Papitaiso kei na Veivakadeitaki

Na qaravi ni cakacaka vakalotu oqo e gadrevi kina na veivakadonui mai vua e dua na matabete veiliutaki ka tu vua na kena idola, se dua e veiqaravi ena ruku ni nona veidusimaki e dua e taura tu na kena idola.

O Ira na iVakadinadina ni dua na Papitaiso

Erau na ivakadinadina tiko ni papitaiso yadua e rua na bete se lewe ni Matabete i Melikiseteki me rau raica ni sa vakayacori vakadodonu na papitaiso. E dodonu me na vakayacori tale na papitaiso kevaka e sega ni cavuti donu na kena vosa me vaka e sa volai tiko ena Vunau kei na Veiyalayalati 20:73 se ke dua na tiki ni yagona se nona isulu na tamata o ya e sega ni tabadromuci taucoko.

iVakaro ni kena Vakayacori na Papitaiso

Ena ruku ni nona veidusimaki o koya e vakatulewa tiko, sa rawa vua e dua na bete se lewe ni Matabete i Melikiseteki me vakayacora na cakacaka vakalotu ni papitaiso. Ni sa vakayacora okoya, ena:

1. Tu e loma ni wai vata kei koya me na papitaiso.

2. Taura na ilabeniika imatau nei koya na tamata o ya ena ligana imawi (me rawarawa kina ka veitaqomaki); na tamata me na papitaiso me na taura na ilabi ni ika imawi nei koya na lewe ni matabete ena ligana imawi.

3. Laveta cake ki na sukuwea na ligana imatau.

4. Cavuta taucoko na yacai koya na tamata o ya ka kaya, “Sa lesi au ko Jisu Karisito, meu papitaisotaki iko ena yaca ni Tamada kei na Luvena kei na Yalo Tabu. Emeni” (Vunau kei na Veiyalayalati 20:73).

5. Me qai taura na tamata o ya na ucuna ena ligana imatau (me rawarawa kina); ka me na qai tabea e ligana imatau o koya na lewe ni matabete na dakui koya na tamata o ya ka tabadromuci koya vakataucoko, oka kina na isulu e daramaka tiko.

6. Ka me qai vakamatari koya cake tale mai wai.

Veivakadeitaki kei na iSolisoli ni Yalo Tabu

Ena qai vakadeitaki e dua na tamata me dua na lewe ni Lotu ka ciqoma na isolisoli ni Yalo Tabu ni papitaiso oti (raica na Vunau kei na Veiyalayalati 20:41). Ena qai yaco walega me lewe ni lotu e dua na tamata ni sa vakayacori oti na cakacaka vakalotu ni papitaiso kei na veivakadeitaki ka sa volaitukutukutaki vakavinaka (raica na Joni 3:5; Vunau kei na Veiyalayalati 33:11).

Ena ruku ni nodratou veidusimaki na matabisopi, sa rawa vua e dua se sivia na lewe ni Matabete i Melikiseteki me vakaitavi ena dua na veivakadeitaki. Me ratou tabaka vakamamada ena ligadratou na buradelai koya na tamata o ya. O koya me na vakayacora na cakacaka vakalotu oqo me qai:

1. Cavuta taucoko na yacana.

2. Cavuta ni sa vakayacori tiko na cakacaka vakalotu o ya ena lewa ni Matabete i Melikiseteki.

3. Vakadeitaka na tamata o ya me sa lewe ni Lotu i Jisu Karisito ni Yalododonu Edaidai.

4. Cavuta na vosa “Ciqoma na Yalo Tabu” (sega ni “ciqoma na isolisoli ni Yalo Tabu”).

5. Cavuta na veivosa ni veivakalougatataki ena veidusimaki ni Yalotabu.

6. Tinia e na yaca i Jisu Karisito.