Iesu o loo Aoao Atu i le Itulagi i Sisifo (Ua Asiasi atu Iesu Keriso i le atu Amerika), na saunia e John Scott

Mataupu 5

Faaaoga le Mana o le Tusi a Mamona

Manatunatu i le Mea Lenei

• E faapefea ona avea le Tusi a Mamona ma maa‘au‘au o la tatou tapuaiga?

• Aisea ua avea ai le Tusi a Mamona ma vaega sili ona mamana i le faagasologa o le liuaina?

• O le a le mea ua aoao mai e le Tusi a Mamona e uiga ia Iesu Keriso?

• E mafai faapefea ona ou faaaogaina le Tusi a Mamona e fesoasoani ai ia te a’u lava ma isi ia latalata atili atu i le Atua?

• E faapefea ona talanoaina e le Tusi a Mamona ia fesili o le agaga?

• E mafai faapefea ona ou fesoasoani i tagata ia faitau ma maua se molimau o le Tusi a Mamona?

O le Tusi a Mamona, a tuufaatasi ma le Agaga, o lau punaoa sili lea ona malosi i le liuaina. O lenei tusi o se faamaumauga anamua, ma paia ua tusia e faatalitonu ai tagata uma o Iesu o le Keriso (tagai i le itulau autu o le Tusi a Mamona). E pei ona taua e lona vaeautu, o le Tusi a Mamona o se ‘Tasi Molimau ia Iesu Keriso.” O se faamaoniga faatauanau foi na valaauina e le Atua Iosefa Samita o se perofeta ma toefuatai mai le talalelei a Iesu Keriso e ala mai ia te ia.

faitotoa faaofuofu ma le maa’au’au

O Le Tusi a Mamona o le Maa’au’au o lo Tatou Talitonuga

Na aoao mai le Perofeta o Iosefa Samita o le Tusi a Mamona o le “maa ‘au‘au lea o lo tatou talitonuga” (faatomuaga i le Tusi a Mamona). Na ia saunoa mai i se tasi taimi: “A aveese le Tusi a Mamona ma faaaliga, o fea la e i ai lo tatou talitonuga? Ua leai se mea” (Aoaoga a Peresitene o le Ekalesia: Iosefa Samita [2007], 196).

O se faitotoa faaofuofu o se fausaga malosi e faia mai fasi tina-mamanu e faalagolago i le tasi ma le isi. O le vaega ogatotonu, po o le maa’au’au, e masani lava ona telē atu nai lo isi tina ma taofia uma isi.

Na saunoa Peresitene Ezra Taft Benson o le Tusi a Mamona o le maa’au’au o la tatou tapuaiga i ni auala se tolu:

Molimau ia Keriso. “O le Tusi a Mamona o le maaauau o la tatou molimau ia Iesu Keriso, o Ia lava o le maatulimanu o mea uma tatou te faia. O loo tauaveina ai le molimau o Lona moni i le mana ma le manino.”

Atoatoaga o Aoaoga Faavae. “Ua fetalai mai le Alii lava Ia o loo i le Tusi a Mamona le ‘atoaga o le talalelei a Iesu Keriso’ (Mataupu Faavae ma Feagaiga 20: 9; 27:5]. … “O loo maua i le Tusi a Mamona le atoatoa o [le aoaoga faavae] e manaomia mo lo tatou faaolataga. Ma o loo aoaoina i le manino ma faigofie le aoaoina mai lea e oo lava i fanau e mafai ona aoaoina auala o le faaolataga ma le faaeaga.”

Faavae o molimau. E faapei ona pa’ū le faitotoa faaofuofu pe a aveese le maa’au’au, e faapena foi le tū ma le pa’ū o le Ekalesia atoa ma le moni o le Tusi a Mamona. Ae a faapea ua moni le Tusi a Mamona … e tatau lava i se tagata ona ia talia talitonuga o le Toefuataiga.” (Aoaoga a Peresitene o le Ekalesia: Ezra Taft Benson [2014], 129, 131, 128.)

O le mauaina o se molimau o le Tusi a Mamona o le afioga a le Atua, e mafai ai ona tatou iloa o Iosefa Samita o se perofeta. Na toefuataiina mai le pule o le perisitua a le Atua e avefeau faalelagi, e ala mai ia te ia. Sa faatagaina foi e le Atua ia Iosefa e faatulaga le Ekalesia a Iesu Keriso. O loo faaauau pea faaaliga i aso nei e ala mai i perofeta soifua.

se alii talavou o loo faitauina tusitusiga paia

O le Tusi a Mamona e Taua i le Liua Patino

O se vaega taua o le liuaina o le mauaina lea o se molimau mai le mana o le Agaga Paia faapea e moni le Tusi a Mamona. A o e faitau ma suesue i ai ma le faamaoni, o le a e lagonaina o ona upu e faamalosia ai lou agaga. O ona upu o le a faamalamalamaina ai lou malamalama i le olaga, i le fuafuaga a le Atua, ma Iesu Keriso (tagai Alema 32:28). Tatalo e uiga i le tusi ma le manatu moni i ai ma le faatuatua ia Keriso. A o e faia, o le a e maua se molimau e ala i le Agaga Paia o le afioga ia a le Atua (tagai Moronae 10:4–5).

O lau lava molimau i le Tusi a Mamona e mafai ona taitai atu ai i se faatuatua loloto ma tumau i lona mana e fesoasoani ai i isi ia liua. Fesoasoani i tagata o loo e aoaoina ia iloa le malamalama latou te lagonaina a o latou faitauina ma le faamaoni. Faamamafa atu lana molimau mamana ia Iesu Keriso. Fautuaina i latou e tatalo ina ia maua a latou lava molimau e moni le tusi.

O le uunaia o tagata e saili se molimau mai le Agaga Paia e uiga i le Tusi a Mamona e tatau ona avea ma taulaiga autu o au aoaoga. E mafai e le Tusi a Mamona ona suia o latou olaga e faavavau.

Faaaoga le Tusi a Mamona e Aoao Atu ai le Talalelei a Iesu Keriso

Na saunoa le Perofeta o Iosefa Samita, “O le Tusi a Mamona [o] le tusi aupito sili ona sa’o i soo se tusi i luga o le fogaeleele” (faatomuaga i le Tusi a Mamona). O loo molimau mai e uiga ia Keriso ma o loo aoao manino mai ai Lana aoaoga faavae (tagai i le 2 Nifae 31; 32:1–6; 3 Nifae 11:31–39; 27:13–22). O loo aoao mai ai le atoaga o Lana talalelei. O uluai mataupu faavae ma sauniga o le talalelei e pei ona aoaoina i le Tusi a Mamona o le ala lea i se olaga faamanuiaina.

Faaaoga le Tusi a Mamona e fai ma au punavai autu mo le aoaoina atu o le talalelei toefuataiina. O le siata lenei o loo lisi atu ai nisi o upumoni i le Tusi a Mamona o le a e aoao atu.

Lesona a Faifeautalai i le Mataupu 3	Aoaoga Faavae	Punaoa Faasino
Lesona a Faifeautalai i le Mataupu 3 O Le Sāvali o le Toefuataiga o le Talalelei a Iesu Keriso	Aoaoga Faavae O le natura o le Atua, o le galuega a le Faaola ma le Togiola, o se pauu ese, Toefuataiga, Iosefa Samita, pule o le perisitua	Punaoa Faasino 1 Nifae 12–14 2 Nifae 3; 26–29 Mosaea 2–5
Lesona a Faifeautalai i le Mataupu 3 O Le Ata o le Faaolataga a le Tama Faalelagi	Aoaoga Faavae O le “fuafuaga sili a le Atua Faavavau,” e aofia ai le Pau o Atamu ma Eva, o le Togiola a Iesu Keriso, o le Toetu, ma le Faamasinoga	Punaoa Faasino 2 Nifae 2; 9 Mosaea 3; 15–16 Alema 12; 34:9; 40–42
Lesona a Faifeautalai i le Mataupu 3 O Le Talalelei a Iesu Keriso	Aoaoga Faavae Faatuatua ia Keriso, salamo, papatisoga, o le meaalofa o le Agaga Paia, ma le tumau e oo i le iuga	Punaoa Faasino 2 Nifae 31–32 3 Nifae 11; 27:13–22
Lesona a Faifeautalai i le Mataupu 3 Avea ma Soo o Iesu Keriso i le Olaga Atoa	Aoaoga Faavae Sauniga e pei o le papatisoga, faauuga i le perisitua, ma le faamanatuga	Punaoa Faasino 3 Nifae 11:22–28; 18 Moronae 2–6

Suesuega o Tusitusiga Paia

O le a le fetalaiga a le Faaola e uiga i le Tusi a Mamona?

• Mataupu Faavae ma Feagaiga 1:29; 3:19–20; 19:26–27; 20:5–16; 33:16; 42:12

• Mose 7:62

O Le Tusi a Mamona o loo Molimau mai ia Keriso

O le faamoemoega autu o le Tusi a Mamona o le molimau atu lea ia Iesu Keriso. E faamautu ai le moni o Lona soifuaga, misiona, toetu, ma le mana. O loo aoao mai ai aoaoga faavae moni e uiga ia Keriso ma Lana Togiola.

O nisi o perofeta e ona tusitusiga o loo teuina i totonu o le Tusi a Mamona, sa vaaitino lava ia Keriso. O le uso o Iareto, Nifae, ma Iakopo na vaai i le Keriso o le muai olaga. Na auai le motu o tagata i le galuega a le Faaola i tagata o sa Nifae (tagai i le 3 Nifae 11–28). Mulimuli ane, na vaai Mamona ma Moronae i le Keriso toetu ( tagai Mamona 1:15; Eteru 12:39).

A o faitau ma tatalo tagata e uiga i le Tusi a Mamona, o le a latou iloa atili le Faaola ma maua Lona alofa. O le a latou tuputupu ae i a latou molimau ia te Ia. O le a latou iloa le ala e o mai ai ia te Ia ma faaolaina. (Tagai i le 1 Nifae 15:14–15.)

Peresitene Russell M. Nelson

“Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e maua i soo se mea. O loo aoao mai ai le uiga moni o le toe fanauina. … Ua tatou iloa le mafuaaga ua tatou i ai iinei i le lalolagi. O upumoni nei ma isi upumoni e sili ona aoao atu ma le mamana ma le faatauanau i le Tusi a Mamona nai loo se isi lava tusi. O le mana atoa o le talalelei a Iesu Keriso o loo i ai i le Tusi a Mamona” (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” Liahona,Nov. 2017, 62).

Suesuega Faaletagata Lava Ia

I lau misiona atoa, tusi i totonu o lau tusi talaaga o suesuega ia tali i fesili nei:

• O le a se mea ua e aoaoina e uiga ia Iesu Keriso mai lau suesuega o le Tusi a Mamona?

• Na faapefea ona aafia lau molimau ia Iesu Keriso i lou suesueina o le Tusi a Mamona?

• E mafai faapefea ona e faaaogaina le Tusi a Mamona e fesoasoani ai i tagata e faamalolosia a latou molimau?

Suesuega o Tusitusiga Paia

O a mafuaaga na tuuina mai e perofeta o le Tusi a Mamona na tusia ai a latou tusi?

• 1 Nifae 6:4–6; 9:3–5

• 2 Nifae 4:15–16; 25:23–29; 26:15–16; 29:11–14; 33:13–15

• Iakopo 1:4–8; 4:1–6, 12

• Enosa 1:13

• Iaroma 1:2

• Ominae 1:25–26

• Upu a Mamona 1:3–8

• Alema 17:2, 14

• 3 Nifae 5:14–15

• Mamona 8:35

Suesuega a le Tagata Lava Ia pe Faalesoa

Ua tusia le Tusi a Mamona “i le faatalitonuina o [tagata uma] o Iesu o le Keriso” (itulau autu o le Tusi a Mamona). O le siata lenei o loo lisi atu ai nisi o mataupu o le Tusi a Mamona o loo molimau mai i le soifuaga, aoaoga, ma le galuega a Iesu Keriso. Filifili fuaitau e suesue ai i lau misiona atoa.

Ma le isi, mafaufau i manaoga o tagata o loo e aoaoina. Fai ni fuafuaga e faitau faatasi ma i latou nisi o nei fuaitau e faamalosia ai lo latou malamalama ma le molimau i le Faaola.

Itulau autu ma le faatomuaga	O loo faamanino mai ai le faamoemoega o le tusi.
1 Nifae 10–11	O loo molimau atu Liae ma Nifae i le Faaola.
2 Nifae 2; 9	Ua molimau atu Liae ma Iakopo ia Iesu Keriso ma Lana Togiola.
2 Nifae 31–33	O loo aoao atu e Nifae le aoaoga faavae a Keriso.
Mosaea 2–5	O loo aoao atu le Tupu o Peniamina ia Keriso.
Alema 5; 7	O loo molimau atu Alema e uiga i le Faaola.
Alema 36	Ua aafia Alema i le mana togiola o Keriso.
3 Nifae 9–10	O loo valaaulia e le Faaola tagata ina ia o mai ia te Ia.
3 Nifae 11–18	O loo aoaoina e le Faaola ia Sa Nifae e uiga i le Tama ma Lana aoaoga faavae.
3 Nifae 27	O loo aoao atu e le Faaola Lana talalelei.
Eteru 12	Ua aoao atu Eteru ma Moronae o le faatuatua ia Iesu keriso o se mataupu faavae o le faatinoga ma le mana.
Moronae 7–8	O loo aoao atu e Mamona le alofa mama o Keriso ma Lana Togiola.
Moronae 10	Ua valaaulia e Moronae tagata uma ina ia o mai ia Keriso ma ia faaatoatoaina ia te Ia.

Ua Fesoasoani le Tusi a Mamona ia Tatou Latalata Atili Atu ai i le Atua

E tusa ai ma le Tusi a Mamona, na saunoa le Perofeta o Iosefa Samita e faapea “o le a latalata atu se tagata i le Atua e ala i le usitaia o ona mataupu, nai lo soo se isi lava tusi” (faatomuaga i le Tusi a Mamona). O le tausisia pea o le valaauliaina o tagata ina ia ola i mataupu faavae o loo maua i totonu o le Tusi a Mamona, e te fesoasoani ai ia i latou e atiina ae le faatuatua ia Iesu Keriso ma faalatalata atu i le Atua.

O le Tusi a Mamona e fausia ai le molimau ma valaaulia ai faaaliga faaletagata lava ia. Faaaoga le Tusi a Mamona e fesoasoani ai i tagata ia maua ni aafiaga faaleagaga, aemaise lava se molimau mai le Agaga Paia e faapea o le tusi lava ia e moni.

Tuu atu le faamuamua i fuaitau o le Tusi a Mamona pe a e aoao atu. Ua ia i latou le mana e liua ai e ala i le Agaga Paia. Pe a e aoaoina atu le talalelei e faaaoga ai le Tusi a Mamona, o lau aoaoga o le a fesootai ma le mana ma le manino i le loto ma le mafaufau.

Na aoao mai Peresitene Gordon B. Hinckley: “O i latou o e ua faitauina [le Tusi a Mamona] ma le agaga tatalo, pe mauoa pe matitiva, pe atamamai pe leai, ua tuputupu a’e i latou i lona mana.” Na faaauau ona ia aoao mai:

“E aunoa ma le masalosalo ou te folafola atu ia te outou, afai o le a outou faitau ma le agaga tatalo i le Tusi a Mamona, e tusa lava pe ua faafia ona e faitauina muamua, o le a faapea ona oo atu i totonu o o outou loto se fuataga faaopoopo o le Agaga o le Alii. O le a oo mai se faaiuga malosi ina ia savali i le usiusitai i ana poloaiga, ma o le a oo mai se molimau malosi atu i le moni o le soifua o le Alo o le Atua” (O Le Mana o le Tusi a Mamona,” Ensign, Iuni 1988, 6).

Faifeautalai o loo faitauina tusitusiga paia

O Le Tusi a Mamona o loo Talanoaina ai Fesili o le Agaga

O le faitauina o le Tusi a Mamona faatasi ai ma le taitaiga a le Agaga e mafai ona fesoasoani i tagata e maua ai tali po o malamalamaaga i a latou fesili patino—po o fesili a le agaga. Fesoasoani i tagata ia iloa pe faapefea ona talanoaina e aoaoga i le Tusi a Mamona ia fesili o le olaga.

O nisi o nei fesili o loo lisi atu i lalo, faatasi ai ma mau faasino o le Tusi a Mamona o loo talanoaina ai.

• O i ai ea se Atua? O ai le Atua? (Mosaea 4:9; Alema 18:24–40; 22:4–23; 30:44)

• Pe silafia e le Atua a’u ma popole mo a’u? E faapefea ona e lagonaina Lona alofa? E faapefea ona ou lagona le latalata atili ia te ia?” (2 Nifae 26:24; Mosaea 4:9–12; Enosa 1:1–12; Alema 18:32; Moronae 10:32–33)

• O le a le faamoemoega o le olaga? (2 Nifae 2:25; Alema 34:32)

• Aisea e matua faigata tele ai le olaga i nisi o taimi? E mafai faapefea ona ou maua le malosi i taimi faigata? (1 Nifae 17:3; 2 Nifae 4:20–21; Alema 36:3; Eteru 12:27)

• E mafai faapefea ona ou maua le filemu i taimi o le faigata? (Mosaea 24:13–15; Helamana 5:47)

• E mafai faapefea ona ou fiafia atili? (Mosaea 2:41; Alema 22:15–16)

• E mafai faapefea ona avea a’u ma se tagata e sili atu ona lelei? (Mosaea 26:30–31; Alema 5:12–13; 7:23–24; Eteru 12:27)

• E faapefea ona ou lagonaina le faamagaloga a le Atua? (Enosa 1:2–8; Alema 36:17–21)

• O le a le mea e tupu pe a ou oti? (2 Nifae 9:3–6, 11–13; Alema 11:42–44; 40:11)

Ua tuuina mai foi e le Tusi a Mamona le taitaiga e uiga i isi fesili taua, e pei o le:

• E mafai faapefea ona ou saofaga atu i le manuia faaleagaga o lo’u aiga? (1 Nifae 1:1; 8:36–38; Mosaea 2:5–6; 4:14–15; 3 Nifae 18:21)

• E mafai faapefea ona ou fesoasoani i la’u fanau e fausia le malosi e tetee atu ai i faaosoosoga? (1 Nifae 15:23–25; Helamana 5:12; 3 Nifae 18:15, 18–21, 24–25)

• E mafai faapefea e le usitai i poloaiga a le Atua ona fesoasoani ia te a’u ia maua se olaga e sili atu le fiafia, ma sili atu ona faamanuiaina? (2 Nifae 2:25–28; 4:35; Mosaea 2:41; 4 Nifae 1:15–18)

Peresitene Dallin H. Oaks

“E tatau i faifeautalai ona iloa le auala e faaaoga ai le Tusi a Mamona e tali ai a latou lava fesili ina ia mafai ai ona latou faaaogaina ma le mataalia e fesoasoani ai i isi ia aoao e faia lea lava mea e tasi. … E tatau ona latou teulotoina le mana o le Tusi a Mamona i le aoaoina atu o le talalelei toefuataiina, muamua e ala i le faaaogaina i o latou lava olaga ona faasoa atu lea ia i latou o loo latou aoaoina” (Dallin H. Oaks, “Counsel for Mission Leaders,” seminar for new mission leaders, June 25, 2022).

Suesuega a le Tagata Lava Ia pe Faalesoa

Lisi ni fesili o le agaga o loo ia te oe pe ua e faalogo foi i ai mai isi. Sue fuaiupu i le Tusi a Mamona e fesoasoani e talanoaina ai nei fesili. Tusi manatu ma mau faasino o le Tusi a Mamona i lau api talaaga mo suesuega. Faaaoga a o e aoao atu.

O Le Tusi a Mamona ma le Tusi Paia e Lagolago e le Tasi le Isi

Na fetalai le Alii ia “aoao atu mataupu faavae o la’u talalelei, o i ai i le Tusi Paia ma le Tusi a Mamona, e i ai le atoatoa o le talalelei” (Mataupu Faavae ma Feagaiga 42:12). O le Au Paia o Aso e Gata Ai e “talitonu o le Tusi Paia o le afioga a le Atua i mea uma ua tonu ona faaliliuina” (Mataupu Faavae o le Faatuatua 1:8; tagai foi 1 Nifae 13:29). O le Tusi Paia o se tusitusiga paia. O le Tusi a Mamona o se soa o tusitusiga paia o loo i ai le atoaga o le talalelei a Iesu Keriso.

O le Tusi Paia ma le Tusi a Mamona e faaatoatoa ma faatamaoaigaina e le tasi le isi (tagai Esekielu 37:16–17; 1 Nifae 13:40; Mamona 7:8–9). O ia voluma e lua o tusitusiga paia o se tuufaatasiga o aoaoga e pei ona tusifaamaumauina ai e perofeta anamua. O loo faamatala mai i le Tusi Paia ia fegalegaleaiga a le Atua ma tagata i le Itulagi i Sasae mo le faitau afe o tausaga. O loo faamatala mai i le Tusi a Mamona ia fegalegaleaiga a le Atua ma tagata i Amerika anamua mo le silia ma le afe tausaga.

tagata o loo faailogaina mau

O le mea e sili ona taua, o le Tusi Paia ma le Tusi a Mamona e faaatoatoa e le tasi le isi i le molimauina o Iesu Keriso. O loo maua i le Tusi Paia le tala i le soifua mai o le Faaola, galuega i le olaga nei, ma le Togiola—e aofia ai Lona maliu ma le Toetu. O le Tusi a Mamona o loo aofia ai valoaga o le soifua mai ma le misiona a le Faaola, aoaoga e uiga i Lana Togiola, ma le tala o Lana galuega i Amerika. O le molimau a le Tusi a Mamona e faamautuina ai le molimau a le Tusi Paia faapea o Iesu o le Alo e Toatasi na Fanaua e le Atua, ma le Faaola o le lalolagi.

Ua aoao mai e le Tusi Paia ma le Tusi a Mamona le tulafono o molimau: “O fofoga o molimau e toalua pe toatolu e faamautu ai upu uma” (2 Korinito13:1; tagai foi 2 Nifae 11:2–3). O le ogatusa ai ma lenei tulafono, o tusi uma o tusitusiga paia e molimau ia Iesu Keriso (tagai i le 2 Nifae 29:8).

Suesuega a le Tagata Lava Ia pe Faalesoa

Ia sue mau e faamaonia ai ia autu nei i totonu o le Tusi a Mamona ma le Tusi Paia. O faataitaiga o loo tuuina atu i totonu o puipui pe a uma ia autu taitasi. Faaopoopo au oe lava autu ma fuaitau.

• Perofeta (Iakopo 4:4–6; Amosa 3:7)

• Liliuese (2 Nifae 28; 2 Timoteo 4:3–4)

• Toefuataiga (1 Nifae 13:34–42; Galuega 3:19–21)

• O i tatou uma o fanau a le Atua (1 Nifae 17:36; Galuega 17:29)

Fesoasoani i Tagata e Faitau ma Malamalama i le Tusi a Mamona

O i latou o e le faitauina pe le malamalama i le Tusi a Mamona, o le a faigata lava ona maua se molimau i lona moni. E mafai ona e fesoasoani ia latou malamalama i le tusi e ala i le faitauina faatasi ma i latou. Faitau i le taimi o se taimi faatulagaina mo le aoaoina atu, i le taimi o se asiasiga tulitatao, po o tekinolosi. E mafai foi ona e faatulagaina ni tagata o le ekalesia e faitau faatasi ma tagata sailiili. O le matamata i se vitiō o le Tusi a Mamona ona faitau lea o mataupu e fesootai i ai e mafai ona fesoasoani tele.

Tatalo mo le fesoasoani a o e filifilia ia fuaitau e tali atu ai i o latou popolega ma faafitauli. Faitau ma talanoaina fuaitau pupuu, e pei o le 1 Nifae 3:7 po o le Mosaea 2:17. Ia faitau foi ma talanoaina fuaitau uumi po o mataupu atoa, e pei o le 2 Nifae 31, Alema 7, po o le 3 Nifae 18. Ia uunaiina tagata ina ia faitau le Tusi a Mamona mai le amataga, e aofia ai ia mau a molimau e Toatolu ma Molimau e Toavalu ma le molimau a le Perofeta o Iosefa Samita.

Vasega o le aoga sa

Mafaufau i fautuaga nei a o e faitauina le Tusi a Mamona ma tagata:

• Tatalo a o le’i faitauina. Fesili mo se fesoasoani e malamalama ai. Tatalo ina ia molimau atu le Agaga Paia ia i latou e moni.

• Ia auaua’i e faitau. Faitau i se saoasaoa latou te maua ai le toafimalie. Ia faamalamalama atu ni upu ma ni fuaitau e lē masani ai.

• Taofi mai lea taimi i lea taimi e talanoaina mea na faitauina.

• Faamatala le talaaga ma le matalalaga o le fuaitau, e pei o le tagata o loo tautala, pe faapei le tagata, ma pe o le a foi le tulaga o i ai. Afai o i ai se vitiō talafeagai o le Tusi a Mamona, mafaufau e faaali atu.

• Faailoa atu sāvali po o aoaoga faavae autu e vaavaai i ai.

• Faasoa atu lau molimau ma manatu talafeagai, lagona, ma aafiaga patino.

• Aoao sa’o atu aoaoga faavae mai upu a perofeta o le Tusi a Mamona. O le a fesoasoani lea i tagata e lagona ai le mana faaleagaga o le tusi.

• Fesoasoani i tagata ia “faatatau” mea latou te faitauina i o latou lava olaga (1 Nifae 19:23). Fesoasoani ia latou iloa pe faapefea ona talafeagai tusitusiga paia ia i latou lava ia.

A o e faaaogaina nei mataupu faavae, o le a e fesoasoani i tagata e atiina a’e le tomai ma le manao e faitau e i latou lava le Tusi a Mamona. Faamamafa atu o le faitauina o le tusi i aso taitasi o se ki lea i le agai i luma i le papatisoga ma le liua i le olaga atoa.

Faalagolago i le folafolaga o loo i le Moronae 10:3–5. Uunaia tagata e faitau ma le faamaoni le Tusi a Mamona ma ia tatalo ma le manatu moni i ai ia iloa e moni. Faamalamalama atu o le faamoemoega moni o lona uiga o le naunau e faatino le tali latou te maua e ala i le Agaga Paia. O tagata uma lava e faitau ma tatalo ma le faamaoni e uiga i le Tusi a Mamona e mafai ona iloa moni e ala i le mana o le Agaga Paia.

E tatau foi ona e faaaogaina lenei folafolaga i taimi uma ina ia faamalosia ai lau lava molimau i le Tusi a Mamona. O lau molimau o le a e maua ai le mautinoa o i latou o e faaaogaina lenei folafolaga o le a maua se molimau o le tusi o le afioga a le Atua.

Faaaoga le Tusi a Mamona i Vaega Uma o Lau Galuega

O le Tusi a Mamona o se punaoa mamana i le liuaina. Ia faaaoga e avea ma au punavai autu o le aoaoina atu o le upumoni toefuataiina. Na saunoa mai Peresitene Russell M. Nelson:

“E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai ma se isi mea o loo manino ma mamana atili ai le aoaoina o na upumoni nai lo le Tusi a Mamona. …

“A ou mafaufau i le Tusi a Mamona, ou te mafaufau i le upu mana. O upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga” (“O Le Tusi a Mamona: Faamata e Faapeī Lou Olaga e Aunoa Ma Ia?” 61, 62).

Pe a faitauina le Tusi a Mamona ma tagata, faasoa atu lau molimau i le mana faaleagaga na e lagonaina a o e faitauina. Faamamafa atu le taua o lana molimau ia Iesu Keriso ma Lana Togiola. Faasoa atu fuaitau e mafai ona fesoasoani i tagata e lagona ai le alofa o lo latou Faaola. Fesoasoani ia latou iloa pe mafai faapefea ona latou iloa atili le Faaola e ala i ona itulau.

Faitau fuaitau o le a siitia ma faamalolosia ai tagata. Taulai atu i o latou manaoga. Faasoa atu ni faataitaiga o auala e faatatau ai aoaoga o loo i le Tusi a Mamona i o tatou olaga i aso nei.

Manatua le Mea Lenei

• O le Tusi a Mamona o le maa ‘au‘au o la tatou molimau ia Keriso, o la tatou aoaoga faavae, ma a tatou molimau.

• O le Tusi a Mamona o loo manino ona aoao mai ai ia aoaoga faavae o loo maua i lesona a faifeautalai.

• O loo talanoaina e le Tusi a Mamona ia fesili o le agaga.

• Faitau e lē aunoa mai le Tusi a Mamona ma tagata o loo e aoaoina. Fesoasoani ia i latou e faitau na o i latou lava i aso uma ma faaaoga mea ua latou aoaoina.

• Faalagolago i le folafolaga a le Alii e faapea o tagata uma lava o e faitau ma le faamaoni ma tatalo e uiga i le Tusi a Mamona o le a iloa lona moni e ala i le mana o le Agaga Paia.

---

Manatu mo le Suesue ma le Faaaogaina

Suesuega Faaletagata Lava Ia

• Faitau le 2 Nifae 2; 9; 30; 31; 32. Valivali mau taitasi ia Iesu Keriso. Ia fai se lisi o igoa po o suafa eseese mo Keriso o loo faaaogaina i nei mataupu. Maka Ana upu na fetalai ai. Ia faailoga Ona uiga ma faatinoga.

• A o e faitau i aso taitasi mai le Tusi a Mamona, ia tusi i totonu o lau tusi talaaga o suesuega ia fuaitau na i ai ni uiga faapitoa ia oe. Ia tusi pe o le a faapefea ona e faaaogaina i lou olaga.

• Tusi i totonu o lau tusi talaaga o suesuega ou lagona ina ua e faatoa mauaina se molimau faaleagaga i le moni o le Tusi a Mamona.

• Tusi fesili nei e tolu i totonu o lau api faamaumau o suesuega: I le aluga o lau misiona, faaopoopo tali i fesili nei.

  • Faamata e faapeī lou olaga e aunoa ma le Tusi a Mamona?

  • O le a se mea o le a ou le iloa e aunoa ma le Tusi a Mamona?

  • O le a se mea semanu ou te le mauaina pe ana leai le Tusi a Mamona?

• Faitau le Lauga i luga o le Mauga i le Mataio 5–7 ma le lauga a Keriso i le malumalu i le 3 Nifae 12–14. E faapefea ona fesoasoani le faitauina faatasi o nei mau ia te oe e malamalama atili ai i aoaoga a le Faaola?

• Suesue tulaga taitasi i le Tusi a Mamona e faasino i se tasi o tatalo. I lau api talaaga mo suesuega, tusi ai mea ua e aoaoina mai le Tusi a Mamona e uiga i le tatalo.

• Mai ulutala o mataupu o le Mosaea 11–16, tusi se aotelega o mea na aoao atu e Apinati. Ona faitau lea o mataupu nei ma faalautele lau aotelega.

• Mai ulutala o mataupu o le Mosaea 2–5, tusi se aotelega o mea na aoao atu e le Tupu o Peniamina. Ona faitau lea o mataupu nei ma faalautele lau aotelega.

Suesuega Faalesoa ma le Felafolafoaiga Faalesoa

• Faitau faatasi ia fuaitau o le Tusi a Mamona. Ia fetufaa’i mea na oulua aoaoina ma lagonaina. Talanoaina pe o le a faapefea ona e faaaogaina i lou olaga.

• Faitau faatasi le Alema 26 ma le 29. Faasoa atu po o a ni ou lagona i lau misiona. Tusi ou lagona i totonu o lau tusi talaaga o suesuega.

• Faitau le Alema 37:9 ma talanoaina po o le a se taua o tusitusiga paia ia Amona ma ona uso faifeautalai. Saili ia mau o loo faamatalaina ai le auala na latou faaaoga ai ia tusitusiga paia.

• Faitau le Alema 11–14, ia ave e le tasi le matafaioi a Alema po o Amoleka ae o le isi e fai ma taufaaleaga. Ia talanoaina le auala na tali atu ai nei faifeautalai i fesili faigata.

Aufono a le Itu, Konafesi Faalesone, ma le Aufono a Taitai o le Misiona

• Faataitai ona faaaoga le Tusi a Mamona i auala uma taitasi o loo ta’ua i ulutala autu o lenei mataupu.

• Lisi fesili na tuuina mai e i latou o loo e aoaoina. Ia faamalamalama atu i le isi le auala e te tali atu ai i nei fesili e faaaoga ai le Tusi a Mamona.

• Faitau faatasi ia fuaitau o le Tusi a Mamona. Ia fetufaai atu le malamalama, o lagona, ma molimau.

• Faataitai le faaaogaina o le Tusi a Mamona e faamautu ai le sāvali o le Toefuataiga.

• Ia valaaulia faifeautalai e faamatala atu ni aafiaga na fesoasoani ai le Tusi a Mamona ia i latou ma tagata sailiili i le gasologa o le liuaina.

• Tuu atu i faifeautalai e faasoa mai se mau e fiafia i ai o le Tusi a Mamona e fesoasoani e talanoaina ai se fesili o le agaga.

• Valaaulia se tagata o le ekalesia o se tagata liliu mai e faasoa atu le matafaioi o le Tusi a Mamona i lona liua.

Taitai Misiona ma Fesoasoani o le Misiona

• Aoao ia faifeautalai i le auala e faaaoga ai le Tusi a Mamona e faamautu ai le moni o le sāvali o le Toefuataiga.

• Faitau faatasi ma faifeautalai le 1 Nifae 1 ma faatusatusa i le aafiaga na oo i ai Iosefa Samita.

• Ia saunia se Tusi Mamona mama ma vaivai le faavaa mo faifeautalai. Valaaulia i latou e faitau ma faailoga faalua le tusi i le aluga o isi periota e lua pe tolu o le siitaga e sosoo ai.

  • I le faitauga muamua, fai atu ia i latou e faailoga mea uma e faasino i ai pe molimau atu ai ia Iesu Keriso.

  • I le faitauga lona lua, fai atu ia i latou e faailoga aoaoga faavae ma mataupu faavae o le talalelei.

  Tuu atu i faifeautalai e faasoa mai mea sa latou aoaoina ma lagonaina. Sa faamatala e Elder Ronald A. Rasband le ala na aafia ai o ia o se faifeautalai i le faitauina o le Tusi a Mamona i lenei ala:

Elder Ronald A. Rasband

“Sa matuai tele atu isi mea i la’u faitauga nai lo le na ona faailogaina o mau. O faitauga taitasi o le Tusi a Mamona, mai luma i tua, sa faatumuliaina ai au i se alofa maoae mo le Alii. Sa ou lagonaina se molimau ua matuai maua’a o le moni o Ana aoaoga ma le ala e faaaoga ai “i le asō.” E fetaui lelei lenei tusi ma lona faaulutala, “O Se Tasi Molimau ia Iesu Keriso.” Faatasi ai ma lena suesuega ma le molimau faaleagaga na mauaina, sa avea ai au o se faifeautalai o le Tusi a Mamona, ma se soo o Iesu Keriso.” (“I Le Aso,” Liahona, Nov. 2022, 25

• Valaaulia faifeautalai e faasoa atu ia te oe ni mau o le Tusi a Mamona na taua i o latou olaga.

• Ia faailoa atu fesili o le agaga mo tagata i lau misiona. Valaaulia faifeautalai e sue ni fuaiupu i le Tusi a Mamona e fesoasoani e talanoaina ai nei fesili.