Tangiriia Naake Ko Reireiniia

Nikabane bwaai ake e karaoi te Tia Kamaiu rinanon nako Ana mwakuri iaon te aba e bon kakorakoraaki man te tangira. Ngkai ti kekeiaki n riki bwa taan iriira ni koaua Kristo, ti kona ni kaonaki ma te aeka n tangira aio (taraa Ioane 13:34–35; Moronaai 7:47–48; 8:26). Ngkana e mena i nanora ana tangira te Tia Kamaiu, ti na ukorii aanga nako ni buokiia tabeman n reiakina Kristo ao n roko Nakoina. E na riki te tangira bwa kakorakoraan nanora ibukin ara angareirei.

N Tangiriia Naake Ko Reireiniia

• Noriia taan reiakinaki n aron ana taratara te Atua nakoia.

• Ukoriia bwa ko na kinaia—n ataa aia kangaanga ae a mena inanona, kainnanoia, ao korakoraia.

• Mwanewei araia n am tataro.

• Katea te tabo ae mano ike ngaiia ni kabane a na karineaki ao n ataia bwa e bongana aia tibwatibwa.

• Kakaei kawai aika a riai n aron kaotan am tangira.

Te Tia Kamaiu E Noora te Konabwai ae Mairoun te Atua Irouia ake E Reireiniia

Angiia aomata i Ieriko a taku bwa a atai bwaai ni kabane iaon Takaio. Bon te tia koroboki ao te tia riko mwane—mataniwiia taan ikoikoti ana mwane te uea, ni koauana—ao e bon kaubwai. E ataaki, bwa n aia iango, te aomata ae e aki kokoaua ao e buakaka. Ma Iesu e taraa nanon Takaio ao E noora te aomata ae etieti ae “natin Aberaam” (taraa Ruka 19:1–10). Te Tia Kamaiu e noriia aomata tiaki n aroia ae a nooraki iai ma n ae bon ngaiia—ao n are a kona n riki nako iai. Irouia taan akawa aika aki bobo ma aomata n aron Timon, Anterea, ao Ioane, E noriia taan kairiiri n Ana Ekaretia n taai aika a na roko. Iroun te tia bwainikiriiniia aomata ae mamakaki ae Tauro, E noora “te aomata ae rineaki,” are e na tataekina Ana euangkerio imataia uea ao aaba (taraa Mwakuri 9:10–15). Ao rinanom ao aomata n tatabemaniia ake ko reireiniia, te Tia Kamaiu e noriia natin te Atua mwaane ke aine ma aia konabwai ae akea tiana.

Mai ibuakoia aomata ake ko reireiniia, e na bon bae n iai tabeman aika a taraa ni kakaonimaki ao n rairaki ao tabeman aika a taraa n aki nano iai ke a bon kakaitara. Taratara raoi bwa ko na aki karaoa bukinan temanna ni kabotoa ti iaon are ko nooria. E kona ni buokiko te Tamnei ae Raoiroi n noriia aomata n tatabemaniia n aron ana taratara te Tia Kamaiu—ao ni buokiko ni moana tangiraia n aron are E karaoia.

Titiraki ae ko na Iangoi: Iangoia aomata n tatabemaniia ake ko reireiniia, ao iangoia bwa e kanga aia namakin Tamara are i Karawa ao Iesu Kristo ibukiia n tatabemaniia. Tera ae A nooria iroun teuaane ke neienne? A kanga iango aikai n roota aron am reirei nakon te aomata anne?

Man Booki aika Tabu 1 Tamuera 16:7; Taian Areru 8:4–5; I-Rom 8:16–17; Reirei ao Berita aika Tabu 18:10–14

E Kinaira te Tia Kamaiu ao E Atai Baike a Riki Nakoira, Kainanora, ao Korakorara

Ainen Tamaria e aki roko nakon te mwanibwa bwa e na ongoraa taekan te euangkerio. E roko bwa e na itiran. Ma te Tia Kamaiu e nooria bwa takana e riaon riki te taka n rabwata. E ataia bwa iai ana kangaanga mai imwaina ao ana reitaki ae aki tamaroa. Ngaia are Iesu e anaa kainanona n rabwata are e bane riki nanona iai—te ran ae e na maiu iai—ao ni kairekerekea ma kainanona ae korakora n maiun tamneina ibukin “te ran ni kamaiu” ao “te maiu ae akea tokina.” N rabanen aia marooro, te aine e karekea ana kakoaua i bon irouna bwa Iesu bon te Kristo, kairakina n ae karako bwa e kanga Iesu ni kinaa. “[E] tuangai ba’i ni kabane ake I karaoi,” e taku. “Tiaki te Kristo Ngaia?” (taraa Ioane 4:6–29).

Te riki bwa te tia reirei n aron Kristo e raonaki ma ataakiia aomata ake ko reireiniia ao te kekeiaki n ataa te bwai are n aia iango ao inanoia. Ko kona n rangi n tabeakinii baike inanon maiuia ao ni kaota te nanoanga nakoia. Ko kona n taratarai kawai ae ko na mataata iai n aron maiuia, taarena, mamaten nanoia, ao kainnanoia. Ko kona ni kakaea bwa e kanga aron reiakinaia ae tamaroa. Ko kona n anga titiraki, kakauongo raoi, ao taraa te bwai ae riki. I aoia ni kabane, ko kona n tataro ibukin te atatai are tii te Tamnei ae e kona n anga. Kinaakin raoi te aomata, e na bon karekea ae tamaroa ni buoka teuanne ke neienne ni kunea i bon irouna nanon ao mwaakan ana euangkerio Iesu Kristo. N te tai are ko ataa iai aron batakatakan te aomata, te Tamnei e na reireiniko bwa ko na kanga ni buoka katokan te taka n ana ran ni kamaiu te Tia Kamaiu.

Titiraki aika a na Iangoaki: Tera ae ko a kaman ataia iaon te aomata are ko reireina? Tera ae moan te kakawaki irouia? Tera korakoraia? Tera te kangaanga ae a rinanona? Tera ae ko kona ni karaoia bwa ko na mataata raoi irouia?

Man Booki aika Tabu Taian Areru 139:1–5; Mataio 6:25–32; Mareko 10:17–21; Ioane 10:14; 3 Nibwaai 17:1–9

Te Tia Kamaiu E Tataro Ibukiia Naake E Reireiniia

Iangoia bwa tera ana namakin Timon Betero ngke e ongo bwa e kangai te Tia Kamaiu nakoina, “Timon, Timon, noria, e tangiria Tatan bwa ko na reke irouna, … ma I tataro i bukim, bwa e na aki toki am onimaki” (Ruka 22:31–32). E na kanga n tia n rootiko ataakin ae Iesu Kristo e tataro nakon te Tama ibukim? Aomata n rimoa n te aono n Amerika e reke irouia te aeka n taneiai ae aekakin aei, ao a kabwarabwaraa n te kawai aei: “Ao akea ae kona n iangoa te kimwareirei are e kaona tamneira n te tai are ti ongo iai bwa [Iesu] e tataro ibukira nakon te Tama” (3 Nibwaai 17:17).

Ko bae naba n iangoia bwa tera ae riki n am iango ngke ko tataro ibukin temanna—ni katoa tai, ni mwanewea arana. E kanga am tataro n roota aron am namakin ibukin te aomata anne? A kanga n roota aron am mwakuri? E koaua bwa Tamara are i Karawa e ongo ao e kaekai tataro aika a nako man te nano irouia tia reirei ake e bane nanoia ni buokiia taan reiakinaki. Ao n angiin keiti, teuana te kawai ae E kaekai tataro akanne bon man ringan nanon te tia reirei ao n angan teuanne ke neienne kairi mai iroun te tamnei bwa e na karaoi ke n taekin bwaai tabeua ake a na buoka te tia reiakinaki n namakina Ana tangira.

Titiraki aika a na Iangoaki: Ngkai ko iangoiia naake ko reireiniia, iai mai ibuakoia ae ko namakinna bwa iai kainanona ae onoti ibukin am tataro? Tera ae e kairiko iai te tamnei bwa ko na tataro ibukina ae e kaineti ibukin teuanne ke neienne? Tera kakabwaia aika a na roko ngkai ko kaoiia taan reiakinaki bwa a na tataro ibukiia n tatabemaniia?

Man Booki aika Tabu: Ioane 17; Aramwa 31:24–36; 3 Nibwaai 18:15–24; 19:19–23, 27–34

Te Tia Kamaiu E Kakoauaa bwa Nikabane Aomata a Namakinna ae a Karineaki ao a Bongana

Te anua ae bwainaki irouia taan kairiiri n te aro n ana tai Iesu bwa taan bure a na katinanikuaki. Ao ibukin aei, ngke a noora Iesu taan kairiiri bwa e reitaki ma taan bure, a rootaki n te un. E na kanga temanna ae e irekereke ma aekan aomata akanne n riki bwa te tia reirei n te maiu n tamnei?

Iesu, n aron ae e ataaki, iai ana kawai ae kaokoro. E ukoria ni kamarurungiia naake a mamaara maiun tamneia (taraa Mareko 2:15–17; Ruka 4:17–18). E aki toki ni buokiia naake a taraa ni kaokoro ma ake irarikiia ke iai aia kangaanga mai imwaina, ao E reitaki ma ake a tia ni bure. E kamoamoaa ana onimaki te tautia n Rom (taraa Mataio 8: 5–13). E wetea te tia rikoi ana mwane te uea ae aki kakoauaaki bwa temanna Ana reirei ae onimakinaki (taraa Mareko 2:14). Ngke e bukinaki te aine bwa e wene ni bure, E angan neienne te namakin ae e mano ao e kaungaa bwa e na raira nanona ao ni maiuakina te maiu ae raoiroi (taraa Ioane 8:1–11).

Ma e karaoa ae mwaiti riki Iesu nakon anne. E karikirakea te aeka n anua ni bubutimwaai ao n tangira ibuakoia taan Iriiria. Ni koauan Ana banna ni katooto e mena inanoia Ana Abotoro ngke e a roko aia tai n uota te euangkerio nakoia aomata ni kabane. E oti aio n ana taeka Betero: “Bon te koaua bwa te Atua E bon aki inanonano n tarakin aroia aomata” (Mwakuri 10:34).

E na bon bae ni iai ibuakoia naake ko weteaki bwa ko na reireiniia ae e bon inimaki n aanga tabeua n namakinna ae a karineaki ao n kabonganaaki. Te kawai n tangiriia ao ni karineiia, ko kona ni kaotia ae a aki ti butimwaeaki ma a kainanoaki. Ko kona ni kawariia naake aki rooroko, ake a korakai, ke naake a taraa n aki nano iai, n rangi n taotaonakinnano ngkana e taraa ni waeremwe te rikirake. Ko kona ni buokiia aomata nako n namakina te mano ao ni mwengaraoi n tibwaua aia tabeaianga ma naake raoia inanon te onimaki. Ao ko kona ni karaoa ae mwaiti riki nakon anne. Ko kona ni kaungaia ni kabane taan reiakinaki bwa a na buokiko ni katea te tabo are reirei aika tabu a reiakinaki n tamnein te karinerine, ni kaaina, ao n tangira.

Titiraki aika a na Iangoaki: Tera ae e na buoka te aomata n namakina te karineaki ao ni bongana? Tera ae kaira nanon te aomata ni karineia ao n tabeakiniia tabeman? Ngkai ko tataromwaaka ni iangoia aomata ake ko reireiniia, tera ae ko karekea bwa ko na karaoia bwa aonga ni kabane ni kona n namakina ae a butimwaeaki ao a kainanoaki?

Man Booki aika Tabu: Ioane 4; 2 Nibwaai 26:27–28, 33; Aramwa 1:26; 3 Nibwaai 18:22–25

Taan reirei a kona ni buokiia naake a reireiniia n namakina ae a tangiraki.

E Kaota ana Tangira te Tia Kamaiu nakoia Naake e Reireiniia

N tokin te tai ae tamaroa, ae kaunganano n te reirei ao te ibuobuoki ibuakoia Nibwaite, e nooria Iesu bwa E nang riai n nako. Iai riki aomata tabeman ae E na kawariia. “Naako okiri batami” E taku, “ao katauraoi raoi ami iango ibukin te ingabong,” Ma aomata a tii tekateka ikekei “n tang,” n taratara “iaona n te aro are kaanga a na tuangnga bwa e na tiku riki teutana irarikiia.” N namakinan kainanoia are aki taekinaki ao n “onrake n te nanoanga,” e tiku Iesu irarikiia teutana riki te tai (3 Nibwaai 17:3, 5–6). E kakabwaiai aia aoraki ao ake a karawawataaki. E katorobubua ao e tataro ma ngaiia. E tang ma ngaiia, ao E kimwareirei ma ngaiia.

Iangoia ma te tataromwaaka ni kamatebwaia ana taeka ao ana mwakuri te Tia Kamaiu n 3 Nibwaai 17. Iangoa te tangira are E kaotia ibukiia naake E reireiniia. Taratarai waaki ake a kaotaki iai Ana tangira n tabo tabeua inanon koroboki aika a tabu. Ngkanne iangoia naake ko reireiniia. Ko na kanga ni kaota am tangira ibukiia? Kaoa te Tamnei bwa e na kairiko. Ngkana ko kunea bwa e kangaanga namakinan ke kaotan te tangira ibukiia naake ko reireiniia, moana man taekinan koauan Ana tangira te Atua. Imwiina “tataro nakon te Tama ma korakoran nanom ni kabane, bwa ko na kaonaki n [ana tangira Kristo ae itiaki], are e a tia ni katoka iaoia ni kabane taan iriira Natina, are Iesu Kristo ni koaua” (Moronaai 7:48). Ao uringa bwa tabeaiangam ibukin te angareirei iaon reirei e riai n aki karika ae ko na mwaninga kaotakin te tangira rinanon am taeka ao am mwakuri. N taai nako arom ni karaoa te mwakuri nakoia aomata e bon rangi ni kakawaki n aron naba te bwai are ko reireiniia.

Titiraki aika a na Iangoaki: E kanga n tia te Tia Kamaiu ni buokiko n ataa Ana tangira ibukim? E kanga te karo ke taan reirei tabeman n tia ni buokiko n namakina Ana tangira? A ataia aomata ake ko reireiniia ae ko tangiriia? A ataia ae e tangiriia te Tia Kamaiu?

Man Booki aika Tabu: Mareko 6:31–42; Ioane 13:3–16, 34–35; 15:12–13; 1 I-Korinto 13:1–7; 1 Ioane 4:7–11

Kawai Tabeua ni Kamwakurii Baike Ko a Tia n Reiakin

• Ngkana ko reirei nakoia kaain te kiraati, reiakin araiia taan reiakinaki ao kabonganai ngkana ko angareirei.

• Kaota am kakaitau ngkana taan reiakinaki a anga aia iango.

• Reitaki ma taan reiakinaki imwaain ao imwiin am anga reirei.

• Buokiia taan reiakinaki ni karikirakea te tabo ae e mena iai te tangira ao te karinerine i bon imarenaia.

• Rangi ni kakauongo raoi—ngkana ko angareirei ao n taai riki tabeua.

• Karaoa te mwakuri ni ibuobuoki ibukiia naake ko reireiniia.

• Tatauraoi n ibita bairean am angareirei ni kabanea riki te tai iaon tuua aika kakawaki ake a bongana nakoia naake ko reireiniia.