Wase 3: Lesoni 2

Na iTuvatuva ni Veivakabulai nei Tamada Vakalomalagi

Era na Lomatarotaro Beka na Tamata

• Na cava na inaki ni bula?

• Au a lako mai vei?

• E tiko beka e dua na Kalou ka kauwaitaki au? Au na vakila beka vakacava ni kauwai o Koya?

• Meu vakabauta vakacava na Kalou ni yaco tiko e vuqa na ka ca?

• Na cava sa rui dredre kina ena so na gauna na bula? Meu na kunea vakacava na kaukauwa ena veigauna vakaoqori?

• Meu na yaco beka vakacava meu tamata vinaka cake?

• Na cava ena yaco niu sa mate?

Na kosipeli vakalesui mai i Jisu Karisito ena vukea noda sauma eso na taro bibi ni yaloda. Ena kosipeli, eda vulica kina na keda ivakatakilakila vakalou kei na tawamudu eda rawa ni yacova vakaluve ni Kalou. Na kosipeli e solia vei keda na inuinui ka vukei keda meda kunea na sautu, marau kei na bula e vakaibalebale. Na bulataki ni kosipeli e vukea na noda tubu, ka kunea na kaukauwa nida sotava na bolebole ni bula.

E vinakata na Kalou na ka vinaka duadua ena vukudra na Luvena ka gadreva me solia vei keda na Nona veivakalougatataki cecere duadua, sai koya na tawamate rawa kei na bula tawamudu (raica na Mosese 1:39; Vunau kei na Veiyalayalati 14:7). Baleta ni lomani keda, sa vakarautaka kina o Koya vei keda e dua na ituvatuva meda rawata kina na veivakalougatataki oqo. Ena ivolanikalou, na ituvatuva oqo e vakatokai me ituvatuva ni veivakabulai, na ituvatuva cecere ni marau, ka ituvatuva ni veivueti (raica na Alama 42:5, 8, 11, 13, 15, 16, 31).

Ena ituvatuva ni Kalou, na tamata yadua e lakova e dua na ilakolako ena bula taumada, na sucu, bula oqo, mate, kei na bula ni oti na mate. Sa vakarautaka na Kalou na veika eda gadreva ena ilakolako oqo me rawa kina ni sa oti na mate, sa rawa ni yaco meda lesu tale ki na Nona iserau ka rawata na taucoko ni marau.

O Jisu Karisito na itakele ni ituvatuva ni Kalou. Ena Nona Veisorovaki kei na Tucake tale, sa dolava kina vei keda o Jisu meda rawa ni tawamate rawa ka bula tawamudu.

Ena noda bula e vuravura, eda sa guilecava kina na noda bula taumada. Se eda sega ni kila vakavinaka sara kina na bula ni oti na mate. Ia sa vakatakila na Kalou e levu na dina me baleta na iwase oqo ni noda ilakolako tawamudu. Sa vakarautaki ena dina eso oqo na kilaka me rawa kina nida kila vinaka sara na inaki ni bula, meda rawa ni vakila kina na reki, ka meda nuitaka kina na veika vinaka ena yaco mai. Na kilaka oqo sa iyau talei me tuberi keda nida tiko voli e vuravura.

Vakatutu ni Veivakavulici

E vakarautaki ena iwasewase oqo e dua na sabolo ni ituvatuva me vukea nomu vakavakarau mo veivakavulici. E okati talega kina na ivakaraitaki ni taro kei na veisureti e rawa ni o vakayagataka.

Nio vakarau mo veivakavulici, vakasamataka ena masumasu na ituvaki ni tamata yadua kei na nona gagadre vakayalo. Vakatulewataka na ka ena veiivuke vakalevu me vakavulici. Vakarau mo vakamacalataka na vosa eso era na sega beka ni kila na tamata. Tuvatuva ena levu ni gauna ena nomu, ka nanuma tiko me vakaleleka na lesoni.

Digia na ivolanikalou mo vakayagataka ni o veivakavulici. Na iwasewase ni “Yavu Vakaivunau” ni lesoni e okati kina e vuqa sara na ivolanikalou yaga.

Vakasamataka na taro cava me tarogi nio veivakavulici. Tuva na veisureti me caka ka na vakayaloqaqataka na tamata me yavala.

Vakabibitaka na veivakalougatataki yalataki ni Kalou, ka wasea na nomu ivakadinadina ni veika o vakavulica.

Na Veika mo na Vakavulica vei ira na Tamata ena Loma ni 15-25 na Miniti

Digia e dua se sivia mai na veivakavuvuli oqo mo vakavulica. Na yavu vakaivunau ni veivakavuvuli yadua sa toka tarava mai na ituvatuva oqo.

Bula Taumada: Na iNaki kei na iTuvatuva ni Kalou me baleti Keda

• Eda luvena kece na Kalou. Na Kalou a bulia na tamata ena Nona itovo vakaikoya.

• Eda a bula tu vata kei na Kalou ni bera nida sucu mai ki vuravura. Eda sa lewe ni Nona matavuvale. E kilai keda ka lomani keda yadua o Koya.

• Sa vakarautaka na Kalou e dua na ituvatuva ni noda marau kei na tubu ena bula oqo kei na tawamudu.

• Ena noda bula taumada eda a digitaka meda muri Jisu Karisito ka ciqoma na nona ituvatuva na Kalou. Sa kena ibalebale oqo na lako mai ki vuravura me rawa nida cavuta kina na ikalawa ka tarava ena noda ilakolako tawamudu.

• O Jisu Karisito na itakele ni ituvatuva ni Kalou. Sa dolava o Koya vei keda meda rawata na tawamate rawa kei na bula tawamudu.

Na Veibuli

• Ena veidusimaki ni Kalou, sa bulia kina ko Jisu na vuravura.

Na Lutu Nei Atama kei Ivi

• O Atama kei Ivi erau a isevu vei ira na luve ni Kalou me lako mai ki vuravura. A bulia na Kalou na yagodrau ka biuti rau ena Were ko Iteni.

• Erau a talaidredre o Atama kei Ivi rau vakasevi tani mai na were ka rau tawasei tani mai na iserau ni Kalou. Na ka e yaco oqo e vakatokai na Lutu.

• Ni oti na Lutu, sa yaco me rau tamata bula vakayago o Atama kei Ivi. Ni rau sa tamata bula vakayago, sa rawa ni rau vuli, toso, ka vakaluveni o Atama kei Ivi. Rau sa vakila talega na yaluma, ivalavala ca, kei na mate.

• Na Lutu sa ikalawa ki liu ki na kawatamata. Na Lutu sa rawa kina vei keda meda mai sucu e vuravura ka toso ena ituvatuva nei Tamada Vakalomalagi.

Na Noda Bula e Vuravura

• Ena ituvatuva ni Kalou, eda gadreva meda lako mai ki vuravura meda mai vakayago, vuli, ka tubu.

• E vuravura eda vulica kina meda lako ena vakabauta. Ia, e sega ni biuti keda duadua tu na Tamada Vakalomalagi. Sa vakarautaka o Koya e vuqa na isolisoli kei na idusidusi me vukea noda lesu tale ki na Nona iserau.

Na Veisorovaki i Jisu Karisito

• Eda sa ivalavala ca kece sara, ka eda na mate kecega. Ni lomani keda na Kalou, sa tala mai kina na Luvena, ko Jisu Karisito, i vuravura me vueti keda mai na ivalavala ca kei na mate.

• Ena isoro ni veivakaduavatataki nei Jisu, sa rawa kina nida vosoti ka savai mai na noda ivalavala ca. Sa rawa ni veisau na yaloda me vinaka cake nida veivutuni. Oqo sa rawa kina nida lesu tale ki na iserau ni Kalou ka rawata na reki e taucoko.

• Ena vuku ni sa Tucake tale o Jisu, eda na tucake kece tale ni oti noda mate. Sa kena ibalebale oqo ni na cokoti vata tale na yalo kei na yago ni tamata yadua, ka da na bula me tawamudu na tamata yadua ena yago sa uasivi sara, ka sa tucake tale mai na mate.

• Sa solia ko Jisu Karisito na vakacegu, inuinui, kei na veivakabulai. Na Nona isoro ni veivakaduavatataki sai koya na ituvutka ni ivakaraitaki ni Nona loloma. Na veika taucoko e sega ni dodonu me baleta na bula e rawa me vakadodonutaki mai na Veisorovaki i Jisu Karisito.

Na Vuravura ni Yalo

• Ni sa mate na yagoda vakayago, sa na tomani tiko na bula ni yaloda ena vuravura ni yalo. Oqo e dua na ituvaki vakawawa ni vuli kei na vakavakarau ni bera na Tucake tale.

• Sa vakavuvulitaki ena vuravura ni yalo na kosipeli i Jisu Karisito, ka rawa nida tubu tiko kina ka toso ki liu.

Na Tucaketale, Vakabulai kei na Bula Vakacerecerei

• Ni sa oti na noda gauna ena vuravura ni yalo, sa ikalawa ka tarava na Tucake tale ena noda ilakolako tawamudu.

• Na Tucake tale sai koya na vakaduavatataki ni yaloda kei na yagoda. O keda yadua eda na tucake tale ka taukena e dua na yago sa vakataucokotaki na kena vinaka. Eda na bula me tawamudu. Sa rawa oqo ena Veisorovaki kei na Tucake tale ni iVakabula.

Veilewai kei na Veimatanitu Lagilagi

• Nida vakaturi cake tale, ena qai noda turaganilewa ko Jisu Karisito. Ena vakavo walega e lewe vica, na luve ni Kalou taucoko ena ciqoma e dua na tikina ena dua na matanitu vakalagilagi.

• E dina nida na tucake taucoko tale, eda na sega ni ciqoma taucoko e dua vata ga na lagilagi tawamudu. Ena lewai keda ko Jisu me vakatau mai na noda vakabauta, cakacaka, kei na veivutuni ena bula oqo kei na vuravura ni yalo. Eda rawa ni lesu tale ka laki bula ena iserau ni Kalou kevaka eda sa yalodina.

Taro e Rawa ni o Tarogi ira Kina na Tamata

Na taro eso oqo era ivakaraitaki ni veika o rawa ni tarogi ira kina na tamata. Na taro eso oqo e rawa ni vukei iko me vakaibalebale kina na nomu veivosaki ka kila na nona gagadre kei na ivakarau ni rai e dua na tamata.

• Na cava o nanuma ni inaki ni bula?

• Na cava e kauta mai vei iko na marau?

• Na bolebole cava soti o gadreva kina na Kalou me vukei iko?

• Na cava o sa bau vulica mai na bolebole o sa sotava?

• Na cava o kila me baleti Jisu Karisito? Sa vakaimawe vakacava ena nomu bula na Nona bula kei na itavi?

Veisureti O Rawa ni Vakayacora

• O na rawa beka ni kerea vua na Kalou ena masu me vukei iko mo kila ni veika keirau vakatavulica e dina? (Raica na “Vakasama Titobu ni Veivakavulici: Masu” ena iotioti ni iwasewase ni lesoni 1.)

• O na rawa beka ni tiko ena lotu vata kei keirau ena Sigatabu oqo mo vulica eso tale na ka me baleta na veika keirau sa vakavulica oti?

• Ena rawa beka ni o wilika na iVola i Momani ka taroga ena masu mo kila kina ni sa vosa ni Kalou? (Mo na vakatura sara beka ga na wase se na veitikina eso.)

• O na muria beka na ivakaraitaki nei Jisu ka papitaiso? (Raica “Na Veisureti ni Papitaiso kei na Veivakadeitaki,” ka liu tiko ki na lesoni 1.)

• E rawa beka me keirau lokuca e dua na gauna baleta na neirau veisiko ka tarava?

Yavu Vakaivunau

Na iwasewase oqo e vakarautaka na ivunau kei na ivolanikalou mo vulica me vaqaqacotaka na nomu kilaka kei na ivakadinadina ni kosipeli ka vukea nomu veivakavulici.

Bula Taumada: Na iNaki kei na iTuvatuva ni Kalou me baleti Keda

Eda Luvena na Kalou, ka da a Bula Vata kei Koya ni Bera Noda Sucu

Na Kalou e Tama ni yaloda. Eda sa Luvena ka Caka meda iTovo vata kei Koya. O keda yadua e dui tu na keda inaki vakalou, baleta nio keda yadua eda luvena na Kalou. Na kilaka oqo e rawa ni vukei keda ena veigauna dredre ka rawa ni vakauqeti keda meda yacova na kedai ituvaki vinaka duadua.

Eda a bula tu vata kei na Kalou vaka-Luvena vakayalo ni bera nida sucu mai ki vuravura. Eda sa lewe ni Nona matavuvale.

“E dua tiko na ivakatakilakila bibi eda wasea vata kece ena gauna oqo ka tawamudu, edua me na kakua sara ni yali mai matada, ka meda na vakavinavinakataka. Sai koya nio iko e dua na luvena ka a dau luvena tagane se luvena yalewa tu ga na Kalou ka tawamudu na kena wakatu vakayalo.

“… Noda kila na dina oqo—noda kila vakavinaka sara ka vakamareqeta—sai koya e veisautaka na bula. Oqo e solia vei iko e dua na ivakatakilakila duatani ka na sega ni dua e kauta tani vei iko. Ia e uasivi cake, ni dodonu me solia vei iko e dua na vakanananu vakaitamera ni kemu yaga tawayalani. Kena itinitini, e solia vei iko e dua na inaki vakalou, vakaturaga ka yaga sara ni bula” (M. Russell Ballard, “Children of Heavenly Father” [ Lotu ena Brigham Young University, Maj. 3, 2020], 2, speeches.byu.edu).

Eda a Digitaka Meda Lako mai ki Vuravura

E lomani keda na Tamada Vakalomalagi ka gadreva meda yaco me vakataki Koya. O koya e dua na kabula vakacerecerei ka taukena e dua na yago vakalagilagi.

Ena noda bula taumada, eda vulica ni tu e dua na nona ituvatuva na Kalou ena vukuda meda yaco me vakataki Koya. E dua na iwase ni Nona ituvatuva sai koya meda na biuta mai na noda itikotiko vakalomalagi ka da lako mai i vuravura meda mai taukena e dua na yago. Eda gadreva talega meda rawata na kilaka ka tara cake na vakabauta ena gauna ni noda tiko tani mai vua na Kalou. Eda na sega ni nanuma na noda a bula tiko vata kei na Kalou. Ia, ena vakarautaka o Koya na veika eda gadreva me rawa kina nida lesu tale ka laki bula vata kei Koya.

Na galala ni digiidigi, se na galala kei na nomu rawata mo digidigi, sa tiki yaga sara ni nona ituvatuva na Kalou ena vukuda. Ena noda bula taumada, eda a digitaka yadua meda muria na ituvatuva ni Kalou ka lako mai ki vuravura me rawa nida mai cavuta na ikalawa e tarava ena noda ilakolako tawamudu. Eda kila ni ena noda tiko voli eke, eda na sotava e vuqa sara na veimadigi vovou meda tubu ka sotava kina na reki. Eda kila talega na mai sotava na veisaqasaqa. Eda na mai sotava na veitemaki, veivakatovolei, yaluma, kei na mate.

Ena noda digitaka meda lako mai ki vuravura, eda sa vakabauta na nona loloma kei na veivuke na Kalou. Eda sa vakararavi kina Nona ituvatuva me baleta na noda vakabulai.

Na Tamada Vakalomalagi e Digitaki Jisu Karisito me Mai Vakabulai Keda

O Jisu Karisito na itakele ni ituvatuva ni Kalou. Ni bera nida lako mai i vuravura, eda sa kila nida na sega ni rawa ni lesu tale ki na iserau ni Kalou vakataki keda ga. A digitaki Jisu Karisito na Tamada Vakalomalagi, na Nona Ulumatua, me rawa kina vei keda meda lesu tale Vua ka rawata na bula tawamudu.

A ciqoma ena lomasoli ko Jisu. A vakadonuya o Koya me lako mai ki vuravura ka vueti keda ena Nona isoro ni veivakaduavatataki. Na Nona Veisorovaki kei na Tucake tale ena rawa kina ni vakataucokotaki na inaki ni Kalou ena vukuda.

Vulici ni iVolanikalou

Luve ni Kalou

• Cakacaka 17:28–29

• Iperiu 12:9

iNaki ni Kalou

• Mosese 1:39

• Eparaama 3:25–26

• Joni 17:3

Bula Taumada

• Vunau kei na Veiyalayalati 138:53–56

• Eparaama 3:22–28

• Efeso 1:3-4

• Jope 38:4–7

• Jeremaia 1:5

Vulica Vakalevu baleta na iVakavuvuli Oqo

• iDusidusi ki na iVolanikalou: “Bula Taumada,” “iTuvatuva ni Veivueti”

• iVoladusidusi Raraba, 1.1: “iTuvatuva ni Marau ni Kalou”

• Gospel Topics: “Premortality,” “Plan of Salvation”

Na Veibuli

Na ituvatuva nei Tamada Vakalomalagi e vakarautaka na buli ni vuravura, ka ra na ciqoma kina na Luvena vakayalo e dua na yago ka rawata na kilaka. Sa gadrevi na noda bula e vuravura me rawa kina nida toso ka yaco me vaka na Kalou.

Ena veidusimaki ni Tamada Vakalomalagi, a bulia kina o Jisu Karisito na vuravura kei na veika bula kecega e tu kina. Oti sa qai bulia na Tamada Vakalomalagi na tagane kei na yalewa me ucui Koya. Na veibuli sa dua na ivakaraitaki ni loloma ni Kalou ena vukuda meda rawata kina na madigi meda tubu.

Vulici ni iVolanikalou

• 1 Nifai 17:36

• Alama 30:44

• Vunau kei na Veiyalayalati 88:41–47

• Mosese 2; 6:63

• Nai Vakatekivu 1:27

• iVakadewa nei Josefa Simici, Joni 1:1–3

• 2 Korinica 5:6–7

Vulica Vakalevu baleta na iVakavuvuli Oqo

• iDusidusi ki na iVolanikalou: “Bulia, Veibuli”

• Gospel Topics: “Creation”

Na Lutu Nei Atama kei Ivi

Ni se Bera na Lutu

O Atama kei Ivi erau a isevu vei ira na luvena vakayalo na Tamada Vakalomalagi me rau lako mai ki vuravura. A bulia na Kalou na yagodrau me rau ucui Koya ka biuti rau ena Were ko Iteni. Ena were erau se savasava sara ga, ka vakarautaka na Kalou na veika erau gadreva.

Ni rau tiko voli ena were o Atama kei Ivi, a vakaroti rau na Kalou me rau kakua ni kania na vua ni vunikau ka kilai kina na vinaka kei na ca. Kevaka erau talairawarawa ki na ivakaro oqo, ena rawa ni rau tiko ga ena were. Ia, ke rau a sega beka ni rawa ni toso ena nodrau vuli mai na veibasai ni ka kei na bolebole ni bula vakayago. E sega ni rawa me rau kila na reki baleta ni sega ni rawa me rau vakila na rarawa kei na mosi.

E a temaki Atama kei Ivi o Setani me rau kania na vuanikau vakatabui, ka rau digitaka me rau cakava vakakina. Ena vuku ni digidigi oqo, erau a vakasevi tani kina mai na were ka tawasei mai na iserau ni Kalou. Na ka e yaco oqo e vakatokai na Lutu.

Ni Oti na Lutu

Ni oti na Lutu, sa yaco me rau tamata bula vakayago o Atama kei Ivi. Ni rau sa sega tale ni qai bula tiko ena savasava ni yalo, erau sa kila ka sotava na vinaka kei na ca. Sa rawa ni rau vakayagataka na nodrau galala ni digidigi me rau digitaka kina se o cei vei rau. Ni rau a sotava o Atama kei Ivi na veibasai ni ka kei na bolebole, sa rawa kina ni rau vuli ka toso. Baleta ni rau sa vakila na yaluma sa rawa talega ni rau vakila na reki. (Raica na 2 Nifai 2:22–25.)

E dina ni tu na veika dredre erau sotava, erau vakila o Atama kei Ivi ni sa dua na ka cecere na mai bula ena bula oqo. E dua na veivakalougatataki sai koya ni sa rawa me rau luveya. Oqo sa vakarautaka na sala vei ira na vo ni luvena vakayalo na Kalou me ra lako mai ki vuravura ka mai ciqoma na yago.

Me baleta na veivakalougatataki ni Lutu, erau a reki ruarua o Atama kei Ivi. A kaya ko Ivi, “Kevaka keirau a sega ni talaidredre, ke a sega na neirau [kawa], ka na sega ni rawa i keirau kila na vinaka kei na ca, kei na reki ena neirau sa vueti, ka vakakina na bulatawamudu sa solia na Kalou vei ira sa talairawarawa” (Mosese 5:11; raica talega na tikina e 10).

Vakasama Titobu Vakaivunau: Na Lutu

Na Lutu e tiki yaga sara ni yavu ni veivakabulai ni Kalou. Na Lutu sa rawa kina vei keda meda lako mai ki vuravura ka toso me rawa nida yaco meda Kalou (raica na 2 Nifai 2:25).

Na lewa nei Ivi oti qai o Atama me kania na vuanikau ka biuta na Were ko Iteni e dua na digidigi ririkotaki vakayalo. Vakararaba, era vakatoka na ivolanikalou kei ira na parofita na digidigi qo me talaidredre, sega ni ivalavala ca (raica na Yavu ni Vakabauta 1:2; 2 Nifai 9:6).

Eso na tamata e cala na nodra vakabauta ni o keda kece eda vauci ena nodrau talaidredre o Atama kei Ivi (so era vakatoka me “ivalavala ca taumada”). Ia, sa vakatakila na Turaga ni sa “sorovaka na caka cala taumada na Luve ni Kalou, sa na sega kina ni saumi na nodra ivalavala ca na qase e uludra na luvedra” (Mosese 6:54).

Ni se qai imatai ni gauna me vakavuvulitaki kina na Lutu, vakamacalataka vakarawarawa sara.

Vulici ni iVolanikalou

Ena loma ni Were

• 2 Nifai 2

• Mosese 2:26–31; 3:15–17; 4:6–12; 7:32

• Nai Vakatekivu 1:26–31; 2:15–17

Na Lutu

• 2 Nifai 2:15–16, 22–27; 9:6–10

• Alama 12:22–34

• Mosese 4; 5:8–12

• Nai Vakatekivu 2:16–17; 3

• Vunau kei na Veiyalayalati 29:36, 39; 101:78

Vulica Vakalevu baleta na iVakavuvuli Oqo

• iDusidusi ki na iVolanikalou: “Lutu nei Atama kei Ivi,” “Galala ni Digidigi”

• Gospel Topics: “Fall of Adam and Eve,” “Agency and Accountability”

Na Noda Bula e Vuravura

E vuqa na tamata era dau taroga, “Na cava beka au mai cakava e vuravura?” Na noda bula e vuravura e tiki yaga sara ni nona ituvatuva na Kalou me baleta na noda itosotoso tawamudu. Na ulumatua ni noda inaki sai koya meda mai vakavakarau meda lesu tale ki na iserau ni Kalou ka rawata na reki e taucoko. Sa tuvai koto e ra eso na sala e vakarautaki keda kina na bula e vuravura me baleta oqo.

Rawata e Dua na Yago

E dua na inaki ni lako mai ki vuravura meda mai ciqoma e dua na yago. Na yagoda e ibulibuli tabu, cakacaka mana ni Kalou. Ena yagoda, sa rawa kina nida cakava, vulica, ka kila e levu na ka e sega ni rawata na yaloda. E rawa nida toso ena veisala eso e sega ni rawata na yalo.

Baleta ni rawa ni mate na yagoda, eda sa dau vakila kina na mosi, tauvimate, kei na veivakatovolei tale eso. Na veika eso eda sotava oqo sa rawa ni vukei keda ena noda vulica na vosota, yalololoma, kei na itovo ni bula vakalou tale eso. E rawa ni ra tiki ni noda salatu ki na reki. Na digitaka na dodonu ena gauna e dredre kina ni caka sa dau vakavuqa me tiki kina ni noda itovo ni bula na vakabauta, inuinui, kei na loloma cecere.

Vulica mo Vakayagataka Vakavuku na Galala ni Digidigi

E dua tale na inaki ni bula oqo meda vulica kina meda vakayagataka vakavuku na noda galala ni digidigi—meda digitaka na ka e dodonu. Na vulici ni kena vakayagataki vakavuku na noda galala ni digidigi sa gadrevi ena noda yaco me vaka na Kalou.

Na Tamada Vakalomalagi kei Jisu Karisito erau vakavulica vei keda na ka dodonu ka solia na ivakaro me tuberi keda ki na bula marau. E temaki keda o Setani meda caka cala, ni vinakata meda rarawa me vakataki koya. Eda sotava na veisaqasaqa ena vinaka kei na ca, ka ni gadrevi oqo ena noda vulica meda vakayagataka na noda galala ni digidigi (raica na 2 Nifai 2:11).

Nida talairawarawa vua na Kalou, eda na tubu ka ciqoma na Nona veivakalougatataki yalataki. Nida talaidredre, eda na vakayawaki keda mai Vua ka ciqoma na isau ni ivalavala ca. Dina ga ni rairai sega ni dau vakakina ena so na gauna, na ivalavala ca ena dau veimuataki ga ki na rarawa. E vakavuqa ni veivakalougatataki ni talairawarawa—kei na revurevu ni talaidredre—era sega ni laurai mai ena gauna vata ga se laurai e taudaku. Ia era na yaco dina mai, baleta na Kalou e dodonu.

Ena gauna mada ga eda cakava tiko kina na noda vinaka kece, eda se ivalavala kece tiko ga ka “sega ni yacova na veika e vakarokorokotaki kina na Kalou” (Roma 3:23). Ni kila tiko na Tamada Vakalomalagi na ka oqo, sa mani vakarautaka kina e dua na sala meda veivutuni me rawa kina nida lesu tale Vua.

Na veivutuni e kauta mai na kaukauwa ni noda Dauveivueti, ko Jisu Karisito, ki na noda bula (raica na Ilamani 5:11). Nida veivutuni, sa yaco meda savai mai na ivalavala ca ena isoro ni veivakaduavatataki nei Jisu Karisito kei na isolisolli ni Yalo Tabu (raica na 3 Nifai 27:16–20). Mai na veivutuni eda na vakila kina na reki. Sa dolavi vei keda na salatu lesu vei Tamada Vakalomalagi, ni sa rui dau loloma ko Koya. (Raica na “Veivutuni” ena lesoni 3.)

Vulica mo dau Lako ena Vakabauta

E dua tale na inaki ni bula oqo sai koya meda rawata na kilaka, ka dau yaco duadua ga mai nida tawasei tani mai vei Tamada Vakalomalagi. Nida sega ni raici Koya, eda gadreva meda vulica meda lako ena vakabauta (raica na 2 Korinica 5:6–7).

E sega ni biuti keda duadua tu na Kalou ena ilakolako oqo. Sa vakarautaka mai o Koya na Yalo Tabu me veituberi, veivakacegui, ka vakasavasavataki keda. Sa vakarautaka talega o koya na ivolanikalou, o ira na parofita, na masu, kei na kosipeli i Jisu Karisito.

Na veitiki kece sara ni noda bula oqo—na reki kei na yaluma, na rawaka kei na druka—e rawa ni vukea na noda tubu nida vakavakarau meda lesu tale vua na Kalou.

Vulici ni iVolanikalou

E Dua na Gaua ni Tubu kei na Toso

• 2 Nifai 2:21; 9:27

• Mosaia 3:19

• Alama 12:21–24; 34:31–35; 42:2–10

• Eparaama 3:25–26

Digidigi

• 2 Nifai 2:26–29

• Josua 24:15

Vinaka kei na Ca

• Moronai 7:12–19

iValavala ca

• Ilamani 5:11

• Roma 3:23

• 1 Joni 1:8–10

Sa Dodonu meda Savasava meda Tiko kina kei na Kalou

• 3 Nifai 27:19

• Mosese 6:57

Vulica Vakalevu baleta na iVakavuvuli Oqo

• iDusidusi ki na iVolanikalou: “Bula Vakayago,” “Rarawa”

• Gospel Topics: “Mortality,” “Adversity”

Na Veisorovaki i Jisu Karisito

Ena vuku ni Lutu nei Atama kei Ivi, eda na ivalavala ca ka mate kecega. Eda na sega ni rawa ni uabaleta vakataki keda ga na revurevu ni ivalavala ca kei na mate. Ena nona ituvatuva ni veivakabulai na Tamada Vakalomalagi, sa vakarautaka kina o Koya e dua na sala me uabaleta kina na revurevu ni Lutu me rawa kina nida lesu tale yani Vua. Ni bera ni buli na vuravura, na Tamada Vakalomalagi e a digitaki Jisu Karisito me noda iVakabula ka Dauniveivueti.

O Jisu Karisito duadua ga e rawa ni vueti keda mai na ivalavala ca kei na mate. Sai koya na Luve ni Kalou. E a tawacala ka talairawarawa vakataucoko kivua na Tamana. Sa vakarautaki ko Koya ka sa tuvakarau me cakava na lomai Tamana.

Na Veisorovaki ni iVakabula e okati kina na Nona a vakararawataki ena Were o Kecisemani kei na Nona a vakararawataki ka mate ena kauveilatai, kei na Nona Tucaketale. E sega ni na vakasamataki rawa na nona vakararawataki—na kena levu a tiri kina na dra mai na qara kecega ni yagona (raica na Vunau kei na Veiyalayalati 19:18).

Na Veisorovaki nei Jisu Karisito sai koya na ka lagilagi duadua a yaco ena itukutuku ni bula vakatamata. Ena Nona isoro ni veivakaduavatataki, sa yavalata kina ko Jisu na ituvatuva nei Tamana me cakacaka. Eda na sega ni cakava rawa e dua na ka kevaka a sega na Veisorovaki nei Jisu Karisito baleta ni sega ni rawa nida vakabulai keda vakai keda mai na ivalavala ca kei na mate (raica na Alama 22:12–15).

Na isoro ni noda iVakabula sa ivakaraitaki cecere sara ni Nona lomana na Tamana kei keda. “Na raraba, na balavu, na cecere kei na titobu” ni loloma i Karisito sa uasivia na ka kecega e kilai rawa (Efeso 3:18; raica talega na tikina e 19).

A Uabaleta na Mate o Jisu Karisito ena Vukuda Kece

Ena gauna a mate kina o Koya ena kauveilatai, erau a veitalatala na Yalona kei na Yagona. Ena ikatolu ni siga, e rau a duavata tale na Yalona vata kei na Yagona, me sega tale vakadua ni rau na veitawasei. E rairai vei ira e vuqa na tamata, ka vakaraitaka vei ira ni taukena tiko e dua na yago tawa mate rawa, vakalewe ka vakasui. Na vakaduavatataki tale ni yalo kei na yago oqo sa vakatokai na Tucake tale.

Nida tamata vakayago, eda na mate kecega. Ia, ni sa vakadrukai mate ko Jisu, ena tucake tale mai na mate na tamata kecega e sucu mai ki vuravura. Na Tucake tale e dua na isolisoli vakalou, ka soli mai na nona loloma cecere kei na iloloma soliwale na iVakabula. Ena cokoti vata tale na yalo kei na yago ni tamata yadua, eda na bula me tawamudu na tamata yadua ena yago sa uasivi sara, ka sa tucake tale mai na mate. Kevaka a sega ko Jisu Karisito, ke sa tinia ko mate na inuinui kece sara ni laki tiko vata tale kei na Tamada Vakalomalagi (raica na 2 Nifai 9:8–12).

O Jisu sa Rawata vei Keda meda Savai mai na Noda iValavala Ca

Meda kila na inuinui eda rawa ni ciqoma mai vei Karisito, ena gadrevi meda kila na lawa ni lewa dodonu. Sai koya na lawa sega ni veiveisau ka kauta mai na isau ni noda ivalavala. Na talairawarawa vua na Kalou e kauta mai na revurevu vinaka, kei na talaidredre e kauta mai na ka ca. (Raica na Alama 42:14–18.) Nida ivalavala ca, sa yaco meda dukadukali vakayalo, ka sega ni dua na ka dukadukali e rawa ni bula ena iserau ni Kalou (raica na 3 Nifai 27:19).

Ena nona isoro ni veivakaduavatataki o Jisu Karisito, a tucake kina o Koya ena vukuda, vakararawataki, ka sauma na itotogi ni noda ivalavala ca (raica na 3 Nifai 27:16–20). Na ituvatuva ni Kalou e solia vei Jisu Karisito na kaukauwa me vosa ena vukuda—me tu ena keda maliwa kei na lewa dodonu (raica na Mosaia 15:9). Ena vuku ni nona isoro ni veivakaduavatataki ko Jisu, sa rawa kina ni kaya ni Nona na dodonu ni loloma uasivi ena vukuda, nida sa veivutuni me rawa kina na vakabauta (raica na Moronai 7:27; Vunau kei na Veiyalayalati 45:3–5). “Ia sa vakaceguya na gagadre ni lewa dodonu na loloma cecere oqo, ka sa ologi [keda] ena liga ni veitaqomaki” (Alama 34:16).

Mai na isolisoli duadua ga ni Veisorovaki ni iVakabula kei na noda veivutuni sa rawa kina meda lesu ka laki bula vata tale kei na Kalou. Nida veivutuni, eda na vosoti ka savai vakayalo. Eda sa vueti mai na icolacola ni kilai yaloda ena vuku ni noda ivalavala ca. Sa vakabulai na yaloda mavoa. Eda sa vakasinaiti ena reki (raica na Alama 36:24).

E dina ga nida se sega ni taucoko sara ka rawa nida na yaco koso tale, e levu cake sara na loloma soliwale, na loloma, kei na loloma uasivi e tu vei Jisu Karisito mai na druka, cala, se na ivalavala ca e tu vei keda. Sa dau tuvakarau ka nanamaki tu na Kalou me ciqomi keda nida gole Vua ka veivutuni (raica na Luke 15:11–32). Sa sega ni dua na ka me tawasei keda tani mai na loloma ni Kalou, sa tu vei Karisito Jisu na noda Turaga” (Roma 8:39).

Sa Dau Colata o Jisu Karisito na Noda Mosi, Vakararawataki, kei na Malumalumu

Ena Nona isoro ni veivakaduavatataki, sa colata kina o Jisu Karisito na noda mosi, rarawa, kei na malumalumu. Ena vuku ni ka oqo, sa kila o Koya “me vaka na veika vakayago na sala me vukei ira kina na nona tamata me vaka na nodra veimalumalumu” (Alama 7:12; raica talega na tikina e 11). E veisureti o Koya, “Dou lako mai vei au,” ka nida vakayacora vakakina, ena solia vei keda o Koya na vakacegu, inuinui, kaukauwa, na itovo ni rai donu, kei na veivakabulai (Maciu 11:28; raica talega na tikina e 29–30).

Nida vakararavi vei Jisu Karisito kei na Nona Veisorovaki, ena rawa ni vukei keda o Koya meda vosota na noda vakatovolei, tauvimate, kei na mosi. E rawa nida vakasinaiti ena reki, sautu, kei na veivakacegui. Na veika taucoko e sega ni dodonu me baleta na bula e rawa me vakadodonutaki mai na Veisorovaki i Jisu Karisito.

Vulici ni iVolanikalou

Na Veisorovaki ni iVakabula

• 2 Nifai 2:6–8

• Mosaia 3:5–12

• Alama 7:11–13; 11:40; 34:8–10

• Vunau kei na Veiyalayalati 18:11–12; 19:15–19; 45:3–5; 76:40–43

• Joni 3:16–17

• 1 Joni 1:7

Tucaketale

• 2 Nifai 9:6–7, 13

• Mosaia 15:7–12

• Alama 11:42–45; 40:23

• Ilamani 14:15–19

• Luke 24:1–10, 36–39

• Joni 11:25–26

• 1 Korinica 15:20–22, 41–42

Vulica Vakalevu baleta na iVakavuvuli Oqo

• iDusidusi ki na iVolanikalou: “Jisu Karisito,” “Sorovaka, Veisorovaki,” “Loloma Soliwale”

• Gospel Topics: “Jesus Christ,” “Atonement of Jesus Christ,” “Grace”

Na Vuravura ni Yalo

E vuqa na tamata era dau taroga, “Na cava ena yaco niu sa mate?” Na ituvatuva ni veivakabulai e vakarautaka e vuqa na isau bibi ni taro oqo.

Na mate e tiki ni “ituvatuva ni loloma cecere” ni Kalou vei keda (2 Nifai 9:6). E sega ni sa icavaccava ni noda bula, ia na mate sa ikalawa ka tarava ni noda ilakolako tawamudu. Meda yaco me vaka na Kalou, sa dodonu meda mate mada ka da qai rawata e muri e dua na yago sa vakataucokotaki, ka sa tucake tale mai na mate.

Ni sa mate na yagoda vakayago, sa na tomani tiko na bula ni yaloda ena vuravura ni yalo. Oqo e dua na ituvaki vakawawa ni vuli kei na vakavakarau ni bera na Tucake tale kei na iOtioti ni veilewai. Na veika eda kila mai na bula oqo ena tu ga vata kei keda.

Ena vuravura ni yalo, o ira na tamata era ciqoma ka bulataka na kosipeli i Jisu Karisito “era na ciqomi ki na dua na itutu ni bula marau, ka vakatokai ko parataisi” (Alama 40:12). O ira talega na gonelalai era na ciqomi ki parataisi nira sa mate.

Na yalo mai parataisi era na tiko vakacegu mai na nodra leqaleqa kei na yaluma. Era na tomana na nodra tubu vakayalo, cakava na cakacaka ni Kalou kei na veiqaravi vei ira na tani. Era na vakavuvulitaka na kosipeli vei ira era a sega ni ciqoma ena nodra bula eke (raica na Vunau kei na Veiyalayalati 138:32–37, 57–59).

Ena vuravura ni yalo, na tamata a sega ni rawa me ciqoma na kosipeli e vuravura, se o ira era a digitaka me ra kakua ni muria na ivakaro, era na vakila ni yalani vei ira eso na ka (raica na Vunau kei na Veiyalayalati 138:6–37; Alama 40:6–14). Ia, baleta ni dau lewa vakadodonu ka dau loloma na Kalou, ena dua na nodra madigi me vakavulici vei ira na kosipeli i Jisu Karisito. Kevaka era ciqoma ka veivutuni, era na vueti mai na nodra ivalavala ca (raica na Vunau kei na Veiyalayalati 138:58; raica talega na 138:31–35; 128:22). Era na kidavaki yani ki na vakacegu mai parataisi. Era na qai ciqoma e dua na tikina ena matanitu lagilagi vakatau ena digidigi era a vakayacora eke kei na vuravura ni yalo.

Eda na tiko ga ena vuravura ni yalo me yacova nida vakaturicake tale mai na mate.

Vulici ni iVolanikalou

• Alama 34:34; 40

• Vunau kei na Veiyalayalati 138

• 1 Pita 3:18–20; 4:6

• Na Dauvunau 12:7

Vulica Vakalevu baleta na iVakavuvuli Oqo

• iDusidusi ki na iVolanikalou, “Parataisi

Na Tucaketale, Vakabulai kei na Bula Vakacerecerei

Tucaketale

Na ituvatuva ni Kalou sa rawa kina vei keda meda tubu ka rawata na bula tawamudu. Ni sa oti na noda gauna ena vuravura ni yalo, sa ikalawa ka tarava na Tucake tale ena tubu oya.

Na Tucake tale sai koya na vakaduavatataki ni yaloda kei na yagoda. O keda vakayadua eda na vakaturicake tale. Sa rawa oqo ena Veisorovaki kei na Tucake tale ni iVakabula. (Raica na Alama 11:42–44.)

Nida vakaturicake tale, eda na rawata yadua na yago sa vakataucokotaki, e sega kina na mosi kei na tauvimate. Eda sa na tawamate rawa, ka bula me tawamudu.

Veivakabulai

Baleta nida na tucake kece tale, eda na vakabulai kece—se rawata na veivakabulai—mai na mate vakayago. Na isolisoli oqori sa soli vei keda ena loloma soliwale nei Jisu Karisito.

Sa rawa talega nida vakabulai—se rawata na veivakabulai—mai na isau e lavaka na lawa ni lewa dodonu me baleta na noda ivalavala ca. Na isolisoli oqo sa rawati talega ena vuku ni nona vinaka kei na loloma cecere i Jisu Karisito, nida veivutuni. (Raica na Alama 42:13–15, 21–25.)

Vakacerecerei

Na vakacerecerei, se bula vakalou, e ituvaki cecere duadua ni marau kei na lagilagi ena matanitu vakasilesitieli. Na bula vakacerecerei e isolisoli ka tiko na veika e lavaki kina. O Peresitedi Nelson e vakavulica, “Na veika lavaki o ya e okati kina na vakabauta na Turaga, veivutuni, papitaiso, ciqomi ni Yalo Tabu, kei na yalodina tiko kina veicakacakatabu vakalotu kei na veiyalayalati ni valetabu.(“Veivakabulai kei na Bula va-Kalou” Liaona, Me 2008, 9).

Na bula vakacerecerei e kena ibalebale na bula vata kei na Kalou me tawamudu ena veimatavuvale tawamudu. Sai koya na kila na Kalou kei Jisu Karisito ka yaco me vakataki Rau, ka vakila na bula Erau marautaka.

Vulici ni iVolanikalou

• 2 Nifai 9:6–7, 13

• Alama 11:42–44; 22:14; 42:13–15, 21–25

• 1 Korinica 15:20–22

Vulica Vakalevu baleta na iVakavuvuli Oqo

• iDusidusi ki na iVolanikalou, “Tucake tale”

• Gospel Topics: “Resurrection,” “Salvation”

Veilewai kei na Veimatanitu Lagilagi

iDusidusi: Ni o vakavuvulitaka ena imatai ni gauna na veimatanitu lagilagi, vakavulica ena itagede rawarawa me vaka na nona gagadre kei na nona kila e dua.

Nida vakaturi cake tale, o Jisu Karisito ena noda turaganilewa dodonu ka dau veivosoti. Ena vakavo walega e lewe vica, o keda yadua eda na ciqoma e dua na tikina ena dua na matanitu vakalagilagi. E dina nida na vakaturi cake kece tale, eda na sega ni ciqoma e dua vata ga na lagilagi tawamudu (raica na Vunau kei na Veiyalayalati 88:22–24, 29–34; 130:20–21; 132:5).

Na tamata a sega ni donui koya na madigi me kila vakavinaka sara ka talairawarawa ki na lawa ni Kalou ena nodra bula eke ena soli vei ira na madigi oya ena vuravura ni yalo. Ena lewa na tamata yadua ko Jisu me vaka na nona vakabauta, nona cakacaka, gagadre, kei na veivutuni ena bula oqo kei na vuravura ni yalo (raica na Vunau kei na Veiyalayalati 138:32–34, 57–59).

E vakavuvulitaka na ivolanikalou na veimatanitu ni lagilagi vaka selesitieli, teresitieli, kei na tilesitieli. O iratou yadua sa vakatakilai mai kina na loloma, lewa dodonu, kei na loloma uasivi ni Kalou.

O ira era vakabauti Karisito, veivutunitaka nodra ivalavala ca, ciqoma na veicakacaka vakalotu ni kosipeli, maroroya na nodra veiyalayalati, ciqoma na Yalo Tabu, ka vosota me yacova na ivakataotioti era na vakabulai ena matanitu selesitieli. Na matanitu oqo era na oka talega kina o ira na tamata era a sega ni donumaka na madigi me ra ciqoma na kosipeli ena nodra bula oqo ia a “rawa me ra vakabauta ena yalodra taucoko” ka qai laki kitaka vakakina ena vuravura ni yalo (Vunau kei na Veiyalayalati 137:8; raica talega na tikina e 7). Na gonelalai era a mate ni ra se bera ni yacova na yabaki ni yalomatua (yabaki walu) era na vakabulai talega ena matanitu selesitieli (raica na Vunau kei na Veiyalayalati 137:10).

Ena ivolanikalou, na matanitu selesitieli e vakatauvatani kei na lagilagi se na iserau ni matanisiga. (Raica na Vunau kei na Veiyalayalati 76:50–70.)

Na tamata era a bulataka na bula dokai “era a sega ni vakabauta na ivakadinadina kei Jisu ni ra se vakayago, ia era a qai vakabauta e muri” era na rawata e dua na tikina ena matanitu teresitieli (Vunau kei na Veiyalayalati 76:74). Sa vakakina vei ira era a sega ni gumatua ena nodra ivakadinadina kei Jisu. Na matanitu oqo e vakatauvatani kei na lagilagi ni vula. (Raica na Vunau kei na Veiyalayalati 76:71–80.)

O ira era a ivalavala ca tiko ga ka sega ni veivutuni ena bula oqo se ciqoma na kosipeli i Jisu Karisito ena vuravura ni yalo era na ciqoma na kedra isau ena lagilagi vakatilesitieli. Na matanitu oqo e vakatauvatani kei na lagilagi ni kalokalo. (Raica na Vunau kei na Veiyalayalati 76:81–86.)

Vakasama Titobu Vakaivunau: Veilewai

Na tamata kece ena tu e matai Jisu Karisito me lewai ena vuku ni nona ivalavala” (3 Nifai 27:15; raica na tikina e 13–15). Ena vakasamataka na Turaga na ituvaki ni tamata yadua, okati kina na nona kila na vinaka kei na ca, kila na kosipeli, na itagede ni yalomatua, kei na gagadre (raica na Luke 12:47–48; Vunau kei na Veiyalayalati 137:9).

Baleta nida sega ni kila vinaka sara na kedra ituvaki na tani, sa dodonu meda kakua ni dau viavia kila na itagede ni lagilagi era na rawata. Ia, o keda meda vakarautaki keda meda sota kei na Turaga ka sureti ira na tani mera vakavakarau. (Raica Alama 5:15–19, 33; Moronai 10:32; Dallin H. Oaks, “‘Judge Not’ and Judging,” Liaona, Oko. 1999, 6–13.)

Vulici ni iVolanikalou

• 2 Nifai 9:15

• Mosaia 3:24

• 3 Nifai 27:14–16

• Vunau kei na Veiyalayalati 76:50–113; 88:20–32; 137:7–10

• Joni 14:2

• Roma 14:10

• 1 Korinica 15:40–41

• 2 Korinica 12:2

Vulica Vakalevu baleta na iVakavuvuli Oqo

• iDusidusi kina iVolanikalou: “Vakatulewa, Lewai,” “iVakatagedegede ni Lagilagi”

iTuvatuva ni Lesoni Lekaleka ki na Vakarauta

Na ituvatuva sa koto oqo e sabolo ni veika e rawa ni o vakavulica vua e dua ke lailai walega na gauna. Nio vakayagataka na ituvatuva oqo, digia e dua se sivia na ivakavuvuli mo vakavulica. Na yavu vakaivunau ni veivakavuvuli yadua sa soli yani ena itekivu ni lesoni.

Nio veivakavulici, taro ka vakarorogo. Vakayacora na veisureti ena vukei ira na tamata me ra vulica mera toro voleka vua na Kalou. E dua na veisureti bibi sai koya me sota tale kei iko na tamata oya. Na balavu ni lesoni ena vakatau ena taro o taroga kei na vakarorogo o vakayacora.

Na Veika mo Vakavulici ira kina na Tamata ena Loma ni 3-10 na Miniti

• Eda luvena kece na Kalou. Eda sa lewe ni Nona matavuvale. E kilai keda ka lomani keda yadua o Koya.

• Sa vakarautaka na Kalou e dua na ituvatuva ni noda marau kei na tubu ena bula oqo kei na tawamudu.

• Ena ituvatuva ni Kalou, eda gadreva meda lako mai ki vuravura meda mai vakayago, vuli, ka tubu.

• O Jisu Karisito na itakele ni ituvatuva ni Kalou. Sa vakavuna o koya me rawa nida rawata na bula tawamudu.

• Ena veidusimaki ni Kalou, sa bulia kina ko Jisu na vuravura.

• Na veika eda sotava e vuravura e kedra inaki me vukei keda meda vakarau meda lesu tale ki na iserau ni Kalou.

• Eda sa ivalavala ca kece sara, ka eda na mate kecega. Ni lomani keda na Kalou, sa tala mai kina na Luvena, ko Jisu Karisito, ki vuravura me vueti keda mai na ivalavala ca kei na mate.

• Na veika taucoko e sega ni dodonu me baleta na bula e rawa me vakadodonutaki mai na Veisorovaki i Jisu Karisito.

• Ni sa mate na yagoda vakayago, sa na tomani tiko na bula ni yaloda ena vuravura ni yalo. Eda na vakaturi cake tale mai na mate oi keda kece. Sa kena ibalebale oqo ni na cokoti vata tale na yalo kei na yago ni tamata yadua, ka da na bula me tawamudu na tamata yadua ena yago sa uasivi sara, ka sa tucake tale mai na mate.

• Nida vakaturi cake tale, ena qai noda turaganilewa ko Jisu Karisito. Ena vakavo walega e lewe vica, na luve ni Kalou taucoko ena ciqoma e dua na tikina ena dua na matanitu vakalagilagi. Eda rawa ni lesu tale ka laki bula ena iserau ni Kalou kevaka eda sa yalodina.