« ឯកសារណែនាំ ៖ ការជ្រើសរើស និងការរៀបចំភាពជាអ្នកដឹកនាំរបស់សិស្សក្នុងថ្នាក់សិក្ខាសាលា » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

ការគ្រប់គ្រងថ្នាក់រៀន

ឯកសារណែនាំ ៖ ការជ្រើសរើស និងការរៀបចំភាពជាអ្នកដឹកនាំរបស់សិស្សក្នុងថ្នាក់សិក្ខាសាលា ។

« គ្រូបង្រៀនថ្នាក់សិក្ខាសាលាអាចជ្រើសរើសអ្នកកាន់តំណែងក្នុងថ្នាក់ដូចជាប្រធានថ្នាក់ម្នាក់ អនុប្រធានថ្នាក់ម្នាក់ និងលេខាម្នាក់ ។ ជាដំបូង គ្រូបង្រៀនទាក់ទងទៅឪពុកម្ដាយរបស់សិស្ស និងប៊ីស្សពស្នើសុំការអនុម័ត ។ គ្រូបង្រៀនប្រកាសអំពីអ្នកកាន់តំណែងក្នុងថ្នាក់ ប៉ុន្តែពួកគេមិនត្រូវបានគាំទ្រ ឬធ្វើពិធីញែកចេញទេ ។ ពួកគេអាចជួយគ្រូបង្រៀនជាមួយនឹងកិច្ចការនៅក្នុងថ្នាក់រៀនតាមទម្លាប់ ហើយលើកទឹកចិត្តសិស្សផ្សេងទៀតឲ្យមករៀន និងចូលរួម » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ វគ្គ ១៥.១.៤ នៅត្រឹមថ្ងៃទី២៨ ខែសីហា ឆ្នាំ២០២៣ ) ។ ដើម្បីជួយពង្រឹងការប្រែចិត្តជឿរបស់សិស្សទៅលើព្រះយេស៊ូវគ្រីស្ទ អ្នកដឹកនាំសិស្សក្នុងថ្នាក់សិក្ខាសាលាអាចនឹងជួយគ្រូបង្រៀនធ្វើកិច្ចការដូចខាងក្រោម ៖

រក្សាឲ្យមានព្រះវិញ្ញាណសមរម្យក្នុងថ្នាក់ ។
លើកទឹកចិត្តឲ្យចុះឈ្មោះចូលរៀន និងចូលរួមក្នុងថ្នាក់សិក្ខាសាលា ។
បង្កើតទម្លាប់វិជ្ជមាន ។

សិស្សទាំងប្រុសទាំងស្រីអាចបម្រើទៅតាមសមត្ថភាពណាមួយក្នុងនាមជាអ្នកកាន់តំណែងនៅក្នុងថ្នាក់ ។

អ្នកកាន់តំណែងក្នុងថ្នាក់នឹងធ្វើការមានប្រសិទ្ធភាពបំផុត នៅពេលដែលពួកគេទទួលបានការណែនាំ និងការបំពាក់បំប៉ន អំពីទំនួលខុសត្រូវរបស់ពួកគេនៅពេលចាប់ផ្តើម និងក្នុងអំឡុងពេលបំពេញការចាត់តាំងរបស់ពួកគេ ។ ការណ៍នេះអាចធ្វើបានក្នុងអំឡុងពេលប្រជុំក្រុមដ៏ខ្លីមួយជាមួយគ្រូបង្រៀនដែលធ្វើឡើងភ្លាមៗមុនពេល ឬក្រោយពេលបង្រៀន ឬដោយការចែកចាយបញ្ជីនៃការចាត់តាំង តួនាទី និងទំនួលខុសត្រូវរបស់ពួកគេយ៉ាងត្រឹមត្រូវ ។ ការប្រាស្រ័យទាក់ទងជាបន្តបន្ទាប់រវាងគ្រូបង្រៀន និងអ្នកកាន់តំណែងក្នុងថ្នាក់ក៏នឹងមានប្រយោជន៍ផងដែរ ។

អ្នកកាន់តំណែងក្នុងថ្នាក់អាចត្រូវបានផ្លាស់ប្តូរទៅតាមពេលវេលាពេញមួយឆ្នាំសិក្សាទៅតាមពេលឈប់សម្រាកវិស្សមកាល ដើម្បីអនុញ្ញាតឲ្យសិស្សកាន់តែច្រើនមានឱកាសបម្រើ ។

គ្រូបង្រៀនគួរតែសរសើរ និងអរគុណអ្នកកាន់តំណែងក្នុងថ្នាក់ជាទៀងទាត់ចំពោះកិច្ចខិតខំប្រឹងប្រែងរបស់ពួកគេ ។

អ្នកកាន់តំណែងក្នុងថ្នាក់អាចផ្ដល់ការបម្រើតាមមធ្យោបាយជាច្រើន ដើម្បីបង្កើនបទពិសោធន៍ដល់សិស្សក្នុងថ្នាក់ ។ នេះជាបញ្ជីនៃទំនួលខុសត្រូវមួយចំនួន ៖

ស្វាគមន៍សិស្សដទៃទៀតមកកាន់ថ្នាក់រៀន ។
ដឹកនាំថ្នាក់ ។
លើកទឹកចិត្តសិស្សក្នុងថ្នាក់ឲ្យចាប់ផ្ដើមទាន់ពេល ។
ការប្រជុំធម្មនិដ្ឋាន—ជួយក្នុងការរៀបចំ ដាក់កាលវិភាគ និងជាអ្នករំឭក ។
រំឭកសិស្សដទៃទៀតអំពីព្រឹត្តិការណ៍សំខាន់ៗរបស់ថ្នាក់ ការចាត់តាំង ការរៀបចំ និងការតាមដាន ។
ចំណេះចំណានខាងគោលលទ្ធិ ។
ធ្វើការងារបម្រើដល់សិស្សដទៃ ។
ការដាក់គោលដៅ និងរំឭក/គាំទ្រ ។
ធ្វើជាគំរូល្អ ។
អធិស្ឋានដើម្បីដឹងដោយខ្លួនឯងពីរបៀបដើម្បីបម្រើសមាជិកក្នុងថ្នាក់ និងព្រះអម្ចាស់ ។

សាច់រឿង—តើវាអាចមើលទៅមានលក្ខណៈបែបណា ៖

នៅដើមឆ្នាំ ៖

នៅចុងសប្ដាហ៍ទីមួយនៃឆ្នាំសិក្សាថ្មីនេះបងស្រី រ៉ូចាស បានអធិស្ឋានស្វែងរកសិស្សបីនាក់ ដែលគាត់មានអារម្មណ៍ថា នឹងក្លាយជាអ្នកដឹកនាំក្នុងថ្នាក់ដ៏ល្អ ៖ អ៊ីស្សាប៊ែលឡា ក្លេមិនថ៍ ជាប្រធានថ្នាក់ យ៉ាកុប ស្មីធ ជាអនុប្រធាន និង សារ៉ា អាបារ៉ា ជាលេខា ។ គាត់បានទូរសព្ទទៅឪពុកម្តាយ និងប៊ីស្សពរបស់ពួកគេម្នាក់ៗដើម្បីសុំការអនុម័តឲ្យសិស្សទទួលយកការចាត់តាំងនោះ ។

ការទាក់ទងឪពុកម្តាយ និងប៊ីស្សព ៖

បងស្រី រ៉ូចាស ទូរសព្ទទៅម្តាយរបស់ អ៊ីស្សាប៊ែលឡា ហើយនិយាយថា « ជម្រាបសួរ បងស្រី ក្លេមិនថ៍ ! ខ្ញុំឈ្មោះ រ៉ូចាស ជាគ្រូបង្រៀនថ្នាក់សិក្ខាសាលារបស់ អ៊ីស្សាប៊ែលឡា ។ ខ្ញុំមានចំណាប់អារម្មណ៍សុំឲ្យនាងធ្វើជាប្រធានថ្នាក់របស់យើងសម្រាប់ត្រីមាសទីមួយ ។ ការណ៍នេះនឹងតម្រូវឲ្យនាងមានទំនួលខុសត្រូវតិចតួចនៅក្នុងថ្នាក់របស់យើងក្នុងអំឡុងពេលវគ្គសិក្សានីមួយៗ ។ តើបងពេញចិត្តឲ្យខ្ញុំសុំឲ្យ អ៊ីស្សាប៊ែលឡា បំពេញតួនាទីនេះដែរឬទេ ? » គាត់ក៏មានការសន្ទនាស្រដៀងគ្នានេះដែរ ជាមួយឪពុកម្តាយរបស់យ៉ាកុប និង សារ៉ា និងប៊ីស្សពរបស់ពួកគេម្នាក់ៗ ។

ការអញ្ជើញ និងការបំពាក់បំប៉ន ៖

បន្ទាប់ពីឪពុកម្តាយ និងប៊ីស្សពម្នាក់ៗបានយល់ព្រមហើយ បងស្រី រ៉ូចាស ទុកពេលវេលាក្នុងអំឡុងពេលម៉ោងបង្រៀនលើកក្រោយ ដើម្បីឲ្យសិស្សធ្វើការលើការចាត់តាំងជាមួយដៃគូម្នាក់ ។ ក្នុងអំឡុងពេលនេះគាត់បានសុំឲ្យ អ៊ីស្សាប៊ែលឡា យ៉ាកុប និង សារ៉ា ឈានជើងមកខាងមុខម្នាក់ម្តងៗ ដើម្បីអញ្ជើញពួកគេឲ្យធ្វើជាអ្នកកាន់តំណែងក្នុងថ្នាក់ ហើយបានផ្ដល់ឯកសារតួនាទីដែលមានចែងអំពីទំនួលខុសត្រូវឲ្យពួកគេសិក្សា ។ បន្ទាប់មក គាត់អញ្ជើញសិស្សទាំងបីនាក់ឲ្យមកថ្នាក់រៀន ១៥នាទីមុន ដើម្បីពួកគេអាចពិភាក្សាអំពីទំនួលខុសត្រូវ និងឆ្លើយសំណួរណាមួយ ។

អ្នកកាន់តំណែងក្នុងថ្នាក់បានមកដល់ ១៥នាទីមុនថ្នាក់លើកក្រោយ ហើយពួកគេពិភាក្សាអំពីឯកសារតួនាទីដែលពួកគេបានទទួល ហើយបានសួរបងស្រី រ៉ូចាស អំពីសំណួរដែលពួកគេមានអំពីការចាត់តាំងរបស់ពួកគេ ។ បងស្រីរ៉ូចាស សុំឲ្យ អ៊ីស្សាប៊ែលឡា ដឹកនាំថ្នាក់ថ្ងៃនេះ ហើយឲ្យចំណុចមួយចំនួនដែលត្រូវនិយាយ ដើម្បីសម្រួលដល់បទពិសោធន៍នេះ ។

វគ្គសិក្សាដំបូងបន្ទាប់ពីការបំពាក់បំប៉ន ៖

បន្ទាប់ពីកិច្ចប្រជុំបំពាក់បំប៉នដោយសង្ខេប បងស្រី រ៉ូចាស បានណែនាំខ្លួន អ៊ីស្សាប៊ែលឡា យ៉ាកុប និង សារ៉ា ជាអ្នកកាន់តំណែងក្នុងថ្នាក់ ។ នៅពេលគាត់ណែនាំពួកគេទៅសិស្សផ្សេងទៀត គាត់បានពន្យល់ខ្លីៗពីតួនាទីរបស់ពួកគេ ហើយបន្ទាប់មកប្រគល់ពេលវេលាទៅឲ្យ អ៊ីស្សាប៊ែលឡា ដើម្បីចាប់ផ្តើមថ្នាក់រៀនជាមួយនឹងសេចក្តីប្រកាស និងអំពីការប្រជុំធម្មនិដ្ឋាន ។

ក្នុងរយៈពេលពេញមួយត្រីមាស ៖

ជារឿយៗ បងស្រី រ៉ូចាស រិះរកវិធីដើម្បីអរគុណដល់អ្នកកាន់តំណែងក្នុងថ្នាក់ និងបន្តបំពាក់បំប៉នពួកគេក្នុងអំឡុងពេលប្រជុំខ្លីៗពីមុន និងក្រោយថ្នាក់រៀន ។ អ្នកកាន់តំណែងក្នុងថ្នាក់កាន់តែមានភាពងាយស្រួលក្នុងការបំពេញការទទួលខុសត្រូវរបស់ពួកគេ ហើយពួកគេបំពេញភារកិច្ចទាំងនោះបានល្អ ។ ពួកគេប្ដូរវេនគ្នាស្វាគមន៍សិស្សចូលមកថ្នាក់ ហើយចាប់ផ្ដើមថ្នាក់ ។ សារ៉ា ធ្វើកិច្ចការបានល្អក្នុងការរំឭកសិស្សផ្សេងទៀត នៅពេលដែលវាជាវេនរបស់ពួកគេដើម្បីផ្តល់ការប្រជុំធម្មនិដ្ឋាន ។ យ៉ាកុប ប្រឹងប្រែងយ៉ាងខ្លាំងដើម្បីប្រាកដថា មនុស្សគ្រប់គ្នាមានអារម្មណ៍ស្វាគមន៍ និងត្រូវការ ។ អ៊ីស្សាប៊ែលឡា តែងតែចែកចាយការណ៍នានាពីការសិក្សាផ្ទាល់ខ្លួនរបស់នាង ហើយលើកទឹកចិត្តមិត្តរួមថ្នាក់របស់នាងឲ្យបន្តធ្វើការលើគោលដៅសិក្សារបស់ពួកគេ ។ ពេលខ្លះអ្នកកាន់តំណែងក្នុងថ្នាក់ផ្តល់យោបល់ដល់បងស្រី រ៉ូចាស អំពីរបៀបដែលអាចកែលម្អថ្នាក់បាន ឬនៅពេលដែលពួកគេកត់សម្គាល់ឃើញសិស្សម្នាក់កំពុងមានការលំបាក ។ ពួកគេក៏ស្វែងរកវិធីប្រកបដោយការអធិស្ឋានដើម្បីធ្វើជាមិត្តភក្តិ និងជួយដល់មិត្តរួមថ្នាក់របស់ពួកគេផងដែរ ។

នៅចុងបញ្ចប់នៃត្រីមាស ៖

បងស្រី រ៉ូចាស សម្រេចតែងតាំងអ្នកកាន់តំណែងក្នុងថ្នាក់ថ្មីដើម្បីផ្តល់ឱកាសឲ្យសិស្សដទៃទៀតដឹកនាំ ។ គាត់ធ្វើតាមដំណើរការដូចគ្នានឹងលើកមុនដែរ ដើម្បីអញ្ជើញសិស្សថ្មីបីនាក់ទៀតឲ្យធ្វើជាអ្នកកាន់តំណែងក្នុងថ្នាក់សម្រាប់ត្រីមាសក្រោយ ។ ក្នុងអំឡុងពេលថ្នាក់ចុងក្រោយនៃវគ្គសិក្សាបងស្រី រ៉ូចាស ហៅអ៊ីស្សាប៊ែលឡា យ៉ាកុប និង សារ៉ា ឲ្យឡើងទៅមុខថ្នាក់រៀន ហើយអរគុណពួកគេចំពោះការខិតខំរបស់ពួកគេ ។ បន្ទាប់មក គាត់ណែនាំអ្នកកាន់តំណែងថ្មីក្នុងថ្នាក់សម្រាប់ត្រីមាសបន្ទាប់ទៀត ។