Mangisuro babaen ti Espiritu

Idi binilin ti Mangisalakan da Joseph Smith ken Sidney Rigdon a mangikasaba iti ebangheliona, inkarina kadakuada “Maikagayto ti Espiritu Santo iti panangipaneknek iti pakaammo kadagiti amin a banag a sawenyo” (Doktrina ken Katulagan 100:8; kitaen met iti Doktrina ken Katulagan 42:15–17; 50:17–22). Maaramat met ti kasta met la a kari iti amin a suruam iti ebanghelio, agraman kenka. No mangisuroka iti ebanghelio ni Jesucristo, makaduam ti Espiritu a mangtarabay kenka ken mangipaneknek iti kinapudno iti panunot ken puso dagiti sursuruam (kitaen iti Doktrina ken Katulagan 8:2). Saanka nga agmaymaysa no mangisuroka “saan a sika ti agsao, no di ti Espiritu Santo” (Marcos 13:11).

Ti Espiritu Santo ti pudno a mannursuro. Awan ti mortal a mannursuro, kasano man ti kinalaing wenno kaadu ti padasna, a mabalin a mangsukat iti akemna iti panangsaksi iti kinapudno, panangpaneknek ken ni Cristo, ken panangbalbaliw iti puspuso. Ngem makapagbalin ti amin a mannursuro a ramit iti panangtulong kadagiti annak ti Dios nga agsursuro babaen ti Espiritu.

Tapno Mangisuro babaen ti Espiritu

• Isaganam ti bagim a naespirituan.

• Kanayon a nakasagana a sumungbat kadagiti naespirituan a pannignay maipapan iti kasapulan dagiti agad-adal.

• Mangparnuay kadagiti setting ken gundaway a pakaisuruan dagiti agad-adal babaen ti Espiritu Santo.

• Tulongam dagiti agad-adal nga agsapul, mangbigbig, ken agtignay iti bukod a paltiing.

• Masansan nga iburay ti pammaneknek, ken allukoyen dagiti agad-adal a mangibinglay kadagiti rikna, padas, ken pammaneknekda.

Insagana ti Mangisalakan ti Bagina a Naespirituan a Mangisuro

Tapno agsagana para iti panagministrona binubos ti Mangisalakan ti 40 nga aldaw iti let-ang “tapno makikadua iti Dios” (Patarus ni Joseph Smith, Mateo 4:1 [iti Mateo 4:1, footnote b]). Ngem nabayag a nangrugi idin ti naespirituan a panagsaganana. Idi sinulisog ni Satanas Isuna, kinabaelanna nga inusar dagiti “balikas ti biag” nga impategna para iti “umno nga oras” a kasapulanna ida (Doktrina ken Katulagan 84:85). Panunotem maipapan kadagiti bukodmo a panagkagumaan a mangisagana iti bagim a naespirituan a mangisuro. Ania ti masursurom manipud iti Mateo 4:1–11 maipapan no kasano a masurotmo ti pagwadan ti Mangisalakan iti naespirituan a panagsaganam?

Ti Espiritu ti pudno a mannursuro ken ti pudno a pagtaudan ti kumbersion. Ti nabileg a panangisuro iti ebanghelio ket agkasapulan saan laeng a panangisagana iti maysa a lesson no di ketdi panangisagana a nasayaat iti bagim a naespirituan sakbay nga irugim ti mangisuro. No naespirituan a nakasaganaka, nasaysayaat a kabaelamto a denggen ken suroten ti pannarabay ti Espiritu bayat ti panangisurom. Ti wagas tapno maawis ti Espiritu Santo iti panangisurom ket mangawis Kenkuana iti biagmo. Iraman daytoy ti sipapasnek a panagkagumaan a sumurot iti pagwadan ti Mangisalakan ken agbiag iti ebangheliona iti amin a pusom. Ngem gapu ta awan kadatayo ti mangaramid iti daytoy a naan-anay, kaipapananna pay ti panagbabawi iti inaldaw.

Dagiti Saludsod nga Utoben: Ania ti kayat na a sawen kenka ti isaganam ti bagim a naespirituan a mangisuro? Ania ti mariknam a makaparegta nga aramidem tapno mapasayaat ti wagas a panangisaganam iti bagim a naespirituan? Kasano ti panagkunam a ti naespirituan a panagsagana ket makaaramid iti pakaidumaan iti panangisurom?

Manipud kadagiti Nasantuan a Kasuratan: Esdras 7:10; Lucas 6:12; Alma 17:2–3, 9; Doktrina ken Katulagan 11:21; 42:13–14

Kanayon a Nakasagana ti Mangisalakan a Sumungbat iti Kasapulan dagiti Dadduma

Ni Jairo, ti agturay iti sinagoga, nagruknoy iti saksaka ni Jesus, nga agpakpakaasi Kenkuana a tulonganna ti ngannganin matay nga anakna a babai. Nakipagseksekan ni Jesus ken dagiti disipulona iti umariwekwek a tattao iti kalsada a mapan iti balay ni Jairo idi kellaat a nagsardeng ni Jesus. “Asino ti nangsagid kaniak?” Sinaludsodna. Kasla naidumduma a saludsod daytoy—iti reprep ti tattao, siasino ti saan a mangsagsagid Kenkuana? Ngem narikna ti Mangisalakan nga iti dayta nga ummong, adda maysa nga immasideg kenkuana nga addaan naipangruna a kasapulan ken addaan iti pammati nga umawat iti pannakaagas nga idiayana. Adda pay la oras a mangsarungkar iti anak a babai ni Jairo. Ngem immuna a kinunana iti babai a nangsagid iti pagan-anayna, “Anakko, ti pammatim pinasalun-atnaka; inkan a sitatalna” (kitaen iti Lucas 8:41–48).

Kas mannursuro, mabalin a no dadduma makitam ti bagim nga agdardaras tapno isurom ti maysa a banag nga insaganam nga isuro. Idinto a mabalin a napateg dayta, siguraduem nga iti panagdardarasmo saanmo a di inranta nga indaras ti panagkasapulan unay ti maysa a tao nga isursurom Kas pangnayon iti naespirituan a pannarabay a kiniddawmo bayat ti panagsaganam a mangisuro, kiddawem pay ti pannarabay ti Espiritu kabayatan ti panangisurom. Ikarigatam ti agbalin a mannakaammo kadagiti kasapulan, saludsod, ken pagesman dagiti agad-adal. Matulongannaka ti Espiritu Santo a mang-discern no kasano nga umaw-awat wenno maawatan ti maysa nga agad-adal ti maysa a banag nga insurom. Mabalin a tignayennaka, no dadduma, a mangbalbaliw kadagiti planom. Kas pagarigan, mabalin a maawis ti riknam a mangbubos iti ad-adu pay nga oras ngem iti insangratmo iti maysa a topiko wenno mangibati iti sumagmamano a panaglilinnawag para iti sumaruno tapno mapaglilinnawagan ti maysa a banag a napatpateg kadagiti agad-adal itan.

Dagiti Saludsod nga Utoben: Kaano a nariknam nga ammo ti maysa a nagannak wenno sabali a mannursuro dagiti kasapulam kas maysa nga agad-adal? Ammo kadi dagiti sursuruam nga ad-adda nga interesadoka iti pannakasursuroda ngem iti panangileppasmo iti maysa a lesson? Kasano a maisaritam a nasaysayaat ti panagessemmo?

Manipud kadagiti Nasantuan a Kasuratan: 1 Pedro 3:15; Alma 32:1–9; 40:1; 41:1; 42:1

Nangipaay ti Mangisalakan kadagiti Gundaway tapno Masuruan dagiti Tao babaen ti Espiritu Santo

Narigat para iti adu iti panawen ni Jesus tapno maawatanda no asino a talaga Isuna, ngem adu dagiti opinion. “Dagiti dadduma kunada a sika ni Juan a Bautista,” impadamag dagiti disipulona, “dagiti dadduma, ni Elias, ket dagiti dadduma, ni Jeremias, wenno maysa kadagiti mammadto.” Ngem kalpasanna nagsaludsod ni Jesus a nangawis kadagiti disipulona a mangipakni iti opinion dagiti dadduma ket kitaenda ti naguneg ti bukodda a puspuso: “Siasinoak iti panagkunayo?” Tinarigagayanna kadakuada a mangsarak iti sungbatda saan a manipud iti “lasag ken dara” ngem direkta manipud iti “Amak nga adda sadi langit.” Isu met la daytoy a kita ti saksi—bukod a paltiing manipud iti Espiritu Santo—a nangpabael ken ni Pedro a mangipakdaar, “Sika ti Cristo, ti Anak ti sibibiag a Dios” (kitaen iti Mateo 16:13–17).

Tapno makapagbiag a naespirituan kadagiti ud-udina nga aldaw, kasapulanto dagiti tao a suruam ti naespirituan a saksi ti kinapudno. Dimo maited daytoy kadakuada, ngem mabalinmo nga awisen, allukoyen, paregtaen, ken suruan ida a mangsapul iti daytoy. Maaramidmo a nalawag—babaen dagiti balikas ken tignaymo—no kasano ti kinapateg ti Espiritu Santo iti panagsursuro iti ebanghelio. Kas pagarigan, ibilangmo ti panagsursuro iti aglawlaw a parnuayem ken yallukoymo. Maysa a banag a simple kas iti urnos dagiti tugaw iti maysa a siled wenno ti wagas a panagkablaaw ken pannakipulapolmo kadagiti agad-adal ket mangituding iti naespirituan a tono para iti padas nga addanto kadagiti agad-adal. Maawismo pay dagiti agad-adal a mangisagana iti bagbagida a naespirituan nga agsursuro, kas met iti panagsaganam a naespirituan a mangisuro. Idawatmo kadakuada nga umawat iti pagrebbengan iti espiritu nga isangbayda. Mabalinmo met ti mangipaay kadagiti gundaway a mariknada ti Espiritu a mangipaneknek ken ni Jesucristo ken iti ebangheliona. Agbalinto dayta a saksi a maysa a “bato” para kadakuada, “ken dagiti ruangan ti impierno saanto nga agballigi [kadakuada].” (Mateo 16:18).

Dagiti Saludsod nga Utoben: Ania ti napaliiwmo a nakatulong iti naespirituan nga aglawlaw para iti panagsursuro iti ebanghelio? Ania ti makasinga iti daytoy? Ania ti mangtulong kadagiti tao a sursuruam manipud iti Espiritu? Panunoten maipapan iti setting a masansan unay a pangisuruam. Ania ti mariknam no addaka sadiay? Kasano a nasamsamay a maawismo ti Espiritu nga adda sadiay?

Manipud kadagiti Nasantuan a Kasuratan: Lucas 24:31–32; John 14:26; 16:13–15; Moroni 10:4–5; Doktrina ken Katulagan 42:16–17; 50:13–24

No mangisurotayo, maawistayo dagiti agad-adal a mangsapul iti bukodda a naespirituan a saksi ti kinapudno.

Tinulongan ti Mangisalakan dagiti Dadduma nga Agsapul, Mangbigbig, ken Agtignay iti Bukod a Paltiing

Tarigagayan ti Apo ti makisarita kadatayo—ken tarigagayanna a maammuantayo a makisarsarita Isuna kadatayo. Idi 1829, nagsursuro ti agtawen iti 22 a school teacher nga agnagan iti Oliver Cowdery maipapan iti nawada, ken makaay-ayo a doktrina a makaawat ti asino man iti bukod a paltiing. Ngem adda dagiti saludsodna a maipada iti dinamag ti adu kadatayo: “Talaga kadi a padpadasen a kasaritanak ti Apo? Kasano a maammuak no ania ti ibagbagana?” Tapno masungbatan dagitoy a saludsod, inawis ni Jesucristo ni Oliver Cowdery nga agpanunot iti pribado a kanito maipapan iti naespirituan a pannakaagas. “Diak kadi imbaga ti kappia iti panunotmo maipanggep iti dayta a banag?” Sinaludsodna (kitaen iti Doktrina ken Katulagan 6:21 –24). Idi agangay, sinuruanna ni Oliver maipapan iti dadduma a wagas a mabalin a makisarita ti Espiritu kenkuana (kitaen iti Doktrina ken Katulagan 8:2–3; 9:7–9; kitaen met iti Doktrina ken Katulagan 11:12–14).

Ti panagbiag iti maysa a lubong a masansan unay a di maseknan kadagiti naespirituan a banag, kasapulantayo amin ti tulong iti panangbigbig iti timek ti Espiritu. Mabalin a nariknatayo ti Espiritu a ditayo inam-ammo daytoy. Ken masursurotayo amin ti ad-adu pay maipapan no kasano ti mangsapul iti Espiritu, mangbigbig iti impluensiana, ken agtignay kadagiti pannignay nga itedna kadatayo. No mangisuroka, tulongam dagiti agad-adal a mangtakuat kadagiti wagas a mabalin a makisarita ti Espiritu—ken no kasano a nakisarita Isuna kadakuada, Maysa kadagiti kaindaklanan a banag a maitedmo kas maysa a mannursuro ket mangtulong kadagiti sursuruam a dumur-as iti daytoy tungpal biag a panangragpat iti bukod a paltiing.

Dagiti Saludsod nga Utoben: Apay a napateg a masursuro ti umawat iti bukod a paltiing? Tinulongannaka kadin ti maysa a tao a makaawat no kasano ti agsapul ken magbigbig iti paltiing? Kasano a maallukoymo dagiti suruam nga agsapul, mangbigbig, ken agtignay iti paltiing manipud iti Espiritu Santo?

Manipud kadagiti Nasantuan a Kasuratan: Taga Galacia 5:22–23; Alma 5:45–47; Doktrina ken Katulagan 42:61; 121:33; Joseph Smith—Pakasaritaan 1:8–20

Nagpaneknek ti Mangisalakan kadagiti Sinuruanna

Kabayatan ti naipangpangruna a natalinaay a kanito ti panangisuro ken ministering, kinalikaguman ni Jesus a mangliwliwa iti gayyemna a ni Marta, a natay ti kabsatna a lalaki. Imbinglayna kenkuana ti simple a pammaneknek ti agnanayon a kinapudno: “Agungarto ti kabsatmo” (Juan 11:23). Ti panagsaksina ti nangguyugoy ken ni Marta a mangibinglay iti bukodna a pammaneknek: “Ammok nga agungarto iti panangungar iti maudi nga aldaw” (Juan 11:24). Kitaen no kasano a maulit daytoy a pagtuladan iti Juan 11:25–27. Ania ti makaawis iti riknam maipapan iti pagwadan ti Mangisalakan? Apay a ti panangibinglay iti pammaneknek kadagiti kinapudno ti ebanghelio ket napateg a paset ti panangisuro?

Mabalin nga addaan nabileg nga impluensia ti pammaneknekmo kadagiti sursuruam. Saan a kasapulan ti nalaing wenno atiddog a panagsarita. Saan a nasken a mangrugi iti “Kayatko nga iburay ti pammaneknekko.” Iburaymo laeng no ania ti ammom babaen ti bileg ti Espiritu Santo. Kangrunaan a nabileg ti maysa a pammaneknek no maiburay daytoy a natarus ken naimpusuan. Masansan nga iburaymo ti pammaneknek maipapan iti Mangisalakan, ti ebangheliona, ken ti bilegna iti biagmo, ket allukoyem dagiti sursuruam nga aramidenda met ti kasta. Ken laglagipem a no dadduma ti kabilgan a panagsaksi ket maipeksa saan a babaen ti mannursuro ngem babaen ti kapada nga agad-adal.

Dagiti Saludsod nga Utoben: Sapulen dagiti pagarigan iti nasantuan a kasuratan a mangiladawan iti nabileg nga impluensia ti maysa a tao a mangiburburay iti pammaneknek. Ania ti masursurom manipud kadagita a pagwadan? Kaano a nabendisionanka babaen iti pammaneknek ti maysa a tao? Kasano a ti panangibinglay iti pammaneknekmo inimpluensianna dagiti isursurom? Kasano nga inimpluensiaannaka daytoy?

Manipud kadagiti Nasantuan a Kasuratan: Dagiti Aramid 2:32–38; Mosiah 5:1–3; Alma 5:45–48; 18:24–42; 22:12–18; Doktrina ken Katulagan 46:13–14; 62:3

Sumagmamano a Wagas a Pakayaplikaran No Ania ti Masursurom

• Idawatmo kadagiti agad-adal a mangibinglay no ania ti insuro ti Espiritu Santo kadakuada bayat ti panagadalda iti balikas ti Dios.

• Agsaganaka a nasaksakbay nga umawat kadagiti naespirituan a pannignay kabayatan ti panangisurom.

• Isuratmo dagiti naespirituan a parikna nga umay kenka bayat ti panagsaganam.

• Sagpaminsan a mangipaay kadagiti gundaway nga agutob a siuulimek dagiti miembro ti klase no ania ti isursuro ti Espiritu kadakuada.

• Agusar iti sagrado a musika ken ladawan a mangawis iti impluensia ti Espiritu Santo.

• Dumngeg kadagiti pannignay bayat ti panagplanom ken panangisurom, ken agtallugodka a mangbalbaliw kadagiti planom.

• Mangipaay kadagiti gundaway a mangiburay iti pammaneknek dagiti amin nga agad-adal maipapan iti masursuroda.

• Tulongam dagiti dadduma a mangbigbig no adda ti Espiritu.

• Agbiagka a mayannurot kadagiti kinapudno nga isursurom tapno makapagpaneknekka maipapan kadagitoy.

• Surotem dagiti pannignay a mangisuro iti madagdagus, saan a pormal a kanito.