Kuv yuav ua li cas kom muab siab rau ntseeg Khetos kom nrhiav tib neeg rau kuv qhia?
Peb yuav ua li cas kom txawj pom kev dav dua ntxiv thiab npaj zoo dua kom nrhiav neeg rau peb qhia?
Kuv yuav ua li cas kom muaj peev xwm thiab ua siab loj ntxiv nrog tib neeg uas kuv ntsib sib tham txhua hnub?
Peb yuav ua li cas kom koom siab nrog cov mej zeej qhia txog txoj moo zoo?
Peb yuav tsum ua dab tsi thaum peb txais ntawv xa peb mus qhia lwm tus?
Muaj tej lub tswv yim twg txog kev nrhiav tau neeg rau peb qhia uas peb tseem tsis tau ua?
Tus Cawm Seej uas sawv rov los tau qhia Nws cov thwj tim, “Yog li ntawd, nej cia li tawm mus qhia txhua haiv neeg hauv qab ntuj no, kom lawv los ua kuv cov thwj tim: Nej yuav tsum tuav Leej Txiv, Leej Tub thiab [tus] Vaj Ntsuj Plig Dawb Huv lub npe, muab lawv ua kev cai raus dej” (Mathais 28:19; kuj saib Malakaus 16:15). Tus Tswv tau rov qab txib peb niaj hnub nim no, hais tias, “Nej cia li mus thoob plaws lub ntiaj teb [thiab] tshaj tawm txoj moo zoo” (Lus Qhuab Qhia thiab Kev Khi Lus 68:8; kuj saib 50:14).
Cov tub txib txoj hauj lwm yog kev nrhiav tau neeg, kev qhia lawv, thiab pab lawv npaj ua kev cai raus dej. Koj yuav ua raws li tus Tswv txoj lus txib kom qhia Nws txoj moo zoo thiab muab neeg uas hloov siab los ntseeg ua kev cai raus dej thaum koj “nrhiav tau cov uas txais yuav [koj]” (Lus Qhuab Qhia thiab Kev Khi Lus 42:8). Ua tsis taus cov tub txib txoj hauj lwm mus txog thaum koj nrhiav tau neeg qhia lawm xwb. Saib ntsoov txhua lub sij hawm seb puas muaj cib fim qhia neeg txog txoj moo zoo. Kawm kom siv tej yam uas ntxim ua hauv koj cheeb tsam.
Yeej yog ib qho tseem ceeb heev kom nrog cov mej zeej ua hauj lwm nrhiav tau neeg. Khwv ua hauj lwm kom lawv tso siab rau koj. Thaum cov mej zeej tso siab rau cov tub txib, ces lawv haj yam yuav xav caw lawv cov phooj ywg thiab tsev neeg ntsib nej. Cov neeg no haj yam yuav hloov siab los ntseeg tus Tswv, ua kev cai raus dej, thiab taug txoj kev ua raws li txoj moo zoo.
Yeej yuav nrhiav tau neeg npaum li lawv npaj siab xav mloog txog txoj moo zoo. Lub sij hawm los nyias yuav txawv nyias. Koj nrhiav tau neeg thawj zaug sib ntsib los sis tom qab sib ntsib ntau zaus rau ib lub sij hawm ntev zog. Neeg coob ntsib cov tub txib los sis lub Koom Txoos cov mej zeej ob peb zaug ua ntej lawv pib kawm txog txoj moo zoo tiag tiag. Tsis txhob tos kom rov qab nrog lawv tham.
Koj txoj kev ua hauj lwm kom nrhiav tau neeg los tej zaum yuav txais nqi zog tom qab koj hloov cheeb tsam los sis tom qab koj tau ua tub txib tiav lawm. Txawm yog lub sij hawm twg los sis tus neeg txiav txim li cas los, tus Tswv zoo siab rau koj txoj kev ua hauj lwm.
Tshooj no qhia txog tej ntsiab cai thiab tej lub tswv yim kom pab koj nrhiav tau neeg. Tej ntsiab cai los yeej zoo rau txhua tus siv. Tiam sis, cov tub txib thiab qhov chaw tshaj tawm txoj moo zoo cov thawj coj los tej zaum yuav tsum muab hloov kho raws li lawv tej xwm txheej.
Muab Siab rau Ntseeg Kom Nrhiav Tau Neeg rau Koj Qhia
Koj ua hauj lwm qhov twg los, tus Tswv tau hu koj los ua hauj lwm “rau txoj kev cawm cov neeg dim” (Lus Qhuab Qhia thiab Kev Khi Lus 100:4). Xwv kom ua li no, koj yuav tsum muab saib rau ntseeg Khetos kom nrhiav tau neeg rau koj qhia lawv thiaj li xaiv tau kom coj raws li Nws thiab ua kev cai raus dej.
Kev ntseeg yog ib lub ntsiab cai ntawm kev muaj peev xwm thiab hwj chim. Cia li ntseeg tias tus Tswv npaj tib neeg kom txais tau txoj moo zoo uas txum tim rov qab los. Cia li ua siab ntev ntseeg tias Nws yuav coj koj mus rau lawv, los sis coj lawv los rau koj. Cia li ua raws li koj txoj kev ntseeg kom cuab hom phiaj, npaj kev, thiab ua raws li koj tau npaj kom nrhiav neeg rau koj qhia (saib tshooj 8).
Daim Duab
ob tug tub txib thov Vajtswv
Muaj kev ntseeg thov Vajtswv thaum koj nrhiav Vajtswv txoj kev pab kom nrhiav tau tib neeg rau koj qhia. Thaum Amas ua tub txib tus thawj coj mus rau cov neeg Xaulas, nws tau thov hais tias: “Auj tus Tswv es, thov koj pub rau peb kom peb yuav muaj kev vam meej los ntawm txoj kev coj lawv rov qab los cuag koj los ntawm Khetos los. Saib seb, auj tus Tswv es, lawv tus ntsuj plig yeej muaj nqis … ; yog li ntawd, auj tus Tswv es, muab hwj chim thiab laj lim tswv yim rau peb xwv kom peb yuav coj tau, peb cov kwv tij no, rov qab los rau koj (Amas 31:34–35).
Cov neeg uas koj ntsib feem ntau tsis paub hais tias lawv nrhiav txoj moo zoo mus txog thaum lawv nrhiav tau lawm. Piv txwv hais tias, ib tug neeg hloov siab los ntseeg hais tias, “Thaum kuv hnov txog txoj moo zoo, twb puv ib lub qhov hauv kuv lub siab uas kuv tsis tau paub tias kuv muaj” Lwm tus hais tias, “Kuv nrhiav tau ib qho uas kuv tsis tau paub tias kuv nrhiav.” Lwm tus nrhiav qhov tseeb tiam sis tsis paub yuav nrhiav tau nyob qhov twg (saib Lus Qhuab Qhia thiab Kev Khi Lus 123:12).
Nrhiav tus Ntsuj Plig txoj kev coj koj mus thaum koj nrhiav tib neeg rau koj qhia. Kev mloog tus Ntsuj Plig lus kom nrhiav tau neeg yeej tseem ceeb npaum li kev qhia raws li tus Ntsuj Plig. Cia li ntseeg tias koj yuav paub ua li cas kom nrhiav tau cov neeg uas yuav txais yuav koj.
Kev Kawm Ntawv Nrog tus Khub
Tej zaum muaj mej zeej hauv koj cheeb tsam uas tau hloov siab los ntseeg lub Koom Txoos. Thov seb lawv tau ua li cas kom paub txog lub Koom Txoos. Tej zaum tej yam uas lawv teb yuav pab koj tawm tswv yim kom paub nrhiav tau neeg. Thov seb lawv tau ua li cas kom paub cov tub txib uas qhia qhov tseeb rau lawv. Sau ntsiab lus txog tej yam uas lawv hais nyob hauv koj phau ntawv ceev txog kev kawm.
Kev Kawm Vaj Lug Kub
Tau ua li cas kom npaj thiab coj Vajtswv cov me nyuam los rau txoj moo zoo uas tau muab txum tim rov qab los?
Thaum koj nrhiav neeg rau koj qhia, cia li nco ntsoov txog qhov uas kev teem sij hawm thiab kev npaj kev tsis zoo ib yam. Kev teem sij hawm yog kev teem tej kev sib ntsib kom puv ib hnub thiab sau rau hauv koj phau npaj kev. Kev npaj kev yog kev thov Vajtswv kom pab koj siv zog tsom ntsoov rau tib neeg thiab tej kev zoo tshaj plaws kom nrhiav tau lawv.
Yam ntxim ua uas yog lawm, thaum lub sij hawm yog thiab nyob hauv qhov chaw yog, yeej pab tau koj nrhiav tau neeg rau koj qhia. Nug koj tus kheej tej lus nug no:
Wb yuav mus qhov twg kom ntsib cov neeg uas tus Tswv npaj?
Qhov twg yog qhov chaw zoo tshaj thiab tej yam ntxim ua twg zoo tshaj kom nrhiav tau neeg nyob rau tej lub sij hawm thaum nruab hnub los sis hauv ib lub lim tiam?
Wb yuav ua li cas kom hlub lawv, pab lawv, los sis muab tej yam uas muaj nqis rau lawv lub neej tam sim no?
Wb yuav ua li cas kom siv zog, siv txuj ci, thiab siv rab peev xwm kom txhawb nqa lawv?
Wb npaj ua dab tsi yog tias muaj ib txoj kev npaj uas ua tsis taus?
Sim pom tej kev uas tus Tswv siv kom npaj tib neeg. Lawv puas txaus siab nrog koj tham? Lawv puas nrhiav kev pab los sis kev nplij siab?
Cia li xav txog tej kev siv zog uas ua rau koj nrhiav tau neeg. Twb pib sib tham nyob qhov twg? Puas tau koom tes nrog cov mej zeej? Puas tau siv txuj ci technology?
Pib npaj kev tsom ntsoov rau qhov uas koj yuav ua li cas kom foom koob hmoov rau tib neeg, ces yuav yooj yim teem sij hawm rau tej ntawd.
Kev Kawm Ntawv Nrog tus Khub
Nrog koj tus khub, siv daim phiaj nram qab no kom ntsuas seb neb siv zog zoo npaum li cas kom nrhiav tau neeg rau neb qhia. Npaj kev sim tej lub tswv yim ib txhia uas tshiab rau neb.
Kev Siv Zog Nrhiav Neeg
Tej lub Sij Hawm
Ntau Zaus
Yuav Luag Txhua Zaus
Wb kawm txog cov mej zeej thiab txhawb nqa lawv thaum lawv siv zog qhia txoj moo zoo, tsis hais cov mej zeej tshiab, cov tub hluas ntxhais hluas, cov uas npaj mus ua tub txib, cov tub txib uas tab tom rov qab los, tsev neeg uas tsis yog mej zeej tag nrho, thiab cov txiv neej uas tseem tsis yog txwj laug.
Wb ua hauj lwm kom cov mej zeej ntseeg wb lawv thiaj li yuav txaus siab caw lawv tsev neeg thiab phooj ywg nrog wb sib ntsib.
Wb ua hauj lwm nrog pawg ntseeg cov thawj coj hauv tej kev sib ntsib koom tes txhua lub lim tiam uas txhawb nqa peb txoj kev siv zog nrhiav neeg thiab nug seb puas muaj neeg uas wb ntsib tau.
Wb ua hauj lwm nrog cov neeg uas wb tab tom qhia, cov neeg uas tau qhia dhau los, thiab cov neeg uas txais ntawv xa kom mus xyuas lawv.
Wb nrog neeg coob tham ntau npaum li wb hais tau txhua hnub.
Wb xav tias wb yuav tsum ua li cas kom pab cov neeg uas wb ntsib hnov tus Vaj Ntsuj Plig Dawb Huv lub hwj huam.
Wb cuab hom phiaj txhua lub lim tiam thiab txhua hnub kom nrhiav tau neeg (saib tshooj 8).
Wb nrhiav neeg rau wb qhia txhua lub sij hawm.
Wb txawj tsim tej kev tshiab thiab siv ntau yam kom nrhiav tau neeg. Wb sim ua tej yam tshiab thiab tsis txhob lam ua qhov qub tas li.
Wb npaj kom nrhiav tau neeg. Wb npaj txog qhov uas wb yuav nyob qhov twg, ua thaum twg, thiab ua li cas kom tsom ntsoov.
Wb xav txog tej qhov chaw twg thiab thaum twg yuav yog lub sij hawm zoo tshaj kom nrhiav neeg rau wb qhia.
Wb xav txog tej kev nrhiav tau neeg twg dhau yog tej kev zoo.
Wb hloov tej yam uas tau npaj kom nrhiav tau neeg yog yuav tsum ua thiab muaj tej kev npaj uas txhawb nqa yog tias tsis sib ntsib raws li tau teem sij hawm ua.
Peb teb sai sai thaum xa ntawv thov nyob online thiab txais zaj lus los ntawm tib neeg uas tej zaum xav kawm.
Wb npaj wb tej kev sau ntawv saum huab cua ua ntej thiab nrog cov mej zeej ua hauj lwm kom nrhiav tau neeg nyob online.
Rau Siab Nrhiav Neeg
Nrhiav Neeg Tsis Tu Tsis Tseg
Thaum nyuam qhuav muab lub Koom Txoos txum tim rov qab los, tus Tswv tau qhia ib pawg kwv tij ntau zaus kom lawv mus qhia Nws txoj moo zoo “thaum taug kev mus.” Nws xav kom lawv siv txhua lub cib fim kom qhia txog txoj moo zoo. (Saib Lus Qhuab Qhia thiab Kev Khi Lus 52:9–10, 22–23, 25–27.)
Siv tej lus qhia no thaum koj nrhiav neeg. Rau siab nrhiav tau neeg kom mus txhua hnub. Npaj rau koj txoj kev siv zog nrhiav tau neeg—thiab saib puas muaj tej lub cib fim uas tsis tau npaj ua ntej. Kev nrhiav cov neeg tshiab yog ib yam uas yuav tsum ua txhua lub sij hawm.
Nrhiav kom txais kev tshoov siab thiab txaus siab siv ntau yam txoj kev. Tsom ntsoov rau tej kev uas yeej ntxim ua hauv koj cheeb tsam.
Daim Duab
Khetos Hu Petus thiab Adales, los ntawm James Taylor Harwood
Cia Hlua Nyob hauv Dej Tas Li
Hais txog cov tub txib txoj hauj lwm, Thawj Tswj Hwm Dallin H. Oaks hais tias:
“Peb txhua tus yuav tsum tsis txhob ua li neeg nuv ntses uas xav tias nws twb nuv ntses tas ib hnub tiam sis tiag tiag nws twb siv sij hawm feem ntau kom mus mus los los, noj su, thiab lam kho nws tej cuab yeej. Kev nuv ntses yeej nyob ntawm seb nej txoj hlua nyob hauv dej ntev npaum li cas, tsis yog qhov uas nej tsis nyob hauv tsev ntev npaum li cas. Cov neeg nuv ntses ib txhia tsis nyob hauv tsev ntev li kaum ob teev thiab tso lawv txoj hlua hauv dej ntev li kaum teev. Lwm tus neeg nuv ntses tsis nyob hauv tsev ntev li kaum ob teev thiab tso lawv txoj hlua hauv dej ntev li ob teev xwb. Cov neeg nuv ntses zoo li no ntshe lawv xav tias yog vim li cas lawv tsis tau ntses npaum li lwm tus.
Lub ntsiab cai no yeej hais txog cov tub txib thiab, tus uas tus Xib Hwb hais tias yog cov uas ‘paub mus nrhiav neeg’ [Mathais 4:19]. Ib tug tub txib yuav tsum tso nws txoj hlua hauv lub pas dej nuv ntses thaum tib lub sij hawm uas nws tawm nws lub tsev” (zaj lus rau tej qhov chaw tshaj tawm txoj moo zoo cov thawj tswj hwm tshiab, Rau Hli Ntuj 20, 2000).
Daim Duab
tej pas nuv ntses
Txwj Laug Quentin L. Cook twb piav txog qhov no. Ntxiv rau qhov uas nws qhia kom tso yus “txoj hlua rau hauv dej” rau lub sij hawm ntev, nws kuj qhia tias cov tub txib uas nrhiav tau neeg rau lawv qhia “lawv yeej tso ob peb txoj hlua rau hauv dej. …
“Lawv xaiv thiab mus xyuas tej tsev neeg uas tsis yog mej zeej tag nrho.
“Lawv nrhiav hauv lawv [qhov app Qhia Kuv txoj Moo Zoo] seb puas muaj neeg uas tau qhia yav tas los kom hu xov tooj thiab ntaus ntawv rau lawv.
“Lawv ua hauj lwm pab cov mej zeej, cov neeg uas cov tub txib qhia yav tas los, cov neeg uas lawv tab tom qhia, thiab cov neeg hauv zej zog. …
“Lawv pab cov mej zeej tsim tej zaj lus txog txoj moo zoo kom faib rau lwm tus hauv … kev sib tham saum huab cua.
Neb yuav siv txuj ci technology no kom pab neb tso ob peb txoj hlua nyob hauv dej?
Nrog Txhua Tus Tham
Cia li hloov siab kom xav xav coj neeg los cuag Yexus Khetos (saib Mauxiyas 28:3). Thaum koj muaj lub siab xav li no, yeej yuav pom koj txoj kev hlub thiab txoj kev txhawj txog neeg thaum koj nrhiav neeg. Yeej yuav pom koj txoj kev hlub thaum koj nrog lwm tus sib tham.
Nrog neeg coob tham txhua hnub coob npaum li koj ua taus. Nrog lawv tham nyob txhua qhov chaw uas koj mus. Nyob hauv tej qhov chaw tsim nyog, cia li mus ib lub tsev dhau ib lub tsev. Tus Tswv tau qhia cov txwj laug hauv lub Koom Txoos thaum ub, “Qhib koj lub qhov ncauj tshaj tawm kuv txoj moo zoo.” Ces nws tau cog lus tias “tej lus yuav los” kom lawv paub qhia dab tsi (Lus Qhuab Qhia thiab Kev Khi Lus 30:5; kuj saib 33:7–10).
Ib yam li ntawd, tus Tswv tau qhia Joseph Smith thiab Sidney Rigdon tias, “Tsa neb lub suab mus rau cov neeg no; hais tej lus uas kuv yuav muab tso rau hauv neb lub siab.” Ces tus Tswv cog lus tias, “Yuav muab rau neb … tam sim ntawd kiag, tej uas neb yuav hais” (Lus Qhuab Qhia thiab Kev Khi Lus 100:5–6).
Thaum koj ntsib neeg, feem ntau koj yuav hnov tus Ntsuj Plig pab koj paub hais li cas. Tiam sis, yog koj tsis txais kev tshoov siab, cia li pib hais—tej zaum koj yuav xav nug ib yam thiab mloog seb lawv teb li cas (saib “Nrhiav Neeg Los ntawm tej Yam Lawv Xav Tam Sim No” nyob hauv tshooj no). Los yog tej zaum hais txog tus Tswv Yexus Khetos los sis txog qhov uas Vajtswv hu Joseph Smith ua ib tug yaj saub.
Tej lub tswv yim no yuav pab koj thaum koj nrog cov neeg uas koj ntsib tham:
Ua siab zoo, ua siab tiag, thiab hais lus zoo. Nrhiav tej yam uas yuav pab koj nrog tus neeg sib raug zoo thiab pib nrog nws tham.
Ua tib zoo mloog seb cov neeg hais li cas. Nrhiav kev to taub txhua tus neeg tej kev xav tau thiab tej yam lawv nyiam. Thaum tsim nyog ua, nug seb puas cia neb pab.
Xav txog qhov uas txoj moo zoo yuav pab lawv li cas. Ces qhia ib yam tseeb txog txoj moo zoo thiab caw lawv kawm ntxiv. Qhia txog qhov uas txoj moo zoo yuav ua rau lawv muaj kev cia siab ntxiv thiab ua rau lawv lub neej muaj nqis heev.
Nug seb lawv tsev neeg zoo li cas. Pab lawv paub tias txoj moo zoo uas tau muab txum tim rov qab los yuav ua rau lawv tsev neeg tau koob hmoov. Hais rau lawv tias koj yuav pab lawv nrhiav tau lawv cov poj koob yawm txwv uas tau tuag lawm tej npe.
Muab tej phau me nyuam ntawv los sis lwm yam ntaub ntawv los ntawm lub Koom Txoos, tsis hais cov uas muab luam tawm thiab cov digital.
Qhia rau lawv txog koj lub hom phiaj ua ib tug tub txib thiab vim li cas koj txiav txim siab ua ib tug tub txib.
Tej lub ntsiab cai no kuj hais txog koj txoj kev nrog cov mej zeej tham thiab.
Yeej nyuaj me ntsis thaum yuav xav nrog tib neeg tham. Thov Vajtswv kom muaj kev ntseeg thiab ua siab loj kom qhia txog txoj moo zoo. Txhua tus uas koj ntsib yog koj tus kwv tij, muam, nus, los sis viv ncaus nyob hauv Vajtswv tsev neeg. Nco ntsoov tias Nws “tsis txwv leej twg ntawm cov uas los cuag nws, tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; … txhua tus yeej zoo tib yam rau Vajtswv” (2 Nifais 26:33).
Kev Kawm Koj tus Kheej Los Sis Nrog tus Khub
Nyeem zaj lus los ntawm Victor Manuel Cabrera nyob hauv “Thirsting for the Living Water,” Ensign, Yim Hli Ntuj 2001, 60–61. Thaum koj ua li ntawd, saib seb Vajtswv tau npaj nws txais cov tub txib thiab cov tub txib tau ua li cas kom siv sij hawm uas tsis tau npaj ua ntej kom qhia nws txog txoj moo zoo.
Twb tau npaj tus txiv neej no kom txais tau txoj moo zoo uas txum tim rov qab los?
Yuav ua li cas yog tias ob tug txwj laug tsis tau qhia ib zaj lus txog txoj moo zoo rau nws?
Rov qab xyuas seb koj tau ua dab tsi nag hmo. Koj puas tau nrog neeg coob tham coob npaum li ua tau? Yog tias tsis ua, cuab hom phiaj thiab npaj kev kom nrog neeg coob tham hnub no.
Kev Kawm Vaj Lug Kub
Koj kawm dab tsi los ntawm tej nqe vaj lug kub txog kev nrhiav neeg rau koj qhia? Koj kawm dab tsi los ntawm tej nqe vaj lug kub no txog tej yam uas koj yuav tsum qhia? Tus Tswv cog lus dab tsi rau peb?
“Txoj kev caw txhua tus txais txoj moo zoo yeej yog txoj hauj lwm ntawm kev cawm seej thiab kev tsa nto” (Phau Qhia Kev Coj lub Koom Txoos, 23.0). Nrog lub Koom Txoos cov mej zeej ua hauj lwm kom nrhiav neeg rau koj qhia. Thaum cov mej zeej xa ib tug mus rau koj qhia ces koom tes pab hauv tej zaj lus qhia, ces cov neeg haj yam yuav xav ua kev cai raus dej thiab muaj siab ntseeg hauv lub Koom Txoos.
Nrog cov Thawj Coj hauv Zej Zog Sib Raug Zoo
Cia li nrog pawg npisov thiab lwm tus thawj coj hauv pawg ntseeg sib raug zoo. Pawg ntseeg qhov chaw tshaj tawm txoj moo zoo tus thawj coj (yog tias tau hu ib tug) thiab pawg txwj laug thiab Koom Haum Niam Tsev pawg thawj tswj hwm los koj yeej yuav tsum nrog lawv tham. Nrhiav kom lawv qhia koj, thiab txhawb nqa lawv nyob hauv tej kev sib ntsib koom tes txhua lub lim tiam (saib tshooj 13).
Nyob hauv tej kev sib ntsib koom tes txhua lub lim tiam, nrog pawg pov thawj tus pab thib ib thiab Koom Haum Ntxhais Hluas pawg hlob tus thawj tswj hwm ua hauj lwm. Ob tug hluas no muaj ib lub luag hauj lwm tseem ceeb rau kev qhia txoj moo zoo. Pab lawv yaum lawv tej pawg kom qhia txog txoj moo zoo. Ib txoj kev rau cov tub hluas ntxhais hluas ua li no yog kev caw cov phooj ywg tuaj nrog lawv ua tej yam ntxim saib ntxim ua.
Nug koj tus kheej seb “Kuv puas yog ib txoj koob hmoov rau cov thawj coj hauv zej zog?” Cia li muaj tus xeeb ceem li no tias “Kuv yuav ua li cas kom pab?” Ib yam li Amoos nyob hauv Phau Ntawv Maumoos, cia li muaj tus xeeb ceem xav pab lwm tus thaum koj nrog cov thawj coj hauv pawg ntseeg tham (saib Amas 17:23–25).
Thawj Tswj Hwm Russell M. Nelson tau qhia tej qhov chaw tshaj tawm txoj moo zoo cov thawj tswj hwm hais tias: “Kuv cia siab tias nej yuav hlub cov thawj coj thiab cov mej zeej hauv nej zej zog. Txhawb nqa lawv thiab tshoov lawv lub siab. Koj txoj kev txawj muab cov tub txib txoj kev mob siab txuas rau cov mej zeej txoj kev khov kho thiab txoj kev hlub los kuv tsis muaj peev xwm qhia tias qhov no tseem ceeb npaum li cas. Koj txoj kev ua tau zoo los yeej yuav loj kawg nkaus” (“Hopes of My Heart,” lub rooj sab laj rau cov thawj tswj hwm rau tej qhov chaw tshaj tawm txoj moo zoo tshiab, Rau Hli Ntuj 23, 2019).
Muaj ntau txoj kev rau koj txhawb nqa thiab pab cov mej zeej qhia txog txoj moo zoo. Cia li pab lawv xav txog qhov uas vim li cas txoj moo zoo tau ua rau lawv tau koob hmoov. Yaum kom lawv “Tsa [lawv] lub teeb kom ci rau neeg ntiaj teb” (3 Nifais 18:24).
Pab cov mej zeej ua raws li tej ntsiab cai ntawm kev hlub, kev qhia, thiab kev caw. Qhia txog tej yam ntxwv ntawm tej kev ua raws li tej lub ntsiab cai no raws li ib txwm ua thiab tsis txawv txav.
Hlub. Ib txoj kev qhia tias koj hlub Vajtswv yog thaum koj hlub thiab pab Nws cov me nyuam. Yaum cov mej zeej ncav tes hlub tsev neeg, phooj ywg, cov neeg zej zog, thiab lwm tus. Kev ua ib yam dab tsi siv zog hlub lwm tus yeej yog ib txoj kev tseem ceeb kom ua raws li lawv tej kev khi lus rau Vajtswv (saib Mauxiyas 18:9–10).
Qhia. Vim lawv hlub Vajtswv thiab Nws cov me nyuam, cov mej zeej yeej xav qhia lwm tus txog cov koob hmoov uas Nws tau foom pub rau lawv (saib Yauhas 13:34–35). Yaum kom cov mej zeej qhia lwm tus txog qhov uas txoj moo zoo ua rau lawv lub neej tau koob hmoov. Yaum kom lawv hais txog tus Cawm Seej thiab Nws lub hwj huam. Pab lawv muaj kev xyiv fab uas los ntawm kev muab lawv txoj kev hlub, lub sij hawm, thiab lub neej pub rau lwm tus. Pab lawv kawm qhia raws li tej yam uas ib txwm ua thiab tsis txawv txav—qhia kom ua ib feem ntawm lawv txoj kev ua neej tam sim no xwb.
Daim Duab
Txwj Laug Gary E. Stevenson
“Peb txhua tus qhia tej yam rau luag tej. Peb ua li no ntau. Peb qhia seb peb nyiam tej zaj yeeb yam thiab zaub mov dab tsi, tej yam txaus luag uas peb pom, tej chaw peb ncig mus xyuas, cov duab uas peb nyiam, tej lus uas tshoov peb lub siab.
“Peb yuav ua li cas thiaj qhia txog peb txoj kev hlub Yexus Khetos txoj moo zoo ntxiv rau tej yam uas peb yeej faib tawm lawm? … Thaum qhia tej yam zoo uas peb muaj hauv txoj moo zoo no rau lwm leej lwm tus, peb thiaj sib pab ua raws li tus Cawm Seej txoj lus txib tseem ceeb no” (Gary E. Stevenson, “Hlub, Qhia, Caw,” Liyahaunas, Tsib Hlis Ntuj 2022, 86).
Caw. Tus Cawm Seej caw txhua tus lees txais Nws txoj moo zoo thiab npaj siab txais txoj sia nyob mus ib txhis (saib Amas 5:33–34). Ib yam li kev qhia, kev caw neeg yeej yog ib yam uas cov mej zeej caw tsev neeg, phooj ywg, thiab cov neeg zej zog los koom ua ke ua tej yam uas cov mej zeej yuav ua xwb. Yaum cov mej zeej kom lawv thov Vajtswv txog kev caw neeg thaum ua tej yam no:
Los thiab saib. Caw neeg “los thiab saib” cov koob hmoov uas lawv txais tau dhau los ntawm Yexus Khetos, Nws txoj moo zoo, thiab Nws lub Koom Txoos.
Los thiab ua hauj lwm pab. Caw neeg “los thiab ua hauj lwm pab” lwm tus uas xav tau kev pab.
Los thiab koom ua ke. Caw tib neeg “los thiab koom ua ke” ua cov mej zeej ntawm Yexus Khetos lub Koom Txoos uas muab txum tim rov qab los.
Txwj Laug Gary E. Stevenson hais tias: “Muaj ntau pua txoj kev uas peb caw tau tib neeg los ua. Peb muaj cuab kav caw lwm tus ‘los saib’ ib txoj kev sib ntsib noj lub cim nco txog, ib txoj kev ua si hauv pawg ntseeg, saib ib daim vidi-aus nyob online uas piav txog Yexus Khetos txoj moo zoo. Kev ‘los saib’ ua tau ib txoj kev caw kom los nyeem Phau Ntawv Maumoos los sis xyuas ib lub tuam tsev tshiab thaum qhib rau tib neeg saib ua ntej muab lub tuam tsev fij tseg. Tej thaum, txoj kev caw yog ib yam uas nyob hauv nruab siab—ib yam li caw peb tus kheej, qhia rau peb paub thiab pom tej yam uas nyob ntawm peb ib ncig, es pib ua ib yam dab tsi ” (“Hlub, Qhia, Caw,” 86).
Ua tib zoo pab cov tub hluas ntxhais hluas hlub, qhia, thiab caw. Cov tub hluas ntxhais hluas yeej muaj peev xwm hlub lawv cov phooj ywg, qhia tej uas nyob hauv lawv lub siab, thiab caw lawv mus rau tej yam ntxim saib ntxim ua.
Pab cov mej zeej to taub tias txhua zaum ib tug neeg siv zog ua neej raws li tej lub ntsiab cai txog kev hlub, kev qhia, thiab kev caw ces yeej zoo, tsis hais tus neeg ntawd nrog cov tub txib sib ntsib los sis koom lub Koom Txoos los tsis ua li ntawd los yog.
Cia li pab cov mej zeej siv lawv tej kev muaj zog thaum lawv qhia txog txoj moo zoo. Ib txhia txawj nrhiav tau neeg rau lawv qhia, thiab ib txhia txawj qhia. Ib txhia txawj ntaus phooj ywg zoo, thiab lwm tus nyiam thov Vajtswv pab lawv cov phooj ywg. Cia li pab lawv tias muaj tej yam uas txhua tus muaj peev xwm ua.
Thaum koj mus xyuas cov mej zeej, cia li muaj ib lub hom phiaj. Qhia tias koj mob siab ua txoj hauj lwm nrhiav neeg thiab qhia neeg. Saib lawv lub sij hawm rau nqi.
Tej zaum cov mej zeej ib txhia yuav nyiam kom neb los qhia ib zaj lus qhia rau lawv. Tej lus tseeb ntawm txoj moo zoo hloov tau yus lub neej. Kev txhawb nqa cov mej zeej txoj kev to taub txog txoj moo zoo yuav ua rau lawv tso siab rau koj thiab ua rau lawv xav qhia lwm tus txog txoj moo zoo. Cia li pab lawv paub tus Ntsuj Plig thiab ua raws li tej kev tshoov siab uas lawv txais tau.
Rov qab xyuas seb koj txoj kev sib ntsib koom tes txhua lub lim tiam uas nyuam qhuav tas los zoo li cas. Koj ua tau dab tsi kom kev sib ntsib ntawd zoo dua? Saib tej yam uas pawg ntseeg cov thawj coj thov thiab npaj yuav ua li cas thiab thaum twg yuav teb.
Npaj kev seb koj yuav ua li cas kom koom tes pab cov tub txib txoj hauj lwm nyob hauv txoj kev sib ntsib koom tes tom ntej.
Kawm lub npe ntawm pawg ntseeg cov thawj coj (txiv neej thiab poj niam). Npaj kev seb neb yuav ua li cas hauv lub hli tom ntej kom nrog lawv sib raug zoo thiab txhawb nqa lawv thaum lawv ua cov tub txib txoj hauj lwm.
Nrhiav Neeg hauv Qhov App Qhia Kuv txoj Moo Zoo
Qhov app Qhia Kuv txoj Moo Zoo yeej yog ib yam zoo kom pab nrhiav neeg rau koj qhia. Cov tub txib uas pheej siv tej yam hauv qhov app no yeej nrhiav tau neeg coob ntxiv. Yog xav kawm txog tej yam no, cia li saib txoj kev cob qhia uas muaj nyob hauv qhov app. Ua tib zoo mloog tej kev tshoov siab uas koj txais tau thaum koj saib cov neeg tej lub npe.
Qhov app no muaj xov xwm txog cov neeg uas lwm tus xa lawv lub npe tuaj, cov tub txib nrog lawv tham, los sis cov tub txib tau qhia. Cov neeg no ib txhia tej zaum yuav xav rov qab nrog cov tub txib sib ntsib. Tej zaum lawv kuj paub txog lwm tus neeg uas xav kawm txog txoj moo zoo.
Thaum koj npaj kev, siv daim qhia kev thiab tej kev saib ib txhia nyob hauv qhov app kom pom meej tias yuav tsum mus xyuas leej twg. Saib lawv tej xov xwm thiab kawm tias twb tau ua li cas kom nrhiav tau lawv. Sim seb puas muaj cov ntawv ceev xwm txheej txog cov mej zeej uas pab lawv. Siv cov xov xwm no kom txiav txim saib tias yuav ua li cas kom rov qab nrog lawv tham.
Daim Duab
ob tug tub txib siv xov tooj kawm ntawv
Siv tej kev saib ib txhia nyob hauv qhov app kom xaiv tag nrho cov neeg uas:
Twb teem sij hawm ua kev cai raus dej tiam sis tsis tau ua kev cai raus dej.
Tau mus rau kev sib ntsib txais lub cim nco txog tsawg tshaj ib zaug tiam sis tsis tau ua kev cai raus dej.
Tau txais ntau dua li peb zag lus qhia.
Tsis ntev tas los tsis tau nrog nws tham.
Yog tias tib neeg uas neb mus xyuas tsis xav kom neb qhia los sis xaiv kom neb tsis tuaj xyuas, ces cia li ceev cov xov xwm ntawd nyob hauv qhov app. Sau ntawv txog qhov uas koj yuav ua li cas kom nrog lawv sib txuas lus tas li thiab txhawb pab lawv mus txog thaum koj npaj kawm ntxiv. Piv txwv hais tias, xav seb puas caw lawv sau npe txais cov email kom txais tej zaj lus txog Yexus Khetos los sis tej lub ntsiab lus ntawm txoj moo zoo. Tej zaum koj kuj yuav xav pab lawv sib txuas lus nrog ib tug mej zeej uas teb tau lawv tej lus nug thiab ua phooj ua ywg nrog lawv. Teeb ib lo lus nco ntsoov nyob hauv qhov app kom rov qab xyuas seb lawv ua zoo li cas. Nug seb lawv puas paub leej twg ntxiv uas xav kawm.
Koj kuj nrhiav tau neeg rau koj qhia los ntawm qhov app Qhia Kuv txoj Moo Zoo thaum siv tej kev saib ib txhia los sis tej pawg kom xa zaj lus. Nov yog ib txoj kev zoo kom cia neeg paub txog tej xwm txheej xws li pawg ntseeg tej yam ntxim saib ntxim ua thiab tej kev sib ntsib ua kev cai raus dej. Rov qab nug txog tej kev caw rau tej kev sib ntsib no.
Kev Kawm Ntawv Nrog tus Khub
Kom kawm tias qhov app Qhia Kuv txoj Moo Zoo yeej zoo npaum li cas kom pab neb nrhiav neeg, cia li ua tej yam no. Thaum neb ua, tsom ntsoov rau tej kev tshoov siab uas neb txais.
Tom qab siv ib txoj kev pom ib txhia, xaiv tag nrho cov neeg uas tau kawm peb zaj lus qhia los sis tau kawm ntxiv. Xaiv lawv txhua tus mus koom lub koom txoos hnub Sunday no.
Tsim ib txoj kev pom ib txhia thiab nrhiav tag nrho cov uas tau teem hnub ua kev cai raus dej thiab tau koom lub koom txoos tsawg tshaj ob zaug.
Npaj kev ntaus ntawv rau tib neeg kom koom ib yam ntxim saib ntxim ua hauv pawg ntseeg los sis lub txheej xwm pab lwm tus. Tej lub sij hawm neb yuav xav ntaus ntawv xa mus rau ib pawg thiab rov qab nug tib neeg ib ib leeg mus ib leeg.
Nrog koj tus khub sib tham txog cov uas koj tau txais kev tshoov siab txog. Cia li npaj mus xyuas lawv los sis nrog lawv tham tsis ntev tom ntej.
Nrhiav Los ntawm Kev Pab Lwm Tus
Muab Cib Fim rau Neeg Los Pab Lwm Tus
Thaum koom ua ke pab lwm tus ces tib neeg yeej zoo siab thiab nrog cov tub txib thiab mej zeej sib raug zoo. Neeg coob zoo siab siv lawv tej txuj ci, kev muaj peev xwm, los sis tej khoom pab thiab yuav tsum caw lawv ua xwb.
Cia li caw neeg kom koom tes ua tej kev pab lwm tus uas ib pawg ntseeg npaj ua. Koj kuj pab tau neeg nrhiav tau tej lub cib fim pab lwm tus xws li tej yam nyob hauv JustServe.org yog tias koj qhov chaw muaj. Thaum koj nrog lwm tus mus pab neeg, ua rau nej koom siab heev.
Muab Kev Pab
Ib yam li tus Cawm Seej, cia li “[mus] ua tej hauj lwm zoo” (Tes Hauj Lwm 10:38; kuj saib “Mus Thoob Plaws Ua Hauj Lwm Zoo” nyob hauv tshooj 1). Thov Vajtswv kom paub txog tej lub cib fim ua zoo txhua hnub. Tej lub sij hawm koj yuav npaj mus pab lwm tus, tiam sis feem ntau los koj yuav tsis npaj ua ntej. Nrhiav tau tej kev uas yooj yim thiab uas ua tau tam sim ntawd kom ua hauj lwm pab lwm tus thiab txhawb nqa lawv. Nco ntsoov tias tus Tswv tau siv tej lub cib fim uas tsis tau npaj ua ntej kom ncav tes pab thiab foom koob hmoov rau lwm tus.
Muaj ib lub siab xav pab tib neeg tiag tiag. Yog tias lub sij hawm pab lwm tus ua rau nej muaj cib fim qhia, cia li ris Vajtswv txiaj. Yog tias lawv tsis xav kawm, ces cia li zoo siab uas koj tau pab lwm tus. Teb tej lus nug yog tias tib neeg xav paub. Yog tias ib tug neeg xav kawm ntxiv, cia li teb me ntsis thiab teem lwm lub sij hawm kom sib ntsib thiab qhia ib zaj lus rau nws.
Ua tib zoo kom ua raws li tej kev cai txog kev pab lwm tus nyob hauv Kev Cai Ua Tub Txib ntawm Yexus Khetos cov Thwj Tim, 2.7 thiab 7.2.
Nrhiav Neeg Los ntawm tej Yam Lawv Xav Tam Sim No
Qhov uas yus nrhiav neeg los ntawm tej yam lawv xav tam sim no txhais tias yus sim pom lawv zoo li Vajtswv pom. Cia li ntseeg tias tej zaum tus Ntsuj Plig twb tau coj koj mus nrog tus neeg no tham, los sis tej zaum twb coj nws los rau koj. Cia li nrhiav kev kom to taub tib neeg sab ntsuj plig xav tau dab tsi. Kawm tias tej yam twg tseem ceeb tshaj plaws rau lawv, qhov tseem ceeb yog lawv txoj kev sib raug zoo nrog lawv tsev neeg thiab Vajtswv. Tej zaum koj yuav xav nug tej lus nug zoo li tej no—ces cia li mloog zoo:
Koj saib dab tsi rau nqi tshaj?
Muaj dab tsi uas ua rau koj xyiv fab?
Koj xav kom yav tom ntej zoo li cas rau koj thiab cov uas koj hlub?
Muaj dab tsi uas tab kaum koj kom tsis txhob muaj raws li koj cia siab?
Tej yam twg hauv koj lub neej yog tej yam uas koj xav ua zoo dua?
Thov kom txais kev tshoov siab thaum koj xav txog tej yam uas koj kawm txog tus neeg ntawd tej kev cia siab thiab tej yam nws xav tau. Tej lus tseeb twg ntawm txoj moo zoo txuas rau tej yam uas nws xav tau?
Cia li xav seb yuav qhia li cas los ntawm tus neeg ntawd txoj kev pom. Nws paub dab tsi txog koj? Koj muab dab tsi uas yuav pab tau nws? Tus neeg ntawd puas xav tias yog nws nrog koj tham ces yuav muaj nqis?
Xav txog tej yam yog vim li cas neeg xav ntsib koj, lwm tus mej zeej, los sis lub Koom Txoos. Tej piv ntxwv txog tej yam uas koj ua taus los muaj nram qab no.
Daim Duab
ob tug tub txib nrog tus poj niam tham
Muab Cib Fim Los Yog Xov Xwm uas Lawv Saib Rau Nqi
Siv lub Koom Txoos tej kev pab thiab koj tej txuj ci thiab tej kev muaj zog kom nrog ib tug neeg sib raug zoo txog tej yam nws nyiam. Nrhiav Leej Txiv Saum Ntuj Ceeb Tsheej txoj kev pab kom muab tau tej lub cib fim los sis tej xov xwm uas tus neeg ntawd saib rau nqi.
Qhib siab kom txais tau kev tshoov siab thiab cia li tsim tej yam tshiab thaum koj xav txog tej lub cib fim los sis xov xwm uas koj qhia tau. Muaj tej lub tswv yim nyob nram qab no.
Tshaj tawm txog lub Koom Txoos tej yam ntxim saib ntxim ua xws li kev ua si nyob rau hnub phav los sis tej chav kawm txog kev vam khom yus tus kheej. Siv tej daim ntawv los sis kev sib tham saum huab cua kom qhia txog ib yam zoo li no.
Caw lawv tuaj rau ib txoj kev sib ntsib ua kev cai raus dej.
Neeg coob xav ntsib lwm tus hauv lawv zej zog los sis nrog lawv sib raug zoo dua. Ib txhia kho siab heev. Muaj tej lub tswv yim kom pab tib neeg sib raug zoo tiag nyob nram qab no.
Cia li mus xyuas neeg uas nyuam qhuav tsiv tsev tuaj hauv cheeb tsam no kom tos txais lawv.
Pab cov neeg hauv zej zog ntsib cov mej zeej uas nyiam tej yam zoo ib yam.
Caw tib neeg tuaj rau pawg ntseeg tej kev sib ntsib, tej yam ntxim saib ntxim ua, thiab tej kev qhib tsev.
Hais rau lawv tias koj yuav pab lawv ntsib pawg ntseeg tus coj kev ua hauj lwm hauv lub tuam thiab tsev neeg zaj keeb kwm, tus uas pab tau lawv kawm ntxiv txog lawv poj koob yawm txwv uas tas sim neej lawm.
Hais rau cov neeg tias koj yuav qhia lawv ua tsev neeg hmo ua ke los sis nyeem vaj lug kub ua ke nrog lawv tsev neeg. (Saib Phau Qhia Kev Coj lub Koom Txoos, 2.2.4, kom kawm txog tej ntsiab cai uas pab tau hloov raws li tib neeg lub neej.)
Caw cov neeg uas muaj hnub nyoog txaus kom koom seminary, mus rau institute, los yog koom ua BYU–Pathway Worldwide.
Muaj ntau txoj kev rau koj siv kom nrhiav tau cov neeg uas tus Ntsuj Plig npaj txais txoj moo zoo uas txum tim rov qab los. Ua tej yam koj ua tau kom hla kev ntawm cov uas Vajtswv tab tom npaj.
Kev Kawm Ntawv Nrog tus Khub
Xaiv tej lub tswv yim nyob hauv tshooj no uas neb tsis tau ua. Npaj kev kom sim ua tej lub tswv yim no nyob rau lub lim tiam tom ntej.
Nrog cov Neeg Sib Tham uas Tib Neeg Xa Koj Mus Ntsib
Cov neeg uas tau xa ntawv tuaj rau koj mus qhia los tej zaum lawv npaj siab txais Yexus Khetos txoj moo zoo. Kev xa ntawv los tej zaum yuav los ntawm lub Koom Txoos cov mej zeej, lwm tus tub txib, lub Koom Txoos lub hauv paus, thiab tej kev siv kev sib tham saum huab cua hauv zej zog.
Hu Mus Sai Sai
Thaum lub Koom Txoos lub hauv paus los sis kev sib tham saum huab cua hauv zej zog xa ntawv tuaj rau koj mus qhia ib tug neeg, ua tib zoo saib xov xwm nyob hauv qhov app Qhia Kuv txoj Moo Zoo txog tej yam lawv nyiam. Sim nrog lawv tham sai li sai tau.
Daim Duab
ib tug tub txib khob qhov rooj
Siv tej lus qhia nram qab no thaum muaj neeg uas lwm tus xa ntawv tuaj rau koj mus qhia:
Yog tias ib tug mej zeej los sis lwm tus tub txib tau xa ntawv tuaj rau koj mus qhia, nrog tus neeg uas tau xa ntawv tham kom kawm ntxiv. Yog cov tub txib tau xa ntawv txog tus neeg ntawd, lawv nrog koj qhia hauv internet los tau yog tias lawv qhov chaw tshaj tawm txoj moo zoo tus thawj coj pom zoo. Cov mej zeej muaj cai koom nrog koj mus qhia tus neeg los sis koom ua ke virtually thaum koj qhia.
Cia li nrawm sim nrog tus neeg sib tham thaum mus xyuas, hu tuaj, ntaus ntawv, xa email, los sis siv lwm yam kev sib txuas lus. Yog tus neeg ntawd tsis teb, sim nrog nws tham lwm lub sij hawm.
Yog tias thawj zaug koj nrog nws tham yog los ntawm kev tham xov tooj, kev ntaus ntawv, los sis email, teem ib lub sij hawm kom sib ntsib tim ntsej tim muag los sis siv txuj ci technology.
Nrog koj tus khub, rov qab saib tus neeg tej lus thov thiab kawm tias nws xav tau dab tsi thiab nyiam dab tsi. Cia li xav seb txoj moo zoo yuav pab nws li cas.
Thaum nej sib ntsib, cia li nqa tej khoom twg uas lawv thov tuaj, xws li Phau Ntawv Maumoos. Cia li qhia tej lus tseeb txog txoj moo zoo los ntawm cov tub txib tej zaj lus qhia raws li tus neeg tej kev xav tau los sis tej yam nws nyiam.
Tej lub sij hawm cov neeg uas xa ntawv tuaj rau koj mus qhia yuav pab koj ntsib lwm tus uas Vajtswv npaj. Yog tias cov neeg uas koj mus ntsib tsis xav kawm, nug seb lawv puas paub lwm tus uas tej zaum xav kawm los sis xav tau kev cia siab hauv lawv lub neej. Tej zaum twb tau coj koj mus rau tus neeg no vim lwm tus nyob hauv lub tsev los sis zej zog tau npaj siab txais txoj moo zoo lawm.
Yog tias ntsib tsis tau cov neeg raws li tau teem sij hawm tseg lawm, xav seb koj yuav ua lwm yam hauj lwm dab tsi hauv cheeb tsam ntawd. Qhov app Qhia Kuv txoj Moo Zoo yuav pab koj nrhiav tau neeg nyob ze uas cov tub txib dhau los twb sib ntsib los yog qhia.
Xa Ntawv rau cov Tub Txib Qhia Neeg Nyob Lwm Cheeb Tsam
Thaum koj ntsib neeg uas xav kawm txog txoj moo zoo tiam sis tsis nyob hauv koj cheeb tsam, ces cia li qhia lawv me ntsis txog txoj moo zoo. Ces pab lawv npaj ntsib cov tub txib thiab cov mej zeej hauv cheeb tsam uas lawv nyob.
Yog koj qhov chaw tshaj tawm txoj moo zoo tus thawj tswj hwm pom zoo, ces koj tseem txhawb nqa cov neeg no pab lawv txais txoj moo zoo los tau (saib Tej Kev Cai Ua Tub Txib, 7.5.4).
Kev Kawm Ntawv Nrog tus Khub
Rov qab xyuas tag nrho cov neeg uas lwm tus xa ntawv tuaj rau cov tub txib qhia hauv koj cheeb tsam nyob rau ib lub hli tas los. Xaiv cov neeg uas koj tsis tau nrog lawv tham, thiab rov qab sim nrog lawv tham. Txiav txim siab seb yuav rov qab mus ntsib leej twg ntawm cov uas koj twb mus xyuas ua ntej lawm. Kho cov ntawv ceev xwm txheej hauv qhov app Qhia Kuv txoj Moo Zoo.
Daim Duab
ob tug tub txib tham xov tooj
Siv Txuj Ci Technology
Muaj ntau txoj kev rau koj siv txuj ci technology kom nrhiav neeg rau koj qhia. Muaj tej txoj kev no nram qab no:
Siv kev sib tham saum huab cua kom nrog cov mej zeej ua hauj lwm nrhiav neeg.
Sau email thiab siv kev sib tham saum huab cua kom nrog lwm tus sib raug zoo.
Tshaj tawm txog tej nqe vaj lug kub, tej lus, thiab tej zaj lus txog txoj moo zoo uas txhawb nqa.
Pab tib neeg siv FamilySearch.org kom kawm ntxiv txog lawv tsev neeg uas tau tas sim neej lawm.
Qhia txog ib qho txuj ci nyob online.
Nrog lwm tus tham zoo hauv tej pawg uas nyiam zoo ib yam nyob online.
Tsim ib nqe lus uas qhia txog tej yam uas pawg ntseeg yuav ua thaum yav tom ntej.
Siv txuj ci technology yeej yog ib txoj kev tseem ceeb kom muaj “ob peb txoj hlua nyob hauv dej” txhua hnub. Ntxiv rau lwm yam uas koj ua kom nrhiav neeg, cia li tso ob peb txoj hlua internet nyob hauv dej thiab.
Daim Duab
Txwj Laug David A. Bednar
Txwj Laug David A. Bednar qhia hais tias: “Txuj ci technology ua rau peb muaj ntau txoj kev uas muaj hwj chim peb thiaj li muaj peev xwm tshaj tawm txog ‘Yexus Khetos, thiab qhov uas Yexus tuag saum tus ntoo khaub lig’ thiab ‘tshaj tawm txoj kev hloov siab lees txim rau cov neeg’ [1 Kauleethaus 2:2; Lus Qhuab Qhia thiab Kev Khi Lus 44:3]. Tiam neeg uas tab tom loj hlob tuaj los twb tau npaj siab hnov thiab kawm txog txoj kev muab txoj moo zoo txum tim rov qab los los ntawm tej kev sib txuas lus no (“They Should Proclaim These Things unto the World,” zaj lus rau tej qhov chaw tshaj tawm txoj moo zoo cov thawj tswj hwm tshiab, Rau Hli Ntuj 24, 2016).
Kev Kawm Ntawv Nrog tus Khub
Kawm seb neb qhov chaw tshaj tawm txoj moo zoo ua dab tsi kom siv kev sib tham saum huab cua. Nrog koj tus khub sib tham seb neb yuav ua li cas kom sau tej zaj lus saum huab cua uas muaj raws li tej ntawd. Koj tej kev sau ntawv saum huab cua los yuav tsum ua raws li lub Koom Txoos tsab cai txog internet (saib “Internet” nyob hauv nqe 38.8 ntawm Phau Qhia Kev Coj lub Koom Txoos).
Yog tias koj qhov chaw tshaj tawm txoj moo zoo muaj ib tug kws txawj siv kev sib tham saum huab cua, cia li siv nws rab peev xwm thaum neb tsim tej zaj lus saum huab cua.
Daim Duab
ob tug poj niam sib tham
Siv Tsev Neeg zaj Keeb Kwm
Tsev neeg zaj keeb kwm yeej yog lwm txoj kev nrhiav neeg rau koj qhia. Nyob thoob plaws lub ntiaj teb, tus Ntsuj Plig tshoov neeg coob lub siab kom nrhiav lawv cov poj koob yawm txwv uas tuag lawm. Neeg coob xav paub zoo ntxiv txog lawv tsev neeg uas yog cov txheeb ze. Qhov no ua rau lawv xav nrhiav tau lawv txheeb ze li cas thiab paub tias lawv nyob hauv Vajtswv tsev neeg.
Qhov uas peb hais tias yog Eliyas lub hwj huam yeej yog tus Vaj Ntsuj Plig Dawb Huv lub hwj huam kom coj neeg xav nrhiav, sau ntawv, thiab hlub lawv cov poj koob yawm txwv—tsis hais yav tas los thiab niaj hnub no (saib Malakis 4:5–6).
Thaum koj nrhiav tib neeg, tej zaum koj yuav xav qhia neeg txog FamilySearch.org los sis caw lawv muab qhov app FamilySearch Tsob Ntoo los sis qhov app FamilySearch tej Kev Cim Xeeb. Tej zaum koj yuav xav muab phau me nyuam ntawv Kuv Tsev Neeg: Tej Zaj Dab Neeg uas Coj Peb Los Nyob Ua Ke rau lawv. Tej yam no yuav pab cov neeg kawm txog cov txheeb ze thiab cov poj koob yawm txwv thiab sau ntawv txog lawv tej zaj dab neeg.
Kawm seb muaj tej kev pab neeg nrhiav tsev neeg zaj keeb kwm hauv koj cheeb tsam thiab lawv yuav ua li cas kom pab cov neeg uas koj nrog lawv tham. Tus coj kev ua hauj lwm hauv lub tuam thiab tsev neeg zaj keeb kwm pab tau neeg nrhiav tau lawv cov poj koob yawm txwv uas tas sim neej lawm.
Cia li caw neeg los qhia tias lawv nco qab dab tsi txog cov uas lawv hlub rau koj. Thaum lawv ua li ntawd, tej zaum lawv yuav hnov tus Vaj Ntsuj Plig Dawb Huv ua tim khawv rau lawv txog qhov uas tej tsev neeg tseem ceeb heev hauv Vajtswv txoj hau kev. Tej lub sij hawm zoo li no yuav ua rau nej sib tham txog lub hom phiaj ntawm lub neej no, Vajtswv txoj hau kev zoo siab, thiab tus Cawm Seej lub luag hauj lwm hauv txoj hau kev ntawd.
Thaum tsim nyog ua, cia li qhia neeg txog cov lus qhuab qhia uas qhia vim li cas lub Koom Txoos cov mej zeej nrhiav tsev neeg zaj keeb kwm piv rau lub tuam tsev.
Thov Vajtswv kom paub txog tej lub cib fim siv tsev neeg zaj keeb kwm thaum koj nrhiav neeg. Cia li tsim tej kev tshiab, thiab kawm txog tej yam uas pab tau.
Kev Kawm Vaj Lug Kub
Cia li kawm tej nqe vaj lug kub no txog tsev neeg zaj keeb kwm. Sau ntawv txog tej yam uas koj kawm.
Tau Muab lub Hwj Chim Khi Txum Tim Rov Qab Los Dhau Los ntawm Eliyas
Kev nrhiav neeg thiab kev qhia neeg yeej sib txuas. Cov neeg uas koj qhia los feem coob muaj phooj ywg los yog cov txheeb ze uas npaj siab txais txoj moo zoo. Thaum cov neeg uas koj qhia txais cov koob hmoov ntawm txoj moo zoo, ces lawv txoj kev xav qhia rau lwm tus yuav loj tuaj (saib 1 Nifais 8:12). Txhua lub sij hawm—thaum nrhiav neeg, qhia, thiab nrog cov mej zeej ua hauj lwm—cia li nug, “Koj paub leej twg uas yuav tau koob hmoov los ntawm zaj lus no?”
Thaum cov neeg uas koj qhia npaj ua kev cai raus dej, cia li nug lawv seb txog lawv tsev neeg thiab cov phooj ywg uas lawv xav caw tuaj rau lawv txoj kev ua kev cai raus dej. Cia li npaj kev kom caw thiab yaum txhua tus tuaj. Tib neeg yeej hnov tus Ntsuj Plig ntau thaum ua kev sib ntsib ua kev cai raus dej.
Kev Kawm Ntawv Nrog tus Khub
Rov qab xyuas seb neb qhia leej twg. Sau ntawv txog cov uas neb tau thov kom hais tej npe ntawm cov uas yuav xa neb mus xyuas thiab cov uas neb tsis tau thov. Cia li xyaum ua seb neb yuav ua li cas kom caw ob pawg no kom qhia txog cov neeg uas neb mus qhia tau. Nyob hauv neb phau npaj kev, sau ib lus cim kom caw neeg zoo li no thaum neb mus xyuas.
Daim Duab
cov poj niam saib xov tooj
Qhia Thaum Koj Nrhiav Neeg
Thaum koj ntsib tib neeg thiab kawm tias lawv xav tau thiab nyiam dab tsi, cia li kawm kom pib qhia lawv thaum ntawd thiab hais koj zaj lus tim khawv. Koj yuav nrhiav tau neeg ntxiv rau koj qhia thaum koj ua tim khawv txog tus Cawm Seej thiab Nws txoj moo zoo thiab cia lawv hnov tus Vaj Ntsuj Plig Dawb Huv lub hwj chim.
Xav seb koj puas qhia tej lub ntsiab lus xws li kev zoo siab, kev nyuaj siab, lub hom phiaj ntawm lub neej no, los sis kev tuag. Txawm yog koj hais dab tsi thaum xub thawj, cia li hais lus yooj yim sai sai txog tus Cawm Seej, Nws txoj moo zoo, thiab Nws txoj kev hu tus Yaj Saub Joseph Smith. Nov yog peb zaj lus qhia rau lub ntiaj teb uas peb qhia xwb.
Tej zaj lus nram qab no qhia piv txwv txog qhov uas koj yuav ua li cas qhia me ntsis txog kev muab Yexus Khetos txoj moo zoo Txum Tim Rov Qab Los thiab tsev neeg tseem ceeb npaum li cas.
Qhia thiab Ua Tim Khawv txog Kev Muab Yexus Khetos txoj Moo Zoo Txum Tim Rov Qab Los
Cia li ua tim khawv txog Yexus Khetos thiab qhia tej ntsiab lus txog qhov tseeb. Piv txwv hais tias, koj hais tau ob peb kab lus xwb kom ua tim khawv txog Yexus Khetos txoj moo zoo uas muab txum tim rov qab los.
Ntau xyoo tom qab tej lus tseeb tau ploj lawm, Vajtswv tau hais kom ib tug yaj saub muab tej lus tseeb no txum tim rov qab los. Wb muaj puav pheej txog qhov no uas koj tuav tau, nyeem, thiab xav txog nyob hauv koj lub siab. Wb caw koj nyeem thiab thov Vajtswv kom kawm koj tus kheej tias qhov no muaj tseeb. Koj puas kam wb …
Yog tias muaj sij hawm me ntsis ntxiv, tej zaum koj yuav xav hais li no:
Peb zaj lus qhia yeej yooj yim to taub. Vajtswv yog peb Leej Txiv. Peb yog Nws cov me nyuam. Peb yog Nws tsev neeg. Nws paub peb thiab hlub peb txhua tus. Nws xav kom peb muaj kev xyiv fab. Txij thaum chiv keeb los, Nws tau ua raws li ib tug txheej txheem ntawm kev hlub kom muab Yexus Khetos txoj moo zoo tshwm sim Nws cov me nyuam thiaj li yuav paub rov qab mus cuag Nws. Yexus tau qhia txoj moo zoo rau cov yaj saub xws li Adas, Nau-as, Anplaham, thiab Mauxes. Tiam sis neeg feem coob pheej xyeej txoj moo zoo thiab cov yaj saub uas qhia txog. Ob txhiab xyoos tas los, Yexus Khetos tau qhia Nws txoj moo zoo. Tib neeg tau xyeej Yexus. Tom qab Yexus cov Thwj Tim tuag, cov neeg tau muab cov lus qhuab qhia tseeb hloov, xws li tej lus qhia txog Pawg Vajtswv. Lawv kuj tau hloov cov kab ke, xws li txoj kev cai raus dej.
Wb caw koj los kawm txog tej yam tseeb ntxiv rau tej yam uas koj saib rau nqi lawm. Cia li xav txog qhov puav pheej hais tias Leej Txiv Saum Ntuj Ceeb Tsheej tau rov qab qhia tias Nws hlub Nws cov me nyuam thiab tau muab cov lus qhuab qhia thiab cov kab ke tseeb tshwm sim rau ib tug yaj saub. Tus yaj saub lub npe hu ua Joseph Smith. Qhov puav pheej txog qhov tseeb no los muaj nyob hauv ib phau ntawv—Phau Ntawv Maumoos. Koj tuav tau, nyeem, thiab xav txog qhov tseeb los ntawm phau no hauv koj lub siab lub ntsws. Wb caw koj los koom lub koom txoos kom kawm ntxiv.
Qhia thiab Ua Tim Khawv txog Qhov uas Tsev Neeg Tseem Ceeb Npaum Li Cas
Yog koj hais txog qhov uas lawv tsev neeg tseem ceeb npaum li cas ces yuav pab koj nrhiav tau neeg rau koj qhia, tsis hais lawv ntseeg Yexus Khetos los yog lawv tsis ntseeg. Yuav yooj yim rau koj muab tej yam uas tib neeg paub txog tsev neeg txuas rau Leej Txiv Saum Ntuj Ceeb Tsheej txoj hau kev cawm seej. Tej zaum koj yuav xav hais ib yam zoo li no.
Peb tsev neeg yeej yog cov uas muaj hwj huam tseem ceeb tshaj hauv peb lub neej. Peb tsev neeg yog qhov uas muab peb sib khi ua ke thiab pab peb kom ib leeg xav tau ib leeg thiab sib hlub.
Qhov uas muaj ib tsev neeg uas muaj zog thiab zoo siab yeej yog neeg coob ib lub hom phiaj. Kev sib yuav thiab kev tu me nyuam hauv lub ntiaj teb niaj hnub nim no yeej yog ib qho nyuaj heev.
Ces koj hloov tau kom qhia txog zaj lus qhia ntawm Kev Muab Txoj Moo Zoo Txum Tim Rov Qab Los.
Koj yeej yog ib tug hauv Vajtswv tsev neeg txij thaum ua ntej koj yug los. Nws yog peb Leej Txiv. Txwj Laug xav kom Leej Txiv Saum Ntuj Ceeb Tsheej xav kom peb rov qab mus nrog Nws nyob. Koj yog Nws tus me nyuam, thiab Nws hlub koj. Nws muaj ib txoj hau kev kom pab koj rov qab los cuag Nws.
Tej lus tseeb no thiab ntxiv los peb Leej Txiv Saum Ntuj Ceeb Tsheej uas hlub peb twb muab txum tim rov qab los dhau los ntawm ib tug yaj saub. Tej lus tseeb no pab peb to taub peb yog Vajtswv tsev neeg. Koj puas kam wb qhia koj txog tej lus tseeb no? Koj puas kam koom lub koom txoos koj thiaj li kawm tau ntxiv?
Kev Kawm Ntawv Nrog tus Khub
Npaj ib zaj lus qhia uas ntev li ib feeb raws li ib zaj lus qhia nyob hauv tshooj 3. Xyaum qhia ib leeg rau ib leeg. Xav txog tej yam uas neb ua tau kom qhia zaj lus no thaum neb nrhiav neeg. Npaj qhia nyob rau ib lub sij hawm tsim nyog kom caw lwm tus kawm ntxiv txog Yexus Khetos.
Tsis Nkim Zog
Thaum tib neeg xaiv kom tsis kawm ntxiv txog kev muab txoj moo zoo txum tim rov qab los, koj yeej tsis nkim zog. Tej zaum koj twb cog ib lub noob uas yuav loj tuaj lwm lub sij hawm. Txawm yog muaj li ntawd los tsis muaj, koj txoj kev pab thiab txoj kev qhia tias koj muaj lub siab hlub yeej yuav foom koob hmoov rau koj thiab lawv huv tib si.
Yog tias tib neeg tsis npaj siab txais txoj moo zoo, sim seb puas muaj dab tsi ntxiv uas koj ua tau kom pab lawv lub neej. Qhov uas koj nrog lawv sib raug zoo tseem muaj nqis heev. Ua lawv tus phooj ywg ntxiv mus.
Tej lub sij hawm tib neeg yuav tsum siv sij hawm kom xav txog tej yam uas Vajtswv xav kom lawv hloov. Pab lawv txais tej zaj xov los ntawm lub Koom Txoos tej email los yog website. Tej zaj lus ntawd los tej zaum yuav pab npaj tib neeg kom ua raws li tej lus caw kom kawm ntxiv thaum yav tom ntej.
Thaum ib tug tsis txais txoj moo zoo, ces yeej ua rau yus poob siab. Tiam sis, thaum koj tig mus rau tus Tswv, Nws tau cog lus tias, “Kuv yuav pab nej thiab txhawb kom nej muaj zog, kuv sab tes xis yuav puag rawv nej” (Yaxayas 41:10).
Thaum koj ntseeg Yexus Khetos, koj yuav nyob kaj siab lug thiab txais kev nplij siab txog koj tej hauj lwm. Cia li nco ntsoov tias koj yog leej twg thiab vim li cas koj ua hauj lwm rau tus Tswv ua ib tug tub txib. Kev ntseeg yuav pab koj mus tom ntej thiab xav ua ncaj ncees ntxiv.
Tej lub Tswv Yim rau Kev Kawm Ntawv thiab Kev Siv
Kev Kawm Ntawv Koj tus Kheej
Nyeem Yauhas 15:12, Yauhas 21:15–17, 1 Thexalaunikes 2, thiab Mauxiyas 18:8–10. Koj ua zoo li cas kom ua raws li koj txoj kev lav ris hlub thiab pab lwm tus? Koj yuav ua li cas thiaj ua zoo dua? Sau koj tej lus teb nyob hauv koj phau ntawv ceev txog kev kawm.
Nyeem 3 Nifais 18:31–32, Amas 24:7–8, thiab Amas 32:41. Tej nqe no qhia dab tsi txog kev ua hauj lwm nrog cov neeg uas cov tub txib tau qhia dhau los? Sau ntawv txog tej yam uas koj tau kawm nyob hauv koj phau ntawv ceev txog kev kawm. Qhia tej yam no rau koj tus khub.
Npaj kev kom ntsib cov mej zeej tshiab hauv neb cheeb tsam. Yog xav tau, siv qhov app Qhia Kuv txoj Moo Zoo kom paub txog lawv. Nug tej yam zoo li no:
Vim li cas koj npaj siab kawm txog txoj moo zoo?
Thaum twg yog thawj zaug uas koj tau paub txog lub Koom Txoos thiab yog vim li cas?
Muaj dab tsi uas ua rau koj xav ntsib cov tub txib?
Wb ua tau li cas kom txhawb nqa koj txoj kev kawm zuj zus ntxiv?
Los ntawm tej kev sib ntsib no, neb tau kawm dab tsi txog kev nrhiav neeg uas ua tau zoo zuj zus kom xav ua kev cai raus dej? Npaj kev kom siv tej yam uas neb kawm lub lim tiam no.
Rov qab kawm txog tej lub ntsiab lus no. Siv tej zaj lus qhia nyob hauv tshooj 3, thiab npaj ib txoj kev yooj yim kom nrhiav neeg. Xyaum qhia neeg thaum nrhiav neeg.
Xav kom muaj dab tsi coj lub neej thiab muaj lub hom phiaj rau lub neej no
Xav kom nrog Vajtswv sib raug zoo
Xav tau kev pab thaum txiav txim siab txog ib yam dab tsi tseem ceeb
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Nyeem thiab sib tham txog zaj lus “Pom Dav Dua Thaum Npaj Nrhiav Neeg” hauv tshooj no. Hais kom txhua khub tub txib ua kev ntsuam xyuas no.
Sib tham seb tej lub tswv yim no tau pab cov tub txib li cas kom nrhiav neeg rau lawv qhia.
Sau ntawv txog lwm lub tswv yim kom nrhiav tau neeg rau cov tub txib qhia. Caw cov tub txib qhia tias yuav ua raws li lawv tej lub tswv yim li cas.
Caw cov tub txib cuab hom phiaj ua zoo dua kom txawj nrhiav neeg.
Sau ntawv txog ob peb lub cib fim nrhiav neeg.
Muab ib lub cib fim uas tau sau rau txhua tus tub txib. Cia txhua tus tub txib siv tsib feeb npaj qhia seb nws yuav ua li cas qhia ib feem ntawm ib zaj lus qhia yog tias muaj lub cib fim ntawd.
Qhia meej tias yuav tsum tsis txhob qhia ntev dhau qhov tsim nyog rau lub cib fim ntawd.
Caw ob peb tug tub txib qhia zaj lus uas lawv tau npaj rau lawv lub cib fim.
Caw cov tub txib xyaum ib leeg qhia ib leeg ib zaj lus txog txoj moo zoo uas ntev li ib feeb xwb. Tej zaum nej yuav xav tsim ob peb yam ntxwv rau lawv nrhiav neeg, xws li thaum qhia hauv ib tug mej zeej lub tsev, qhia ntawm lub qhov rooj, qhia ntawm ntug kev, los sis nrog ib tug neeg tham uas lwm tus xa ntawv tuaj rau nej qhia. Hais kom cov tub txib xyaum seb yuav qhia li cas thaum muaj tej xwm txheej no.
Nrog nej tsev neeg coj yam ntxwv txog cov mej zeej txoj kev ua tub txib txoj hauj lwm Qhia tias nej tau ua li cas rau cov tub txib thiab cov mej zeej.
Nrog cov thawj coj pov thawj hwj thiab cov thawj coj hauv tej lub kom haum sib tham seb tej kev twg yuav zoo tshaj rau cov tub txib nrhiav neeg rau lawv qhia nyob hauv nej qhov chaw tshaj tawm txoj moo zoo.
Npaj tej kev sib ntsib hawm Vajtswv kom nej hais tau rau cov neeg uas cov tub txib tab tom qhia hauv nej qhov chaw tshaj tawm txoj moo zoo. Nrog cov thawj coj pov thawj hwj hauv zej zog sib tham kom cov mej zeej yuav coj lawv cov phooj ywg tuaj. Caw cov mej zeej tshiab kom hais lawv tej zaj lus tim khawv thiab qhia lawv tej zaj txog lawv txoj kev hloov siab los ntseeg ua ntej nej hais lus.
Tej lub sij hawm nrog cov tub txib mus pab lawv nrhiav neeg rau lawv qhia.
