Karuwaineneik Niknik ilo Ekkatak

Ekar ilo m̧ool kabwilōn̄lōn̄ n̄an lale an Rilo̧mo̧o̧r eo etetal ioon dān. Bōtaab ekar jab bwe n̄an Piter. Ekar kōņaan kōm̧m̧ane ta eo Riļo̧mo̧o̧r ekar kōm̧m̧ane, pād ijo Ekar pād ie, im bōk ejja en̄jake eo wōt kōn e make. “Kwōn jiron̄ eō bwe in iwōj n̄an Ippaṃ ioon lọjet,” ekar ba. Rilo̧mo̧o̧r ekar uwaak kōn juon karuwainene eļam waan: “Kwon itok.” Kōn menin, Piter ekar keļo̧k jān kōjparok eo an wa eo im kar kwaļo̧k n̄an kōj bwe mour in juon rikaļoor ejjab juon en̄jake bajjōk (lale Matu 14:24–33). Ej aikuj tōmak ilo Kraist im kijejeto eļap. Ak ej barāinwōt boktok jeraam̧m̧an ļapļap n̄an etetal ippān Rilo̧mo̧o̧r.

“Kwon Itok.” “Itok im kom̧ naaj loe.” “Kwōn itok, ḷoor Eō.” “Kwōn ilọk, im kōṃanṃan āinwōt” (Matu 14:29; Jon 1:39; Luk 18:22; 10:37). Jān jinoin jerbal in karejar eo An, Rilo̧mo̧o̧r ekar karuwainene ro rej ļoore n̄an en̄jake kōn er make m̧ool ko, kajoor eo, im iakwe E me ekar letok. E kar kōm̧m̧ane menin kōnke en̄in ej lukkuun ta meļeļein ekkatak. Ejjab baj wōt ron̄jake im riiti; ej barāinwōt oktak, ukweļo̧k, im waanmaanļo̧k. Ilo naan ko an Rilo̧mo̧o̧r, ekkatak ej itok “jān katak im barāinwōt jān tōmak” (Katak im Bujen Ko 88:118; naan ko kar kobaiktok). Im tōmak ekitbuuj kōm̧m̧an n̄an kōj make, ejjab baj kipel n̄an kōm̧m̧an (lale 2 Nipai 2:26).

N̄e jej ļoore waanjon̄ak eo an Rilo̧mo̧o̧r, jej karuwainene ro jej katakin er n̄an kajjitōk, kapukōt, im kōḷaḷḷaḷ—innām pukōtļo̧k (lale Matu 7:7–8). Im jej bōk karuwainene eo n̄an kōj make. Ippān doon, kōn tōmak eo ad make ilo Kraist im jerbal kijejeto, jenaaj itok n̄an jeļā kōn kōj make ta meļeļein n̄an etetal Ippān.

N̄an Karuwaineneik Niknik ilo Ekkatak

• Jipan̄ rūkkatak ro bōk eddo in ekkatak eo aer.

• Rōjan̄ rūkkatak ro n̄an itok n̄an jeļā Rilo̧mo̧o̧r eo jān ekkatak gospel eo aolep raan.

• Karuwainene rūkkatak n̄an kepopo n̄an ekkatak.

• Rōjan̄ rūkkatak ro n̄an kwaļo̧k m̧ool ko rej ekkatak.

• Karuwainene rūkkatak ro n̄an mour kōn ta eo rej ekkatak.

Rilo̧mo̧o̧r eo Ej Jipan̄ Ro Jet Bōk Eddo in Ekkatak ko Aer.

Jōk baaj ko me renaaj kar kijoon ļom̧aļo ko ilo ejjeļo̧k jorrāān enaaj kar juon jerbal epen n̄an jabdewōt. Ļeo jein ak jatin Jered kar “tōl iien otemjej jān pein Irooj” (Ether 2:6), bōk meļeļe ko kōn ļōm wa ko im ekōjkan aer naaj kar lōn̄ mejatoto ie. Bōtaab ta eo kwoj kile elmen an Irooj kar uwaak ke ļeo jein im jatin Jared ekar kajjitōk n̄an leļo̧k meram n̄an lowaan baaj ko? (lale Ether 2:22–25). Ekōjkan an ļeo jein ak jatin Jared kar jeraam̧m̧an jān kajjitōk n̄an kōjerbal tōmak eo an ilo wāween in? (lale Ether 3:1–16).

Emaron̄ in āinwōt pidodoļo̧k n̄an ba n̄an aolep rūkkatak ro men ko kwoj ļōmņak rej aikuj jeļā. Ijo wōt ke, Elder David A. Bednar ekar kapilōk: “Ad irilọk ejjab aikuj in ‘Ta eo ij ba n̄an er?’ Ijeļo̧kin, kajjitōk eo n̄an kajjitōk ippād make ej ‘Ta eo imaron̄ karuwainene er n̄an kōm̧m̧ane? Ta kajjitōk ko reim̧we imaron̄ kajjitōk kake, eļan̄n̄e rej m̧ōņōņō in uwaak, naaj jino karuwaineneitok Jetōb Kwojarjar eo n̄an mour ko aer?’” (evening with a General Authority, Feb. 7, 2020, broadcasts.ChurchofJesusChrist.org).

Ļōmņak kōn elmen am karuwainene rikatak ro n̄an bōk eddo in ekkatak ko aer. N̄an waanjon̄ak, kwomaron̄ kajjitōk ippāer n̄an kajjitōk kajjitōk ko, kappukōt uwaak ko, kōļmenļo̧kjeņ, im kwaļo̧k ak rekoote ļōmņak ko im en̄jake ko aer. Ilo aer kōm̧m̧ane, enaaj kōkajoorļo̧k tōmak eo aer, loe m̧ool ko ilo naan eo an Anij, im wōr aer make en̄jake kōn m̧ool kein. Ilo ad bōk eddo n̄an ekkatak eo ad make, jemaron̄ ba, āinwōt an kar Josep Smith kōm̧m̧ane, “Em̧ōj aō jeļā n̄an n̄a make” (Josep Smith—Bwebwenato 1:20).

Kajjitōk n̄an Kōļmenļo̧kjeņ kaki: Etke aorōk bwe rūkkatak ro ren memourur ijeļo̧kin ad im̧we ekkatak ko aer? Elmen am̧ maron̄ jipan̄ er bōk eddo in ekkatak eo aer? Ekōjkan an kar rūkaki ro jipan̄ eok kōm̧m̧ane menin? Ta waanjon̄ak ko jān jeje ko rekwojarjar komaron̄ ļōmņak kake ijo armej ro raar karuwainene er n̄an ekkatak kōn er make? Elmen an waanjon̄ak kein jelet elmen am katakin?

Jān Jeje ko Rekwojarjar: 1 Nipai 11; Katak im Bujen Ko 9:7–8; 58:26–28; 88:118–125; Josep Smith—Bwebwenato 1:11–20

Rilo̧mo̧o̧r ej Rōjan̄ Ro Jet n̄an Itok n̄an Jeļā E ilo Ekkatak An in Naan

Ke ekar itok n̄an iien eo n̄an an Rilo̧mo̧o̧r eo kajutak Kabun̄ eo An ilo raan ko āliktata, E ekar jiron̄ ro Rikarejera, “Pedped ioon men ko em̧ōj aer jeje” (Katak im Bujen Ko 18:3). Ilo m̧ool, Bok in Mormon, eo ekar m̧ōttan wōt jidik im ededeļo̧k ukōte, ekar pād ie naan in kōmeļeļe eo ejipan̄ n̄an jerbal eo, ekoba ekōjkan peptaij, ekōjkan kōm̧m̧an kwojkwoj eo, im tipdik in meļeļe ko jet raorōk. Bōtaab Rilo̧mo̧o̧r eo ekar barāinwōt kōnaan bwe ro Rikarejeran ren loe revelesōn ko An āinwōt juon iien em̧m̧an n̄an ron̄jake E im itok n̄an jeļā wōn E em̧wilaļļo̧k. Ilo ejja revelesōn jab in wōt, E ekar jiron̄ er, “Bwe ej Ainikiō eo ej kōnono [naan kein] n̄an kom̧; … kōn menin, kom̧ maron̄ kam̧ool bwe kom̧ ar ron̄ Ainikiō, im jeļā naan ko Aō” (Katak im Bujen Ko 18:35–36).

Ļōmņak kōn armej ro kwoj katakin er. Elmen aer ļōm̧ņak kōn ekkatak jeje ko rekwojarjar? Kōn un jab in, ewi am̧ ļōm̧ņak kake? Eļapļo̧k ke jān juon eddo raan otemjej? N̄e kwoj ekkatak jeje ko rekwojarjar, kwoj ke en̄jake an Rilo̧mo̧o̧r kōnono n̄an kwe? Būreejtōn Russell M. Nelson ekar katakin: “Ia eo jemaron̄ etal n̄an e n̄an ron̄jake E? Jemaron̄ lale n̄an jeje ko rekwojarjar. … Lin̄ūri naan ko an Anij aolep raan eaorōk n̄an mour ilo jetōb, eļaptata ilo raan kein me eļapļo̧k jorrāān ko. Ilo ad kwojkwoj ioon naan an Kraist aolep raan, naan ko an Kraist enaaj ba n̄an kōj wāween jelm̧ae iien ko reppen n̄e jej ļōmņak jeban kar ioone” (“Ron̄jake E,” Liaona, Māe 2020, 89). Ilo am̧ katakin, rōjan̄ rūkatak ro n̄an katak jeje ko rekwojarjar n̄an un eo n̄an pukōt Rilo̧mo̧o̧r—ejjab pukōt wōt eo̧o̧n ak mool ko kōn E ak pukōt E. Ron̄ ainikien Irooj aolep raan ilo jeje ko rekwojarjar ej pedped eo im̧aan tata n̄an juon niknik to̧o̧n wōt am̧ mour, make ļo̧k ekkatak gospel eo.

Kajjitōk ko n̄an Kōļmenļo̧kjeņ kaki: Ļōmņak kōn iminene in ekkatak jeje ko rekwojarjar make. Ekōjkan an kar ekkatak naan eo an Anij kar kōkajoorļo̧k jemjera eo am̧ Ippān? Ta eo kwomaron̄ kōm̧m̧ane n̄an kōkōm̧anm̧anļo̧k ekkatak eo am̧? Ekōjkan am̧ naaj im̧we ro jet n̄an niknik im ekkatak naan an Anij aolep raan? Ta kōjeraam̧m̧an ko renaaj būki ilo aer kōm̧m̧ane?

Jān Jeje ko Rekwojarjar: Joshua 1:8; 2 Timote 3:15–17; 2 Nipai 32:3; Jekab 2:8; 4:6; Katak im Bujen Ko 33:16

Rilo̧mo̧o̧r Ekar Karuwainene Ro Jet n̄an Kepopo n̄an Ekkatak

Em̧ool ine eo em̧m̧an tata ejjab maron̄ eddōk ilo bwidej eo epen, edekāke, ak elōklōk. Ejjeļo̧k oktak, em̧ool katak eo aorōk tata im ekōm̧anm̧anļo̧k tōmak ejjab maron̄ ukōt juon bōro me ejjab pojak n̄an bōke. M̧ōttan eo an ennaan eo an būrabōļ eo an Rilo̧mo̧o̧r kōn rikkat eo, ine ko, im bwidej eo an elōn̄ jekjek ko. Ej ilo “bwidej eṃṃan”—bōro eo me em̧ōj an pidodo im alikkar an dekā ko im lōklōk ko ilo jetōb—bwe naan eo an Anij ej kwaļo̧k leen eo eo an mour (lale Matu 13:1–9, 18–23).

Kepopo ilo jetōb ej aorōk—n̄an kwe im n̄an armej ro kwoj katakin er Kōn menin ekōjkan ad jipan̄ kōpooj būruōd bwe ren “bwidej eṃṃan” n̄an naan eo an Anij? Ļōmņak in ļoor pedped in katak ko an m̧aanjabpopo, ko kwomaron̄ kōjerbali ilo mour eo am̧ im kōketak ilo mour ko an ro kwoj katakin er. Jar n̄an pukōt ta eo Irooj ekōņaan bwe kwon ekkatak. Mour ilo juon wāween eo em ej karuwainene E n̄ān mour eo am. Ukweļo̧k aolep raan. Najdik ikdeelel eo am̧ n̄an ekkatak kōn kajjitōk kajjitōk ko rem̧ool. Ekkatak naan eo an Anij kōn tōmake bwe enaaj tōl eok n̄an uwaak ko. Kōpeļļo̧k būruōm̧ n̄an jabdewōt E naaj katakin eok.

Ilo an rūkkatak ro kōppopo n̄an ekkatak ilo wāween in, enaaj wōr ippāer mejān jetōb ko n̄an lo im lo̧jilin̄i ko n̄an ron̄ ta eo Irooj enaaj kōņaan bwe ren jeļā (lale Matu 13:16).

Kajjitōk ko n̄an Kōļmenļo̧kjeņ kaki: Ta eo kwoj kōm̧m̧ane n̄an kepooj kwe make n̄an ekkatak? Ekōjkan an m̧aanjabpopo eo am̧ jelet wāween am̧ lo, ron̄, im meļeļe naan eo an Anij? Elmen am im̧we ro jet n̄an kepopo n̄an ekkatak? Ta oktak eo emaron̄ kōm̧m̧ane kōn ekōjkan aer bōk m̧ool ko an gospel eo?

Jān Jeje ko Rekwojarjar: Inōs 1:1–8; Alma 16:16–17; 32:6, 27–43; 3 Nipai 17:3

Rūkkatak ro rej jeraam̧m̧an jān iien ko rem̧m̧an n̄an kwaļo̧k ippān doon ta eo rej ekkatak.

Rilo̧mo̧o̧r eo Ekar Kōketak Ro Jet n̄an Kwaļo̧k M̧ool ko Raar Ekkatak

“N̄aij rum̧wij ilo kōnono,” Inok ekar būromōj ke Irooj ekar kūr e n̄an kwaļo̧k gospel eo. Bōtaab wejepādik ejjan̄in ļo̧k wōt n̄an jidik juon men aikuj n̄an juon rikarejeran Irooj. Ijjeļo̧kin, Irooj ekar kallim̧uri Inōk bwe eļan̄n̄e ekar bwe an tōmak n̄an kōpeļļo̧k lo̧n̄in, naan ko renaj kar itok. “Inaaj lewōj n̄an eok ekkōnono,” Ekar ba (Moses 6:31–32). Inōk ekar kōjerbal tōmak eo an, im Irooj ekar ilo m̧ool kōnono kōn e, kōn naan ko rekanooj in kajoor me raar kōm̧m̧an bwe armej ro ren wudiddid, (lale Moses 6:47). Ilo m̧ool, rekar kōm̧m̧an bwe lale make en wūdiddid. Toļ ko raar ko, reba ko raar ukōt iaļ eo aer, im laļ ko raar mijak armej ro an Anij, “jon̄an kar kajoor in naan ko an Inok, im jon̄an kar kanooj kajoor in kajin eo me Anij eaar leļo̧k n̄an e” (Moses 7:13).

Irooj ekōņaan bwe kōjwōj aolep—ejjab baj rikanaan ro An wōt—n̄an bōk kajoor eo n̄an kōnono An in naan. E ej kōņaan bwe aolepād wōj, ekoba armej ro kwoj katakin er (lale Katak im Bujen Ko 1:20–21). Naan ko ad remaron̄ jab kōm̧akūt toļ ko ak bar kōlaajļo̧k reba ko, bōtaab remaron̄ jipan̄ ukōt bōro ko. En̄in ej etke ekanooj in aorōk n̄an leļo̧k n̄an rūkkatak ro iien ko rem̧m̧an n̄an kwaļo̧k ippān doon ta eo rej ekkatak kōn Rilo̧mo̧o̧r eo im gospel eo An. Kōm̧m̧ane menin enaaj jipan̄ er kobaik m̧ool ko raar katakin im kwaļo̧k ippāer ren m̧ōttaer. Enaaj barāinwōt jipan̄ er bōk lōke ilo maron̄ eo aer n̄an kwaļo̧k m̧ool ko ilo jekjek ko jet.

Kajjitōk ko n̄an Kōļmenļo̧kjeņ kaki: Ļōmņak kōn iien eo kwar kōnono kōn juon m̧ool an gospel eo ippān juon. Ta eo kwar ekkatak jān en̄jake eo? N̄āāt eo kwar kam̧m̧oolol bwe juon ekar wōr ippān peran eo n̄an kwaļo̧k ļōmņak ko im tōmak ko aer? Ekōjkan an armej ro kwoj katakin er naaj jeraam̧m̧an jān iien ko rem̧m̧an n̄an kōnono men ko rej ekkatak? Ta iien ko rem̧m̧an kwomaron̄ ejaki n̄an er?

Jān Jeje ko Rekwojarjar: Alma 17:2–3; Moronai 6:4–6; Katak im Bujen Ko 84:85; 88:122; 100:5–8

Rilo̧mo̧o̧r eo ekar Karuwaineneik Ro Jet n̄an Mour kōn Ta eo Ekar Katakin

“En romaak ami meram iṃaan mejān armej.” “Iakwe ro rikōjdat kom̧.” “Kajjitōk, im naaj lewōj e n̄an kom̧.” “Kom̧in deļo̧n̄ ilo kōjām eo erānin̄.” (Matu 5:16, 44; 7:7, 13.) Jet iaan karuwainene ko raorōk tata, ememļo̧kjeņ ilo aolepān jerbal in karejar eo an Rilo̧mo̧o̧r ilo laļ in raar kōnono kaki ke E ekar katakin rikaļoor ro An ilo juon toļ laleļo̧k Lom̧aļo in Galilee. Jibadbad eo an Rilo̧mo̧o̧r ekar n̄an ukōt mour ko, āinwōt kar kalikkar jān karuwainene eo An āliktata: “Innām jabdewōt eo ej roñjake naan kein Aō, im kōṃanṃani, naaj kajjioñe er āinwōt armej eo e jeḷāḷọkjeṇ, im ej kalōk ṃweo iṃōn ioon bar” (Matu 7:24; eoon ko kobaitok).

Wōt ej wōtļo̧k im ibwijleplep ej itok im kōto ko rej to̧o̧rļo̧k n̄an mour an aolep. Ekkatak kōn gospel eo ejjab aorōk n̄en rikatak rejjab jutak ben ilo aolep melijon̄ ko rej jeļmae. En̄in ej un eo jej jab aikuj ped ilo ad karuwaineen rikatak ro n̄an ļōmņak elmen aer mour kōn ta eo rej ekkatak? Jān kauteij eo kōn anemkwoj in kālet eo an ro jet, elōn̄ iaan karuwainene ko renaaj juon wot: “Ta eo kwoj en̄jake kōm̧ōņōņō in kōm̧m̧ane?” Ekka karuwainene ko ad rej aikujin lukkuun kōmeļeļeik: “Kwonaaj ke kālet juon m̧wil an Rilo̧mo̧o̧r eo kwokōņaan jerbale?” Ilo am bōk iien em̧m̧an n̄an rikatak ro n̄an ron̄, kile, im kwaļo̧k im̧we jān Jetōb Kwojarjar, E enaaj katakin er makūtkūt ko aer make rej aikuji n̄an bōke. Jipan̄ rikatak ro ļōmņak kōn kōjeraam̧m̧an ko renaaj itok ilo aer jerbal eoon ta eo rej ekkatak, im rōjan̄ er n̄an waanmaanļo̧k men̄e enaaj ben. Mour kōn mool ej ial eo em̧ōkaj n̄an eļapļo̧k tōmak, naan in kamool, im oktak. Ilo an Rilo̧mo̧o̧r kar ba, mour kōn katak keo an Jema ej ial eo n̄an aolep kōj n̄an lukkuun jeļā bwe katak eo ej mool (lale Jon 7:17).

Kajjitōk ko n̄an Kōļmenļo̧kjeņ kaki: N̄āāt kar im̧we eok n̄an jerbal kōnke juon armij ekar karuwainene eok? Ekōjkan an mour eo am̧ kar oktak āinwōt juon tōprak? Lale karuwainene ko letok jān jeje ko rekwojarjar im jān ritōl ro an Kabun̄ in. Ta kwoj ekkatak emaron̄ jipan̄ eok ilo am karuwainene ro jet n̄an jerbal? Ilo wāween ta ko kwoj etale karuwainene ko am̧?

Jān Jeje ko Rekwojarjar: Luk 10:36–37; Jon 7:17; Jemes 1:22; Mosaia 4:9–10; Katak im Bujen Ko 43:8–10; 82:10

Jet Wāween ko n̄an Kōjerbal Ta eo Kwoj Ekkatak

• Kajjitōk ippān ro jet n̄an itok ilo aer pojak n̄an kwaļo̧k juon men Jetōb Kwojarjar ekar katakin er, āinwōt men ko loi ewōr meļeļeier ilo eoon ko ilo jeje ko rekwojarjar.

• Leļo̧k n̄an rūkkatak ro iien em̧m̧an n̄an katakin jidik in katak eo.

• Rōjan̄ rūkkatak ro n̄an etale juon pijan alwoj, jeje ko rekwojarjar, ak enaan m̧okta jān iien eo.

• Joļo̧k kōņaan eo n̄an uwaake aolep kajjitōk. Kobaik ro jet ilo kapukōte uwaak eo.

• M̧okta jān kwaļo̧k men ko kwar loi kōn jeje ko rekwojarjar, kajjitōk ippān rūkkatak ro n̄an kwaļo̧k ta ko rekar loi jen er make.

• Kajjitōk kajjitōk ko rej rōjan̄ rūkkatak ro n̄an pukōt uwaak ko ilo naan an Anij.

• Karuwainene rūkkatak ro n̄an kajjitōk kajjitōk ko aer make kōn ta eo rej ekkatak.

• Leļo̧k iien n̄an aolep rikatak n̄an lin̄uri kajjitōk eo m̧okta jān am kajjitōk ipper n̄an kwaļo̧k uwaak ko.

• Ļōmņak n̄an kajepel rūkkatak ro ilo kurup ko redik, n̄e ekkar.

• Kwaļo̧k men ko aikuji ilo alikkar n̄an jipan̄ rūkkatak ro eddōkļo̧k.

• Leļo̧k karuwainene ko rej im̧we rūkkatak ro n̄an em̧m̧anļo̧k ak ren jab eddo. Etale im karuwaineneik rūkkatak ro n̄an kwaļo̧k en̄jake ko aer.

• Jipan̄ rūkkatak ro ekkatak jān jeje ko rekwojarjar kōn:

  • Kakōļļeik eoon ko eļap meļeļeier, eļan̄n̄e kōņaan.

  • Karuwainene revelesōn ko ilo kōļmenļo̧kjeņ im jar.

  • Je men ko im̧we jān jetōb.

  • Kōm̧m̧ane juon jōnōl in ekkatak.

  • Kōm̧m̧ane kōttōpar ko n̄an jerbale ta eo rej ekkatak.