Tītau manihini ’ia ’apo i te ha’api’ira’a ma te itoito

E mea māere mau ’ia hi’o i te Fa’aora i te haerera’a nā ni’a i te ’are. ’Aita rā te reira i nava’i nō Petero. ’Ua hina’aro ’oia e rave i te mea tā te Fa’aora i rave, ’ia vai i te vāhi tei reira ’oia ’e ’ia ora ’oia iho i taua ato’a ’ohipa e tupu ra. ’Ua parau ’oia, « e parau mai iā’u ’ia haere atu vau ia ’oe na nā ni’a i te ’are ». Pāhono atu ra te Fa’aora ma te hō’ē anira’a manihini ’ōhie : « ’A haere mai ». I reira, ’ōu’a atu ra Petero mai roto atu i te hau o te pahī ma te fa’a’ite mai ia tātou ē, e ’ere te ti’ara’a pipi i te ’ohipa fa’aea noa (hi’o Mataio 14:24–33). E tītau te reira i te fa’aro’o i te Mesia ’e i te tauto’ora’a itoito. E hōpoi ato’a mai rā te reira i te ha’amāuruurura’a rahi i te haerera’a ’e te Fa’aora.

« ’A haere mai ». « ’A haere mai ’e ’a hi’o ». « ’A haere mai, ’a pe’e mai iā’u » « ’E haere ’oe, e na reira ato’a » (Mataio 14:29 ; Ioane 1:39 ; Luka 18:22 ; 10:37). Mai te ’ōmuara’a o tāna misiōni, ’ua ani manihini te Fa’aora i tāna mau pipi ’ia ora nō rātou iho i te mau parau mau, te mana ’e te here ’o tāna i pūpū na. ’Ua nā reira ’oia nō te mea ’o te reira mau te ’apora’a mau. E ’ere noa i te fa’aro’ora’a ’aore rā i te tai’ora’a ; ’o te tauira’a ato’a rā, te tātarahapara’a ’e te haerera’a i mua. I roto i te mau parau a te Fa’aora, e tae mai te ’apora’a mai « nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118 ; tu’uhia te ha’apāpūra’a). ’E tei roto i te fa’aro’o te ’ohipara’a i tei au i tō tātou iho hina’aro, ’eiaha ma te ha’avīhia (hi’o 2 Nephi 2:26).

’Ia pe’e ana’e tātou i te hi’ora’a o te Fa’aora, tē ani manihini nei tātou i te feiā tā tātou e ha’api’i nei ’ia ani, ’ia ’imi ’e ’ia pātōtō—’e i muri iho e ’itea-hia-mai (hi’o Mataio 7:7–8). ’E e fāri’i tātou iho i teie anira’a manihini. Ma te ’āmui, maoti tō tātou iho fa’aro’o i te Mesia ’e tā tātou tauto’ora’a itoito, e ’ite tātou iho i te aura’a ’ia haere nā muri iho iāna.

Nō te tītau manihini ’ia ’apo i te ha’api’ira’a ma te itoito

• Tauturu i te mau pīahi ’ia amo i te hōpoi’a nō tā rātou ’apora’a i te ha’api’ira’a.

• E fa’aitoito i te mau pīahi ’ia ’ite māite i te Fa’aora, nā roto i te tuatāpapara’a i te ’evanelia i te mau mahana ato’a.

• E ani i te mau pīahi ’ia fa’aineine nō te ’apo i te ha’api’ira’a.

• E fa’aitoito i te mau pīahi ’ia fa’a’ite i te mau parau mau tā rātou e ’apo ra.

• E ani i te mau pīahi ’ia ora i te mea tā rātou e ’apo ra.

’Ua tauturu te Fa’aora ia vetahi ’ē ’ia amo i te hōpoi’a nō tā rātou ’apora’a i te ha’api’ira’a

Te hāmanira’a i te mau pahī ’o te fano atu nā ni’a i te moana ma te pāruruhia, e ’ere ïa i te ’ohipa ’ōhie nō te ta’ata. ’Ua « arata’i-tāmau-hia » te taea’e o Iareda « e te rima o te Fatu » (Etera 2:6), ma te fāri’i i te mau arata’ira’a nō ni’a i te taraira’a i te mau pahī ’e e nāhea rātou ’ia ha’apuvaivaihia. E aha rā tā ’oe e ’ite nei i tō te Fatu pāhonora’a atu, ’a ani ai te taea’e o Iareda nō ni’a i te tu’ura’a i te māramarama i roto i te mau pahī ? (hi’o Etera 2:22–25). Nāhea te taea’e o Iareda i te ha’amaita’ira’ahia i te anira’a ’ia fa’a’ohipa i tōna fa’aro’o mai teie te huru ? (hi’o Etera 3:1–16).

E mea ’ōhie a’e paha ’ia parau noa i te mau pīahi i te mau mea ato’a tā ’oe e mana’o ra e ti’a ia rātou ’ia ’ite. Teie rā, ’ua a’o mai Elder David A. Bednar : « ’Eiaha tō tātou hina’aro ’ia riro, ‘E aha tā’u e parau atu ia rātou ?’ ’Āhiri i te reira, te mau uira’a e ti’a ’ia ui ia tātou iho ’oia ho’i ‘E aha tā’u e ani atu ia rātou ’ia rave ? E aha te mau uira’a fa’auru tā’u e ui atu, mai te mea ’ua ineine rātou nō te pāhono mai, e ha’amata te reira i te ani manihini i te Vārua Maita’i i roto i tō rātou orara’a ?’ » (’āru’i ’e te hō’ē huimana fa’atere rahi, 7 nō Fepuare 2020, broadcasts.ChurchofJesusChrist.org).

’A feruri e nāhea ’oe i te ani manihini i te mau pīahi ’ia amo i te hōpoi’a nō tō rātou ’apora’a mai. ’Ei hi’ora’a, e nehenehe ’oe e ani manihini ia rātou ’ia ui i tā rātou iho mau uira’a, ’ia ’imi i te mau pāhonora’a, ’ia feruri ’e ’ia fa’a’ite ’aore rā ’ia pāpa’i i tō rātou mau mana’o ’e mau ’āehuehu. ’A nā reira ai rātou, e ha’apūai rātou i tō rātou fa’aro’o, e ’ite rātou i te mau parau mau i roto i te parau a te Atua, ’e e fāri’i i tō rātou iho mau ’itera’a rau nā roto i teie mau parau mau. ’A amo ai tātou i te hōpoi’a nō tō tātou iho ’apora’a mai, e nehenehe tātou e parau, mai tā Iosepha Semita i nā reira na, « ’ua ’ite au iho » (Iosepha Semita—’Ā’amu 1:20).

Te mau uira’a e feruri : Nō te aha e mea faufa’a nō te mau pīahi ’ia vai itoito noa ’eiaha rā ’ia fa’aea noa i roto i tā rātou ’apora’a mai i te ha’api’ira’a ? Nāhea ’oe i te tauturu ia rātou ’ia amo i te hōpoi’a nō tō rātou ’apora’a mai ? Nāhea te mau ’orometua ha’api’i i te tauturu ia ’oe ’ia rave i te reira ? E aha te mau hi’ora’a nō roto mai i te mau pāpa’ira’a mo’a tā ’oe e mana’o nei, i reira te mau ta’ata i te anira’ahia ’ia ha’api’i mai nā roto ia rātou iho ? Nāhea teie mau hi’ora’a i te fa’auru i tā ’oe huru hōro’ara’a i te ha’api’ira’a ?

Nō roto mai i te mau pāpa’ira’a mo’a : 1 Nephi 11 ; Te Ha’api’ira’a Tumu ’e te mau Fafaura’a 9:7–8 ; 58:26–28 ; 88:118–125 ; Iosepha Semita—’Ā’amu 1:11–20

’Ua fa’aitoito te Fa’aora ia vetahi ’ē ’ia ’ite ē ’o vai nei ’oia nā roto i te ha’api’ira’a i tāna parau

I te taera’a te taime nō te Fa’aora e ha’amana i te fa’anahora’a i tāna ’Ēkālesia i te mau mahana hope’a nei, ’ua parau ’oia i tāna mau tāvini, « ’ia ti’aturi i te mau mea i pāpa’ihia ra » (Te Ha’api’ira’a Tumu ’e te mau Fafaura’a 18:3). ’Oia mau, te Buka a Moromona, ’o tā rātou i fātata i te fa’aoti i te ’īriti, tei roto te mau arata’ira’a e hina’arohia nō te ’ohipa, ’oia ato’a e nāhea ’ia bāpetizo, e nāhea ’ia fa’atere i te ’ōro’a mo’a ’e te tahi atu mau mea ri’i faufa’a rahi. ’Ua hina’aro ato’a rā te Fa’aora i tāna mau tāvini ’ia hi’o i tāna mau heheura’a ’ei fāna’ora’a nō te fa’aro’o iāna ’e nō te ’ite hōhonu atu ā iāna. I roto i taua ā heheura’a ra, ’ua parau ’oia ia rātou, « ’o tō’u ho’i reo teie e parau atu nei [i teie mau parau] ia ’oe na ; … nō reira, e ti’a ia ’oe ’ia fa’a’ite atu ē, ’ua fa’aro’o ’oe i tō’u nei reo, ’e ’ua ’ite ho’i i tā’u mau parau. » (Te Ha’api’ira’a Tumu ’e te mau Fafaura’a 18:35–36).

’A feruri i te mau ta’ata tā ’oe e ha’api’i nei. Nāhea rātou i te hi’o i te tuatāpapara’a i te mau pāpa’ira’a mo’a ? E ’o ’outou, nāhea ’oe i te hi’o i te reira ? ’Ua hau ānei i te hō’ē fa’ahepora’a tāmahana ? ’Ia tuatāpapa ana’e ’oe i te mau pāpa’ira’a mo’a, tē fāri’i ra ānei ’oe ē, tē paraparau ti’a mai ra te Fa’aora ia ’outou ? ’Ua ha’api’i te peresideni Russell M. Nelson : « E haere ti’a tātou i hea nō te fa’aro’o iāna ? E nehenehe tātou e haere i roto i te mau pāpa’ira’a mo’a … E mea faufa’a rahi te utuhira’a i roto i te parau a te Atua i te mau mahana ato’a nō te oraora pae vārua, i roto iho ā rā i teie mau mahana ’ārepurepu rahi. ’A ’oa’oa ai tātou i te mau parau a te Mesia i te mau mahana ato’a, e parau mai te mau parau a te Mesia ia tātou nāhea ’ia pāhono i te mau fifi ’aita roa atu tātou i feruri ē, e fārerei tātou » (« Fa’aro’o iāna », Liahona, Mē 2020, 89). ’A ha’api’i ai ’outou, ’a fa’aitoito i te mau pīahi ’ia tuatāpapa i te mau pāpa’ira’a mo’a ma te ’ōpua ’ia ’iteahia mai te Fa’aora—’eiaha i te ’imi-noa-ra’a i te mau ’īrava ’aore rā i te mau ’ohipa i tupu nō ni’a iāna, ’ia ’iteahia rā ’oia. E mea faufa’a roa te fa’aro’ora’a i te reo o te Fatu i te mau mahana ato’a i roto i te mau pāpa’ira’a mo’a, i roto i te hō’ē orara’a tā’āto’a nō te ’apo mai i te ha’api’ira’a ’evanelia ma te itoito ’e te ti’amā.

Te mau uira’a e feruri : ’A feruri i tā ’oe iho mau peu matarohia nō te tuatāpapa i te pāpa’ira’a mo’a. Nāhea te tuatāpapara’a i te parau a te Atua i te ha’apūai i tō ’oe iho aura’a ’e ’ōna ? E aha tā ’oe e nehenehe e rave nō te ha’amaita’i i tā ’oe tuatāpapara’a ? Nāhea ’oe i te fa’auru ia vetahi ’ē ’ia tuatāpapa itoito ’e te tāmau i te parau a te Atua ? E aha te mau ha’amaita’ira’a tā rātou e fāri’i ’a nā reira ai rātou ?

Nō roto mai i te mau pāpa’ira’a mo’a : Iosua 1:8 ; 2 Timoteo 3:15–17 ; 2 Nephi 32:3 ; Iakoba 2:8 ; 4:6 ; Te Ha’api’ira’a Tumu e te mau Fafaura’a 33:16

’Ua tītau manihini te Fa’aora ia vetahi ’ē ’ia fa’aineine nō te ’apo mai i te ha’api’ira’a

E’ita ato’a te mau huero maita’i roa a’e e tupu i ni’a i te repo pa’ari, te ’ōfa’ifa’i ’aore rā, te taratara. Hō’ē ā ato’a nō te ha’api’ira’a tumu faufa’a rahi roa a’e ’e te fa’auruhia a’e, e mea ’iti roa nō te taui i te ’ā’au tei ’ore i ineine nō te fāri’i i te reira. E tuha’a te reira nō te parau poro’i nō te parabole a te Fa’aora nō ni’a i te ta’ata ueue, te mau huero ’e te repo huru rau. Tei roto i te « repo maita’i »—te ’ā’au tei tāmarūhia ’e tei tāmāhia i te mau ’ōfa’i ’e i te mau taratara pae vārua—e riro ai te parau a te Atua ’ei hotu nō te ora (hi’o Mataio 13:1–9, 18–23).

E mea faufa’a roa te fa’aineinera’a pae vārua—nō ’oe ’e nō te mau ta’ata tā ’oe e ha’api’i nei. Nō reira, nāhea tātou i te tauturu ’ia fa’aineine i tō tātou ’ā’au, ’ia riro ’ei « repo maita’i » nō te parau a te Atua ? ’A feruri i te mau parau tumu nō te fa’aineinera’a i muri nei, ’o tā ’oe e nehenehe e fa’a’ohipa i roto i tō ’oe orara’a ’e e fa’aitoito i roto i te orara’a o te feiā tā ’oe e ha’api’i nei. ’A pure nō te ’ite e aha te ha’api’ira’a tā te Fatu e hina’aro ’ia ’apo mai ’outou. ’A ora’ia au i te anira’a manihini ’ia parahi mai ’oia i roto i tō ’oe orara’a. ’A tātarahapa i te mau mahana ato’a. ’A fa’a’amu i tō ’oe hina’aro ’ia ’apo mai i te ha’api’ira’a nā roto i te uira’a i te mau uira’a mau. ’A tuatāpapa i te parau a te Atua ma te fa’aro’o ē, e arata’i ’oia ia ’oe i te mau pāhonora’a. ’A ’īriti i tō ’oe ’ā’au i te mau mea ato’a tāna e ha’api’i ia ’outou.

’A fa’aineine ai te mau pīahi nō te ’apo mai i te ha’api’ira’a mai teie te huru, e roa’a ia rātou te mata pae vārua nō te hi’o ’e te tari’a nō te fa’aro’o i te mea tā te Fatu e hina’aro’ ia ’ite rātou (hi’o Mataio 13:16).

Te mau uira’a e feruri : E aha tā ’oe e rave nō te fa’aineine ia ’oe iho nō te ’apo mai i te ha’api’ira’a ? Nāhea tā ’oe fa’aineinera’a i te fa’auru i tā ’oe huru hi’ora’a, huru fa’aro’ora’a ’e huru māramaramara’a i te parau a te Atua ? Nāhea ’oe i te fa’auru ia vetahi ’ē ’ia fa’aineine nō te ’apo mai i te ha’api’ira’a ? E aha te ta’a-’ē-ra’a tā te reira e fa’atupu mai i roto i tā rātou fāri’ira’a i te mau parau mau o te ’evanelia ?

Nō roto mai i te mau pāpa’ira’a mo’a : Enosa 1:1–8 ; Alama 16:16–17 ; 32:6, 27–43 ; 3 Nephi 17:3

E fāna’o te mau pīahi i te mau rāve’a nō te fa’a’ite i te tahi ’e te tahi i te mea tā rātou i ’apo mai.

’Ua fa’aitoito te Fa’aora ia vetahi ’ē ’ia fa’a’ite i te mau parau mau tā rātou e ’apo ra

« E ta’ata reo maumau vau », ’ua ’oto Enoha i tō te Fatu pi’ira’a iāna ’ia haere e poro i te ’evanelia. ’Aita rā te reo maumau i riro na ’ei fa’ahepora’a nō te hō’ē tāvini a te Fatu. Maori rā, ’ua fafau te Fatu ia Enoha ē, mai te mea ’ua nava’i tōna fa’aro’o nō te hāmama i tōna vaha, e tae mai te mau parau. Parau mai ra ’oia : « Nā’u e hōro’a atu i te parau i tō ’oe na vaha » (Mose 6:31–32). ’Ua fa’a’ohipa Enoha i tōna fa’aro’o ’e ’oia mau, parau iho ra te Fatu nā roto iāna, ma te mana mau i tupu ai te rurutaina o te nūna’a (hi’o Mose 6:47). ’Oia ïa, ’ua fa’atupu te reira i te rurutaina o te fenua iho. ’Ua horo ’ē te mau mou’a, ’ua taui te mau ’ānāvai i tō rātou tahera’a ’e ’ua mata’u rahi roa te mau nūna’a i te nuna’a o te Atua, « i te pūai rahi o te parau a Enoha, ’e i te mana rahi o te reo tā te Atua i hōro’a iāna ra » (Mose 7:13).

Tē hina’aro nei te Fatu ia tātou pā’āto’a—’eiaha i tāna mau peropheta noa—’ia roa’a te mana nō te parau i tāna parau. Tē hina’aro nei ’oia te reira nō tātou pā’āto’a, ’oia ato’a nō te feiā tā ’oe e ha’api’i nei (hi’o Te Haʼapiʼiraʼa Tumu ʼe te mau Fafaura’a 1:20–21). E’ita tā tātou mau parau e fa’anu’u ’ē i te mau mou’a ’aore rā e fa’atīpu’u ’ē i te mau ’ānāvai, e nehenehe rā tā rātou e tauturu ’ia taui te mau ’ā’au. Nō reira e mea faufa’a roa ’ia hōro’a i te mau pīahi te mau rāve’a nō te fa’a’ite i te tahi ’e te tahi i te mea tā rātou i ’apo mai nō ni’a i te Fa’aora ’e tāna ’evanelia. E tauturu te reira ia rātou ’ia tu’u mai i roto ia rātou te mau parau mau tei ha’api’ihia ia rātou ’e ’ia fa’a’ite i te reira. E tauturu ato’a te reira ia rātou ’ia ha’amau i te ti’aturira’a i roto i tō rātou ’aravihi nō tefa’a’ite i te mau parau mau i roto i te tahi atu mau tupura’a.

Te mau uira’a e feruri : ’A feruri i te hō’ē taime ’a paraparau ai ’oe nō ni’a i te hō’ē parau mau o te ’evanelia i te hō’ē ta’ata. E aha te ha’api’ira’a tā rātou i ’apo mai nā roto mai i te ’ohipa i tupu ? E aha te taime ’a māuruuru ai ’oe nō te itoito o te hō’ē ta’ata tei fa’a’ite i tōna mau mana’o ’e tōna mau ti’aturira’a ? Nāhea te mau ta’ata tā ’oe e ha’api’i nei, e fana’o ai i te mau rāve’a nō te paraparau i te mau mea tā rātou i ’apo mai ? E aha te mau fāna’ora’a tā ’oe e nehenehe e fa’atupu nō rātou ?

Nō roto mai i te mau pāpa’ira’a mo’a : Alama 17:2–3 ; Moroni 6:4–6 ; Te Ha’api’ira’a Tumu ’e te mau Fafaura’a 84:85 ; 88:122 ; 100:5–8

’Ua tītau manihini te Fa’aora ia vetahi ’ē ’ia ora i te mea tāna i ha’api’i

« ’Oia ato’a tō ’oe māramarama, ’ia ’ana’ana ïa i mua i te aro o te ta’ata nei ». « E aroha atu i tō ’oe mau ’enemi ». « E ani, e hōro’ahia mai tā ’outou ». « E tomo nā te ’ūputa piriha’o ». (Mataio 5:16, 44 ; 7:7, 13). Te tahi o te mau anira’a manihini oraora roa a’e ’e te fa’ahiahia mau i roto i te tā’āto’ara’a o te misiōni a te Fa’aora, ’ua fa’ahitihia ïa ’a ha’api’i ai ’oia i tāna mau pipi i ni’a i te purou mou’a e ’itehia atu ai te miti nō Galilea. Te ’ōpuara’a a te Fa’aora ’o te tauira’a ïa i te mau orara’a, ’ia au i tei ha’apāpūhia i roto i tāna anira’a manihini hope’a : « ’O te fa’aro’o mai i tā’u nei mau parau, e ha’apa’o atu ra, e fāito vau iāna i te hō’ē ta’ata pa’ari, ’o tei fa’ati’a i tōna fare i ni’a i te papa » (Mataio 7:24 ; tu’uhia te ha’apāpūra’a).

’Ua topa te ua ’e ’ua tahe mai te pape pu’e ’e ’ua puhi te mau mata’i i roto i te orara’a o te mau ta’ata ato’a. Te ha’api’ira’a mai i te evanelia, e’ita te reira e nava’i nō te tauturu i te mau pīahi ’ia pāto’i i te mau tāmatara’a ’o tā rātou e fa’aruru atu. Nō reira ’eiaha tātou e taiā i te ani i te mau pīahi ’ia feruri e nāhea rātou ’ia ora i te ha’api’ira’a tā rātou i ’apo mai. Nō te fa’atura i te ti’amāra’a o vetahi ’ē, e riro te rahira’a o tā tātou mau anira’a manihini ’ei parau nō te tā’ato’ara’a : « E aha te mea e tauturu ia ’oe ’ia rave ? » I te tahi taime, ’ia riro tā tātou mau anira’a manihini ’ei mea pāpū maita’i atu ā : « E hina’aro āneie mā’iti ’oe i te hō’ē huru o te Fa’aora ’o tā ’oe e hina’aro e ’ohipa i ni’a ? » ’A hōro’a ai ’oe i te mau fana’ora’a i te mau pīahi ’ia fa’aro’o, ’ia ’ite mai ’e ’ia fa’a’ite i te mau muhumuhu nā roto mai i te Vārua Maita’i, e ha’api’i ’oia ia rātou e aha tā rātou iho ’ohipa e ti’a ’ia rave. Tauturu i te mau pīahi ’ia feruri i te mau ha’amaita’ira’a e tae mai ’a ha’a ai rātou i ni’a i te mea tā rātou i ’apo mai, ’e e fa’aitoito ia rātou ’ia tāpe’a maite noa atu e mea fifi te reira. Te orara’a i te parau mau ’o te ’ē’a vitiviti roa a’e ïa ē tae atu ai i te fa’aro’o, te ’itera’a pāpū, ’e te fa’afāriura’a. Mai tā te Fa’aora i parau, te orara’a i te ha’api’ira’a tumu a te Metua ’o te rāve’a ïa nō tātou pā’āto’a ’ia ’ite mau ē e parau mau te ha’api’ira’a tumu (hi’o Ioane 7:17).

Te mau uira’a e feruri : E aha te taime ’a fa’auruhia ai ’oe ’ia ’ohipa maoti te hō’ē anira’a tei fa’ataehia mai e te hō’ē ta’ata ? Nāhea tō ’oe orara’a i taui ai ’ei hope’ara’a ? E hi’o i te mau tītaura’a manihini tei hōro’ahia mai i roto i te mau pāpa’ira’a mo’a ’e nā te feiā fa’atere o te ’Ēkālesia. E aha tā ’oe i ’apo mai ’o tē nehenehe e tauturu ia ’outou, ’a ani manihini ai ’oe ia vetahi ’ē ’ia ’ohipa ? Nāhea ’oe ’ia ha’afaufa’a i tā ’oe tītaura’a manihini ?

Nō roto mai i te mau pāpa’ira’a mo’a : Luka 10:36–37 ; Ioane 7:17 ; Iakobo 1:22 ; Mosia 4:9–10 ; Te Ha’api’ira’a Tumu ’e te mau Fafaura’a 43:8–10 ; 82:10

Te tahi mau rāve’a nō te fa’a’ohipa i te mea tā ’oe i ’apo mai

• E ani ia vetahi ’ē ’ia haere ineine mai nō te fa’a’ite i te hō’ē mea tā te Vārua Maita’i i ha’api’i ia rātou, mai te hō’ē hi’ora’a nō roto mai i te hō’ē tuha’a māramarama nō te pāpa’ira’a mo’a.

• Hōro’a i te mau pīahi te mau rāve’a nō te ha’api’i i te hō’ē tuha’a o te hō’ē ha’api’ira’a.

• E fa’aitoito i te mau pīahi ’ia māta’ita’i fa’ahou i te hō’ē video, ’ia hi’o fa’ahou i te pāpa’ira’a mo’a, ’aore rā i te hō’ē a’ora’a hou te fārereira’a.

• Fa’a’oroma’i i te pāhono atu i te mau uira’a ato’a. E fa’aō mai ia vetahi ’ē i roto i te ’imira’a i te mau pāhonora’a.

• Hou ’oe ’a fa’a’ite ai i te mau mana’o nō ni’a i te hō’ē pāpa’ira’a mo’a, e ani i te mau pīahi ’ia fa’a’ite mai i tō rātou iho mana’o.

• E ui atu i te mau uira’a ’o tē fa’aitoito i te mau pīahi ’ia ’ite i te mau pāhonora’a i roto i te parau a te Atua.

• E ani i te mau pīahi ’ia ui i tā rātou iho mau uira’a nō ni’a i te ha’api’ira’a tā rātou i ’apo mai.

• Hōro’a i te taime i te mau pīahi ato’a ’ia feruri i te hō’ē uira’a, hou ’a ani atu ai ia rātou ’ia fa’a’ite mai i te mau pāhonora’a.

• ’A feruri i te vāhi i te mau pīahi ’ei pupu na’ina’i nō te ’āparaura’a, mai te mea e tano.

• Fa’a’ite māramarama i te mau tītaura’a nō te tauturu i te mau pīahi ’ia tupu i te rahi.

• ’A fa’atae i te mau anira’a manihini ’o te fa’auru i te mau pīahi ’ia ha’amaita’i ia rātou, e ’ere rā i te mea teimaha. ‘A pe’e ’e ’a ani i te mau pīahi ’ia fa’a’ite mai i tō rātou mau ’itera’a rau.

• Tauturu i te mau pīahi ’ia ’apo mai i te mau ha’api’ira’a nā roto mai i te mau pāpa’ira’a mo’a ma te :

  • Fa’a’ūra’a i te mau tuha’a faufa’a rahi, mai te mea e hina’arohia.

  • Anira’a i te heheura’a nā roto i te feruri-hōhonu-ra’a ’e te pure.

  • Pāpa’ira’a i te mau mana’o pae vārua e tae mai.

  • Tāpe’ara’a i te hō’ē buka tuatāpapara’a ’ā’amu.

  • Ha’amaura’a i te mau fā nō te ha’a i ni’a i te mea tā rātou i ha’api’i mai.