Various men in a correctional facility attend a church meeting.

Aiaiga Faavae mo Vaega ma Sauniga Tapuai

Vaega o Falepuipui o le Eria po o le Auaunaga i le Falepuipui

Ina ia tuuina atu i taitai o siteki ma uarota le lagolago sili atu, e mafai e se Au Peresitene o le Eria ona faatulaga se vaega o le auaunaga i le falepuipui i le eria. O le faamoemoega o lenei vaega o le lagolagoina lea o taitai i le lotoifale a o latou faataunuuina lo latou tiutetauave e auauna atu ia i latou ua aafia i le faafalepuipuiina. E mafai e Au Peresitene o Eria ona faatulaga ni faamoemoega talafeagai mo le vaega e faavae i manaoga o la latou eria. E tali atu le vaega i mataupu faigata e fesootai ma tuaoi o siteki e tele. E tatau ona faalauiloa ai le saogalemu ma isi mamanu aoga o le galuega o le falepuipui ma le tausiga pe a uma ona faasaolotoina.

Valaauga i Auaunaga i le Falepuipui po o le Falepuipui ma Sauniga Tapuai

E faamautinoa e le peresitene o le siteki ua valaauina taitai agavaa i valaauga o auaunaga i le falepuipui a le siteki. E masani lava, o ulugalii po o tagata taitoatasi ua valaauina i le vaega o auaunaga i le falepuipui a le siteki e le tatau ona tofia e avea ma faifeautalai mo auaunaga, pe tatau foi ona latou ofuina ni faailoga o igoa o faifeautalai. E mafai ona faatuina ni valaauga eseese i totonu o se vaega o le galuega o le falepuipui a le siteki po o se paranesi e faafetaiaia ai manaoga o i latou o loo auauna atu i ai le vaega. E tatau ona aofia ai valaauga faaletaitai o le Aualofa pe a auauna atu i tamaitai o loo faafalepuipuiina.

O sauniga tapuai mo tagata o le ekalesia i falepuipui, po o nisi faalapotopotoga e mafai ona faafaigofie pe a moomia ai ina ia faafetaiaia ai manaoga o i latou o loo aofia ai. O sauniga nei e masani lava ona mulimuli i le mamanu lava e tasi e pei o le sauniga faamanatuga, vagana ai e le mafai ona tuuina atu le faamanatuga i tagata o loo i le falepuipui. E mafai ona auai tagata ua faafalepuipuiina e ala i le faia o tatalo, tuuina atu o lauga, faasoa atu molimau, po o le faataunuuina o isi tofiga talafeagai, e tusa lava po o le a le sootaga faalelotu po o le tulaga i le Ekalesia. O le usuina o viiga e mafai ona valaaulia ai le Agaga ma tuuina atu ai i tagata taitoatasi se avanoa e auai ai ma tapuai ai.

O tagata o le ekalesia ua valaauina e fesoasoani e tuuina atu sauniga tapuai i le falepuipui e mafai ona tuuina atu le faamanatuga i le tasi ma le isi i se isi fonotaga i lalo o le taitaiga a le peresitene o le siteki.