“Mwakoro 9: Kakaeia Aomata aika Ko na Reireiniia,” Tataekina Au Euangkerio: Te Kaetieti ibukin Tibwauan Ana Euangkerio Iesu Kristo (2023)

“Mwakoro 9, ” Tataekina Au Euangkerio

Mwakoro 9

Kakaeia Aomata aika Ko na Reireiniia

Iangoa Aio

N na kanga ni kamwakura te onimaki iroun Kristo ni kakaeia aomata aika ko na reireiniia?
Ti na kanga ni karababaa nako ara taratara ao ni kanakoraoa ara babaire ibukin kakaeaia aomata aika ko na reireiniia?
N na kanga ni karikirakea au konabwai ao bon onimakinau ni marooro ma aomata ake I kaitibo ma ngaiia n te bong koraki?
Ti na kanga ni katiteuanaira ma membwa n tibwauaan te euangkerio?
Tera ae ti riai ni karaoia ngkana ti karekeia ake a kan reiakinaki?
Tera tabeua kawai ake ti tuai ni kataia ni karaoia ni kakaeakia aomata aika a na reireinaki?

E tuangiia Ana reirei Te Tia Kamaiu are mangauti, “Ma ngaia ae kam na nako ni kakiritiania botanaomata ni kabaneia, ni bwabetitoia nako nanon aran te Tama, ma te Nati, ma te Tamnei ae Raoiroi.” (Mataio 28:19; taraa naba Mareko 16:15). E a manga taekina riki te kakao aei te Uea n ara bong, “Naako ngkami ni kabuta te aonaba [ao] tataekina te euangkerio” (Reirei ao Berita aika Tabu 68:8; taraa naba 50:14).

Te mwakuri ni mitinare bon kakaeakiia aomata, reireinakiia, ao buokakia bwa a na tauraoi nakon te bwabetito. Ko na kakoroa nanon ana mwakuri te Uea n reireia Ana euangkerio ao ni bwabetitoia ake a rairaki ngkai ko “kuneia naake a na butimwai ngkami” (Reirei ao Berita aika Tabu 42:8). Akea te bwai ae e na riki n te mwakuri ni mitinare ni karokoa ko kunea temanna n reireinna. Ni katoa tai taratara reken te tai n tibwaua te euangkerio. Reirei aron kabonganaan kawai ake a nakoraoi n am aono.

E rangi ni kakawaki te mwakuri ma membwa ni kakaeakia aomata. Mwakuri korakora ni karekea onimakinam irouia. Ngkana membwa a onimakiniia mitinare, a na bon tangiria ni kaoiia raoraoiia ao kaain aia utu ni kaitibo ma ngkoe. Aomata aikai a na bon waekoa n rairaki nakon te Uea, ni bwabetitoaki, ao ni rikirake i aon kawain te berita.

E na reke kuneakiia aomata ni kaineti nakon tauraoin te aomata n ongora te euangkerio. E na kakaokoro aia tai aomata n tatabemaniia. E konaa n otinako mwiin te kakae man te moan tai n reitaki ke man reitaki aika mwaiti n te tai ae maan. A mwaiti aomata aika a korakora reitakiia ma mitinare ke membwa n te Ekaretia i mwain ae a moana te kamatebwai ae matoa n te euangkerio. Tai baenikai ni manga reitaki ma ngaiia.

E na iai uaan mwiin am kekeiaki ni kakae imwiin ae ko mwaing nako man te tabo ke i mwiin ae e a bane am tai ni mitinare. N aki tabe ma te tai ke te bwai ae riki mai iai, te Uea e rrangi ni kakaitau te Uea ibukin am kekeiaki.

E kabwarabwarai tuua ao iango te mwakoro aio ake a na buokiko ni kakae. A taabangaki moan tuua aikai. Ma, a konaa mitinare ao taan kairiiri n te mition ni bitii ni kangaraoia ma bwaai ake a rinanona.

Kammwakura te Onimaki ni Kakaeia Aomata aika Ko na Reireiniia

N te tabo are ko beku iai, e a tia ni weteiko te Uea bwa ko na mwakuri “ibukin kamaiuan tamnei” (Reirei ao Berita aika Tabu 100: 4). Ni karaoan aei, ko riai ni kamwakura te onimaki iroun Kristo ni kakaeiia aomata aika ko na reireiniia bwa aonga n rineia n Iriiria ao ni bwabetitoaki.

Te onimaki bon te tua ae mwakuri ao ni mwaaka. Onimaki bwa te Uea e katauraoia aomata bwa a na ongora nakon te euangkerio ae kaokaki. Karekea te taotaonaki n nano n onimakina ae E na kairiko nakoia, ke ngaiia nakoim. Mwakuri i aon te onimaki man katean te kouru, karaoan te babaire, ao karaoa nanon am babaire ni kakaeiia aomata aika ko na reireiniia (taraa mwakoro 8).

Tataro ma te onimaki ngkai ko ukora Ana ibuobuoki te Atua ni kakaeia aomata aika ko na reireiniia. Ngke e kaira te mwakuri ni mitinare Aramwa nakoia Tioromwaite, e tataro: “O te Uea, ko kona n anganiira bwa e na nakoraoi ara waaki ni kairia riki nakoim i nanon Kristo. Nooria, O te Uea, a kakawaki tamneia …; ngaia are, anganiira, O te Uea, te mwaaka ao te wanawana bwa ti na kona ni manga kairia [ngaiia] riki nakoim” (Aramwa 31:34–35).

Aomata ake ko kaitibo ma ngaiia n angiin te tai aki ataia ae a kakaea te euangkerio ae kaokaki ni karokoa a kunea. Te katooto, e taku te tia rairaki temanna, “Ngkana I ongo te euangkerio, e kaona te marena are inanou ae I aki ataia ae iai irou.” E a manga taku temanna, “I a tia ni katiaa te kakae ae I aki ataia bwa I mena i aona.” Tabeman a bon kakaea te koaua ma aki ataia bwa a na kunea ia (taraa Reirei ao Berita aika Tabu 123:12).

Ukoukora ana kairiiri te Tamnei ngkai ko kakaeiia aomata ake ko na reireiniia. Te Kakae ma te Tamnei e bon rangi ni kakawaki riki n ai aron naba te reirei ma te Tamnei. Karekea te onimaki bwa ko na ataia bwa e kanga aron kakaeaia naake a na tauraoi ni butimwaiko.

Kamatebwai ma Toam

A na bon bae ni iai membwa n am tabo aika a rairaki nakon te Ekaretia. Titirakiniia bwa a kanga n reitaki ma te Ekaretia. Aia kaeka e na anganiko nonori bwa ko na kanga ni kakae. Titirakiniia naba bwa a kanga n ataia bwa te bwai are a reireia mitinare nakoia e bon koaua. Koreia ni kakimototoa aia taneiai i nanon am tieno ni kamatebwai.

Kamatebwaian Koroboki aika Tabu

A kanga natin te Atua ni katauraoi ao ni kairaki nakon te euangkerio ae kaokaki?

Karababaa Am Taratara n te Babaire ni Kakae

Ngkai ko ukora kakaeaia aomata aika ko na reireiniia, ataa raoi te kaokoro imarenan kabaean te tai ao te babaire. Kabaean te tai bon kanoaan am babaire ao am bong. Babaire bon karaoan te kekeiaki ae manena ma te tataromwaaka n kabotoa iaoia aomata ao iaon kawai aika tamaroa ni kakaeaia aomata.

Te waaki ae karaoaki ae eti, n te tai ae riai ao n te tabo ae riai, e kona ni buokiko ni kakaeia aomata aika ko na reireiniia. Titirakiniko titiraki aikai:

Te tabo raa ae ti na kaitibo iai ma aomata are e katauraoiia te Uea?
Iaa taabo ao aekan waaki ni kakukurei aika tamaroa ni kakaeakiia aomata n te tai aika a onoti n te bong teuana ke n te wiiki?
Ti na kanga ni kaota te tangira, ni beku ibukiia, ke n uotii bwaai aika manena ni maiuia n te tai aei?
Ti na kanga ni kabongana oin korakorara, rabakaura, ao ara taarena n tabekiia rake?
Tera ara katauraoi bwa ti aonga ni manga kabongana ngkana e aki mwakuri are ti karaoia?

Kataia atai kawai aree katauraoia iai aomata te Uea. A kukurei ni marooro ma ngkoe? A kakaei buokaia ke karauan nanoia?

Iangoi aanga n te kekeiaki ni kakae ae e a tia n rangi n nakoraoi. Kam moan reitaki ma ngaia iaara? N te kekeiaki anne a irekereke iai membwa ake n te tabo? E kabonganaki bwaai n rabakau aika boou?

Moana am babaire man iangoana bwa ko na kanga ni kakabwaiaia aomata, ao e na waekoa n roko riki mwiin am kamatebwai.

Kamatebwai ma Toam

Ma toam, kabongana te taibora ae i nano n rinanon am kekeiaki ni kakaeia aomata aika ko na reireiniia. Baireia bwa ko na kabonganai iango aika a boou iroum.

Te Kekeiaki ni Kakae	N tabetai	N angin te tai	E Kuri ni Katoatai
Ti riki ni kinaia membwa ao ni boutokaiia n aia kekeiaki n tibwa te euangkerio, ni ikotaki ma membwa aika a boou, kairake, naake a katauraoi ni beku n te mition, mitinare aika a bane aia tai, membwa ake ti ngaiia kaain te aro n aia utu, ao unimwaane aika tauraoi.
Ti mwakuri ni karekea onimakinara irouia membwa bwa aonga n namakina te mweraoi ni kaoiia kaain aia utu ao raraoia bwa a na kaitibo ma ngaira.
Ti mwakuri ma taan kairiiri n te uoote n tain te bowi ni babaire ni boutokaa ara kekeiaki ni kakae ao n ataia ngkana iai aomata ae ti kona n reitaki ma ngaiia.
Ti mwakuri ma aomata aika a bon tibwa reiakinaki, ake a kaman reiakinaki, ao aomata ake a kanakoaki araia nakoira rinanon te kaombiuta bwa ti na kakaiia.
Ti marooro ma aomata aika mwaiti are a kona n reke iroura n te bong ae koraki.
Ti katauraoi ni maiun tamneira ao n tataro ibukin Ana ibuobuoki te Atua ngkai ti babaire ibukin kakaeaia aomata ake ti na reireiniia.
Ti kakoauaa bwae katauraoiia aomata ibukira te Uea bwa ti na reireiniia.
Ti iangoia bwa ti na kanga ni buokiia naake ti kaitibo ma ngaiia n namakina mwaakan korakoran te Tamnei ae Raoiroi.
Ti katea ara kouru n te kakae ni katoa wiiki ao ni katoa bong (taraa mwakoro 8).
Ti kateimatoaa kakaeiia aomata ake ti na reireiniia.
Ti kakaei anga ni karaoi ao ni kabonganai aekakin nako kawai ni karekeaia aomata. Ti katai kawai aika a boou ao n totokoa ae ti na bae i nanon are ti tataneiai ini karaoia.
Ti babaire bon ti ibukin te kakae. Ti babaire bwa ningai, iaa, ao ti na kangaa ni kabotoa ara iango iaona.
Ti iangoia bwa te tabo raa ae tamaroa ao te tai raa n te bong anne ae ti na kakaiia iai aomata ake ti na reireiniia.
Ti iangoia bwa baikara mwakuri aika a wakinaki ake mai i mwaaina ae a rangi ni mwakuri raoi.
Ti bitii aron ara babaire ni kakae ngkana e kainanoaki ao ni iai te babaire teuana ae ti kona ni karaoia ngkana te mwakuri are e wakinaki e aki bwai.
Ti kabongana te app iaon Preach My Gospel ni kakae, ni katei kouru ao ni karaoi babaire, ao n rinanoa ao ni kabooui ara rekooti ni katoa bong.
Ti kabonganai oin ara taarena ao korakorara ni buoka aron te kakae.
Ti baireia bwa ningai ao e kangaa aron kabonganakin bwaai ni kaongora ao bwaai n rabakau aika boou ake tabeua ni kakaeiia aomata ake ti na reireiniia.
Ti kabonganai anainano ni kanako rongorongo ao te anganano man te tabo ake a kaitarai baike a tangiri ao kainanoia aomata n ara aono.
Ti waekoa ni kaekai kan oota ake i aonrain ao rongorongo mai irouia aomata ake iai nanoia ni kan ongoraa.
Ti na kaman bairei baike ti na katokai iaon bwaai ni kaongora ao mwakuri ma membwa ni kakae i aonrain.

Bwaina te Kakaonimaki n Am Kakae

Karaoa te Kakae bwa te Kekeiaki ae Teimatoa

I nanon moan tein te Ekaretia ae kaokaki, e kaokioki kaetieti nakoia kurubu ni mwaane te Uea bwa a na reirei Ana euangkerio “i nanon kawaia” n aia tai ni mwananga. E tangiria bwa ana kabongana reken aia tai n tibwa te euangkerio. (Taraa Reirei ao Berita aika Tabu 52:9–10, 22–23, 25–27.)

Anai ni kabonganai kaetieti aikai nakon am kakae. Karaoa te kekeiaki ma te nanomwaaka ni kakae rinanon nako te bong anne. Bairea aron am kekeiaki ni kakae—ao tarai naba kanoan taai ake aki baireaki. Kakaeaia aomata aika boou bwa ko na reireiniia bon te bwai ae e na teimatoa karaoana.

Ukora te kairi mai ieta ao tauraoi ni kabonganai kawai aika mwaiti. Kabotoa am taratara i aon kawai aika a rangi n nakoraoi n am aono.

Katuka Aoo i nanon te Ran

Ni irekereke ma te mwakuri ni mitinare, e taku Beretitenti Dallin H. Oaks:

“A na akea mai ibuakora ae na katotoonga te tia akawa are e taku bwa e a tia n akawa ni kabanea te bong anne ngke bon ni koauana raoi e a tia ni kabanea ana tai n arona ni mwananga nakon ao man te ran, ni kana ana katawanou, ao ni mengomengo ma ana bwai n akawa. Te akawa ae nakoraoi e bon irekereke ma maanra aron tikun am ao n akawa i nanon te ran, tiaki ae maanra ngkoe man kitanan am auti. Tabeman taan akawa a maan ni kitana mweengaia i nanon tebwi ma uoua te aoa ao aia rain n akawa e tiku i nanon te ran ti tebwina te aoa. Tabeman taan akawa a kitana mweengaia i nanon tebwi ma uoua te aoa ao aia rain n akawa e tiku i nanon te ran ti uoua te aoa. Te aroaro ae te kabanea aei tao a na miimii bwa bukin tera aki karekea ae titebo mwiina ma ake tabeman.

“Te tua anne e kaineti naba nakoia mitinare, ake a aranaki iroun te Mataniwi bwa ‘taan akawaia aomata’ [Mataio 4:19]. Aia ao ke rain n akawa mitinare e riai ni bwaka i nanon te ran n te tai naba are e kitana iai ana auti teuanne ke neienne” (tieminaa ibukiia beretitenti n te mition aika boou, Tuun 20, 2000).

E kamataata te kabotau aei Unimwaane Quentin L.Cook. Irarikin are ko katuka am “rain n akawa i nanon te ran” i nanon te tai ae maan, e reirei bwa mitinare ake a kuneiia aomata n reireiniia “aki toki ni katikui aia rain n akawa aika mwaiti i nanon te ran. …

“A kinaiia ao n reitaki ma membwa ake ti ngaiia man aia utu.

“A kakaea i nanon aia [Preach My Gospel app] ibukia aomata ake a tia n reireiaki mai i mwaaina n reitaki nakoia n te tareboon ao te kanako rongorongo.

“A anga ibuobuoki nakoia membwa, aomata ake a tia n reireinaki mai i mwaaina, aomata aika a reireinaki ngkai, ao ni kabutaa taabo ni maeka nako. …

“A buokiia membwa ni karaoi rongorongo n te euangkerio ni tibwaia n are bon oin … aia iteraniba ni kaongora.

“A karekei araia ake ana reiakinaki mai irouia aomata ake a kawariia ao n reireiniia” (“Be Spiritual Pathfinders and Influencers,” aia botaki n taromauri mitinare, Tebetembwa 10, 2020; kairaki katuruturuana).

Kamatebwai ma Toam

Maroroakin titiraki aikai:

Tera tabeua kawai ake ko kona iai ni katikui am “ao n akawa i nanon te ran” ni kamaanna i nanon te bong anne?
Tera tabeua kawai are ko kona iai ni katikui ao n akawa aika mwaiti i nanon te ran ngkai ko kakaeiia aomata aika ko na reireiniia?
Tera bwaai ni ibuobuoki ake i nanon Tataekina Au Euangkerio app ae e kona ni buokiko?
Ko na kanga ni kabonganai bwaai n rabakau aika boou ni buokiko ni katikui ao n akawa aika mwaiti i nanon te ran?

Marooro ma Aomata Nako

Karikirakea te nano ae matoa ni kairiia aomata nakon Kristo (taraa Motiaea 28:3). Ngkana ko namakina te nano aio, a na bane ni kaotaki aam tangira ao tabeaiangam i nanon am kekeiaki ni kakae. E na oti naba am tangira i nanon am kakarabakau.

Marooro ma aomata aika mwaiti n aron am konaa n te bong ae koraki. Marooro ma ngaiia n te tabo are ko nako iai. Ngkana e riai, mwananga nakon te mweenga teuana ma teuana. E tuangiia tabeman unimwaane ake n te Ekaretia rimoa te Uea, “kaurea wiim n taekina au euangkerio.” E berita ngkanne bwa wiia “a na kaonaki” n te bwai are a na angareirei iai (Reirei ao Berita aika Tabu 30:5; taraa naba 33: 7–10).

N aron naba aei, e tuangia Iotebwa Timiti ao Sidney Rigdon te Uea, “Tabekarake bwanaami nakoia aomata aikai; taekini iango ake N na kaaki i nanomi.” I mwiina E berita, “E na kaotaki nakoimi … n te tai raoi anne, te bwai are kam na taekinna” (Reirei ao Berita aika Tabu 100:5–6).

Ngkai ko kaitibo ma aomata, ko na namakina n taainako te Tamnei ni buokiko n ataa te bwai ae ko na taekinna. Ma, ngkana ko aki namakina te wirikiriki, moanna man te tabo teuana—tao man te titiraki ao ni kakauongo nakon aia kaeka (taraa “Kakaea Bwa a Mena Iia Aomata” n te mwakoro aio). Ke tao taetae i aon Iesu Kristo ke i aon wetean Iotebwa Timiti bwa Ana burabeti te Atua.

Iango aikai a kona ni buokiko ni katauraoiko ngkai ko marooro ma naake ko kaitibo ma ngaiia:

Moangare, nanonna raoi, ao tatangira. Kakaei kawai n reitaki ma te aomata ao moana te marooro.
Kakauongo ma nanom nakon te bwai are e taekinna te aomata. Ukoria bwa ko na mataata nakon kainanon ao te bwai ake a tangiria aomata n tatabemaniia nako. Aanga te buoka ae onoti ngkana e riai.
Iangoia bwa e na kanga te euangkerio ni buoka kainanoia. I mwiina reirei i aon te euangkerio ae bebete ao kaoiia bwa a na reiakina riki ae mwaiti. Kaotia bwa e kanga te euangkerio ae kaokaki n uota te kantaninga ae korakora ao nanona i nanon maiuia.
Titirakiniia aron aia utu. Buokiia bwa a na noria bwa e kanga te euangkerio ae kaokaki ni kona ni kakabwaia aia utu. Anga nanom ni buokiia ni kakaea araia aia bakatibu ake a tia ni mate.
Kaoiia bwa a na roko nakon te bootaki n toa.
Anga booki aika uarereke ke ana boki n reirei te Ekaretia riki tabeua, aika a kaotinakoaki ao ake i aon te intanete.
Tibwaia ma ngaiia te kantaninga ngkai te mitinare ngkoe ao bukin tera ko baireia bwa ko na beku ni mitinare.

Tuua aika a kaineti naba nakoim i nanon am tai ni kaitibo ma membwa.

E bon ririki ae e na iai te nakonnano ni maaku ibukin te marooro ma aomata. Tataro ibukin te onimaki ao te ninikoria n reireia te euangkerio ae kaokaki. Aomata ni kabane ake ko kaitibo ma ngaiia bon tarim ke mwanem i nanon ana utu te Atua. Uringa bwa “akea ae totokoia ngkana iai ae kan nakoina, ae bwatabwata ke ae mainaina, te toro ke ae inaomata, te mwaane ke te aine; … titebo aroia ni kabane imatan te Atua” (2 Nibwaai 26:33).

Am Kamatebwai ke ngke ma Toam

Wareka te rongorongo mairoun Victor Manuel Cabrera n “Thirsting for the Living Water,” Ensign, Aokati 2001, 60–61. Ngkai ko karaoia, noria bwa e kanga ni katauraoaki bwa e na butimwaaia mitinare ao a kanga mitinare ni kabongana te tai ae aki ataaki nreireinna te euangkerio.

E kanga te mwaane n tia ni katauraoaki ibukin te euangkerio ae kaokaki?
Tera ae e na kona n riki ngkana mitinare aki tibwa te rongorongo n te euangkerio?
Rinanoa te bwai are ko karaoi ngkoananoa. Ko a tia ni marooro ma aomata aika mwaiti nakon am kabanea ni konaa? Ngkana ko tuai, katei kouru ao karaoi babaire bwa ko na marooro ma aomata aika mwaiti n te bong aei.

Kamatebwaian Koroboki aika Tabu

Tera ae ko kona n reiakinna man booki aikai tabu aikai n kakaeaia aomata aika ko na reireiniia? Tera ae ko kona n reiakinna man booki aika tabu aikai bwa tera ae ko na reirei i aona? Tera ae e berita iai te Uea?

Reirei ao Berita aika Tabu 24:12; 28:16; 33:7–15; 60:2–3, 7

Katiteuanaaki ma Membwa

“Kaoakiia ni kabane bwa a na butimwaea te euangkerio bon mwakoron te mwakuri ni kamaiu ao te karietataaki” (Aeniboki ni Kabuta, 23.0). Mwakuri ma Membwa n te Ekaretia ni kakaeia aomata aika ko na reireiniia. Ngkana a kanakoi araia aomata membwa nakoim ao a manga iriira te reirei, aomata a waekoa riki ni bwabetitoaki ao n tiku ni kakaonimaki n te Ekaretia.

Karika te Reitaki ae Matoatoa ma Taan Kairiiri n te Tabo

Karika te reitaki ae matoatoa ma kaain te bitiobiriki ao taan kairiiri ake tabeman. Te tia kairiiri n te mition n te uoote (ngkana iai ae weteaki) ao beretitentii n te kooram n unimwaana ao te Bootaki n Aine ngaiia bon moan aomata ae ko na reitaki nakoia. Ukora aia kairiiri, ao boutokaiia n tain te boowi ni babaire ni katoa wiiki (taraa mwakoro 13).

N tain te boowi ni babaire ni katoa wiiki, mwakuri ma te tia ibuobuoki n te kooram ni ibonga ao te beretitenti n aia kiraati Ataeinnaine ibukiia ake a ikawai. Kairake aikai iai tabeia ae moan te kakawaki n tibwauaan te euangkerio. Buokiia ni kaungaia kaain te kooram ao membwa n te kiraati n tibwaua te euangkerio. Te kawai teuana bwa kairake a na kaoiia raraoia nakon taian waaki ni kakukurei.

Titirakiniko ni katoatai, “I riki ngai bwa te kakabwaia nakoia taan kairiiri n te tabo?” Karikirakea te anua ae “N na kanga n ibuobuoki?” N aron Amon n Ana Boki Moomon, e kawariia taan kairiiri n te tabo ma anuana ni ibuobuoki (taraa Aramwa 17:23–25).

Nakoia taan kairiiri n te mition, e reirei Beretitenti Russell M. Nelson: “Au kantaninga bwa ko reiakinna n tangiriia taan kairiiri n te tabo ao membwa. Tabekiia rake ao kaungaiia. Ami konabwai n reita ingaingan nanoia mitinare n teimatoa n aia kekeiaki n tangiria membwa tiaki te bwai ae naki kaokiokaki. E na korakora rikiraken nakoraoin am mwakuri” (“Hopes of My Heart,” seminar for new mission leaders, June 23, 2019).

Boutokaiia Membwa n Aia Kekeiaki n Tibwaan te Euangkerio

A mwaiti kawai ni boutokaiia ao ni kaungaia membwa n tibwaaan te euangkerio. Buokiia bwa a na noria bwa e kanga n tia ni kakabwaiaaki maiuia n te euangkerio. Kaungaia bwa a na “taui i eta [aia] taura bwa e na oota nakon te aonaaba” (3 Nibwaai 18:24).

Buokiia membwa bwa a na karaoa nanon te tua n tangira, tibwatibwa, ao ni kakao. Anga katooto ni kawai aika bon riai ao ni kakaraoaki ae a kona iai ni kamwakurii taian tua aikai.

Tangira. Teuana te kawai ni kaota tangiran te Atua bon man tangiraia ao buokaia Natina. Kaungaia membwa bwa a na kawariia ma te tangira kaain aia utu, raraoia, kaain rarikiia, ao aomata tabeman. Aron nako te kekeiaki ni kaota te tangira bon te kawai ae kakawaki ni kawakinan berita aika tabu are atia ni karaoia ma te Atua (taraa Motiaea 18: 9–10).

Tibwaia. Ibukina bwa iai aia tangira ibukin te Atua ao Natina nako, e bon reke irouia membwa ae a tangiria n tibwa te kakabwaia are E a tia n anganiia (taraa Ioane 13:34–35). Kaungaia membwa bwa a na tuangiia aomata tabeman bwa e kanga te euangkerio ni kakabwaiai maiuia. Kaungaia bwa a na taetae iaon te Tia Kamaiu ao aron Ana mwkauri nakoia aomata. Buokiia bwa a na namakina te kimwareirei n tibwaan aia tangira, aia tai, ao baika a riki inanon maiuia. Buokiia bwa a na reiakinna bwa e kanga aron te tibwatibwa n te kawai ae riai ao ae kakaraoaki—n ae bebete bwa mwakoron te bwai are a bon tataneiai ni karaoia ni maiuia.

“Ti bane n tibwai bwaai ma aomata tabeman. Ti kakaraoia n taainako. Ti tibwaia bwa aekakira tamnei ao amwarake aika ti tangiri, bwaai aika a kangare aika ti noori, taabo aika ti kawari, korobanna aika ti tangiri, ao kibuntaeka aika a karokoa namakinan te tamnei.

Ti na kanga ni karinii i buakon rinanin bwai ake ti a tia n tibwai n te bwai ae ti tangiria ibukin ana euangkerio Iesu Kristo? … Man tibwaan ara taneiai ae tamaroa n te euangkerio ma aomata tabeman, ti ira kakoroan nanon ana kakao ae korakora te Tia Kamaiu” (Gary E. Stevenson, “Tangira, Tibwatibwa, Kakao,” Riaona, Meei 2022, 86).

Kaoa. Te Tia Kamaiu e kaoiia ni kabane bwa a na karekea Ana euangkerio ao ni katauraoi ibukin te maiu ae akea tokina (taraa Aramwa 5:33–34). N aron te tibwatibwa, te kakao bon te bwai ae bebete ni kairiia ara utu, raoraora, ao kaain rarikra n te bwai ae a tia ni kakaraoia membwa. Kaungaia membwa bwa a na tataro n aron kaoaia aomata ni kawai aikai:

Nakomai ao Nooria. Kaoiia aomata n “roko ao n nora” te kakabwaia are a kona ni karekea rinanon Iesu Kristo, Ana euangkerio, ao Ana Ekaretia.

1:17
Nakomai ao beku. Kaoiia aomata n “roko ao ni beku” ibukin kainanoia aomata tabeman.
Nakomai ao Kaainna. Kaoiia aomata n “roko ao ni kaainna” bwa membwa n Ana Ekaretia Iesu Kristo ae kaokaki.

E taku Unimwaane Gary E. Stevenson: Bubua kawai ni kakao ae ti kona ni kanakoa nakoia tabeman. Ti kona ni kaoiia tabeman bwa a na ‘roko ao n nora’ te bootaki n toa, waaki ni kakukurei n te uoote, te witeo iaonrain are e kabwarabwaraa taekan ana euangkerio Iesu Kristo. ‘Roko ao noria’ e kona n riki bwa te kakao ni wareka ana Boki Moomon ke ni kawara te tembora ae boou n tain neweabakina i mwaain katabuana. N tabetai te kakao bon te bwai ae ti kanakoa i nanoaa—te kakao ni bon nakoira, n anganiira te atatai ao te nonori ni waaki aika a katobibiira, bwa ti na mwakuri iaona” (“Tangira, Tibwatibwa, Kakao,” 86).

Kakoauaa bwa ko buokiia kairake n tangira, tibwatibwa, ao ni kakao. Kairake a rangi n tarena n tangiraia raraoia, n tibwa te bwai are i nanoia, ao ni kaoiia nakon waaki ni kakukurei.

Buokiia membwa ni mataata bwa angiin te kekeiaki ni maiuakin tuan te tangira, tibwatibwa, ao kakao e bon uaana, bwa tao te aomata e kaitibo ke aki ma mitinare ke ni kaaina te Ekaretia.

Buokiia membwa n onimaki iaon korakoraia n tibwauaakin te euangkerio. Tabeman a rangi n nakoraoi ni kakaeakiia aomata aika a na reireinaki, ao tabeman a nakoraoi n te anga reirei. Tabeman kanga a bon bungiaki ma te konabwai n reitaki ma raraoia, ao tabeman a tangiria n tataro ibukiia raraoia. Buokiia n noria ae iai kawai ibukiia aomata nako n ira buakon te waaki.

Ngkana ko kawariia membwa, karaoia bwa iai bukina. Kaotia bwa e rangi n tatauraoi nanom n te mwakuri ni kakae ao n te anga reirei. Karinea aia tai ao babairean aron aia tai.

Tabeman membwa tao a na tangiriko bwa ko na anga te rongorongo man teuana mai buakon te reirei. Te koaua n te euangkerio e bita aron te maiu. Kakorakorakia membwa ni mataata n te euangkerio e na karikirakea onimakinam irouia ao ni karikirakea ungaia n tibwauaia. Buokiia bwa a na kinaa te Tamnei ao ni mwakuri ma ana wirikiriki.

Ukora aron kakaeakiia aomata ake ko na reireiniia rinanoia utu ake ti ngaiia kaain te aro n aia utu, unimwaane aika tauraoi, membwa ake a manga oki, ao membwa aika boou. A na bon bae n rawata kaain aia utu ao raoraoia aika kaain koaua ake tabeua.

N te bwai are ko karaoia ma memba, iriira te Tamnei ao ukora aron katean aia onimaki iaon te Tia Kamaiu, Iesu Kristo.

Ibukin riki iango ao bwaai ni ibuobuoki bwa ko na kanga ni boutokaia membwa n tibwauaa te euangkerio, taraa:

share.ChurchofJesusChrist.org.
“Sharing the Gospel” n te Gospel Library.
Tataekina Au Euangkerio, mwakoro 13.
Aeniboki ni Kabuta, mwakoro 23.

Kakabwaia ake a Beritanaki n Tibwauaan te Euangkerio

Buokiia membwa ni mataata iaon kakabwaia aika kakawaki man tibwauaan te euangkerio. A raonaki ma:

Te kimwareirei ao te rau (see Reirei ao Berita aika Tabu 18:10–16; Aramwa 26:11, 13, 35; Aramwa 36:24–28).
Te mwaaka ni kamatoaaki mairoun te Atua (taraa Motiaea 18:8–13; Ioane 15:4–5).
Kamanoaki man te kariri (taraa 3 Nibwaai 18:24–25).
Kabwaraan te bure (taraa Reirei ao Berita aika Tabu 62:3).

Kamatebwai ma Toam

Rinanoa kanoan te boowi ni babaire are n te wiiki ae nako. Ko na kanga ni karikia bwa e na mwakuri raoi riki? Rinanon taian bubuti mai irouia taan kairiiri man te uoote ao baireia bwa ko na kanga ao ningai ae ko na kaekaia iai.
Iangoia bwa ko na kanga ni bairea am mwakuri ni mitinare nakon te boowi ni babaire are imwiina.
Reiakin araia taan kairiiri n te uoote (mwaane ao aine). Iangoia bwa tera ae ko na karaoia ibukin te namwakaina ae na roko ni karikirakea te reitaki ae matoatoa ma ngaiia ao ni boutokaiia n aia waaki ni mwakuri ni mitinare.

Kakae rinanon te App are Tataekina Au Euangkerio

Te app are Tataekina Au Euangkerio bon te bwai ni ibuobuoki ae tamaroa ni kakaeakiia aomata aika ko na reireiniia. Mitinare ake a katoatai ni kabonganai bwaai ake iaon te app aei e korakora riki materaoin aia mwakuri ni kakae. Bwa ko aonga n rangi ni mwaatai i aon bwaai aika i aon te app, nakon te kataneiai ae katauraoaki i nanon te app. Tatauraoi nakon namakinan ana wirikiriki te tamnei ae ko na karekea ngkai ko rinanon araia aomata.

N te app aei iai i nanona rongorongo i aoia aomata ake a kaman kanakoaki araia ibukin reiakinaia, kawarakiia, ke atia n reireinaki. Tabeman mai ibuakoia aomata aikai tao a bae ni manga tangiria ni kaitibo ma mitinare riki. Tao a na bae n ataiia naba aomata tabeman aika a kukurei n ongoraa taekan te euangkerio.

I nanon am tai ni baire, kabongana te mwabe ao te raumea n am kakae n te app ni moanibwaia bwa antai aomata ae ko na kawariia. Tarai rongorongoia ao reiakinna bwa a kanga ni kuneaki. Taraia ngkana iai te rekooti i aoia membwa ake a tia ni buokiia. Kabongana te rongorongo aio ni baireia bwa tera ae nakoraoi n aron manga kawaraia.

a kamatebwai mitinare i aon aia tareboon

Kabongana te bwai ni ibuobuoki n raumea i nanon te app ni katebenakoia ni kabane naake:

A kaman katea aia bong ni bwabetito ma aaki bwabetitoaki.
A iriira te bootaki n toa tao teuana te tai ma a tuai bwabetitoaki.
A tia ni karekea teniua ke ae raka riki te reirei.
E tuai reitaki te aba ma ngaiia n taai aikai.

Ngkana aomata ake ko reitaki ma ngaiia aki tangiria ni kan reireinaki ke a rineia ni katoka kakawarakiia, korei rongorongo akanne n te app. Koreia ni kaotia bwa ko na kanga n teimatoa ni reitaki ma ngaiia ao n tabeakiniia ni karokoa a tauraoi ni manga reiakinaki. Te katooto, iangoia ni kaoiia bwa a na kabaei araia bwa a na kakarekea te rongorongo iaon Iesu Kristo ke reirein te euangkerio ake tabeua. Ko kona naba n reitiia ma membwa ake a kona ni kaekai aia titiraki ao n nabeakiniia n te bwai are a tatangiria ao n riki bwa raoraoia. Katuka te kauring iaon te app bwa a na manga kakawaraki. Titirakiniia ngkana ataa temanna ae tao e tauraoi n ongoraa.

Ko kona naba ni kuneia aomata n reireiniia rinanon te app are Tataekina Au Euangkerio man kabonganaan te raumea ke te kurubu n kanakoi rongorongo nakon te kurubu. E kona n riki aio bwa te kawai ni kaotia nakoia aomata taekan bwaai aika a riki n aron te waaki ni kakukurei n te uoote ao te taromauri ni bwabetito. Ririmwiin taian bobotaki aikai ni kanakoan kakao ae bon mai iroum.

Kamatebwai ma Toam

N noria bwa bon te bwai ni ibuobuoki ae tamaroa te app are Taetaekina Au Euangkerio n te kakae, katai waaki aikai. Ngkai ko karaoi, kamwataua raoi taian namakin ake ko karekei.

Ni kabongana te raumea, katebenakoia aomata ake a tia n anganaki te reirei teniua ke ae raka riki. Ibukiia n tatabemaniia kaoiia bwa a na ira te taromauri n te Tabati aei.
Karaoa te raumea ni kakaeia ni kabane naake iai aia bong ni bwabetito ae kateaki ao a tia n iriira te taromauri tao uatai.
Baireia ni kaongoia aomata n tatabemaniia n irii waaki ni kakukurei n te uoote ke te mwakuri n ibuobuoki. N taai tabetai ko na bae n tangiria ni kanakoa te rongorongo nakon te kurubu ao n ruamwiia aomata ni bon kaka temanna.
Marooro ma toam naake iai am namakin iaoia. Karaoi babaire ni kawariia, ke tao n reitaki nakoia.

Kakae rinanon te mwakuri ni Ibuobuoki

Katauraoi Taai ibukiia Aomata bwa a na Roko ao ni Beku

E kona n reke aia taneiai aomata ae tamaroa ao n reitaki ma mitinare ao membwa n te tabo n tain waakinan te mwakuri ni ibuobuoki. A mwaiti aomata aika a kukurei n tibwauaa aia tarena, rabakauiia, ke aia ibuobuoki ma a ti kainanoa ae a na kaoaki.

Kaoia aomata bwa ana ira buakon te mwakuri ni ibuobuoki are e baireaki man te uoote. Ko kona naba n reitiia aomata ma waaki ni ibuobuoki n aron ake n te JustServe.org n te tabo are e tauraoi iai. Ngkai ko beku ma aomata tabeman, kam uaia n reitaki n te kawai ae moan te mwakaroiroi.

Aanga te Ibuobuoki

N aron te Tia Kamaiu, “[nako] karaoa ae raoiroi” (Mwakuri 10:38; taraa naba “Nakonako ni Karaoa ae Raoiroi” inanon mwakoro 1). Tataro bwa ko na atai taai ni kakaraoa ae raoiroi rinanon nako te bong teuana ma teuana. N tabetai am ibuobuoki a na tia ni baireaki, ma n angiin te tai a na bon aki baireaki. Kakaei kawai aika a bebete ma ni waekoa ni beku, ibuobuoki, ao tabekiia rake aomata. Uringnga bwa te Uea e karekei taai aika aki kantaningaaki ni kawariia ao ni kakabwaia aomata tabeman.

Beku ma te nano ni koaua ni buokiia aomata. Ngkana te ibuobuoki e karekea te tai n anga reirei, kakaitau iai. Ngkana e aki, ngkanne kakaitau n reken karaoan ae tamaroa ibukin temanna. Kaekai titiraki ngkana aomata a titiraki. Ngkana iai temanna ae kaota nanona, kaeka n ae kimototo ao bairea te tai ni kaitibo n te tai teuana n tibwauaa te rongorongo.

Kakoauaa bwa ko na ira te kaetieti ibukin te ibuobuoki i nanon Kainibaaire ibukiia Mitinare n Riki bwa Ana Reirei Iesu Kristo, 2.7 ao 7.2.

Kakaeia Aomata n te Tabo are A Mena Iai

Kakaeaia aomata n te tabo are a mena iai e moanaki man kataan norakiia n aron are e nooria iai te Atua. Katautaua bwa tao ko kairaki bwa ko na taetae ma te aomata aei, ke teuaane ke neienne tao e kairaki nakoim. Ukoria bwa ko na mataata ni kainanoia ao te bwai are a tangiria aomata akanne ni maiun tamneia. Kakaea bwa tera ae moan te kakawaki nakoia, riki n aia reitaki ma aia utu ao te Atua. Ko kona n anga titiraki n aron aika i nano—ao imwiina ongoraa ma nanom ni koaua:

Tera ae moan te kakawaki iroum?
Tera ae e anganiko te kimwareirei?
Tera ae ko tangiria ibukim n taai aika a na roko ao ibukiia naake ko tangiriia?
Tera kangaanga aika ko kaitarai ni karekean te kantaninga ao am iango ake ko iangoi?
Tera mai ibuakon bwaai ni maium ae ko tangiria ni katamaroa?

Ukorii kairi mai iroun te tamnei ngkai ko iangoi baika ko a tia n reiakin iaon ana kantaninga ao te bwai are e tangiria te aomata. Tera koaua n te euangkerio ae e bon kaineti nakon are e tangiria teuanne ke neienne?

Iangoa arom ni kaeka man ana nonori te aomata anne. Tera ae e ataia teuanne ke neienne ibukim? Tera ae ko kona n anga ae e na ibuobuoki? E namakinna te aomata anne ae reitakim ma ngaia e na uaana?

Iangoi bukina ae kakaokoro are aomata a na tangiria iai ni kinako, membwa ake tabeman, ke te Ekaretia. Tabeua katooto ake ko kona ni katauraoi a kaotaki i nano.

Aanga Taneiai ke Rongorongo ae a na Bongana Ibukiia

Kabonganai bwaai ni ibuobuoki n te Ekaretia ao oin am tarena ao korakoram ni katomai baike a nano iai aomata. Ukora ana ibuobuoki Tamara are i Karawa n anga rongorongo ke taneiai ae bongana nakon te aomata.

Tauraoi butimwaai kairi mai iroun te tamnei ao rangi ni kamwaiti aanga aika a kakaokoro ni iangoi taneiai ke rongorongo ae ko kona ni katauraoi. Tabeua iango a katauraoaki i nano.

Tibwai ringke n bwaai ni ibuobuoki n te Ekaretia ake a anga rongorongo iaon bwaai ake a na nano iai.
Booa te bootaki n aron te taromauri (ni bon itaramata ke rinanon te intanete n ae maiu).
Aanga bwaai n tain te bootaki n te tabo ke n tain kaotakin bwaai (te katooto, katea rikin te utu n te tabo ni bobwai n te tabo).
Anganano n reireina te kiraati.
Karaoa te kiraati ibukin kamatebwaian koroboki aika tabu, ke anga nanom ni wareka te Baibara ao booki aika tabu ake tabeua ma ngaiia.
Aanga te reirei iaon te Ingiriti bwa te kauoua n taetae.
Katanoata nakoia te botanaomata ana waaki ni kakukurei te Ekaretia n aron baka n amwarake n tain te motirawa ke te kiraati iaon te riki n toronibwai. Kabonganai beeba aika tibwaaki nako ke bwaai ni kaongora.
Kaoiia nakon te taromauri ni bwabetito.
Anga nanom ni kanweabaia n taian auti ni bootaki.

Teuana mai ibuakon te taneiai ae kakaawaki are ko kona ni buokiia iai aomata bwa e na reke irouia bon iran te taromauri n te Ekaretia. Kaoiia ao kabwarabwara bwa aekakira arona. Tuangiia bwa e na kanga iriiran te bootaki n toa ni kakabwaia maiuia.

Kaota Aron te Reitaki ae Koaua

A mwaiti aomata ae a tangiria ni kaitibo ma aomata tabeman n aia komiunite ke n rangi ni kinaia raoi. Tabeman aomata a tiku ni maroa. Tabeua iango ibukin buokan kaotan aron te reitaki ae koaua a karinanaki inano.

Kawariia aomata ake a tibwa mwaing nakon te aono n anga butimwaeaia.
Kaotiia aomata n te komiunite nakoia membwa ake a tia n tibwauaa nanoia ni kan ongora.
Kaoia aomata nakon bootakin te uoote, waaki ni kakukurei, ao auti are a uki aomata n roko iai.
Kukurei ni buokiia ni katomaiia ma te tia kairiiri ibukin te tembora ao rongorongon te utu n te uoote, are e kona ni buokiia n reiakina riki taekaia aia utu ake a tia ni mate.
Kukurei n reireiniia aomata bwa e kanga aron karaoan te bootaki n utu n te tairiki ke ni wareki koroboki aika tabu n aia utu. (Taraa Aeniboki ni Kabuta, 2.2.4, ibukin tuua aika a na ibuobuoki ae e kona ni bitaki nakon te bwai are a rinanona aomata.)
Kaoiia aomata ni kaineti nakon aia roro n ira te tieminari, ni ira te intitute, ke ira buakon te BYU–Pathway Worldwide.

A mwaiti kawai aika a rine ni kakaeaia naake a tia ni katauraoaki ibukin te euangkerio ae kaokaki. Karaoa are ko kona ni karikiko n tauraoi i mwaia naake a tia ni katauraoaki.

Kamatebwai ma Toam

Katebenakoi tabeua kawai n te mwakoro aei ae ko tuai ni karaoi. Karaoa baireana bwa ko na katai tabeua mai ibuakon iango aikai nakon te wiiki ae e na roko.

Reitaki ma Aomata ake a Kanakoaki Araia Nakoim

Aomata ake a kanakoaki araia nakoim tao a tauraoi ni butimwaea ana euangkerio Iesu Kristo. Aara ake a roko iroum tao a reke mai irouia membwa n te Ekaretia, mitinare ake tabeman, ana etekuata te Ekaretia, ao man te mwakuri iaon bwaai ni kaongora man te tabo.

Karoko Irouia n te Tai ae Waekoa

Ngkana e kanakoaki aran te aomata nakoim rinanon te etekuata ke man bwaai ni kaongora n te tabo, warekii rongorongoia inanon te app are Tataekina Au Euangkerion aron tauraoia n ongora. Kataia reitaki ma ngaiia n te tai ae waekoa.

Kabonganaan te kainibaire ngkana ko mwakuri ma aomata ake a kanakoaki araia nakoim:

Ngkana e kanakoaki aran te aomata nakoim mairouia membwa ke irouia mitinare ake tabeman, reitaki ma te aomata are e kanakoa te ara n reiakina riki ae mwaiti. Ngkana a kanakoa aran te aomata mitinare, a na kona n anga reirei ma ngkoe rinanon te intanete ngkana e kariaia aia tia kairiiri n te mition. Membwa a kona ni bon roko n raoniko ke rinanon te intanete ni iira buakon te anga reirei.
Waekoa kataia n reitaki ma te aomata rinanon kawarakiia, tareboniaia, kanako rongorongo n te tareboon, imeeri, ke anga riki n reitaki tabeua. Ngkana e aki kaeka te aomata, kataia reitaki nakon teuanne ke neienne n te tai ae kaokoro n te bong anne.
Ngkana am moan reitaki e karaoaki n te tareboon, kanako rongorongo nte tareboon, ke te imeeri, bairea te tai ni bon kawaria ni itaramata ke rinanon bwaai n rabakau aika boou.
Ngkoe ma toam, rinanon ana bubuti te aomata ao ataa kainanon ao te bwai are e tangiria teuanne ke neienne. Iangoia bwa e kanga te euangkerio ni kona ni buokii kainano akanne.
Ngkana kam kaitibo, uotii bwaai ake a bubuti ibukiia, n aron Ana Boki Momon. Tibwai koaua n te euangkerio man aia reirei mitinare are e kaineti nakon kainanon ao te bwai are e tangiria te aomata.

N tabetai aomata ake a kanakoaki araia nakoim a kona ni kairiko nakoia aomata tabeman ake E katauraoiia te Atua. Ngkana te aomata are ko reitaki ma ngaia e aki tangiria ni kan reireiaki, titirakiniia ngkana a ataia aomata tabeman ae a kukurei n ongora ke a kainanoa reken te kaantaninga ni maiuia. Tao ko a tia ni kairaki nakon te aomata aei ibukina bwa iai riki temanna n te mweenga ke kaain rarikiia ae tauraoi ibukin te euangkerio.

Ngkana eaki nakoraoi kabaean am tai ma temanna, iangoia bwa ko na kanga ni karaoi mwakuri ni mitinare ake tabeua n te aono anne. E kona ni buokiko te app ae Tataekina Au Euangkerio ni karekeia aomata ake a kaan ake a tia ni kawaraki ke n reiakinaki mai imwaaina.

Kanakoi Araia Aomata nakoia Mitinare n te Aono Teuana

Ngkana ko kaitibo ma aomata aika a kukurei n reiakina riki ae mwaiti n te euangkerio ma a maeka itinanikun am aono are ko mwiokoaki iai, kabwarabwara te euangkerio nakoia. I mwiina buokiia bwa a na tauraoi ni kaitibo ma mitinare ao membwa n te tabo are a maeka iai.

Ngkana e kariaia am beretitenti n te mition, ko kona n reitinako ni boutokaiia aomata aikai ni buokiia ni karekea te euangkerio (taraa Kainibaire ibukiia Mitinare, 7.5.4).

Kamatebwai ma Toam

Rinanon araia ni kabane aomata ake a tia ni kanakoaki araia nakon am aono inanon te namwakaina ae nako. Katebenakoia aomata ake a tuai man reke iroum, ao kataia reitaki ma ngaiia riki. Baireia bwa angaa mai ibuoakoia ae a tia ni kawaraki ae a riai ni manga kawaraki riki. Kabooui rekooti aikai inanon Tataekina Au Eungakerio app.

Kabonganai Rabakau aika Boou

A mwaiti kawai aika ko kona ni kabonganai iairabakau aika boou ni kakaeiia aomata aika ko na reireiniia. Tabeua katooto a kaotaki i nano:

Kabonganai bwaai n reitaki ni mwakuri ma membwa ni kakaiia aomata.
Karaoa te reitaki ma ngaiia rinanon te imeeri ao bwaai ni kaongora n te intanete.
Tibwai kiibu aika a kaungaa te nano man koroboki aika tabu, aia kibu n taeka tabeman, ao rongorongon te euangkerio.
Buokiia aomata ni kabongana FamilySearch.org n reiakina riki ae mwaiti ibukia kaain aia utu ake a tia ni mate.
Aanga nanom ni karaoa te aonrain kiraati n reirei aron rabakau.
Karaoi reitaki aika riai rinanon kurubu n tibwatibwa iaonrain.
Karaoa te katanoata are e kaota taekan bwaai aika a na karaoaki n te uoote.

Kabonganakin bwaai n rabakau aika a boou bon te kawai ae kakawaki ni kawakin “ao n akawa aika mwaiti i nanon te ran” inanon te bong anne. Irarikin am kekeiaki ni kakae ake tabeua, katikui am rain n akawa n te intanete aika mwaiti inanon te ran.

E reirei Unimwaane David A. Bednar: “Rabakau aika a boou a katauraoi aanga aika mwaiti aika korakora are ti kona iai ni tataekina ‘Iesu Kristo, are e tauraki’ ao ‘tataekina te rainannano nakoia aomata’ [1 I-Korinto 2:2; Reirei ao Berita aika Tabu 44:3]. A bon katauraoaki raoi te roro ae rikirakei n ongo ao ni reiakina taekan te euangkerio ae kaokaki rinanon bwaai ni kaongora aikai” (“They Should Proclaim These Things unto the World,” tiemina ibukiia beretitenti n te mition aika boou, Tuun 24, 2016).

Kamatebwai ma Toam

Kakaea bwa tera ae e karaoia am mition ma bwaai ni kaongora. Maroroakinna ma toam bwa ko na kanga ni karaoi katanoata i aon bwaai ni kaongora ake a kaineti nakon aei. Am katanoata ae ko katokaa e riai n ira are n ana kaetieti te Ekaretia i aon te intanete (taraa “Intanete” n te mwakoro 38.8 n te Aeniboki ni Kabuta).

Ngkana iai te tia rabakau iaon kabonganaan bwaai n kaongora n am mition, karekea are e ataia teuanne ke neienne ngkai ko karaoi katanoata iaon bwaai ni kaongora.

Kabongana Rongorongon te Utu

Rongorongon te utu bon teuana naba te kawai ae ko kona ni kakaiia iai aomata ake ko na reireiniia. I nanon te aonaaba aei, e kairiia mirion aomata te tamnei bwa a na kinaiia aia bakatibu ake atia ni mate. A mwaiti ae a tangiria ni karekea te reitaki ae matoatoa ma naan nako aia utu. Aio e kona ni kaira te nano ni kakaea te reitaki ao ni kinakiia raoi ngkai mwakoron ana utu te Atua.

Te bwa are n tabetai e aranaki bwa tamnein Eria bon ana kairoro te Tamnei ae Raoiroi n anaa nanoia aomata bwa a na kinaiia, taua mwiin, ao n nabeia kaain aia utu—ake man rimoa ao ake ngkai (taraa Maraki 4:5–6).

N am kakae, tao ko na kaota nakoia aomata te FamilySearch.org ke kaoiia bwa a na kaewea te FamilySearch Tree app ke te FamilySearch Memories app. Ko kona n angania naba katotoon n te boki ae uarereke Au Utu: Karaki Ake A Bootiira. Bwaai ni ibuobuoki aikai a buokiia aomata ni kuneia aia koraki ao bakatibu ao ni booti aia karaki.

Baireia bwa tera bwaai ni ibuobuoki rongorongon te utu ae a tauraoi n am aono ao a na kanga ni buokiia aomata ake ko kawariia. Te tia kairiiri n te tembora ao rongorongon te utu n te uoote e kona ni buokiia aomata n kinaiia aia bakatibu ake a tia ni mate.

Kaoiia aomata bwa a na tibwaia ma ngkoe aia ururing iaoia aia koraki ake a tangiriia. Ngkai a karaoia, a na namakina te Tamnei ae Raoiroi n tuangiia aron kakawakin te utu n Ana babaire te Atua. Taai aikai a kona ni kairi nakon te marooro ae bon kakaraoaki iaon te kantaninga n te maiu aei, Ana babaire ni kakukurei te Atua., ao mwiokoan te Tia Kamaiu n te babaire aei.

Ngkana e riai, reireia aomata te reirei bwa bukin tera membwa n te Ekaretia a karaoai mwakuri n rongorongon te utu ao e kanga n irekereke ma te tembora.

Tataro bwa ko na atai taai ake ko na kabongana iai rongorongon te utu n am kekeiaki ni kakae. Karaoi bwai aika mwaiti, ao karikia bwa ko na mwatai iaon bwaai ni ibuobuoki ake a tauraoi.

Kamatebwaian Koroboki aika Tabu

Kamatebwai iaon booki aika tabu aikai n rongorongon te utu. Taua mwiin bwaai ake ko reiakin.

Te Mwaaka ni Kabaebae are Kaokaki rinanon Eria

Mwakuri ibukiia Maate

Am Kamatebwai ke ngke ma Toam

Kataa teuana ke e raka riki man waaki ni kakukurei aikai ni buokiko ni kakae rinanon rongorongon te utu.

Bairea kawaran te membwa are e a tia n rinanon te taneiai n rongorongon te utu. Reiakinna bwa tera mwakuri n ibuobuoki aika a tauraoi rinanon te tia kairiiri n tembora ao rongorongon te utu n te uoote.
Kataneiaiko bwa ko na kanga n anga te ibuobuoki iaon rongorongon te utu nakoia naake ko kaitibo ma ngaiia. Karaoa te baire n anga te reirei n rongorongon te utu n tain am kakae.
Warekia ao maroroakina te Utu ao Tembora te boki ae uarereke ni karekea matatam ae korakora n te mwakuri n rongorongon te utu. Korei baike ko reiakin i nanon am tieno ni kamatebwai.
Kabongana Au Utu te boki ae uarereke ke FamilySearch.org te bwai ni ibuobuoki ngkai ko kakaiia aomata ake ko na reireiniia.
Ngkana e kona, karaoa te bootaki are a uki aomata n roko iai, anga reirei n te kiraati n rongorongon te utu, ke anga te ibuobuoki ni kamataata.

Kakae N Tain Am Anga Reirei

Te kakae ao te anga reirei bon waaki aika a irekereke. Aomata ake ko reireiniia n tainako iai raraoia ke kaain aia utu ae a tauraoi ni butimwaea te euangkerio ae kaokaki. Ngkai aomata ake ko reireiniia a namakina te kakabwaia n te euangkerio, e na rikirake i nanoia te kan tibwauai (taraa 1 Nibwaai 8:12). I nanon kangaanga ni kabane—n aron te kakae, te anga reirei, ao te mwakuri ma membwa—titiraki, “Antai ae ko ataia ae e na kakabwaiaaki man te rongorongo aio?”

Ngkana naake ko reireiniia a katauraoi ibukin te bwabetito, titirakiniia ibukin aia utu ao raoraoia ae a tangiria ni kaoiia nakon aia bwabetito. Karaoa te babaire ni kaoiia ni kabane bwa a na roko. E na kona ni korakora namakinan te Tamnei n tain te bootaki ni bwabetito.

Kamatebwai ma Toam

Rinanoa araia aomata ake ko reireiniia. Karaoa rinanin aara irouia naake ko a tia n tuangiia ibukin araia aomata ake a kona n reireinaki ao naake ko tuai n tuangiia. Kataneiaiko bwa ko na kanga ni kanakoi kakao ibukin aara iaoia ake a na reireinaki ni kurubu akanne. Inanon am boki ni babaire, korea taekan ae ko na kanakoa te kakao aio n tain kawaraia n ae e na roko.

Anga Reirei Ngkana Ko Kuneiia

Ngkai ko kaitibo ma aomata ao n atai baike a tangiri ao ni kainanoi, karikirakea te anua ni moana te anga reirei ao tibwauaa am koaua. Ko na kuneiia aomata aika mwaiti riki n reireiniia ngkai ko anga am kakoaua iaon te Tia Kamaiu ao Ana euangkerio ao ni kariaia bwa a na namakina mwaakan te Tamnei ae Raoiroi.

Iangoia n anga reirei iaon atu n reirei n aron te kukurei, te tia kakaitara, te kantaninga n te maiu, ke te mate. Bwa tao e kanga aron am waaki, waekoa okioki ao n ae bebete nakon te Tia Kamaiu, Ana euangkerio, ao Ana wewete nakon te Burabeti Iotebwa Timiti. Aio ara rongorongo ae moan te onoti nakon te aonaaba.

Te mwakoro ae i mwiina e katauraoi katooto bwa ko na kanga n anga reirei n ae kimototo iaon Kaokan Ana euangkerio Iesu Kristo ao kakawakin te utu.

Reirei ao Kakoaua iaon Kaokan Ana Euangkerio Iesu Kristo

Taekina koauan Iesu Kristo ao anga te reirei ae kimototo iaon te koaua ae kaokaki. Te katooto, ko kona ni kaota koauan kaokan ana euangkerio Iesu Kristo i nanon ti uoua ke teniua te tiententi:

Imwiin bubua n ririki i mwiin buana, e a tia ni manga kaokaki te koaua iroun Tamara are i Karawa ae tatangira rinanon te burabeti ae maiu. Iai iroura te kakoaua iaon aei ae ko kona n taua inanon baim, warekia, ao ni iangoia i nanom. Ti kaoko bwa ko na warekia ao tataro n reiakina koauana i bon ibukim. Ko kona n anga kariaiakara n…

Bwa ngkana e reke am tai, ko na taekina ae mwaiti riki:

Ara rongorongo e rangi ni beebete. Te Atua bon ngaia Tamara i Karawa. Ngaira bon Natina. Ngaira bon mwakoron Ana utu. E kinaira n tatabemaniira nako ao e tangiriira. E tangiriira bwa ti na rinanon te kimwareirei. Manmoan rikin te aonaaba, E a tia n iriira te baeten n rotiia aomata n te tangira ni kaota Ana euangkerio Iesu Kristo bwa aonga Natina ni kona n ataia bwa a na kanga n oki Nakoina. E a tia ni kaota te euangkerio nakoia burabeti n aron Atam, Noa, Aberaam, ao Mote. Ma a mwaiti aomata aika a okioki n rineia n rawa nakon te euangkerio ao te burabeti are e reirei iaona. Uoua te ngaa te ririki n nako, Iesu Kristo bon Ngaia ae E reireia Ana euangkerio. Aomata a bon katinanikua naba Iesu. I mwiin mateia Ana Abotoro Iesu, aomata a kamangaoi reirei aika koaua, n aron taekan te Atu n Atua. A bitii naba otenanti, n aron te bwabetito.

Ara kakao nakoim bwa ko na ikoti aikai ma koaua ake ko a tia ni kawakinna. Iangoa te koaua ae ataaki bwa Tamara are i Karawa e a tia n manga kawaria Natina n te tangira ao ni kaota te reirei ae koaua ao otenanti nakon te burabeti. Aran te burabeti anne bon Iotebwa Timiti. Te koaua ae ataaki n te koaua aei e kuneaki n te boki—ana Boki Moomon. Ko kona n taua i nanon baim, warekia, ao iangoia n am iango ao i nanom. Ti kaoko bwa ko na ira te taromauri n reiakina riki ae mwaiti.

Reirei ao Kakoaua iaon kakawakin te Utu

Tataekinan kakawakin te utu e na buokiko ni kuneia aomata ake ko na reireiniia, bwa tao iai ana atatai ni Kiritian ke tiaki ngaia te Kiritian. Ko kona ni waekoa ni kairekerekea aio ma angiia aomata n te bwai are ataia iaon te utu nakon Ana babaire ni kamaiu Tamara are i Karawa. Ko kona n taekina ae kanga aron aei:

E kona n riki ara utu bwa teuana te bwai ni kakairi ae moan te kakawaki inanon maiura. E kabaeira ara utu nakon temanna ao e kona ni buokiira n namakina ae ti kainanoaki ao n tangiraki.

Karekean te utu ae korakora, ae kukurei e bon moanibwai ao n kakawaki irouia angiia aomata. Karekean te mare ae matoatoa ao karikirakeaia ataei n te aonaaba ni boong aikai e kona n anga te kakaewenako.

Ko kona ngkanne ni karaoa te bitaki nakon rongorongon Kaokan Bwaai:

Ko a kaman tia n riki bwa mwakoron Ana utu te Atua imwaain are ko bungiaki. Boni Ngaia Tamara. Tamara are i Karawa E tangiriira bwa ti na oki ni maeka ma Ngaia. Ngkoe bon Natina ao E tangiriko. Iai Ana babaire ni buokiko n oki Nakoina.

Koaua aikai ao ake tabeua a tia ni kaokaki nakon te aonaaba iroun Tamara are i Karawa ae tatangira rinanon te burabeti ae maiu. Koaua aikai a buokiira ni mataata ni nnera n Ana utu te Atua. Ti kona n reireiniko ae mwaiti i aon koaua aikai? Ko kona ni ira te taromauri bwa ko aonga n reiakina riki ae mwaiti?

Kamatebwai ma Toam

Katauraoa te teuana ni miniti te rongorongo ni kaineti ma teuana te reirei i nanon mwakoro 3. Kataneiai n tibwaia i marenami. Iangoi kawai ake ko kona n tibwauaa iai te rongorongo aio ni waakin am kakae. Baireia n tibwaia n te tai ae riai ni kaoiia aomata tabeman n reiakina ae mwaiti i aon Iesu Kristo.

E Aki Matebuaka te Kekeiaki

Ngkana a rineia aomata bwa a na aki kan reiakina ae mwaiti i aon te euangkerio ae kaokaki, e aki matebuaka am kekeiaki. Tao ko a tia n unika te koraa are e na rikirake n te tai teuana. Bwa tao e riki anne ke e aki, am ibuobuoki ao kaotan nanom n tangira ae kororaoi e na kakabwaiai ngkami.

Ngkana a tuai n tauraoi aomata ni karekea te euangkerio, taraia bwa tera riki ae ko kona ni karaoia ni kanakoraoa maiuia. Te reitaki are ko karikirakea a bon tiku ni matoa ao ni kakawaki. Reitinako n riki bwa te rao.

Aomata n tabetai a kainanoa te tai ni iangoi bitaki are a tuangaki. Buokiia ni karekei rongorongo rinanon ana imeeri te Ekaretia ke webutiaite. Rongorongo aikai tao a na ibuobuoki ni katauraoia aomata ni butimwaai kakao ake imwina n reiakina ae mwaiti.

Ngkana te aomata e aki butimwaea te euangkerio, e bon rereke ae na iai te aki kukurei. Ma, ngkana ko nakon te Uea n taai n aekan aikai, E a tia ni berita, “Tai maku; I a buokiko Ngai; N na taua baim” (Itaia 41:10).

Rinanon te onimaki iroun Kristo, ko kona ni kunea te rau ao te kaungaaki n am kekeiaki. Kateimatoaa te taratara bwa antai ngkoe ao bukin tera ko beku bwa ana mitinare te Uea. Te onimaki e na buokiko ni waaki rake ao n teimatoa ni baika ko tangiri aika raraoi.

Iango ibukin te Kamatebwai ao Karaoana

Am Kamatebwai

Wareka Ioane 15:12, Ioane 21:15–17, 1 I-Tetaronike 2, ao Motiaea 18:8–10. E uara aron kakoroan nanon am beku n tangira ao ni beku ibukiia aomata tabeman? Ko na kanga ni kanakoraoiko? Korea am kaeka inanon am tieno ni kamatebwai.
Wareka 3 Nibwaai 18:31–32, Aramwa 24:7–8, ao Aramwa 32:41. Tera ae e reiakinna kiibu aikai i aon te mwakuri ma aomata ake a tia n reireinaki mai imwaaina? Korei baike ko reiakin inanon am tieno ni kamatebwai. Anga reirei i aona nakon toam.

Kamatebwai ma Toam ao te Kaibibiti Toa

Karaoi babaire ni kawariia membwa ake a boou n am aono. Ngkana e kainanoaki, kabonganaa Tataekina Au Euangkerio app ni kinaiia. Kanakoi titiraki n aron aikai:
- Ko kanga ni katauraoaki ibukin te euangkerio?
- N ningai ao e kanga aron moan reitakim ma te Ekaretia?
- Tera ae angan nanom bwa ko na kaitibo ma mitinare?
- Ti na kanga ni boutokaa arom n teimatoa n rikirake?
Man taian marooro aikai, tera ae ko a tia n reiakinna iaon kakaeaia aomata ake a waaki iaon kawaia nakon te bwabetito? Karaoa am babaire ni kamwakura te bwai are ko reiakinna n te wiiki aei.
Rinanoi atu n reirei aikai n tatabeua nako. Kabongana te reirei inanon mwakoro 3, katauraoa aron te waaki ni kakae ae bebete. Kataneiai n anga reirei i nanon tain te kakae.
- Namakinan kainanoan riki te kairiiri ao te kaantaninga n te maiu
- Tangiran te namakin ni kaaniaki riki nakon te Atua
- Kainanoan te buoka ma babaire aika kakawaki

Marooro ni Kauntira, Maungatabu n te Tioun, ao Marooro ni Kauntira ibukiia Taan Kairiiri n te Mition

Wareka ao maroroakina “Karababaa Am Taratara n te Babaire ni Kakae” mwakoro. Kamenaia mitinare ma toaia nako bwa na kabwanina kanoaan te ukenano.
- Maroroakinna bwa a kanga iango aikai ni buokiia mitinare ni kakaaia aomata aika a na reireinaki.
- Korei ni karinani iango ibukin kakaeaia aomata ake a na reireiaki. Kaoia mitinare bwa a na kaota aron are a iangoia.
- Kaoiia mitinare bwa a na katea aia kouru ibukin katamaroaan aia kekeiaki ni kakae.
Karaoa te rinan ni kawai aika mwaiti n te kakae.
- Anganiia mitinare n tatabemaniia nako teuana te anga maibuakon aikai. Anganiia mitinare n tatabemaniia nako nimaua te miniti ni katauraoi bwa e na kanga teuanne ke neienne n anga te reirei ngkana e mena inanon te waaki are e anganaki.
- Katuruturua kainanoan tarakin abwakin te rongorongo bwa e tau nakon te bwai are e riki.
- Kaoiia mitinare aika mwaiti n anga te reirei are a tia ni katauraoia ngkana a rinanon te bwai are e riki are e a tia ni baireaki ibukiia.
Kaoiia mitinare bwa a na kataneiai n tibwauaa te rongorongo n te euangkerio inanon teuana te miniti imarenaia. Ko na bae n tangiria n karaoi kawai aika kakaokoro n te bwai ae riki, n aron te anga reirei ni mweengan te membwa, te reirei imatan te mataroa, te reirei irarikin te kawai, ke kawaran temanna are a anganaki arana bwa a na kawaria. Kamenaia mitinare bwa na kataneiaia n anga reirei ngkana a rinanon bwaai aika a riki aikai.

Taan Kairiiri n te Mition ao Kauntira n te Mition

Kaota te katooto ae te membwa ngkoe ni karaoan te mwakuri ni mitinare inanon am utu. Tibwa am taneiai ma mitinare ao membwa.
Marooro ma taan kairiiri n te tabo ao ni bootaki iaon te kawai ae tamaroa ibukiia mitinare n kakaeaia aomata aika a na reireiaki inanon am mition.
Barongaa aia taromauri mitinare are ko kona n taetae nakoia aomata ake a reireiaki inanon am mition. Reitaki ma taan kairiiri n te tabo bwa aonga membwa ni kairiia raraoia. Kaoiia membwa aika a boou bwa a na kaota aia koaua ao ni karakina aron rairakiia imwaain ae ko marooro.
N taai tabetai naako ma mitinare ni buokiia ni kakaiia aomata ake a na reireiaki.