Vasega Muamua

Faaaogaina o Mataupu Faavae o le Talalelei

O Manulauti o le Vasega

I le vasega lenei, ia fesoasoani i sui auai:

Ia malamalama i mea e ono fesoasoani ai mo le filemu ma le fiafia i faaipoipoga.
Ia i ai le faamoemoe sili atu, e mafai ona latou ausia le fiafia a o faaaogaina mataupu faavae o le talalelei i a latou faaipoipoga.
Amata ona faaaoga mataupu faavae nei e fa, ina ia faamalolosia ai a latou faaipoipoga:
- Tausisi i mataupu faavae o le talalelei.
- Tautino e tumau i le faaipoipo ma foia eseesega.
- Tausia feagaiga.
- Taumafai ia faaleleia atili i aso taitasi.

O Le Faavae mo le Fiafia i le Faaipoipoga

Na aoao mai Peresitene Ezra Taft Benson: “O le Faaipoipoga … o le mataupu faavae sili ona faamamaluina ma faaeaina o le talalelei a Iesu Keriso. E leai se sauniga e sili atu lona taua, ma sili atu lona paia ma tatau ai mo le fiafia e faavavau o le tagata. O le faamaoni i le feagaiga o le faaipoipoga e aumai ai le fiafia atoatoa iinei ma taui faamamaluina i le isi olaga.”¹

E mafai e ulugalii ona faamalolosia a latou sootaga, ma tausia o latou aiga ia saogalemu, e ala i le mulimulita’i i fautuaga o lo o tuuina atu i le folafolaga e uiga i le aiga.² E mafai ona latou maua tali i o latou faafitauli e ala i le suesue i aoaoga a le Faaola ma Ana auauna, ma e ala i le tatalo faatauanau mo le taitaiga a le Alii, o le a faavaeina ai a latou sootaga faale-faaipoipoga i luga o le faavae o le talalelei a Iesu Keriso. E ala i le tatalo, e mafai ai ona latou maua le malosi e tausia ai a latou feagaiga ma galulue faatasi. E mafai ona latou salamo mai mausa leaga ma fefaamagaloa’i. E mafai foi e ulugalii ona aoaoina tomai e foia ai faafitauli ma fesootai ai, ina ia foia ai feeseeseaiga ma taofia ai feteenaiga e ono tutupu mai.

O Le Tulaga Lepetia o le Olaga Faale-Aiga

Na lapata’i mai Peresitene Hinckley e uiga i le tulaga lepetia o le olaga faale-aiga: “Ua malepelepe le aiga i le lalolagi atoa. … Ua nutimomoia loto; ua aue tamaiti.”³ Pe a feagai ma faafitauli ma lu’itau i totonu o le faaipoipoga, o nisi tagata latou te lagona le lotovaivai ma manana’o e faauma. O le toatele o nisi, latou te tautino atu i a latou sootaga faale-faaipoipoga, galulue i le foiaina o o latou faafitauli, ma olioli i le filemu, fiafia, ma le manuia o le faaipoipoga.

E ui e tele le avanoa mo le ausiaina o le fiafia, e toatele tagata o lo o tauivi ma le ātu, lē fiafia, ma le atuatuvale. Ua faamata’uina le faaipoipoga mai fafo e aiaiga ma faiga faaagafesootai ma le televave o le olaga o aso taitasi. O lo o faamata’uina mai i totonu e mausa le lelei, o le le malamalama, ma le faamaualuga. E le faigofie ona foiaina faafitauli ogaoga, ma o nisi ulugalii e foliga mai ua tauivi pea lava pea ma faafitauli lava e tasi lea ua faaletonu ai a latou faaipoipoga mo le tele o tausaga. I le iloa ai o le tulaga faamata’uina o le aiga, na lapata’i mai ai le Au Peresitene Sili ma le Korama a le Toasefululua i totonu o le folafolaga i le aiga e faapea; “o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei.”⁴

O nei faafanoga ua manino lava i totonu o nuu. O ulugalii na manatu o le tatala o faaipoipoga o le fofo sili lea mo se faaipoipoga le manuia, ua iloa nei e masani ona tutupu mai ai isi faafitauli sa le i mafaufauina. I se suesuega mo aafiaga umi o le tete’a, na faamaonia mai e le fomai faapitoa o le mafaufau o Judith Wallerstein, faatasi ma isi tusitala lagolago, o Julia Lewis ma Sandra Blakeslee, e faapea, o le tete’a e aafia ai olaga o tamaiti ma aafia ai a latou amio ma faaiuga fai mo taimi o totoe o o latou olaga.⁵

Na maua e Linda Waite o le Iunivesite o Chicago ma lana soa tusitala o Maggie Gallagher e faapea, o le tatalaina o faaipoipoga e masani ona i ai isi taunuuga faatamaia mo tamaiti, e aofia ai le faateleina o le le tausisia o tautinoga ma le solitulafono, faaitiitia avanoa mo a’oga, ma le faateleina o faafitauli faale-mafaufau ma le ola maloloina.⁶ Na la mauaina e ono sili atu le avanoa e sauaina ai tamaiti e le uo tama po o le uo teine a se tasi o matua, ia po o se matua fai, nai lo matua moni.⁷

E tele mafuaaga e tupu mai ai luitau i faaipoipoga, e pei ona matauina e Peresitene Spencer W. Kimball:

“O ni tagata se toalua e eseese tulaga e o mai ai, o le a vave ona iloa e uma loa ona fai le sauniga o le faaipoipoga, ua tatau loa lava ona feagai ma le mea moni. Ua le toe i ai se olaga o mea e momo’o i ai, po o mea faafoliga; ua tatau ona tatou o ese mai puao ma tutu mausali i luga o le eleele. Ua tatau ona tauaveina le tiutetauave ma taliaina tiute fou. O nisi o saolotoga faale-tagata lava ia ua tatau ona tia’i atoa ai ma le tele o fetuunaiga, fetuunaiga lē manatu faapito, e ao ona faia.

“O le a vave ona iloa e le tasi i le mae’a ai o le faaipoipoga, o le toalua e i ai vaivaiga na le i faailoaina pe aliali a o le i faaipoipo. O uiga lelei sa masani ona faaalia i le taimi o le faamasaniga, ua amata ona faaitiitia ma o vaivaiga sa foliga e laitiiti ma lē amanaia tele i le taimi o le faamasaniga lea ua faatupulaia i se tulaga le mafaatusalia. … O mausa o le tele o tausaga lea ua aliali mai; o le toalua atonu e mata’ū pe faamaumau, paie pe maelega, amio lelei pe amio paaa, agalelei ma loto fesoasoani pe faalii ma matafaasiasia, tagisa pe loto foai, faasausili pe amiosolia. O le faafitauli o matua o le toalua ua amata ona manino mai, ma o le sootaga o le taitoalua ia i latou ua toe faa-matateteleina.” ⁸

Tala Fiafia mo le Faaipoipoga

Ua tautino mai e Peresitene Kimball i ulugalii e ui lava i nei mea, atoa ai ma isi luitau, e mafai ona faamanuiaina le faaipoipoga: “E ui ina taumafai alii talavou ma tamaitai talavou taitasi e saili, i le maelega uma ma le agaga tatalo, se soa e mafai ona maua ai se olaga sili ona faamalieina ma matagofie, peitai, ua mautinoa o soo se alii lelei ma se tamaitai lelei e mafai ona maua le fiafia ma se faaipoipoga faamanuiaina, pe a naunau uma le toalua e totogia le tau.”⁹

E ui o le a latou feagai ma eseesega ma feteenaiga, ae e mafai e ulugalii ona foiaina ma le manuia na mea. E sili ona foiaina lelei ia faafitauli, pe a taumafai uma le ulugalii e faatoilaloina na faafitauli. Ae paga lea, e le tutusa i taimi uma le faaosofia o ulugalii e faasaoina faatasi la laua faaipoipoga. Pe a eseese le tulaga o le agaga faaosofia o le tane ma le ava, o le soa e sili ona tuuto e tatau ona i ai le lototele, i le iloa ai o le tumau i le faaaogaina o mataupu faavae faale-sootaga, e masani ona aumaia le tulaga faamanuiaina i la laua faaipoipoga. O le alofa o le tasi o le ulugalii, tautinoga, ma lana vaaiga i le faavavau e masani ona faamautuina ai le faaipoipoga seia matua ma salamo le isi o le la ulugalii, ma iloaina le maimau ma le faatamaiaga e ono o’o i ai le ulugalii, pe afai e tete’a. O le tulafono o le seleselega–“o le mea e luluina e le tagata, o le mea lava lea e seleseleina mai e ia” (Kalatia 6:7)–ma le liliu atu o le isi alafau (tagai Mataio 5:39) faaaoga i le faaipoipoga faapea foi isi sootaga.

Faamalolosia o Faaipoipoga

O le a faamalolosia e tagata taitoatasi a latou faaipoipoga pe a latou:

Tausisia Aoaoga o le Talalelei.
Tautino atu i latou lava i a latou faaipoipoga.
Tausia feagaiga na latou osia.
Taumafai ia faaleleia atili i aso taitasi.

Tausisi i Mataupu Faavae o le Talalelei

O eseesega masani i le va o ulugalii e o’o ina faateteleina e avea o ni feteenaiga ma feeseeseaiga pe a vaai atu ulugalii o le tasi i le isi ma la latou sootaga i se auala faapi’opi’o, taufaasese, ma lē moni. E mafai e ulugalii ona faatoilaloina nei mea pi’opi’o pe a latou aoao e mulimuli ia Iesu Keriso.

Na matauina e Elder Neal A. Maxwell o le Korama a Aposetolo e Toasefululua, e mafai e le talalelei ona fesoasoani i tagata ia manino la latou vaai faatasi ma le i ai o se mafaufau tonu: “Aua o le vaai atu i le olaga ma isi e ala i meavaai o le talalelei e maua ai le vaaiga e faavavau, afai e faaumiumi la tatou vaai ma faifai soo, e mafai ona manino atu la tatou vaai. … O mea e pei o se fasi meaai ma tupe siliva e tolusefulu faapea taimi o le faamalieina o manaoga o le tino e matuā mou ese atu mai le vaai; e faapena foi le sasau sa faaleleia i le tagāpolo, po o le tenisi, pe a faatusatusa i le alualu i luma i le onosa’i. E faapena foi le toe teuteuina o le potu i luma, pe a taatia ai i tala ane le faalogo ma le aoaoina o le fanau a se tasi.”¹⁰ Pe a ola tagata i le talalelei, o le a manino atu la latou vaai ma faia filifiliga e sili atu ona talafeagai.

O i latou o e faananau atu ma le loto atoa i se faaipoipoga faavavau ma se olaga faale-aiga faamanuiaina, e ao ona saili ia avea ma soo moni o le Alii o Iesu Keriso. Faatasi ma le uiga faale-soo, e sau ai le taitaiga faamamaluina i itu uma o le olaga, e aofia ai ma le taitaiga ia iloa avea ma se soa lelei i le faaipoipoga ma se matua. Na aoao mai e le Faaola o le a Ia fesoasoani i tane ma fafine ia faatoilalo o latou vaivaiga:

“Afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou, ma ua lava lou alofa tunoa mo tagata uma o e e latou te faalotomaualalaloina i latou lava i ou luma, aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.

“Faauta, o le a ou faaali atu i Nuuese o latou vaivaiga, ma o le a ou faaali atu ia te i latou o le faatuatua, faamoemoe, ma le alofa mama e aumai ai i latou ia te au–o le puna o le amiotonu uma” (Eteru 12:27–28).

E faapena foi le a’oa’o mai o le Perofeta o Iosefa Samita, “O le latalata o le tagata i le atoatoaga, o le manino foi lea o lana vaai, ma le tele foi lea o lona olioli, seia oo ina ia manumalo i mea leaga o le soifuaga ma le toe i ai sona manao i le agasala.”¹¹

O le avea ma se so’o e faaleleia ai le vaai faale-mafaufau ma fesoasoani i tagata taitoatasi e vaai “i mea e pei ona i ai moni lava” (Iakopo 4:13). O faiga faataumaoi i isi o le a suia e le alofa, onosa’i, ma le faapalepale. O le usitaia o mataupu faavae e iva o le folafolaga i le aiga e taitaiina atu ai i le amiotonu patino, ma latalata ai i le Atua. O le a faateleina le agaga talisapaia mo tagata o le aiga; o le a mafai foi ona maua le taitaiga faalelagi.

O le olaga e aumaia luitau, o le tele o na luitau e sau mai i a tatou fegalegaleaiga ma isi. Peitai, e pei ona matauina e Peresitene Kimball, e mafai ona avea faigata ma faamanuiaga, pe a tatou vaai atu i ai i se vaaiga o le faavavau:

“Afai tatou te vaai i le olaga faaletino o le atoaga o le olaga, o le a avea tiga, faanoanoaga ma le puupuu o le ola o ni faafatiatama’i. Ae afai tatou te vaai i le olaga o se mea e faavavau e o’o atu i le muai olaga muamua ma oo atu ai lava i le faavavau i tua atu o le oti, ona ono mafai ai lea ona malamalama i mea uma o tutupu.

“Pe le o i ai ea se poto i lona tuuina mai ia i tatou o luitau ina ia mafai ona tatou manumalo ai, o matafaioi ina ia mafai ona tatou ausia, galuega ina ia faamalosia o tatou musele, faanoanoaga e tofotofo ai o tatou agaga? Pe le o le tatou oo ea i faaosoosoga e suesue ai lo tatou malosi, o ma’i ina ia aoao ai le onosai, oti ina ia tatou maua le tino toetu, ma le fiafia atoa?”¹²

O tane ma ava e tuputupu a’e e ala i faigata, a’oa’oga, faatuatua, amiotonu faaletagata lava ia, ma le taitaiga faaleagaga. Faatasi ai ma le taitaiga faaleagaga, latou te mauaina ai le agavaa sili atu e manumalo ai i faafitauli ma luitau o le olaga, e aofia ai ma mea e aafia ai le aiga.

Gaoioiga e Aoao Ai: Suia o le Vaaiga

Valaaulia tagata o le vasega e mafaufau i a latou mafuaaga mo le auai ai i lenei vasega. Fai i ai e tusi a latou tali i fesili nei:

O le a le mea e tupu i la oulua faaipoipoga, pe a oulua lagonaina e faapei ua e vaai atu ia te oe lava ma lou toalua, e pei o le silasila a le Tama Faalelagi i a oulua uma?
O le a le mea e tupu, pe a foliga mai ua pulea e tulaga faatonuina o le lalolagi a oulua fegalegaleaiga?
O a suiga e manaomia ona e faia e toe faalelei ai lagona le lelei, ma faamautuina ai se vaaiga sili atu i la oulua sootaga?
Faamata o a ni mea o lo o silafia e le Alii e uiga ia te oulua, e lua te le i malamalama i ai, e pei o oulua avanoa e faavavau, olaga ae le i fanau mai, o mea na tutupu i le olaga ua suia ai lau amio, ma lou agavaa e ausia se faaipoipoga faavavau?
E mafai faapefea e Lana silasila ona faaaafia ai le auala lua te fesootai ai o le tasi i le isi?

Tautino atu e Tumau i le Faaipoipo ma Foia Eseesega

E feagai ulugalii uma lava ma luitau i a latou faaipoipoga. Vagana ua tautino faamaoni atu le tasi i le isi, o le a le maua e i latou le faavae e feagai ai ma afā o le olaga. O ulugalii ua tautino le tasi i le isi, e popole tele ina ia foia a latou faafitauli.

O Catherine Lundell, o se fomai faapitoa mo aiga ma faaipoipoga, na ia faamatalaina se ulugalii na tauivi ma ni faafitauli tuga i la laua faaipoipoga. Sa la fuafua e tete’a i le taimi o le tautotogo, pe a le mafai e i laua ona foia o la faafitauli. I nai masina o le aoaoga, na itiiti lava se alualu i luma o taumafaiga a le ulugalii ma ua sauni e tete’a, peita’i, na musu Lundell e faaopoopo atu lana faatofalaiga faapolofesa i la laua faaiuga. Nai lo lena, na ia faamanatu atu ia i laua e uiga i a la feagaiga: “O oulua lava e faia le faaiuga e tatala a oulua feagaiga,” na ia fai atu ai ia i laua. “O oulua lava o le a soifua ma lena faaiuga.” Ina ua toe foi ane le ulugalii mo le asiasiga e soso’o ai, na “tulaga ese le alofa faaalia ma le tali atu o le tasi i le isi.” Na la faamatalaina, ina ua mae’a ona mafaufau e uiga i la laua mataupu, na la filifili ai e tuuto atu i laua uma i le la faaipoipoga. E ui lava ina i ai pea o la faafitauli e ao ona foia, o la laua tautinoga faafouina na maua ai se eseesega i la laua faaipoipoga. ¹³

Na aoao mai le Faaola e uiga i le tautinoga e tatau ona i ai i se faaipoipoga: “O le mea lea e tuua ai e le tane o lona tama ma lona tina, ae faatasi ma lana ava…. O lea e le toe toalua ai, a o le tino e tasi i laua. O lenei, o e ua faatasia e le Atua, aua ne’i faateaeseina e se tagata.” (Mataio 19:5–6).

Na aoao mai e Elder Bruce C. Hafen o le Fitugafulu e faapea o le faaipoipoga o se feagaiga, ae le o se konekarate. O itu e lua i se faatulagaga faakonekarate e masani ona savavali ese pe a tula’i mai faafitauli ma faaleagaina ai le tulaga solo lelei. “Peitai a o’o mai faafitauli i se faaipoipoga na osia ai ni feagaiga,” na saunoa Elder Hafen, “o le a taumafai le tane ma le ava la te foiaina. Na laua faaipoipo ina ia fetufaai ma tuputupu a’e, e fusia i feagaiga a le tasi le isi, i le nuu, ma le Atua.”¹⁴

O le tele o ulugalii e nonofo faatasi o le a iloaina e mafai ona foia faafitauli. E tusa ai ma le suesuega a Waite ma Gallagher, e i ai se pasene maualuga o ulugalii faaipoipo lē fiafia, o e e tutu faatasi, ma foia a la faafitauli ma o’o ina maua le fiafia i la laua faaipoipoga: “o le 86 pasene o ulugalii faaipoipo lē fiafia, o e tumau, o le a iloa i le lima tausaga mulimuli ane, o a latou faaipoipoga o le a sili atu ona fiafia. … O le toatele e faapea mai e moni lava ua faateleina lo latou fiafia. O le mea moni, e latalata i le tolu-vae-lima o i latou na faapea mai na le fiafia a latou faaipoipoga… ma tumau i le faaipoipo, ua faatulagaina lea lava faaipoipoga o se faaipoipoga “e ese le fiafia”, po o le “e fai lava si fiafia.”¹⁵

O lenei siitaga na tupu fo’i i faaipoipoga e sili ona le fiafia. Na faamauina e Waite ma Gallagher, “O faaipoipoga sili ona le lelei ua faaalia suiga sili ona maoa’e i le toe faaleleia: 77 pasene o tagata faaipoipo mautu, o e na faatulagaina a latou faaipoipoga o ni faaipoipoga e matua le fiafia lava … na faapea mai o le faaipoipoga lava lena e tasi ua avea ma faaipoipoga ‘e ese le fiafia’ po o le ‘e fai lava si fiafia’ i le lima tausaga mulimuli ane.”¹⁶

O ulugalii e nonofo faatasi e faafiafiaina fo’i i faamanuiaga. Na maua e Waite ma Gallagher o ulugalii nei e ola umi,¹⁷ mauaina oa e sili atu,¹⁸ sili atu ona ola maloloina ma fiafia,¹⁹ ma maua le faamalieina sili atu i tulaga faale-feusuaiga nai lo tagata e le o faaipoipo.²⁰

Tausia Feagaiga

O Feagaiga–maliliega paia i le va o le Atua ma Lana fanau–e aumaia faamanuiaga faaopoopo lea e fesoasoani e faasaoina ai aiga. Pe a feagai ulugalii ma faafitauli, e mafai ona latou manatua a latou feagaiga, e maua ai le malosiaga e foia ai faigata. E mafai e feagaiga ona fesoasoani i le tele o auala:

O feagaiga e faateleina ai le agaga faaosofia. E ala i le feagaiga fou e faavavau o le faaipoipoga, ua tautino mai e le Alii o ulugalii agavaa o le a fai mo latou mea uma o lo o i ai ia te Ia (tagai MFF 132:19–20). Na a’oa’o mai le aposetolo o Paulo, “O mea e le i vaaia e mata, e le i lagona foi e taliga, e le i o’o foi i le loto o se tagata, o mea ia ua saunia e le Atua mo i latou o e alolofa ia te ia” (1 Korinito 2:9). Pe a manatua e tane ma ava a latou feagaiga, o le a latou maua le musumusuga ma le agaga faaosofia e galulue ai i a latou faaipoipoga, ma foia faafitauli pe a tula’i mai.

O feagaiga e taiala ai amioga. O feagaiga e osia e tagata a o tuputupu a’e i le talalelei, e fesoasoani e faamalolosia a latou sootaga. I le taimi o le papatisoga, e osia e tagata o le ekalesia feagaiga e usitaia poloaiga a le Atua ma ia avea faapei o Iesu Keriso. O le tausisia o le feagaiga o le papatisoga o le a foia ai le tele o faafitauli i le faaipoipoga. O e umia le perisitua e osi feagaiga ina ia faalauteleina o latou valaauga ma talia le taitaiga mai le Alii ma Ana auauna (tagai MFF 84:33–39, 43–44). O feagaiga o le malumalu e taialaina ai foi tane ma ava i a latou sootaga o le tasi ma le isi.

O feagaiga e faamanuiaina ai ulugalii. Ina ua faatuina Lana feagaiga ma Aperaamo, na folafola atu e le Alii, “ma o le a Ou faamanuiaina oe e le mafuaina” (Aperaamo 2:9). Ua lava ona faailoa mai e tusitusiga paia o le a faamanuiaina ma lagolagoina e le Alii ona tagata o le feagaiga. O i latou e mulimuli ia te Ia, o le a avea ma suli i faamanuiaga na folafola i a Aperaamo. I taimi o faigata, e tuuina mai e le Alii le taitaiga ma lagolagoina tane ma ava agavaa. I le tumutumuga lava, o le a latou mauaina le fiafia e faavavau ma le faaeaga i le malo selesitila. Na matauina e Elder Bruce C. Hafen o le usiusitai i feagaiga, o le a mafai ai e tagata taitoatasi ona “iloaina ai ni faatanoa o loo natia o le malosi” ma “vaieli loloto i totonu o le lotoalofa.”²¹ O nei faamanuiaga e faamalolosia ai ulugalii i taimi o le faaletonu.

O feagaiga e fesoasoani e laveaia le fanau. O faamanuiaga o le feagaiga o le faaipoipoga e aafia ai le fanau faapea ma matua. O matua e tausia lenei feagaiga, e faamalolosia i le a’oa’oina ma le tausia o a latou fanau. Na a’oa’o mai Peresitene Polika Iaga, “Pe afai ua maua e se alii ma se tamaitai o laua faaeega paia ma faamauga, ona maua lea o fanau mulimuli ane, o na fanau o suli faale-tulafono i le Malo ma ona faamanuiaga ma folafolaga uma.”²² Na toe faamamafa mai e Peresitene Boyd K. Packer o le Korama a Aposetolo e Toasefululua le taua o feagaiga o le malumalu: “E le lava le faamamafaina pea o le taua o le faaipoipoga i le malumalu, o fusi ia o le sauniga o le faamauga, ma e manaomia ai tulaga faatonuina o le agavaa mo ia sauniga. Pe a tausia e matua feagaiga ua la osia i le fatafaitaulaga i le malumalu, o le a faavavau ona fusia a laua fanau ia i laua.”²³ E ui e le mafai e matua ona “faamalosia le faaolataga i luga o i latou o e le manana’o i ai,”²⁴ ae o faamanuiaga o feagaiga o le malumalu e faamalolosia ai matua ma a latou fanau.

O se lisi o feagaiga e osia e tagata o le Ekalesia ma le Atua o lo o i le itulau 12. Atonu e te manao e fai ni kopi o lenei lisi ma tufatufa atu i tagata o le vasega.

O nisi tane ma ava agavaa o lo o tuufesili pe o le a le mea e tupu i faamanuiaga o a latou feagaiga pe a solia e se tasi o le ulugalii le feagaiga na la osia faatasi. Pe a tuulafoaia e se tasi o le ulugalii le feagaiga, o le soa faatuatuaina e le taofia faamanuiaga folafolaina mo ia. Na faamalosiau mai Peresitene Gordon B. Hinckley ia i latou o e aafia: “Matou te le vaai maulalo atu ia te outou o ni tagata ua le mafaia se mea ona ua le faamanuiaina se faaipoipoga. … O le a le faafitia oe e le Alii, pe tulia oe.”²⁵ E faapena foi, e mafai e se tamaitiiti ona faatumauina le faamanuiaga o le fanau mai, po o le faamauina i le feagaiga, e tusa lava pe ua tuulafoaia e se tasi, po o le ulugalii uma foi le feagaiga. O se matua o le e tausia le feagaiga, e faatumauina se sootaga faale-feagaiga ma le tamaitiiti.

Taumafai ia Faaleleia Atili i Aso Taitasi

O le lotovaivai o se tasi o mea faigaluega sili a Satani. E toatele ulugalii e lofituina i le manatu o le avea ma se “tagata atoatoa, e faapei o lo [tatou] Tama oi le lagi e atoatoa” (Mataio 5:48). I le iloa ai o o latou le atoatoa ma le feagai ai ma faafitauli faale-aiga o aso uma, e avea ai latou ma tagata lotovaivai. O le olaga faale-aiga e faavavau ia i latou, atonu e foliga mai ia i latou o se miti. “O le a le mafai ona ou o’o i ai,” latou te tagiaue ai. “Aisea la e taumafai ai?”

O tagata taitoatasi o e ua fiu ia i latou lava, o latou taitoalua, po o a latou fanau, e tatalaina le faitotoa mo uunaiga amioletonu. Ae o i latou o e saili e mulimuli ia Iesu Keriso, e mafai ona manumalo i na uunaiga: “Ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou” (Iakopo 4:7–8). Faatasi ma le loto finafinau, e mafai e tagata taitoatasi ona suia tulaga toilalo e avea ma manumalo, pe a a’oa’oina i latou mai a latou mea sese.

E toatele tagata ua i ai le agaga e faatusatusa i latou i isi, i se tulaga le lelei, vaai atu i le tulaga atoatoa i isi, a o latou iloaina ma le tiga o latou lava vaivaiga. O se tasi o fomai faapitoa na ia manatuaina le galulue ai ma ni uo tamaitai se toalua, o e na mafatia mai le loto nutimomoia ma le leai o se talitonuga ia te ia lava. Sa le iloaina e se tasi o i laua, o lo o maua e le isi le fesoasoaniga, ae sa tauina mai e i laua uma le tala e tai tutusa lelei lava: “Soo se taimi lava ou te alu ai i le fale o la’u uo, e masani lava ona foliga mai ua ia mauaina mea uma. O lona fale e maopoopo lona faatulagaina, o lana fanau e amio lelei, ma e foliga mai o lo o faafoeina lelei lona olaga. I le faatusatusa atu i ai, ou te faalogo atu ua pei ua ou masofasofa. O le fale ua pei se faatafuga, o tamaiti e matautia, ma e ou te tauivi lava tau lava ia sagatonu pea lo’u mafaufau. Ina ua mavae ni nai asiasiga, na iloa ai e le fomai o lo o talanoa ia tamaitai e uiga ia i laua lava. Ua taufai vaai atu le tasi i le isi ua toeititi atoatoa, ae o le isi ua vaai ifo ia te ia lava, o se tagata e matua le atoatoa lava.

O le isi faafitauli taatele i faaipoipoga taufaaletonu, e aofia ai tane ma ava o e e le vaai ifo i sese o le tagata lava ia, ae taula’i atu i faaletonu moni po o faaletonu ua manatu o i ai o latou taitoalua. E tele faaipoipoga e le manuia ona o tane ma ava latou te faia le tulaga lea seia o’o i le tulaga ua le faamalieina ma le fiafia ai le tasi i le isi. E masani lava o se faiga lelei le iloa ma foia faafitauli faale-tagata lava ia, nai lo le saili e suia le amio a le isi o le toalua.

E manaomia ona manatua e ulugalii, e leai se tagata soifua e atoatoa; o le tulaga atoatoa, e manaomia ai se taimi umi. O Elder Russell M. Nelson o le Korama a le Toasefululua, na fautuaina tagata o le Ekalesia ina ia taumafai e faaleleia atili i aso taitasi, faaauau i le onosa’i: “A oo mai o tatou faaletonu, e mafai ona tatou taumafai pea e faasa’oina. E mafai ona sili atu lo tatou loto faamagalo i o tatou lava vaivaiga ma i latou tatou te alolofa i ai. E mafai ona faamafanafanaina tatou ma faapalepale.”²⁶

Gaoioiga e Aoao Ai: Alualu i Luma i se Laa e Tasi i le Taimi

Faamanatu i sui auai, o le gaoioiga muamua na faatonuina ai latou e faailoa luitau sili e lua i a latou faaipoipoga, ma se mataupu faavae se tasi pe lua e mafai ona latou galueaiina e faamalolosia ai a latou sootaga faale-faaipoipoga. Fai atu ia i latou e vaai se amioga talafeagai e mafai ona amata ona latou suia (fai ma faataitaiga, ia taofia le e’ē po o le amata ona faaalia le agaga faafetai sili atu). A latou fiafia i lena mea, valaaulia i latou e fesiligia o latou taitoalua mo ni fautuaga po o fea le faafitauli e muamua ona taulima. Peitai, aua ne’i faatagaina lenei talosaga e amataina ai ni finauga. Faamanatu ia i latou o le atoatoa o se faasologa umi, e faaauau i o tatou olaga i tala atu o le olaga faitino, ma e sili atu ona faatautaia faafitauli i le ta’itasi o laa i le taimi.²⁷ Ia fai atu ia i latou e tusi le suiga o le amio ua latou malilie e faatinoina.

O Le Olioli o Aiga Faavavau

O le Atua e pule aoao. A o sailia e tagata taitoatasi se vaaiga faale-mafaufau e faavavau i o latou aiga, ia uunaia i latou e mafaufau mo sina taimi i le matalasi o foafoaga a le Atua, ma le faamoemoega na faia ai na mea. Na fetalai le Alii i a Mose: “Ma e le mafaitaulia lalolagi ua Ou foafoaina; ma sa ou foafoaina foi i latou mo lo’u lava faamoemoe; ma o lo’u Atalii e Toatasi na Fanaua, na Ou foafoaina ai i latou. … Ma ua le mafaitaulia i latou i le tagata; ae ua faitaulia mea uma ia te a’u, aua e a a’u i latou ma ua Ou iloa i latou.” (Mose 1:33, 35). Na maofa se tasi tusitala i le matua tele o le atulaulau: “[O le Mea Vaai o le Hubble] na faasaga atu i se tasi o itu sili ona gaogao o le vanimonimo, ma taula’i atu i se vaega e pei o le tele o se fasi oneone e uuina i le mamao e tusa o le umi o le lima, ma iloa ai o lea faaputuga ma lea faaputuga o lalolagi e tusa ma le mafai e le mata ona vaaia, … e tofu lava ma le piliona o fetu.”²⁸

O le Atua lava lea na foafoaina lalolagi e le mafaitaulia ua Ia tautino mai o le fiafia e faavavau o Ana fanau o Lana galuega ma lona mamalu lea (tagai Mose 1:39). E finagalo o Ia mo i tatou, ma o tatou aiga, ia maua le fiafia i lenei olaga, ma aga’iga’i atu i le mauaina o “oa e faavavau” (MFF 78:18). E ui ina tatou lagonaina le faatauvaa i le faatusatusa atu i le manomano o foafoaga a le Atua, e ao ona tatou manatua o i tatou lava o Ana fanau. Ua ia folafola mai na te fesoasoani ma faamanuia i tatou, a o tatou tausia Ana poloaiga. E mafai ona tatou maua faamanuiaga ua saunia e le Atua mo i tatou, a o tatou usitaia feagaiga ma mulimuli i mataupu faavae o le talalelei.

O le aiga e totonugalemu i le fuafuaga a le talalelei. Na a’oa’o mai Peresitene Gordon B. Hinckley:

“Na faauuina e le Alii e tatau ona tatou faaipoipo, ma ia tatou nonofo faatasi i le alofa ma le filemu ma le fealofani, ma ia maua ni a tatou fanau ma tausia i latou i Ona ala. …

“A uma loa ona fai atu ma faia na mea uma, o le uiga atoatoa lena o le talalelei. O le aiga o se foafoaga a le Atua. O se foafoaga faavae. O le ala e faamalosia ai le malo, o le faamalosia lea o aiga o tagata.

“Ua faamalieina a’u pe afai tatou te vaai i uiga lelei i le tasi ma le tasi, a e le o uiga leaga, o le a tele se fiafia i aiga o tatou tagata. O le a faaitiitia le tete’a, faaitiitia le le faamaoni, faaitiitia le ita ma lagona le lelei ma le femisaa’i. O le a tele le loto faamagalo, tele le alofa, tele le filemu, ma tele le fiafia. O le mea lea e finagalo ai le Alii.”²⁹

O le avea ma soo, e o’o mai ai le taitaiga faalelagi i vaega uma o le olaga, e aofia ai le avea ma se tane ma se ava lelei.

Auala e Taialaina ai e Feagaiga ia le Amio

E masani ona osia e tagata o le Ekalesia feagaiga ma le Alii. O lo o faailoa atu i le lisi lenei auala e taialaina ai e feagaiga nisi o amioga. E tele le aafiaga e ono o’o mai e ala i nei feagaiga. O le tausisia o le feagaiga o le papatisoga lava ia, o le a foia ai le tele o faafitauli i le faaipoipoga.

Papatisoga

(Tagai 2 Nifae 31:17–21; Mosaea 18:8–10; MFF 20:37; Mataupu Faavae o le Faatuatua 1:4.)

Tauave i luga o se tasi le suafa o Iesu Keriso.
Tu atu e fai ma molimau mo Iesu Keriso.
Tausia o poloaiga i taimi uma.
Ia faamama i avega a isi, faanoanoa faatasi ma e faanoanoa, faamafanafana i e manaomia le faamafanafanaga.
Faailoa le naunau e auauna i le Atua i le olaga atoa.
Faaalia le salamo mo agasala.

Faamanatuga

(Tagai 3 Nifae 18:28–29; Moronae 4, 5; MF&F 20:75–79; 27:2; 46:4.)

Faafou feagaiga o le papatisoga.
Toe tautino atu e tauave i ou luga le suafa o Keriso, manatua pea o Ia, ma tausia Ana poloaiga.

Tautoga ma le Feagaiga o le Perisitua

(Tagai Iakopo 1:19; MF&F 84:33–44; 107:31.)

Faalautele valaauga e ala i le faataunuuina o tiutetauave o le perisitua.
Aoao atu le Afioga a le Atua, ma galue punoua’i e tulei i luma ia faamoemoega o le Alii.
Ia usitai; ia maua se silafia o le talalelei, ma ia ola e tusa ma lena silafia.
Auauna atu i isi, ma galue ina ia faamanuiaina o latou olaga.

Faaeega Paia o le Malumalu

“Ia usitaia le tulafono o le mama a’ia’i ma le legavia, ia loto foa’i, agalelei, faapalepale ma mama; i le tuuto atu atoa o taleni ma ‘oa faaletino i le faasalalauina o le upu moni ma le siitiaina o le aiga o tagata; ina ia faatumauina le tuuto atu i le upu moni, ma ia saili i auala uma e tuuina atu ai le sauniuniga sili ina ia saunia le lalolagi e talia lona Tupu,–o le Alii o Iesu Keriso” (James E. Talmage, House of the Lord [Salt Lake City: Bookcraft, 1962] 84).

Faaipoipoga Faaselesitila

Ia alofa i le toalua, ma tumau i le faamaoni ia te ia ma le Atua e oo i le faavavau atoa.
Ola i auala e fesoasoani ai ia maua se olaga faale-aiga fiafia, ma galue ia faamanuiaina le toalua ma le fanau.
“Ia fanafanau ia, ma ia uluola, ma ia tumu ai le lalolagi” (Kenese 1:28).