Vasega Lua

Fesoota’i atu i le Alofa

Faamoemoega o le Lesona

I le taimi o le lesona lenei, fesoasoani i sui auai:

Ia malamalama a o latou avea atili e faapei o Keriso ma latou mauaina se suiga o le loto, o le a faateleina lo latou mana’o ma le agavaa ina ia fesootai lelei ma talafeagai.
Aoao tomai tau i fesootaiga na o le a faaleleia atili ai lo latou agavaa ia malamalama ma fefaasoaai lagona tiga.
Ia malamalama o amioga Faa-Keriso ma fesootaiga lelei e faamalolosia ai faaipoipoga.

Alofa ma Fesootaiga Lelei

Ua aoao mai perofeta ma aposetolo o Aso e Gata Ai, e ao i matua ona alofa le tasi i le isi, faapea a latou fanau: “O le tane ma le ava ua i ai se tiutetauave paia e alofa ma tausi e le tasi le isi.”¹

O fesootaiga i le faaipoipoga e aofia ai manatu taitasi, lagona, amioga, po o le mana’o e fefaasoa’i i upu pe le leoa fo’i, i le va o le tane ma le ava. O fesootaiga lelei o se faaaliga o le alofa. O fesootaiga lelei e faamalosia ai le malamalama i itu e lua ma le faaaloalo, faaitiitia feteenaiga, ma e faateleina le alofa, e na te tatalaina faitoto’a i le tulaga aupito maualuga o le tulaga mafana faale-tagata soifua. E mafai e ulugalii taitasi ona a’oa’o ia atamamai e fesootai.

Na aoao mai e Peresitene Spencer W. Kimball le taua o fesootaiga lelei:

“E i ai le mana faamaneta i upu e lelei ona faaaoga. O nisi tagata latou te faaaogaina ma le tatau, a o isi e le afeifeia.

“O upu o auala ia o fesootaiga, ma o faailoilo sese e aumaia ai manatunatuga lē sa’o. O taunuuga o le fenumia’i ma le le malamalama. O upu e faaosofia ai lo tatou olaga atoa ma o mea faigaluega o la tatou mataupu, o le faaaliga o o tatou lagona alofa, ma o faamaumauga o lo tatou alualu i luma. O upu e mafua ai ona tuia loto ma aumaia loimata i taimi o le tigaalofa. O upu e mafai ona moni, pe taufaasese fo’i. O le toatele o tatou e oge i upu, ma faapea ona le lelei ai le tautala.”²

O Le Ogaoga o Faafitauli Tau i Fesootaiga

I se suesuega o ulugalii faaipoipo i totonu o le atunuu, na iloa ai e le fomai faapitoa o le mafaufau o David H. Olson o le Iunivesite o Minesota ma lana paaga faale-galuega o Amy K. Olson, o fesootaiga le lelei, o se tasi o maa faalavea aao e sefulu i le tulaga faamalieina faale-faaipoipoga. O le valusefululua pasene o ulugalii na moomoo ia tele ni taimi e faasoa mai ai lagona o a latou paaga. O isi tali e faatatau i fesootaiga, e ui e le lavea i le sefulu pito i luga, ae na maualuga lona faatulagaina:75 pasene sa faigata ona fesili atu i a latou paaga mo mea e manana’o ai, 72 pasene na lagonaina le le malamalama, 71 pasene na faapea mai latou te le talanoaina ma a latou paaga mataupu po o faafitauli, ma le 67 pasene na fai mai, e fai e a latou paaga faamatalaga e tuu ai i latou i lalo.³ Na aliali mai fo’i i le suesuega, o le “fesootaiga faamalieina”, o le tasi lea o faailoga o le faaipoipoga fiafia.⁴

Faamaluluina o le Loto

E sili le alualu i luma o ulugalii, aga’i atu i le faaleleia o o latou tomai faale-fesootaiga, pe a maua e i latou le loto momomo ma le naunautaiga e faamagalo atu, ma talosagaina le faamagaloina. E mafai e tagata taitoatasi ona faamaluluina o latou loto, e tusa po o le a le mea e filifili o latou taitoalua e fai.

Na matauina e Victor Cline, o se foma’i faapitoa o le mafaufau, ma o se tagata o le Ekalesia e faapea: “Na ou mauaina i le tolu sefulu tausaga o le faia o galuega faufautua mo faaipoipoga, o le aoaoina o auala fou tau i fesootaiga, alu i aoaoga e uiga i tomai faale-sootaga, po o le faitauina o tusi sili ona lelei uma e uiga i le mataupu, o le a le fesoasoani moni lava e togafitia ai manu’a faale-faaipoipoga, se i vagana ua atiina ae e tagata taitoatasi o loo aafia se agaga salamo, po o le lagonaina o le faamaluluina o le loto. O lenei faamaluluina o le loto e masani lava ona manaomia ona tupu i le ulugalii uma, e tusa lava pe faapea o le tasi le mafuaaga autu o faafitauli. E ui e le mafai ona e faamalosia lou toalua ia suia, ae o oe e mafai ona sui. E mafai ona e filifili e alofa ma faamagalo, e tusa po o le a le mea na tupu. O le taunuuga, e masani lava o le a i ai se suiga i uiga ma le amio a lou toalua.”⁵

Ua fautua mai tusitusiga paia, o le auala e fesootai ai tagata e i ai lona sootaga ma ituaiga o tagata e i ai i latou. Na aoao mai Iesu, “A o mea e sau mai le gutu, ua alu a’e ia mai le loto” (Mataio 15:18). Na tautino mai e Iakopo i lana tusi, “a le sese se tasi i le upu, o le tagata lea ua sao, na te mafaia fo’i ona taofi i le tino uma”(Iakopo 3:2). O le faaleleia o fesootaiga, atonu e manaomia ai suiga maumaututu i uiga faavae, i le auala e manatunatu ai se tasi, lagona, ma amio a’i. I le avea ai ma so’o o Keriso, tatou te saili ia avea faapei o Ia, e pei ona sa Ia poloai mai ai, ina o Ia aoaoina le au soo Sa Nifae: “O a ituaiga o tagata e tatau ona outou i ai? E moni, ou te fai atu ia te outou, e pei lava o a’u nei.” (3 Nifae 27:27).

Faaleleia Atili o Fesootaiga

O fautuaga nei o le a fesoasoani i ulugalii e faaleleia atili ai fesootaiga i a latou faaipoipoga.

Aveese Auala Faataumaoi e Talanoa ai le Tasi i le Isi

I le silia ai ma le 20 tausaga o le suesueina o fesootaiga i le va o ulugalii, na mataulia ai e le fomai faapitoa o le mafaufau o John Gottman mamanu e fa o fesootaiga, lea e masani o faataumaoia ai faaipoipoga:

Faitio: “O le osofaia o uiga ma amioga a se tasi … e masani lava ona o faatasi ma le tuuaifuaina.”
Inoino: O le faalumaina, po o le tuuina o le toalua i se tulaga maualalo, e faaalia e se tasi i upu po o taga, e faapea o le toalua e “valea, inosia, e le mafaia se mea, pe o se vale.”
Sisi’o: O le tali sisi’o atu i ni faagaulemalie, faitioga, po o le manatu faatauvaa e ala i le faia o faanoi, faafitia, finauina, limala’u, po o le tali atu i tuuaiga, nai lo le taumafai e foia le faafitauli.
Lotomaa’a: O le tula’i ese mai faaletino, pe faale-mafaufau, mai i le sootaga faale-ulugalii pe a tutupu feeseeseaiga, e mafai ona avea lena mea e faapei o se pama’a.⁶

O nisi tane ma ava latou te faia tala ma mea, e aunoa ma le mafaufau i ai, ma faalavelaveina ai le agaga fefaasoaa’i ma le faalogo. O mausa leaga e au ina totoina mausali i le tele o tausaga o le faifaisoo ma le faamalosiauga. Mai lea taimi i lea taimi, o faafitauli e o’o ina faateteleina, e aafia ai taitoalua, o e latou te taofiaina ma le loto i ai fesootaiga ona o le ita, mafaufauga le lelei, o le faalii, loto ita, po o le lagona faaesea. O nei ulugalii atonu latou te manaomia fesoasoaniga faale-lotu ma faa-fomai e foia ai faafitauli. Afai e i ai i ulugalii ni maa faalavea aao faale-fesootaiga i a latou faaipoipoga, e tatau ona iloilo le auala e talanoa ai le tasi i le isi, ma le mafuaaga e talanoa ai faapea, ma foiaina soo se faafitauli lava.

I le faaopopo atu i le tineia o faiga masani faatautala i fesootaiga, e ao i ulugalii ona faateleina fesootaiga lelei. “[O le] faatusatusaga faataulaitu e faapea5 i le 1,” na ta’ua ai e Gottman. Pe a faalima taimi e sili atu ai ona tutupu lagona ma fegalegaleaiga lelei nai lo fegalegaleaiga ma lagona le lelei, “o le a ono faamausaliina le faaipoipoga.”⁷

I lana suesuega, na iloa ai e Gottman o ulugalii e auau faatasi ma fiafia, na sili atu ona fai lelei e le tasi le isi. O nei tagata taitoatasi e fegalegalea’i lelei e ala i le:

Faaali le fiafia i le mea o lo o fia talanoa mai ai le toalua.
Faaalia o le alofa e ala i faatinoga o le agamalu, u’u lima, ma le faailoa atu o le alofa.
Faaaliga o lo latou popole e ala i nai faatinoga laiti o le mafaufau loloto, nai meaalofa mai lea taimi i lea taimi, ma talanoaga i luga o telefoni.
Faaaliga o le loto faafetai e ala i le faaleo o le faafetai, tuuina atu le faamalo, ma ta’u atu le agaga mitamita i lona toalua.
Faaaliga o le loto popole pe a pagatia le toalua.
O le i ai o le malamalama i manatu ma lagona o le isi, faaalia lo latou malamalama ma lagonaina lagona o le toalua.
O le taliaina o le isi, faailoa atu i o latou taitoalua latou te taliaina ma faaaloalogia le mea na ia fai mai ai, e tusa lava pe latou te faatuiese ai.
O le faia o nai tausuaga ma mea malie faatasi, e aunoa ma le faatiga i le isi.
Faaalia o le olioli pe a faagaeetia, po ua tele le fiafia.⁸

E ui lava o le faamoemoega autu o le tineia atoa o uiga le lelei, ae e ao ona taumafai ulugalii i le taimi nei e faateleina a latou fegalegaleaiga lelei, ma faaitiitia fegalegaleaiga le lelei.

Ia iloa ma Talia Eseesega

O nisi tagata e amio e pei ua latou talitonu o o latou taitoalua e tatau ona mafaufau ma gaoioi e pei o i latou. A o iloa, talia, ma talisapaia e ulugalii o latou eseesega, o le a sili atu ona malamalama ma talia e le tasi manaoga o le isi, ma auala e faatino ai a latou galuega.

E tele tusi ma tala tusitusia tautaua ma lelei ua tusia e uiga i eseesega i le va o alii ma tamaitai, aemaise lava i faiga ma auala o fesootaiga. O le tulaga moni, atonu e i ai lava auala e tele e eseese ai ni tagata se toalua. O nisi tusitala ma faiaoga ua finau mai o tamaitai e tuuina atu le faataua i le felagolagoma’i, fesootai atu i isi, ma le galulue faatasi, ma e latou te foiaina faafitauli e ala i le auau faatasi, faalogo, faia o fesili, faailoaina o lagona, ma le faasoaina mai o o latou lava faafitauli. Ua ta’u mai foi e nei lava tagata e faapea, o alii e matele i le faatauaina o le tutoatasi, saolotoga, tulaga, ma le pule, ma e latou te foiaina faafitauli e ala i le faatinoina, tuuina atu fautuaga, faamalosiau i isi, ma le sailia o tali o faafitauli.

E ui o nei tusi ma tala tusia e malie ma tele ina fiafia i ai tagata, o eseesega o lo o faamatalaina e eseese lava mai lea tagata i lea tagata, ma mai lea aganuu i lea aganuu. O faiga ua aga’i i ai atunuu, tulaga na soifua a’e ai i aiga, ma ituaiga galuega e sailia, ua aafia ai le auala e mafaufau ai tagata, ma auala e talanoa ma fesootai ai i isi. O tane ma ava e tatau ona malamalama o o latou taitoalua o tagata e ese auala e fesoota’i ai. O nei eseesega e le tatau ona avea ma se faalavefau; o se eseesega i fesootaiga, po o le ese o le auala e tali atu ai i se tulaga patino, e mafai ona avea ma se malosiaga i se sootaga faale-faaipoipoga.

Gaoioiga e Aoao Ai: Malamalama i Ituaiga Eseese o Talanoaga

Ina ia fesoasoani i ulugalii e faamalosia se malamalamaaga sili atu o ituaiga auala eseese e fesootai ai, ia fai atu ia i latou e galulue i se tulaga “e na o lagona”, talanoaga e fausia ai le va lelei ma isi mo le lua i le tolu minute (i le talanoaina o faafitauli e ala i le finagalo autasi, faalogo, faia o fesili, faailoaina o lagona, ma le fefaasoaai o o latou lava faafitauli). A mae’a, fesili atu ia i latou i se auala e taula’i atu i tali o faafitauli mo le lua i le tolu minute (i le tuuina atu o fautuaga, toe faamalosiauina, sailia o tali, faatinoina). E mafai ona avea le autu o se mea moni na tupu, pe o se mataupu saogalemu e mafaufauina, e le o se mataupu e ono faatupu ai se feteenaiga i le va o ulugalii.

Talanoa ma tagata o le vasega pe na faigata ia i latou ona faaaogaina se tasi o auala o fesootaiga. Fai atu ia i latou e tusia a latou faamatalaga e uiga i a latou lava auala faapea foi auala a o latou taitoalua. A mae’a, valaaulia i latou e faasoa ma talanoa i a latou auala ma mea na matauina, ina ia vaai pe latou te malilie faatasi i ai.

Iloilo Mamanu o Mafaufauga Faataumaoi

E faigata i tagata taitoatasi ona fesootai lelei, pe afai e i ai ia i latou manatu le lelei e uiga i a latou tane, po o ava. O manatu le lelei, e masani ona faaseseina ai–se tasi i le faateleina o ona lava malosiaga, a o taulai atu i vaivaiga o lona toalua. E mafai e sui auai ona amata faasa’oina soo se manatu taufaasese atonu o i ai ia i latou, e ala i le fesiligia o o latou manatu–sailiina o faamaoniga o na manatu e le moni, toe suia o se vaaiga e vaai ai i amioga faaletonu, ma mataulia atonu e i ai ni mafuaaga tatau mo le amioga a le toalua. E mafai foi ona tatalo ina ia fesoasoani mai le Alii ia i latou ia vaai atu i le toalua e pei ona silasila mai ai o Ia i lea tagata. O nisi taimi afai e talanoa atu ma le agalelei le tasi o le toalua i le isi, o le a taufai atiina ae e i laua ni manatu ma lagona lelei.

Na maua e Gottman o manatu faataumaoi e masani ona aafia ai lagona o le mama mai se mea na tupu, po o le ita i le le ta’u amiotonuina; o nei manatu e mafai ona o mai eseese, pe o mai faatasi foi.⁹ O i latou o e mama mai faiga faataumaoi, e masani ona fefefe i o latou taitoalua; latou te lagonaina le tuuai seseina, le lelei ona taulimaina i latou, po o le le taliaina ma le faafetai o i latou. O nisi e oo ina matua fefefe lava, o le mea lea e le manatu ai e puipuia i latou. Latou te lagona le faamaoniaina o lo latou tulaga pau, ma latou faaaogaina ai lea tulaga e avea o se mafuaaga e aloese ai mai lo latou tiutetauave mo le faasaoina o a latou faaipoipoga.¹⁰

O le tagata ita ona o le le tauamiotonuina e lagonaina le “tete’e ma le inoino” i o latou taitoalua mo le faatiga ia i latou. Latou te lagona o lo latou ita ua faamaonia, ma o nisi taimi e manana’o ai i le taui ma sui. O tagata e lagonaina le mafatia ma le ita, e masani ona le manana’o e faaaoga tomai mo fesootaiga lelei. Latou te le popole e uiga i le faalogo atu, po o le taumafai ia malamalama.¹¹

E ui e talafeagai mo tagata taitoatasi ona mafaufau i o latou lava manaoga i faaipoipoga, o nisi tane ma ava e manatu ifo lava mo na o i latou lava, ma e taulai atu o latou manatu i le faamalieina o i latou lava. Atonu latou te tuuaia isi, nai lo le talia o le tiutetauave mo faafitauli, po o lo latou pepelo, pe faafitia foi a latou gaoioiga. Atonu latou te manatu faatauvaa, pe tuu foi i lalo o latou taitoalua mo le le faamalieina o o latou faamoemoega manatu faapito.

O nisi taimi e lagona ai e tagata taitoatasi le le mafaia o se mea, ona o o latou lava manatu le lelei, po o o latou taitoalua foi, e uiga ia i latou, ma faapea ai ona tetee, sisi’o, po o le musu ma amata ona faamaaa. O fesootaiga tatau, atonu o le a matua faigata ona tupu.

Gaoioiga e Aoao Ai: Matauliaina o Mamanu o Manatu Faataumaoi

Fai atu i sui auai e mafaufau pe i ai ni o latou manatu le lelei, ma ni lagona ia e faaititia ai lo latou manao ma le agavaa, e galulue ai i le faaleleia o a latou faaipoipoga. Afai e i ai ia i latou nei ituaiga o manatu, fai atu i ai e faia se fuafuaga e foia ai, e ala i le faaaogaina o fautuaga ua tuuina atu i luga, e pei ona manaomia. O nisi tane ma ava, atonu e manaomia le talanoa faatasi i o latou lagona, ina ia mafai ai ona foia i latou. Afai latou te talitonu e mafai ona latou talanoa i o latou lagona, e aunoa ma le feteenai po o se tulaga tauaimisa, ia fautuaina e faatulaga se taimi ma se nofoaga i le faagasologa o le vaiaso mo lena faamoemoega. Nai lo lena, atonu e manaomia lo latou faatali seia mauaina tomai sili atu mo fesootaiga, ma le foiaina o faafitauli. Fautuaina ulugalii e saili fautuaga mo a latou faaipoipoga, pe afai o o latou manatu le lelei ua foliga mai ua tele naua, ma pe afai o nei manatu e fesootai i faafitauli tuga o o latou sootaga.

Faaaoga Tomai Lelei Tau i Fesootaiga

E mafai e tane ma ava ona faata’ita’i ma faamalolosia tomai na o le a fesoasoani ia i latou e fesootai lelei ai. A o latou suia mamanu tuai faataumaoi o fesootaiga i auala fou ma sili atu o fegalegaleaiga, ua latou fausia se siosiomaga sili atu, lena o le a mafai ona taitaiina atu ai i le suia o le loto, e pei ona faamatala atu muamua i lenei vasega. Peitai, o le atamai e fesootai, e aofia ai le faatinoina o mea e le mautinoa. Pe a tatalaina auala o fesootaiga e tane ma ava, ua amata ona latou lagonaina le sili atu ona saogalemu, i le fefaasoaa’i o lagona maaleale na fefefe e talanoa ai muamua. Atonu o le a aliali mai feeseeseaiga; e ono tulai mai foi ni feteenaiga. Peitai, o le tiga e tupu mai ai, e masani lava ona le tumau. O manu’a faale-sootaga o le a amata ona faaleleia, pe a mafai e ulugalii ona malamalama ma taliaina e le tasi lagona o le isi. O le a mafai ona foia faafitauli, pe a mafai e ulugalii ona talanoaina mataupu ogaoga e ala i le poto ma le magafagafa.

O tomai nei o le a fesoasoani i ulugalii e faaleleia atili ai fesootaiga.

Ia faailoa atu le fiafia ma le loto gaua’i atu pe a talanoa mai le toalua. E mafai e tagata taitoatasi ona faailoa atu le fiafia le leoa, e ala i le faatumauina o le vaai sa’o i mata e aunoa ma le sioa, ma faalogo lelei nai lo le foliga mai o loo i se mea mamao, pe faapopoleina.

Pe a faapopoleina le toalua, pe manao e talanoa mai, e tatau i le tane po o le ava ona tuu ese mea o loo fiafia i ai, ae faalogo. Afai o i ai nisi matafaioi e faigata ai ona faalogo atu, e ao i le ulugalii ona faatulaga e faaauau le talanoaga i se taimi vave e mafai ai. Pe a faalogo atu le tasi i le isi, e tatau i ulugalii ona nofouta i a la’ua lava gagana o le tino, ma e ao ona faailoa atu o loo faalogo atu, e ala i le luelue o le ulu, po o le faapea atu, “O lena la,” “Na la,” ma isi mea faapena. Na fautua mai Elder Russell M. Nelson o le Korama a le Toasefululua: “E taua le faaaoga o le taimi e talanoa ai, ina ia tatalaina pea laina o fesootaiga. Afai o le nonofo faaleulugalii o se mafutaga taua i le olaga, e manaomia le faaaoga i ai o le taimi sili ona lelei!”¹²

Fai fesili. E mafai e se tasi ona valaaulia lona toalua e talanoa, e ala i le faia o fesili e pei o le, “E foliga mai o loo i ai se mea ua faapopoleina ai oe. “E te fia talanoa e uiga i ai?”

O nisi tane ma ava, latou te taofia feteenaiga ma mumusu e faailoa mai mea o loo mafaufau i ai pe lagonaina, ona o le fefefe e faatupu se feeseeseaiga. Mo lena mafuaaga, atonu latou te taofia ai le faasoaina mai i isi, o mataupu maaleale. Peitai, atonu o le a le mafai ona suia lagona, sei vagana ua talanoaina. E mafai e tagata taitoatasi ona fesoasoani i o latou taitoalua e talanoaina nei mataupu maaleale, e ala i le fesili atu e uiga i o latou manatu ma lagona faatasi ai ma se manaoga moni ia malamalama i o latou manatu. O le taimi lava e malamalama faatasi ai e uiga i manatu o le tasi ma le isi, o le a mafai loa ona galulue faatasi mo ni auala e foia ai.

Faalogo atu ma le toto’a. O tagata e lelei le faalogo, e masani ona latou toe faaupuina mea latou te faalogoina. Pe a latou toe faaupuina se fuaitau, latou te faailoa atu le fiafia ma le naunautaiga e fia malamalama i le savali a le tagata o loo talanoa mai. Afai e le’i manino la latou faalogo, e ao i le tagata na saunoa ona toe faamanino le mea sa talanoa ai.

E mafai e tane ma ava ona faapea atu, “Se i o’u toe faaupuina le mea ou te manatu na e saunoa ai, ina ia mautinoa o sa’o la’u faalogo.” (Mo se faataitaiga: “Ua e mafatia, ona o lo’u le talanoa atu ia te oe, a o le’i faatauina le sofa. Ua e lagonaina le le amanaia o oe, ma lē faatauaina. E sa’o lena?” po o le “Ua e lagonaina ua ou solia se tasi o tulafono lē tusitusia, e tusa ai o le faia faatasi o faaiuga tetele, ina ua ou faatauina le sofa, ma ua e mafatia ai. E sa’o lena?”) E mafai e tagata taitoatasi ona toe faaupu lo latou malamalamaaga i le savali, seia faamalieina le tasi, ua malamalama le isi i le mea na talanoa mai ai. E le tatau i tagata o loo faalogo ona faasalavei atu o latou lava manatu, ina ia faailoa atu ai se mea o manao ai. E ao ona latou taliaina manatu ma lagona o le isi tagata, ae aua le faitioina, pe faamasinoina foi i latou.

Fefaasoaai faamoemoega. Pe a aga atu i se mataupu faigata, e mafai e tagata taitoatasi ona fefaasoaai muamua o latou faamoemoega–o le mea latou mananao i ai mo le sootaga, mo le toalua, ma mo i latou lava. Afai e lelei o latou faamoemoega, o le a malamalama o latou taitoalua o loo latou mananao e foia le faafitauli, ae le o le faitio, po o le muimui.

Pe a tutupu faafitauli i totonu o faaipoipoga, o nisi taimi, o le tagata ua ita, o le a na o lagona le lelei lava e mauaina, po o le gaua’i atu i auala faataumaoi o fesootaiga e pei o le faitio, inoino, sisi’o, po o le lotomaaa. Pe a tupu mai lenei amioga, e masani lava ona faatamaia ai le sootaga, faaosofia ai le toalua e lagona le teenaina, le taliaina, tiga, faanoanoa, mafatia, le fiafia, po o le ita. O se auala sili atu, o le taumafai lea o tane ma ava e faafetaiaia se faafitauli ma se manatu o le a mafai ona latou foiaina, ae le na o le tomumumu e uiga i le faafitauli. Mo se faataitaiga: “Ou te manao ia te oe ia e iloa ou te alofa ia te oe, ma ou te faatauaina la ta ulugalii. O loo i ai se faafitauli e manaomia le talanoaina. Ou te manao ta te foiaina le faafitauli, ina ia mafai ai ona faaauau lo ta lagona vavalalata o le tasi i le isi, ma ia maua e i taua lagona lelei o le tasi i le isi.”

Faaaoga faaupuga “O a’u”. E ao i tagata taitoatasi ona faaaoga faaupuga “O a’u” pe a latou lagona le ita, nai lo le faaaogaina o faaupuga “O oe”.

O se faaupuga “O a’u” e faailoa atu ai lagona faaletagata ma tuuina atu ai mafuaaga mo na lagona (mo se faataitaiga, “Ou te le fiafia pe a le totogia pili i taimi e tatau ai, ma pe a le tusiaina siaki ua faaaoga i le vaega e tatau ona faamauina ai”) nai lo le taulai atu i le tuuaia o le toalua. O le faaaogaina foi o le faaupuga “O a’u”, e faailoa atu ai le tulaga o le talia o le tiutetauave mo lagona (mo se faataitaiga: “Ua ou ita” nai lo le “ua e faaitaina a’u”).

O savali e faatatau ia te “Oe”, e faailoa atu ai le tulaga o le faamasinosino, le lelei, ma e masani ona faaseseina ai faamatalaga e uiga i le toalua (mo se faataitaiga, “e ese lou paie” po’o le “e ese lou faainaelo”) O faaupuga e faaaoga ai “Oe” e valaaulia ai lagona o le ita, sisi’o, ma le tali atu.

Gaoioiga e Aoao Ai: Faaaogaina o Tomai o le Faalogo ma Faaupuga “O A’u”

E faaaoga i lenei gaoioiga faatinoga i taga e aoao ai tomai o le faalogo ma le faaaogaina o faaupuga “O a’u”. Ia fai atu i ulugalii taitasi e tusia le upu fola i luga o se fasi pepa, ma filifili po o ai o le a avea ma failauga, ae po o ai o le a avea ma tagata e faalogologo. O le tagata e tautala, na te uuina le fasi pepa ma o ia lea “ua i ai le avanoa e tautala ai.” Faaaoga le faataitaiga o loo i lalo, pe saunia se isi mo lenei gaoioiga. Faatonu ulugalii e taofi ni a latou lava faafitauli seia oo i se isi taimi, ma se’i maua tomai e sili atu.

O le failauga ua i ai le avanoa e saunoa ai, ma e ao ona ia faaaogaina faaupuga e faatatau i a “A’u”, ae le o faamatalaga e faatatau i a “Oe” e talanoaina ai le mataupu. E tatau ona ia faia faamatalaga pupuu, ina ia mafai e le tagata o loo faalogo ona toe faaupuina faamatalaga. E le tatau i le tagata faalogologo ona ia faasalaveia le failauga, pe faailoa atu lona faatuiese, a o saunoa le failauga.

O le sini o le malamalama atoatoa lea i le mea o loo saunoa i ai le failauga. Afai e le malamalama le tagata faalogologo i le mea o loo saunoa i ai le failauga, e ao ona ia fesili ina ia maua ai faamatalaga. A mae’a ona faasoa mai lagona o le failauga, ma ua uma ona toe faaupuina e le tagata faalogologo, ia fesuia’i tulaga o ulugalii taitasi. Ona toe fai lea o le faatulagaga ua faamatala atu i luga. O le tagata faalogologo o le a avea ma failauga, ma o le a ia faasoaina atu ona manatu i le mataupu.

A mae’a ona faataunuuina e le tane ma le ava tulaga uma, ia ona latou talanoaina lea o o latou aafiaga.

Ata Faataitai

O se ulugalii o loo popole ona o la laua fanau ua le o aoaoina amioga pulea. E ui ua mae’a ona totofi a latou feau, ua masani lava ona le fufuluina ipu, e le faamamaina potu, e le teuina moega, ua le faia galuega i le lotoa, ma isi mea faapena. E manao le ava ina ia faateleina se taimi o le tane e galulue ai ma le fanau, ina ia mautinoa ua fai uma feau i le fale. O le tane e faigaluega mo le 50 i le 70 itula i vaiaso taitasi, ma ua ia lagona e manaomia e lana ava le faaitiitia o le toe faamamafa mai ia te ia, ae faaalu le tele o lona taimi e galulue ai ma le fanau. E tele atu le taimi faaaluina o le ava i le fale, nai lo le tane, ae o loo i ai foi lana galuega mo na o sina taimi o le aso, ma se valaauga mamafa i le Ekalesia.

Talanoa faalelei ma ia malilie faatasi i le mea moni. E ao i tagata taitoatasi ona malilie faatasi i le mea moni, pe a latou feagai ma faitioga ma le tuuaifuaina. Pe a latou taliaina a latou mea sese, o le a latou mafai ona faatoafilemuina finauga ma faateleina lo latou tulaga tauleleia. A latou teenaina le mea moni, e masani ona latou faateteleina faafitauli, ma foliga mai ai ua vaivai ma sese.

Na faamatala e Gottman le sisi’o, o se tasi o auala sili ona matautia o faiga faataumaoi o fesootaiga. Na ia matauina, “e mafai ona taitai atu ai i le faataliolio lē gata o lagona lē lelei.” O le sisi’o, e aofia ai le teenaina o le tiutetauave, faia o faanoi, faatuiese, faitioina, osofaia, uiga masalosalo po o le faatalasua, ma le limala’u.

I se faatusatusaga, o uiga lē sisi’o, e aofia ai le taliaina o le tiutetauave, faailoaina o mea sese, sailia o fofo o faafitauli, malie ma le agaga moni e faia suiga, ma le amanaiaina ma le faaaloalo o lagona o le toalua. Na tusia e Gottman, o ulugalii o e aoao e aua le sisi’o, o le a toetoe lava mautinoa le faaleleia o a latou faaipoipoga: O le togafiti e tasi e sili ona taua mo le faatamaiaina o fesootaiga sisi’o, o le filifili lea ia i ai se manatu lelei e uiga i lou toalua, ma le toe folasia atu o le faamalo ma le fiafia i la oulua sootaga.”¹³

A o malilie faatasi tagata taitoatasi i le mea moni, ma a’oa’o e tautatala faamaoni, o le a mafai ona latou manatuaina le taua o le faapea atu, “Ia malie lou loto.” O se faatoesega e sau mai le loto, na te faafesootaia feteenaiga, ma aumaia le vai malu i lagona ita ma finauga.

Gaoioiga e Aoao Ai: Talanoa e Aunoa ma le Sisi’o ma Malilie Faatasi i le Mea Moni

O lenei gaoioiga e faaaoga ai tala faatino e a’oa’o ai tomai e tautala ai e aunoa ma le sisi’o ma malilie faatasi i le mea moni. Ia faaaoga e ulugalii se tasi o ata faataitai o loo i lalo, poo le fausia foi o se tasi e mananao i ai latou. O le ata faataitai e le tatau ona fesootai i se mea o loo tupu i a latou faaipoipoga. I a latou tala faatino, e mafai ona filifili latou po o ai o le a tuuina atu le savali ma le tagata o le a taliaina. O le tagata e auina atu le feau e ao ina fai atu se faamatalaga e feoloolo lona tulaga faitio e pei o lea, “Ua ou lagona le tulaga olegia, pe a e sola e te tapolo, e aunoa ma lou faailoaina mai.” O le tagata e taliaina, e tatau ona faataitai le tali atu e aunoa ma le sisi’o, ma ia malie i soo se mea moni lava o loo tuuina mai i le faamatalaga. A mae’a nai minute, ona fesuia’i lea o tulaga o ulugalii. O le tagata na tuuina atu le savali, o le a ia faataitaia le lagona e maua e se tasi mo le taliaina o le tiutetauave, ae o le tagata e taliaina, o le a ia lagonaina le taliaina o le le atoatoa, po o le mea sese na faia. A mae’a, ia talanoa ulugalii e tusa o le mea na tupu.

Ata Faataitai A

O se ava, ua faatoa iloaina mai se uo, e masani ona alu lana tane e tapolo i afiafi, ae o le la sa ia faapea atu ia te ia, e tuai ona manava mai le galuega. Ua faatoa ia iloaina, e tuu e lona toalua le ato tapolo i le keli o le taavale. Ua ia lagonaina le olegia, ona o le pepelo o lona toalua ia te ia. O lana tali mai e faapea, “Aisea e le fiafia ma ita ai o ia i lenei tulaga? O lea sa avea lava a’u ma se toalua lelei.”

Ata Faataitai E

O se tane ua le fiafia ona o lona toalua, o le e faatauina atu fagu faamanogi, e faaalu le tele o itula e talanoa ai ma ana tagata faatau. Pe a i ai i le fale o ia, na te faaauau lana galuega i luga o le telefoni. Ua ia lagonaina le teenaina ma le tuua toatasi. Ua ia faitioina lana ava, i lona popole tele mo lana galuega nai lo ia. I le mafaufau o lana ava, e taua tele le fesootaiga ma ana tagata faatau ia te ia mo le pisinisi.

Tuuina atu o le faaviivii faamaoni. O faaviivii e faamaoni, e faaleleia ai fesootaiga, ma fesoasoani ai i tagata taitoatasi e lagonaina le fiafia ia i latou lava. E pei ona fautuaina mai e Gottman, “O le faamanatu atu i lau paaga (ma oe lava) e te fiafia tele ia te ia, e tele lava ina aumai ai se malosiaga, tulaga lelei i le faaiuga o a oulua talanoaga.”¹⁴ O ia ituaiga faaviivii, e faamalolosia ai sootaga.

Ia manino le faailoa atu o mea e fiafia i ai. Na matauina e le tusitala o Susan Page, o nisi o ulugalii e tele tausaga o nonofo e aunoa ma le faasoa atu o mea latou te fiafia i ai, po o mea latou te faamoemoeina mai le tasi.¹⁵ O nisi faamoemoega e faigofie, e pei o le talosaga atu e ave le lapisi i fafo, po o le aveina atu o le ipu i le fata ipu, pe a uma le tausamiga o le afiafi, o isi e faale-taua tele. Na fautua mai Page, o faamoemoega e le faailoaina e mafai ona faaletonu ai le sootaga mo le tele o tausaga. Pe a le faamalieina ia faamoemoega, e masani ona lagonaina e tagata taitoatasi le faanoanoa, lē fiafia, ma le ita, e tusa lava pe le i faailoaina mai o latou manaoga, po o faamoemoega. E ono o’o ai i latou i le tulaga o le faapogisaina e uiga i le sootaga.

O mafuaaga masani mo le le faasoaina mai o manaoga ma faamoemoega, e aofia ai manatu e pei o le “Ua tatau ona ia iloa le mea ou te mana’o ai”; “O le a ia faapea ifo, ua ou faitioina ia”; “E ao lava ina ou taliaina le mea ua ou mauaina”; po o le “E le mafai lava ona ou mauaina, aisea la e fesili ai fua i ai?” Peitai, i le fesiligia o mea latou manana’o i ai, e faailoa atu ai e tagata taitoatasi lo latou taliaina o le tiutetauave i totonu o sootaga. O le faatulagaga o le faia o fesili, e masani lava ona faamalosia ai le sootaga. E tusa pe o le a le taliaina se talosaga, pe faatupu ai foi se feteenaiga, o le talosaga o le a aumai ai le mataupu i le laolao. O le taimi lava e faailoa mai ai le mataupu, o le a mafai ai ona galueaiina ma o’o ai ina foiaina.¹⁶

E ao ina faaaoga e tagata taitoatasi le faautauta lelei, pe a talosaga mo mea latou te manana’o i ai, ma ia manatua e le o talosaga uma e talafeagai. E ao ina latou:

Ia manino i o latou mafaufau mea latou te manana’o i ai, ae le i talosagaina.
Ia filifili le taimi sa’o e tuuina atu ai le talosaga. O le a faigata ona tali mai le toalua, pe afai o loo i ai isi mea o loo aafia ai.
Ia tuu sa’o; mo se faataitaiga, e mafai ona latou faapea, “Faamolemole, pe mafai ona e alu e ave le lapisi i fafo?” nai lo le faapea, “Maimau pe ana mafai ona e fesoasoani mai.”
Ia faapuupuu le faaupuga o le talosaga, e aunoa ma le tau faaumiumia e faamaonia ai; mo se faataitaiga, e mafai ona latou faapea, “Ou te fia sogi faamavae atu, ae ou te le’i alu i le galuega,” nai lo lea “Ou te iloa ua tele mea ou te mana’o ai, ma o nisi taimi e tuai ona e ala, ae, e fesoasoani ou te maua ai faalogoga lelei pe a …”
Ia fai atu i se auala e le o faatonuina ai. “E te finagalo malie …” o se fasi fuaitau amata lelei. E tatau i tagata taitoatasi ona malamalama o le toalua ua i ai le aia tatau e faapea mai ai e leai, aemaise lava pe afai o le talosaga e le talafeagai.¹⁷

Afai e foliga mai le talosaga ua talafeagai, ma ua malosi le lagona o le tagata e uiga i ai, ae teena e le toalua, e mafai e le tagata ona toe fesili atu i se isi auala. Atonu e manaomia sina taimi mo le toalua e malamalama ai i le uiga o le talosaga.¹⁸

Iloilo Pe Faapefea ona Oulua Talanoa o le Tasi i le Isi (faagasologa ma anotala)

O nisi taimi e matele ai le taula’i atu o ulugalii i mataupu ua tula’i mai i lea taimi, e pei o le, o ai e totogia pili, po o le, o ai e aveina le lapisi (faafitauli o anotala), ae galo ai ia i latou o le faafitauli sili atu, o le auala latou te fesootai ai (faagasologa). Latou te taumafai e faaleleia faafitauli faale-fesootaiga, e ala i le faaauau ona faia o mea e le lelei, e pei o le e’ē, finauga, po o le faatonu. Nai lo le fesoasoani e foia faafitauli, o nei mea e fesoasoani e faatupulaia fefinauaiga. Afai e iloilo e ulugalii ma suia le faagasologa o a latou fesootaiga, faia o na faagasologa ia sili atu ona lelei, o le a sili atu ona latou foia feteenaiga ma maua vaaiga fou e taitai atu ai i feutagaiga e sili atu.

O se tasi o ulugalii na sailia togafitiga, ona ua fefe le ava i le ita soo o lana tane. Na ia faaleagaina le puipui o le potumoe i se tasi o a la finauga. I le taimi o le a’oa’oga na ia faamaonia mai ai o le a ia le faatiga lava i se tasi, ae sa finau mai le ava, e sosoo lava le tatu’iina o meafale ma le tatu’iina o tagata (faafitauli o anotala).

Nai lo le faatagaina o le ulugalii e finau ai lava pe faamata o le a tu’iina e le tane se isi, na taula’i atu taumafaiga a le fomai i auala e masani ona faafetaiaia ai finauga, e aofia ma lea o loo feagai nei ma laua. E masani ona tomumu le ava i lona toalua e uiga i mea e le fiafia ai. E lagona e le tane le tuuaia ma matua le lelei ai ona lagona. Pe a leiloa lana tala e fai, o le a ia le toe tautala loa ma savali ese. E manatu le ava o lea tulaga, o se teenaina lea o ona lagona. Ona ia mulimuli atu loa lea i lana tane, mai lea potu i lea potu, ma manao atu lava ina ia talanoa mai ia te ia. O le mea e o’o i ai, o le faapa loa o lona ita.

Ina ua mae’a ona iloaina e le ulugalii le faagasologa, na fesoasoani loa le fomai ia i laua e suia la laua auala e foia ai le faafitauli. Na aoaoina e le ava, le faaitiitia o le faasoaina o ona lagona i totonu, ae o le tane ua aoaoina e faalogo ma tali atu i se auala talafeagai i lagona o lana ava.

Gaoioiga e Aoao Ai: Iloiloina o Faagasologa Tau i Fesootaiga

Fai i ulugalii e mafaufau e uiga i auala latou te talanoaina ai mataupu e tula’i mai, foiaina o faafitauli, ma faaosofia ai e le tasi le isi i mafaufauga ma amioga. Pe latou te talanoaina mataupu ma le agaga e tasi? Pe latou te faitioina ea, finau, tomumu, faamasinoina le tulaga mama, pe faatonu, po o le alu ese ma gugu, po o le faasausili? Pe latou te tali atu ea ma le agaga lelei o le tasi i le isi, pe taumafai e sisi’o? Pe o lelei ea la latou auala, e fesoasoani ia i latou e ausia faatasi ai taunuuga faamalieloto, po o fausia ai ea nisi faafitauli faaopoopo? Pe o fiafia faatasi ea i le auala o loo talanoaina ai mataupu? Fai atu i ai e talanoa pe faapefea ona latou faaleleia le auala latou te talanoaina ai faafitauli i a latou sootaga.

Fesootaiga Lelei

Na faailoa mai e Elder Marvin J. Ashton o le Korama a le Toasefululua, le auala e mafai ai ona aoao atili tagata i fesootaiga agaalofa: “Ou te tatalo ina ia fesoasoani mai lo tatou Tama Faalelagi ia i tatou ina ia lelei la tatou fesootaiga i totonu o le aiga e ala i le loto malie, ina ia tuu mea e loto i ai le tagata lava ia ae fai mea mo lelei o isi, i le loto malie ina ia alo ese mai le faamasino atu, le loto malie ina ia tausi faalilolilo mea e le tatau ona faalauaiteleina, faapea ma le loto malie inaia faatinoina le onosai. … E mafai ona fesoasoani le fesootaiga i le atiina ae o le lotogatasi o le aiga, pe afai o le a tatou taumafai i ai ma tuu mea tatou te mananao ai, ae sailia lea tulaga.”¹⁹

“O le tane ma le ava ua i ai se tiutetauave paia e alofa ma tausi e le tasi le isi ma a la fanau.”

“O Le Aiga: O Se Folafolaga I Le Lalolagi”