Saogalemu

O tagata o le ekalesia e auauna atu ia i latou o e ua faafalepuipuiina e tatau ona faaaloalo ma mulimuli i tulafono uma o le nofoaga ma faiga faavae o le saogalemu. E tatau foi ona latou mulimuli i taiala nei:

Aloese mai le tuua na o oe ma se tagata matua o loo i ai i le falepuipui. O le tuuina atu o fautuaga patino po o se faamanuiaga faaleperisitua e faatagaina faatasi ma le faamaoniga a taitai o le nofoaga ma a o mulimuli i a latou taiala.
E tatau i tagata o le ekalesia ona aloese mai le talanoaina o faamatalaga auiliili o le solitulafono, faasalaga, po o togafitiga manaomia a se tagata e sili atu nai lo mea e manaomia e fesoasoani ai ia te ia i le faagasologa o le salamo. E tatau ona latou mulimuli i faiga faavae o le fono aoai o tagata auai o le ekalesia . Afai e iloa e tagata o le ekalesia soo se ituaiga o sauaga, e tatau ona latou faafesootai vave ia taitai faaletulafono. E tatau i peresitene o paranesi, epikopo, ma peresitene o siteki ona vili le laina fesoasoani mo le sauaina mo le taitaiga i le faia o fuataga o le puipuiga ma le ausiaina o mea e manaomia mo le lipotiina mai (tagai i le Tusitaulima Aoao, 38.6.2, 38.6.2.1).
E le tatau i tagata o le ekalesia ona tuuina atu ni tupe po o ni meaalofa i se tagata matua o loo i ai i le fale, pe tatau foi ona latou faia se maliega e faia ai pe a uma ona tatala le tagata. O lagolago tautupe uma e tatau ona maua mai i tupe a le siteki, uarota, po o le paranesi. E le totogia e le Ekalesia ia pili faaletulafono po o pili o le faamasinoga a se tagata ua faafalepuipuiina, e ui atonu e totogi ai pasese i pasi, pili e maua ai se pepa faamaonia e sui ai, po o isi fesoasoaniga o le uelefea (tagai i le Tusitaulima Aoao, 22.5.2).
E le tatau lava i tagata o le ekalesia ona faasoa atu o latou tuatusi o le aiga pe faatagaina se tagata ua tatalaina e asiasi ane pe nofo i le po i lo latou fale. O isi faamatalaga faafesootai, e pei o se tuatusi imeli po o se numera o le telefoni, e na o le pau le taimi e mafai ona faasoa atu ai i se tagata ua tatalaina pe afai e faatagaina e tulafono o le nofoaga se fesootaiga pe a uma ona tatala ma ua i ai se tofiga o le tagata e tuuina atu ai le lagolago faifai pea.
E lē tatau i taitai o le Ekalesia ona faaaofia ai i latou lava i faamasinoga faalemalo po o faamasinoga o soligatulafono mo tagata o le Ekalesia i o latou iunite, e aunoa ma le mua’i feutagai ma le loia a le Ekalesia (tagai Tusitaulima Aoao, 38.8.23.1). E aofia ai le molimau atu po o le faia o ni upu tusitusia pe tuufofoga i se fono mo le nofovaavaaia po o le palola, faapea ai foi ma le fesootai atu i tagata faigaluega o le faamasinoga e fai ma sui o tagata solitulafono po o isi. E ui lava i le lelei o faamoemoega, ae o taitai o le Ekalesia e faasoaina atu faamatalaga i taualumaga faaletulafono e mafai i nisi taimi ona sese le faauigaina ma e oo lava i le faaleagaina—aemaise lava i tagata ua aafia fua ma o latou aiga. O lenei aiaiga faavae e puipuia ai foi le Ekalesia mai le utia sese i mataupu faaletulafono. Afai e talitonu se taitai e tatau ona ia molimau atu pe fesootai i se mataupu faaletulafono pe afai foi e manaomia se taitai e faia lena mea e ala i le faiga faaletulafono, e tatau ona ia faafesootaia le faufautua faaletulafono po o le loia a le Ekalesia. I le Iunaite Setete ma Kanata, e faafesootai e taitai le Ofisa o le Fautua Aoao a le Ekaleisa.

I fafo atu o le Iunaite Setete ma Kanata, e faafesootai e taitai le loia a le eria i le ofisa o le eria.
E le tatau i tagata o le ekalesia ona tuuina atu ni savali i le va o tagata taitoatasi o e ua faafalepuipuiina ma a latou uo po o aiga.
I falepuipui, e tatau ona valaauina ni alii se toalua po o se ulugalii e galulue faatasi ma alii ua faafalepuipuiina. Ia le itiiti ifo i le toalua alii, toalua tamaitai, po o se ulugalii e tatau ona tofia e galulue ma tamaitai ua faafalepuipuiina.

A uma ona tatala se tagata mai se nofoaga, e mafai e tagata o le ekalesia ona saunia ni auala o feoa’iga a o mulimuli i taiala nei:

E tatau ona faia auala o feoa’iga i nisi taimi, e le tumau, ma mo manaoga moni e le faigofie ona faatinoina i se isi auala. O manaoga talafeagai e mafai ona aofia ai le aveina atu i le lotu, auaunaga faafomai, faatalanoaga o galuega, ma nofoaga faatali pasi po o nofoaga o nofoaafi e toe faatasia ai le tagata ua magalo ma lona aiga.
E masani lava ona tuuina atu auala o feoa’iga i le nuu o loo nofo ai le tagata ua magalo ma o le a faigaluega ai. E tatau ona aloese mai femalagaaiga mamao.
Pe a aveina se tagata ua tatala, e tatau lava ona i ai i taimi uma ni tagata matutua se toalua i totonu o le taavale e faaopoopo atu i le tagata ua tatalaina. E faapitoa lava le taua o lenei mea pe afai o le tagata ua tatalaina o se tamaitiiti laitiiti pe na faamaonia muamua ni solitulafono matuia.