Reirei iaon Iesu Kristo n Aki Taraaki bwa Tera ae Ko Angareirei Iaona

A rangi ni mwaiti bwaai aika ana reireiaki n ana euangkerio Iesu Kristo ae kaokaki—moan tua, tuua, taetae ni burabeti, ao karaki man koroboki aika a tabu. Ma aikai ni kabane bon taian mwaanga man te aroka ae ti teuana, bwa ti teuana ni kabane te kantaninga iai: bwa ti na buokiia aomata nako n roko nakon Kristo ao ni kakororaoaki Irouna (taraa Iarom 1:11; Moronaai 10:32). Ngaia are n aki taraaki bwa tera ae ko angareirei iaona, uringa ae ko bon reirei raoi iaon Iesu Kristo ao ni kanga n riki n ai Arona. Te Tamnei ae Raoiroi e kona ni buokiko n reiakina ataakin te koaua iaon te Tia Kamaiu ao mwaakan Ana kamaiu inanon nako moan tuua n te euangkerio, taian tua, ao reirei iaon taetae ni burabeti (taraa Iakobwa 7:10–11).

Ko angareirei iaon taekan te anga karea? Iangoia n rinanona ma taan reiakinaki bwa e kanga te anga karea are ti karaoi ni kairii nanora nakon ana anga karea te Tia Kamaiu ae “akea tiana ao akea tokina” (Aramwa 34:10). Ko angareirei iaon taekan te katiteuanaaki? Iangoia ni maroroakina katiteuanakin Iesu Kristo are e reke ma Tamana ao Ana kakao nakoira bwa ti na riki n teuana ma Ngaiia (taraa Ioane 17). Tarai ni kabane atuun rongorongo n te euangkerio bwa reken te tai n angareirei ao n reirei iaon Iesu Kristo.

Ni kabane tuua a karekea naba te tai aei. Tai tii kabotoa am taratara iaon tuan te euangkerio—reiakina naba aron te Tia Anga te Tua. Ngkana ko marooro iaon Tuan te Mauri ao n toki iaon baike a riai ni karaoaki ao ake a na aaki ibukin te marurung, e na bua am tai ni iangoa raoi nanon ana mwamwannano Iesu Kristo ibukira—ni maiun tamneira ao n rabwatara—n anganiira te tua aei. Katuruturua bwa e kanga aron ingaingan ao tauraoin te Tia Kamaiu ni kakabwaiaira ma Mwaakana ni buokiira ni maiuakina Ana tua. Ni kabane tuua are E anganiira e kaota nakoira Ana iango ao ana kantaninga ao nanona—kunea te kimwareirei n ikotaki n ukoukora aei!

Katuruturua bannan Iesu Kristo

Ti kona ni katuka Iesu Kristo bwa boton te angareirei ao te reirei man kinaakin ao katuruturuan ae Ngaia bon te banna ni katooto ae kororaoi n tuan nako te euangkerio. Ngkai ngaira taan iriiria, ti bon aki ti tou mwiin taian tua—ti iriira Iesu Kristo. Ngkai ti kabotoa ara taratara iaon bannan te Tia Kamaiu ae kororaoi, te Tamnei ae Raoiroi e na kaota Koauana ao ni kaungaira bwa ti na Iriiria.

Iangoia tabeua te tai ae ko angareirei iaon tuan te teimatoa ni karokoa te toki. Te marooro iaon ae e kanga te Tia Kamaiu n riki bwa te banna ni katooto n te teimatoa ni karokoa te toki e kona n uota te namakin ni karinerine ae tamaroa Ibukina. Tera ae a kona n reiakinna koraki ake ko reireiniia ao n namakinna man Ana katooto?

Te Tia Kamaiu e katea te banna ni katooto ae kororaoi ibukira ni kabane. E Kamaiuia Ni Kabane, iroun Michael Malm

Reirei iaon Arana, Mwiokoana, ao Anuan Iesu Kristo

E mwaiti te ara ae e weteaki iai Iesu Kristo inanon booki aika tabu. Arana n tatabeua nako a bon kaota aron Mwiokoana n Ana babaire te Atua ao n reireiniira iaon Anuana ae mai iroun te Atua. Ko na bae ni iangoia ni ukoria ma taan reiakinaki bwa tera te ara n aron Ana Tiibu te Tei te Atua, te Tia Tei Ibukira, te Tia Kakoroa Ara Onimaki, ao Ootan te Aonaaba ae a reireiniira iaon Iesu Kristo. Ao riki, ngkai ko buokiia taan reiakinaki bwa a na ataa ae mwaiti riki iaon te Tia Kamaiu, reirei riki n ae riaon are E taekinna ao ni karaoia bwa antai Ngaia ao teraa mwiokoana ae E tangiria ni karaoia inanon maiura. Ngkai kam uaia n reiakina aroaron ao anuan te Tia Kamaiu, te Tamnei ae Raoiroi e na kananoa mataatam ao am tangira Ibukina.

Kakaei Kanikina Ake a Kaota Koauan Iesu Kristo

“Bwaai ni kabane,” e taku te Uea, “a karikaki ao ni karaoaki bwa a na kaota taekau” (Mote 6:63; taraa naba 2 Nibwaai 11:4). Ma te koaua anne n ara iango, ti kona n reiakinna n noori kanikinaa aika mwaiti inanon koroboki aika a tabu ake a taekina kakoauaan te Tia Kamaiu. Kanikinaa aikai bon bwaai n aron te kariki, te ran, ao te oota. N te tai are ti mataata iai bwa a kanga bwaai aikai n irekereke nakon te Tia Kamaiu, a kona n reireiniira iaon Mwaakana ao anuan Kristo. Ko kona naba ni kunei waaki aika titearona ni maiun te Tia Kamaiu ao maiuiia burabeti ao tabeman mwaane ao aine aika a kakaonimaki inanon koroboki aika a tabu. Ukoukoran kanikinaa a kaotii koauan te Tia Kamaiu n taabo ake ko bae n naki noori iai.