“Buokiia Taan Reiakinaki n Roko nakon Iesu,” Reirei n ana Kawai te Tia Kamaiu: Ibukiia ni Kabane Naake a Angareirei n te Mweenga ao n te Ekaretia (2022)
“Buokiia Taan Reiakinaki n Roko nakon Iesu Kristo,” Reirei n ana Kawai te Tia Kamaiu
Ngkai tia reirei n Ana euangkerio Iesu Kristo, ti buokiia aomata ni mataata ao ni katan iaon Ana reirei, mwaakana, ao ana tangira.
Buokiia Taan Reiakinaki n Roko nakon Iesu Kristo
Akea te bwai ae ko karaoia ngkai te tia reirei ngkoe ae e na kakabwaiaia taan reiakinaki nakon riki ae ko buokiia n ataa Tamara are i Karawa ao Iesu Kristo ao n namakina Aia tangira (taraa Ioane 17:3). Iangoi am taneiai ake a atia ni buokiko n roko n ataa ao n tangira Tamara are i Karawa ao Iesu Kristo. Tera ae ko a tia ni karaoia n reiakina aron Anuaia, mwaakaia, ao aia tangira? E kanga am tangira ibukin Tamara are i Karawa ao Iesu Kristo ni uota te kimwareirei nakoim? Ngkanne iangoia bwa teraa ae e kona ni karaoia Aia tangira ao mwaakaia ibukiia naake ko reireiniia. (Taraa Aramwa 26:16; Mote 5:11.)
Tokin ara kouru n te maiu aei bon te riki n aron Tamara are i Karawa ao n oki rikaaki Nakoina. Te kawai ni kakoroan nanon te kouru anne bon te roko nakon Iesu Kristo (taraa Ioane 14:6). Aio bukin ae, te burabeti Nibwaai e reirei: “ti kaakarabakauakina Kristo, ao ti kimwareirei iroun Kristo” (2 Nibwaai 25:26).
Ni kabane natin te Atua a kainanoa te oota ao te koaua are e roko mai iroun te Tia Kamaiu ao ni kona n rineia ni kaeka nako iai. N riki bwa te tia reirei n Ana euangkerio Iesu Kristo e nanonaki bwa a na buokaki aomata ni mataata ao ni katan iaon Ana reirei, mwaakan ana kamaiu, ao ana tangira ae kororaoi. Iangoia bwa a na kanga iango aikai ni buokiko ni kaungaia aomata ni kinaa raoi Iesu Kristo ao n Ririmwiina.
Buokiia Taan Reiakinaki ni Kinaa ana Tangira, Mwaakan, ao Ana Nanoanga te Uea inanoni Maiuia
E tamaroa ataakin Ana tangira te Tia Kamaiu, mwaakana, ao ana nanoanga, ma ti kainanoia naba n namakinna ibon iroura. Noran ae E kanga ni kakabwaiaiia ao ni kamaiuiia aomata ake inanon koroboki aika a tabu e buokiira ni karikirakea te onimaki ae E boni kona naba ni kakabwaiaira ao ni kamaiuira. Te katooto, reiakinan ana taneiai Taniera e bon aki bwanin ngkana e aki anganiira kaungakiira n onimakina te Uea ngkana ti a kaitarai ae kanga ai aron ara oo n raian.
Ngkai ko buokiia taan reiakinaki ni kinaa ana “nanoanga” te Uea (1 Nibwaai 1:20), ake inanon koroboki aika a tabu ao n oin aia taneiai, a na namakinna ao n ataia ae e memena te Uea irarikiia ao E na tei irarikiia ma te tangira (taraa Reirei ao Berita aika Tabu 68:6.). A na kona n nora ao n namakina koauan Ana tangira ao ana nanoanga te Uea inanon tain aia kangaanga ao n te bwai are a rinanona.
Taan reirei a kona ni buokiia taan reiakinaki n namakina Ana tangira, mwaakan, ao ana nanoanga te Tia Kamaiu.
Buokiia Taan Reiakinaki ni Kakorakorai aia Reitaki ma Tamara are i Karawa ao Iesu Kristo
Te kantaninga n reiakinan ao kamatebwaian aron Iesu Kristo bon buokaia aomata nako n roko ni kaaniaki riki Nakoina ao Tamara are i Karawa. Buokiia aomata ake ko reireiniia bwa a na aki kabuaa te kantaninga anne. Kaungaia bwa a na kakorakoraa aia reitaki ma Tamaia are i Karawa ao Iesu Kristo man kamatebwaian koroboki aika a tabu, reitinako n rairannano, taetae ma te Tama n te tataro, ao ni kaota koauan te Tama ao te Nati. Reireiniia taan reiakinaki n te taetae ao n te katooto bwa a na kanga ni karaoi ao n kawakin berita ake a kabaeira Nakoia. Buokiia bwa a na ataia bwa ti kanga ni kakawaki ao n tangiraki Irouia. Kakorakoraa aia onimaki bwa Iesu Kristo, man raoiroin Ana Mwakuri ni Kamaiu ae kororaoi, bon ti te kawai n oki rikaaki nakon te Tama. Katauraoi taai ibukiia taan reiakinaki ni karekea te kakoaua mai irouin te Tamnei ae Raoiroi, “are kaota koauan te Tama ao te Nati” (Mote 5:9).
Buokiia Taan Reiakinaki n Tangiria mai Inanoia ni Kekeiaki n Riki n ai Aron Iesu Kristo
N tokin te tai, reiakinan aron Iesu Kristo e karekea kairakira iroun te tamnei bwa ti na riki n ai Arona. Ma te riki n ai Arona e tii reke ngkana ti mwakuri n te onimaki, n tain ke itinanikun te kiraati, ni karaoan are mai inanora n rineia n iriira Ana banna ni katooto ao ni karekea Ana akoi. Kaoiia taan reiakinaki bwa a na ukora ana buoka te Tamnei ae Raoiroi ni kinai kawai are a na kona iai n riki n ai aron te Tia Kamaiu. Anga te kairi ao te boutoka ngkai taan reiakinaki a kekeiaki ni kakaraoia inanon maiuia ni riki n ai Arona.
E reirei Iakobwa bwa “bwaai ni kabane ake a tia n anganaki aomata iroun te Atua man ni moan karikan te aonaaba” e kona n reireiniira aron Iesu Kristo (2 Nephi 11:4). Am reirei e kona n riki bwa teuana mai buakon bwaai akanne. Karika Iesu Kristo bwa boton reirei nako ao inanon bwaai aika a karaoaki. Ngkai ngkoe ao taan reiakinaki kam “kaakarabakauakina Kristo, … kimwareirei iroun Kristo, … tataekina Kristo” (2 Nibwaai 25:26), te Tamnei ae Raoiroi e kona ni katuka te kakoaua iaon te Tia Kamaiu n nene n aia iango ao nanoia aomata n tatabemaniia nako. Ngkai ko buokiia naake a reiakinaki n roko ni kinaa Tamara are i Karawa ao Iesu Kristo i bon irouiia, e na reke irouia ae a na rairaki Nakoia ibukin te buoka, te kantaninga, ao te kamaiuaki rinano nako maiuiia.