Te Tia Kamaiu n rereuan Iutaia

N aron are e anaa te tai te Tia Kamaiu ni katauraoi ibukin Ana mwakuri, ti riai ni katauraoira n reirei ma te Tamnei.

Reirei man te Tamnei

Ngke e tua te Tia Kamaiu nakon Iotebwa Timiti ao Sidney Rigdon bwa a na tataekina Ana euangkerio, E berita nakoia, “Te Tamnei ae Raoiroi e na nako ni kaota koauan bwaai ni kabane are kam na taekinna.” (Reirei ao Berita aika Tabu 100:8; taraa naba Reirei ao Berita aika Tabu 42:15–17; 50:17–22). Te berita ae ai aron anne e kaeti naba nakoia ni kabane naake a reirei te euangkerio, ni ikotaki ma ngkoe. Ngkai ko reirei ana Euangkerio Iesu Kristo, ko kona ni karekea iroum te Tamnei ae Raoiroi ni kairiko ao ni kaota koauan te koaua nakon aia iango ao nanoia naake ko reireiniia (taraa Reirei ao Berita aika Tabu 8:2). Ko aki tiku n ti ngkoe ngkana ko reirei, bwa “tiaki ngkami ake kam taetae, ma E taetae te Tamnei ae Raoiroi” (Mareko 13:11).

Te Tamnei ae Raoiroi bon te tia reirei ni koaua. Akea te tia reirei n te maiu aei, bwa tao e rangi n rabakau ke e korakora taneiaina, ni kona n onea Mwiina n tibwangana ni kaota koauan te koaua, kakoauaa Kristo, ao ni bitii naano. Ma ni kabane tia reirei a kona n riki bwa bwaai ni mwakuri ni buokiia natin te Atua n reireiaki iroun te Tamnei.

N Reirei man te Tamnei

• Katauraoiko n te maiu n tamnei.

• Katauraoiko n tainako ni butimwaai kairiiri mai iroun te tamnei iaon kainnanoia taan reiakinaki.

• Karaoi aanga ao taai ibukiia taan reiakinaki bwa a na reiakinaki iroun te Tamnei ae Raoiroi.

• Buokiia taan reiakinaki n ukora, ni kinaa, ao ni mwakuri iaon oin aia kaotioti.

• Kaokaota am koaua n taainako, ao kaoiia taan reiakinaki bwa a na tibwaua aia namakin, taneiai, ao aia koaua.

Te Tia Kamaiu E Katauraoia n te Maiu n Tamnei Ngkana E Anga Reirei

Ni katauraoi ibukin Ana Mwakuri, Iesu e kabanea 40 te bong n te rereua ni “mena irarikin te Atua” (Ana Rairairi Iotebwa Timiti, Mataio 4:1 [inanon Mataio 4:1, footnote b]). Ma Ana katauraoi n te maiu n tamnei e a kaman moanaki mai imwaaina. Ngke e kataia Tatan ni kamwanea, E reke te konaa irouna ni katan iaon “taekan te maiu” are E a tia ni kawakinna ibukin te “tai naba arei” ngkana E a kainanoia (Reirei ao Berita aika Tabu 84:85). Iangoa oin am kekeiaki ni katauraoiko n te maiu n tamnei imwaain ae ko reirei. Tera ae ko reiakinna man Mataio 4:1–11 iaon ae ko na kanga ni iriira Ana banna ni katooto te Tia Kamaiu n am tai ni katauraoi ni maium n tamnei?

Te Tamnei bon te tia reirei ni koaua ao boton te rairaki ni koaua. Te anga reirei ae korakora n te euangkerio e kainanoa tiaki tii te katauraoi iaon te reirei ma bon katauraoam n te maiu n tamnei imwaain ae ko moana am reirei. Ngkana ko tauraoi ni maium n tamnei, ko na rangi ni kai ongo ao n iriira ana kairi te Tamnei ngkai ko angareirei. Te kawai ni kaoa te Tamnei ae Raoiroi nakon am angareirei bon Kaoakina nako nanon maiu. Aio n raonaki ma te botumwaaka ni kekeiaki ni iriira ana banna ni katooto te Tia Kamaiu ao ni maiuakina Ana euangkerio ma nanom ni kabane. Ao ibukina bwa akea mai ibuakora ae kona ni karaoa aei ma te kororaoi, e kananonaaki naba bwa ana iai te rairannano ni katoa bong.

Titiraki aika a na Iangoaki: Tera nanon aei iroum bwa ko na katauraoiko n te maiu n tamnei imwaain am angareirei? Tera ae ko namakinna bwa ko na karaoia ni katamaroa arom ni katauraoiko n te maiu n tamnei? Tera n am iango ae te katauraoi n te maiu n tamnei e kona ni karika te kaokoro n am angareirei?

Man Booki aika Tabu: Etira 7:10; Ruka 6:12; Aramwa 17:2–3, 9; Reirei ao Berita aika Tabu 11:21; 42:13–14

Te Tia Kamaiu E Tauraoi n Tainako ni Kaeka nakon Kainanoia Aomata Tabeman

Iairo, te tia taua taekan te mwaneaba, e bwaka i waen Iesu, ni bubutiia Iesu bwa e na buoka natina te aine ae e a kan mate. Iesu ma Ana reirei a kaneneia rake ibuakoia aomata bwa a na nakon ana auti Iairo ngke n te tai ae e waekoa e a tei naba Iesu. “Antai ae ringai?” E titiraki. E taraa n ae te titiraki ae e aki bo ma aongina—ngkai e karibwaaki ibuakoia aomata, ao antai ae aki Ringnga? Ma te Tia Kamaiu e ataia bwa ibuakoia aomata, iai temanna ae nakoina ma kainnanona ae onoti ao ma te onimaki ni karekea te kamarurungaki are E anga. E na bon reke te tai ni kawara natin Iairo te aine. Ma E taku moa nakon te aine are e ringnga Kunikaina, “Natiu, e na rau nanom: e kamaiuko am onimaki; naako ma te rau” (taraa Ruka 8:41–48).

Ngkai ngkoe te tia reirei, ko na bae n tabetai ni kuneko bwa ko a rangi ni kabaitii bwa e aonga ni bane te reirei are ko katauraoia. Ma e ngae ngke e kakawaki anne, kakoauaa bwa n am tai ni kabaiti ko na aki riaoa kainanon te aomata ae karina are ko reireinna. Irarikin te kairiiri n te maiu n tamnei are ko kakaea ngkai ko katauraoi n reirei, ukora naba ana kairi te Tamnei ngkai ko angareirei. Kataia bwa ko na ataa te kainano, te titiraki, ao te bwai are a nano iai taan reiakinaki. E kona ni buokiko te Tamnei ae Raoiroi n ataia ngkana te tia reiakinaki e karekea ke e mataata n te bwai are ko reirei iaona. E na anganiko te kairi, n taai tabetai, bwa ko na bita tein am reirei. Te katooto, ko na bae n namakinna bwa ko na kabanea riki te tai nakon are ko a tia ni baireia iaon te atuu ni iango ke ni katuka te marooro nakon te tai teuana ma kabanea riki iaon te bwai are e rangi ni bongana nakon te tia reiakinaki ngkai moa.

Titiraki aika a na Iangoaki: Ningai ae ko namakinna iai bwa te karo ke tia reirei tabeman a ataa kainanom ngkai te tia reiakinaki ngkoe? Ataia naake ko reireiniia ae e bane riki nanom ibukin reiakinaia nakon ae tii kabwaninan banen te reirei? Ko na kanga n reitaki n ae tamaroa n te bwai ae bane nanom iai?

Man Booki aika Tabu: 1 Betero 3:15; Aramwa 32:1–9; 40:1; 41:1; 42:1

Te Tia Kamaiu E Katauraoi Taai ibukiia Aomata bwa a na Reireiaki iroun te Tamnei ae Raoiroi

Moan te kangaanga irouia aika a mwaiti n ana tai Iesu n ataia bwa antai raoi Ngaia, ma e bati taian iango iaona. “Temwangina a taku bwa Ioane are te tia Babetito Ngkoe,” a kaeka Ana reirei, “ao temangina, bwa Eria; ao temangina, bwa Ieremia, ke te burabeti temanna.” Ma imwiina Iesu e anga te titiraki are e kaoiia iai Ana reirei bwa a na katuka aia iango tabeman ao n tirobaea are bon inanoia: “Ao ngkami kam taku bwa antai Ngai?” E tangiriia bwa a na karekea aia kaeka tiaki man “te iriko ma te rara” ma bon mai iroun raoi “Tamau are i Karawa.” Bon aio raoi te aeka ni kakoaua—oin te kaotioti mai iroun te Tamnei ae Raoiroi—are e a angan Betero te konaa ni kangai, “Bon te Kristo Ngkoe, are Natin te Atua are e maiu” (taraa Mataio 16:13–17).

Ni konaa ni maiu n te maiu n tamnei ni boong aikai, aomata ake ko reireiniia a kainanoa te kakoaua n tamnei n te koaua. Ko aki kona n anganiia, ma ko kona ni kaoiia, kaungaiia, karekea ana kairi te tamnei, ao n reireiniia bwa a na ukoria. Ko kona n rangi ni kaitiakia—rinanon am taetae ao am mwakuri—bwa e kanga n rangi ni kakawaki te Tamnei ae Raoiroi n reiakinan te euangkerio. Iangoia, n aron te katooto, te tabo n reiakinaki are ko kateia ao ni kaungaa. N tabetai te bwai ae uarereke n aron bairean te kaintekateka inanon te ruu ke arom ni kamauriia ao n reitaki ma taan reiakinaki e katauraoa butimwaean te tamnei ibukin te taneiai are a na karekea taan reiakinaki. Ko kona naba ni kaoiia taan reiakinaki bwa a na katauraoiia ni maiuia n tamnei n reiakinaki, n aron naba katauraoam n te maiu n tamnei ngkai ko na angareirei. Tuangiia ae bon tabeia kaoan te tamnei n reke irouia. Ao ko kona ni karekea te tai ibukiia n namakina te Tamnei ni kaota koauan Iesu Kristo ao Ana euangkerio. Te kakoaua anne e na riki bwa te “bwaa” ibukiia, “ ao mataroan moone e na aki kataea ana kai [iaoia]” (Mataio 16:18).

Titiraki aika a na Iangoaki: Tera ae ko a tia n nooria ae e buoka karikan te otabwanin ibukin te maiu n tamnei ibukin reiakinan te euangkerio? Tera ae e karika te totoko nako iai? Tera ae e buokiia aomata ake ko reireiniia ae a reiakinna mai iroun te Tamnei? Iangoa aron te tabo are ko aki toki n rereirei iai. Tera am namakin ngkana ko a mena n te tabo anne? Ko na kanga n rangi ni kanakoraoa kaoan te Tamnei bwa e na mena ikanne?

Man Booki aika Tabu: Ruka 24:31–32; Ioane 14:26; 16:13–15; Moronaai 10:4–5; Reirei ao Berita aika Tabu 42:16–17; 50:13–24

mitinare a reireina te utu

Ngkai ti angareirei, ti kona ni kaoiia taan reiakinaki bwa a na ukora oin aia kakoaua n tamnei n te koaua.

Te Tia Kamaiu E Buokiia Aomata Tabeman n Ukora, ni Kinaa, ao ni Mwakuri iaon Oin aia Kaotioti

Te Uea e tangiria n reitaki ma ngaira—ao E tangiriira bwa ti na ataia ae e rereitaki ma ngaira. N 1829 te tia reirei ae 22 ana ririki ae arana Oliver Cowdery e reiakina te reirei ae moan te matoa, ao e kakukurei are aomata nako a kona ni karekea oin aia kaotioti i bon irouia. Ma iai ana titiraki ae titebo ma are angiira ti titiraki naba iaona: “E bon koaua ae te Atua e kataia n taetae nakoiu? Ao N na kanga n ataa te bwai ae E taekinna?” Ni kaekai titiraki aikai, Iesu Kristo e kaoa Oliver bwa e na ururing rikaaki n iangoa ana tai n ukeaaba ibukin maiun tamneina. “I aki tuangko te rau n am iango?” E titiraki (taraa Reirei ao Berita aika Tabu 6:21–24). Rimwii, E reireina Oliver iaon kawai tabeua are e kona iai te Tamnei n taetae nakoina (taraa Reirei ao Berita aika Tabu 8:2–3; 9:7–9; taraa naba Reirei ao Berita aika Tabu 11:12–14).

Te maeka n te aonaaba e bon katoa tai iai mwanuokinan bwaai n tamnei, ti bane ni kainnanoa te buoka ni kan kinaa bwanaan te Tamnei. Ti bae n tia n namakina te Tamnei n akea ataakina iroura. Ao ti bane ni kona n reiakina ae mwaiti riki iaona bwa ti na kangaa ni ukora te Tamnei, kinaa Ana kairoro, ao mwakuri iaon wirikiriki are E anganiira. Ngkai ko reirei, buokiia taan reiakinaki ni kunei kawai ae e kona n reitaki iai te Tamnei—ao e kanga n tia ni reitaki ma ngaiia. Teuana te bwaintangira ae ko kona n anga ngkai te tia reirei ngkoe bon buokaia naake ko reireiniia inanon rikirakeia ni maiuia ni karekea oin aia kaotioti i bon irouia.

Titiraki aika a na Iangoaki: Eaera ngkai e kakawaki reiakinan karekean oin am kaotioti i bon iroum? Iai temanna ae e a tia ni buokiko ni mataata bwa ko na kanga ni ukora ao ni kinaa te kaotioti? Ko na kanga ni kaungaia naake ko reireiniia ni ukora, kinaa, ao ni mwakuri iaon te kaotioti are mai iroun te Tamnei ae Raoiroi?

Man Booki aika Tabu: I-Karatia 5:22–23; Aramwa 5:45–47; Reirei ao Berita aika Tabu 42:61; 121:33; Iotebwa Timiti—Rongorongo 1:8–20

Te Tia Kamaiu E Kaota Ana Koaua nakoia Naake E Reireiniia

Inanon te tai ae namakinaki iai te rau n tain te angareirei ao te ibuobuoki, Iesu e ukora karauan nanon raraona ae Mareta, ae e a tia ni mate mwanena. E tibwaia ma neienne te koaua ae bebete ae akea tokina: “E na boni manga uti mwanem” (Ioane 11:23). Ana kakoaua e karekea ana tai Mareta n tibwa oin ana koaua: “I ataia bwa e na bon uti n te mangauti n te bong n toki” (Ioane 11:24). Ataia bwa e kanga te baeten aei n okioki inanon Ioane 11:25–27. Tera ae anaaki iai nanom iaon ana banna ni katooto te Tia Kamaiu? Bukin tera tibwaan te koaua iaon koauan te euangkerio bon te mwakoro ae e kakawaki n te angareirei?

Am kakoaua e kona ni korakora kairorona iaoia naake ko reireiniia. E aki kainnanoa te wii kateke ke e na abwaabwaki. Ao ao e aki kainnanoa moanakina ma “I tangiria ni kaota au koaua.” Tii tibwaua are ko ataia man mwaakan te Tamnei ae Raoiroi. Kakoauaan te bwai ae koaua e rangi ni korakora riki ngkana e bon kaeineti ao e nako man te nano. Kakaota am koaua ni katoa tai iaon te Tia Kamaiu, Ana euangkerio, ao Mwaakana inanon maium, ao kaungaiia naake ko reireiniia bwa a na karaoa naba ae aekan aei. Ao uringnga bwa n tabetai te kakoaua ae korakora e bon aki kaotaki iroun te tia reirei ma irouia ake a reiakinaki.

Titiraki aika a na Iangoaki: Tarai banna ni katooto inanon koroboki aika a tabu ake a kaota korakoran ana kairoro temanna are e kaota ana koaua. Tera ae ko reiakinna man banna ni katooto akanne? Ningai te tai ae ko a tia iai ni kakabwaiaki man ana koaua temanna? E kanga tibwaan am koaua ni iai kairorona iaoia naake ko reireiniia? E kanga n tia n roota maium?

Man Booki aika Tabu: Mwakuri 2:32–38; Motiaea 5:1–3; Aramwa 5:45–48; 18:24–42; 22:12–18; Reirei ao Berita aika Tabu 46:13–14; 62:3

Kawai Tabeua ni Kamwakurii Baike Ko a Tia n Reiakin

• Tuangiia taan reiakinaki bwa a na tibwaia bwa tera ae e reireiniia te Tamnei ae Raoiroi ngkai a kamatebwaia Ana taeka te Atua.

• Katauraoi imwaain te tai ni karekei ana wirikiriki te tamnei ngkai ko angareirei.

• Korei namakin mai iroun te tamnei ake a roko ngkai ko katauraoi.

• Karekei taai tabetai ibukiia kaain te kiraati n iangoia ma te karaurau bwa tera ae e reiakiniia te Tamnei.

• Kabonganai katangitang aika a tabu ao korotamnei ni karekea namakinan te tamnei.

• Kakauongo nakon wirikiriki ngkai ko bairea te reirei, ao tauraoi ni bita tein are ko a tia ni baireia.

• Karekei taai ibukiia taan reiakinaki ni kabane bwa a na kaotii aia koaua iaon baike a reiakin.

• Buokiia tabeman n ataia ngkana a namakina te Tamnei.

• Maiuakina te koaua are ko reireia bwa ko aonga ni konaa ni kaota am koaua iaoia.

• Iriira te wirikiriki n reirei inanon taai aika a karina, ao n tuai baireaki.