Mangyawis iti Napasnek a Panagsursuro

Awan duadua a makapasiddaaw a makaparegta a buyaen ti Mangisalakan a mangmagna iti rabaw ti danum. Ngem saan nga umdas dayta para ken ni Pedro. Tinarigagayanna nga aramiden no ania ti inaramid ti Mangisalakan, mapan iti ayanna, ken maaddaan iti isu met la a mismo a padas. “Ibilinmo nga umayak kenka a magna iti rabaw ti danum,” kinunana. Simmungbat ti Mangisalakan nga addaan iti simple nga awis: “Umayka.” Iti dayta, dimsaag ni Pedro manipud iti bilog ket impakitana kadatayo a ti kinadisipulo ket saan a di makaparegta a padas (kitaen iti Mateo 14:24–33). Kasapulan daytoy ti pammati ken ni Cristo ken napasnek a panagkagumaan. Ngem daytoy pay ti mangyeg iti nabaknang a gunggona ti pannakipagna iti Mangisalakan.

“Umayka.” “Umayka ket kitaem.” “Umayka, surotennak.” “Inkan, ket aramidem met ti kasta” (Mateo 14:29; Juan 1:39; Lucas 18:22; 10:37). Manipud iti rugi ti panagministrona, inawis ti Mangisalakan dagiti pasurotna a mangpadas mismo kadagiti kinapudno, bileg, ken ayat nga indiayana. Inaramidna daytoy gapu ta daytoy a talaga ti kaipananan ti panagsursuro. Ngem saan laeng a panagdengngeg wenno panagbasa; daytoy pay ti panagbalbaliw, panagbabawi, ken panagdur-as. Kadagiti balikas ti Mangisalakan, umay ti panagsursuro “babaen iti panagadal ken kasta met iti pammati ”(Doktrina ken Katulagan 88:118; nainayon ti panangyunay-unay). Ket iraman ti pammati ti panagtignay para iti bagbagitayo, saan laeng a painaknakman (kitaen iti 2 Nephi 2:26).

No surotentayo ti pagwadan ti Mangisalakan, awisentayo dagiti sursuruantayo nga agdawat, agsapul, ken umawag—ket kalpasanna agbirok (kitaen iti Mateo 7:7–8). Ket awatentayo mismo dayta nga awis. Sangkamaysa, babaen ti bukodtayo a pammati ken ni Cristo ken napasnek a panagkagumaan, maammuantayonto para iti bagbagitayo no ania ti kayat a sawen ti makipagna Kenkuana.

Tapno Mangyawis iti Napasnek a Panagsursuro

• Tulongan dagiti agad-adal nga umawat iti pangrebbengan para iti panagsursuroda.

• Allukoyen dagiti agad-adal a mangam-ammo iti Mangisalakan babaen iti panagadal iti ebanghelio iti inaldaw.

• Awisen dagiti agad-adal nga agsagana nga agsursuro.

• Allukoyen dagiti agad-adal a mangibinglay kadagiti kinapudno a masursuroda.

• Awisen dagiti agad-adal nga agbiag iti no ania ti masursuroda.

Tinulongan ti Mangisalakan dagiti Dadduma nga Umawat iti Pagrebbengan para iti Panagsursuroda

Ti panangbangon kadagiti sasakayan a sitatalged a mangdaliasat kadagiti taaw ket agbalin a narigat nga aramid para iti tunggal maysa. Ti kabsat ni Jared “agtultuloy nga inturong ti ima ti Apo” (Ether 2:6), nga umaw-awat kadagiti annuroten maipapan iti kadakkel dagiti bilog ken no kasano a maaddaanda iti angin. Ngem ania ti madlawyo maipapan no kasano a simmungbat ti Apo idi nagsaludsod ti kabsat ni Jared maipapan iti panangted iti silaw kadagiti sasakayan? (kitaen iti Ether 2:22–25). Kasano a naparaburan ti kabsat ni Jared iti awis a mangaramat iti pammatina iti kastoy a wagas? (kitaen iti Ether 3:1–16).

Mabalin a nalaklaka nga ibaga lattan kadagiti agad-adal ti amin a banag a mapanunotmo a nasken a maammuanda. Nupay kasta, imbalakad ni Elder David A. Bednar: “Nasken a saan koma a kastoy ti panggeptayo ‘Ania ti ibagak kadakuada?’ Ketdi, dagitoy dagiti saludsod a damagentayo ‘Ania ti mayawisko nga aramidenda? Ania dagiti naparegta a saludsod a madamagko a, no natallugodda a sumungbat, mangruginto a maawis ti Espiritu Santo iti biagda?” (evening with a General Authority, Peb. 7, 2020, broadcasts.ChurchofJesusChrist.org).

Ibilangmo no kasano a maawismo dagiti agad-adal nga umawat iti pagrebbengan para iti panagsursuroda. Kas pagarigan, mabalinmo nga awisen ida nga agdamag iti bukodda a saludsod, agsukisok iti sungbat, agutob, ken mangibinglay wenno mangisurat kadagiti kapanunotan ken riknada. No aramidenda, mapapigsadanto ti pammatida, matakuatanda dagiti kinapudno iti balikas ti Dios, ken maaddaanda iti bukodda a padas kadagitoy a kinapudno. No umawattayo iti pagrebbengan para iti bukodtayo a panagsursuro, maisaotayo, kas iti inaramid ni Joseph Smith, “Nasursurok iti bagik” (Joseph Smith—Pakasaritaan 1:20).

Dagiti Saludsod nga Utoben: Apay a napateg nga agbalin a naregget dagiti agad-adal imbes a saan a naregget iti panagsursuroda? Kasano a matulongam ida nga umawat iti pagrebbenganda para iti bukodda a panagsursuro? Kasano a natulongandaka dagiti mannursuro a mangaramid iti daytoy? Ania dagiti pagarigan manipud kadagiti nasantuan a kasuratan a mapanunotmo a nakaawisan dagiti tao nga agsursuro para iti bagbagida? Kasano a makaapekto iti no kasano ti panangisurom dagitoy a pagarigan?

Manipud kadagiti Nasantuan a Kasuratan: 1 Nephi 11; Doktrina ken Katulagan 9:7–8; 58:26–28; 88:118–125; Joseph Smith—Pakasaritaan 1:11–20

Inallukoy ti Mangisalakan dagiti Dadduma a Mangam-ammo Kenkuana babaen ti Panagadal iti Balikasna

Idi dimteng ti panawen nga opisial a buklen ti Mangisalakan ti Simbaanna kadagiti ud-udina nga aldaw, imbagana kadagiti katulonganna, “Agpannurayka kadagiti banag a naisurat” (Doktrina ken Katulagan 18:3). Pudno a, ti Libro ni Mormon, a dandani nalpasdan a naipatarus, naglaon iti makatulong iti panangiturong para iti aramid, agraman no kasano ti mangbuniag, kasano ti mangannong iti sakramento, ken dadduma pay a napapateg a detalye. Ngem tarigagayan pay ti Mangisalakan a makita dagiti katulonganna dagiti paltiing kas maysa a gundaway tapno dumngeg Kenkuana ken mangam-ammo Kenkuana a nasaysayaat. Iti dayta isu met la a paltiing, kinunana kadakuada, “Ta ti timekko ti mangibagbaga [dagitoy a balikas] kadakayo; … gapuna, mabalinyo a paneknekan a nangngegyo ti timekko, ken ammoyo dagiti balikasko” (Doktrina ken Katulagan 18:35–36).

Panunotem maipapan dagiti tao a sursuruam. Kasano a makitada ti panagadal iti nasantuan a kasuratan? Para iti dayta a banag, kasano a makitada daytoy? Ad-adda pay daytoy ngem iti inaldaw nga obligasion? No adalenyo dagiti nasantuan a kasuratan, mariknayo kadi a direkta a makisarsarita ti Mangisalakan kadakayo? Insuro ni Presidente Russell M. Nelson: “Sadino kadi ti mabalin a pakangngegantayo Kenkuana? Mabalintayo ti agbasa kadagiti nasantuan a kasuratan. … Napateg ti inaldaw a napasnek a panagbasa iti balikas ti Dios para iti naespirituan a pannakaispal, nangnangruna kadagitoy nga aldaw a kumarkaro ti pannakaburibor. No agpennektayo kadagiti balikas ni Cristo iti inaldaw, dagiti balikas ni Cristo ti mangibaganto kadatayo no kasano ti agresponde kadagiti rigat a ditayo kaano man impagarup a mapadasantayo” (“Hear Him,” Liahona, Mayo 2020, 89). No mangisuroka, allukoyem dagiti agad-adal a mangadal kadagiti nasantuan a kasuratan nga addaan iti panggep ti panangsapul iti Mangisalakan—saan laeng a panangsapul kadagiti bersikulo wenno dagiti kinapudno maipapan Kenkuana no di ket panangsapul Kenkuana. Ti idedengngeg iti timek ti Apo iti inaldaw kadagiti nasantuan a kasuratan ket mainaig iti pundasion iti tungpal biag, agwaywayas a panagsursuro iti ebanghelio.

Dagiti Saludsod nga Utoben: Ibilangmo ti bukodmo nga ugali iti panagadal iti nasantuan a kasuratan. Kasano a nangpapigsa ti panagadal iti balikas ti Dios iti relasionmo Kenkuana? Ania ti maaramidmo tapno mapasayaat ti panagadalmo? Kasano a maparegtamto dagiti dadduma nga agadal iti balikas ti Dios a sipapasnek ken masansan? Ania dagiti bendision nga awatendanto no aramidenda dayta?

Manipud kadagiti Nasantuan a Kasuratan: Josue 1:8; 2 Timoteo 3:15–17; 2 Nephi 32:3; Jacob 2:8; 4:6; Doktrina ken Katulagan 33:16

Inawis ti Mangisalakan dagiti Dadduma nga Agsagana nga Agsursuro

Uray dagiti kasayaatan a bukel ket saan a mabalin a dumakkel iti natangken, nabato, wenno nasiit a daga. Maipada, nga uray ti kapatgan ken makaitandudo iti pammati a doktrina ket saan a nalabit a mangbalbaliw iti puso a saan a nakasagana nga umawat iti daytoy. Paset dayta ti mensahe ti pangngarig ti Mangisalakan maipapan iti agmulmula, bukbukel, ken daga nga agduduma ti kasasaadna. Adda iti “nasayaat a daga”—ti puso a napalukneng ken nadalusan kadagiti naespirituan a bato ken siit—nga ited ti balikas ti Dios a bunga a mangmangted iti biag (kitaen iti Mateo 13:1–9, 18–23).

Napateg ti naespirituan a panagsagana—para kenka ken para kadagiti tao a sursuruam. Ngarud kasano a tulongantayo nga agsagana ti puspusotayo tapno isuda ti “nasayaat a daga” para iti balikas ti Dios? Ibilangmo dagiti sumaganad a pagbatayan ti panagsagana, a mabalinmo a yaplikar iti biagmo ken yallukoy iti biag dagiti sursuruam. Agkararagka a mangammo no ania ti kayat ti Apo a sursuruem. Agbiagka iti wagas a mangawis iti kaaddana iti biagmo. Agbabawika iti inaldaw. Taraonam ti tarigagaymo nga agsursuro babaen ti panagdamag kadagiti napudno a saludsod. Adalem ti balikas ti Dios nga addaan iti pammati nga iturongnakanto kadagiti sungbat. Luktam ti pusom iti ania man nga isuronanto kenka.

No agsagana dagiti agad-adal iti kastoy a wagas, maaddaandanto kadagiti naespirituan a mata a kumita ken lapayag a dumngeg no ania ti kayat ti Apo a maammuanda (kitaen iti Mateo 13:16).

Dagiti Saludsod nga Utoben: Ania ti ar-aramidem a mangisagana iti bagim tapno agsursuro? Kasano a ti panagsaganam makaapekto iti wagas a panagkitam, panagdengngeg, ken panangawat iti balikas ti Dios? Kasano a maparegtam dagiti dadduma nga agsagana nga agsursuro? Ania ti pagdumaan a maaramid dayta iti no kasano nga awatenda dagiti kinapudno ti ebanghelio?

Manipud kadagiti Nasantuan a Kasuratan: Enos 1:1–8; Alma 16:16–17; 32:6, 27–43; 3 Nephi 17:3

Mangted pagimbagan kadagiti agad-adal dagiti gundaway a mangibinglay iti tunggal maysa no ania ti masursuroda.

Inallukoy ti Mangisalakan dagiti Dadduma a Mangibinglay kadagiti Kinapudno a Sursuruenda

“Nabuntogak nga agsasao,” sililiday akinuna ni Enoc idi inawagan ti Apo tapno mangikasaba iti ebanghelio. Ngem ti kinalaing nga agsao saan a kaano man naidawat a kasapulan iti katulongan ti Apo. Ketdi, inkari ti Apo ken ni Enoc a no adda umdas a pammatina a manglukat iti ngiwatna, umay dagiti balikas. “Pagbalikasenkanto,” kinunana (Moises 6:31–32). Inaramat ni Enoc ti pammatina, ket pudno a nagsao ti Apo babaen kenkuana, nga addaan kadagiti balikas a nabileg unay a nakaigapuan dagiti tao tapno agpigergerda (kitaen iti Moises 6:47). Kinapudnona, dagitoy ti gapu ti panaggarigen-gen ti daga mismo. Nagkusukos dagiti bantay, nagbaliw ti turong ti agus ti danum dagiti karayan, ken nagbuteng dagiti pagilian kadagiti tao ti Dios, “nakabilbileg ti balikas ni Enoc, ken naindaklan unay ti bileg ti pagsasao nga inted kenkuana ti Dios” (Moises 7:13).

Tarigagayan ti Apo kadatayo amin—saan laeng a dagiti propetana—a maaddaan iti bileg a mangisao iti balikasna. Tarigagayanna dayta para iti amin kadatayo, agraman dagiti tao a sursuruam (kitaen iti Doktrina ken Katulagan 1:20–21). Mabalin a di pagkusukosen dagiti balikastayo dagiti bantay wenno mangiturong kadagiti karayan, ngem matulongandatayo a mangbalbaliw kadagiti puso. Dayta ti gapu no apay a napateg unay a mangted kadagiti agad-adal iti gundaway a mangibinglay iti tunggal maysa no ania ti masursuroda maipapan iti Mangisalakan ken ti ebangheliona. Ti panangaramid iti daytoy ti mangtulongto kadakuada a mangibiag kadagiti kinapudno a maisursuro kadakuada ken mangyebkas kadagitoy. Daytoyto pay ti mangtulong kadakuada a makagun-od iti panagtalek iti kabaelanda a mangibinglay kadagiti kinapudno iti dadduma pay a kasasaad.

Dagiti Saludsod nga Utoben: Panunotem maipapan iti maysa a gundaway a naisaritam maipapan iti kinapudno ti ebanghelio iti maysa a tao. Ania ti nasursurom manipud iti padas? Kaano a nagyamanka a naaddaan ti maysa a tao iti tured a mangibinglay kadagiti kapanunotan ken pammatina? Kasano a mangtedto iti pagimbagan dagiti tao a sursuruam manipud kadagiti gundaway a mangisarita maipapan kadagiti banag a masursuroda? Ania dagiti gundaway a mapartuatmo para kadakuada?

Manipud kadagiti Nasantuan a Kasuratan: Alma 17:2–3; Moroni 6:4–6; Doktrina ken Katulagan 84:85; 88:122; 100:5–8

Inawis ti Mangisalakan dagiti Dadduma nga Agbiag iti No Ania ti Insurona

“Kasta koma ti panaglawag ti silawyo iti sanguanan dagiti tao.” “Ayatenyo dagiti kabusoryo.” “Agdawatkayo, ket maikkankayto.” “Sumrekkayo iti ruangan a nailet.” (Mateo 5:16, 44; 7:7, 13.) Sumagmamano dagiti kalawagan, nakallalagip unay nga awis iti intero a naindagaan a panangministro ti Mangisalakan ket naisao bayat ti panangisurona kadagiti disipulona iti maysa a bakras ti bantay a matannawagan iti Baybay ti Galilea. Ti panggep ti Mangisalakan ket mangbalbaliw kadagiti biag, kas inlawlawag ti panggibus nga awisna: “Siasino man a dumngeg kadagitoy a saok ket aramidenda ida, ipariskonto iti maysa a tao a masirib, a nangbangon iti balayna iti bato” (Mateo 7:24; nainayon ti panangyunay-unay).

Matinnag dagiti tudo ken umay dagiti bagyo ken pumug-aw dagiti angin iti biag ti tunggal maysa. Ti panagsursuro maipapan iti ebanghelio saan nga umdas no nasken a masarkedan dagiti agad-adal ti amin a pannubok a pakaipasanguandanto. Daytoy ti gapu no apay a nasken a saantayo nga agkedked a mangawis kadagiti agad-adal a mangibilang no kasano a mabalinda nga ibiag no ania ti masursuroda. Gapu iti respeto iti kinawaya a panagpili dagiti dadduma, agbalinto a sapasap ti adu kadagiti pangawistayo: “Ania ti mariknam a nakaawisan ti pasnekmo nga aramiden?” Sagpaminsan a mabalin a nasken a nalawlawag dagiti awistayo: “Mangpilikayo kadi iti maysa a kababalin ti Mangisalakan a kayatmo nga itrabaho?” Bayat ti panangipaaymo kadagiti gundaway a dumngeg, mangbigbig, ken mangibinglay dagiti agad-adal kadagiti pannignay manipud iti Espiritu Santo, suruamto ida no ania dagiti bukod a tignay a nasken nga aramidenda. Tulongam dagiti agad-adal a mangibilang kadagiti bendision a sumarunonto bayat ti panagtignayda iti no ania ti sursuruenda, ken allukoyem ida nga agpursigi uray no narigat daytoy. Ti panagbiag iti kinapudno ti kaalistuan a dana nga agturong iti dakdakkel a pammati, pammaneknek, ken kumbersion. Kas iti kinuna ti Mangisalakan, ti panagbiag iti doktrina ti Ama ket ti wagas para iti amin kadatayo tapno pudno nga ammuen a pudno ti doktrina (kitaen iti Juan 7:17).

Dagiti Saludsod nga Utoben: Kaano a naparegtaka nga agtignay gapu iti inted nga awis ti maysa a tao? Kasano a nagbalbaliw ti biagmo kas bungana? Sapulem dagiti pangawis a naited kadagiti nasantuan a kasuratan ken dagiti lider ti Simbaan. Ania ti masursurom a makatulong kenka bayat ti panangawismo kadagiti dadduma nga agtignay? Iti ania a wagas a pakasurnadam kadagiti pangawismo?

Manipud kadagiti Nasantuan a Kasuratan: Lucas 10:36–37; Juan 7:17; Santiago 1:22; Mosiah 4:9–10; Doktrina ken Katulagan 43:8–10; 82:10

Sumagmamano a Wagas a Pakayaplikaran No Ania ti Masursurom

• Idawatmo kadagiti dadduma nga umay a nakasagana a mangibinglay iti maysa a banag nga insuro ti Espiritu Santo kadakuada, kas iti maysa a nalawag a pannakaammo ken pannakaawat manipud iti napnuan kaipapanan a binatog iti nasantuan a kasuratan.

• Ikkam dagiti agad-adal kadagiti gundaway a mangisuro iti maysa a paset ti lesson.

• Allukoyem dagiti agad-adal a mangrebyu iti maysa a video, nasantuan a kasuratan, wenno mensahe sakbay ti panagkikitayo.

• Pagkedkedam ti ugali a mangsungbat iti tunggal saludsod. Iramanmo dagiti dadduma iti panagsapul kadagiti sungbat.

• Sakbay ti panangibinglay kadagiti nalawag a pannakaammo ken pannakaawat maipapan iti nasantuan a kasuratan, idawat kadagiti agad-adal a mangibinglay iti bukodda.

• Agdamag kadagiti saludsod a mangallukoy kadagiti agad-adal a mangsapul kadagiti sungbat iti balikas ti Dios.

• Awisen dagiti agad-adal nga agdamag iti bukodda a saludsod maipapan iti no ania ti masursuroda.

• Mangipaay iti oras iti amin nga agad-adal a mangutob iti maysa a saludsod sakbay ti panagkiddaw kadakuada a mangibinglay kadagiti sungbatda.

• Ibilang ti panangbingay-bingay kadagiti agad-adal iti babassit a grupo ti panaglilinnawag, no maitutop.

• Ipeksam dagiti nalawag a namnamaen a makatulong iti panagdur-as dagiti agad-adal.

• Mangted kadagiti panangawis a mangparegta kadagiti agad-adal tapno dumur-as ngem saan a makatalipupos. Surnadam ken awisem dagiti agad-adal a mangibinglay kadagiti padasda.

• Tulongam dagiti agad-adal a makasursuro manipud kadagiti nasantuan a kasuratan babaen ti:

  • Panangmarka kadagiti napnuan kaipapanan a binatog, no tarigagayan.

  • Panangawis iti paltiing babaen ti panagutob ken panagkararag.

  • Panangisurat kadagiti naespirituan nga impresion.

  • Panangpatalinaed iti maysa a study journal.

  • Mangituding kadagiti panggep a tun-oyen nga agtignay iti no ania ti masursuroda.