lima o loo uuina se tusi o loo matala

Salamo ma le Alualu i Luma i le Ala i le Faaola

O le tele o le faasologa o le salamo e tupu i le va o se tagata, le Atua, ma i latou na aafia i agasala a se tagata. Peitai, o nisi taimi e manaomia ai e se epikopo po o se peresitene o le siteki ona fesoasoani i tagata o le Ekalesia i a latou taumafaiga ia salamo. Pe a fesoasoani i tagata ia salamo, o epikopo ma peresitene o siteki e alolofa ma popole. Latou te mulimuli i le faataitaiga a le Faaola, o le na siitia tagata taitoatasi ma fesoasoani ia i latou e liliu ese mai le agasala ma agai atu i le Atua. (Tagai Mataio 9:10–13; Ioane 8:3–11; tagai foi Tusitaulima Aoao, 32.1.)

O nei lava mataupu faavae e faatatau pe a fesoasoani i tagata taitoatasi o loo i ai nei pe na faafalepuipuiina muamua. E tatau i taitai ona mulimuli i uunaiga a le Agaga ma faaaoga le taitaiga o loo tuuina mai i tusitusiga paia ma i le Tusitaulima Aoao, mataupu e 32. A o latou faia lena mea, o le a taialaina i latou e fesoasoani i fanau a le Atua e toe foi atu i le ala o le feagaiga.

Fesoasoani i se Tagata Matua o loo Taofia

Ua fautuaina taitai e fesoasoani i le tagata matua o loo nofovaavaaia ina ia salamo, faamagalo i latou lava ma isi, ma maua se molimau ia Iesu Keriso o lo latou Faaola. E tatau i taitai ona aoao atu e mafai e le Alii ona tuuina atu le faamagaloga i soo se tasi, e tusa lava po o le a lo latou tulaga.

Ua fetalai mai le Alii, “Faauta, o le ua salamo i ana agasala e faamagaloina o ia, ma o au le Alii, ou te le toe manatua lava” (Mataupu Faavae ma Feagaiga 58:42).

E tatau foi i taitai ona aoao atu o le ala e toe foi ai i le tulaga atoatoa o le pepa faamaumau i totonu o le Ekalesia o le a le maea seia maea le faamalologa o le tagata mai le faafalepuipuiina ma toe faaaogaina i totonu o se uarota. O le tulaga o tagata auai i le Ekalesia e mafai ona fenumiai ai faifeau ma taitai o faasaoga ma e le tatau ona aafia ai le tausiga o auaunaga i le nofoaga.

O tagata taitoatasi e lei papatisoina lava o ni tagata o le Ekalesia ae iloa upumoni o le talalelei a o faafalepuipuiina, e mafai ona saunia mo le papatisoga pe a uma ona faasaolotoina i latou.

Fono Aoai o le Tagata Auai

O se fono aoai o tagata auai o le Ekalesia o se laasaga taua lea i le fesoasoani atu i se tagata ua auai i amioga matuia o le solitulafono ina ia salamo ma toe foi atu i le ala o le feagaiga (tagai i le Tusitaulima Aoao, 32.6, 32.9–32.14). O lea fesoasoani e mafai ona aofia ai le taofia aloaia o nisi o avanoa mai le avea ai ma tagata o le Ekalesia po o le soloia mai le avea ma tagata o le Ekalesia mo se taimi (tagai i le Tusitaulima Aoao, 32.11.3, 32.11.4). O se tasi o faamoemoega o le taofia o tagata auai i le Ekalesia po o le aveesea o pepa faamaumau o le fesoasoani lea i se tagata ia maua le mana togiola o Iesu Keriso e ala i le salamo.

E manaomia se fono aoai o tagata auai pe a faafalepuipuiina se tagata mo le fasioti tagata, faamalosi teine/tama, sauaina o feusuaiga, sauaina o se tamaitiiti po o se talavou, sauaina o se toalua po o se isi tagata matua, amioga faataumaoi (saua, feusuaiga, po o mea tautupe), mata’ifale, ponokalafi a tamaiti, faaipoipoga faaautaunonofo, agasala matuia a o umia se tofiga lauiloa i le Ekalesia, ma le tele o solitulafono matuia (tagai i le Tusitaulima Aoao, 32.6.1).

Atonu e manaomia se aufono o tagata auai pe a faafalepuipuiina se tagata mo gaoioiga faatupu vevesi, ituaiga sauaga maualalo, amioga lē mamā faalefeusuaiga, amioga taufaasese, solia o le faatuatuaina, ma isi faatinoga (tagai i le Tusitaulima Aoao, 32.6.2).

O le epikopo po o le peresitene o le siteki o le iunite sa nofo ai le tagata i le taimi na faia ai le solitulafono, e faagasoloina soo se gaoioiga e tatau ai mo tapuia’iga mamafa po o le soloia mai le avea ma tagata o le Ekalesia. Afai na tapuia’ia ia avanoa o le avea ai ma tagata o le Ekalesia, e auina atu e le taitai (po o le failautusi pe a faatagaina) le pepa faamaumau i le iunite o loo nafa mo le nofoaga o loo faafalepuipui ai le tagata. Afai na aveesea le pepa faamaumau, e faafesootai e le epikopo po o le peresitene o le siteki le taitai o lena iunite (tagai Tusitaulima Aoao, 32.14.8, 32.15).

E le o se mea e le masani ai le leai o se fono aoai na faia a o lei faafalepuipuiina se tagata. I nisi taimi, o taitai e i ai tiutetauave mo le tagata o loo i le falepuipui o le a manaomia ona taitaia le fono aoai o le tagata auai.

Lagolagoina o Tagata ua Faasalaina i se Solitulafono Faalefeusuaiga

E tatau i taitai ona feiloai ma i latou o e na molia i se solitulafono faalefeusuaiga e iloa ai pe i ai ni tulaga faaletulafono e faatapulaa ai lo latou gafatia e auai i le Ekalesia po o isi gaoioiga. E tatau foi i taitai ona faafesootai le laina fesoasoani a le Ekalesia mo le taitaiga i nei tulaga. O loo maua le laina fesoasoani mo epikopo ma peresitene o siteki.

• Iunaite Setete ma Kanata

• Malo Aufaatasi

• Aialani

• Farani

• Ausetalia

• Niu Sila

• I atunuu e leai se laina fesoasoani, e tatau i le peresitene o le siteki, ona sailia se taitaiga mai le loia a le eria i le ofisa o le eria.

E tatau i taitai ona feutagai ma le faufautua faaletulafono a le Ekalesia i le auala sili e faia ai ni fuafuaga talafeagai e fesoasoani ai i le tagata ia alualu i luma i le ala e toe foi atu ai i le Faaola a o faamautinoaina le saogalemu mo tagata uma o le uarota.

O se fono aoai o tagata auai o le Ekalesia e mafai ona avea ma se laasaga taua e fesoasoani ai i se tagata o loo auai i se amioga matuia o le solitulafono ina ia salamo ma toe foi atu i le ala o le feagaiga.

O nisi atunuu e tausia se faamaumauga faaleatunuu o i latou ua molia i se solitulafono faalefeusuaiga e faasaga i se tamaitiiti laitiiti. O tagata solitulafono i feusuaiga i le palola po o le nofovaavaaia e ono i ai ni sa na faamamafaina e le malo e uiga i le auai i gaoioiga faaagafesootai e pei o sauniga faalelotu. E faamamaluina e le Ekalesia nei sa. E ono eseese sa faaletulafono pe a uma ona magalo se tagata, ma e mafai ona aveesea sa i le aluga o taimi. E faalagolago i tulaga, e mafai e le Ekalesia ona faatinoina ni fuataga faaopoopo o le puipuiga e sili atu nai lo sa faaletulafono aloaia a le tagata.

Ofusa o le Malumalu

E le faasaina e le Ekalesia se tagata matua o loo taofia mai le ofuina o ofu o le malumalu. Ae peitai, e tatau i le peresitene o le siteki ona iloiloina ma le agaga tatalo le tulaga ma faia le faaiuga mulimuli. E tusa lava po o le a le faaiuga a le peresitene o le siteki, o le tagata matua o loo taofia o le a manaomia ona galulue faatasi ma le pulega o le falepuipui ma le faifeau e iloilo pe mafai ona ia ofuina ma le talafeagai ofusa o le malumalu.

Fesoasoani i Tagata Taitoatasi e Saunia mo le Magalo

E mafai e taitai ona tuuina atu le lagolago o le a faamanuiaina ai le olaga o le tagata pe a uma ona magalo i masina a o lumanai le faasaolotoina mai le nofoaga o taofia ai. Atonu latou te iloiloina foi manatu nei:

• Fesoasoani i le tagata e fai se fuafuaga faatino mo aso muamua e 90 pe a uma ona magalo. O lenei fuafuaga e mafai ona aofia ai le sailia o se nofoaga e nofo ai, sailia o se galuega, ma le toe fesootai atu i aiga ma taitai o le Ekalesia i le lotoifale mo le lagolago faifai pea.

• Faafesootai taitai o le uarota tumau fou, ma fesoasoani e saunia i latou e tuuina atu le lagolago faifai pea. Uunaia i latou e tofia se ulugalii auauna atu ma faia faatalanoaga e le aunoa ma le tagata ua magalo.

• E tusa ai ma taiala o fale ma fanua, tuuina atu i le tagata faamatalaga faafesootai taua mo ofisa lagolago, punaoa mo tagata lautele, po o isi tagata faafesootai aoga.

• Fesoasoani e faatulaga femalagaaiga i le tulaga o le tietie i taavale po o pepa e malaga ai i pasi. (Tagai i taiala o le “Saogalemu”.)

• Talanoa e uiga i le fefe ma popolega atonu e i ai i le tagata e uiga i le magalo. Fesoasoani e foia popolega, tuuina atu fautuaga, ma tuuina atu faamanuiaga o le perisitua.

• I nofoaga e maua ai, faafesootai muamua le Ofisa o Auaunaga mo Suiga a le Ekalesia i le 1-801-240-7340.

Fesoasoani i Tagata Pe a Uma ona Magalo

O nai aso, vaiaso, ma e oo lava i masina muamua talu ona magalo mai le faafalepuipuiina e mafai ona matua faigata lava. E masani lava, e leai se nofoaga saogalemu mo le tagata e nofo ai po o ni faamoemoega lelei mo se galuega. O le fetuunai i le olaga i fafo atu o le faafalepuipuiina e matuai ātu faalelagona, ma o mamanu tuai o vaisu ma isi amioga e ono faatosinaina ai. E taua tele le lagolago a aiga, uo, ma tagata o le Ekalesia i lenei taimi.

O fesili nei e ono fesoasoani e iloilo ai pe a tuuina atu le lagolago:

• O fea o nofo ai le tagata? Pe o saogalemu o ia ma o loo i ai i se ala e tau atu i galuega ma fesootaiga ma aiga ma tagata o le Ekalesia i le lotoifale?

• O a isi laasaga i taumafaiga a le tagata e toe faatuina se olaga saogalemu ma aoga?

• Pe o i ai ni taimi faatulagaina faafomai e manaomia po o isi manaoga faalesoifua maloloina?

• O le a se mea e mafai ona faia e aiga, uo, ma le Ekalesia e fesoasoani ai i le tagata ia lagona le alofagia ma le alualu i luma?

• O a ofisa ma punaoa a le alalafaga o loo maua e fesoasoani ai?

• Pe manaomia se togafitiga ma se fautuaga? O faapefea ona alualu i luma le tagata? E faapefea ona totogi e le tagata? Pe manaomia ona faia ni suiga i togafitiga po o fautuaga?

• E te manaomia ona fesoasoani i le tagata ia malamalama i soo se suiga po o faamatalaga i lona pepa faamaumau?

E le gata i lea, a o taloina e taitai se fono aoai o se tagata auai o le ekalesia, mo se tagata matua na faafalepuipuiina muamua, ua fautuaina i latou e mafaufau i le mafuaaga o le faafalepuipuiina o le tagata, le umi o le faafalepuipuiina, ma mausa faaleagaga ua atiina ae e le tagata lava ia. E masani lava, o le tagata matua o loo itaofia ua faaaluina le tele o tausaga e salamo ai, auai i sauniga a le Ekalesia, suesue, ma auauna atu i isi i le mea sili na te mafaia. I tulaga faapena, atonu e talafeagai mo fono aoai o le tagata auai, le mulimuli i taiala o loo i le Tusitaulima Aoao, mataupu e 32, ona faavave le faagasologa o le iloiloga ma fesoasoani i le tagata e toe foi vave atu i le ala o le feagaiga ma le tulaga atoatoa o le avea ma tagata auai o le ekalesia.

O polokalama a le Ekalesia e pei o Auaunaga mo Aiga, vaega e toe faaleleia ai vaisu, po o vasega o le ola tutoatasi e ono tutusa lava le aoga. E mafai e taitai ma tagata o le ekalesia ona faafesootai le Ofisa o Auaunaga mo Suiga a le Ekalesia mo nisi fesoasoaniga i le 1-801-240-7340.