Taiala mo le Faiaoga

E moomia tele le faamalolosia o faaipoipoga, aemaise lava i nei aso e gata ai a o faateleina le fenumia’i ma faaosoosoga. I se saunoaga e uiga i o tatou aso, na saunoa ai Peresitene Gordon B. Hinckley: “Ua lepetia le aiga i le lalolagi atoa. O fusi tuai na sa fusia faatasi ai le tama ma le tina ma le fanau, ua motusia i soo se mea…. Ua nutimomoia loto; ua fetagisi fanau. Pe le mafai ea ona lelei atu se mea tatou te fai? Ioe, e tatou te mafai.”¹

Na saunia lenei vasega e tali atu ai i le manaoga mo le faamalolosia o sootaga faaleaiga ma ua tusia ina ia aoga mo se aofaiga e toatele o tagata e mafai ona aoga i ai. O lo o aofia ai mataupu faavae o le talalelei ma tomai e fesoasoani ai i sui auai e faaleleia atili ai a latou faaipoipoga.

Faaaoga le tusi taiala lenei a le faiaoga faatasi ai ma le taiala o punaoa mo ulugalii. O lo o tuuina atu ai faamatalaga faaopopo e fesoasoani ai ia te oe ina ia manuia le faafoeina o vasega.

O nisi o manatu i totonu o lenei folasaga ma le faaopoopoga na aumaia mai i le tusi taiala a le faiaoga o le Mataupu Faavae o le Tausiga Faa-matua, o se faasologa o tusi na tusia e H. Wallace Goddard ma na lolomiina e le Alabama Cooperative Extension Service.²

Faatautaia o le Vasega

O le vasega e tatau ona aoaoina i vaega taito’a 20 o tagata auai, pe toaitiiti ifo foi, e tagata e i ai tomai faapitoa a le ofisa o Tautua a le AAG mo Aiga, po o i latou e faigaluega ofo fua mai i uarota ma siteki. O se kosi masani o le a faia i le umi e ono i le valu vasega. O vasega taitasi, e masani ona 90 minute le umi. E aofia i leFaamalolosia o Faaipoipoga:Taiala o Punaoa mo Ulugalii ni autu se ono e mafai ona faaaogaina i fonotaga a vaega. E ui o le a e filifilia autu e te manatu o le a sili ona faafetaiaia ai manaoga o tagata taitoatasi o le vasega, ae e ao ona e aoaoina le vasega 1, “Faaaogaina o Mataupu Faavae o le Talalelei,” o le uluai vasega lea o le kosi. Ina ia mautinoa ua lelei ona aoaoina, atonu o nisi autu e manaomia ai le lua i le tolu taimi e talanoaina ai.

Ia mafaufau i fautuaga nei mo le faatinoina o le vasega:

Mulimuli i taiala a le ofisa mo le totogiina o pili a vaega, pe afai o le vasega o lo o lagolagoina e se lala o le Tautua a le AAG mo Aiga. Afai o le vasega o lo o lagolagoina e se siteki po o se uarota, o le pili e tatau ona na o le tau o tusi aoga e aofia ai. E ao ona totogi e sui auai le pili i le amataga o le vasega, ina ia faamalosiauina ai le auai mai i le vasega.
Faamalosiau i ulugalii e auai faatasi i vasega ina ia faamalolosia ai sootaga vavalalata. O mataupu faavae latou te aoaoina e mafai ai ona aumaia faatasi i laua, pe a auai uma i laua, ae mafai foi ona avea nei mataupu faavae o se tina, pe a le auai, pe le fia lagolagosua se tasi o i laua.
Ia tausia se faamaumauga o le aofai o vasega na auai ai sui taitasi, e ala lea i le faia o le tauvalaauga i taimi taitasi e fai ai le vasega (tagai itulau 78 i le faaopoopoga).
Faafesootai le ofisa lata ane o le Tautua a le AAG mo Aiga, pe a i ai ni fesili e uiga i le aoaoina o le vasega. O nofoaga e i ai ofisa ma numera o telefoni, e mafai ona maua i lewww.ldsfamilyservices.org.

Faasilasilaina o le Vasega

Pe a e faasoaina atu faamatalaga e uiga i le vasega, faamatala mea e mafai e tagata taitoatasi ma ulugalii ona maua mai ai e ala i le auai ai. O se lisi o aoga e maua mai, o le a sili atu ona faaosofia ai ulugalii, nai lo le tuuina atu o se lisi o autu o le a talanoaina.

E tele aoga o le vasega. O tagata taitoatasi e auai, o le a aoaoina auala e foia ai feeseeseaiga, atiina ae uiga alofa sili ma le faatuatuaina, ma avea le faaipoipoga o se tasi o faamuamua ina ia latou olioli faatasi i se fiafiaga sili atu. O le a latou aoao e faalogo ma fefaasoaai lagona maaleale ma tiga, ma faatautaia i se auala talafeagai lagona o le ita. O le a latou mauaina se lagona sili o le faafetai mo le taua e faavavau o le feagaiga o le faaipoipoga, ma o latou avanoa e faavavau e o’o mai e ala i le faaipoipoga faa-selesitila. O le a latou aoao e atiina ae se lotogatasi e sili atu, laugatasia, ma le fefaaaloaloa’i.

Ia manatua e faaaoga le pepa o faamatalaga o lo o i le itulau 76 i le faaopopoga e faasoa atu ai faamatalaga e uiga i le vasega.

Agavaa e Faiaoga ai i Lenei Vasega

O lenei vasega e mafai ona faiaoga ai soo se tagata matua ua malamalama lelei e uiga i tomai faale-sootaga ma luitau e feagai ma ulugalii i faaipoipoga. O nisi mea taua e faiaoga lelei ai i lenei vasega, e aofia ai le amanaiaina o lagona o isi, o se silafia i le talalelei, ma se malamalamaaga i le tulaga paia o le faaipoipoga, ma se agaga faafetai mo lena mea.

O le agavaa sili ona taua mo le faiaoga ai i lenei vasega o la oe lava tapenaga faale-tagata lava ia, ina ia maua le taitaiga a le Agaga Paia. Ua fetalai mai le Alii, “Ma o le a tuu atu ia te outou le Agaga e ala i le tatalo o le faatuatua; ma afai tou te le maua le Agaga aua tou te aoao atu” (MF&F 42:14). O le toatele o tagata ua latou aoaoina mai mea na tutupu, o le tuuta’ia i le faagasologa o le lesona ona o manatu e foliga mai e le fesootai ma ua le maua ai le savali ona ua le fia faalogo le vasega. Faatusatusa la ituaiga tulaga na ma taimi na auai ai le Agaga, ina ua o’o i le mafaufau faamatalaga ma uunaiga, ina ua solo lelei le tuuina atu o upu ma ua tuuina atu e le Agaga le upu moni i loto ma mafaufau o isi.

Aoao Atu Faamanuiaina

O le a sili ona faamanuiaina oe i le avea ai o se faiaoga, pe a e sailia musumusuga ma pe a e aumaia lou lava silafia, manatu, mea na tutupu i lou olaga, ma ou uiga lelei i le vasega. Pe a e aoao atu i le Agaga, o le a e fesoasoani i sui auai e manatunatu i mea na tutupu i o latou lava olaga ma aoao mea e faaleleia ai a latou faaipoipoga. Ia mafaufau pe faapefea ona e faaaogaina mea na tutupu i lou olaga e aoao ma faamalolosia ai mataupu faavae ma tomai. Ia tuu atu lou loto i lau aoaoga, ona e maua lea o le olioli sili i a outou fegalegaleaiga ma tagata o le vasega.

O le oa o mea na tutupu mai soifuaga o sui auai taitasi o se aseta sili lea mo oe a o e aoaoina atu le vasega. Ia mataulia le tiutetauave o tagata taitoatasi mo lana lava faaipoipoga, ma ia faasoa atu lou silafia ma tomai e tusa ma le taitaiga a le Agaga. Ia e malamalama o lou tiutetauave o le tatalaina o faitotoa mo avanoa fou, ae le o le faalau atu o mea i sui auai o le vasega. O vasega taitasi o se taumafaiga tuu-faatasi, e fefaasoaa’i ai oe ma tagata o le vasega i manatu ma malamalamaaga, ma ofoina atu le lagolagosua.

A o e faasoaina atu lou silafia, aafiaga, ma manatu, ia faamalosiau atu i tagata auai o le vasega e manatunatu i mea na tutupu i o latou lava olaga, atoa ai ma malosiaga. Fesoasoani ia i latou ia iloa mataupu faavae, na e mafai ona fesoasoani e siitia ai i latou, ma faamalosiau atu a o latou atiina ae tomai, ina ia faaaoga ai na mataupu faavae. A o e faatinoina na lava tomai, o le a faatupula’ia lou tomai o se faiaoga.

Faaaoga le tusi lesona e pei ona faamoemoeina ai, ma sailia le taitaiga mai le Agaga i le fuafuaina po o le a le mea e aoao atu, ma pe faapefea ona aoao atu. Pe a mae’a ona manatunatu ma le agaga tatalo i mataupu faavae o i lenei tusi lesona, faatulaga lau lesona e ala i lou mafaufau i mea o lo o moomia e tagata taitoatasi o le vasega mai le mataupu o le a e aoaoina. Taumafai e fesili ifo ia te oe lava, “O le a se mea e manaomia ona aoaoina e tagata o le vasega i lenei aso?” Atonu o le a e mauaina mai se manatu taua se tasi, pe lua foi. Ona mafaufau lea, po o a ni manatu lagolago o le a fesoasoani i tagata o le vasega e malamalama ai i manatu autu. O le taimi lava e maua ai se manatu autu ma manatu lagolago, ia fuafua loa le auala sili e tuu atu ai. O fautuaga faafaiaoga nei e mafai ona fesoasoani ia te oe a o fuafuaina lau lesona.

Faaaogaina o Tala e Faapupula ai se Mataupu Faavae

Ina ia amataina se vasega, atonu e te manao e tusia le manatu autu, po o le mataupu faavae i luga o se laupapa, ona faamatala lea o se tala e faapupula ai. E aoga tele ia tala, aua e mafai ona latou pa’i atu i loto ma suia olaga; e mafai ona latou faapupula atu mataupu faavae lē tinoa ma faigofie ona malamalama ai. O le olaga e tumu i tala, ma e faigofie atu i tagata ona manatua tala ma mataupu faavae, ia latou te aoao atu.

Na sili ona mamana le aoao atu a le Faaola, e ala i le faaaogaina o tala. Taumafai e faapupuu tala e te faamatalaina, ma ia faafaigofie i le mea e gata ai le mafai. Ia faaeteete ia aua ne’i tele naua tala patino ia te oe e faamatalaina. E ono osofaia ai tulaga patino i lou toalua, pe faatiga ai foi isi.

O le a faigata i tagata o le vasega ona fesootai atu i au tala patino, pe afai ua foliga mai o lau faaipoipoga ua atoatoa naua. O le tele o ituaiga tala faapena, atonu e faavaivaia ai tagata o le vasega i a latou lava taumafaiga ina ia suia. Pe a foliga mai ua talafeagai ai, ia faasoa atu ni tala e uiga i luitau na feagai ma oe, ma faafitauli na oulua feagai, faapea foi tala e uiga i mea na faamanuiaina ai oe. Pe a e faasoa atu nei tala, faamatala mea na e aoaoina mai na mea na tutupu. Ia taula’i atu i itu lelei, ma faamatala mea na e faia e faaleleia ai. Afai o au tala o le a aliali atu ai le tele o faafitauli, atonu o le a aveesea ai le moni, ma e ono manatu sui auai, e le aoga ia mataupu faavae o lo o e aoaoina atu.

Faatino i Taga

Pe a mae’a ona e aoaoina tagata o le vasega i se auala e faaaoga ai se mataupu faavae i le faaipoipoga, atonu e te faamautuina le mataupu faavae i le faatinoina i taga. O le faatinoga sili i taga, e masani ona tupu pe a amata i lou faapea atu, “O le a le mea e masani lava ona tupu i tulaga faapea?” Ia tofi se tasi e faatinoina. Ona talanoa lea o le vasega i mea sese e masani ona faia e ulugalii i tulaga faapea. A maea se talanoaga, e mafai ona e faapea atu: “Se i tatou toe faatinoina la le tulaga lea i taga, ae o le taimi lenei, ia faaaoga le mataupu faavae lea na tatou talanoaina. Ona tatou vaavaai lea, po o le a le auala e lelei, a o a foi nisi mea e manaomia ona faaleleia”.

O lenei auala o le aoao atu, e masani o se auala sili ona lelei e fesoasoani ai i tagata taitoatasi ma ulugalii e suia a latou amio. O se otootoga puupuu lenei:

Aoao atu se mataupu faavae ma le auala e mafai ona faaaoga ai i se tulaga faale-faaipoipoga.
Valaaulia se tasi e faatino se auala e masani ona tali atu ai i lea tulaga.
Ia talanoaina le faatinoga i taga ma pe mafai faapefea e ulugalii ona faaaoga le mataupu faavae i lea tulaga.
Valaaulia se tasi e faatino i taga le auala e faaaoga ai le mataupu faavae i lea tulaga.
Talanoa i le faatinoga i taga ma le auala e sili atu ona lelei e faaaoga ai le mataupu faavae.
Faaauau le faagasologa o faatinoga i taga ma le talanoaga, seia masani sui auai i auala sili ona lelei e faaaoga ai le mataupu faavae.³

E le tatau ona faamoemoe atu i sui auai ina ia atoatoa le faatinoga. Atonu o le a latou mauaina, o le a lelei lo latou faatinoina o nisi mea, a o nisi vaega e manaomia ai le faaleleia atili. Atonu o le a latou iloaina foi, e le faapea e tatau lava ona atoatoa i latou i le taimi lava lea; e mafai ona siitia o latou tulaga i le faagasologa o taimi. A o e matauina mea ua lelei ona latou faatinoina, faailoa atu o latou malosiaga. O nisi tagata o le vasega atonu e mananao e faatino i taga le tulaga e tasi a o faagasolo le vasega, pe, atonu foi latou te mananao e filifili se tasi o tulaga mai o latou lava soifuaga. E mafai e sui auai ona faaauau ona faataitaia le faaaogaina o se mataupu faavae, seia latou malamalama i tomai latou te manaomia ona aoaoina.

Faaaoga le faautauta, pe a faaauai sui auai i faatinoga i taga. E sili atu le soa o le tane ma le ava, pe a faatino tala i taga. I tulaga o sootaga ua afaina, o faatinoga e faafefiloi atonu e valaaulia ai noataga e le faale-ulugalii ia e ono afaina ai le fesootaiga i le va o le tane ma se ava.

Afai e foliga mai e le lelei lagona o tagata o le vasega i le faatinoina i taga, filifili nisi gaoioiga e faamautuina ai mataupu faavae o lo o e aoao atu. Mo se faataitaiga, e mafai ona e faaauai tagata o le vasega i se talanoaga e uiga i auala e faaaoga ai le mataupu faavae i nisi tulaga, pei o tulaga faale-tagata lava ia, po o tulaga e aofia ai ulugalii latou te iloa (e aunoa ma le faaaluina o le taimi e faitatala ai, po o le faalauiloaina foi o nisi o faamatalaga ua mataulia).

Valaauliaina ma le Taialaina o Talanoaga a le Vasega

O le talanoaga o se meafaigaluega faafaiaoga taua tele. Pe a e valaauliaina talanoaga, ua e faaali atu e te faatauaina tele manatu ma mea na tutupu i isi, ma e te le lagonaina faapea o oe ua iloa tali i faafitauli uma. Ua e faaali atu foi, o luitau e mafai ona foia i ni auala se tele. Faalagolago i le Agaga ina ia fesoasoani ia te oe a o e aoao atu, ma ia e iloa o le Agaga o le a Ia musuia foi isi. Fesili atu i tagata o le vasega mo a latou fautuaga. O le a aoga ia i latou le faalogologo atu i manatu eseese.

O nisi tagata o le vasega o le a vave ona lagonaina le fiafia e auai ai i talanoaga. O isi, e fai si matamumuli ma e le mananao e ofoina mai o latou manatu ma mafaufauga. O le a sili atu ona ‘anoa le vasega mo tagata taitoatasi, pe a maua e i latou se avanoa e auai ai i le faatinoga. O le a aoga foi o latou manatu i isi tagata o le vasega. Ia saunia se siosiomaga saogalemu mo le vasega, e ala i le faaalia o le faaaloalo mo tagata uma o le vasega. Ia faailoa atu e te faatauaina manatu ma mea na tutupu i tagata taitoatasi, ma ia aua ne’i faatagaina se tasi e ula i manatu o isi.

O taiala nei o le a fesoasoani ia te oe e valaaulia ma taialaina le auai o le vasega i le faatinoga, ma o le a fesoasoani e fausia ai se siosiomaga lelei mo tagata o le vasega.

Ia faatutuina tulafono faavae manino e fesoasoani ai i tagata taitoatasi e lagonaina le saogalemu e faasoa mai. Ia aofia ai mea nei:
- Ia Le Faalauaiteleina. O faamatalaga faale-tagata lava ia e fetufaai mai i le taimi o le vasega, e gata ai lava i le vasega.
- Pupuu. O faamatalaga mai sui auai e ao ina faapupuu.
- Paleni E mafai e sui auai ona talanoa mai i soo se taimi e mananao ai, ae ia mautinoa o lo o maua foi e isi se avanoa laugatasia e faasoa mai ai.
- Onosai ma agalelei. O le a manaomia e tagata taitoatasi se taimi e aoao ma fefaasoaai ai tomai fou. E ao i sui auai ona onosai ma agalelei le tasi i le isi, faapea ia i latou lava.
- Faamalosiauga. E ao i sui auai ona faamalosiau le tasi i le isi, a o latou faaaogaina faamatalaga mai le vasega i o latou olaga.
- Faamagaloga E fai e tagata taitasi mea sese, e tusa lava pe ua maea ona aoaoina ni auala fou e faatinoina ai ni mea. E manaomia e tagata taitoatasi o le vasega ona malamalama i le taua o lona faamagaloina o ia lava ma isi.^*
Ia fai fesili e valaaulia ai manatu, ae le o fesili e na o le tasi le tali sao. Mo se faataitaiga, e mafai ona e fesili atu, “O le a sou manatu, o a nisi o uiga sili ona taua o se tane po o se ava lelei?” nai lo le “O le a le uiga sili ona taua … ?” O le a sili atu ona mananao tagata e faasoa mai o latou manatu, pe a latou iloa e te le o saili atu mo na o le tasi le tali sao.
Ia faamamaluina tali a tagata taitasi. Ia tusi faapuupuu i luga o le laupapa tali taitasi, ma faailoa atu lou amanaia o tali na tuuina mai. Ia tuuina atu faamatalaga faamalosiau anoa e pei o le, “O ni manatu lelei tele ia” Faafetai atu ia i latou na tuuina mai manatu, e tusa lava pe atonu o i ai se manatu e ono fesiligia le moni. A o taumafai ai ina ia faaalia le faaaloalogia, ia mautinoa e le o taliaina ni mataupu sese o ni mataupu moni.
Ia poto e taulai atu fesili i isi, pe a foliga mai ua fepalepaleai e se toatasi le talanoaga. O lenei toe faatonutonuina e masani lava e le faigofie, aua o nisi sui auai e mananao e talanoa mo se taimi umi e uiga i a latou faafitauli faale-faaipoipoga. E ui o o latou faamoemoega atonu e foliga mai e lelei, e le tatau lava ona e faatagaina latou e faaaluina atoa le taimi manaomia mo aoaoga, po o le aveesea foi o le avanoa mo isi e faasoa mai ai o latou aafiaga. Ia faalogo ma le toto’a, ma aloaia lagona, peitai, ia taulai atu i isi tagata o le vasega. Atonu e mafai ona e fai atu faapenei: “E foliga mai o lena mea ua avea ma luitau moni lava mo oe. Ou te fia manao lava e iloa pe faapefea ona fesoasoani ia te oe mataupu faavae ma tomai o le a e aoaoina mai lenei vasega. O ai se isi e i ai sana luitau, po o se tulaga e fia faasoa mai?” po o le “Ua e tuuina mai nisi o fesili faigata atonu o le a sili atu ona talanoaina i vasega o lo o mulimuli mai.”
Atonu o nisi sui auai o le a latou fautuaina mai ni amioga le talafeagai. Nai lo le teenaina o le ala ma faamaasiasia ai, fesoasoani i le tagata e su’e ni manatu fou. E mafai ona e faapea atu: “E foliga mai e faigata. O le a ou faasoa atu ni manatu, i se taimi mulimuli ane, e uiga i lena mataupu atonu o le a fesoasoani tonu lava ia te oe. O le a i ai foi nisi manatu mai le vasega.” Aua ne’i finau ma tagata o le vasega e uiga i le eseesega o auala.
Pe a lagonaina e sui auai le saogalemu, faatauaina, ma faaaloalogia, o le a mafai ona e fesoasoani ia i latou ina ia sili atu ona amanaia lagona o isi. A o faamatala mai o latou aafiaga, ia fai atu fesili e pei o nei “A faapea o oe o lou toalua ua i ai i lena tulaga, faamata o le a sou lagona?” “Faamata o le a se tulaga patino o le a faigata ai lava mo lou toalua?” po o le “A faapea o oe lea na tupu ai lena mea, faamata o le a sou lagona?” Ia fai atu nei fesili i se auala e le tuuaia ai. A o fetufaai mai e tagata lagona o o latou taitoalua i o latou lava aafiaga, atonu o le a amata ona sili atu ai lo latou malamalama i o latou taitoalua.
Fai fesili e fesoasoani ai ia te oe e iloilo manaoga o tagata auai o le vasega. Taitai le talanoaga i auala e talafeagai ma o latou manaoga. Fetuunai le polokalama ma gaoioiga e aoao ai, e tusa ma mea latou te gafatia.
Ia tuu atu i sui auai e faailoa mai tulaga na latou le faaalia ai amioga lelei. Tuu atu latou te talanoa ma tusia se fuafuaga mo se isi auala e tali atu ai i na tulaga.
Ia faaaoga tausuaga talafeagai, ma ia mataalia ma tiotio.
Ia vaevae le taimi o le lesona i ni ituaiga eseese o gaoioiga–valaaulia talanoaga a le vasega, faamatala se tala, pe fai se gaoioiga a le vasega e faaolaola ai pea.
A maea vasega taitasi, ia faafetai atu ia i latou na saofaga i talanoaga.

* O tusitusiga lanu o lo o faailoa atu ai faamatalaga o lo o maua i le Faamalolosia o Faaipoipoga:Taiala o Punaoa mo Ulugalii.

Mulimulitaia o se Faatulagaga

O talanoaga e mafai i nisi taimi ona manaia ma malie, ma e ono faigata ai ia te oe ona tata’i le vasega i le isi gaoioiga e sosoo ai. O le taimi lava e malamalama ai tagata o le vasega i se mataupu faavae ma iloa ona faaaoga, o nisi talanoaga faaopoopo atonu o le a maimau ai le taimi e manaomia mo isi gaoioiga. Toe tata’i le talanoaga i se isi mea, po o le aga’i i le isi gaoioiga pe a ua oo i le taimi e fai ai.

O se faagasologa tusitusia i luga o le laupapa, e mafai i nisi taimi ona fesoasoani ia te oe e faatumauina se lesona solo lelei. O le faagasologa e mafai ona auiliili, pe lautele foi e tusa ma lona aoga. Atonu e mafai ona e tusia se faagasologa e pei ona tuuina atu i lalo:

7:00 to 7:15–Toe faamanatu manatu faavae ma gaoioiga ua tuanai
7:15 to 7:30–Manaomia o tomai e foia ai feeseeseaiga
7:30 to 7:45–Laasaga mo le foiaina o feeseeseaiga
7:45 to 8:30–Faatinoina o tomai e foia ai feeseeseaiga⁴

Afai ua e saunia mo le agai atu i le isi mataupu aoaoina, ae o lo o mananao lava le vasega e talanoaina le mataupu ua te’a, atonu e mafai ona e faasino i le faagasologa ma faapea atu: “E manaia tele o outou manatu ma malamalamaaga. Atonu e mafai ona tatou toe talanoaina i se isi taimi o mulimuli mai. Mo le taimi nei, tatou se’e atu i le isi autu.” Peitai, afai e te lagona o le a sili atu ona faamanuiaina ai tagata o le vasega mai le faaauauina o le talanoaga i se autu, e mafai ona e suia le faasologa.

Faaaogaina o Ala o Fesootaiga

Pe a tatau ai, ia filifili ata pupuu mai CD, DVD, po o kaseti vitio, e fesoasoani ia te oe e aoao atu ai manatu faavae ma aumai ai mafaufau o tagata o le vasega. E fautuaina ina ia faaaoga ata ua faatagaina mai e le Ekalesia. O ata pupuu e sili atu nai lo ata uumi e faatumauina ai le fiafia o sui auai. Ia mautinoa e te le solia le tulafono o le kopiina o ata. A i ai ni fesili i le faaaogaga, ia valaau i le Church Intellectual Property Office i le 1-801-240-3959.

Faataitaiga o Mea E Te Aoao Atu

O le sini a lenei vasega, o le aoaoina atu lea o tomai aoga, ma uunaia tagata taitoatasi e faaaoga na tomai e faamalolosia ai a latou faaipoipoga. O le taimi o le vasega, o se avanoa lelei lea mo oe e faataitai ai, e faapea foi i le aoao atu, mataupu faavae lelei, uiga faaalia, ma tomai. Aoao tagata taitoatasi ia agalelei ma agamalu e ala i le faia lelei o i latou. Ia amanaia lagona o isi, mataalofa, ma faaeteete, aemaise pe a manaomia e sui auai le toe faatonutonuina. Ia faaaoga tomai mo fesootaiga lelei. O nisi tagata e seasea ona fesootai ma se isi o le a faalogo atu ma le toto’a ia i latou. O le auala tou te fesootai ai atonu o le a maoae, e pei lava o le faamatalaga o lo o e tuuina atu. O lau faataitaiga lelei, e mafai ona fesoasoani ia i latou e suia le auala e fesootai ai ma le tasi, i totonu o le faaipoipoga.

O nisi tagata o le vasega, atonu o nisi taimi, e ātu ai pe feita foi ma faalilii. O lau auala e tali atu ai atonu e suia atoa ai, e ala i le tele o mea e mauaina mai e tagata mai le vasega. A o e tali atu ma le agalelei, o le a e faailoa atu tomai lelei o le faalogo ma le foiaina o faafitauli. Aua nei faatagaina se tasi o lo o ita e pulea, pe faumālo i fetufaaiga a le vasega.

Amataina ma le Faamae’aina o le Vasega

O fautuaga o loo i lalo, o le a fesoasoani ia te oe e amata ma faauma ai le vasega i se tulaga lelei.

O Le Amataina

Ina ia fesoasoani ia sologa lelei le ulua’i vasega, atonu e te manao e faia mea nei:

Afai e le masani tagata o le vasega i le fale e fai ai le vasega, ia faatutu ni faailoilo e faailoa ai le auala i le potu-aoga ma falelēta’ua.
Aumai kopi o le Faamalolosia o Faaipoipoga:Taiala o Punaoa mo Ulugalii mo sui auai. Atonu foi e mafai ona i ai pepa o igoa ma maka, po o peni ina ia mafai ai e tagata o le vasega ona saunia ma faaaoga o latou pepa o igoa, seia o latou iloa le igoa o le tasi ma le isi.
Afai o le vasega o lo o lagolagoina e se lala o le Tautua a le AAG mo Aiga, tuu atu i sui auai le numera o le telefoni a le ofisa, ina ia mafai ona valaau atu i ai pe a i ai ni a latou fesili.

Ia mautinoa ua tuuina atu le 15 i le 30 minute, i le amataga o vasega taitasi, e toe iloilo ai manatu faavae ma gaoioiga na tuuina atu i le vasega ua faatoa maea atu.

Lesona tulitatao ma le Iloiloga

I le lesona faaiu, atonu e te manao e faia mea nei:

Tufatufa atu kopi o le Pepa o Iloiloga (taga’i itulau 79 i le faaopoopoga), ma tuuina atu i sui auai e faatumuina.
Ia faailoa taumafaiga ma le alualu i luma o sui auai. (Itulau 80 i le faaopoopoga o lo o i ai se tusi faamaonia atonu e te mana’o e faaaoga.)