia
Pene 4
’Imi ’e tūru’i i ni’a i te Vārua
’A feruri na
-
E aha tā’u e rave ’ia vai mai te mana o te Vārua Maita’i i roto i tō’u orara’a ’e te tāvinira’a misiōnare ?
-
E aha te ti’ara’a o te Vārua Maita’i i roto i te fa’afāriura’a ?
-
Nāhea vau i te tauturu i te mau ta’ata tā māua e ha’api’i nei ’ia putapū i te fa’aurura’a a te Vārua Maita’i ?
-
Nāhea vau i te ha’afaufa’a rahi atu ā i tā’u mau pure ?
-
Nāhea vau ’ia ha’api’i mai i te ’ite i te mau muhumuhu a te Vārua Maita’i ?
’Imi i te arata’ira’a a te Vārua Maita’i
Te hōro’a o te Vārua Maita’i ’o te hō’ē ïa ō rahi roa a’e ’o tā te Atua i hōro’a mai i tāna mau tamari’i. E mea faufa’a roa te reira i roto i tā ’oe ’ohipa ’ei misiōnare. E hina’aro ’oe i te arata’ira’a, te mana o te heheura’a o te Vārua Maita’i, ’a tauturu ai ’oe i te mau ta’ata ’ia bāpetizohia, ’ia ha’amauhia, ’e ’ia fa’afāriuhia.
Te fa’ari’ira’a i te arata’ira’a a te Vārua Maita’i i roto i tō ’oe orara’a, tītauhia te ’ohipa pae vārua. Teie ’ohipa tei roto te pure tu’utu’u ’ore ’e te tuatāpapara’a pāpa’ira’a mo’a tāmau. Tei roto ato’a te ha’apa’ora’a i te mau fafaura’a ’e te mau fa’auera’a a te Atua (hi’o Mosia 18:8–10, 13). ’Oia ato’a te ravera’a i te ’ōro’a mo’a i te mau hepetoma ato’a ma te ti’amā (hi’o Te Ha’api’ira’a Tumu ’e te mau Fafaura’a 20:77, 79).
Tē fa’aruru nei ’oe i te mau hina’aro ’e te mau tupura’a ta’a ’ē i te mahana ato’a. E tauturu te mau muhumuhu a te Vārua ia ’oe ’ia ’ite e aha te mea e rave ’e ’e parau. ’A ’imi ai ’e ’a ’ohipa ai ’oe i ni’a i teie mau muhumuhu, e fa’arahi te Vārua Maita’i i tō ’oe ’aravihi ’e te tāvinira’a tei nā ni’a a’e i te mea tā ’oe e nehenehe e rave nā roto ia ’oe iho. E tauturu ’oia ia ’oe i roto i te mau tuha’a tāta’itahi o tā ’oe tāvinira’a misiōnare ’e tō ’oe iho orara’a. (hi’o 2Nephi 32:2–5 ; Alama 17:3 ; Helamana 5:17–19 ; Te Ha’api’ira’a Tumu ’e te mau Fafaura’a 43:15–16 ; 84:85).
« I te mau mahana i muri nei, e’ita tātou e ora mai i te pae vārua mai te peu ’aita te mana arata’i, te fa’atere, te tāmāhanahana ’e te fa’auru tāmau o te Vārua Maita’i » (Russell M. Nelson, « Heheura’a nō te ’Ēkālesia, heheura’a nō tō tātou orara’a » Liahona, Mē 2018, 96).
Te māramarama o te Mesia
« ’Ua hōro’ahia mai te [māramarama] Vārua o te Mesia i te ta’ata tāta’itahi ’ia ti’a iāna ’ia fa’ata’a ’ē i te maita’i ’e te ’ino » (Moroni 7:16 ; hi’o ’īrava 14–19 ; hi’o ato’a Ioane 1:9). Te māramarama o te Mesia ’o te tūramara’a ïa, te ’ite ’e te fa’aurura’a i hōro’ahia mai e Iesu Mesia. Teie fa’aurura’a e tae mai ïa nā roto i te fa’ari’ira’a i te hōro’a o te Vārua Maita’i. E arata’i te reira i te feiā tei ineine nō te ha’api’i mai ’e nō te ora i te ’evanelia a Iesu Mesia tei fa’aho’i-fa’ahou-hia-mai.
Te Vārua Maita’i
Te huru ta’ata o te Vārua Maita’i
Te Vārua Maita’i ’o te toru ïa o te melo nō te Atuara’a. E tino vārua ’oia ’e ’aita tōna e tino ’i’o ’e te ivi (hi’o Te Ha’api’ira’a Tumu ’e te mau Fafaura’a 130:22). O ’oia te Fa’aa’o, ’o tā te Fa’aora i fafau mai ē e ha’api’i ’oia i tāna mau pipi i te mau mea ato’a ’e e fa’aho’i mai i te ha’amana’ora’a i te mea tā Iesu i ha’api’i a’e nei (hi’o Ioane 14:26).
Te mana o te Vārua Maita’i
E hōro’ahia te ’itera’a pāpū i te feiā e ’imi pāpū mau i te parau mau, hou te bāpetizora’a e ravehia ai nā roto i te mana o te Vārua Maita’i. E nehenehe te mau ta’ata ato’a e fa’ari’i i te hō’ē ’itera’a pāpū nō Iesu Mesia ’e nō tāna ’evanelia tei fa’aho’ihia mai nā roto i te mana o te Vārua Maita’i. « E nā roto i te mana o te Vārua Maita’i e ’ite ai ’outou i te parau mau i te mau mea ato’a ra » (Moroni 10:5).
Te hōro’a o te Vārua Maita’i
Te hōro’a o te Vārua Maita’i ’o te ti’ara’a ïa ’ia roa’a te hoara’a tāmau o te Vārua Maita’i, mai te mea e vai ti’amā noa tātou. E fa’ari’i tātou i te hōro’a o te Vārua Maita’i, i muri a’e i tō tātou bāpetizora’ahia i te pape. E hōro’ahia te reira nā roto i te ’ōro’a o te ha’amaura’a.
Te nā ’ō nei te peropheta Iosepha Semita ē : « Tē vai ra te ta’a-’ē-ra’a i rotopū i te Vārua Maita’i ’e te hōro’a o te Vārua Maita’i. ’Ua fa’ari’i Korenelio i te Vārua Maita’i nā mua a’e ’oia ’a bāpetizohia ai, ’o te mana fa’a’ite pāpū ho’i te reira nōna i te parau mau o te ’evanelia, ’aita rā ’oia i fa’ari’i i te hōro’a o te Vārua Maita’i, i te taime noa ’a bāpetizohia ai ’oia » (Te mau ha’api’ira’a a te mau peresideni o te ’Ēkālesia : Iosepha Semita [2007], 97).
E mea nā roto i te hōro’a ’e te mana o te Vārua Maita’i tātou e ha’amo’ahia ai––e riro ’ei mea mo’a a’e, e mea hope a’e, e mea ’ī a’e, e riro mai te Atua te huru. E mea nā roto i te tāra’ehara a te Mesia ’e te ha’amo’ara’a mana o te Vārua Maita’i, tātou e fānau-fa’ahou-hia ai i te pae vārua, ’a ha’apa’o ai tātou i te mau fafaura’a tā tātou i rave ’e te Atua (hi’o Mosia 27:25–26).
Te Vārua Maita’i nō te fafaura’a
E parau-ato’a-hia te Vārua Maita’i te Vārua Mo’a nō te fafaura’a Te Ha’api’ira’a Tumu ’e te mau Fafaura’a 88:3). I te reira ’aravihi, e ha’apāpū te Vārua Maita’i ē, te mau ’ōro’a o te autahu’ara’a tā tātou e fa’ari’i nei ’e te mau fafaura’a tā tātou i rave ’ua fa’ari’ihia ïa e te Atua. Rātou tei tā’atihia e te Vārua Mo’a nō te fafaura’a e fa’ari’i ïa i te mau mea ato’a tā te Metua e vai ra (hi’o Te Ha’api’ira’a Tumu ’e te mau Fafaura’a 76:51–60 ; Ephesia 1:13–14 ; Arata’i nō te mau pāpa’ira’a mo’a, « Vārua mo’a nō te fafaura’a »).
E mea ti’a i te mau ’ōro’a ’e te mau fafaura’a ato’a ’ia tā’atihia e te Vārua Mo’a nō te fafaura’a ’ia ha’amanahia i muri a’e i teie orara’a (hi’o Te Ha’api’ira’a Tumu ’e te mau Fafaura’a 132:7, 18–19, 26). Teie tā’atira’a tei te huru ïa o tō tātou ha’apa’o-tāmau-maita’i-ra’a.
Mau hōro’a a te Vārua
E hōro’a te Fatu ia tātou i te mau hōro’a a te Vārua nō te ha’amaita’i ia tātou ’e nō te fa’a’ohipa i te ha’amaita’ira’a ia vetahi ’ē.(hi’o Te Ha’api’ira’a Tumu ’e te mau Fafaura’a 46:8–9, 26). ’Ei hi’ora’a, te mau misiōnare tei ha’api’i mai i te hō’ē reo ’āpī e nehenehe e fa’ari’i i te hōro’a o te mau reo, nō te hōro’a ia rātou i te tauturu nō te ha’api’i ia vetahi ’ē i roto i tō rātou iho reo.
E rave rahi hōro’a a te Vārua tei fa’ata’ahia i roto te Moroni 10:8–18, Te Ha’api’ira’a Tumu ’e te mau Fafaura’a 46:11–33, ’e 1 Korinetia 12:1–12. ’O te tahi noa teie o te mau hōro’a a te Vārua. E nehenehe te Fatu e ha’amaita’i ia tātou ma te tahi atu mau hōro’a tei te huru noa i tō tātou ha’apa’o-maita’i-ra’a, mau hina’aro, ’e te mau hina’aro o vetahi ’ē.
Tē ani nei te Fa’aora ia tātou ’ia ’imi tu’utu’u ’ore i te mau hōro’a pae vārua (hi’o Te Ha’api’ira’a Tumu ’e te mau Fafaura’a 46:8 ; 1 Korinetia 14:1, 12). E tae mai teie mau hōro’a nā roto i te pure, te fa’aro’o, ’e te tauto’ora’a––’e mai te au i te hina’aro o te Atua.
Ha’api’ira’a ta’ata hō’ē ’e ha’api’ira’a ’e te hoa misiōnare
Pāpa’i i te hō’ē fa’a’itera’a i te nātura ’e te ti’ara’a o te Vārua Maita’i.
Tai’o Te ’Ohipa 4:1–33.
-
Mea nāhea tō Petero ’e Ioane ’imira’a i te mau hōro’a pae vārua ?
-
Nāhea te Atua i te pāhonora’a i tā rāua mau pure ?
-
E aha tā ’oe i ha’api’i mai nā roto mai i teie ’ohipa i tupu nō ni’a i tā ’oe iho ’ohipa ?
Te mana o te Vārua i roto i te fa’afāriura’a
E tupu te fa’afāriura’a nā roto i te mana o te Vārua Maita’i. Tā ’oe ’ohipa o te tauturura’a ïa i te hōpoi mai i te mana o te Vārua i roto i te orara’a o te hō’ē ta’ata. Te tahi mau rāve’a tā ’oe e nehenehe e rave tei fa’a’itehia i raro nei.
-
’Imi ’ia roa’a mai te Vārua ia ’oe nā roto i te pure, te ’imira’a i te mau pāpa’ira’a mo’a ’e te ha’apa’ora’a i tā ’oe mau fafaura’a.
-
Ha’api’i i te ta’ata ma te pe’e i te Vārua nō ni’a i te Fa’aora ’e te parau poro’i o te fa’aho’i-fa’ahou-ra’a mai. Pe’e i te arata’ira’a a te Vārua i roto i te fa’aaura’a i tā ’oe parau poro’i i te mau hina’aro o te ta’ata tāta’itahi.
-
Fa’a’ite pāpū i te mea tā ’oe i ’ite nā roto i te mana o te Vārua Maita’i ē, te mea tā ’oe i ha’api’i e parau mau ïa. ’A fa’a’ite pāpū ai ’oe, e nehenehe te Vārua Maita’i e fa’a’ite pāpū ia vetahi ’ē.
-
Ani manihini i te mau ta’ata ’ia ’ohipa, ’e e turu atu ia rātou i roto i te ha’apa’ora’a i tā rātou mau parau fafau. ’A ha’apa’o ai te mau ta’ata i tā rātou mau parau fafau, e putapū pūai atu ā rātou i te mana o te Vārua Maita’i. Hi’o pene 11.
-
’A tāmau ā ma te uiuira’a i te mau ta’ata nō ni’a i te ’ohipa i tupu nō rātou, ’a pāhono ai rātou i te hō’ā anira’a manihini. E tupu rahi atu ā tō rātou fa’aro’o ’a tātarahapa ai rātou, ’a ha’apa’o ai i te mau fa’auera’a ’e i tā rātou mau parau fafau. Tauturu ia rātou ’ia ’ite i te Vārua i te ’ohipara’a ’e o rātou.
’Ua ha’api’i te peresideni M. Russell Ballard : « E tae mau te fa’afāriura’a mau nā roto i te mana o te Vārua. ’Ia ha’aputapū ana’e te Vārua i te ’ā’au, e taui te mau ’ā’au. ’Ia ’ite ana’e te mau ta’ata […] i te Vārua i te ’ohipara’a ’e o rātou, ’aore rā ’ia ’ite mata ana’e rātou i te fa’a’itera’a i te here o te Fatu ’e te aroha i roto i tō rātou orara’a, e fa’ateiteihia ’e e ha’apūaihia rātou i te pae vārua ’e e fa’arahihia tō rātou fa’aro’o iāna. E pe’e iho ā teie mau ’ohipa i tupu ’e te Vārua, ’ia ineine ana’e te hō’ē ta’ata i te tāmata i te parau [hi’o Alama 32:27]. Mea nā reira tātou e putapū ai e parau mau te ’evanelia » (« Now Is the Time », Ensign, Novema. 2000, 75).
Ha’api’ira’a ta’ata hō’ē ’e ha’api’ira’a ’e te hoa misiōnare
-
Tītau i te ’ite nō te hō’ē ’aore rā hau atu o nā ’īrava i raro nei. ’A tai’o ai ’oe, ’a ’imi i te hāro’aro’a e aha tā te hō’ē ta’ata e putapū nei i roto i te rāve’a o te fa’afāriura’a. Pāpa’i i tō ’oe mau fa’auru’a’ī i roto i tā ’oe buka tāmahana. ’A ’āparau atu i tō ’oe mau mana’o ’e te tahi atu mau misiōnare ’e te mau melo.
2 Nephi 4:16–35 ; Enosa 1 ; Mosia 4–5 ; 18:7–14 ; 27–28 ; Alama 5 ; 17–22 ; 32 ; 36 ; 38
-
Tītau i te ’ite nō te hō’ē ’aore rā hau atu o nā ’īrava i raro nei. ’A tai’o ai ’oe, ’a feruri nāhea ’oe i te ha’api’i maita’i a’e ma te mana fa’afāriu o te Vārua. ’A pāpa’i i tō ’oe mau nino’a mana’o ’e mau fa’auru’a’ī i roto i tā ’oe buka tāmahana. ’A ’āparau atu i tō ’oe mau mana’o ’e te te tahi atu mau misiōnare ’e te mau melo.
1 Nephi 8:11–12 ; Mosia 28:1–4 ; Alama 26 ; 29 ; 31:26–38 ; 32 ; Moroni 7:43–48 ; Te Ha’api’ira’a Tumu ’e te mau Fafaura’a 4 ; 18:10–16 ; 50:21–22.
’Imira’a pāpa’ira’a mo’a
E aha tā te mau pāpaʼiraʼa moʼa i muri nei e haʼapiʼi nei nō niʼa i te mana o te Vārua i roto i tā ’oe ’ohipa ?
E aha tā ’oe e nehenehe e rave ’ia vai mai te mana o te Vārua i roto i tā ’oe ’ohipa ?
E pure ma te fa’aro’o ia Iesu Mesia
Nō te tauturu ia vetahi ’ē ’ia fa’afāriuhia mai, tītauhia ia ’oe ’ia ha’api’i ma te mana o te Vārua (hi’o Te Ha’api’ira’a Tumu ’e te mau Fafaura’a 50:13–14, 17–22). ’Ua parau te Fatu, « e hōro’ahia atu te Vārua ia ’outou nā roto i te pure fa’aro’o, ’e mai te mea ’aita ’outou e fa’ari’i i te Vārua, ’eiaha roa ïa ’outou e ha’api’i atu » (Te Ha’api’ira’a Tumu ’e te mau Fafaura’a 42:14).
’A pure ai ’oe nō te tauturu i roto i tā ’oe ha’api’ira’a, e fa’atae te mana o Vārua Maita’i i tā ’oe ha’api’ira’a « i te ’ā’au o te mau tamari’i a te ta’ata nei » (2 Nephi 33:1). ’A ha’api’i ai ’oe i te ta’ata ma te pe’e i te Vārua ’e e fa’ari’i vetahi ’ē nā roto i te Vārua, e « māramarama te tahi e te tahi » ’e « ’ua ha’amāramaramahia ’e ’ua ’oa’oa ’āpitipiti ho’i rāua » (Te Ha’api’ira’a Tumu ’e te mau Fafaura’a 50:22).
Nāhea ’ia pure
’Ua ha’api’i mai Iesu ia tātou nāhea ’ia pure (hi’o Mataio 6:9–13 ; 3 Nephi 18:19). E pure ’ā’au tae ’e ma te hina’aro mau ’ia ’ohipa mai te au i te fa’aurura’a tei fa’ari’ihia e ’oe nā roto mai i te Vārua Maita’i. E tītau te mau pure manuia i te haeha’a, te tauto’ora’a tāmau (Hi’o Moroni 10:3–4 ; Te Ha’api’ira’a Tumu ’e te mau Fafaura’a 8:10).
Fa’a’ohipa i te reo ’o tē fa’a’ite i te hō’ē tā’amura’a o here ’e te ha’amorira’a ’e te Atua.
Fa’a’ite tāmau noa i te māuruuru. E tauturu te tauto’ora’a ferurihia ia ’oe ’ia ’ite i te aroha rahi o te Atua i roto i tō ’oe orara’a. E ’īriti te reira i tō ’oe ’ā’au ’e tō ’oe vaerua i te fa’aurura’a.
’A pure « ma te pūai hope roa o te ’ā’au » ’ia hōro’ahia mai te aroha ia ’oe (Moroni 7:48). ’A pure nō vetahi ’ē nā ni’a i tō rātou i’oa. ’A pure nō te feiā tā ’oe e ha’api’i ra. ’A ’imi i te fa’aurura’a e nāhea ’oe ’ia ani manihini ’e e tauturu ia rātou ’ia haere mai i te Mesia ra.
Ha’api’ira’a ta’ata hō’ē
’A tītau i te ’ite i te pure a te Fatu i roto te Mataio 6:9–13. ’A ui atu ia ’oe iho i te mau uira’a i muri nei, ’e ’a pāpa’i i tō ’oe mau fa’auru’a’ī i roto i tā ’oe buka tāmahana.
-
Nāhea tā ’oe hōpoi’a i teienei ’ei misiōnare i te fa’auru i tā ’oe mau pure ?
-
Mea nāhea tā ’oe mau pure e roa’a ai i te ha’amaita’i i te orara’a o vetahi ’ē ?
-
Nāhea ’oe i te pure ’ia roa’a te pūai nō te upo’oti’a i ni’a i te fa’ahemara’a ?
-
Nāhea ’oe i te pure nō te fa’ari’i i te tauturu nō te pāhono i tō ’oe mau hina’aro pae vārua ’e pae tino ?
-
Nāhea i te fa’ahanahana i te Atua ’ia pure ana’e ’oe ?
E aha te taime e pure ai ?
E aha te taime e ti’a ai ’ia pure ? ’Ua parau te Fatu, « ’a ’imi itoito noa, ’a pure noa i te mau taime ato’a ’e ’a ti’aturi noa ho’i, ’e e ’āmuihia mai te mau mea ato’a ’ei maita’i nō ’outou » (Te Ha’api’ira’a Tumu ’e te mau Fafaura’a 90:24).
’Ua parau Alama, « ’a paraparau atu i te Fatu i te mau mea ato’a tā ’oe e rave ra, ’e nāna ho’i ’oe e arata’i i te maita’i ’oia ïa, ’ia ta’oto ’oe i te ru’i ra, ’a ta’oto ïa i te Fatu ra, ’ia tīa’i māite mai ’oia ia ’oe i tō ’oe nā ta’otora’a ; ’e ’ia ti’a mai ’oe i te po’ipo’i ra, ’ia ’ī tō ’oe ’ā’au i te ha’amaita’i i te Atua ra » (Alama 37:37 ; hi’o ato’a 34:17–27).
Tē ani manihini nei te Fatu ia ’oe ’ia fa’aherehere te tahi taime muhu ’ore ’e te ’ōmo’e nō te pure : « ’a haere atu i roto i tō ’oe piha, ’e… ’a pure atu ai i tō ’oe Metua » (3 Nephi 13:6 ; hi’o ato’a mau ’īrava 7–13).
’Ua ha’api’i te peresideni Gordon B. Hinkley : « I te mau po’ipo’i ato’a … e ti’a i te mau misiōnare ’ia tūturi ’e ’ia ti’aoro atu i te Fatu nō te ha’amātara i tō rātou reo ’e ’ia paraparau nā roto atu i te reira nō te ha’amaita’i i te feiā tā rātou e ha’api’i atu. Mai te mea e nā reira rātou, e tomo mai te hō’ē māramarama ’āpī i roto i tō rātou orara’a. E vai mai te ’ana’anataera’a rahi nō te ’ohipa. E ’ite rātou ē, i roto i te hō’ē huru pāpū mau, e mau tāvini rātou na te Fatu ’o tē paraparau nei nā ni’a i tōna i’oa » (« Missionary Service », First Worldwide Leadership Training Meeting, 11 nō Tēnuare 2003, 20).
Ti’aturira’a i te Atua ’ia pure ana’e tātou
Te aura’a te roa’ara’a te fa’aro’o i te Atua ’o te ti’aturira’a ïa iāna. Tei roto ato’a te ti’aturira’a i tōna hina’aro ’e i tāna tārena nō te pāhonora’a tā ’oe mau pure (hi’o Isaia 55:8–9). ’Ua haʼapiʼi te peresideni Dallin H. Oaks ē :
« Noa atu te huru pūai o tō tātou fa’aro’o, ’aita te reira e fa’atupu mai i te hō’ē hope’ara’a e pāto’i i te hina’aro o te Ta’ata ’o tā tātou i ha’amau i te fa’aro’o. ’A ha’amana’o i te reira, mai te peu ’aita ana’e tā ’outou mau pure e pāhonohia mai te au ’aore rā i te taime tā ’outou e hina’aro. Te fa’a’ohipara’a i te fa’aro’o i te Fatu ia Iesu Mesia e vai noa i raro a’e i te fa’aterera’a a te ra’i, i te maita’i, i te hina’aro, i te pa’ari ’e i te taime o te Fatu. ’Ia roa’a ana’e ia tātou teie huru fa’aro’o ’e te ti’aturi i te Fatu, e fana’o ïa ia tātou i te pārurura’a mau ’e i te hau i roto i tō tātou orara’a » (« The Atonement and Faith », Ensign, ’Ēperēra 2010, 30).
Nō ni’a i te mau pure e au ra e vai noa ma te pāhonora’a ’ore, ’ua parau te peresideni Russell M. Nelson :
« ’Ua ’ite au i taua mana’o ra ! ’Ua ’ite au i te ri’ari’a ’e te mau roimata nō taua mau taime ra. Terā rā, ’ua ’ite ato’a vau ē e’ita roa tā tātou mau pure e tau’a-’ore-hia. E’ita roa tō tātou nei fa’aro’o e māuruuru-’ore-hia. ’Ua ’ite ē, te hi’ora’a ’ā’ano o te hō’ē Metua i te ao ra tei ’ī i te pa’ari, e mea ātea atu ā i tō tātou iho. ’A ’ite ho’i ai tātou i tō tātou mau fifi ’e tō tātou mau māuiui i te tino nei, ’ua ’ite ’oia i tō tātou haerera’a i mua ’e tō tātou fāito pūai mure ’ore. Mai te peu e pure tātou nō te ’ite i tōna hina’aro ’e ’ia auraro tātou i te reira, ma te fa’a’oroma’i ’e te itoito, e nehenehe te fa’aorara’a mure ’ore e tupu mai te au i tāna ravera’a ’e tāna tārena » (« Iesu Mesia–Te Fatu Fa’aora », Liahona, Novema 2005, 86).
’A ha’api’i mai ’ia ’ite i te mau muhumuhura’a a te Vārua
E mea faufa’a roa nō ’outou ’e te feiā tā ’outou e ha’api’i ra ’ia ’apo mai nō te ’ite i te mau ’āparaura’a nō ō mai i te Vārua. I te rahira’a taime e paraparau mārū noa mai te Vārua, nā roto mai i tō ’outou nino’a mana’o, te ferurira’a ’e te ’ā’au. ’Ua ’itehia mai i te peropheta Eliaha ē, e ’ere te reo o Fatu tei roto i te mata’i, te ’āueuera’a fenua, ’aore rā te auahi––e « reo iti ha’iha’i » rā (1 Te mau Ari’i 19:12). « E ’ere ïa i te reo mai te pātiri », inaha rā « e reo ha’iha’i ’e te marū roa, mai te mea ra ē, ’o te hō’ē parau iti ha’iha’i ’e ’ua ha’aputa roa te reira i te vārua » (Helamana 5:30).
E riro te mau ’āparaura’a a te Vārua i te ta’a ’ē tei te huru o te ta’ata. Noa atu te huru putapūra’a tā teie mau ’āparaura’a e fa’atupu mai, tē ha’api’i nei te mau pāpa’ira’a mo’a nāhea ’ia ’ite mai i te reira. Teie te tahi hi’ora’a, e ha’api’i te Vārua ia ’outou ’e e arata’i ia ’outou ’ia rave i te maita’i. E tūrama ’oia i tō ’outou vaerua. E arata’i ’oia ia ’outou ’ia haere ma te ha’eha’a ’e ’ia ha’avā ma te parauti’a. (Hi’o Te Ha’api’ira’a Tumu ’e te mau Fafaura’a 11:12–14 ’e e tāpa’o i muri iho « Ha’api’ira’a ta’ata hō’ē » i roto i teie tuha’a).
’Ei pāhonora’a i te uira’a « nāhea tātou e ’ite ai i te mau muhumuhu a te Vārua ? » ’Ua tai’o te peresideni Gordon B. Hinckley te Moroni 7:13, 16–17. I muri iho ’ua parau ’oia :
« ’O teie ïa te tāmatara’a, ’ia oti ana’e i te parauhia ’e i te ravehia. E tītau ānei te reira ’ia rave i te maita’i, ’ia fa’ati’a mai i ni’a, ’ia ti’a ’āfaro, ’ia rave i te mea ti’a, ’ia hāmani maita’i, ’ia hōro’a hua atu ? Nō reira ’o te Vārua ïa o te Atua te reira. …
«… mai te mea e ani te reira ’ia rave i te maita’i, nō ’ō mai ïa te reira i te Atua ra ». mai te mea e ani te reira ’ia rave i te ’ino, nō ’ō mai ïa te reira i te diabolo ra. … ’E mai te peu e rave ’outou i te mea maita’i ’e mai te peu e ora ’outou ma te rāve’a maita’i nā roto i te maita’i, e ’ite ’outou i roto i tō ’outou ’ā’au tā te Vārua e parau nei ia ’outou.
« E ’ite ’outou i te mau muhumuhu a te Vārua nā roto i te mau hotu a te Vārua—te mea o te ha’amāramarama, ’o te fa’atupu mai i te au, ’o te ha’amaita’i ’e te ha’apāpū ’e te fa’ateitei ’e te arata’i ia tātou i te mau mana’o maita’i a’e ’e te mau parau maita’i ’e te mau ’ohipa maita’i nā te Vārua ïa o te Atua » (Te mau Ha’api’ira’a a Gordon B. Hinckley [1997], 260–61).
’A ’imi ’e ’a pe’e ai ’outou i te arata’i a te Vārua Maita’i, e rahi atu ïa tō ’outou ’aranihi nō te ’ite ’e nō te hāro’aro’a i tāna mau fa’aurura’a i roto i te tau (hi’o 2 Nephi 28:30). Nehenehe e parau ē, te rirora’a ’ei ta’ata fa’aro’o rahi i te reo o te Vārua, mai te ha’api’ira’a ïa i te tahi atu reo. E ravera’a mārū ïa te reira ’o tē tītau i te tauto’ora’a tāmau ’e te itoito.
’A tītau i te arata’ira’a a te Vārua Maita’i ma te ’ā’au tae mau. Mai te peu e mana’ona’ora’a ’ē atu tō ’outou, e’ita paha ’outou e putapū i te muhumuhura’a a te Vārua. ’Aore rā, e tīa’i ’oia nō paraparau mai ē tae roa i te taime e ’imi ai ’outou i tāna fa’aurura’a nā roto i te hina’aro ha’eha’a ’ia rave mai te au i tāna mau muhumuhura’a.
E ’ume’ume te reo o te ao nei nō te huti mai i tō ’outou ara maita’i. E nehenehe te reira e fa’aātea ’ōhie i te mau fa’auru’a’ī pae vārua maoti noa ’ia vaiiho ’outou i te vāhi nō te Vārua i roto i tō ’outou ’ā’au. ’A ha’amana’o i teie parau a’o a te Fatu : « ’A fa’atupua na, ’ia ’ite mai ē, ’o vau nei te Atua » (Salamo 46:10 ; hi’o ato’a Te Ha’api’ira’a Tumu ’e te mau Fafaura’a 101:16).
« E rave rahi rāve’a tā te Atua nō te fa’a’ite i tāna heheura’a i tāna mau tamaroa ’e tamāhine, mai te mau ferurira’a, te mana’o ’e te nino’a mana’o o te ’ā’au, te moemoeā […] ’e te fa’aurura’a. E fa’ari’i-’oi’oi-hia te tahi mau heheura’a ma te pūai ; ’are’a te tahi pae ra, e ’ite-marū-hia ïa. Te fa’ari’ira’a, te ’itera’a, ’e te pāhonora’a i te mau heheura’a a te Atua e mau hōro’ara’a pae vārua ana’e ïa tā tātou e ti’a ’ia hīa’ai ’e ’ia ’imi » (David A. Bednar, « The Spirit of Revelation in the Work [Te Vārua heheura’a i roto i te ’ohipa] », rurura’a fa’aterera’a misiōni 2018).
Ha’api’ira’a ta’ata hō’ē
Tītau i te ’ite o te mau pāpa’ira’a mo’a i roto i te tāpura i muri nei. ’A feruri i te mau taime ’a putapū ai ’oe i te hō’ē o teie mau nino’a mana’o, te ferurira’a ’aore rā te fa’auru’a’ī e fa’ata’ahia ra i roto i teie mau ’īrava. ’A ha’api’i ai ’oe ’e ’a roa’a ai i te ’itera’a, ’āmui mai i te tahi atu mau pāpa’ira’a mo’a i teie tāpura. ’A feruri e nāhea ’oe e nehenehe e fa’a’ohipa i teie mau parau tumu nō te tauturu ia vetahi ’ē ’ia putapū ’e ’ia ’ite i te Vārua.
|
Te Ha’api’ira’a tumu ’e te mau Fafaura’a 6:23 ; 11:12–14 ; 88:3 ; Ioane 14:26–27 ; Roma 15:13 ; Galatia 5:22–23 |
E hōro’a mai i te nino’a mana’o o te here, te ’oa’oa, te hau, te fa’a’oroma’i, te marū, te ha’eha’a, te fa’aro’o ’e te tīa’ira’a. |
|
Alama 32:28 ; Te Ha’api’ira’a Tumu ’e te mau Fafaura’a 6:14–15 ; 8:2–3 ; 1 Korinetia 2:9–11 |
Tūrama ’e e hōro’a mai i te mau mana’o i te ferurira’a ’e te nino’a mana’o i te ’ā’au. |
|
Tauturu i te mau pāpa’ira’a mo’a ’ia hōro’a mai i te pūai. | |
|
E monohia te pōiri e te māramarama. | |
|
Ha’apūai i te hina’aro ’ia ’ape i te ’ino ’e ’ia ha’apa’o i te mau fa’auera’a. | |
|
Moroni 10:5 ; Te Ha’api’ira’a Tumu ’e te mau Fafaura’a 21:9 ; 100:8 ; Ioane 14:26 ; 15:26 ; 16:13 |
Ha’api’i i te parau mau ’e e hōpoi mai te reira i te fa’aha’amana’ora’a. |
|
Arata’i ’e e pāruru i te fa’ahemara’a. | |
|
2 Nephi 31:18 ; Te Ha’api’ira’a Tumu ’e te mau Fafaura’a 20:27 ; Ioane 16:13–14 |
E fa’ahanahana ’e e fa’a’ite-pāpū nō te Atua te Metua ’e nō Iesu Mesia. |
|
Te Ha’api’ira’a Tumu ’e te mau Fafaura’a 42:16 ; 84:85 ; 100:5–8 ; Luke 12:11–12 |
Arata’i te mau parau a te feiā ha’api’i ha’eha’a. |
|
Moroni 10:817 ; Te Ha’api’ira’a Tumu ’e te mau Fafaura’a 46:8–26 ; 1 Korinetia 12 |
E hō mai i te mau hōro’a o te Vārua. |
|
E parau e aha te mea e pure. | |
|
2 Nephi 32:1–5 ; Te Ha’api’ira’a Tumu ’e te mau Fafaura’a 28:15 |
E parau e aha te mea e rave. |
|
Tauturu i te feiā parauti’a ’ia parau ma te mana ’e te ha’amanahia. | |
|
Ha’amo’a ’e e ’āfa’i mai te fa’a’orera’a o te mau hara. | |
|
E hōpoi mai i te parau mau i te ’ā’au o te feiā e fa’aro’o. | |
|
E ha’amaita’i i te mau tāreni ’e te ’aravihi. | |
|
1 Nephi 7:15 ; 2 Nephi 28:1 ; 32:7 ; Alama 14:11 ; Moromona 3:16 ; Etera 12:2 |
E tūra’i i mua ’aore rā e tāpe’a mai. |
|
E fa’ateitei i te ta’ata ha’api’i ’e te pīahi. |
’A tūru’i i ni’a i te Vārua
’Ei tāvini nā te Fatu, tītauhia ’oe ’ia ’rave i tāna ’ohipa nā roto i tāna rāve’a ’e tōna mana. ’Ua ha’api’i te peropheta Iosepha Semita ē « e’ita roa e nehenehe i te ta’ata ’ia poro i te ’Evanelia mai te mea ’aita te Vārua Maita’i » (Ha’api’ira’a : Iosepha Semita, 332).
’A ti’aturi i te Vārua nō te arata’i ia ’oe i roto i te mau tuha’a ato’a o tā ’oe ’ohipa. E ha’amāramarama ’e e fa’auru ’oia ia ’oe. E tauturu ’oia ia ’oe ’ia ’ite mai i te ta’ata nō te ha’api’i ’e e hōro’a mai i te mana i tā ’oe ha’api’ira’a. E ’āpe’e ’oia ia ’oe ’a tauturu ai ’oe i te mau melo, te mau melo i ho’i mai, ’e te mau melo fāfariu-’āpī-hia ’ia ha’apūai i tō rātou fa’aro’o.
Vetahi mau misiōnare e ti’aturi rātou ia rātou iho. Vetahi ’aita teie huru ti’aturira’a. ’A tu’u ma te ha’eha’a i tō ’oe ti’aturira’a ’e tō ’oe fa’aro’o ia Iesu Mesia, ’eiaha i ni’a ia ’oe iho. ’A tūru’i i ni’a i te Vārua ’eiaha rā i ni’a i tō ’oe iho mau tāreni ’e mau ’aravihi. E fa’ananeahia tā ’outou mau tauto’ora’a e te Vārua Maita’i ’ia hau atu i tā ’outou e nehenehe e rave ma tō ’outou iho pūai.
’Imira’a pāpa’ira’a mo’a.
’A ’imi i te mau pāpa’ira’a mo’a i muri nei ’e ’a feruri nāhea te reira i te pāhono i teie mau uira’a faufa’a roa ’o tā ’oe e ui i te mahana ato’a. Nāhea ’oe e nehenehe ai e fa’a’ohipa i te mau ha’api’ira’a i roto i tei mau ’īrava i tā ’oe mau tauto’ora’a ’ia mā’imi, i te fa’anahora’a i tā ’oe mau tuha’a ’e i tā ’oe iho ha’api’ira’a ’e te ha’api’ira’a ’e te hoa misiōnare ? Nāhea ’oe nehenehe ai e fa’a’ohipa i teie mau ’īrava nō tā ’oe mau tauto’ora’a nō te ha’api’i, ’ia ani manihini i te ta’ata ’ia rave i te mau tītaura’a, ’e ’ia ’āpe’e atu i te mau tītaura’a ?
I hea e ti’a ai iā’u e haere ?
E aha te mea tā’u e rave ?
E aha te mea tā’u e parau ?
Nāhea e ti’a iā’u ’ia fa’a’ohipa i te mau pāpa’ira’a mo’a i roto i tā’u ha’api’ira’a ?
Te tahi mau parau nō te vai arara’a
’A ha’apāpū i tō ’oe mau mana’o ma te mau rāve’a pāpū
’A pure ai ’oe nō te fa’ari’i i te fa’aurura’a, ’a fa’aau i tō ’oe mau mana’o pae vārua ’e te mau pāpa’ira’a mo’a ’e te mau ha’api’ira’a a te mau peropheta ora. Te mau mana’o o te Vārua e ’āna’i te reira i ni’a i teie mau rāve’a pāpū.
’A mā’imi i te heheura’a i roto i tā ’oe fa’auera’a ’ohipa
’Ia pāpū ia ’oe ē, te mau nino’a mana’o ’o tā ’oe i putapū ’ua tano maita’i i tā ’oe fa’auera’a ’ohipa. Maoti ra ’ua pi’ihia ’oe e te hō’ē ha’amanara’a e tano, ’aita te mau mana’o o te Vārua i hōro’ahia ia ’oe nō te a’o atu ’aore rā nō te fa’atītī’aifaro ia vetahi ’ē. ’Ei hi’ora’a, e’ita ’oe e fa’ari’i i te heheura’a nō te parau i te hō’ē ’episekōpo i te mea tāna e rave nō tōna pi’ira’a.
’A ’ite i te fa’aurura’a mau a te Vārua
’Ua a’o te peresideni Howard W. Hunter : « Hina’aro nei au ’ia hōro’a atu i te tahi parau fa’aara… ’ia ’ore tātou e ara maita’i…, e nehenehe tātou e tāmata fa’ahua noa ’ia fa’ari’i i te fa’auru a te Vārua o te Fatu ma te ti’amā ’ore ’e te mana’o tāviri. E pe’ape’a vau ’ia fa’ariro-ana’e-hia te ’ā’au putapū ’aore rā, te roimata tahe noa ’ei tāpa’o nō te taera’a mai o te Vārua. ’Oia mau, e nehenehe te Vārua o te Fatu e fa’atupu i te ’ā’au putapū, tae roa atu i te roimata, ’eiaha rā te reira fa’a’itera’a pae tino ’ia fa’aauhia i ni’a i te pārahira’a mai te Vārua iho » (Te mau ha’api’ira’a a Howard W. Hunter [1997], 184).
’Eiaha e tāmata i te fa’ahepo i te mau ’ohipa pae vārua
E’ita te mau ’ohipa pae vārua e ti’a ’ia fa’ahepohia. E nehenehe ’oe e fa’arahi i te hō’ē huru ’e te hō’ē arutaimāreva e tītau manihini i te Vārua, ’e e nehenehe ’oe e fa’aineine ia ’oe iho, terā rā e’ita ’oe e nehenehe e fa’ahepo e nāhea ’e ’āfea te fa’aurura’a e tae mai ai. ’A fa’a’oroma’i ’e ’a ti’aturi ē e fa’ari’i ’oe i te mea tā ’oe e hina’aro i te taime mau ra.
’A tāpe’a i te mau ’itera’a pae Vārua ma te mo’a
’Ei misiōnare, e mea ’ite a’e paha ’oe i te mau ’itera’a pae vārua i teienei i nā mua a’e nei i roto i tō ’oe orara’a. E mea mo’a teie mau ’itera’a ’e ’ua fa’ata’a-ta’a-ē-hia nō tō ’oe iho fa’ateiteira’a, ha’api’ira’a, ’aore rā fa’atītī’aifarora’a.
E mea maita’i a’e ’ia vai ’ōmo’e noa teie mau ’itera’a e rave rahi. ’A fa’a’ite noa i te taime e fa’aara mai ai te Vārua ē nā roto i te reira e nehenehe ’oe e ha’amaita’i ia vetahi ’ē (hi’o Alama 12:9 ; Te Ha’api’ira’a Tumu ’e te mau Fafaura’a 63:64 ; 84:73).
’A fa’a’ohipa i tā ’oe iho ha’avāra’a i roto i te tahi mau tupura’a
Te tahi taime e hina’aro tātou ’ia arata’ihia tātou e te Vārua i roto i te mau mea ato’a. Terā rā, pinepine te Fatu i te vaiiho ia tātou ’ia fa’a’ohipa mai te au i tā tātou iho ha’avāra’a (hi’o Te Ha’api’ira’a tumu ’e te mau Fafaura’a 60:5 ; 61:22 ; 62:5). ʼUa haʼapiʼi te peresideni Dallin H. Oaks ē :
« Te hina’aro ’ia arata’ihia e te Fatu, ’ua riro ïa ’ei hō’ē pūai, e ti’a rā ’ia ’āpitihia atu e te hāro’aro’ara’a ’o tā tō tātou Metua i te ao ra e vaiiho e rave rahi fa’aotira’a i tā tātou iho mau mā’itira’a. Te ravera’a i te fa’aotira’a nā tātou iho ’o te hō’ē ïa o te mau tumu nō te tupura’a i te rahi ’o te ti’a ia tātou ’ia ’ite i roto i te orara’a tāhuti nei. Te feiā e tāmata i te vaiiho ’ia rave i te mau fa’aotira’a ato’a i te Fatu ’e ’o tē tāparu nei nō te heheura’a i roto i te mau mā’itira’a ato’a, fātata i roto i te mau ’ohipa e tupu ’o tā rātou e pure ’ia arata’ihia rātou ’e ’aita e fa’ari’i i te reira. ’Ei hi’ora’a, teie te mea pāpū e tupu i roto e rave rahi huru fa’anahora’a i reira te mau mā’itira’a faufa’a ’ore ’aore rā te hō’ē ’aore te tahi te fa’ari’ihia.
« E ti’a ia tātou ’ia tuatāpapa i te mau mea i roto i tō tātou ferurira’a, ma te fa’a’ohipa i te mau mana nō te ferurira’a tā tō tātou Rahu i tu’u i roto ia tātou. I muri iho e ti’a ia tātou ’ia pure nō te fa’ari’i i te arata’ira’a ’e ’ia rave mai te reira ’ia fa’ari’i ana’e tātou. Mai te mea ’aita tātou e fa’ari’i i te arata’ira’a, e ti’a ia tātou ’ia rave mai te au i tō tātou mana’o ha’avā maita’i a’e. Tē vai nei te ta’ata e onoono ’ia ’imi i te arata’ira’a ma te heheura’a nō te mau tumu parau ’aita te Fatu i mā’iti ’ia arata’i ia rātou, e hāmani te reira ta’ata i tāna pāhonora’a mai te au i tōna iho hina’aro ’aore rā ta’a ’ore, ’aore rā, hau atu ’ua fa’ari’i rātou i te pāhonora’a nā roto i te tahi atu rāve’a heheura’a tano ’ore » (« Our Strengths Can Become Our Downfall [E riro tō tātou pūai ’ei hi’ara’a nō tātou iho] », Ensign, ’Ātopa 1994, 13–14).
’Imira’a pāpa’ira’a mo’a
E mea faufa’a roa te tūru’ira’a i ni’a i te Vārua, ē ’ua fa’aara mai te Fatu ia tātou ’eiaha e pāto’i ’aore rā e tīnai i te Vārua. E aha tā ’oe i ha’api’i mai nā roto mai i te mau ’īrava i muri nei ?
Mana’o nō te ha’api’i ’e nō te rave
Ha’api’ira’a ta’ata hō’ē
-
E vāhi i te hō’ē ’api e piti ’āna’ira’a. ’A tu’u te hō’ē ’āna’ira’a te i’oa « Te mea tā te Fatu i rave » ’e te tahi atu ’āna’ira’a « Te mea tā Lehi ’aore rā tā Nephi i rave ». Tai’o i te ’ā’amu o te Liahona ’e te fatira’a te fana (1 Nephi 16:9–31) ’aore rā te ’ā’amu o Nephi i te hāmanira’a i te hō’ē pahī (1 Nephi 17:7–16 ; 18:1–6). ’A pāpa’i i te mau ’ohipa i tupu i roto i teie ’ā’amu i roto i te ’āna’ira’a e au. ’A feruri e aha tā teie ’ā’amu e nehenehe e ha’api’i mai ia ’oe nō ni’a i te nātura o te fa’aurura’a.
-
’A hi’o i tā ’oe buka ’ā’amu ’e ’a ’ite mai i te mau tupura’a i reira ’oe i te arata’ira’ahia e te Vārua ’aore rā ’ua fa’ari’i ’oe i te hō’ē hōro’a a te vārua. ’A feruri i te taime, i te vāhi ’e i te tumu ’a tupu mai ai teie mau ’itera’a. Mea nāhea te rima o te Fatu i fa’a’itera’ahia mai ? E aha te mea tei tupu ia ’oe ? Te ha’amana’ora’a i teie mau ’itera’a e nehenehe e tauturu ia ’oe ’ia ’ite i te Vārua.
-
’Imi Alama 33:1–12 ’e Alama 34:17–31. E aha te mau uira’a tā Alama ’e ’o Amuleka i pāhono ? (Hi’o fa’ahou Alama 33:1–2.) Nāhea rāua i te pāhonora’a i teie mau uira’a ? E aha te mau ha’apāpūra’a tā rāua i hōro’a ?
-
’Ua fafau mai te Fatu ē, e arata’i te Vārua ia tātou nā roto e rave rahi rāve’a faufa’a mau. ’A tai’o ai ’oe i te mau ’īrava i muri nei, ’a ’ite mai i te mau huru o tā ’oe ’ohipa ’o tē tītau i te arata’ira’a a te Vārua. E aha te aura’a te mau parau tumu i fa’ahitihia i roto i te mau pāpa’ira’a mo’a i muri nei nō tā ’oe iho ha’api’ira’a ’e te ha’api’ira’a ’e te hoa misiōnare ? nō te rurura’a ’āpo’ora’a mata’eina’a, te ’āmuira’a ārea misiōnare, te mau ’ōro’a bāpetizora’a, ’e te tahi atu ’āpo’ora’a ?
Pure
Arata’ira’a i te mau ’āpo’ora’a
Ha’api’ira’a ’e te hoa misiōnare ’e tāuiuira’a hoa
-
Parau nō ni’a i te mau pure tā ’outou e hōro’a ’ei hoa misiōnare. E arata’ihia ānei te reira e te Vārua Maita’i ? Mea nāhea tō ’outou fa’ari’ira’a i te pāhonora’a i tā ’outou mau pure ’ei hoa misiōnare ? ’Ia pure ana’e ’outou ’ei hoa misiōnare, e :
-
Ti’aturi ānei ’outou ē, e hōro’a mai te Atua i te mea tā ’outou e ani nei ma te parauti’a ’e mai te au i tōna hina’aro ?
-
’Ite mau ānei ’e e ha’amāuruuru ānei ’outou nō te mau pāhonora’a i tā ’outou mau pure ?
-
Pure ānei ’outou nō te mau ta’ata ma te fa’ahiti i te i’oa ’e e feruri i tō rātou mau hina’aro ?
-
Pure ānei ’outou nō te tahi ’e te tahi ’e ’ia arata’i te Vārua ia ’outou ?
-
’Ite ānei ’outou i te mau te pāhonora’a o tā ’outou mau pure ?
-
Pure ānei ’outou ma te euhe ’ia ’ohipa i ni’a i te mau fa’aurura’a tā ’outou e fa’ari’i ?
-
-
E ’āparau nāhea ’outou e ’imi ai i te Vārua ma te tu’utu’u ’ore.
-
E ’āparau i te mau rāve’a ta’a ’ē tā te mau ta’ata e fa’ata’a nei i te fa’aurura’a a te Vārua Maita’i. ’A pāpa’i i roto i tā ’outou buka tāmahana i te mau parau tā te ta’ata ’o tā ’outou e ha’api’i nei i rave, i ni’a i tā rātou mau ’itera’a ’e te Vārua. Nāhea ’outou e nehenehe ai e tauturu ia vetahi ’ē ’ia ’ite i teie fa’aurura’a mo’a ?
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
-
Mai te mea e tano, ’a ani i te mau misiōnare ’ia fa’a’ite mai i te hō’ē ’ā’amu ’aore rā te hō’ē ’itera’a ’o tā rātou i fa’aro’o i roto i te hō’ē purera’a nō te ’itera’a pāpū, te hō’ē ’itera’a nō te ha’api’ira’a, ’aore rā te tahi vāhi ’ē, ’aita i maoro a’e nei. E nehenehe te mau ’ā’amu ’aore rā te mau ’itera’a pae vārua tei fa’ati’ahia mai e vetahi ’ē, e tauturu ia ’outou ’ia fa’ananea i tō ’outou fa’aro’o ’e ’ia ’ite ē, e tupu te fa’aurura’a a te Vārua ma te ’ā’ano ’e ma te pinepine.
-
’A ani i te mau misiōnare ’ia hōro’a mai i te mau a’ora’a nō ni’a i te misiōni ’e te mana o te Vārua Maita’i.
-
E ’āparau nāhea te fa’a’itera’a i te ’ā’au mehara i te tauturu ia ’outou ’ia hi’o i te mea ha’iha’i e mea faufa’a roa rā, ’a ha’amaita’i ai te Fatu ia ’outou (hi’o Etera 3:5 ; Te Ha’api’ira’a Tumu ’e te Fafaura’a 59:21). ’Āparau nō te mau huru fa’a’itera’a i te māurururu.
-
’A feruri e ani i te hō’ē melo ’āpī ’ia paraparau mai nō ni’a i huru ’a fa’auruhia ai ’oia e te Vārua, i te taime ’a ha’api’i mai ai ’oia nō ni’a i te ’Ēkālesia. E ani i te ta’ata ’ia fa’a’ite noa mai i te mau ’itera’a noa tāna i mana’o e mea tano.
Feiā fa’atere misiōni ’e nā tauturu misiōni
-
E nehenehe ’outou e ani i te mau misiōnare ’ia fa’aō mai i te mau ’itera’a pae vārua e tano i roto i tā rātou rata tāhepetoma.
-
I roto i te mau uiuira’a ’aore rā te mau ’āparaura’a, ’a ani i te tahi mau taime i te mau misiōnare nō ni’a i tā rātou mau pure i te po’ipo’i ’e te pō. ’Ia tītauhia, e ’āparau ’e ’o rātou nō ni’a e nāhea ’ia ha’afaufa’a atu ā i tā rātou mau pure.
-
’A ani i te mau misiōnare nāhea rātou i te tauturu i te feiā tā rātou e ha’api’i nei, ’ia putapū ’e ’ia ’ite i te Vārua.