« ជំនាញ ៖ ជួយសិស្សស្វែងរកដំណោះស្រាយចំពោះភាពយឺតយ៉ាវរបស់ពួកគេ » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

ការគ្រប់គ្រងថ្នាក់រៀន

ជំនាញ ៖ ជួយសិស្សស្វែងរកដំណោះស្រាយចំពោះភាពយឺតយ៉ាវរបស់ពួកគេ ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ )

តើអ្នកអាចធ្វើអ្វីខ្លះដើម្បីជួយសិស្សស្វែងរកដំណោះស្រាយដោយខ្លួនឯងចំពោះភាពយឺតយ៉ាវ ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

ពេលគ្រូបង្រៀនយល់ពីមូលហេតុដែលសិស្សម្នាក់មករៀនយឺត នោះគាត់អាចអញ្ជើញសិស្សឲ្យស្វែងរកមធ្យោបាយមករៀនឲ្យបានទាន់ពេលវេលា ។ វិធីមួយដើម្បីធ្វើបែបនេះគឺដោយការសួរសំណួរដែលអញ្ជើញសិស្សឲ្យស្វែងរកដំណោះស្រាយផ្ទាល់ខ្លួនដើម្បីមកឲ្យទាន់ពេល ។ ឧទាហរណ៍នៃសំណួរទាំងនេះអាចរួមមានដូចខាងក្រោម ៖

តើប្អូនអាចគិតពីវិធីមួយ ដែលអាចជួយប្អូនឲ្យមកថ្នាក់រៀនបានទាន់ពេលដែរឬទេ ?
តើមានវិធីពីរ ឬបីដែលយើងអាចធ្វើបាន ដើម្បីជួយប្អូនឲ្យមករៀនមុនម៉ោងដែរឬទេ ?

ប្រសិនបើសិស្សមិនអាចគិតឃើញពីដំណោះស្រាយណាមួយទេ វាមិនថ្វីនោះទេ ក្នុងកាលដែលយើងចែកចាយគំនិតពីរបីដើម្បីធ្វើឲ្យសិស្សគិតឃើញ ហើយសួរថាតើគំនិតទាំងនោះមានប្រយោជន៍ឬទេ ។ នៅពេលសិស្សមានដំណោះស្រាយដោយខ្លួនឯង នោះពួកគេនឹងកាន់តែមានឆន្ទៈក្នុងការកែលម្អការមករៀនរបស់ពួកគេឲ្យបានទាន់ពេលវេលា ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

ខណៈពេលកំពុងនិយាយជាមួយ ឆាលី ហើយរកឃើញថាគាត់តែងតែមកយឺត ព្រោះប៉ារបស់គាត់គេងហួសម៉ោង នោះបងស្រី អាល់វ៉ារ៉ាដូ បានសួរថា « ឆាលី តើមានអ្វីដែលប្អូនអាចធ្វើបានដើម្បីមករៀនទាន់ពេលឬទេ ? »

ឆាលី ឆ្លើយតបថា « មែនហើយ ខ្ញុំអាចទៅសូមម៉ាក់របស់ខ្ញុំឲ្យជូនខ្ញុំមករៀន ឬនិយាយជាមួយប៉ារបស់ខ្ញុំឲ្យគាត់ជួយជូនខ្ញុំមករៀនឲ្យទាន់ពេល » ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមសរសេរសំណួរមួយដើម្បីជួយសិស្សទាំងនេះឲ្យរកដំណោះស្រាយចំពោះភាពយឺតយ៉ាវនៅក្នុងស្ថានភាពដូចខាងក្រោម ៖

អ្នករកឃើញថា កាតាលីណា មកយឺតព្រោះនាងភ្លេចបើកសំឡេងនាឡិការោទ៍នៅពេលយប់ ។
អ្នករកឃើញថាយ៉ារ៉ុម មកយឺតព្រោះជាធម្មតាថ្នាក់តែងចាប់ផ្តើមយឺតសឹងតែដប់នាទីក្រោយម៉ោងដែលត្រូវចាប់ផ្តើមរៀន ។

ជញ្ជឹងគិត ឬពិភាក្សា ៖

ហេតុអ្វីបានជាវាសំខាន់ក្នុងការជួយសិស្សឲ្យស្វែងរកដំណោះស្រាយចំពោះភាពយឺតយ៉ាវផ្ទាល់ខ្លួនរបស់ពួកគេ ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

សូមគិតអំពីស្ថានភាពមួយនៅក្នុងថ្នាក់របស់អ្នកដែលសិស្សម្នាក់បានមកយឺត ។ បន្ទាប់ពីបានរកឃើញមូលហេតុដែលសិស្សមកយឺតហើយ សូមសួរសំណួរមួយដល់ពួកគេឲ្យស្វែងរកដំណោះស្រាយផ្ទាល់ខ្លួនដើម្បីមករៀនឲ្យបានទាន់ពេល ។