« ការបំពាក់បំប៉នចំណេះចំណានខាងគោលលទ្ធិ » ការបំពាក់បំប៉នកម្មវិធីសិក្សាថ្នាក់សិក្ខាសាលា ( ឆ្នាំ ២០២៥ )
ការបំពាក់បំប៉នចំណេះចំណានខាងគោលលទ្ធិ
សេចក្តីណែនាំស្ដីពីចំណេះចំណានខាងគោលលទ្ធិ ៖ គន្លងនៃការខិតខំ និងការស្វែងរកចម្លើយដ៏ទេវភាព
នៅក្នុងព្រះគម្ពីរមរមន យ៉ាកុបភ្ជាប់បទពិសោធន៍ដែលលោកបានមាន ទៅជាមួយនឹងបុរសម្នាក់ឈ្មោះថា សេរេម ។ សេរេមជាអ្នករៀនសូត្រ ម្ល៉ោះហើយ ទើបគាត់អាចបញ្ជោរ ហើយរកកលល្បិចនៃសម្ដីជាច្រើនរហូតដល់គាត់បានបង្វែរចិត្តមនុស្សជាច្រើនចេញ ហើយ « រំលំគោលលទ្ធិនៃព្រះគ្រីស្ទចោល » ( សូមមើល យ៉ាកុប ៧:២–៤ ) ។ យ៉ាកុបពន្យល់ថាសេរេម « បានស្វែងរកឱកាសជាច្រើន ដើម្បីគាត់អាចនិយាយនឹងខ្ញុំ ។ … ហើយគាត់បានសង្ឃឹមថានឹងធ្វើឲ្យខ្ញុំបាត់បង់សេចក្ដីជំនឿ »( យ៉ាកុប ៧:៣, ៥ ) ។ ប៉ុន្តែយ៉ាកុបបានកត់ត្រាថា ទោះជាយ៉ាងណា « ខ្ញុំមិនអាចបាត់បង់សេចក្តីជំនឿបានទេ » ( យ៉ាកុប ៧:៥ ) ។ ដោយសារតែកិច្ចខិតខំឧស្សាហ៍ព្យាយាមដែលយ៉ាកុបបានមានអស់ពេញមួយជីវិតរបស់លោក គ្មានសំណួរ ឬកាលៈទេសៈណាដែលអាចដកយកយ៉ាកុបចេញពីគ្រឹះដ៏រឹងមាំដែលលោកបានស្ថាបនាលើព្រះយេស៊ូវគ្រីស្ទ និងដំណឹងល្អរបស់ទ្រង់ឡើយ ។
នៅសម័យរបស់យើង យុវវ័យនៃសាសនាចក្រជួបប្រទះសំណួរ និងស្ថានភាពពិបាកដែលអាចធ្វើឲ្យពួកគេបាត់បង់សេចក្ដីជំនឿរបស់ពួកគេ ។ ចំណេះចំណានខាងគោលលទ្ធិគឺជារបៀបមួយដែលសិស្សអាចរៀបចំខ្លួនសម្រាប់ឧបសគ្គទាំងនេះ ។ ពេលដែលសិស្សអភិវឌ្ឍចំណេះចំណានខាងគោលលទ្ធិ នោះពួកគេនឹងអាចរៀបចំខ្លួនបានកាន់តែប្រសើរ ដើម្បីកុំឲ្យបាត់បង់សេចក្ដីជំនឿរបស់ពួកគេលើព្រះយេស៊ូវគ្រីស្ទ ។ ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានចែកចាយជាមួយគ្រូបង្រៀនថ្នាក់សិក្ខាសាលា និងវិទ្យាស្ថានអំពីចំណេះចំណានខាងគោលលទ្ធិ ដូចខាងក្រោម ៖
[ ចំណេះចំណានខាងគោលលទ្ធិ ] នឹងផ្ដោតទៅលើការស្ថាបនា និងការពង្រឹងសេចក្ដីជំនឿរបស់សិស្សយើងទៅលើព្រះយេស៊ូវគ្រីស្ទ ហើយពង្រឹងពួកគេតាមរយៈការបង្កើនសមត្ថភាពក្នុងការរស់នៅ និងការអនុវត្តដំណឹងល្អនៅក្នុងជីវិតពួកគេ ។ …
គំនិតផ្តួចផ្តើមនេះគឺត្រូវបានបំផុសគំនិត និងទាន់ពេលវេលា ។ វានឹងមានឥទ្ធិពលដ៏អស្ចារ្យលើយុវវ័យរបស់យើង ។ ទោះជាយ៉ាងណា ភាពជោគជ័យនៃចំណេះចំណានខាងគោលលទ្ធិ និងភាពជោគជ័យនៃកម្មវិធីផ្សេងៗទាំងអស់នៃការសិក្សានៅក្នុងប្រព័ន្ធ ស៊ី.អ៊ី.អេស. នឹងពឹងផ្អែកទាំងស្រុងទៅលើអ្នករាល់គ្នាក្នុងវិសាលភាពដ៏ធំមួយ ។ ( អិម រ័សុល បាឡឺដ « The Opportunities and Responsibilities of CES Teachers in the 21st Century[ ជំនួបជាមួយអ្នកមានសិទ្ធិអំណាចទូទៅ ថ្ងៃទី ២៦ ខែ កុម្ភៈ ឆ្នាំ ២០១៦ ] នៅលើគេហទំព័រ broadcasts.ChurchofJesusChrist.org )
ចំណេះចំណានខាងគោលលទ្ធិនៅក្នុងកម្មវិធីសិក្សា
នៅក្នុងសៀវភៅសិក្សាសម្រាប់គ្រូបង្រៀន បទពិសោធន៍នៃការរៀនសូត្រចំណេះចំណានខាងគោលលទ្ធិ ត្រូវបានដាក់បញ្ចូលជាទៀងទាត់ ដើម្បីជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ ។ រូបក្រាហ្វិចខាងក្រោមនេះបង្ហាញពីលទ្ធផលនៃចំណេះចំណានខាងគោលលទ្ធិ ។ សម្រាប់ព័ត៌មានបន្ថែម សូមមើល ឯកសារគោលនៃចំណេះចំណានខាងគោលលទ្ធិ ( ២០២៣ ) ។
កម្មវិធីសិក្សាថ្នាក់សិក្ខាសាលាជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិតាមរបៀបបីយ៉ាងដូចខាងក្រោមនេះ ៖
-
មេរៀននៃសេចក្ដីណែនាំនៃចំណេះចំណានខាងគោលលទ្ធិ និងគោលការណ៍នៃការទទួលបានចំណេះដឹងខាងវិញ្ញាណ
-
វគ្គបទគម្ពីរចំណេះចំណានខាងគោលលទ្ធិបានបង្រៀននៅក្នុងបរិបទរួមនឹងកាលវិភាគ ចូរមកតាមខ្ញុំ
-
មេរៀននៃការអនុវត្តចំណេះចំណានខាងគោលលទ្ធិ
ដូចជាអ្នកឡើងភ្នំដែលត្រូវការឧបករណ៍ដើម្បីរំកិលចុះពីជញ្ជាំងជ្រលងភ្នំដ៏ចោតដោយសុវត្ថិភាព បទពិសោធន៍នៃការរៀនសូត្រទាំងនេះជួយបំពាក់ដល់សិស្សនូវជំនាញទាំងឡាយដើម្បីដោះស្រាយនូវសំណួរ និងស្ថានភាពដ៏ពិបាកដោយសេចក្ដីជំនឿលើព្រះយេស៊ូវគ្រីស្ទ ។
សេចក្តីណែនាំស្ដីពីមេរៀនចំណេះចំណានខាងគោលលទ្ធិ និងមេរៀនការទទួលបានចំណេះដឹងខាងវិញ្ញាណ
មេរៀននៃចំណេះចំណានខាងគោលលទ្ធិមានចំនួនប្រាំ ដែលបានរៀបរៀងឡើងដើម្បីជួយសិស្សយល់ពីគោលបំណងនៃចំណេះចំណានខាងគោលលទ្ធិ និងរៀនពីគោលការណ៍នៃការទទួលបានចំណេះដឹងខាងវិញ្ញាណ ។
-
ការពង្រឹងមូលដ្ឋានគ្រឹះខាងវិញ្ញាណរបស់អ្នក ៖ សេចក្ដីណែនាំស្ដីពីចំណេះចំណានខាងគោលលទ្ធិ ។ ផ្ដល់ដល់សិស្សនូវទស្សនៈរួមពីអ្វីទៅជាចំណេះចំណានខាងគោលលទ្ធិ និងប្រភេទនៃបទពិសោធន៍នៃការរៀនសូត្រដែលពួកគេអាចរំពឹងទុកដើម្បីជួយពួកគេអភិវឌ្ឍចំណេះចំណានខាងគោលលទ្ធិ ។ ពេលវេលាដ៏ល្អបំផុតគឺបង្រៀននៅពេលនៃការចាប់ផ្ដើមឆ្នាំសិក្សា ប្រសិនបើសិស្សទាំងនោះជាសិស្សថ្មីក្នុងថ្នាក់សិក្ខាសាលា ឬបង្រៀនជាមេរៀនរំឭកឡើងវិញនៅពាក់កណ្ដាលឆ្នាំសិក្សា ។
-
ការស្វែងរកវិវរណៈផ្ទាល់ខ្លួនសម្រាប់សំណួររបស់ខ្ញុំ ៖ ការទទួលបានចំណេះដឹងខាងវិញ្ញាណ ផ្នែកទី ១ ។ ជួយសិស្សឲ្យយល់ពីរបៀបដែលពួកគេអាចទទួលបានការណែនាំ និងវិវរណៈមកពីព្រះតាមរយៈព្រះវិញ្ញាណបរិសុទ្ធ ។ ពេលវេលាល្អបំផុតសម្រាប់បង្រៀនមេរៀននេះគឺនៅដើមឆ្នាំសិក្សា ។
-
ការធ្វើសកម្មភាពដោយសេចក្ដីជំនឿដើម្បីស្វែងរកចម្លើយ ៖ ការទទួលបានចំណេះដឹងខាងវិញ្ញាណ ផ្នែកទី ២ ។ ជួយសិស្សឲ្យយល់ពីរបៀបធ្វើសកម្មភាពដោយសេចក្តីជំនឿលើព្រះយេស៊ូវគ្រីស្ទ នៅពេលពួកគេខិតខំស្វែងរកចម្លើយចំពោះសំណួររបស់ពួកគេ ។ ពេលវេលាល្អបំផុតសម្រាប់បង្រៀនមេរៀននេះគឺនៅដើមឆ្នាំសិក្សា ។
-
ការពិនិត្យមើលប្រធានបទនៃដំណឹងល្អ និងសំណួរដោយមានទស្សនវិស័យដ៏អស់កល្បមួយ ៖ការទទួលបានចំណេះដឹងខាងវិញ្ញាណ ផ្នែកទី ៣ ។ ជួយសិស្សឲ្យមើលឃើញពីគំនិត និងសំណួរទាំងឡាយឲ្យកាន់តែដូចព្រះយេស៊ូវគ្រីស្ទ នៅពេលពួកគេពិនិត្យមើលគំនិត និងសំណួរទាំងឡាយនោះជាមួយនឹងទស្សនវិស័យដ៏អស់កល្បមួយ ។ ពេលវេលាល្អបំផុតសម្រាប់បង្រៀនមេរៀននេះគឺនៅដើមឆ្នាំសិក្សា ។
-
ការបែរទៅរកធនធានដ៏ទេវភាពដែលបានតាំងឡើងដើម្បីស្វែងរកចម្លើយ ៖ ការទទួលបានចំណេះដឹងខាងវិញ្ញាណ ផ្នែកទី ៤ ។ ជួយសិស្សឲ្យយល់ពីសារៈសំខាន់នៃការខិតខំស្វែងរកសេចក្តីពិតពីប្រភពនានាដែលព្រះវរបិតាសួគ៌ និងព្រះយេស៊ូវគ្រីស្ទបានប្រទានមកដោយសេចក្តីស្រឡាញ់ ។ ពេលវេលាល្អបំផុតសម្រាប់បង្រៀនមេរៀននេះគឺនៅដើមឆ្នាំសិក្សា ។
វគ្គចំណេះចំណានខាងគោលលទ្ធិដែលបានបង្រៀននៅក្នុងបរិបទ
នៅពេលបង្រៀនមេរៀនចេញពីបណ្តុំព្រះគម្ពីរដែលមានរួមទាំងវគ្គចំណេះចំណានខាងគោលលទ្ធិ សូមរកមើលរបៀបទាំងឡាយដើម្បីសង្កត់ធ្ងន់ទៅលើវគ្គនោះ ។ បង្រៀនវគ្គនេះនៅក្នុងបរិបទ ហើយផ្ដោតលើគោលលទ្ធិដែលវគ្គនេះបង្រៀន ។ អ្នកនឹងសម្គាល់ឃើញរូបតំណាងនេះ នៅគ្រប់ពេលដែលមានវគ្គចំណេះចំណានខាងគោលលទ្ធិ ។ អ្នកអាចលើកទឹកចិត្ដសិស្សឲ្យគូសចំណាំវគ្គនីមួយៗ ដើម្បីពួកគេអាចស្វែងរកវគ្គទាំងនោះនៅពេលក្រោយ ។
ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ )មាននូវបញ្ជីនៃវគ្គចំណេះចំណានខាងគោលលទ្ធិទាំង ២៤ សម្រាប់វគ្គសិក្សានីមួយៗ ។ សេចក្ដីណែនាំអំពីល្បឿនបង្រៀនរបស់អ្នក នឹងមិនរួមបញ្ចូលនូវគ្រប់មេរៀនទាំងអស់ដែលរៀបរាប់អំពីវគ្គចំណេះចំណានខាងគោលលទ្ធិក្នុងបរិបទ ខណៈដែលថ្នាក់សិក្ខាសាលាកំពុងស្ថិតក្នុងការបង្រៀននោះទេ ដូចនេះសូមរកមើលឱកាសដើម្បីជួយសិស្សរំឭកនូវវគ្គទាំង ២៤ ឡើងវិញ ។
ពេលដែលបានសិក្សាវគ្គចំណេះចំណានខាងគោលលទ្ធិនៅក្នុងថ្នាក់រួចហើយ សូមប្រាកដថាអ្នកបានចំណាយពេលវេលាគ្រប់គ្រាន់ក្នុងការសិក្សានូវគោលលទ្ធិដែលបានបង្រៀននៅក្នុងវគ្គចំណេះចំណានខាងគោលលទ្ធិ ដើម្បីសិស្សដឹង និងយល់ពីវា ។ មេរៀននីមួយៗដែលមានវគ្គចំណេះចំណានខាងគោលលទ្ធិ រួមបញ្ចូលការណែនាំដើម្បីជួយសិស្សហាត់ការទន្ទេញព្រះគម្ពីរយោង និងឃ្លាបទគម្ពីរគន្លឹះដែលជាផ្នែកនៃមេរៀននេះ និងដើម្បីហាត់ម្ដងទៀតនៅមេរៀននាពេលអនាគត ។ សិស្សនឹងត្រូវការការហ្វឹកហាត់ជាទៀងទាត់ដើម្បីចងចាំសេចក្ដីយោង និងឃ្លាបទគម្ពីរគន្លឹះ ។ « គំនិតដើម្បីរំឭកចំណេះចំណានខាងគោលលទ្ធិ » រួមមានការណែនាំពីរបៀបដែលអ្នកអាចជួយសិស្សឲ្យហាត់ទន្ទេញសេចក្ដីយោង និងឃ្លាបទគម្ពីរគន្លឹះ ។ គំនិតទាំងនេះអាចរកបាននៅក្នុងឧបសម្ព័ន្ធនៃសៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ។
មេរៀននៃការអនុវត្តចំណេះចំណានខាងគោលលទ្ធិ
មេរៀននៃការអនុវត្តចំណេះចំណានខាងគោលលទ្ធិ គឺបានដាក់កាលវិភាគជាទៀងទាត់ប្រហែលរៀងរាល់ ៤ ទៅ ៦ សប្ដាហ៍ម្ដង ។ មេរៀនទាំងនេះផ្ដល់ឱកាសដល់សិស្សដើម្បីធ្វើកិច្ចការឆ្ពោះទៅកាន់ការសម្រេចបាននូវលទ្ធផលនៃចំណេះចំណានខាងគោលលទ្ធិ ។ មេរៀននៃការអនុវត្តចំណេះចំណានខាងគោលលទ្ធិនីមួយៗមានពីរផ្នែក ៖
-
ការរំឭកចំណេះចំណានខាងគោលលទ្ធិ
-
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
ការរំឭកចំណេះចំណានខាងគោលលទ្ធិ
នៅក្នុងផ្នែកនៃការរំឭកចំណេះចំណានខាងគោលលទ្ធិ សិស្សនឹងអនុវត្ដការយល់ដឹង និងការពន្យល់គោលលទ្ធិដែលប្រើនៅក្នុងវគ្គចំណេះចំណានខាងគោលលទ្ធិ ការកំណត់ទីតាំងព្រះគម្ពីរនៃវគ្គចំណេះចំណានខាងគោលលទ្ធិ និងការទន្ទេញឃ្លាបទគម្ពីរគន្លឹះ និងការអនុវត្ដតាមគោលលទ្ធិដែលបានបង្រៀននៅក្នុងវគ្គទាំងនេះ ។ ទោះបីជាការរំឭកទាំងនេះសំខាន់ និងគួរតែជាផ្នែកមួយនៃបទពិសោធន៍នៃការរៀនសូត្ររបស់សិស្សក្តី ក៏សូមគ្រប់គ្រងពេលវេលាក្នុងថ្នាក់រៀនឲ្យមានប្រសិទ្ធភាពដើម្បីពេលវេលាភាគច្រើនចំណាយទៅលើផ្នែកការរៀន និងអនុវត្តគោលការណ៍នៃការទទួលបានចំណេះដឹងខាងវិញ្ញាណដែរ ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
ផ្នែកការរៀន និងអនុវត្តគោលការណ៍នៃការទទួលបានចំណេះដឹងខាងវិញ្ញាណ គួរតែទទួលបានម៉ោងរៀនភាគច្រើននៃមេរៀននៃការអនុវត្ដវគ្គចំណេះចំណានខាងគោលលទ្ធិ ។ ផ្នែកនេះផ្ដល់ឱកាសដល់សិស្សដើម្បីរៀនអនុវត្ដគោលលទ្ធិនៃដំណឹងល្អរបស់ព្រះយេស៊ូវគ្រីស្ទ និងគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិនៅក្នុងស្ថានភាពជីវិតជាក់ស្តែង ។
ការអនុវត្តនីមួយៗចាប់ផ្តើមជាមួយនឹងឱកាសដើម្បីពិនិត្យមើលឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ សូមចងចាំថា ទោះបីសិស្សម្នាក់ ឬពីរនាក់ចេះគោលការណ៍នេះបានល្អក្ដី ក៏សិស្សផ្សេងៗទៀតអាចនឹងនៅតែត្រូវការពេលវេលា និងការអនុវត្តបន្ថែមដែរ ។ សូមធ្វើឲ្យអស់ពីលទ្ធភាពរបស់អ្នកដើម្បីជួយសិស្សទាំងអស់មានទំនុកចិត្ដក្នុងការប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ ។ « គំនិតនៃការរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ » ដែលរួមមានការណែនាំអំពីរបៀបរំឭកគោលការណ៍ទាំងនោះឡើងវិញ ។ គំនិតទាំងឡាយនេះ គឺមាននៅក្នុងឧបសម្ព័ន្ធសៀវភៅសិក្សាសម្រាប់គ្រូបង្រៀនសិក្ខាសាលា ។
សិស្សនឹងត្រូវបានប្រាប់នូវសាច់រឿងមួយដែលបង្ហាញនូវសំណួរ ឬស្ថានភាពមួយដែល ការយល់ដឹងត្រឹមត្រូវអំពីគោលលទ្ធិពិតអាចជួយបាន ។ ដើម្បីឆ្លើយតបទៅនឹងសំណួរ ឬស្ថានភាព សិស្សអាចរៀនប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង វគ្គចំណេះចំណានខាងគោលលទ្ធិ ព្រះគម្ពីរផ្សេងៗ ឬការបង្រៀនរបស់ថ្នាក់ដឹកនាំសាសនាចក្រ ដែលសិស្សបានរៀននាពេលថ្មីៗនេះ ។
ការផ្ដល់ឱកាសឲ្យសិស្សហ្វឹកហាត់ គឺចាំបាច់សម្រាប់ភាពជោគជ័យរបស់ពួកគេក្នុងចំណេះចំណានខាងគោលលទ្ធិ ។ សូមគិតអំពីរបៀបដែលនរណាម្នាក់រៀនក្បាច់គុនការពារខ្លួនត្រូវការបង្កើនការហ្វឹកហាត់របស់ពួកគេដើម្បីអភិវឌ្ឍភាពរហ័សរហួនខាងសាច់ដុំ ។ ការណ៍នេះរៀបចំពួកគេឲ្យឆ្លើយតបទៅការវាយប្រហារផ្សេងៗខុសពីគ្នា ។ ដូចគ្នានេះដែរ សិស្សត្រូវការបង្កើនការអនុវត្ដជាមួយនឹងចំណេះចំណានខាងគោលលទ្ធិ ។ នៅពេលសិស្សចូលរួមនៅក្នុងការអនុវត្តជាទៀងទាត់ នូវចំណេះចំណានខាងគោលលទ្ធិ នោះការឆ្លើយតបដោយស្មោះត្រង់ចំពោះឧបសគ្គទាំងឡាយ នឹងក្លាយជារឿងឯកឯង និងស្វ័យប្រវត្ដិ ។
ដើម្បីមើលឃើញឧទាហរណ៍ទម្រង់នៃការអនុវត្ដ សូមពិចារណាមើលវីដេអូមួយ ឬទាំងពីរដូចតទៅនេះ នៅលើគេហទំព័រ ChurchofJesusChrist.org ។ នៅពេលអ្នកមើល សូមរកមើលរបៀបដែលគ្រូបង្រៀនជួយសិស្សអនុវត្តការប្រើគោលការណ៍ទាំងបីនៃការទទួលបានចំណេះដឹងខាងវិញ្ញាណ ។
« ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ៣ »
« ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ៤ »
អ្នកអាចកែសម្រួលសាច់រឿងនោះ និងសំណួរដែលបានផ្តល់ឲ្យ ឬសកម្មភាពរៀនសូត្រផ្សេងៗទៀតតាមការចាំបាច់ ដើម្បីបំពេញសេចក្តីត្រូវការរបស់សិស្សបានកាន់តែប្រសើរ ។ អ្នកក៏អាចកែសម្រួលលំដាប់លំដោយដែលសិស្សអនុវត្ដនូវគោលការណ៍ទាំងឡាយនៃការទទួលបានចំណេះដឹងខាងវិញ្ញាណ ។ សូមប្រាកដថា ការកែសម្រួលទាំងនោះនៅតែផ្តល់ឱកាសដល់សិស្សដើម្បីអនុវត្តគោលការណ៍ទាំងឡាយនៃការទទួលបានចំណេះដឹងខាងវិញ្ញាណ និងគោលលទ្ធិនៅក្នុងស្ថានភាពជាក់ស្តែងមួយ ។ ប្រសិនបើកែសម្រួលសាច់រឿង សូមព្យាយាមរក្សានូវសំណួរ ឬកង្វល់ចម្បងនៃសាច់រឿងនោះ ។ សំណួរ ឬកង្វល់ដែលជាចំណុចស្នូលនៃសាច់រឿងនីមួយៗ គឺត្រូវបានរៀបចំយ៉ាងយកចិត្តទុកដាក់សម្រាប់វគ្គសិក្សាថ្នាក់សិក្ខាសាលាទាំងបួនឆ្នាំ ។
សម្រាប់គំនិតអំពីរបៀបដើម្បីធ្វើការកែសម្រួលដោយសមរម្យទៅលើទម្រង់នៃការអនុវត្ដ សូមពិចារណាមើលវីដេអូមួយ ឬទាំងពីរដូចតទៅនេះ នៅលើគេហទំព័រ ChurchofJesusChrist.org ។
« ការកែសម្រួលកម្មវិធីសិក្សាចំណេះចំណានខាងគោលលទ្ធិ ៖ ការអញ្ជើញសិស្សដើម្បីធ្វើឲ្យសាច់រឿងកាន់តែមានភាពទាក់ទង » ។
« ការកែសម្រួលកម្មវិធីសិក្សាចំណេះចំណានខាងគោលលទ្ធិ ៖ ការកែសម្រួលសាច់រឿងដើម្បីបំពេញតម្រូវការជាក់លាក់ » ។
« ការកែសម្រួលកម្មវិធីសិក្សាចំណេះចំណានខាងគោលលទ្ធិ ៖ ការជួយសិស្សឲ្យមើលឃើញខ្លួនពួកគេនៅក្នុងសាច់រឿងនោះ » ។
« ការកែសម្រួលកម្មវិធីសិក្សាចំណេះចំណានខាងគោលលទ្ធិ ៖ ការបង្កើតសកម្មភាពទាំងឡាយដើម្បីជួយសិស្សប្រើប្រាស់គ្រប់គោលការណ៍ទាំងបី » ។
ជំនាញដើម្បីបង្រៀនចំណេះចំណានខាងគោលលទ្ធិដោយមានប្រសិទ្ធភាព
ការបំពាក់បំប៉នខាងក្រោមនេះបង្រៀនពីជំនាញនានា ដើម្បីអភវិឌ្ឍចំណេះចំណានខាងគោលលទ្ធិ ។ វាអាចមានប្រសិទ្ធភាពក្នុងការបញ្ចូលជំនាញទាំងនេះបន្ដិចម្ដងៗ ។
ជំនាញ ៖ សូមពន្យល់អំពីមូលហេតុសម្រាប់សកម្មភាពចំណេះចំណានខាងគោលលទ្ធិ ។
កំណត់និយមន័យ
ការចែកចាយ ឬឲ្យសិស្សចែកចាយមូលហេតុមួយក្នុងការធ្វើសកម្មភាពចំណេះចំណានខាងគោលលទ្ធិ អាចជំរុញទឹកចិត្តសិស្សឲ្យចូលរួមក្នុងសកម្មភាព ។ វាក៏អាចអនុញ្ញាតឲ្យព្រះវិញ្ញាណបរិសុទ្ធបង្រៀនពួកគេអំពីសារៈសំខាន់នៃសកម្មភាពនោះផងដែរ ។ បន្ទាប់ពីអ្នកចែកចាយពីអ្វីដែលថ្នាក់នឹងធ្វើ សូមចែកចាយមូលហេតុមួយ ឬពីរថាហេតុអ្វីអ្នកធ្វើសកម្មភាពនោះ ឬសុំឲ្យសិស្សចែកចាយថា ហេតុអ្វីពួកគេគិតថាសកម្មភាពនោះអាចមានប្រយោជន៍ ។
គំរូ
« ប្អូនៗ យើងនឹងប្រើពេលពីរបីនាទីពន្យល់ពីគោលលទ្ធិដែលយើងរៀនចេញពី លូកា ២:១០–១២ ថាព្រះយេស៊ូវគ្រីស្ទ គឺជាព្រះអង្គសង្គ្រោះនៃពិភពលោក ។ មូលហេតុមួយដែលយើងធ្វើបែបនេះ គឺដើម្បីជួយយើងឲ្យមានលទ្ធភាពឆ្លើយតបដោយមានទំនុកចិត្ត ប្រសិនបើនរណាម្នាក់សួរយើងថាហេតុអ្វីបានជាព្រះយេស៊ូវគ្រីស្ទសំខាន់ចំពោះយើង » ។
ដើម្បីមើលឧទាហរណ៍អំពីរបៀបមួយដែលវាអាចសម្រេចទៅបាន សូមមើលវីដេអូមួយ ឬច្រើនដូចតទៅនេះ នៅលើគេហទំព័រ ChurchofJesusChrist.org ។
« ការចែកចាយមូលហេតុមួយសម្រាប់សកម្មភាពចំណេះចំណានខាងគោលលទ្ធិ »
« ការជួយសិស្សឲ្យរកឃើញមូលហេតុមួយសម្រាប់សកម្មភាពចំណេះចំណានខាងគោលលទ្ធិ »
« ការជួយសិស្សចែកចាយមូលហេតុទាំងឡាយសម្រាប់សកម្មភាពចំណេះចំណានខាងគោលលទ្ធិ »
អនុវត្ត
សូមជ្រើសរើសប្រធានបទមួយក្នុងចំណោមខាងក្រោមនេះ ហើយបំពេញប្រយោគនោះ ។
« ចូរយើងធ្វើសកម្មភាពមួយ ដែលនឹងជួយយើងទន្ទេញចាំបទគម្ពីរយោងចំណេះចំណានខាងគោលលទ្ធិជាមួយនឹងឃ្លាគន្លឹះ ។ មូលហេតុមួយដែលយើងខិតខំទន្ទេញវាគឺ … »
« សម្រាប់រយៈពេលពីរបីនាទីនេះ យើងនឹងរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ ការដឹងពីគោលការណ៍ទាំងនេះអាចជួយយើងឲ្យ … »
« យើងនឹងអនុវត្តការប្រើប្រាស់គោលការណ៍ទាំងបីនៃការទទួលបានចំណេះដឹងខាងវិញ្ញាណ ។ ការប្រើប្រាស់គោលការណ៍ទាំងនេះអាច … »
ការវិភាគ
-
តើអ្នកកំពុងរៀនពីអ្វី កាលដែលអ្នកអនុវត្តការពន្យល់អំពីមូលហេតុសម្រាប់ការធ្វើសកម្មភាពចំណេះចំណានខាងគោលលទ្ធិ ?
រួមបញ្ចូល
កាលអ្នករៀបចំឲ្យសិស្សអនុវត្ដសកម្មភាពចំណេះចំណានខាងគោលលទ្ធិ សូមសរសេរយ៉ាងហោចណាស់មូលហេតុមួយ ដែលការណ៍នេះអាចមានតម្លៃចំពោះសិស្ស ។
ជំនាញ ៖ សូមអញ្ជើញសិស្សឲ្យរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។
កំណត់និយមន័យ
កាលអ្នករំឭកឡើងវិញជាទៀតទាត់នូវគោលការណ៍នៃការទទួលបានចំណេះដឹងខាងវិញ្ញាណជាមួយនឹងថ្នាក់របស់អ្នក នោះព្រះវិញ្ញាណបរិសុទ្ធអាចជួយសិស្សឲ្យចងចាំ ហើយប្រើប្រាស់គោលការណ៍ទាំងនេះក្នុងពេលដែលត្រូវការ ។ អ្នកអាចអញ្ជើញសិស្សឲ្យរំឭកគោលការណ៍ទាំងនេះមុននឹងអ្នកចែកចាយសាច់រឿង ឬខណៈពេលដែលសិស្សកំពុងធ្វើតាមសាច់រឿងទាំងនេះ ។ ការអញ្ជើញទាំងនេះរួមបញ្ចូលនូវឱកាសសម្រាប់សិស្សរំឭកឡើងវិញយ៉ាងហោចណាស់នូវគោលការណ៍មួយ និងសេចក្ដីណែនាំថាពួកគេគួរតែចំណាយពេលប៉ុនណាដើម្បីរំឭកគោលការណ៍នោះ និងឱកាសមួយដើម្បីឲ្យពួកគេចែកចាយអ្វីដែលពួកគេបានរៀន ។ ដោយការធ្វើដូច្នេះ សិស្សនឹងអាចប្រើប្រាស់គោលការណ៍ទាំងនេះបានកាន់តែប្រសើរ ជាផ្នែកនៃការរៀនអនុវត្ត ។ សម្រាប់គំនិតបន្ថែមទៀតអំពីការណ៍នេះ សូមមើលផ្នែក « គំនិតនៃការរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ » នៅក្នុងឧបសម្ព័ន្ធនៃសៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ) ។
គំរូ
« ថ្ងៃនេះ ពួកយើងនឹងរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណចេញពី ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ។ ពួកយើងនឹងចែកជាក្រុមដែលមានគ្នាបីនាក់ ។ សិស្សម្នាក់ៗនៅក្នុងក្រុមនឹងរំឭកគោលការណ៍មួយខុសៗគ្នា ។
« ចំណាយពេលបីទៅបួននាទីដើម្បីអាន និងរៀបចំដើម្បីចែកចាយជាមួយនឹងក្រុមរបស់អ្នកនូវរបៀបមួយដែលគោលការណ៍របស់អ្នកអាចជួយនរណាម្នាក់ដែលកំពុងប្រឈមនឹងសំណួរ ឬស្ថានភាពលំបាកមួយ » ។
ជាឧទាហរណ៍អំពីរបៀបមួយដើម្បីជួយសិស្សរបស់អ្នករំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ សូមមើល « ផ្ដល់ដល់សិស្សនូវឱកាសដើម្បីរំឭកឡើងវិញនូវគោលការណ៍ទាំងបីនៃការទទួលបានចំណេះដឹងខាងវិញ្ញាណ » ដែលមាននៅលើគេហទំព័រ ChurchofJesusChrist.org ។
អនុវត្ត
សូមសរសេរវិធីមួយទៀតដែលអ្នកអាចអញ្ជើញសិស្សឲ្យរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។
ការវិភាគ
-
តើអ្នកបានរៀនអ្វីខ្លះអំពីការអញ្ជើញសិស្សឲ្យរំឭកមើលគោលការណ៍នៃការទទួលបានចំណេះដឹងខាងវិញ្ញាណឡើងវិញ ?
រួមបញ្ចូល
កាលអ្នករៀបចំមេរៀននៃការអនុវត្ដចំណេះចំណានខាងគោលលទ្ធិបន្ទាប់របស់អ្នក សូមដាក់ផែនការពីរបៀបដើម្បីអញ្ជើញសិស្សឲ្យរំឭកឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។
ជំនាញ ៖សួរសំណួរទាំងឡាយណាដែលជួយសិស្សឲ្យនិយាយចេញមកពីរបៀបដែលគោលការណ៍នៃការទទួលបានចំណេះដឹងខាងវិញ្ញាណអាចជាជំនួយនៅក្នុងស្ថានភាពជីវិតពិត ។
កំណត់និយមន័យ
បន្ទាប់ពីសិស្សរំឭកគោលការណ៍នៃការទទួលបានចំណេះដឹងខាងវិញ្ញាណឡើងវិញ ហើយ សូមចែកចាយជាមួយពួកគេនូវសាច់រឿងនេះ និងអញ្ជើញពួកគេនិយាយជាក្រុម ហើយក្រោយមកឲ្យពួកគេនិយាយនៅក្នុងថ្នាក់រៀនថាមានគោលការណ៍អ្វីខ្លះដែលអាចជួយបាននៅក្នុងសាច់រឿងនោះ ។ ការធ្វើដូច្នេះ វាអាចជួយសិស្សបង្កើតទំនុកចិត្ដនៅក្នុងការប្រើប្រាស់គោលការណ៍ទាំងនេះនៅក្នុងជីវិតរបស់ពួកគេផ្ទាល់ ។
គំរូ
បន្ទាប់ពីការរំឭកគោលការណ៍នៃការទទួលបានចំណេះដឹងខាងវិញ្ញាណ និងការណែនាំសាច់រឿងឡើងវិញហើយ អ្នកអាចសួរសំណួរដូចខាងក្រោម ៖
-
« តើគោលការណ៍នៃការទទួលបានចំណេះដឹងខាងវិញ្ញាណណាមួយដែលអ្នកគិតថាអាចជាជំនួយនៅក្នុងសាច់រឿងនេះ ហើយមូលហេតុអ្វី ? »
-
« តើគោលការណ៍ទាំងនេះអាចជួយអ្នកយ៉ាងដូចម្តេច នៅពេលអ្នកប្រឈមនឹងសំណួរមួយដូចដែលមាននៅក្នុងសាច់រឿងនេះ ? »
ជាឧទាហរណ៍ សូមមើលវីដេអូមួយ ឬទាំងពីរដូចតទៅនេះ នៅលើគេហទំព័រ ChurchofJesusChrist.org ។
« ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ១ »
នៅក្នុង « ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ១ » សូមកត់សម្គាល់ថា គ្រូបង្រៀនបង្ហាញជំនាញនេះនៅនាទីទី ១:២៨ ។
« ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ២ »
នៅក្នុង « ទម្រង់នៃការអនុវត្តចំណេះចំណានខាងគោលលទ្ធិ ឧទាហរណ៍ទី ២ » សូមកត់សម្គាល់ថា គ្រូបង្រៀនបង្ហាញជំនាញនេះនៅនាទីទី ២:២៥ ។
អនុវត្ត
សូមសរសេរសំណួរពីរបីដែលអ្នកអាចសួរ ដែលនឹងជួយសិស្សឲ្យនិយាយចេញមក ពីរបៀបដែលគោលការណ៍នៃការទទួលបានចំណេះដឹងខាងវិញ្ញាណអាចជួយពួកគេឆ្លើយតបទៅកាន់មិត្ដភក្ដិរបស់ពួកគេនៅក្នុងសាច់រឿងខាងក្រោម ។
មិត្តភក្តិរបស់អ្នកម្នាក់ពុំមែនជាអ្នកមានជំនឿលើសាសនានោះទេ ថ្មីៗនេះគាត់បានឃើញពួកអ្នកផ្សព្វផ្សាយសាសនាមួយគូកំពុងនិយាយជាមួយមនុស្សម្នានៅឯសួនច្បារ ។ មិត្ដរបស់អ្នកសួរអ្នកថា « ហេតុអ្វីបានជាពួកអ្នកផ្សព្វផ្សាយសាសនាពីព្រះវិហាររបស់ឯង ចេញទៅផ្សព្វផ្សាយអំពីព្រះយេស៊ូវ ? វាហាក់ដូចជាព្រះវិហាររបស់ឯងកំពុងតែបង្ខិតបង្ខំមនុស្សផ្សេងឲ្យជឿដូចពួកគេដូច្នោះដែរ ។ ហេតុអ្វីឯងមិនទុកឲ្យមនុស្សទាំងនោះរីករាយតាមជីវិតរស់នៅរបស់ពួកគេទៅ ? »
ការវិភាគ
-
តើហេតុអ្វីបានជាអ្នកគិតថាវាមានសារៈសំខាន់សម្រាប់ពួកសិស្សនៅក្នុងការនិយាយចេញមក ពីរបៀបដែលពួកគេអាចនឹងប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ ?
-
តើអ្នកគិតថាការប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ អាចជះឥទ្ធិពលដល់ជីវិតរបស់សិស្សបានយ៉ាងដូចម្ដេច ?
រួមបញ្ចូល
-
តើអ្នកអាចធ្វើអ្វីខ្លះ ដើម្បីជួយសិស្សឲ្យនិយាយចេញមក ពីរបៀបដែលគោលការណ៍នៃការទទួលបានចំណេះដឹងខាងវិញ្ញាណអាចជួយពួកគេ និងមនុស្សផ្សេងទៀត ពេលដែលកំពុងប្រឈមនឹងសំណួរ ឬស្ថានភាពលំបាកមួយ ។
សេចក្ដីបញ្ចប់
សូមស្រមៃពីរបៀបដែលសិស្សរបស់អ្នកអាចដោះស្រាយសំណួរ ឬកង្វល់នានា បន្ទាប់ពីការធ្វើការយ៉ាងខ្ជាប់ខ្ជួនដើម្បីឆ្ពោះទៅកាន់លទ្ធផលនៃចំណេះចំណានខាងគោលលទ្ធិក្នុងថ្នាក់សិក្ខាសាលា ។ នៅពេលចាប់ផ្តើម សិស្សត្រូវការជំនួយ និងការជួយជ្រោមជ្រែងបន្ថែមពីអ្នក ក្នុងនាមជាគ្រូបង្រៀន ដើម្បីអនុវត្តគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិទៅក្នុងស្ថានភាពជីវិតជាក់ស្តែង ។ សិស្សត្រូវការពេលវេលាខ្លះៗដើម្បីចេះស្ទាត់នូវគោលលទ្ធិ និងមានទំនុកចិត្ដក្នុងការប្រើប្រាស់គោលការណ៍នៃការទទួលបានចំណេះដឹងខាងវិញ្ញាណ ។ ទោះជាយ៉ាងណា នៅពេលអ្នកបន្តផ្ដល់ឱកាសដល់សិស្សក្នុងការអនុវត្ដជាទៀងទាត់ ការណ៍នេះនឹងក្លាយជាអ្វីដែលសិស្សធ្វើដូចធម្មតាដោយឯកឯង ។ នេះជារបៀបមួយដែលអ្នកអាចជួយសិស្សរបស់អ្នក ស្ថាបនាមូលដ្ឋានគ្រឹះដ៏រឹងមាំរបស់ពួកគេនៅលើសិលានៃព្រះយេស៊ូវគ្រីស្ទ និងធ្វើឲ្យការប្រែចិត្ដជឿរបស់ពួកគេទៅលើទ្រង់ និងគោលលទ្ធិរបស់ទ្រង់កាន់តែខ្លាំងឡើង ។