Vakatokayacataki kei na Vakalougatataki ni Gonelalai

Na kena qaravi na cakacaka vakalotu oqo e gadrevi kina na nona veivakadonui e dua na matabete veiliutaki ka tu vua na kena idola, se dua e veiqaravi ena ruku ni nona veidusimaki e dua e taura tu na kena idola.

iDusidusi Raraba

“Ko ira kece na lewenilotu ni Karisito ka tiko na luvedra me ra kauti ira mai vei ira na italatala qase ki na lotu, io me ra tabaki ira e ligadra ena yaca i Jisu Karisito, ka vakalougatataki ira ena yacana” (Vunau kei na Veiyalayalati 20:70). Me duavata kei na ivakatakila oqo, o ira ga na Matabete i Melekiseteki era rawa ni vakaitavi ena vakayacani kei na vakalougatataki ni gonelalai. Me ra na vakasalataki ira na lewenilotu o ira na iliuliu ni matabete ni bera ni vakatokayacataki ka vakalougatataki na luvedra. Ena kena maroroi na bibi ni veivakalougatataki oqo, me ra segata vagumatua sara na iliuliu me ra kakua ni vakatubu madua se luluqa vei ira na lewenilotu yadua se matavuvale.

Sa kena ivakarau me ra vakatokayacataki ka vakalougatataki na gonelalai ena gauna ni soqoni ni lolo kei na soli ivakadinadina ena tabanalevu ka tiko kina na nodrau ivolatukutuku ni lewenilotu na itubutubu.

iVakaro ni kena Vakatokayacataki ka Vakalougatataki e dua na Gonelailai

Ni vakalougatataki e dua na gonelailai, era na tucake wavoki na lewe ni Matabete i Melikiseteki ka ra tabea cake tiko na gone e ligadra. Ni vakalougatataki e dua na gone qase cake, era na tabaka vakamamada na buradelai koya na gone. O koya ena veivakalougatataki tiko me na:

1. Cavuta na Tamai Keimami Vakalomalagi.

2. Cavuta ni sa vakayacori tiko na veivakalougatataki ena lewa ni Matabete i Melikiseteki.

3. Solia e dua na yaca vua na gone.

4. Semata vua na veivosa ni veivakalougatataki ena veidusimaki ni Yalotabu.

5. Tinia e na yaca i Jisu Karisito.