Pi’ira’a misiōni
Pene 9 : ’Ite mai i te ta’ata nō te ha’api’i

« Pene 9 : ’Ite mai i te ta’ata nō te ha’api’i », ’Ia poro haere i tā’u nei ’Evanelia : E arata’i nō te ha’api’i i te ’Evanelia a Iesu Mesia (2023)

« Pene 9 », ’Ia poro haere i tā’u nei ’Evanelia

The Good Shepherd [Te tīa’i māmoe maita’i], nā Del Parson

Pene 9

’Ite mai i te ta’ata nō te ha’api’i

’A feruri na

  • Nāhea vau ’ia fa’a’ohipa i te fa’aro’o i te Mesia nō te ’ite mai i te ta’ata nō te ha’api’i ?

  • Nāhea tātou i te fa’a’ā’ano i tā tātou hi’ora’a ’e ’ia ha’amaita’i i tā tātou ’ōpuara’a nō te ’ite mai i te ta’ata nō te ha’api’i ?

  • Nāhea vau i te fa’ananea i tō’u ’aravihi ’e tō’u ti’aturi, nō te ’āparau atu i te ta’ata ’o tā’u e fārerei nei i te mau mahana ato’a ?

  • Nāhea tātou i te ’āmui atu ’e te mau melo i roto i te fa’a’itera’a i te ’evanelia ?

  • E aha tā tātou e rave ’ia fa’ari’i ana’e tātou i te mau i’oa tei fa’ataehia mai ?

  • E aha te tahi mau mana’o ’o tā tātou i ’ore i tāmata atu ra nō te ’ite mai i te ta’ata nō te ha’api’i ?

’Ua parau te Fa’aora tei ti’afa’ahou i tāna mau pipi, « e teie nei, e haere ’outou e fa’ariro i te mau fenua ato’a ’ei pipi, ’a bāpetizo atu ai ia rātou i roto i te i’oa o te Metua, ’e nō te Tamaiti, ’e nō te Vārua Maita’i » (Mataio 28:19 ; hi’o ato’a Mareko 16:15). ’Ua fa’ahiti fa’ahou te Fatu i teie fa’auera’a i tō tātou nei ’anotau, ma te parau ē, « ’a haere ’outou nā roto i te ao pā’āto’a nei [’e] ’a poro haere i te ’evanelia » (Te Ha’api’ira’a Tumu ’e te mau Fafaura’a 68:8 ; hi’o ato’a 50:14).

Te ’ohipa misiōnare ’o te ’itera’a mai ïa i te ta’ata, te ha’api’ira’a ia rātou ’e te tauturura’a ia rātou ’ia fa’aineine nō te bāpetizora’a. E rave fa’aoti ’oe i te fa’auera’a a te Fatu ’ia ha’api’i i tāna ’evanelia ’e ’ia bāpetizo i te feiā fa’afāriuhia ’ia « ’ite [mai ’oe] ia rātou ’o tē fa’ari’i mai ia [’oe] » (Te Ha’api’ira’a Tumu ’e te mau Fafaura’a 42:8). ’Aita e ’ohipa e tupu mai i roto i te ’ohipa misiōnare, ē tae roa i te taime e ’itehia mai ia ’oe i te hō’ē ta’ata nō te ha’api’i. ’A hi’o i te mau tāime ato’a i te mau rāve’a nō te fa’a’ite atu i te ’evanelia. ’A ha’api’i mai i te fa’a’ohipa i te mau rāve’a ’aravihi i roto i tō ’oe vaefenua.

E mea faufa’a ta’a ’ē mau ’ia ha’a ’e te mau melo i roto i te ’itera’a mai. ’A ha’a itoito nō te roa’a mai i tō rātou ti’aturira’a. ’Ia ti’aturi ana’e te mau melo i te mau misiōnare, e mea ’ōhie nō rātou ’ia ani i tō rātou mau hoa ’e te mau feti’i ’ia fārerei atu ia ’oe. Mea papū a’e teie mau ta’ata ’ia fa’afāriuhia i te Fatu, ’ia bāpetizohia, ’e ’ia haere i mua i ni’a i te ’ē’a o te ’evanelia.

E tupu te ’itera’a mai mai te au i te hina’aro o te hō’ē ta’ata ’ia fa’aro’o i te ’evanelia. Mea ta’a ’ē te tāime nō te ta’ata tāta’itahi. E nehenehe te ’itera’a mai e tupu i te ’ohipa-’āmui-ra’a mātāmua ’aore rā i te ’ohipa-’āmui-ra’a e rave rahi, nō te hō’ē tau roa. E rave rahi ta’ata tei ’ohipa ’āmui ’e te mau misiōnare ’aore rā ’e te mau melo nō te ’Ēkālesia, hou ’a ha’amata ai i te ’imi-maita’i-ra’a i te ’evanelia. ’Eiaha e taiā i te fārerei fa’ahou atu ia rātou.

E nehenehe tā ’oe mau tauto’ora’a nō te ’itera’a mai manuia, i muri mai i tō ’oe tauira’ahia ’aore rā i muri mai i te hopera’a tā ’oe tau misiōni. Noa atu te huru o te taime ’aore rā te hope’ara’a, e mauruuru te Fatu nō tā ’oe mau tauto’ora’a.

Tē vauvau nei teie pene i te mau parau tumu ’e te mau mana’o nō te tauturu ia ’oe ’ia ’ite mai. E mau parau tumu teie nō te mau vāhi ato’a. Teie rā, e ti’a paha i te mau misiōnare ’e i te feiā fa’atere misiōni e fa’atāno i te reira i tō rātou tupura’a.

’A fa’a’ohipa i te fa’aro’o nō te ’ite mai i te ta’ata nō te ha’api’i

I te mau vāhi tā ’oe e tāvini, ’ua pi’i te Fatu ia ’oe ’ia ha’a « nō te fa’aorara’a i te mau vārua ta’ata » (hi’o Te Ha’api’ira’a Tumu ’e te mau Fafaura’a 100:4). Nō te rave i te reira, e ti’a ia ’oe e fa’a’ohipa i te fa’aro’o i te Mesia nō te ’ite mai i te ta’ata nō te ha’api’i, ’ia nehenehe ia rātou ’ia mā’iti i te pe’e Iiāna ’e ’ia bāpetizohia.

Te fa’aro’o e parau tumu ïa nō te ’ohipa ’e te mana. ’Ia roa’a te fa’aro’o ē, e fa’aineine te Fatu i te ta’ata ’ia fa’ari’i i te ’evanelia tei fa’aho’ihia mai. ’Ia fa’aoroma’i ma te ti’aturi ē, e arata’i ’oia ia ’oe ia rātou ra, ’aore rā rātou ia ’oe ra. ’A ’ohipa ma tō ’oe fa’aro’o i te ha’amaura’a i te mau fā, te ravera’a i te mau ’ōpuara’a, ’e te fa’atupura’a i tā ’oe ’ōpuara’a nō te ’ite mai i te ta’ata nō te ha’api’i (hi’o pene 8).

mau misiōnare e pure ra

’A pure ma te fa’aro’o ’a ’imi noa ai ’oe i te tauturu a te Atua nō te ’ite mai i te ta’ata nō te ha’api’i. I tō Alama arata’ira’a i te hō’ē misiōni i pīha’i iho i te mau ’āti Zorama, ’ua pure ’oia : « E te Fatu, ’ia ha’amanuia mai ’oe ia mātou, ’ia arata’i fa’ahou mai mātou ia rātou ia ’oe na i roto i te Mesia. Inaha, e te Fatu, e mea faufa’a rahi tō rātou vārua […] nō reira ’a horo’a mai ia mātou, e te Fatu, i te mana ’e te pa’ari ’ia ti’a ia mātou ’ia arata’i fa’ahou mai ia rātou, i tō mātou mau taea’e, ia ’oe na » (Alama 31:34–35).

Pinepine te mau ta’ata tā ’oe e fārerei atu, ’aita rātou e ’ite nei ē tē ’imi nei rātou i te ’evanelia tei fa’aho’ihia mai, hou ’a ’itehia mai ai te reira ia rātou. ’Ei hi’ora’a, ’ua parau te hō’ē ta’ata fa’afāriuhia ē, « i tō’u fa’aro’ora’a i te ’evanelia, ’ua fa’a’ī te reira i te hō’ē vāhi vata i roto i tō’u ’ā’au, ’o tā’u i ’ore na i ’ite ē tē vai ra ». ’Ua parau ato’a te tahi, « ’ua hope iā’u te mā’imira’a ’o tā’u i ’ore na i ’ite ē, ’o vau iho ». Tē ’imi itoito nei vetahi i te parau mau ’aita rā i ’ite i hea e ’itehia mai ai te reira (hi’o Te Ha’api’ira’a Tumu ’e te mau Fafaura’a 123:12).

’A ’imi i te arata’ira’a a te Vārua ’a ’imi ai ’oe i te ta’ata nō te ha’api’i. Te ’itera’a mai nā roto i te Vārua e mea faufa’a ato’a i te ha’api’ira’a nā roto i te Vārua. ’Ia vai te fa’aro’o ē, e ’ite ’oe e nāhea ’ia ’ite mai i te feiā e fa’ari’i mai ia ’oe.

Ha’pi’ira’a ’e te hoa misiōnare

Penei a’e tē vai ra i roto i tō ’oe vaefenua te mau melo tei fa’afāriuhia i te ’Ēkālesia. ’A ui atu ia rātou e mea nāhea tō rātou fārereira’a ’e te ’Ēkālesia. E nehenehe tā rātou mau pāhonora’a e hōro’a mai ia ’oe i te mana’o e nāhea ’ia ’ite mai. ’A ui ato’a atu ia rātou e mea nāhea tō rātou ’itera’a ē, tē ha’api’i nei te mau misiōnare i te parau mau ia rātou. ’A pāpa’i poto noa i tō rātou mau ’itera’a i roto i tā ’oe buka tāmahana.

’Imira’a pāpa’ira’a mo’a

Mea nāhea te mau tamari’i a te Atua i te fa’aineinera’ahia ’e i te arata’ira’ahia i te ’evanelia i fa’aho’ihia mai ?

Fa’a’ā’ano i tō ’oe hi’ora’a nō te fa’anahora’a nō te ’ite mai

’A ’imi ai ’oe nō te ’ite mai i te ta’ata nō te ha’api’i, ’ia vai ara maita’i i te ta’a-’ē-ra’a i rotopū i te tārenara’a ’e te fa’anahora’a. Te tārenara’a e fa’a’ī te reira i tā ’oe buka tāmahana ’e tā ’oe mahana. Te fa’anahora’a ’o te ravera’a ïa i te tauto’ora’a itoito ’e nā roto i te pure nō te fa’atumu i ni’a i te ta’ata ’e i ni’a i te mau rāve’a maita’i a’e nō te ’ite mai ia rātou.

E nehenehe te ’ohipara’a tano, i te taime tano ’e i te vāhi tano, e tauturu ia ’oe ’ia ’ite mai i te ta’ata nō te ha’api’i. ’A ui ’ia ’oe iho i teie mau uira’a i muri nei :

  • I hea māua e nehenehe ai e fārerei i te mau ta’ata tā te Fatu e fa’aineine mai ra ?

  • Tei hea te mau vāhi maita’i a’e ’e te mau huru ’ohipara’a nō te ’ite mai i te ta’ata i te mau vāhi tano maita’i o te mahana ’aore rā o te hepetoma ?

  • Nāhea tātou i te fa’a’ite ia rātou i te here, e tāvini ia rātou, ’aore rā e ha’afaufa’a i tō rātou orara’a i teie nei ?

  • Nāhea tātou i te fa’a’ohipa i tō tātou iho pūai, te ’aravihi ’e te mau tāreni nō te fa’ati’a ia rātou ?

  • E aha tā tātou mau ’ōpuara’a mono ’ia ’ore ana’e te hō’ē ’ohipa e manuia ?

’A tāmata i te hi’o fa’ahou i te mau rāve’a tā te Fatu e fa’a’ineine nei i te ta’ata. ’Ua ineine ānei rātou nō te paraparau ia ’oe ? Tē ’imi ra ānei rātou i te tauturu ’aore rā i te tāmahanahana ?

’A feruri nō te ’ite mai i te mau tauto’ora’a tei manuia. I tei hea vāhi te ’ohipa-’āmui-ra’a mātāmua ? Tei roto ānei te mau melo nō te vāhi iho ? ’Ua fa’a’ohipahia ānei te ihi ano ha’a ?

’A ha’amata i tā ’oe fa’anahora’a ma te rōtahi i ni’a i te rāve’a e nehenehe ai ’oe e ha’amaita’i i te ta’ata, ’e i reira tā ’oe tārena e maita’i ai.

Ha’api’ira’a e te hoa misiōnare

’A fa’aohipa ’e tō ’oe hoa misiōnare i te tāpura i muri nei nō te fāito i tā ’oe mau tauto’ora’a, nō te ’ite mai i te ta’ata nō te ha’api’i. ’A feruri i te tāmata i te tahi mau mana’o e mea ’āpī nō ’oe.

Te ’itera’a mai i te tauto’ora’a

I te tahi taime

Pinepine

Fātata i te mau taime ato’a

’Ua ha’api’i mai māua i te ha’amātau i te mau melo ’e tē turu nei ia rātou i roto i tā rātou mau tauto’ora’a nō te fa’a’ite i te ’evanelia, ’oia ato’a te mau melo ’āpi, te feiā ’āpī, te feiā e fa’aineine nei nō te tāvini i te hō’ē misiōni rave tāmau, te mau misiōnare tei ho’i mai, te mau ’utuāfare ’āfa melo, ’e te feiā e au ’ei peresibutero.

Tē tūtava nei māua ’ia roa’a mai te ti’aturira’a o te mau melo, ’ia ’ōhie rātou i te ani manihini i tō rātou mau feti’i ’e tō rātou mau hoa ’ia fārerei mai ia māua.

Tē ’ohipa nei māua ’e te feiā fa’atere o te pāroita i roto i te mau rurura’a fa’aaura’a tāhepetoma, nō te turu i tā māua tauto’ora’a nō te ’imi ’e nō te ’ite mai ē, tē vai ra ānei te ta’ata o tā māua e nehenehe e fārerei atu.

Tē ’ohipa nei māua ’e te feiā e ha’api’ihia nei, te feiā tei ha’api’i-a’ena-hia, ’e te feiā tei ’itehia mai nā roto i te rāve’a nūmeri.

Tē paraparau nei māua i te rahira’a ta’ata e roa’a ia māua e paraparau atu i te mahana.

E fa’aineine māua ia māua i te pae vārua ’e e pure nō te fa’ari’i i te tauturu a te Atua, ’a mito ai māua tātou ’ia ’ite mai i te ta’ata nō te ha’api’i.

’Ua ti’aturi māua ē, tē fa’aineine nei te Fatu i te ta’ata nā māua e ha’api’i.

E feruri māua e nāhea i te tauturu i te feiā tā māua e fārerei nei ’ia putapū i te fa’aurura’a a te Vārua Maita’i.

E ha’amau māua i te mau fā nō te ’imira’a tāhepetoma ’e tāmahana ta’a ’ē (hiʼo pene 8).

Tē tāmau noa nei māua i te ’imi i te ta’ata nō te ha’api’i.

E ta’ata ha’arau [creatif] māua ’e tē fa’a’ohipa nei e rave rau rāve’a nō te ’ite mai i te ta’ata nō te ha’api’i. Tē tāmata nei māua i te mau rāve’a ’āpī ’e tē ’ape nei ’ia ’ore ’ia topa i roto i te nā ni’a-noa-ra’a.

E mito ta’a ’ē māua ’ia ’itehia mai. E fa’anaho māua ahea, i hea ’e nāhea māua ’ia fa’atumu atu.

E feruri māua tei hea te mau vāhi maita’i a’e ’e te mau taime maita’i a’e o te mahana, nō te ’ite mai i te ta’ata nō te ha’api’i.

E hi’o māua e aha te ’ohipara’a nō te mā’imira’a e mea pāpū i muta’a ra.

E fa’atano māua i tā māua ’ōpuara’a nō te mā’imi mai te au i te mau hina’aro ’e tē vai ra te ’ōpuara’a mono ’ia ’ore ana’e te mau ’ohipa tei fa’anahohia e manuia.

E fa’a’ohipa māua te fa’aaura’a rorouira ’Ia poro haere i tā’u nei ’Evanelia nō te ’ite mai, nō te ha’amau i te mau fā ’e nō te fa’anaho i te mau ’ōpuara’a, ’e nō te hi’o fa’ahou ’e nō te fa’atano i tā māua parau fa’a’ite tāmahana.

E fa’a’ohipa māua i tō māua iho mau tārēni ’e mau pūai nō te tauturu ’ia ’ite mai.

E fa’anaho māua ahea ’e nāhea māua e fa’a’ohipa ai i te mau rāve’a tōtiare ’e te tahi atu ihi ano ha’a nō te ’ite mai i te ta’ata nō te ha’api’i.

E fa’a’ohipa māua i te mau porora’a ve’a ’e te mau pupura’a o te vāhi iho, nō te pāhono i te mau hina’aro ’e te mau ’ana’anataera’a o te ta’ata o tō māua vaefenua.

E pāhono ’oi’oi māua i te mau anira’a nā ni’a te rēni ’e i te mau parau pōro’i a te mau ta’ata e nehenehe e ’ana’anatae.

E fa’anaho ātea māua i te mau piara’a nā ni’a i te rāve’a ha’apararera’a tōtiare ’e e ha’a i pīha’i iho i te mau melo nō te ’ite mai nā ni’a i te natirara.

’Ia itoito i roto i te ’itera’a mai

Te ’itera’a mai e tauto’ora’a tāmau ïa

I roto i te mau mahana mātāmua o te ’Ēkālesia tei fa’aho’i-fa’ahou-hia mai, ’ua fa’aue te Fatu e rave rahi taime i te hō’ē pupu taea’e ’ia ha’api’i i tāna ’evanelia « nā te pae ’ē’a » i roto i tō rātou mau tere. ’Ua hina’aro ’oia ’ia fa’a’ohipa rātou i te mau rāve’a ato’a nō te fa’a’ite i te ’evanelia. Hiʼo Te Haʼapiʼiraʼa Tumu ’e te mau Fafaura’a 52:9–10, 22–23, 25–27.)

’A fa’a’ohipa i teie arata’ira’a i tā ’oe ’itera’a mai. ’A rave i te tauto’ora’a itoito nō te ’ite mai i te roara’a o te mahana. ’A fa’anaho i tā ’oe mau tauto’ora’a nō te ’itera’a mai—’e ’a ’imi ato’a i te mau rāve’a mana’o-’ore-hia. Te ’itera’a mai i te mau ta’ata ’āpī nō te ha’api’i e hina’aro tāmau ïa.

’A ’imi i te fa’aurura’a ’e ’ia vai ineine nō te fa’a’ohipa i te mau rāve’a rau. ’A fa’atumu atu i ni’a i te mau rāve’a ’aravihi a’e i roto i tō ’oe vaefenua.

Christ Calling Peter and Andrew [Te pi’ira’a te Mesia ia Petero ’e ia Anederea], nā James Taylor Harwood

’A vaiiho noa te ’ā’ira i roto i te pape

Nō ni’a i te ’ohipa māna’ona’ora’a, ’ua parau te peresideni Dallin H. Oaks :

« ’Eiaha roa te hō’ē o tātou ’ia riro mai te hō’ē ta’ata rava’āi ’o tei mana’o ē, ’ua tai’a ’oia i te tā’āto’ara’a o te mahana, te ti’ara’a mau rā i te rahira’a o te taime ’ua haere atu ’oia i roto i te pape ’e ’ua haere mai i rāpae, ’ua tāmā’a ’e ’ua ha’apa’o i tāna tauiha’a. Te manuiara’a o te rava’āi e tū’ati ïa i te roara’a o te taime e vaiiho ’outou i te ’ā’ira hī i roto i te pape, ’eiaha ra i te maorora’a o tō ’outou haerera’a i rāpae’au i tō ’outou vāhi fa’aeara’a. Vetahi feiā rava’āi e fa’aru’e rātou i te fare e ’ahuru ma piti hora ’e e vaiiho i tā rātou ’ā’ira hī i roto i te pape e ’ahuru hora. Te tahi atu feiā rava’āi e fa’aru’e rātou i te fare e ’ahuru ma piti hora ’e ’ua vaiiho i tā rātou ’ā’ira hī i roto i te pape e piti noa hora. E uiui paha te feiā rava’āi hope’a nei nō te aha pai ’aita rātou i manuia mai te tahi atu mau ta’ata rava’āi.

« E tano ato’a teie parau tumu nō te mau misiōnare, ’o tā te Fatu i pi’i ‘te feiā rava’āi ta’ata’. [Mataio 4:19]. E ti’a i te ’ā’ira hī a te hō’ē misiōnare ’ia topa i roto i te pape o te hīra’a, i te taime ’a fa’aru’e ai ’oia i te fare fa’aeara’a » (seminaire nā te mau peresideni misiōni ’āpī, 20 nō Tiunu 2000)

e rave rahi ’ā’ira hī

’Ua fa’ananea Elder Quentin L. Cook i teie fa’aaura’a. Hau atu i te vaiihora’a i tā ’outou « ’ā’ira hī i roto i te pape » nō te tau roa atu ā, ’ua ha’api’i ’oia ē te mau misiōnare ’o te ’ite mai i te mau ta’ata nō te ha’api’i « e vaiiho tāmau noa e rave rahi ’ā’ira hī i roto i te pāpe […]

« E ’ite pāpū rātou ’e e fārerei i te mau ’utuāfare ’āfa melo.

« E mā’imi rātou i roto i tā rātou [fa’aaura’a rorouira ’Ia poro haere i tā’u nei ’Evanelia] i te mau ta’ata tei ha’api’ihia i te tauāhemo, nō te fārerei atu nā roto te niuniu ’aore rā te poro’i tāireuira.

« E pupu atu rātou i te tauturu i te mau melo, i te mau ta’ata tei ha’api’ihia i te tauāhemo, te mau ta’ata e ha’api’ihia nei, ’e te huira’atira tā’āto’a […]

« E tauturu rātou i te mau melo ’ia hāmani i te mau poro’i o te ’evanelia nō te fa’a’ite atu i ni’a i tā rātou iho […] tahua rāve’a tōtiare.

« E fa’ari’i rātou i te mau i’oa o te mau ta’ata tā rātou e fārerei atu ’e e ha’api’i » (« Be Spiritual Pathfinders and Influencers », purera’a nā te mau misiōnare, 10 nō Tetepa 2020; tu’uhia te ha’apāpūra’a)

Ha’api’ira’a ’e te hoa misiōnare

E ’āparau i te mau uira’a i muri nei :

  • E aha te tahi mau rāve’a e ti’a ai ia ’oe e vaiiho maoro atu ā i tā ’oe « ’ā’ira hī i roto i te pape» i te roara’a o te mahana ?

  • E aha te tahi mau rāve’a e ti’a ai ia ’oe e vaiiho e rave rahi ’ā’ira hī i roto i te pape, ’a ’ite mai ai ’oe i te ta’ata nō te ha’api’i ?

  • E aha te mau fa’a’ohipara’a i roto te fa’aaura’a rorouira ’Ia poro haere i tā’u nei ’Evanelia, e nehenehe e tauturu ia ’oe ?

  • Nāhea ’oe e nehenehe ai e fa’a’ohipa i te ihi ano ha’a nō te tauturu ia ’oe ’ia vaiiho e rave rahi ’ā’ira hī i roto i te pape ?

Paraparau i te mau ta’ata ato’a

’A fa’ananea i te hina’aro hōhonu ’ia ’āfa’i mai i te mau vairua i te Mesia ra (hi’o Mosia 28:3). ’Ia putapū ana’e ’oe i teie hina’aro, e ’itehia tō ’oe here ’e tō ’oe mana’ona’ora’a i roto i tā ’oe mau tauto’ora’a nō te ’ite mai. E ’ite-ato’a-hia tō ’oe here i roto i tā ’oe mau ’āparaura’a.

’A paraparau atu i te mau ta’ata ato’a e ti’a ai ia ’oe i te mau mahana ato’a. ’A paraparau atu ia rātou nā te mau vāhi ato’a e haere ai ’oe. I te vāhi e tano, ’a haere mai te hō’ē fare i te tahi atu fare. ’Ua ha’api’i te Fatu i te tahi pae o te mau peresibutero mātāmua o te ’Ēkālesia, « ’ia hāmama atu ’oe i tō ’oe vaha nō te poro haere i tā’u nei ’evanelia ». I muri iho ’ua fafau ’oia « e fa’a’īhia » tō rātou vaha i te parau e ha’api’i atu (Te Ha’api’ira’a Tumu ’e te mau Fafaura’a 30:5 ; hi’o ato’a 33:7–10).

’Oia ato’a, ’ua parau te Fatu ia Iosepha Semita ’e ia Sidney Rigdon, « ’a fa’ateitei atu ’oe i tō ’oe reo i teie nei feiā ; ’a parau atu i te mau mana’o tā’u e tu’u atu i roto i tō ’oe ’ā’au ». ’Ua fafau ’oia i muri mai « [e] hōro’ahia ho’i ia ’oe […] i te taime ti’a mau, i te mea tā ’oe e parau atu » (Te Ha’api’ira’a Tumu ’e te mau Fafaura’a 100: 5–6).

’A fārerei ai ’oe i te mau ta’ata, e putapū pinepine ’oe i te Vārua ’ia tauturu mai ia ’oe, ’ia ’ite i te mea e parau atu. Teie rā, ’ia ’ore ana’e ’oe e putapū i te fa’aurura’a, ’a ha’amata i te tahi atu vāhi—penei a’e ma te uira’a i te hō’ē uira’a ’e te fa’aro’ora’a i tā rātou pāhonora’a (hi’o « ’Ite mai i te ta’ata i te vāhi tei reira rātou » i roto i teie pene). ’Aore rā penei a’e e paraparau atu nō ni’a i te Fatu ia Iesu Mesia ’aore rā nō te pi’ira’a o Iosepha Semita ’ei peropheta nō te Atua.

E nehenehe i te mau mana’o i muri nei e tauturu ’a paraparau ai ’oe i te feiā tā ’oe e fārerei atu :

  • ’Ia vai fa’ari’i noa, te parau mau, ’e te auhoa. ’A ’imi i te mau rāve’a i te hono atu i te ta’ata ’e ’a ha’amata i te hō’ē ’āparaura’a.

  • ’A fa’aro’o maita’i i te mea tā te ta’ata e parau nei. ’A ’imi ’ia ta’a maita’i i te mau hina’aro ’e te mau ’ana’anataera’a o te ta’ata tāta’itahi. ’A pupu atu i te tauturu ta’ata iho, ’ia hina’aro-ana’e-hia.

  • ’A feruri e nāhea te ’evanelia i te tauturu ’ia pāhono i tō rātou mau hina’aro. I muri iho, ’a ha’api’i i te hō’ē parau mau niu o te ’evanelia ’e e ani manihini ia rātou ’ia ha’api’i mai atu ā. ’A fa’a’ite e nāhea te ’evanelia tei fa’aho’ihia mai e nehenehe ai e hōpoi mai i te tīa’ira’a rahi ’e te aura’a i roto i tō rātou orara’a.

  • ’A ui nō ni’a i tō rātou ’utuāfare. E tauturu ia rātou ’ia hi’o e nāhea te ’evanelia tei fa’aho’ihia mai e nehenehe ai e ha’amaita’i i tō rātou ’utuāfare. ’A pupu atu e tauturu ia rātou ’ia ’ite mai i te mau i’oa o tō rātou mau tupuna i pohe.

  • ’A ani manihini ia rātou ’ia haere mai i te purera’a ’ōro’a.

  • ’A pupu atu i te mau buka iti ’aore rā te tahi atu mau mātēria a te ’Ēkālesia, tei nene’ihia ’e terā i ni’a te natirara.

  • ’A fa’a’ite ia rātou i tā ’oe fā ’ei misiōnare ’e nō te aha ’oe i fa’a’oti ai e tāvini i te hō’ē misiōni.

E tano ato’a teie mau parau tumu nō tā ’oe ’ohipa-’āmui-ra’a ’e te mau melo.

E mea mātauhia tē vai ra te tahi mau fa’ataiāra’a nō te paraparau atu i te ta’ata. ’A pure ’ia roa’a te fa’aro’o ’e te itoito nō te ha’api’i i te ’evanelia i fa’aho’i-fa’ahou-hia mai. Te mau ta’ata ato’a tā ’oe e fārerei nei ’o tō ’oe ïa taea’e ’aore rā tuahine, i roto i te ’utuāfare o te Atua. ’A ha’amana’o ē ’aita ’oia « e pāto’i i te hō’ē ’ia haere mai iāna ra, te ’ere’ere ’e te ’uo’uo, te tītī ’e te ti’amā, te tāne ’e te vahine […] e hō’ē ana’e rātou ato’a i mua i te Atua » (2 Nephi 26:33).

Ha’api’ira’a ta’ata hō’ē ’e ha’api’ira’a ’e te hoa misiōnare

’A tai’o i te pāpa’ira’a a Victor Manuel Cabrera i roto te « Thirsting for the Living Water », Ensign, ’Ātete 2001, 60–61. ’A nā reira ai ’oe, ’a ’imi e mea nāhea ’oia i te fa’aineinera’ahia ’ia fa’ari’i i te mau misiōnare ’e e mea nāhea tō te mau misiōnare fa’a’ohipara’a i te rāve’a mana’o-’ore-hia nō te ha’api’i iāna i te ’evanelia.

  • Mea nāhea tō teie ta’ata fa’aineinera’ahia nō te ’evanelia tei fa’aho’i-fa’ahou-hia mai ?

  • E aha te ’ohipa e tupu mai, ’āhani ’aita te mau peresibutero i fa’a’ite i te hō’ē parau poro’i o te ’evanelia ?

  • ’A hi’o fa’ahou i te ’ohipa tā ’oe i rave i nanahi ra. ’Ua paraparau ānei ’oe i te rahira’a ta’ata e ti’a ai ia ’oe e paraparau atu ? Mai te mea ’aita, ’a ha’amau i te mau fā ’e ’a mito e paraparau e rave rahi atu ā ta’ata i teie mahana.

’Imira’a pāpa’ira’a mo’a

E aha tā ’oe e nehenehe e ha’api’i mai nā roto mai i te mau pāpa’ira’a mo’a i muri nei, nō ni’a i te ’itera’a mai i te ta’ata nō te ha’api’i ? E aha tā ’oe e nehenehe e ha’api’i mai nā roto mai i teie mau ’īrava nō ni’a i te mea e ti’a ia ’oe e ha’api’i ? E aha tā te Fatu e fafau mai ?

Tāhō’ē ’e te mau melo

« E tuha’a te tītaura’a i te tā’āto’ara’a ’ia fa’ari’i i te ’evanelia nō te ’ohipa o te fa’aorara’a ’e te fa’ateiteira’a (Buka arata’i rahi, 23.0). ’A ’ohipa ’e te mau melo o te ’Ēkālesia nō te ’ite mai te ta’ata nō te ha’api’i. ’Ia fa’a’ite ana’e mai te mau melo i te hō’ē ta’ata ia ’oe ’e e ’āmui mai i muri iho i roto i te mau ha’api’ira’a, mea pāpū roa ē e bāpetizohia ’e e vai itoito noa rātou i roto i te ’Ēkālesia.

Patu i te mau tā’amura’a pūai ’e te feiā fa’atere o te fenua iho.

Patu i te mau tā’amura’a pūai ’e te ’episekōpora’a ’e te tahi atu feiā fa’atere o te pāroita. ’O te ta’ata fa’atere misiōni pāroita (mai te mea ’ua pi’ihia hō’ē) ’e te peresidenira’a pupu peresibutero ’e te Sōtaiete Tauturu, tō ’oe feiā mātāmua nō te fārereira’a. ’A ’imi i tā rātou arata’ira’a ’e ’a turu ia rātou i roto i te rurura’a fa’aaura’a tāhepetoma (hi’o pene 13)).

I roto i te mau rurura’a fa’aaura’a tāhepetoma, ’a ’ohipa ’e te tauturu nō te pupu o te mau tahu’a ’e te peresideni nō te piha pa’ari a’e o te feiā ’āpī tamāhine. E ti’ara’a faufa’a roa tō te feiā ’āpī i roto i te fa’a’itera’a i te ’evanelia. Tauturu ia rātou ’ia fa’aitoito i te mau melo o te pupu autahu’ara’a ’e o te piha ’ia fa’a’ite i te ’evanelia. Te hō’ē rāve’a nō te feiā ’āpī ’ia ani manihini i tō rātou mau hoa i te mau fa’a’oa’oara’a.

’A ui pinepine ’ia ’oe iho, « ’ua riro ānei au ’ei ha’amaita’ira’a nō te feiā fa’atere o te fenua iho ? » ’A fa’ananea i te hō’ē huru e « nāhea vau e nehenehe ai e tauturu ? » Mai ia Ammona i roto i te Buka a Moromona, ’a ha’afātata atu i te feiā fa’atere o te reira vāhi ma te hō’ē huru nō te tāvinira’a (hi’o Alama 17:23–25).

’Ua ha’api’i te peresideni Russell M. Nelson i te feiā fa’atere nō te misiōni : « Tē ti’aturi nei au ē, e ha’api’i mai ’outou ’ia here i te feiā fa’atere ’e te mau melo o te fenua iho. ’A fa’ati’a ’e ’a fa’auru ia rātou. Tō ’outou ’aravihi ’ia fa’atū’ati i te ’ana’anatae o te mau misiōnare ’e te pāpūra’a ’e te mau tauto’ora’a here a te mau melo, ’aita ïa e fa’aaura’a. E fa’arahi-roa-hia tō ’outou manuiara’a (« Hopes of My Heart », seminaire nā te feiā fa’atere misiōni, 23 nō Tiunu 2019).

mau misiōnare e ha’api’i ra i te mau vahine

’A turu i te mau melo i roto i tā rātou mau tauto’ora’a nō te fa’a’ite i te ’evanelia

E rave rahi rāve’a nō te turu ’e nō te fa’aitoito i te mau melo ’ia fa’a’ite i te ’evanelia. Tauturu ia rātou ’ia feruri, e mea nāhea te ’evanelia i te ha’amaita’ira’a i tō rātou orara’a. ’A fa’aitoito ia rātou ’ia « fa’ateitei i tō [rātou] māramarama, ’ia ’ana’ana atu i tō te ao nei » (3 Nephi 18:24).

Tauturu i te mau melo ’ia fa’a’ohipa i te mau parau tumu o te here, fa’a’ite ’e ani manihini. ’A hōro’a i te mau hi’ora’a ma te mau rāve’a ’ōhie ’e te au noa nō te fa’a’ohipa i teie mau parau tumu.

Here. Hō’ē rāve’a nō te fa’a’ite te here i te Atua ’o te herera’a ïa ’e te tāvinira’a i tāna mau tamari’i. ’A fa’aitoito i te mau melo ’ia toro atu i te rima ma te here i te mau melo o te ’utuāfare, te mau hoa, te mau ta’ata tupu, ’e te tahi atu. Te tauto’ora’a ato’a nō te fa’a’ite i tōna here ’o te hō’ē ïa rāve’a faufa’a roa nō te ha’apa’ora’a i te mau fafaura’a tā rātou i rave ’e te Atua (hi’o Mosia 18:9–10).

Fa’a’ite. Nō tō rātou here i te Atua ’e i tāna mau tamari’i, e hina’aro ’ōhie noa te mau melo e fa’a’ite i te mau ha’amaita’ira’a tāna i hōro’a mai nō rātou (hi’o Ioane 13:34–35)). E fa’aitoito i te mau melo ’ia parau ia vetahi ’ē, e mea nāhea te ’evanelia i te ha’amaita’ira’a i tō rātou orara’a. E fa’aitoito ia rātou ’ia parau nō te Fa’aora ’e tāna fa’aurura’a. ’A tauturu ia rātou ’ia putapū i te ’oa’oa nā roto i te fa’a’itera’a i tō rātou here, te taime, ’e te mau tupura’a o te orara’a. ’A tauturu ia rātou ’ia ha’api’i mai, nāhea ’ia fa’a’ite ma te mau rāve’a au noa ’e te mātarohia—ma te ’ōhie noa mai tā rātou i mātau i te rave i roto i tō rātou orara’a.

Elder Gary E. Stevenson

« Tē fa’a’ite nei tātou pā’āto’a i te tahi mau mea ia vetahi ’ē. Pinepine tātou i te rave i te reira. Tē fa’a’ite nei tātou i te mau hōho’a teata ’e te mā’a auhia e tātou, te mau mea ’ārearea tā tātou e hi’o nei, te mau vāhi tā tātou e haere nei e māta’ita’i, te ’ohipa rima ’ī auhia e tātou, te mau fa’ahitira’a parau tei fa’auru ia tātou.

« Nāhea e ti’a ai ia tātou ’ia tu’u ’ōhie atu i ni’a i te tāpura o te mau mea tā tātou i fa’a’ite a’ena, i te mau mea tā tātou e au nei nō ni’a i te ’evanelia a Iesu Mesia ? […] Nā roto i te fa’a’itera’a i tō tātou mau ’itera’a maita’i i roto i te ’evanelia ia vetahi ’ē, tē ’āmui ra ïa tātou i roto i te fa’atupura’a i te fa’auera’a rahi a te Fa’aora » (Gary E. Stevenson, « Here, Fa’a’ite, Ani manihini », Liahona, Mē 2022, 86).

Ani manihini. Tē ani manihini mai nei te Fa’aora i te tā’āto’ara’a ’ia fa’ari’i i tāna ’evanelia ’e ’ia fa’aineine nō te ora mure ’ore (hi’o Alama 5:33–34). Mai te fa’a’itera’a, te ani-manihini-ra’a pinepine ’ua riro i te fa’aō-’ōhie-ra’a mai i te ’utuāfare, te mau hoa, ’e te mau ta’ata tupu i roto i te mea tei rave-a’ena-hia e te mau melo. ’A fa’aitoito i te mau melo ’ia pure nō te ani-manihini-ra’a i te ta’ata mai te mau rāve’a i muri nei :

  • ’A haere mai ’e ’a hi’o. E ani manihini i te ta’ata ’ia « haere mai ’e e hi’o » i te mau ha’amaita’ira’a tā rātou e nehenehe e fa’ari’i nā roto ia Iesu Mesia, tāna ’evanelia, ’e tāna ’Ēkālesia.

    1:17

  • ’A haere mai ’e ’a tāvini. E ani manihini i te ta’ata ’ia « haere mai ’e e tāvini » ia vetahi ’ē i roto i te fifi.

  • ’A haere mai ’e ’a fa’aea mai. E ani manihini i te ta’ata ’ia « haere mai ’e ’ia fa’aea mai » ’ei melo nō te ’Ēkālesia a Iesu Mesia i fa’aho’i-fa’ahou-hia mai.

’Ua parau Elder Gary E. Stevenson: « E rave rahi hānere ani-manihini-ra’a e nehenehe tātou e fa’atae ia vetahi ’ē. E nehenehe tātou e ani manihini ia vetahi ’ē ’ia « haere mai ’e e hi’o » i te hō’ē purera’a ’ōro’a, i te hō’ē fa’a’oa’oara’a nā te pāroita, i te hō’ē video nā ni’a i te natirara ’o tē fa’ata’a ra i te ’evanelia a Iesu Mesia. « Haere mai ’e e hi’o » e nehenehe e riro ’ei hō’ē ani-manihini-ra’a ’ia tai’o i te Buka a Moromona ’aore rā e māta’ita’i i te hō’ē hiero ’āpī i te taime o te ’ōpani ’īriti hou tōna ’ōro’a ha’amo’ara’a. I te tahi taime te ani-manihini-ra’a ’o te hō’ē ïa mea tā tātou e fa’atae i roto mai—te hō’ē ani-manihini-ra’a ia tātou iho, te hōro’ara’a ia tātou i te ’itera’a ’ā’au ’e te ’ōrama nō te mau rāve’a ’o te ’āua ha’ati nei ia tātou ’ia fa’a’ohipahia i te reira » (« Here, Fa’a’ite, Ani manihini », 86).

’Ia pāpū i te tauturura’a i te feiā ’āpī ’ia here, ’ia fa’a’ite ’e ’ia ani manihini. E ’aravihi ta’a ’ē tō te feiā ’āpī nō te here i tō rātou mau hoa, ’ia fa’a’ite i te mea e vai ra i roto i tō rātou ’ā’au, ’e ’ia ani manihini ia rātou ’ia haere mai i te mau fa’a’oa’oara’a.

Tauturu i te mau melo ’ia ta’a ē, te tauto’ora’a ato’a nō te ora i te mau parau tumu o te here, fa’a’ite, ’e ani manihini e mea maita’i ïa, ’ia fārerei ānei te hō’ē ta’ata i te mau misiōnare ’aore rā ’aita ’aore rā e tomo i roto i te ’Ēkālesia.

Tauturu i te mau melo ’ia turu’i i ni’a i tō rātou pūai nō te fa’a’ite i te evanelia. Mea ’aravihi vetahi nō te ’ite mai i te ta’ata nō te ha’api’i, ’e vetahi ra e mau ’orometua ha’api’i maita’i roa ïa. Vetahi e ’aravihi ’ōhie tō rātou nō te tū’ati atu i te mau hoa, ’āre’a vetahi ra e mea au ïa nā rātou e pure nō tō rātou mau hoa. Tauturu ia rātou ’ia hi’o ē, tē vai ra te mau rāve’a nō te tā’ato’ara’a ’ia ’āmui mai.

’Ia haere ’oe e fārerei i te mau melo, ’a rave i te reira ma te hō’ē fā pāpū. ’A fa’a’ite atu ē, tē rohi pāpū nei ’oe i roto i te ’ohipa nō te ’itera’a mai ’e te ha’api’ira’a. ’A fa’atura i tō rātou taime ’e tārena.

E mauruuru te tahi mau melo ’ia ha’api’i ’oe i te hō’ē parau poro’i nō te hō’ē o te mau ha’api’ira’a. E taui te mau parau mau o te ’evanelia i te orara’a. Te ha’apūaira’a i te ta’a-maita’i-ra’a o te melo i te ’evanelia, e ha’amara’a te reira i tō rātou ti’aturi ia ’oe ’e e fa’atupu mai i tō rātou ’ana’anatae ’ia fa’a’ite i te reira. Tauturu ia rātou ’ia ’ite i te Vārua ’e ’ia ha’a ’ia au i te mau muhumuhura’a.

’A ’imi ’ia ’itehia mai te ta’ata nō te ha’api’i nā roto i te mau ’utuāfare ’āfa melo, te mau ta’ata e tano ’ei peresibutero, te mau melo e ho’i mai nei, ’e te mau melo ’āpī. Mea pāpū paha e rave rahi melo o tō rātou ’utuāfare ’e te mau hoa nō te tahi atu ha’apa’ora’a fa’aro’o.

I roto i te mau mea ato’a tā ’oe e rave ’e te mau melo, ’a pe’e i te Vārua ’e ’a ’imi i te patu i tō rātou fa’aro’o i te Fa’aora, ia Iesu Mesia.

Nō te mau mana’o ’e te mau mātēria hau atu e nāhea ’oe i te turu i te mau melo i roto i te fa’a’itera’a i te ’evanelia, ’a hi’o :

’A fafau atu i te mau ha’amaita’ira’a nō te fa’a’itera’a i te ’evanelia

Tauturu i te mau melo ’ia ta’a i te mau ha’amaita’ira’a fa’ahiahia o tā te fa’a’itera’a i te ’evanelia e hōro’a mai. ’Oia ho’i :

Ha’api’ira’a ’e te hoa misiōnare

  • ’A hi’o fa’ahou i tā ’oe rurura’a fa’aaura’a tāhepetoma hopea. E nāhea e ti’a ai ia ’oe ’ia ha’amaita’i atu ā ? ’A hi’o fa’ahou i te mau anira’a a te feiā fa’atere o te pāroita ’e ’a fa’anaho e nāhea ’e ’āhea e pāhono ai.

  • ’A fa’anaho e nāhea ’oe ’ia fa’aau i tā ’oe mau tauto’ora’a misiōnare i te rurura’a fa’aaura’a tāhepetoma i mua nei.

  • ’A tāmau maita’i i te mau i’oa o te feiā fa’atere o te pāroita (taea’e ’e tuahine). ’A fa’anaho e aha te mea tā ’oe e rave i te roara’a o te ’āva’e i muri nei, nō te fa’ananea atu ā i te mau tā’amura’a pūai ’e o rātou ’e te turura’a ia rātou i roto i tā rātou mau tauto’ora’a misiōnare.

’A ’ite mai maōti te fa’aaura’a rorouira ’Ia poro haere i tā’u nei ’Evanelia

E mātēria fa’ahiahia mau te fa’aaura’a rorouira ’Ia poro haere i tā’u nei ’Evanelia, nō te ’ite mai i te ta’ata nō te ha’api’i. E manuia rahi a’e te mau misiōnare e fa’a’ohipa nei i te mau tuha’a i roto i teie fa’aaura’a rorouira. Nō te ha’amātau i teie mau tuha’a, ’a rave i te mau ha’api’ipi’ira’a e hōro’ahia i roto i te fa’aaura’a rorouira. ’Ia ara maita’i i te mau muhumuhura’a pae vāru ’o tā ’oe e nehenehe e fa’ari’i mai, ’a hi’o fa’ahou ai ’oe i te mau i’oa o te ta’ata.

Tei roto i te fa’aaura’a rorouira te ha’amāramaramara’a o te mau ta’ata, tei fa’atae-a’ena-hia mai te i’oa, tei fārereihia, ’aore rā tei ha’api’ihia. E hina’aro paha vetahi o teie mau ta’ata e fārerei fa’ahou i te mau misiōnare. ’Ua mātau ato’a paha rātou i te tahi atu mau ta’ata e ’ana’anatae nei ’ia ha’api’i rahi mai nō ni’a i te ’evanelia.

I roto i tā ’oe fa’anahora’a, ’a fa’a’ohipa i te hōho’a fenua ’e te mau titi’ara’a o te fa’aaura’a rorouira nō te ’āpapa mātāmua i te feiā tā ’oe e haere atu e fārerei. ’A hi’o i tō rātou ha’amāramaramara’a ’e ’a ha’api’i mai mea nāhea tō rātou ’itera’ahia mai. ’A hi’o māite ē, tē vai rā ānei te hō’ē fa’a’itera’a nō te mau melo tei tauturu ia rātou. ’A fa’a’ohipa i te reira ha’amāramaramara’a nō te fa’ata’a e aha te rāve’a maita’i a’e nō te fārerei fa’ahou ia rātou.

mau misiōnare e ’imi maita’i ra i ni’a te niuniu paraparau

’A fa’a’ohipa i te tuha’a tīti’ara’a i roto i te fa’aaura’a rorouira nō te ’ite mai i te feiā ato’a ’o tei :

  • Fa’ata’a a’ena i te tai’o mahana nō te bāpetizora’a ’aita rā i bāpetizohia.

  • Haere mai i te purera’a ’ōro’a hō’ē a’e taime ’aita rā i bāpetizohia.

  • Fa’ari’i hau atu e toru ha’api’ira’a.

  • ’Ore i fārereihia iho nei.

Mai te peu ’aita te feiā tā ’oe i fārerei atu e hina’aro ’ia ha’api’ihia ’aore rā ’ua fa’aoti e fa’aea roa te mau fārereira’a, ’a tāpa’o teie ha’amāramaramara’a i roto te fa’aaura’a rorouira. ’A pāpa’i e nāfea ’oe ’ia tāmau noa i te fārerei atu ’e i te fa’aitoito ia rātou, e tae roa i te taime ’ua ineine rātou ’ia ha’api’i fa’ahou mai. ’Ei hi’ora’a, ’a feruri i te ani manihini ia rātou ’ia tāpa’o ia rātou i te pāpa’a rata uira nō te fa’ari’i i te mau poro’i nō ni’a ia Iesu Mesia ’aore rā te tahi atu mau tumu parau o te ’evanelia. E nehenehe ato’a ’oe e fa’atīhono atu ia rātou ’e te hō’ē melo ’o te nehenehe e pāhono i te mau uira’a ’e e fa’arahi i tō rātou ’ana’anataera’a ’e te auhoara’a. ’A ha’amau i te hō’ē ha’amana’ora’a i roto i te fa’aaura’a rorouira nō te pe’e-fa’ahou-ra’a ia rātou. ’A ani atu ia rātou ē, tē vai ra ānei te tahi atu ta’ata e nehenehe e ’ana’anatae.

E nehenehe ato’a ’oe e ’ite mau i te ta’ata nō te ha’api’i nā roto i te fa’aaura’a rorouira ’Ia poro haere i tā’u nei ’Evanelia, mā te fa’a’ohipa i te mau titi’ara’a ’aore rā te mau pupu nō te hāpono atu i te mau poro’i a te pupu. E nehenehe te reira e riro ’ei rāve’a maita’i roa nō te fa’aara i te ta’ata nō te mau ’ohipa e tupu, mai te mau fa’a’oa’oara’a a te pāroita ’e te mau ’ōro’a bāpetizora’a. ’A pe’e atu ’e te mau anira’a manihini a te ta’ata iho i teie mau ’ohipa e tupu.

Ha’api’ira’a ’e te hoa misiōnare

Nō te hi’o ē, e rāve’a maita’i mau te fa’a’aura’a rorouira o te ’Ia poro haere i tā’u nei ’Evanelia, ’a tāmata i te mau ’ātivite i muri nei. ’A nā reira ai ’oe, ’a ha’apa’o maita’i te mau mana’o e tae mai ia ’oe ra.

  • Ma te fa’a’ohipa i te titi’ara’a, ’a ’ite mai i te feiā ato’a i ha’api’ihia e toru a’e ha’api’ira’a ’aore rā hau atu. ’A ani manihini i te ta’ata tāta’itahi ’ia haere mai i te purera’a i teie sābati.

  • Ha’amau i te hō’ē titi’ara’a ’e ’a ’ite mai i te feiā ato’a i fa’ata’a i te hō’ē mahana nō tō rātou bāpetizora’a ’e tei haere mai i te purera’a e piti a’e taime.

  • ’A fa’anaho i te mau poro’i i te ta’ata tāta’itahi ’ia ’āmui mai i te hō’ē fa’a’oa’oara’a a te pāroita ’aore rā te hō’ē ’ohipa tāvinira’a. I te tahi taime, e hina’aro paha ’oe e fa’atae atu i te hō’ē poro’i ’e e hi’o fa’ahou i te ta’ata tāta’itahi.

  • ’A ’āparau ’e tō ’oe hoa nō ni’a te feiā tā ’oe i fa’auruhia. ’A fa’anaho i te fārerei atu ’aore rā i te niuniu ’oi’oi atu ia rātou.

’Ite mai nā roto i te tāvinira’a

’A hōro’a atu i te mau rāve’a nō te ta’ata ’ia haere ’e ’ia tāvini.

E nehenehe te ta’ata e ’ora i te mau ’itera’a maita’i ’e e tīhono atu i te mau misiōnare ’e te mau melo o te fenua iho, i roto i te mau ’ohipa tāvinira’a. E rave rahi ta’ata e ’oa’oa ’ia fa’a’ite atu i tō rātou mau tāreni, mau ’aravihi, ’aore rā mau tāvinira’a ’e ’ua hina’aro noa ’ia ani-manihini-hia mai rātou.

’A ani manihini i te ta’ata ’ia ’āmui mai i roto i te mau ’ohipa tāvinira’a tei fa’atupuhia e te pāroita. E nehenehe ato’a ’oe ’ia tīhono atu te ta’ata ma te mau rāve’a o te tāvinira’a mai tei ’itehia i ni’a te JustServe.org, i te vāhi tē vai ra te reira. ’A tāvini ai ’oe ia vetahi ē, e tāhō’ē mai ’oe ma te rāve’a pūai.

’A pūpū atu i te tāvinira’a

Mai te Fa’aora te huru, « [haere] e hāmani maita’i » (Te ’Ohipa 10:38 ; hi’o ato’a « Haere e hāmani maita’i » i roto i te pene 1). ’A pure ’ia ara noa i te mau taime e au ’ia hāmani maita’i i te roara’a o te mahana tāta’itahi. Te tahi mau taime e fa’anahohia tā ’oe tāvinira’a, pinepine rā te reira i te fa’anaho-’ore-hia. ’A ’ite mai i te mau rāve’a ’ōhie ’e te ’oi’oi nō te tāvini, nō te tauturu, ’e nō te fa’ati’a i te ta’ata. ’A ha’amana’o ē, ’ua rave te Fatu i te mau taime mana’o-’ore-hia nō te toro i te rima ’e nō te ha’amaita’i ia vetahi ’ē.

Tāvini ma te hina’aro mau e tauturu i te ta’ata. Mai te peu e arata’i te tāvinira’a i te rāve’a nō te hō’ē ha’api’ira’a, ’a ’oa’oa. ’Aita ana’e, ’a ’oa’oa i te hāmani-maita’i-ra’a i te hō’ē ta’ata. ’A pāhono i te mau uira’a mai te peu e ui mai rātou. Mai te peu e fa’a’ite mai te hō’ē ta’ata i te ’ana’anatae, ’a pāhono poto noa ’e ’a fa’anaho i te hō’ē fārereira’a i te tahi atu taime nō te fa’a’ite atu i te parau poro’i.

’Ia pāpū ra ia ’oe i te pe’e i te mau arata’ira’a nō te tāvinira’a i roto Te mau ture misiōnare nō te mau pipi a Iesu Mesia, 2.7 ’e 7.2.

’Ite mai te ta’ata i te vāhi tei reira rātou

E ha’amata te ’itera’a mai i te ta’ata i te vāhi tei reira rātou, ma te tāmatara’a i te hi’o ia rātou mai tā te Atua e hi’o ra. ’A feruru nā ē, ’ua arata’ihia paha ’oe ’ia paraparau atu i teie ta’ata, ’aore rā ’ua arata’ihia mai paha ’oia ia ’oe. ’A ’imi i te hāro’aro’a maita’i i te mau hina’aro ’e te mau tītaura’a pae vārua o te ta’ata. ’A ’ite mai e aha te mea faufa’a roa nō rātou, i roto ihoā rā i tō rātou mau tā’amura’a ’e te ’utuāfare ’e te Atua. E nehenehe ’oe e ui atu i te mau uira’a mai teie i raro nei—’e i muri iho ’a fa’aro’o maita’i :

  • E aha te mea tā ’oe e ha’afaufa’a roa a’e ?

  • E aha te mea e fa’a’oa’oa ia ’oe ?

  • E aha tā ʼoe e hina’aro nei nō tō ’oe iho ananahi ’e nō te feiā tā ’oe i here ?

  • E aha te mau fifi tā ’oe e fa’aruru nei nō te fa’atupu i tō ’oe mau tīa’ira’a ’e mau moemoeā ?

  • E aha te mau huru i roto i tō ’oe orara’a tā ’oe e hina’aro nei e ha’amaita’i ?

’A ’imi i te fa’aurura’a ’a feruri ai ’oe i te mea tā ’oe i ha’api’i mai, nō ni’a i te mau tīa’ira’a ’e te mau hina’aro o te ta’ata. E aha te mau parau mau o te ’evanelia e tū’ati ’ōhie nei i te mea tāna e hina’aro nei ?

’A feruri i tā ’oe ha’afātatara’a ’ia au i te hi’ora’a a teie ta’ata. E aha tāna i ’ite nō ni’a ia ’oe ? E aha tā ʼōrua e nehenehe e hōro’a atu, ’o tē nehenehe e tauturu atu ? Tē mana’o ra ānei te ta’ata ē, e mea faufa’a te ’ohipa-’āmui-ra’a ’e ’oe ?

’A feruri i te mau tumu ta’a ’ē nō reira te ta’ata e hina’aro ai e ha’api’i mai i te ha’amātau ia ’oe, i te tahi atu mau melo ’aore rā i te ’Ēkālesia. ’Ua fa’ata’ahia i raro nei te tahi mau hi’ora’a ’o tā ’oe e nehenehe e hōro’a atu.

mau misiōnare e paraparau ra i te vahine

’A hōro’a i te mau ’itera’a ’aore rā i te mau ha’amāramaramara’a tā rātou e ha’afaufa’a

’A fa’a’ohipa i te mau mātēria a te ’Ēkālesia ’e tō ’oe iho mau tārēni ’e mau pūai, nō te tīhono atu i te mau ’ana’anataera’a o te hō’ē ta’ata. ’A ’imi i te tauturu a te Metua i te ao ra ma te pupu atu i te mau ha’amāramaramara’a ’aore rā te mau ’itera’a tā te ta’ata e ha’afaufa’a.

’Ia vai matara noa i te fa’aurura’a ’e ’ia vai ha’arau ’a feruri ai ’oe i te mau huru ’itera’a ta’a ’ē ’aore rā ha’amāramaramara’a ’o tā ’oe e nehenehe e hōro’a atu. ’Ua tāpurahia te tahi mau mana’o i raro nei.

  • ’A fa’a’ite atu i te hō’ē hono nō te hō’ē mātēria a te ’Ēkālesia ’o tē hōro’a nei i te mau ha’amāramaramara’a nō ni’a i te hō’ē ’ohipa tā rātou e ’ana’anatae nei.

  • ’A fa’anaho i te hō’ē tupura’a ’ohipa mai te hō’e purera’a (’ei tino ta’ata ’aore rā nā ni’a te natirara).

  • E pūpū atu i te hō’ē tao’a i te hō’ē rurura’a ’aore rā te hō’ē tupura’a ’ohipa (’ei hi’ora’a, hāmani i te mau tumu rā’au ’aufaufēti’i tāmoni ’ore i te hō’ē mātete nō te fenua iho).

  • ’A pūpū atu e ha’api’i i te hō’ē piha ha’api’ira’a.

  • ’A fa’anaho i te hō’ē piha ha’api’ira’a ’imira’a pāpa’ira’a mo’a, ’aore rā e pūpū atu e tai’o i te Bibilia ’e te tahi atu mau pāpa’ira’a mo’a ’e o rātou.

  • ’A ha’api’i i te reo peretāne ’ei reo piti.

  • ’A pia atu i te mau ’ātivite a te ’Ēkālesia o te fenua iho mai te hō’ē ’ōro’a fa’a’oa’oara’a ’aore rā te mau piha ha’api’ira’a nō te fa’arava’ira’a iāna iho. Fa’a’ohipa i te mau parau ’ōpere ’aore rā te rāve’a tūreiara’a tōtiare.

  • ’A ani ia rātou ’ia haere mai i te hō’ē ’ōro’a bāpetizora’a.

  • ’A pūpū atu i te ha’amata’ita’i ia rātou i te fare purera’a o te fenua iho.

Te hōʼē o te mau ’itera’a faufaʼa rahi roa ’o tā ’oe e nehenehe e tauturu i te ta’ata ’ia ’ore ’oia ho’i, te arata’ira’a mai ia rātou i te hō’ē purera’a a te ’Ēkālesia. ’A ani manihini ia rātou ’e ’a fa’ata’a atu mai te aha te reira e tupu ai. ’A parau ia rātou ē, nāhea te taera’a mai i te hō’ē purera’a ’ōro’a e ha’amaita’i ai i tō rātou orara’a.

Fa’a’ōhie i te mau tā’amura’a mau

E rave rahi ta’ata e hina’aro nei e fārerei atu i te tahi atu mau ta’ata i roto i tō rātou vāhi nohora’a ’aore rā ’nō te mātau maita’i atu ā ia rātou. Tē vai mo’emo’e nei vetahi mau ta’ata. ’Ua tāpurahia i raro nei te tahi mau mana’o nō te tauturu i te fa’a’ōhiera’a i te mau tā’amura’a.

  • ’A haere atu e fārerei i te feiā tei tae noa mai nei i roto i te vaefenua nō te fa’ari’i pōpou ia rātou.

  • ’A ha’afārerei atu i te feiā i roto i te vāhi nohora’a i te mau melo e hō’ē ā tō rātou mau ’ana’anataera’a.

  • ’A ani manihini i te ta’ata i te mau rurura’a pāroita, i te mau ’ātivite, ’e i te mau ’ōpani ’īriti.

  • ’A pūpū atu i te tauturu ia rātou ’ia tīhono atu i te ti’a fa’atere nō te hiero ’e te ’ā’amu ’utuāfare, ’o tē nehenehe e tauturu ia rātou ’ia ha’api’i hau atu ā mai nō ni’a i tō rātou mau melo ’utuāfare tei pohe.

  • ’A pūpū atu i te ha’api’i i te ta’ata nāhea ’ia fa’atupu i te pō ’utuāfare ’aore rā ’ia tāi’o i te mau pāpa’ira’a mo’a ’ei ’utuāfare. (Hi’o Buka arata’i rahi, 2.2.4, nō te mau parau tumu tauturu e nehenehe e fa’atanohia i te huru orara’a o te ta’ata.)

  • ’A ani manihini i te ta’ata nō te matahiti tano ’ia haere mai i te séminaire, te institut, ’aore rā ’ia ’āmui mai i te BYU–Pathway Worldwide.

E rave rahi rāve’a tura nō te ’ite mai i te feiā ’o tei fa’aineinehia nō te ’evanelia i fa’aho’i-fa’ahou-hia mai. ’A rave i te mea e ti’a ai ia ’oe ’ia tu’uhia ’oe i ni’a i te ’ē’a o te feiā tei fa’aineinehia.

Ha’api’ira’a ’e te hoa misiōnare

’A ’ite mai i te tahi mau mana’o i roto i teie tuha’a, ’o tā ’oe i ’ore ā i tāmata atu ra. ’A fa’anaho i te tāmata i te tahi mau mana’o i roto i te hepetoma i muri nei.

’A fārerei atu te feiā ’o tei fa’ataehia mai te i’oa ia ’oe

Penei a’e te feiā tei fa’ataehia mai te i’oa ia ’oe ’ua ineine nō te fa’ari’i i te ’evanelia a Iesu Mesia. E nehenehe te mau i’oa e tae mai nā roto mai i te mau melo o te ’Ēkālesia, te tahi atu misiōnare, te pū fa’aterera’a a te ’Ēkālesia, ’e te mau tauto’ora’a tūreiara’a tōtiare o te fenua iho.

Fārerei ’oi’oi atu

’Ia fa’atae-ana’e-hia mai te hō’ē i’oa ia ’oe nā roto mai i te pū fa’aterera’a ’aore rā nā roto mai i te tūreiara’a tōtiare o te fenua iho, ’a hi’o fa’ahou i te ha’amāramaramara’a i roto te fa’aaura’a rorouira o te ’Ia poro haere i tā’u nei ’Evanelia nō ni’a i tō rātou mau ’ana’anataera’a. ’A tāmata i te fārerei ’oi’oi atu ia rātou.

misiōnare e pātōtō ra i te ’ūputa

’A fa’a’ohipa i te mau arata’ira’a i muri nei ’a ha’a ai ’oe ’e te feiā tei fa’ataehia mai te i’oa ia ’oe :

  • Mai te peu nā te hō’ē melo ’aore rā nā te tahi atu mau misiōnare i fa’atae mai i te i’oa, ’a fārerei atu i te ta’ata tei fa’atae mai i te i’oa nō te māramarama hau atu ā. Mai te peu nā te mau misiōnare i fa’atae mai te i’oa o te ta’ata, e nehenehe rātou e ha’api’i nā ni’a te natira’a ’e o ’oe, mai te peu e fa’ati’a tō rātou fa’atere misiōni. E nehenehe te mau melo e ’āmui tino mai ia ’oe ’aore rā nā roto i te nātirara, i roto i te ha’api’ira’a.

  • ’A tāmata i te fārerei ’oi’oi atu i te ta’ata nā roto i te hō’ē fārerei tino, te niuniura’a, te parau poto tāireiuira, te rata rorouira, ’aore rā te tahi atu rāve’a tūreiara’a. ’Ia ’ore ana’e te ta’ata e pāhono mai, ’a tāmata i te niuniu atu iāna i te tahi atu taime o te mahana.

  • Mai te peu tā ’oe fārereira’a mātāmua mea nā roto i te niuniu, te parau poto tāireiuira, ’aore rā te rata uira, ’a fa’anaho i te hō’ē taime nō te fārerei tino atu ’aore rā nā te ihi ano ha’a.

  • ’Ei auhoa, ’a hi’o fa’ahou i te anira’a a te ta’ata ’e ’a ’ite mai i tōna mau hina’aro ’e mau ’ana’anataera’a. ’A fa’ata’a nāhea te ’evanelia e nehenehe ai e tauturu i te pāhono i teie mau hina’aro.

  • ’Ia fārerei ana’e ’outou, ’a ’āfa’i mai i te mau mātēria ato’a e hina’arohia, mai te Buka a Moromona. ’A fa’a’ite i te mau parau mau nā roto mai te mau ha’api’ira’a misiōnare ’o te pāhono i te mau ’ana’anataera’a ’e te mau hina’aro o te ta’ata.

Te tahi taime e nehenehe te mau ta’ata tei fa’ataehia mai te i’oa e arata’i atu ia ’oe i te tahi atu mau ta’ata tā te Atua i fa’aineine. Mai te peu ’aita te ta’ata tā ’oe i fārerei e ’ana’anatae ra, ’a ani atu ’ua ’ite ānei rātou i te tahi mau ta’ata e ’ana’anatae nei ’aore rā e hina’aro nei i te tīa’ira’a i roto i tō rātou orara’a. Penei a’e ’ua arata’ihia ’oe i teie ta’ata ra nō te mea, ’ua ineine te tahi atu ta’ata i roto i te ’utuāfare ’aore rā i roto i te vāhi nohora’a nō te fa’ari’i i te ’evanelia.

’Ia manuia ’ore ana’e te hō’ē fārereira’a ’e te hō’e ta’ata, ’a feruri nāhea ’oe e nehenehe ai e rave i te tahi atu ’ohipa misiōnare i te reira vāhi. E nehenehe te fa’aaura’a rorouira ’Ia poro aere i tā’u nei ’Evanelia e tauturu ia ’oe ’ia ’ite mai i te feiā nā pīha’i iho ’o tei fārerei-a’ena hia ’aore rā ’o tei ha’api’i-a’ena-hia.

Fa’atae i te i’oa o te ta’ata i te mau misiōnare nō te tahi atu vaefenua

’Ia fārerei ana’e ’oe i te ta’ata e hina’aro nei e ’ite rahi atu ā nō ni’a i te ’evanelia, ’o tē ora rā i rāpae’au i te vaefenua tei fa’ata’ahia nā ’oe, ’a fa’a’ite atu te ’evanelia ia rātou. ’A tauturu atu ia rātou i muri iho ’ia fa’aineine nō te fārerei atu i te mau misiōnare ’e mau melo, i te vāhi i reira rātou i te fa’aeara’a.

Ma te fa’ati’ahia a tō ’oe peresideni misiōni, e nehenehe ’oe e tāmau noa i te turu i teie mau ta’ata, nō te tauturu ia rātou ’ia fa’ari’i i te ’evanelia (hi’o Misionary Standards [Fa’aturera’a misiōnare], 7.5.4).

Ha’api’ira’a ’e te hoa misiōnare

Hi’o fa’ahou i te mau ta’ata ato’a tei fa’ataehia mai te i’oa i roto i tō ’oe vaefenua i roto i te ’āva’e i ma’iri. ’A ’ite mai i te mau ta’ata ’o tā ’oe i ’ore i fārerei atu, ’e ’a tāmata i te fārerei fa’ahou ia rātou. ’A fa’aoti ’o vai i roto i te feiā tei fārereihia e ti’a ’ia fārerei-fa’ahou-hia. A fa’atano i teie mau parau fa’a’ite i roto i te fa’aaura’a rorouira ’Ia poro haere i tā’u nei ’Evanelia.

mau misiōnare e paraparau ra nā te niuniu paraparau

Fa’a’ohipa i te ihi ano ha’a

E rave rahi rāve’a tā ’oe e nehenehe e fa’a’ohipa i te ihi ano ha’a nō te ’ite mai i te ta’ata nō te ha’api’i. ’Ua tāpurahia te tahi mau hi’ora’a i raro nei :

  • ’A fa’a’ohipa i te mau rāve’a tūreiara’a tōtiare nō te ha’a ’e te mau melo nō te ’ite mai i te ta’ata nō te ha’api’i.

  • E patu i te mau tā’amura’a nā roto i te fārereira’a nā te rata uira ’e te rāve’a tūreiara’a tōtiare.

  • ’A fa’a’ite atu i te mau pāpa’ira’a mo’a, te mau fa’ahitira’a parau, ’e te mau poro’i o te ’evanelia ’o te fa’aitoito atu.

  • Tauturu i te ta’ata ’ia fa’a’ohipa te FamilySearch.org nō te ha’api’i rahi mai ā nō ni’a i tō rātou mau melo o te ’utuāfare tei pohe.

  • ’A pūpū atu i te mau piha ha’api’ira’a i ni’a i te natirara nō te ha’api’i i te mau ’aravihi.

  • ’A ha’amau i te mau tīhonora’a tano nā roto i te mau pupu e mau ’ana’anataera’a ’āmui i ni’a i te natirara.

  • ’A hāmani i te hō’ē parau pia e fa’aara nei i te mau tupura’a ’ohipa i muri nei a te pāroita.

E rāve’a faufa’a roa te fa’a’ohipara’a i te ihi ano ha’a nō te vaiiho « i te mau ’ā’ira hī i roto i te pape » i te roara’a o te mahana. Nā ni’a mai i tā ’oe mau tauto’ora’a nō te ’itera’a mai, ’a vaiiho e rave rahi ’ā’ira hī o te natirara i roto i te pape.

Elder David A. Bednar

’Ua ha’api’i Elder David A. Bednar : « Tē pūpū nei te ihi ano ha’a e rave rahi rēni pūai e nehenehe ai ia tātou e poro ia ‘Iesu Mesia, ’e ’oia i fa’asataurohia’ ’e ‘e poro i te tātarahapara’a i te mau ta’ata’ [1 Korinetia 2:2 ; Te Ha’api’ira’a Tumu ’e te mau Fafaura’a 44:3]. ’Ua fa’aineine-ta’a-’ē-hia te u’i ’āpī e ti’a mai nei nō te fa’aro’o ’e nō te ha’api’i mai i te ’evanelia i fa’aho’i-fa’ahou-hia mai māoti teie mau rāve’a » (« They Should Proclaim These Things unto the World », seminaire nā te mau peresideni misiōni ’āpī, 24 nō Tiunu 2016).

Ha’api’ira’a ’e te hoa misiōnare

ʼA hi’o mai e aha tā tā ’oe misiōni e rave nei ’e te rāve’a tūreiara’a tōtiare. ’A paraparau ’e tō ’oe hoa, nāhea ’oe e nehenehe ai e hāmani i te mau piara’a i ni’a i te rāve’a tūreiara’a tōtiare e tano i te reire. E ti’a i tā ’oe mau piara’a e tū’ati i te fa’aturera’a natirara a te ’Ēkālesia (hi’o « Itenati [Natirara] » i roto te tuha’a 38.8 o te Buka arata’i rahi).

Mai te peu tē vai ra tā tā ’oe misiōni te hō’ē ta’ata ’aravihi nō te rāve’a tūreiara’a tōtiare, ’a turu’i atu i ni’a i tōna ’aravihi ’a hāmani ai ’oe i te piara’a i ni’a te rāve’a tūreiara’a tōtiare.

e piti vahine e paraparau ra

Fa’a’ohipa i te ’ā’amu ’utuāfare

E rāve’a ato’a te ’ā’amu ’utuāfare nō te ’ite mai i te ta’ata nō te ha’api’i. Tē fa’auru nei te Vārua i te mau milioni ta’ata nā te ao ato’a nei, ’ia ’ite mai i tō rātou mau tupuna tei pohe. Tē hina’aro nei e rave rahi o rātou i te ho’ē tīhonora’a pūai ’e tō rātou ’utuāfare ’ā’ano. E nehenehe te reira e arata’i atu i te hō’ē hina’aro ’ia ’ite mai i te hō’ē tīhonora’a ’e te hō’ē ihota’ata ’ei tuha’a nō te ’utuāfare o te Atua.

’O te mea ïa ’o tā tātou e parau nei i te tahi taime te vārua o Eliaha ’o te fa’aurura’a ïa o te Vārua Maita’i ’o te tura’i i te ta’ata ’ia ’ite mai, ’ia ha’aputu te parau, ’e ’ia poihere i tō rātou mau melo o te ’utuāfare—tō tahito ra ’e tō teienei (hi’o Malaki 4:5–6).

I roto i tā ’oe ’itera’a mai, e nehenehe ’oe e vauvau atu i te tā’ata te FamilySearch.org ’aore rā e ani ia rātou e fa’auta uira mai te fa’aaura’a rorouira FamilySearch Tree, ’aore rā te fa’aaura’a rorouira FamilySearch Memories. E nehenehe ato’a ’oe e hōro’a atu ia rātou i te hō’ē buka iti Tō’u ’utuāfare : Te mau ’ā’amu e tāhō’ē ia tātou. E tauturu teie mau mātēria i te ta’ata ’ia ’ite mai i te mau fēti’i ’e te mau tupuna ’e ’ia ha’aputu mai i tō rātou mau ’ā’amu.

’A fa’ata’a e aha te mau mātēria nō te ’ā’amu ’utuāfare e vai nei i roto i tō ’oe vaefenua ’e e nāhea te reira e nehenehe ai e tauturu i te ta’ata ’o tā ’oe i fārerei atu. E nehenehe te ti’a fa’atere nō te ’ohipa hiero ’e te ’ā’amu ’utuāfare o te pāroita e tauturu i te ta’ata ’ia ’ite mai i tō rātou mau tupuna tei pohe.

E ani manihini i te ta’ata ’ia fa’a’ite mai ia ’oe te mau ha’amana’ora’a o te feiā tei herehia e rātou. ’A nā reira ai rātou, e nehenehe rātou e putapū i te Vārua Maita’i ’o te ha’apāpū ra ia rātou, nō te faufa’a rahi o te mau ’utuāfare i roto i te ’ōpuara’a a te Atua. E nehenehe teie mau taime e arata’i atu i te mau ’āparaura’a ’ōhie nō ni’a i te tumu o te orara’a, te ’ōpuara’a nō te ’oa’oa a te Atua, ’e te ti’ara’a o te Fa’aora i roto i taua ’ōpuara’a ra.

Mai te mea e tano, ’a ha’api’i i te ta’ata i te ha’api’ira’a tumu e fa’ata’a ra, nō te aha te mau melo o te ’Ēkālesia e rave ai i te ’ohipa ’ā’amu ’utuāfare ’e e aha tō te reira tū’atira’a ’e te hiero.

’A pure ’ia vai ara noa i te mau rāve’a au nō te fa’a’ohipa i te ’ohipa ’ā’amu ’utuāfare i roto i tā ’oe mau tauto’ora’a nō te ’ite mai. ’Ia vai ha’arau, ’e ’ia ha’amātau i te mau mātēria e vai nei.

’Imira’a pāpa’iraa mo’a.

’A ’imi maita’i i te mau pāpa’ira’a mo’a i muri nei nō ni’a i te ’ā’amu ’utuāfare. ’A pāpa’i i te mea tā ’oe i ha’api’i mai.

Te mana nō te tā’atira’a i fa’aho’i-fa’ahou-hia mai nā roto mai ia Eliaha

Te ’ohipa nō te feiā pohe

Ha’api’ira’a ta’ata hō’ē ’e ha’api’ira’a ’e te hoa misiōnare

’A tāmata hō’ē ’aore rā e rave rahi ’ohipara’a i muri nei, nō te tauturu ia ’oe ’ia ’ite mai nā roto i te ’ā’amu ’utuāfare.

  • ’A fa’anaho i te fārerei atu i te hō’ē melo tē vau ra tōna ’itera’a nō te ’ā’amu ’utuāfare. ’A ha’api’i mai e aha te mau tāvinira’a e vai nei nā roto mai i te ti’a fa’atere nō te ’ohipa hiero ’e te ’ā’amu ’utuāfare.

  • ’A ha’api’ipi’i ia ’oe nāhea i te hōro’a i te tauturu nō te ’ā’amu ’utuāfare i te feiā tā ’oe e fārerei atu. ’A mito i te pūpū atu i te ’ā’amu ’utuāfare i roto i tā ’oe tauto’ora’a nō te ’ite mai.

  • Tai’o ’e tāu’aparau i te buka iti Families and Temples [Mau ’utuāfare ’e te mau hiero] nō te māramarama maita’i a’e i te ’ohipa ’ā’amu ’utuāfare. ’A pāpa’i i te mea tā ’oe i ha’api’i mai i roto i tā ’oe buka tāmahana.

  • ’A fa’a’ohipa i te mau mātēria te buka iti My Family [Tō’u ’utuāfare] ’aore rā FamilySearch.org ’a ’ite mai ai ’oe i te ta’ata nō te ha’api’i.

  • I te vāhi e tano, ’a fa’anaho i te hō’ē mahana ’ōpani ’īriti, ’a hōro’a i te hō’ē ha’api’ira’a nō te ’ā’amu ’utuāfare i te hō’ē vāhi huira’atira, ’aore rā ’a pūpū atu i te tauturu nā roto i te fārereira’a.

’Ite mai e aha te taime e ha’api’i ai ’oe

Te ’itera’a mai ’e te ha’api’ira’a e nā ’ohipara’a e tū’ati. Pinepine te mau ta’ata tā ’oe e ha’api’i e mau hoa ’aore rā e mau fēti’i tei ineine nō te fa’ari’i i te ’evanelia i fa’aho’ihia mai. ’A fa’ari’i ai te feiā tā ’oe e ha’api’i ra i te ’itera’a nō te ha’amaita’ira’a o te ’evanelia, e rahi atu ā tō rātou hina’aro ’ia fa’a’ite i te reira (hi’o 1 Nephi 8:12). I roto i te mau tupura’a ato’a—mai te ’itera’a mai, te ha’api’ira’a ’e te ’ohipara’a ’e te mau melo—’a ui, « ’O vai, i tō ’oe mana’ora’a, e fana’o i teie parau poro’i ? »

’Ia fa’aineine ana’e te mau ta’ata tā ’oe e ha’api’i ra nō tō rātou ’ōro’a bāpetizora’a, ’a ui atu ia rātou ’o vai te mau feti’i ’e te mau hoa ’o tā rātou e hina’aro e ani manihini i tō rātou bāpetizora’a. ’A mito i te ani manihini atu ’e i te fa’aitoito ia rātou pauroa ’ia haere mai. E nehenehe te mana pūai o te Vārua e putapūhia i roto i te ’ōro’a bāpetizora’a.

Ha’api’ira’a ’e te hoa misiōnare

’A hi’o fa’ahou i te tāpura o te feiā tā ’oe e ha’api’i nei. ’A hāmani i te hō’ē tāpura nō te feiā ’o tā ’oe i ani te mau i’oa o te ta’ata ’e te feiā ’o tā ’oe i ’ore ā i ani atu. ’A ha’api’ipi’i ia ’oe i te fa’atae atu i te anira’a manihini nō te i’oa o te ta’ata, i te feiā i roto i te pupu tāta’itahi. I roto i tā ’oe fa’anahora’a, ’a pāpa’i nō te fa’aroa atu ā teie anira’a manihini, i roto i tā ’oe mau fārereira’a i mua nei.

mau vahine e hi’o ra i te niuniu paraparau

Ha’api’i ’ia ’ite ana’e mai ’oe

’A fārerei ai ’oe i te ta’ata ’e ’a ’ite mai ai i tō rātou mau ’ana’anataera’a ’e mau hina’aro, ’a ha’amatau ia ’oe i te ha’amata i te ha’api’i ’e i te fa’a’ite i tō ’oe ’itera’a pāpū. E ’ite rahi mai ā ’oe i te ta’ata nō te ha’api’i, ’a fa’a’ite ai ’oe i tō ’oe ’itera’a pāpū nō te Fa’aora ’e tāna ’evanelia ’e mai te mea e vaiiho ’oe ia rātou ’ia putapū i te mana o te Vārua Maitaʼi.

’A feruri i te ha’api’i atu nō ni’a i te mau tumu parau mai te ’oa’oa, te ’ati, te fā o te orara’a, ’aore rā te pohe. Noa atu te huru o tā ’oe ha’afātatara’a atu, ’a fa’ahiti ’oi’oi atu ’e ma te ’ōhie i te Fa’aora, i tāna ’evanelia, ’e tōna pi’ira’a i te peropheta Iosepha Semita. Teie tā tātou parau poro’i ’ōtahi i tō te ao nei.

Tē hōro’a nei te mau tuha’a i muri nei i te mau hi’ora’a, e nāhea ’oe i te ha’api’i poto atu i te fa’aho’i-fa’ahou-ra’a mai o te ’evanelia a Iesu Mesia ’e te faufa’a o te ’utuāfare.

Ha’api’i ’e fa’a’ite pāpū nō te fa’aho’i-fa’ahou-ra’a mai o te ’evanelia a Iesu Mesia

’A fa’a’ite pāpū nō Iesu Mesia ’e ’a ha’api’i poto atu nō te parau mau i fa’aho’ihia mai. ’Ei hi’ora’a, e nehenehe ’oe e fa’a’ite pāpu atu nō te ’evanelia a Iesu Mesia i fa’aho’i-fa’ahou-hia nā roto noa e piti ’aore rā e toru pereota :

I muri mai i te mau tenetere e rave rahi te mo’era’a, ’ua fa’aho’i-fa’ahou-hia mai te mau parau mau e te hō’ē Atua here, nā roto mai i te hō’ē peropheta ora. E ha’apāpūra’a tā māua nō te reira ’o tā ’oe e nehenehe e tāpe’a i roto i tō ’oe nā rima, e tai’o ’e e feruri hōhonu i roto i tō ’oe ’ā’au. Tē ani nei māua ia ’oe ’ia tai’o ’e ’ia pure nō te ha’api’i mai i te reira parau mau nō ’oe iho. E nehenehe ānei tā māua e …

Mai te peu e taime ā tō ’oe, e nehenehe ’oe e parau rahi atu ā :

E parau poro’i ’ōhie roa tā māua. ’O te Atua tō tātou Metua. E mau tamari’i tātou nāna. E tuha’a tātou nō tōna ’utuāfare. ’Ua mātau maita’i ’oia ia tātou ’e ’ua here ia tātou tāta’itahi. Tē hina’aro nei ’oia ’ia ’oa’oa tātou. Mai te ha’amatara’a o te ao nei, ’ua pe’e noa ’oia i te hō’ē hōho’a o te torora’a te rima ma te here, nō te heheu mai i te ’evanelia a Iesu Mesia ’ia nehenehe i tāna mau tamari’i ’ia ’ite e nāhea ’ia ho’i mai ’iāna ra. ’Ua heheu mai ’oia i te ’evanelia i te mau peropheta mai ia Adamu, Noa, Aberahama, ’e Mose. Terā rā, ’ua tāmau noa te rahira’a ta’ata i te mā’iti e pāto’i i te ’evanelia ’e te mau peropheta i ha’api’i i te reira. A piti tauatini matahiti i teienei, ’ua ha’api’i Iesu Mesia iho i tāna ’evanelia. ’Ua pāto’i ato’a te ta’ata ia Iesu. I muri mai i te pohera’a te mau ’āpōsetolo a Iesu, ’ua tāuiui haere te ta’ata i te ha’api’ira’a tumu mau, terā iho ā ra nō te Torutahi. ’Ua taui ato’a rātou i te mau ’ōro’a, mai te bāpetizora’a.

Tā māua anira’a manihini ia ’oe ’o te ’āmuira’a atu ïa i te mau parau mau ’o tā ’oe i poihere a’ena. ’A feruri i te ha’apāpūra’a ē, ’ua toro fa’ahou mai tō tātou Metua i te ao ra i te rima i tāna mau tamari’i, ma te here ’e ’ua heheu mai i te ha’api’ira’a tumu ’e i te mau ’ōro’a mau i te hō’ē peropheta. ’O Iosepha Semita te i’oa o teie peropheta. Tē ha’apāpūra’a o teie parau mau tei roto ïa i te hō’ē buka—te Buka a Moromona. E nehenehe ’oe e tāpe’a te reira i roto i tō ’oe nā rima, e tai’o, ’e e feruri hōhonu i tāna parau mau i roto i tō ’oe ferurira’a ’e tō ’oe ’ā’au. Tē ani manihinihi nei māua ia ’oe ’ia haere mai i te fare pure nō te ha’api’i rahi mai ā.

’A ha’api’i ’e ’a fa’a’ite pāpū nō ni’a i te faufa’a rahi o te ’utuāfare

’A a’o atu nō te faufa’a rahi o te ’utuāfare ’o tē tauturu ia ’oe ’ia ’ite i te ta’ata nō te ha’api’i, e ta’ata ta’ere keresetiano ānei rātou ’aore rā ’aita. E nehenehe ’oe e fa’atū’ati ’oi’oi atu i te mea tā te rahira’a ta’ata i ’ite nō ni’a i te ’utuāfare e te fa’anahora’a nō te fa’aorara’a a te Metua i te ao ra. E nehenehe ’oe e parau atu mai teie te huru :

E nehenehe tō tātou ’utuāfare e riro ’ei hō’ē o te mau fa’aurura’a faufa’a roa a’e i roto i tō tātou orara’a. E tā’amu tō tātou ’utuāfare ia tātou i te tahi ’e te tahi ’e e nehenehe e tauturu ia tātou ’ia ’ite ē ’ua hina’arohia ’e ’ua herehia tātou.

Te fa’ari’ira’a i te hō’ē ’utuāfare pūai ’e te ’oa’oa ’o te ’ohipa faufa’a roa a’e ïa a te ta’ata e rave rahi. Te fa’ari’ira’a i te hō’ē fa’aipoipora’a pa’ari pāpū ’e te ’atu’atura’a i te mau tamari’i i roto i teie ao i teie manaha e riro paha ’ei ’ohipa teimaha.

I reira, e nehenehe paha ’oe e fa’atu’ati atu i te parau poro’i nō te fa’aho’i-fa’ahou-ra’a mai :

E tuha’a ’oe nō te ’utuāfare o te Atua hou roa ’oe ’a fānauhia mai ai. ’O ’oia tō tātou Metua. Tē hina’aro nei te Metua i te ao ra ’ia ho’i tātou e ora i pīha’i iho iāna. E tamari’i ’oe nāna ’e ’ua here ’oia ia ’oe. E ’ōpuara’a tāna nō te tauturu ia ’oe ’ia ho’i i pīha’i iho iāna.

’Ua fa’aho’ihia mai teie mau parau mau ’e te tahi atu i ni’a i te fenua nei, e tō tātou Metua here i te ao ra nā roto mai i te hō’ē peropheta ora. E tauturu teie mau parau mau ia tātou ’ia māramarama i tō tātou ti’ara’a i roto i te ’utuāfare o te Atua. E nehenehe ānei ia māua e ha’api’i rahi atu ā i teie mau parau mau ia ’oe ? E haere mai ānei ’oe i te fare purera’a nō te ha’api’i rahi mai ā ?

Ha’api’ira’a ’e te hoa misiōnare

’A fa’aineine i te hō’ē poro’i hō’ē minuti te roa fa’atumuhia i ni’a i te hō’ē o te mau ha’api’ira’a i roto te pene 3. ’A ha’api’ipi’i ia ’oe i te fa’a’itera’a i te reira i te tahi ’e te tahi. ’A feruri i te mau rāve’a e nehenehe ai ’oe e fa’a’ite atu i teie parau poro’i i roto i te ’ohipa nō te ’itera’a mai. ’A mito i te fa’a’ite atu i te reira i roto i te hō’ē tupura’a tano, nō te ani manihinihi ia vetahi ’ē ’ia ha’api’i rahi mai nō ni’a ia Iesu Mesia.

’Aore e tauto’ora’a i mau’a

’Ia mā’iti ana’e te ta’ata ’eiaha e ha’api’i rahi mai nō ni’a i te ’evanelia tei fa’aho’ihia mai, ’aita tā ’oe mau tauto’ora’a i mau’a. Penei a’e ’ua tanu ’oe i te hō’ē huero ’o tē tupu mai i te tahi atu taime. E tupu ānei te reira ’aore rā ’aita, ’ua riro tā ’oe tāvinira’a ’e tō ’oe fa’a’itera’a i te here mau ’ei hō’ē ha’amaita’ira’a nō ’oe ’e nō rātou.

Mai te peu ’aita te ta’ata i ineine nō te fa’ari’i i te ’evanelia, ’a hi’o e aha te mea tā ’oe e nehenehe e rave nō te ha’amaita’i atu i tō rātou orara’a. Te mau tā’amura’a ’o tā ’oe e fa’ananea e riro noa ïa ’ei mea faufa’a ’e te tao’a rahi. ’A tāmau noa ’ia riro ’ei hoa.

I te tahi mau taime, e hina’aro te ta’ata i te taime nō te feruri i te mau tauira’a ’o tei anihia ia rātou. ’A tauturu ia rātou ’ia fa’ari’i i te mau parau poro’i nā roto i te mau rata uira ’e te mau tahua natirara a te ’Ēkālesia. E nehenehe teie mau parau poro’i e tauturu i te fa’aineine i te ta’ata ’ia fa’ari’i i te mau anira’a manihini i muri nei nō te ha’api’i rahi mai ā.

’Ia ’ore ana’e te hō’ē ta’ata e fa’ari’i i te ’evanelia, e tupu mai iho ā te mana’o tarapape. Terā rā, mai te peu e fāriu atu ’oe i te Fatu i roto i te reira mau taime, ’ua fafau mai ’oia ē, « e fa’a’eta’eta vau ia ’oe, e tauturu vau ia ’oe ; ’oia ïa, e mau vau ia ’oe » (Isaia 41:10).

Nā roto i te fa’aro’o i te Mesia, e nehenehe ’oe e ’ite mai i te hau ’e te ha’apāpūra’a nō tā ōrua mau tauto’ora’a. ’A tāpe’a noa i te hō’ē hi’ora’a ātea ’o vai ra ’oe ’e nō te aha ’oe e tāvini ai i te Fatu ’ei misiōnare. E tauturu te fa’aro’o ia ’oe ’ia haere i mua ’e ’ia tāmau noa ma tō ’oe mau hina’aro parauti’a.

Mana’o nō te ha’api’i ’e nō te rave

Ha’api’ira’a ta’ata hō’ē

  • Tai’o Ioane 15:12, Ioane 21:15–17, 1 Tesalonia 2, ’e Mosia 18:8–10. E aha te fāito nō tō ’oe ravera’a i tā ’oe hōpoi’a ’ia here ’e ’ia tāvini ia vetahi ’ē ? Nāhea ’oe i te ha’amaita’i atu ā ? A pāpa’i i tā ’oe pāhonora’a i roto i tā ’oe buka tāmahana.

  • Tai’o 3 Nephi 18:31–32, Alama 24:7–8, ’e Alama 32:41. E aha tā teie mau ’īrava e ha’api’i nei nō ni’a i te ha’ara’a i pīha’i iho i te ta’ata tei ha’api’i-a’ena-hia ? ’A pāpa’i i te mea tā ’oe i ha’api’i mai i roto i tā ’oe buka tāmahana. ’A ha’api’i i te reira i tō ’oe hoa misiōnare.

Ha’api’ira’a ’e te hoa misiōnare ’e tāuiuira’a hoa

  • ’A mito i te fārerei atu i te mau melo ’āpī i roto i tō ’oe vaefenua. Mai te mea e hina’arohia, ’a fa’a’ohipa i te fa’aaura’a rorouira ’Ia poro haere i tā’u nei ’Evanelia nō te ’ite mai ia rātou. ’A ui atu i te mau uira’a mai teie te huru :

    • Mea nāhea ’oe i te faineinera’ahia nō te ’evanelia ?

    • E aha te taime ’e e mea nāhea tō ’oe fārerei-mātāmua-ra’a i te ’Ēkālesia ?

    • E aha te mea tei tūra’i ia ’oe ’ia fārerei i te mau misiōnare ?

    • Nāhea māua e nehenehe ai e turu ia i tō ’oe mau haere-tāmau-ra’a i mua ?

    Nā roto mai i teie mau rurura’a, e aha tā ’oe i ha’api’i mai nō ni’a i te ’itera’a mai i te ta’ata e haere nei i mua i te bāpetizora’a ? ’A mito i te fa’a’ohipa i te mea tā ’oe i ha’api’i mai i teie hepetoma.

  • ’A hi’o fa’ahou i te mau tumu parau i muri nei. Ma te fa’a’ohipa i te mau ha’api’ira’a i roto te pene 3, ’a fa’aineine i te hō’ē ha’afātatara’a ’ōhie nō te ’itera’a mai. ’A fa’a’ohipa i te ha’api’ira’a i roto te tupura’a nō te ’itera’a mai.

    • Te putapūra’a i te hina’aro nō te arata’ira’a rahi atu ā ’e te fā i roto i te orara’a.

    • Te hina’aro ’ia ha’afātata atu i te Atua

    • Te hina’aro e tauturu ma te mau fa’a’otira’a faufa’a rahi

’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni

  • ’A tai’o ’e ’a tāu’aparau i te tuha’a « Fa’a’ā’ano i tā ’oe hi’ora’a ātea o te fa’anahora’a ’ia ’ite mai ». ’A vaiiho i nā hoa misiōnare tāta’itahi ’ia fa’ahope i te hi’opo’ara’a.

    • ’A tau’aparau e mea nāhea teie mau mana’o i te tauturura’a i te mau misiōnare ’ia ’ite mai i te ta’ata nō te ha’api’i.

    • ’A tāpura i te tahi atu mau mana’o nō te ’ite mai i te ta’ata nō te ha’api’i. ’A ani i te mau misiōnare ’ia fa’ata’a mai i tō rātou mau mana’o.

    • ’A ani i te mau misiōnare ’ia ha’amau i te mau ’ōpuara’a nō rātou iho, nō te ha’amaita’i i tā rātou mau tauto’ora’a nō te ’itera’a mai.

  • ’A hāmani i te hō’ē tāpura nō te mau rāve’a rau nō te ’itera’a mai.

    • ’A hōro’a i te misiōnare tāta’itahi hō’ē o te mau rāve’a. ’A hōro’a i te misiōnare tāta’itahi e pae miniti nō te fa’aineine, e nāhea ’oia ’ia ha’api’i i te hō’ē tuha’a o te ha’api’ira’a i roto i te mau tupura’a i fa’ata’ahia.

    • ’A ha’apāpū i te tītaura’a ’ia ha’apa’o i te roara’a o te parau poro’i e tano nō te tupura’a o tei fa’ata’ahia nā rātou.

    • ’A ani e rave rahi misiōnare ’ia ha’api’i i te ha’api’ira’a tā rātou i fa’anaho i roto i te tupura’a tei fa’ata’ahia nā rātou.

  • ’A ani i te mau misiōnare ’ia ha’api’ipi’i i te fa’a’ite atu i te tahi ’e te tahi, i te parau poro’i o te ’evanelia nō te roara’a hō’ē minuti. E hina’aro paha ’oe e fa’anaho e rave rahi tupura’a nō te ’itera’a mai, mai te ha’api’ira’a i te fare o te hō’ē melo, te ha’api’ira’a i te pae ’ūputa, te ha’api’ira’a i te vāhi haerera’a ta’ata, ’aore rā te fārereira’a i te hō’ē ta’ata tei fa’ataehia mai te i’oa. Ani i te mau misiōnare ’ia ha’api’ipi’i, nō te ha’api’i i roto i teie mau vāhi tāta’itahi.

Feiā fa’atere misiōni ’e nā tauturu nō te misiōni

  • ’A fa’a’ite i te hō’ē hi’ora’a nō te ’ohipa misiōnare-melo i roto i tō ’outou ’utuāfare. ’A fa’a’i’te i tō ’outou mau ’itera’a i te mau misiōnare ’e i te mau melo.

  • ’A tāu’aparau ’e te feiā fa’atere autahu’ara’a ’e nō te mau ’āvirira’a nō ni’a i te rāve’a maita’i a’e nō te mau misiōnare ’ia ’ite mai i te ta’ata nō te ha’api’i i roto i tā ’outou misiōni.

  • ’A fa’anaho i te mau purera’a misiōnare i reira ’outou ’e a’o ai i te mau ta’ata e ha’api’ihia ra i roto i tā ’outou misiōni. ’A fa’aau ’e te feiā fa’atere o te autahu’ara’a o te fenua iho, ’ia nehenehe i te mau melo e ’āfa’i mai i tō rātou mau hoa. ’A ani i te mau melo ’āpī ’ia fa’a’ite i tō rātou ’itera’a pāpū ’e ’ia fa’ati’a i tō rātou fa’afāriura’a hou ’outou ’a paraparau ai.

  • I te tahi taime ’a haere atu nā muri i te mau misiōnare nō te tauturu ia rātou ’ia ’ite mai i te ta’ata nō te ha’api’i.