Aiaiga Faavae mo Fesootaiga

Fesootaiga i le Meli

O le auauna atu ia i latou o e ua faafalepuipuiina e mafai ona aofia ai le faafesootaia o i latou e ala i le imeli po o le meli faaletino. O se tali vave i tusi a se tagata ua faafalepuipuiina e taua tele i lo latou aoaoina ma le manuia. O fesootaiga i le meli e te maua ai se avanoa e valaaulia ai le pagota e o mai ia Iesu Keriso ma tuuina atu le auaunaga patino. E mafai ai foi ona e taliina a latou fesili, siitia i latou, ma faasoa atu mea e faaaoga e le Ekalesia e fesoasoani ai ia i latou e faalatalata atu i le Faaola.

E mafai e le peresitene o le siteki ona valaauina tagata taitoatasi, e aofia ai ulugalii, e fesootai ma se pagota. O fesootaiga uma lava e tatau ona faaalia ai le alofa faaKeriso, aloese mai faitioga po o le tausalaina o amioga solitulafono a le tagata lava ia.

O taiala nei e faatatau pe a fesootai ma tagata o loo faafalepuipuiina:

E tatau ona le itiiti ifo ma le 18 tausaga le matua o le tagata e tali atu.
E tatau ona faaaoga se pusa o le ofisa o le meli e puipuia ai le le faalauaiteleina o le tagata e tali atu.
E le tatau ona umi atu tusi nai lo itulau e lima.
E na o le igoa muamua lava o le tagata e tali atu e tatau ona sainia ai tusi ma e tatau ona aloese mai le faasoaina atu o soo se faamatalaga patino e faailoa mai ai.
E le faatagaina teutusi lanu, pepa lanu po o mea e faaaoga i tusi, kata faafeiloai, pepa e faaaoga ai kata, ma isi pepa e tele vaega.
E le faatagaina le auina atu o ata patino po o tupe.
E le faatagaina le faafesootaia o uo po o aiga o le tagata ua faafalepuipuiina.
E le faatagaina le fesili e uiga i mafuaaga po o faamatalaga auiliili o le faafalepuipuiina o le tagata.
O tusi mai se tagata ua faafalepuipuiina e tatau ona manatu i ai e le faalauaiteleina. E mafai ona teuina i se nofoaga saogalemu e oo atu i le ono masina, ona tatau lea ona faatama’ia. E le afaina le kopiina faaeletonika ma imeli tusi i totonu o se tofigaa a le siteki. Ae peitai, e tatau ona tapeese soo se kopi faaeletonika pe a mavae le ono masina.
E tatau ona tusia tusi uma ma le malamalamaaga o fesootaiga o le a mataituina ma faitauina e le aufaigaluega o le nofoaga.
E le tatau lava ona tuuina atu e tusi ni fautuaga faaletulafono po o ni faamatalaga e uiga i taualumaga faaletulafono.
Afai o se tusi mai se tagata ua faafalepuipuiina e aofia ai le tautau atu o nisi amioga solitulafono, faamata’uina e faaleagaina se tasi, pe faailoa atu se tauimasui faaletulafono e faasaga i le Ekalesia, ona tatau lea i taitai ona faafesootai vave le Ofisa o Fautua Aoao i le 1-801-240-6301.

Okaina o Tusitusiga a le Ekalesia

Ua fautuaina taitai o siteki e tuuina atu i tagata taitoatasi ua faafalepuipuiina se kopi o tusitusiga paia, se lesitala o le mekasini o le Liahona , ma isi lomiga e ono lagolagoina ai le faamalologa, soifua maloloina faalemafaufau po o faalelagona, toe faaleleia o vaisu, ma le ola tutoatasi. O le tele o nofoaga e faatapulaa ai le aofai o mea patino e ono i ai i se tagata.

Ia mautinoa e mulimuli i taiala nei:

Aua nei auina atu ni tusi faavaa malō pe fusi uaea.
E tatau ona mulimulitaia tulafono uma o ia nofoaga Faamolemole tagai i le uepisaite o le nofoaga mo nisi faamatalaga. I le tele lava o tulaga, o anomea e okaina e tatau ona auina sao mai le mea e lolomi ai po o le mea e tufatufa mai ai i le tuatusi mo meli mo le nofoaga.
O le igoa atoa o le tagata ua faafalepuipuiina, numera o le pagota, ma le iunite po o le poloka o le sela e manaomia uma e fai ai se oka, faapea ai foi ma le tuatusi o le falepuipui.
E mafai ona faaaoga tupe a le Ekalesia e faatau ai lomiga talafeagai mai faatau tusi faatuatuaina.

Faamaoniga mo Asiasiga i le Nofoaga

E tatau i taitai ona mulimuli i tulafono patino mo tagata asiasi e pei ona maua i le uepisaite a le falepuipui. O asiasiga e lē aunoa, sauniga tapua’i faalevaiaso, po o isi vasega e tatau ona faamaopoopoina faatasi ma le fesoasoani a le faife’au o le falepuipui. O le i ai o se sootaga lelei ma le faifeau e mafai ona aoga tele ia te oe ma i latou o loo e auauna atu i ai. O nisi falepuipui e manaomia ai le tuuina atu e taitai o le Ekalesia o se faatagaga tusitusia e faapea o i latou o ni sui faamaonia o le Ekalesia. E mafai e taitai ona imeli atu i le ofisa o le Auaunaga i Falepuipui i le laumua o le Ekalesia e talosagaina se tusi mo lenei faamoemoega i le PrisonMinistry@ChurchofJesusChrist.org.