Vakalougatataki ni Tauvimate

era vakalougatataki na marama mai vei ira na turaga

iDusidusi Raraba

O ira duadua ga na lewe ni Matabete i Melikiseteki me ra na vakalougatataki ira na tauvimate se o ira na vakararawataki. Sa dau kena ivakarau me lewe rua se sivia na lewe ni matabete me ra na vakalougatataki ira na tauvimate, ia sa rawa talega vua e dua ga me na vakayacora ruarua na veilumuti kei na veivauci ke gadrevi vakakina. Kevaka e sega ni tiko na waiwai vakatabui, sa rawa me na vakayacori ga na veivakalougatataki ena lewa ni matabete ke sega na veilumuti.

Sa dodonu vua e dua na tama e lewe ni Matabete i Melikiseteki me na vakalougatataki ira na lewe ni nona matavuvale era tauvimate.

Sa dodonu vei ira na veitacini vakalotu mera na vakalougatataki ira na tauvimate ena nona kerekere o koya e tauvimate se o ira era kauwai vakalevu kina ka na vakayacori na veivakalougatataki oqo ena nodra vakabauta (raica na Vunau kei Veiyalayalati 24:13–14; 42:43–44, 48–52). E sega ni dodonu vei ira na lewe ni Matabete i Melikiseteki ka ra dau veisiko yani ki valenibula me ra vaqara madigi me vakalougatataki ira na tauvimate.

Kevaka e dua na tamata e kerea me na vakalougatataki tale ena dua tikoga na mate, sa sega ni gadrevi vei koya na lewe ni matabete me na veilumuti tale ena waiwai ni sa vakayacori oti ena imatai ni veivakalougatataki. Ia, ka solia ga okoya na veivakalougatataki ena veitabaki ni liga ena lewa ni Matabete i Melikiseteki.

E rua tiko na iwasewase ni veivakalougatataki vei ira na tauvimate: na veilumuti ena waiwai kei na veivakadeitaki ni veilumuti.

Veilumuti ena Waiwai

Na veilumuti e vakayacora e dua na lewe ni Matabete i Melikiseteki. O koya e:

1. Vakaturuma vakalailai na waiwai e buradelai koya e tauvimate.

2. Tabaka vakamamada na ligana ruarua e buradelai koya e tauvimate ka cavuta na yacana taucoko.

3. Cavuta ni sa vakayacora tiko ena lewa ni Matabete i Melikiseteki.

4. Cavuta ni sa veilumuti tiko ena waiwai sa vakatabui me ra lumuti ka vakalougatataki kina o ira na tauvimate kei ira era bikai.

5. Tinia e na yaca i Jisu Karisito.

Vauci ni Veilumuti

Sa kena ivakarau, me rua se sivia na lewe ni Matabete i Melikiseteki me ra tabaka vakamamada na ligadra e buradelai koya e tauvimate. O koya me vakayacora na vauci ni veilumuti me na:

1. Cavuta taucoko na yacai koya na tamata o ya.

2. Cavuta ni sa vakayacora tiko na vauci ni veilumuti ena lewa ni Matabete i Melikiseteki.

3. Cavuta na veivosa ni veivakalougatataki ena veidusimaki ni Yalotabu.

4. Tinia e na yaca i Jisu Karisito.