Irelaud 3: Padahk 1

Poaron en Kopwurupwurdohn Rongamwahu en Sises Krais

Aramas Kak Medemedewe

• Mie Koht?

• Ia mwomwen ai pahn kak karaniala Koht?

• Ia mwomwen ai pahn kak esehla mehlelo nan sampah kapingiping wet?

• Ia mwomwen sarawi ah pahn kak soweseie?

• Dahme miehki diren mwomwohdiso?

• Dahme kahrehda I ahneki diren kahpwal?

• Ia mwowen ai pahn kak diar meleilei nan ansou en kepingiping?

• Ia mwomwen ai pahn kak kalaudehla ai peren?

• Ia mwomwen soukohp ah pahn kak sowese sampah rahnpwukat?

Sangete ni tepin sampah, Koht kin ketkiheng soukohp akan rongamwahuo ong Sapwellime serihkan. E ketkihong Sapwellimme Iehros, Sises Krais Sapwellime rongamwahuo. Mahs, Sises ketin kasalehieng rongamwahuo soukohp akan me pil iangahki Adam, Noha, Eipraam, oh Moses. Ahpw diren aramas me kin soikala.

Sounpar riekid samwalahro, Sises Krais pein padahngki Sapwellime rongamwahuo oh kawada Sapwellime Mwomwohdiso. Aramas pil soikala Sises. Mwurinte Sapwellime pwoula, diren me pwupwisang Sapwellimen Kauno mehlelo oh Sapwellime Mwomwohdiso. Unsek en rangamwahuo oh manaman oh mweimwei en prihsduhd sohla mih pohn sampah.

Sounpar epwikihkei mwuri, Koht ketin malipe emen soukohp, me iei Joseph Smith. Koht ketin doadoahngki ih oh kapwurehdo Sapwellime rongamwahuo oh ketkiheng mweimwei en pwurehng kawada Mwomwohdiso en Sises Krais.

Unsek en Mwomwohdiso en Sises Krais ah mie pohn sampah wia kapai lap ehu rahn pwukat. Rongamwahuo kin kihda pasapengpen peidek kan me kitail kin raparapahki pasapengpe. Soukohp me momour kan kin kahluwai kitail nan ansou apwal kan. Sapwellimen Koht manaman oh mweimwei en prihsduhd pwurehngehr kapwurupwurdohng sampah pwehn kapaiada Sapwellime serihkan.

Iren Kaweid Duwen Padahk

Pali wet kasalehda karasaras irekdi ehu pwe en soweseiuk kaunop ong padahk. E pil kasalehda karasaras en peidek oh luhk kan me ke kak doadoahngki.

Ni amw pahn kaunop ong padahk, kapakapki oh medemedewe mwahu duwen irail oh anahn en pali ngenirail. Pilalda dahme pahn keioun kesempwal ken padahkiheng irail. Onopada mwahu pwe ken kak kawehwe lepin lokaiahkan me aramas pahn sohte nohn wehwehki. Wiahda amw pilahn pwe en kak itarehng wen ansou me ke pahn ahneki, oh taman kamwote ahmw padahk.

Pilada iren pwuhk sarawihkan me ke pahn doadoahngki nan amw padahk. Pali “en Doctrinal Foundation” ekei wasa nan padahk kin mie mehn sawas ekei.

Medewe mehnia peidek me ken idek nan amw padahk. Pilahnehda dahme ke pahn kak lukehieng aramas en wia .

Kasalehieng irail kapai kan me Koht ketin inoukihdier, oh wia amw kadehde duwen dahme ke padahngki.

Dahme ke kak padahkiheng aramas nan erein Minit 15–25

Pilada iren padahk meh ehu de riau sang nan ire pwukat pwe ken padahngki. Poahsoan en padahk ong ehu ehu ire pwukat mwurin irekdi wet.

Koht Iei Samatail Nanleng me Diren Limpoak

• Koht iei Samatail Nanleng, oh kitail iei Sapwellime serihkan. E ketin kapik kitailda rasehng Ih.

• Koht ketin mwahngih kitail ni mehlel oh poakohng kitail.

• Koht sapwellimaniki kahlap iasada oh unsek ehu me wiawihkihda uduk oh tih.

• Koht kuwpuriki En kapaiahkin kitail meleilei oh popohl unsek me pahn poatoapoat.

• Pwehki Sahm Nanleng eh ketin poakohng kitail, E ketikihdo Sapwellime Iehros, Sises Krais, en kapitkitailsang nan dihp oh sang mehla.

Koht kin ketin Kasalehieng Soukohp kan Sapwellime rongamwahuo nan Dih en Marain Koaros

• Koht kin ketin malipe soukohp akan pwe irail en wia Weliepe pohn sampah.

• Mahs, Koht ketin pilada soukohp akan me rasohng Adam, Noah, Eipraam, oh Moses.

• Soukohp me momour kin alehdi kaudiahl sang rehn Koht pwe en padahkih kitail oh kahluwai kitail rahnwet.

Sapwellimen Sises Krais Doadoahk en Papah nin Sampah oh Sapwellime Tomwo

• Sises Krais iei Sapwellimen Koht Iehros.

• Ni Ah ketin wiewia Sapwellime doadoahk nin sampah, Sises ketin padahngki Sapwellime rongamwahuo oh kawada Sapwellime Mwomwohdisohu.

• E ketin malipehier Wahnpoaron Ehk-riemen oh ketkiheng irail mweimwei en kakaun Sapwellime Mwomwohdisohu.

• Ni imwilahn Sapwellime mour, Sises Krais ketin pwaindi dipatailkanki Sapwelllime lokolok nan Mwetuwel en Gethsemane oh ni Eh ketin Kalohpwuhlahu. Mwurin Sapwellimen Sises pwoulahu, E ketin iasada.

• Pwehki Sapwellime meiroang en tomwo, kitail kak mwakelekeldahsang oh alehdi mahkepen dipatail kan ni atail pahn koluhla. Met kin kiheng kitail meleilei kahrehieng atail pahn kak pwurala rehn Koht oh ahniki popohl unsek.

• Pwehki Sapwellimen Sises Iasadao, kitail koaros pahn iasada mwurin atail pahn mehla. Met wehwehki me paliwar oh ngenen emen emen kitail pahn pwurpene oh momour kohkohlahte.

Pwupwilao

• Mwurin mehlahn Sapwellimen Sises wahnpoaronko, me ngeder me pwupwilahsang rongamwahuo oh Mwomwohdiso en Sises Krais.

• Nan ansouwo, aramas wekidala diren padahk kan en rongamwahuo. Aramas wekidala tiahk sarawi en prihsduhdo, ehu karasepe iei pepdais. Manaman oh mweimwei en Prihsduhd oh Mwomwohdiso me Sises ketin kawada sohla mih pohn sampah.

Kopwurupwurdohn Rongamwahu en Sises Krais rehn Joseph Smith

• Joseph Smith rapahki pwe en kak esehla mehnia mwohmwohdiso me wia Sapwellimen Koht Mwohmwohdiso mehlelo pwe en kak towehla. Sahm Nanleng oh Sises Krais ketin pwarehng Ih nan pahr 1820. Mwehi wet kahdaniki Kasansal Keieu.

• Koht ketin melipe Joseph Smith en wiahla soukohp men, duwehte eh kin ketin malipe soukohp akan en mahs.

• Kauno ketin kapwuredohng Joseph Smith rongamwahu en Sises Krais.

• Ekei meninkeder sang nanleng kapwurehdo prihsduhdo, oh Joseph alehdi mwemwei en kawada Mwomwohdiso en Sises Krais.

• Sises Krais kin ketin wie kawkaweidte Sapwellime Mwomwohdiso rahnwet ni Eh kin doadoahngki soukohp kan oh wahnpoaron kan me wie momour.

Pwuhk en Mormon: Pil Ehu Kadehdepen Sises Krais

• Pwuhk en Mormon iei kapatapatpenehn pwuhk sarawi kei me soukohp akan me mihmi nan Amerika intingiedi. Joseph Smith kawehwehdi sang ni kisakis oh manaman en Koht.

• Pwuhk en Mormon kin patehng Pwuhk Sarawi oh kihda kadehdepen Sapwellimen Sises kalohk, padahk, oh kahrepen sapwellime doadoahk nin duwen Eh wia atail Sounkomour.

• Kitail kak karaniala Koht ni atail pahn kin wadek Pwuhk en Mormon oh idawehn audepehkan.

• Kitail kak ese me Pwuhk en Mormon iei mahsen en Koht ni atail pahn kin wadek, madmadauloalki, oh kapakapki. Wiepe wet pil pahn sowese kitail en esehla me Joseph Smith iei soukohp emen.

Kapakapki Ken kak Esehla Mehlelo sang rehn Ngehn Sarawi

• Kapakap iei koasoakoasoaipene ehu nan pwungen Koht oh Sapwellime serihkan.

• Ni atail pahn kapakap, kitail kak esehla me padahk en Kopwurupwurdohn rongamwahu en Sises Krais me mehlel.

• Ni atail kin kapakap, Nehng Sarawi kin kadehdehieng kitail mehlelo.

Peidek Kan me Ke Kak Idek Rehn Aramas

Peidek pwukat iei karasepen peidek me ke kakete idek rehn aramas. Peidek pwukat kak kaloalehla koasoakoasoaipenehn nan pwungen kowe oh aramas akan oh soweseiuk ken wehwehki arail anahn oh madamadau.

• Dahme ke kamehlele duwen me pid Koht?

• Ma ke pehm me loalomw karaniala Koht, ia mwomwen amw pepehmo ah pahn kak soweseiuk?

• Dahme ke ese me pid duwen Sises? Ia mwomwen Sapwellime ieias oh padahk ah kin kahluwaiuk?

• Ia mwomwen ai pahn kak diar pasapeng me mehlel nan sampah kapingiping wet?

• Ia mwomwen ah pahn kak soweseiuk ma ke ese me mie soukohp ieias nin sampah rahn wet.

• Ke rohngehr duwen Pwuhk en Mormon? Se kak ehukihenguhk duwen kesempwalpe?

• Ke kak ehukihengkiht dahme ke kamehlele me pid duwen kapakap? Se kak ehukihenguhk dahme me se kamehlele me pid duwen kapakap?

Soahng Kan me Ke Pahn Kakete Lukehieng Aramas en Wia

• Ke kak kapakap oh peki rehn Koht en soweseiuk pwe ken kak ese me dahme se padahkihenguhkehret mehlel? (Kilang “Teaching Insights: Prayer” ni imwilahng iren padahk wet.)

• Ke kak iang kohla sarawi Rahnsarawiet pwe ken kalaude ahmw wehwehki dahme se padahngkiheret?

• Ke kak wadek Pwuhk en Mormon oh kapakapki pwe ken ese me mahsen en Koht met? (Ke kak ndahieng irail mehnia iralaud de iretikitik irail en wadek.)

• Ke kak idawehn Sapwellimen Sises karasaras oh pepdaisla? (Kilang “The Invitation to Be Baptized and Confirmed,” me mihte mwurin iren padahk wet.)

• Kitail kak koasoanehdi iahd kitail kak pilehu pwurodo?

Poahsoan en padahk

Pali wet kin kihda poahsoan en padahk oh iren pwuhk sarawi kan pwe ken kasukuhlki oh kaloalehla amw wehwehki oh kakehlaka amw kadehdepen rongamwahuo pwe en soweseiuk nan omw padahk.

Koht Iei Samatail Nanleng me Diren Limpoak

Koht iei Samatail Nanleng, oh kitail iei Sapwellime Serihkan. E ketin kapik kitailda duwehte Ih. Koht sapwellimaniki kahlap iasada, oh unsek “kahlap ehu me wiawihkihda uduk oh tih me duwehte paliweren aramas” (Doctrine and Covenants 130:22).

Koht ketin mwahngih kitail ni mehlel, oh Sapwellime limpoak ong kitail e lapasang uwen me kitail kak wehwehki. E ketin mwahngih atail kahpwal akan, pahtou kan, oh luwet akan, oh kapahieng kitail sawas nan irair pwukat koaros. E kin kupwurpereniki atail pweidahkan oh pahn kin soweseikitail pwe kitail en kin wiahda pilipil me pwung. E ketin kupwuriki kitail oh Ih en kin koasoakoasoaipene, oh kitail kak koasoaiong Ih ni atail kin kapakap.

Koht ketkiheng kitail mour wet nin sampah pwe kitail en alehdi kasukuhl, keirda, oh ekis duwehla Ih. Pwehki Sapwellime limpoak me unsek, E ketin kuwpurki kitail en pwurala Reh mwurin atail pahn mehla. Apw, kitail sohte kak pein wia met. Pwehki Koht Eh ketin poakohng kitail, E ketikihdo Sapwellime Iehros, Sises Krais, en kapitkitailla. “Pwe iei uwen Koht eh ketin loalloale sampah, me e ketikihdohki Sapwellime Iehros, … pwe sampah en kak alehdi komour pwehki Ih” (Sohn 3:16–17).

Koht kuwpuriki En kapaiahkinkitail meleilei oh popohl unsek me pahn poatoapoat. E ketkihda pilahn ehu me pahn kak elehieng kitail en alehdi kapai pwukat. Pilahn wet adaniki pilahn en komour (kilang iren padahk 2).

Dahme Kitail Kamehlele Me pid Duwen Koht

Diarada dahme aramas me ke padapadakiho kamehlele me pid duwen Koht. Palilaud en aramas kin kamehlele soangen Enihlap men mendahte dahme irail kamehlele duwen Enihlapo ah kin wekpeseng. Apw, diren aramas sohte ese me pid duwen Koht.

Misineri riemen sang nan Pwuhk en Mormon, Ammon oh Aaron, padahkohng aramas ekei me sohte kin iang kamehlele Krais. Ira kin kamangaiala ara padahk oh ira kin lukehieng aramas en kapakap. Pwehki met, Lamonai oh ah pahpahu weliakapwala. Onopki Alma 18:24–40 oh 22:4–23. Mwuri, ke apw uhd sapeng peidek pwukat:

• Dahme misineri pwukat pdahngki me pid duwen Koht?

• Ia mwomen amw pahn kak idawehn ara karasaras?

Ong iren sawas kapatapat, kilang “Teaching People Who Do Not Have a Christian Background” nan irelaud 10.

Onopki Pwuhk Sarawi

• 1 Nihpai 17:36

• Mosaia 4:9

• 3 Nihpai 14:9–11

• Doctrine and Covenants 93:29; 130:22

• Moses 1:39

• Abraham 3:25

• Wiewia kan 17:27–29

• Rom 8:16

• Ipru 12:9

• Senesis 1:26–27

Kalaudehla amw wehwehki Iren Padahk Kesempwal Wet

• Iren Sawas sang nan Pwuhk Sarawi Kan: “Sahm Nanleng,” “Koht, (Koht Sahm, Sises Krais, oh Ngehn Sarawi)”

• Oaralap akan en Rongamwahuo: “Koht Sahm”

Koht kin ketin Kasalehieng soukohp kan Sapwellime rongamwahuo nan Mwehi en Marain Koaros

Soukohp akan Iei Weliepen Koht nin Sampah

Ehu wiepen Koht Eh kin kasalehieng kitail Sapwellime limpoak iei Eh kin ketin malipe soukohp akan, ketkiheng irail manaman oh mweimwei en Prihsduhd, oh kin sair loalerail pwe irail en kin pousehieng aramas Sapwellime mahsen. Soukohp akan Iei weliepen Koht nin sampah Soukohp en nan Kadehde Mering Amos intingiedi me “Kauno Koht sohte pahn ketin wia mehkot, ahpw e kin ketin kasalehieng sapwellime ladu kan, soukohp kan, kupwur rir kan” (Amos 3:7). Kapai pwukat me sansal pah iei kisehn kapai akan me kitail kin alehdi sang rehn soukohp ieias akan iei:

Soun kadehdepen Sises Krais Soukohp akan wia soun kadehdepen Sises Krais kesempwal. Irail kin kadehdeh duwen ah ketin wia atail Sounkomour oh Soundoar.

Padahk kan Soukohp akan kin alehdi Kupwuren Koht pwe kitail en kak kasawiada mehlelo sang me sapwung kan. Re kin padahkiheng kitail kitail en kapwaiada Sapwellimen Koht kosonned akan oh koluhla ni ansou me kitail pwupwidi. Irail kin uhweng mekot me dihp oh kehkehlikkihong aramas wahn dihp akan.

En soukohp padahk kan kin kahrehieng atail kin karaniala Koht oh sowesei kitail en alehdi kapai akan me E ketin kupwuriki ong kitail. Ih silepetail me keioun kehlail iei kitail en kin idawehn mahsen en Kauno me kin peidohsang rehn Sapwellime soukohp akan.

Manaman oh Mweimwei en Prihsduhd Soukohp en rahnwet iei me wia kaun en prihsduhd pohn sampah. Prihsduhd iei mweimwei oh manaman en Koht. Soukohp akan ahneki mweimwei en mahsen oh mwekid ni mwaren Koht ong ni koumourpen Sapwellime serihkan.

Kaweidpen Mwomwohdiso. Mwomwohdiso en Sises Krais kokouda pohn poahsoan me wiawihkihda soukohp akan oh wahnpoaron kan (kilang Episos 2:19–20; 4:11–14).

Soukohp en Mahs

Adam me wia tepin soukohp pohn sampah. Koht padahkihong duwen rongamwahu en Sises Krais oh ketkiong manaman oh mweimwei en prihsduhd. Adam oh Ihp padahkihong neira serihko mehlel pwukat and kangongehkinirail en ahneki pwoson oh momourki rongamwahuo.

E kedekedehoh wahwahn Adam oh Ihp akan soikala rongamwahuo oh pwupwila. Met elehda irair ehu me kahdaneki pwupwilao, de pwupwilahsang. Ni ansou me pwupwila lap kin wiawi, Koht kin ketkihsang Sapwellime manaman oh mweimwei en prihsduhd, me kin anahn ong padahngki oh wia tiahk sarawihkan en rongamwahuo.

Diren pwupwila lap sansal intindi nan Kadehde Mering. Pwe pwupwilahkan en kin imwila, Koht kin mahseniong Sapwellime serihkan oh malipe emen soukohp. E kin pwurehng padahkihong soukohp pwukat mehlel en rongamwahuo oh ketkihong irail manaman oh mweimwei en prihsduhd. Noah, Eipraam, oh Moses wia kisehn soukohp pwukat. E me kapahtou pwe nan ansou pwukat koaros, aramas kin kedekedehoh irail soikala soukohp akan oh pwupwila.

Kaweid en Padahk

Soukohp kan

Diarada dahme aramas me ke padapadakiho ese me pid duwen soukohp akan. Aramas nan palilaud en wasahkan kamehlele me aramas sarawi kin alehdi kaweid sang arail Enihlap de sang powe. Ahpw, kaidehn aramas koaros me kin alehdi kamarain wia soukohp en Koht.

Kawewehieng irail me mwurin ansoun pwupwila lapko koaros, Koht ketin kapwurehieng emen soukohp rongamwahuo. E ketkihong soukohpo manaman oh mweimwei en prihsduhd. Soukohpo kin sowese aramas en wehwehki ihs irail ong Koht, oh duwen arail pahn kak alehkihdi mour soutuk rongamwahu en Sises Krais.

Mwehi en Marain

Mwehi en marain en rongamwahu en Sises Krais iei ansou ehu me mie Sapwellimen Koht ladu pohn sampah me ale mweimwei oh kolokol kih kan en prihsduhd. Sapwellimen Sahm Nanleng pilahn en komour kin kapwurupwurdo nan mwehi en marain koaros.

E me tohto mwehi en marain en rongamwahuo. Adam, Enoch, Noah, Abraham, Moses, Jesus Christ, Joseph Smith, oh mehkei tapiada mwehi en marain nan arail ansou. Mwehi en marain me Joseph Smith tapiada adaniki “dispensation of the fulness of times”(mwehi en marain me unsek) (Episos 1:10). Kilang nan Bible Dictionary, “Dispensations,” oh Kaweid ohng Pwuhk Sarawi Kan, “Dispensation.”

Onopki Pwuhk Sarawi

• Seikop 4:4, 6

• Mosaia 8:13–18

• Doctrine and Covenants 1:37–38

• Luhk 1:68–70

• Wiewia Kan 10:34–43

• Episos 4:11–14

• Eimwos 3:7

Kalaudehla Amw Wehwehki me pid Padahk Wet

• Mehn kaweid ohng Pwuhk Sarawi kan, “Soukohp”

• Oaralap akan en Rongamwahuo: “Soukohp Akan,” “Kawpurupwurdohn Mwomwohdisoht”

Sapwellimen Sises Krais Doadoahk en Papah nin Sampah oh Sapwellime Tomwo

Sises Krais iei Sapwellimen Koht Iehros. Sises oh Sapwellime Tomwo me keioun kesempwal nan Sapwellimen Koht pilahn ong kitail. Sapwellime Tomwo wiawihkihda Sapwellime lokolok nan Metuwel en Kedsemeni, Sapwellime lokolok oh pwoula nin lohpwuo, oh Sapwellime Iasadao.

Sangete nan mwehin Adam oh Ihp, aramas kin kasikasik ketdohn Sises Krais me wia arail Sounkomour oh Soundor. Sahm Nanleng ketin poaronehdo Sapwellime Iehros Sises ong sampah sipele sounpar 2,000 samwalahro.

Sises sapwellimanki mour unsek, sohte dihp. Sises ketin padahngki Sapwellime rongamwahuo oh kawada Sapwellime Mwomwohdisohu. E ketin malipe Wahnpoaron ehk-riemen oh ketkihieng irail manaman oh mweimwei en prihsduhd pwe irail en padahk oh wia tiahk sarawi kan, me iangahki pepdais ape. E ketkiheng irail mweimwei en kakaun Sapwellime Mwomwohdisohu.

Ni imwilahn Sapwellime mour, Sises Krais ketin pwainda dipatial kan ki Sapwelllime lokolok nan Mwetuwel en Kedsemeni oh ni e ketin Kalohpwuhlao. Pwehki Sapwellimen Sises Tomw en tohnmeteio, kitail kak mwakelekeldahsang diapatail kan ni atail kin koluhla. Met elehieng kitail atail pahn kak pwurala pahn sihlangin Koht oh ahniki popohl unsek.

Mwurin Sises Eh ketin kalohpwuhlao, E ketin Iasada, oh powehdi mehla sang ni manaman en Sahm Nanleng. Pwehki Sapwellimen Sises Iasadao, kitail koaros pahn iasada mwurin atail pahn mehla. Met wehwehki me paliwar oh ngenen emen emen kitail pahn pwurpene, oh emen emen kitail pahn momour kohkohlahte nan paliwar ehu me unsek, paliwar me iasadahr. (Kilang “Tomw en Sises Krais” nan padahk 2.)

Soukohp Joseph Smith padahngki me poahson en mour en padahk kan en atail pelien lamalam iei kadehde en Wahnpoaron oh Soukohp akan, me pid duwen Sises Krais, me E ketin pwoula, seridi, oh iasada ni kesiluh en rahn, oh ketdahla nanleng; oh soahng koaros me pid atail pelien lamalam uhsangete ie (Teachings of Presidents of the Church: Joseph Smith [2007], 49).

Onopki Pwuhk Sarawi

• 2 Nihpai 2:6–8; 9:1–24; 31

• Alma 7:11–13; 11:40; 34:8–10

• 3 Nihpai11:31–41; 27:1–22

• Doctrine and Covenants 19:15–19; 45:3–5

• Sohn 3:16–17

• 1 Korint 15:1–4, 20–22

• 1 Sohn 1:7

Esehla Me Tohto me pid Padahk Wet

• Guide to the Scriptures: “Jesus Christ,” “Atone, Atonement”

• Bible Dictionary: “Atonement”

• Gospel Topics: “Jesus Christ,” “Atonement of Jesus Christ”

Pwupwilao

Mwurin Sises Krais Eh ketin Pwoulao, Sapwellime Wahnpoaronko kin nantiheng pwe Sapwellimen Krais padahk en kin pwungupwungte oh onopek mwahu en kin mie nan Mwomwohdiso. Apw, diren tohn Mwomwohdiso sohla kin rong Wahnpoaronko oh poahsoan en padahk kan me Sises padahngki.

Mwurin kamalahn Sapwellimen Sises wahnpoaronko, me ngeder me pwupwilahsang rongamwahuo oh Mwomwohdiso en Sises Krais. Pwupwila wet ekei pak kin kahdaniki Pwupwila Lapo. Pwehki met, Koht ketkihsang mweimwei en prihsduhd pohn sampah. Met iangahki mweimwei me anahn pwe en katanga Mwomwohdiso. Ihme karehda, Mwomwohdiso me Sises ketin kawada sohla mih pohn sampah.

Nan ansouwo, aramas wekidala diren padahk kan en rongamwahuo. Pali laud en dahme aramas ese me pid Koht Sahm, Sises Krais, oh Ngehn Sarawio sohrala de sapwungala. Aramas wekidala tiahk sarawi en prihsduhdo, me duwehte pepdais.

Sounpar epwikihkei mwuri, aramas akan me raparapahki mehlelo song en pilehu onehda padahk kan oh tiahk kan me wekideklahr. Irail kin raparapahki kamarain sang powe, oh ekei irail kin kosoia duwen anahnepen kapwurupwurdohn mehlelo oh mweimwei sang rehn Koht. Arail doadoahk elehieng kokoudahn diren mwomwohdiso.

Mwehi wet kahrehieng ah dirala me kin utung saledek en pelien lamalam de kaudok, me ritingada elen kapwurupwurdohn mehlelo oh mweimwei sang rehn Koht.

Soukohp oh wahnpoaron en mahs akan kohpada duwen pwupwilao (kilang 2 Deselonika 2:1–3). Irail pil kohpada me rongamwahu oh Mwomwohdiso en Sises Krais pahn kapwurupwurdohng sampah (kilang Wiewia Kan 3:20–21). Ma pwupwilao sohte wiawi, e pahn sohte anahnepen kapwurupwurdohu.

Kaweid en Padahk: Pwupwilao

Padahkiheng aramas duwen pwupwilao oh itehieng pisetik en padahng wet ong uwen me irail anahne. Sowese irail en wehwehki anahnepen en mie kapwurupwurdohn rongamwahu en Sises Krais.

Ire Kesempwal akan me Ke Kak Padahngki

• Palilaud en aramas soikala Sises Krais oh Sapwellime Wahnpoaronko (kilang Madiu 24:9; 1 Nihpai 11:32–34; 2 Nihpai 27:5). Mwurin mehlahn Wahnpoaronko, prihsduhdo salongasang sampah. Solahr mweimwei en pepdais de katanga Mwomwohdisohu.

• Wehin Rom, me tepte kin kaloke Christian kan, mwuhr re uhd mwoangehda pelien Christianity. Peidek kesempwal akan me pid mehkan me sarawi kin uhd koasoansoandi sang rehn pwihn pwukat ahpw kaidehn sang ni kaudiahl me sang rehn Koht. Poahsoan en padahk kan oh tiahk sarawi kan kin koasoandi sang ni arail kin koasoakoasoaipene de dipeidki oh wekid pwe en soanamwahuieng eripit en sampah. Kasaladahn iren pwoson akan, ahpw wiawihda sang ni koasoandi en pwihn pwukat (kilang Joseph Smith—History 1:19).

• Ekei aramas song en kapwungala dahme soandiero pwe irail en kapwungala Christianity. Apw, pwehki Sapwellimen Koht mweimwei en prihsduhdo sohte mih pohn sampah, e anahne en mie kapwurupwurdohn mweimwei oh mehlelo pwe Mwomwohdiso en Sises Krais en kak pilehu kokouda.

Onopki Pwuhk Sarawi

• 2 Nihpai 28

• Madiu 24:9–11

• Wiewia Kan 20:28–30

• Kalesia 1:6–9

• 2 Deselonika 2:1–12 (Joseph Smith Translation, Iretikitik 2, 3, 7–9)

• 2 Timoty 4:3–4

• 2 Timoty 4:3–4

• Eimos 8:11–12

Kalaudehla Amw Wehwehki me pid duwen Padahk Wet

• Guide to the Scriptures: “Apostasy”

• Topical Guide: “Apostasy of the Early Christian Church”

• Gospel Topics: “Apostasy”

Kopwurupwurdohn Rongamwahu en Sises Krais rehn Joseph Smith

Kasansal Keiouo oh Malipilip en Joseph Smith nin duwen Soukohp men

Nan erein ansou me unsek en rongamwahu en Sises Krais sohte mih pohn sampah, Sahm Nanleng kin ketin kapkapahdiengete limehkan pohn Sapwellime serihkan. Uwen ansou kei, E kin ketin kaukaunop elen irail en kak pilehu alehdi kapai en unsek en Sapwellime rongamwahuo. Ni ansou me e lel ansou me konehng, E ketin malipe Joseph Smith en wiahla soukohp me E pahn doadoahngki oh kapwurehdo rongamwahu en Sises Krais.

Joseph Smith kin koukouson ni pali mese en United States nan ansou me direkihla kemwekid en pelien lamalam akan. Tohn ah peneinei kin poadidi ong Koht oh kin rapahki mehlelo. Diren mwomwohdisoh kan kin nda me irail me kolokol mehlelo, oh Joseph men ese ihs me pwung (kilang Joseph Smith—History 1:18). Pwuhk Sarawi padahngki me “Kauntehmen mie, oh pwosontehieu, oh pil pepdaistehieu” (Episos 4:5). Ni Joseph ah kin pwarek diren mwomwohdisohko, e kin pingkihda mehnia me e pahn iangala. Mwuhr e kosoia:

“Uwen laud en sawehwe kan oh pingiping me mie nanpwungen mwomwohdiso kan, me e inenen apwal aramas emen me pwulopwul duwehte ngehi … en esehla ni dehde ihs me pwung oh ihs me sapwung. …

“Nan werengen mahwin en koasoai kan oh pingiping en madamadau kan, I kin kalapw pein idek rehi: Dahme pahn wiawi? Mehnia rehn palien lamalam pwukat me mehlel; de, kaidehn irail koaros sapwung? Ma mie me pwung rehrail, mehnia [mwo] oh ia mwomwen ahi pahn ese?” (Joseph Smith—History 1:8, 10).

Jospeh Smith pil duwehte aramas tohto me kin ahneki peidek me pid duwen komourpen palingenirail. E men alehdi mahkepen dipehkan oh en kak mwakelekel mwohn Koht. Ni eh kin raparapahki mehlelo nan mwomwohdiso kan, e wadekada nan Pwuhk Sarawi, “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie” (Seims 1:5

Pwehki ire wet, Joseph koasoanehdi me e pahn idek rehn Koht dahme e konehng wia. Nan 1820, e kohla nan welintuhkehkei limwahn nimwarailo oh kelepwikihdi oh kapakap. Koasoaiepen kasansal me wiawio meh pahieu me pein Jospeph Smith intingiedi de me aramas intingiedi pahn kaweid en Joseph Smith (kilang Gospel Topics Essays, “First Vision Accounts”). Nan koasoaiepe me wiahla kisehn pwuhk sarawi kan, e kawehwehda kasansalo ni duwe met:

“I kilangada uhren marain ieu me peipei pohnangin moangeiet, marain sang marain en ketipino, me kohdihdo lao e leledihdo pohi. … Ni ansou me maraino kapeliehdi I kilangada Kahlap riemen, me sapwellimara marain oh lingan sohte me kak kawehwehda, ketin uh pohi nan wehwe. Emen ira mahsendohngie, lukwerihkinie edei oh mahsanih, ni ah idilahng mehteio —Met iei Nei Pwutak Kempoake. Rong Ih!” (Joseph Smith—History 1:16–17).

Nan kasansal wet, Koht Sahm oh Sapwellime Iehros, Sises Krais, ketin pwaredohng Joseph Smith. Sounkomouro mahsanihong Joseph en dehr towehla ehu sohte lipilipil rehn mwomwohdiso kan.

Nan ehu koasoaiepehu, Joseph kasalehda me Sounkomouro pil mahsaniheng ih: “Dipomw kan lapwadahr. … Kilang, ngehi me Kaun en kilohri. Ih kalohpwulahr pwehki sampah pwe koaros me pahn kamehlele mwarei en kak ahneki mour soutuk.”

Mwurin kasansal wet, Joseph nda, “ Ngeniet direkihla limpoak, oh uwen rahn ekei I ahneki popohl mwuledek oh Kauno ketin ieiangie” (Joseph Smith History, circa Summer 1832, 3, josephsmithpapers.org;spelling oh punctuation ekis wekidekla).

Sang ni kasansal wet, Joseph Smith wiahla emen sounkadehdepen Sises Krais oh esehla mehkot kei me kesempwal me pid duwen Koht Sahm, Koht Nah, oh Koht Ngehn Sarawi. Karasepe, e esehla me Koht Sahm oh Sises Krais Sapwellimaniki kahlap tohror riau. Ni ara ketin ekerki ede, e esehla me Ira ketin mwahngih ih ni mehlel. Ni ara mahsanihong me dipehko lapwadahr, e esehla me Koht direkihla mahk. Mwekid wet audehkihla loale popohl.

Ni duwen me Koht wiahiong soukohp en mahsoko, E ketin malipe Joseph Smith en wia soukohp me e pahn ketin doadoahngki oh kapwurehdo rongamwahuo ni unsek sampah. Kapwurupwurdohu pahn sowese Sapwellimen Koht serihkan en diar popohl nin sampah oh mour soutuk nan mour kohkohdoh—pwehki Sises Krais.

Wadlikiala Joseph Smith—History 1:16–17

Wadlikiala en Joseph Smith kawehwepen ah kilangada Koht Sahm oh Naho (Joseph Smith—History 1:16–17). Ansou koaros kin onopada pwe ken kin kak kawehwehda Keioun Kasansalo ni amw pahn kin doadoahngki pein en Joseph Smith koasoai. Kadehdehda mehlelpe oh dahme e kesempwalkihonguhk.

Kapwurupwurdohn Prihsduhd oh Kih Kan en Prihsduhd

Mwurin Sahmo oh Naho ara pwaradao, ekei meninkeder en nanleng pil pekederlahng Joseph Smith oh ienge Oliver Cowdery. Sohn soun Pepdais pwaralahng ni eh wia aramas iasada men oh kiheng ira Prihsduhd en Aaron oh iangahki kih kan. Mweimwei en pepdais iei kisehn Prihsduhd en Aaron

Ekiste mwurin mwo, Piter, Seims, oh Sohn—Sapwellimen Krais wahnpoaron en mahsoko—ni arail wia aramas iasada, pwarehng oh kiheng manaman oh mweimwei en Prihsduhd en Melkisedek oh kih kan pohn moangen Joseph Smith oh Oliver Cowdery. Prihsduhd wet iei ih mweimwei me Krais ketkihong Sapwellime Wahnpoaronko mahs.

Nan Tehnpas Sarawi en Kirtland, Moses, Elias, oh Elisa pwarehng Jospeh Smith oh Oliver Cowdery kiheng ira kalaudepen mweimwei oh kih kan en prihsduhd me anahn ong kepweipweidahn Sapwellimen Koht doadoahk nan imwin rahn akan. Moses kiheng kih kan en kihpene Israel. Elias kiheng mwehi en rongamwahu en Eipraam. Elaisa kiheng kih kan en manaman en katengeteng. (Kilang Doctrine and Covenants 110:11–16; pil kilang Pwuken Kaweid, 3.1.)

Koasoandi en Mwomwohdisoht

Joseph Smith alehdi poahngoak en pwurehng kawada Mwomwohdiso en Sises Krais pohn sampah. Pwehki ih, Sises Kraisjuliet pwurehng malipe Wahnpoaron Ehk-riemenko.

Soukohp en mahs akan kin kahdaniki atail mwehiet imwin rahn akan de rahn en mwuhr kan. Ih mwehi me pahn uh mwohn Ketdo Keriau en SIses Krais. Ihme kahrehda eden Mwomwohdisoht iei Mwomwohdiso en Sises Krais en Souleng en Imwin-rahn Akan (kilang Doctrine and Covenants 115:3–4; pil kilang 3 Nihpai 27:3–8).

Soukohp oh Wahnpoaron me Ieias Rahnwet

Sises Krais ketin malipehier Wahnpoaron kei nan mwehiet pwe irail en katanga Sapwellime Mwomwohdiso, duwehte E ketin malipehier erein Ah ketiket sampah. Tohn Presidensi Keieu oh Pwihn en Wahnpoaron Ehk-riemenko re wia soukohp kei, ohl sarawi kei, oh sounkihla kaudiahl kei.

Ohl me keioun werei ah wiahki wahnpoaron kelehpw me kin kahdaneki Soukohp pwehki e kakaun Mwomwohdisoht pwon oh ahneki mweimwei tohrohr en kin koasoai ni Mwaren Kauno. Ih me ale mweimwei en weliandi Joseph Smith. Ih oh Wahnpoaron en rahnpwukat alehdi manaman oh mweiwmei koaros sang rehn Sises Krais. E sang ni irekdo en kasarawi kan me tepsang ansou me Joseph Smith alehdi kasarawio sang rehn meninkeder en nanleng kan.

Onopki Pwuhk Sarawi

• 2 Nihpai 3

• 3 Nihpai 27:3–8

• Doctrine and Covenants 27:12–13; 112:30–32; 115:4

• Joseph Smith—History 1:68–72

• Wiewia Kan 3:19–22

• Episos 4:5

• Seims 1:5

Kalaudehla amw Wehwehki me pid Duwen Padahk Wet

• Guide to the Scriptures: “Restoration of the Gospel”

• “The Restoration of the Fulness of the Gospel of Jesus Christ: A Bicentennial Proclamation to the World”

• Gospel Topics: “Restoration of the Church,” “Restoration of the Priesthood”

Pwuhk en Mormon: Pil Ehu Kadehdepen Sises Krais

Pwuhk en Mormon iei ehu pwuhk sarawi me rasohng Paipel. Paipel iei ehu kadehdepen Sises Krais, oh Pwuhk en Mormon wia keriau en kadehdepen Sapwellimen Sises kalohk, padahk, oh kahrepen sapwellime doadoahk nin duwen Eh wia atail Sounkomour.

Meninkeder en nanleng men me adaniki Moroni kaweidki Joseph Smith en kohla ni dohl ehu, wasa me rekohd kan serikidier sounpar epwikihkei. Rekohd wet, me intingdi pohn pleit kohl kei (tehn mete menipinip), audaudkihda inting kei sang rehn soukohp ekei me pid duwen Sapwellimen Koht doadoahk ong ekei aramas en mahs nan Amerika. Joseph Smith kawehwehdi rekohd kan sang ni kisakis oh manaman en Koht.

Soukohp akan en nan Pwuhk en Mormon wehwehki kahrepen Sapwellimen Sises Krais doadoahk oh kin padahngki Sapwellime rongamwahuo. Mwurin Sises eh ketin iasada, E ketin pwarehng aramas pwukat oh pein wia Sapwellime doadoahk ong irail. Sises ketin padahk ong irail oh kawada Sapwellime Mwomwohdisoh.

Pwuhk en Mormon kin soweseikitail en karaniala Koht ni atail pahn kin onopki, wehwehkihla, oh doadoahngki audepe kan nan atail mour. Soukohp Joseph Smith inda me “ohl emen [de lih emen] pahn karaniala Koht sang ni ahr pahn momouriki padahk en kaweid kan me mih loale sang [padahk en] pwuhk teikan” (Teachings: Joseph Smith, 64).

Kitail kak ese me Pwuhk en Mormon iei mahsen en Koht ni atail pahn kin wadek, madamadauloalki, oh kapakapki. Emen soukohp en nan Pwuhk en Mormon inoukihdi me Koht pahn ketin kasalehieng kitail mehlel en pwuhk wet ni atail pahn kapakapki ni mohngiong mehlel, ineng mehlel, oh pwoson Krais (kilang Moronai 10:3–5). Onohnopki Pwuhk en Mormon wia mehkot kesempwal ohng weliakapwala me pahn poatoapoat.

Ni atail pahn wadek Pwuhk en Mormon oh kapakapki, kitail pahn diarada mehlel kan me pid duwen Sises Krais me pahn kapaiada atail mour. Kitail pil pahn esehla me Joseph Smith iei soukohp en Koht emen oh me E ketin doadoahngki Joeseph Smith oh kapwurehdo rongamwahuo oh Mwomwohdiso en Sises Krais.

“I inoukiheng kumwail me ni amwail pahn kapakap oh onopiki Pwuhk en Mormon rahn koaros,kumwail pahn kak wiahda pilipil mwahu kan—rahn koaros. Ih inoukihwei me ni amwail pahn kin madamadauloalki dahme kumwail kin onopiki, wenihmw tok en nanleng pahn ritida, oh kumwail pahn alehdi pasapeng en amwail kalelapak kan oh wasa me kumwail en kin wia nan amwail mour. I inoukiheng kumwail me ni amwail pahn kin sohnkumwaildieng nan Pwuhk en Mormon rahn koaros, kumwail kak silasildihsang me suwed akan en rahno” (Russell M. Nelson, “Pwuhk en Mormon: Ia Pahn Duwen Amwail Mour ma Sohte Pwuhk Wet?” Liahona, Nohp. 2017, 62–63).

Kaweid en Padahk

Kawehwehieng Aramas kan Duwen Pwuhk en Mormon

Ni amw pahn tepin kawehwehieng aramas kan duwen Pwuhk en Mormon, kawehwehieng irail me e wia rekohd sarawi kei me pid duwen Sapwellimen Koht doadoahk ong aramas ekei mahs nan sapwen Amerika sipele sounpar kid samwalahro. Nan pwuhk wet kitail kak esehla soahng tohto me kak doadoahk nan atail mour rahn wet.

Kawehwehieng irail me kahrepen Pwuhk en Mormon iei en kamehlelehieng aramas koaros me Sises iei ihme Krais (kilang ni teh oaralap). Teh oaralapo ketihtihki, pwuhk wet wia “ehu Kadehdehpen Sises Krais.” Inoukiheng aramas akan me irail pahn kalaudehla arail wehwehki arail Sounkomouro ni arail pahn wadek.

Ni amw pahn kiheng aramas neirail Pwuhk en Mormon, ndahieng irail duwen manamanpe me doadoahk nan amw mour. Ehukiheng irail ire ehu de riau me inenen audapan ong uhk de me pahn audapan ong irail. Ni omw pahn kin onop de kowe oh amw kompahnien pahn kin onop pene, Ngehno pahn sowesehkin kumwa irehkan me pahn sair de kakehlaka aramas akan.

Kangoangehki aramas akan en kin wadek Pwuhk en Mormon rahn koaros. Ni arail pahn kin wadek oh daodaongki kaweid kan, Koht pahn kapaiahda irail oh irail pahn karaniala Ih.

Pwuhk en Mormon kin Kasalehda duwen Mehlel en Kapwurupwurdohu.

Ke kak nda soangen mwomwen koasoai pwukat pwe ken sowese aramas akan en wehwehki duwen Pwuhk en Mormon eh kin kasalehda duwen mehlel en Kapwurupwurdohn rongamwahu en Sises Krais:

Pwuhk en Mormon iei ehu wiepen Koht eh ketin kamehlelehiengie duwen mehlel en dahme se kosoiahier. Ke kak menlau wadek lahs en parakrahp riau sang nan mehn kapehse en pwuhk wet?

Kawehwehieng irail wehwehn iren madamadau kan nan parakrahp riauo. Lukehieng irail akan me ke kin padahkehng en wadak wasahkei nan Pwuhk en Mormon oh idawehn dahme parakrahp riauo nda. Ni arail pahn kehn ngehno oh mehlel en Pwuhk en Mormon, Irail kakehr ese me Joseph Smith iei soukohp en Koht men.

Onopki Pwuhk Sarawi

• Teh oaralap en Pwuhk en Mormon

• Mehn Kapehse Ohng Pwuhk en Mormon, parakrahp kan 1–7

• Moronai 10:4–5

• Doctrine and Covenants 1:17–23; 20:1–12

• Joseph Smith—History 1:27–62

Kalaudehla Amw Wehwehki me pid duwen Padahk Wet

• Kaweid ong Pwuhk Sarawi Kan: “Pwuhk en Mormon”

• Oaralap Akan en Rongamwahuo: “Pwuhk en Mormon”

Kapakapki Ken kak Esehla Mehlelo sang rehn Ngehn Sarawi

Pwehki Koht Eh ketin wia Samatail, E pahn ketin soweseikitail en kak kilangada mehlelo. Kitail kak ese me padahk en Kopwurupwurdohn rongamwahu en Sises Krais mehlel ni atail pahn kin wadek Pwuhk en Mormon oh kapakapki ong Koht. Ni atail pahn kapakap ni pwoson oh ineng mehlel, E pahn ketin sapeng atail peidek oh kaweid atail mour.

Koht kin ketin sapengki atail kapakap Ngehn Sarawio. Ni atail kin kapakap, Nehng Sarawi kin padahkih kitail oh kadehdehieng kitail mehlelo. Wehwe sang ni Ngehn Sarawio kin manaman. E kin kalapw pwarada ni meleilei sang ni atail pepehm, lamalam, oh madamadau kan (kilang 1 Nahnmwarki Kan 19:11–12; Ilemen 5:30; Doctrine and Covenants 8:2).

Atail kin poadidi en wadewadek pwuhk sarawi kan (ahpw ni mehlel Pwuhk en Mormon), kin ieiang sarawi en kamadipw sarawi kan, oh kin kapakap ni mehlel, kin soweseikitail en kehn manaman en Ngehn Sarawi oh diarada mehlelo.

Kaweid en Padahk

Kapakap

Diren aramas kin duwehte Joseph Smith me kin raparapahki pasapengpen peidek kesempwal akan oh wiepen arail kak ehuieng Koht. Ehukiheng irail duwen kapakap ah kin soweseiuk karaniala Koht. Ehukieng irail duwen amw kin alehdi pasapeng oh kaweid sang ni amw kin onop oh kapakap.

Kawehwehda me kapakap iei koasoakoasoaipene ehu nan pwungen Koht oh Sapwellime serihkan. Luke irail akan me komw kin padahkehng en peki sawas oh kaweid rehn Koht. Amw pahn kin lukehieng aramas en kapakap wia ehu luhk me keieun kesempwal me ke pahn kak kiheng irail. Ni arail pahn alehdi pasapeng kan, irail pahn esehla me irail Sapwellimen Koht serihkei me e ketin poakoahng oh E pahn ketin sowese irail.

Pali laud en aramas me ke pahn padahkehng pahn sahn kapakap. E wia kapai ehu ken kak sowese irail en esehla kapakap oh elehda elen irail en kak ahneki kapai en kapakap nan arail mour. Kapakap wia wiepen atail kak alehdi kadehdepen mehlel kan en pali ngehn.

Padahkiheng aramas me kapakap kin kalapw audaudkihda pali pwukat:

• Tep, ke pahn nda mwaren Samatail Nanleng.

• Kasalehda amw pepehm kan, soangen amw kalahnganki kapai kan me ke alehdier.

• Idek amw peidek kan, rapahki kaweid, oh peki kapai kan me ke anahne.

• Imwihkihla amw pahn kin nda, “Ni mwaren Sises Krais, ahmen.”

Lukehieng aramas akan en kapakap ni arail pahn wadek Pwuhk en Mormon pwe irail en kak wehwehki me iei mahsen en Koht met me e kadehde duwen Sises Krais.

Ni ahmw pahn padahkiheng aramas en kapakap, doadoahngki lokaia me mengei me irail pil kak doadoahngki ansou me irail pahn kapakap. Kamwotehieng kapakap pwukat.

Luke aramas me ke padapadahkih en kapakap ni imwilahn padahk wet. Kadehdehieng irail me Koht kin ketin karonge oh sapeng atail kapakap kan.

Ineng Mehlel

Wadawadki ineng mehlel wehwehki me kitail koasoanehdier nan loaletail me kitail pahn idawehn poahsoan en padahk kan oh doadoahngki nan atail momour en ehu ehu rahn akan. Kapakapki ineng mehlel wehwehki me kitail koasoanehdier nan loaletail me kitail pahn idawehn pasapeng me kitail alehdi sang rehn Koht.

Onopki Pwuhk Sarawi Kan

• Moronai 10:3–5

• Alma 5:45–46

• Doctrine and Covenants 8:2–3

• Sohn 14:26

• Mehn Kapehse Ohng Pwuhk en Mormon, parakrahp 8–9

Kalaudehla Amw Wehwehki me pid duwen Padahk Wet

• Guide to the Scriptures: “Prayer”

• Bible Dictionary: “Prayer”

• Gospel Topics: “Prayer”

Koasoandihn Padahk Mwotomwot lel Nan Werenge

Me sansal pah iei karasepen dahme ke kak padahngki ma amw ansou inenen mwotomwot. Ni amw pahn doadoahngki irekdi wet, pilada iren padahk meh ehu de riau me ke pahn padahngki. Poahsoan en padahk ong ehu ehu iren padahk pwukat sansaladahr ni tapin padahk wet.

Ni amw pahn padahk, idek peidek kan kowe uhd kin rong. Lukehieng irail luhk kan me pahn sowese irail en karaniala Koht. Ehu luhk kesempwal iei ken lukehieng irail kumwail en pwurehng tuhpene. Uwen reirei en padahk kin pahsan peidek kan me ke pahn idek oh uwen rongorong me ke kin wia.

Dahme Ke Kak Padahkiheng Aramas nan Erein Minit 3–10

• Koht iei Samatail Nanleng, oh E ketin kapik kitailda rasehng Ih. E ketin mwahngih kitail ni mehlel oh poakohng kitail. E ketin kupwuriki en kapai kin kitailda meleilei oh popohl unsek me pahn poatoapoat.

• Sises Krais iei Sapwellimen Koht Iehros. Kahrepen Sapwellime doadoahk iei en elehieng kitail en mwakelekelda sang dipatail kan, powehdi mehla, oh alehdi mour soutuk.

• Koht kin ketin malipe soukohp akan pwe irail en wia Weliepe pohn sampah. Mahs, E ketin malipe soukohp akan me pil iangahki Adam, Noha, Eipraam, oh Moses. Soukohp me momour kin alehdi kaudiahl sang rehn Koht pwe en padahkih kitail oh kahluwai kitail rahnwet.

• Ni Sises Eh ketket pohn sampah, E ketin kawada Sapwellime Mwomwohdiso. Mwurin mehlahn Sapwellimen Sises wahnpoaronko, me ngeder me pwupwilahsang rongamwahuo oh Mwomwohdiso en Sises Krais. Aramas wekidala diren padahk en rongamwahuo oh tiahk sarawi en prihsduhdo, ehu karasepe iei pepdais.

• Koht ketin melipe Joseph Smith en wiahla soukohp men, duwehte eh kin ketin malipe soukohp akan en mahs. Sahm Nanleng oh Sises Krais ketin pwarehng ih. Rongamwahu en Sises Krais kapwurpwurdo sang reh.

• Pwuhk en Mormon iei kapatapatpenehn pwuhk sarawi kei. Pwuhk en Mormon duwehte paipel me wia kadehdepen Sises Krais oh sowese kitail en karaniala Koht ni atail kin wadek oh doadoahngki audepe kan nan atail mour. Joseph Smith kawehwehdi sang ni kisakis oh manaman en Koht.

• Kitail kak kin koasoakoasoaieng kauno ni atail pahn kin kapakap ni ineng mehlel. Kitail kak ese me padahk en Kopwurupwurdohn rongamwahu en Sises Krais mehlel.