Sakaramede

Na kena qaravi na cakacaka vakalotu oqo e gadrevi kina na nona veivakadonui e dua na matabete veiliutaki ka tu vua na kena idola, se dua e veiqaravi ena ruku ni nona veidusimaki e dua e taura tu na kena idola.

iDusidusi Raraba

E ra na dau soqoni vata yani na lewe ni Lotu ena Siga ni Vakacecegu me ra qaravi Kalou kina ka vakaivotavota ena sakaramede (raica na Vunau kei na Veiyalayalati 20:75; 59:9). Ena gauna ni cakacakatabu vakalou oqo, era na kania na madrai ka gunu wai me ra vakananuma kina na lewe kei na dra ni iVakabula me ra vakavoutaka kina na nodra veiyalayalati ni papitaiso (raica na Maciu 26:26–28; iVakadewa nei Josefa Simici, Marika 14:20–25; Luke 22:15–20; 3 Nifai 18; Moronai 6:6).

Vakalougatataki kei na Veivotayaki ni Sakaramede

Sa rawa vei ira na Bete kei na lewe ni Matabete i Melikiseteki me ra vakalougatataka na sakaramede. Sa rawa vei ira na dikoni, ivakavuvuli, bete, kei na lewe ni Matabete i Melikiseteki me ra veisoliyaka na sakaramede.

Ena gauna sa lagati tiko kina na sere ni sakaramede, erau na tucake vakamalua na lewe ni matabete oi rau me na qai masulaka e muri na sakaramede, cega na isulu ka ubi tiko kina na tereya madrai, ka dovia vakalalai na madrai me rawa ni laukana. Ni oti na nodrau dovilaka na madrai, rau na dabe sobu ka lagasere talega.

Ni oti na sere oqo, ena tekiduru o koya me na masulaka na madrai ka cabora na masu ni sakaramede ni madrai. Na masu ni sakaramede e vakatakilai mai vua na Turaga (raica na Vunau kei na Veiyalayalati 20:77, 79; Moronai 4:5). Ena qarauna o bisopi me na cavuti vakamatata, ka dodonu, ena yalo e vakarokoroko. Kevaka e cavuta cala e dua na vosa o koya e masulaka tiko na sakaramede ka qai vakadodonutaki koya ga, ena sega ni gadrevi e dua tale na veivakadodonutaki. Kevaka e sega ni vakadodonutaka na nona cala, ena vakaraitaka o bisopi me na cavuta tale na masu ka me vakadodonu.

Ni oti na masu, era na qai veivotayaka yani na madrai o ira na dikoni se lewe ni matabete vei ira na lewe ni ivavakoso ena kena ivakarau e dokai ka dodonu. Ena votai e liu ena sakaramede o koya e vakatulewa tiko. Ena vakatulewa o bisopi (se dua na daunivakasala ke yali o koya) ena soqoni ni sakaramede vakavo ga ke tiko kina e dua na lewe ni mataveiliutaki ni iteki, e dua na Vitusagavulu ni iWasewase, se dua na Vakaitutu Raraba. Ena sega ni dau vakatulewa e dua na lewe ni matabose e cake ka na sega ni votai e liu ena sakaramede.

Ena gauna sa taura kina na kena sakaramede o koya e vakatulewa tiko, sa rawa vei ira na vo ni dauveivotayaka na sakaramede me ra gole ki na nodra dui vanua ka veivotayaka yani

Ni sa solia yani o koya na lewe ni matabete e dua na tereya ni sakaramede vua e dua na lewenilotu, sa rawa me ra na qai veisolisolitaka yani me rawarawa kina.

Ni sa oti na nodra veivotayaka na madrai o ira na veitacini vakalotu, era na kauta lesu na tereya madrai ki na teveli ni sakaramede. O ira era na veiqaravi tiko ena teveli ni sakaramede era na qai ubia na tereya madrai ka cega na iubi ni tereya wai. Me na qai tekiduru o koya e na masulaka na wai ka cabora na masu ni sakaramede ni wai (raica na Vunau kei na Veiyalayalati 20:79), ka vakasosomitaka na vosa waini me wai.

Ni oti na masu, me ra na qai veivotayaka yani na wai o ira na dikoni se lewe ni matabete vei ira na lewe ni ivavakoso. Ni sa veivotayaki oti, era na kauta lesu na tereya wai ki na teveli ni sakaramade, me ra na qai waraki rau na dauveiqaravi me rau na ubia na tereya, ka me ra qai dabe sobu vakamalua.