Iango ibukin Mwaitin Aron Tein te Angareirei ao Taan Reiakinaki

Tuua n te anga reirei n ana Kawai te Tia Kamaiu e kona ni karaoaki inanon ni kabane taai n angareirei—n te mweenga, te taromauri, ao n taabo nako. Ma irarikina, taai akanne aairi ma oin waakiia aika onoti. Te tiekition aio e anga iango riki tabeua aika a onoti nakoia taan reiakinaki ao tein aron angareirei.

Mweenga ao Utu

Te Mweenga Bon te Tabo ae Tamaroa ibukiia Reiakinan ao Kamatebwaian te Euangkerio

Beretitenti Russell M. Nelson e a tia n reirei bwa te mweenga e riai n riki bwa te tabo ae “boboto iai reiakinan te euangkerio” (“Becoming Exemplary Latter-day Saints,” Riaona, Nobembwa 2018, 113). Te reirei are e riki n te taromauri ke n te tieminari a kakawaki ao ni kainanoaki, ma a bon katauaki bwa a na boutokaa te angareirei are e riki n te mweenga. Te tabo raoi—ao te tabo ae tamaroa—ibukin reiakinan te euangkerio, i bon ibukira ao ara utu, bon n te mweenga.

Ma e aki nanonaki anne bwa reiakinan te euangkerio ae tamaroa e a bon karina naban riki n te mweenga; e anaa te kekeiaki ae barongaaki raoi. E a tia Beretitenti Nelson n taekina ae ko na bae n kainanoa te “bitaki” ke “manga bita tein mweengam”—tiaki nanon ae uruan oon am auti ke kabwaroan aan am auti ae boou ma tao man rinanoana bwa e uara te tamnei inanon mweengam, ni ikotaki ma te bwai ae ko anga nakon te tamnei anne (“Becoming Exemplary Latter-day Saints,” 113). Te katooto, iangoa te katangitang, witeo, ao bwaai ni kaongoraa inanon mweengam, tamnei ake iaon am oo; ao aroia kaain am utu n taetae ao ni karaoa te mwakuri nakoia imarenaia. A kaoa namakinan te Tamnei ae Raoiroi karaoakin bwaai aikai? Ko katanakoa te tai teuana ibukin reiakinan te euangkerio n tatabemanii ngkami ao n ami utu? Kaain te utu a namakina te tangira, a mano, ao ni kaan nakon te Atua ngkana a mena ni mweengam?

Ko na bae n aki namakinna ae iai am konaa n taua aron karekean namakinan te tamnei ni mweengam. Ngkana ngaia anne, riiki bwa te kakairi ae tamaroa are ko kona n riki iai ao butiia te Uea ibukin te buoka. E na karinea am kekeiaki ae raoiroi. Ngkana ko kataia n reirei ao ni kamatebwaia te euangkerio, e ngae ngke ko tuai man noora mwiina aika a tamaroa n te tai anne, ko bon tokanikai.

Te Kamatebwai n te Mweenga E Bon Riki man te Aro n Reitaki

“Tangiriia naake ko reireiniia” e kaineti nakon waaki ni kabane n reireian te euangkerio, ma inanon te mweenga, te tangira e riai n roko n ae e bon ririki ao n namakinaki n ae korakora. E ngae ngke mweengam e aki rangi n tamaroa, e bon nanonaki bwa te tabo ae boboto iai reiakinan te euangkerio ibukina bwa ikanne are e mena iai te reitaki ae akea tokina ae ti kateia. Tia reirei itinanikun te mweenga tao e korakora riki aia taneiai ke kataneiai ngkai taan reirei, ma aki kona ni katotoonga te konabwai n tangira, n te reitaki ae akea tokina are e reke n te mweenga. Ngaia are kawakin reitaki akanne. Kabanea te tai ao te kekeiaki ae tau n ongoraa nakoia kaain am utu ao katea te onimakinaki ao te atatai ma ngaiia. Aio e na buoka katean te aa ae matoa ibukin am kekeiaki n reirei ao ni kamatebwaia te euangkerio n te mweenga.

Te Kamatebwai n te Mweenga E Kona ni Baireaki Karaoana ma ni Katoatai Naba

Angiin taian kiraati n te Ekaretia a karaoaki te taina n te wiiki, ma taia ae baireaki ni moanakina ao tokina, ma aio tiaki aron are n te mweenga. Ko na bae ni bairea karaoan te reirei n te mweenga n te tairiki ke kamatebwaian koroboki aika tabu n te utu, ma te tai n anga reirei n te utu e aki toki n riki n akea baireana, e riki n tainako—n tain te amwarake, karaoan tabem, n tain te takakaro, mwananga nako ni mwakuri ke reirei, wareware n te boki, ke uaia ni mataku n te tamnei. Bwakan te karau ae korakora e kona n reke bwa te tai ni marooro iaon ae e kanga te Tia Kamaiu ni kamanoira man angibuaka n te maiu n tamnei. Te kairake ae e rinanon kangaangan karaoan ana rinerine tao e a tauraoi n reirei iaon karekean oin ana kaotioti. Te ataei ae maaku e na buokaki man am kakoaua iaon te Tia Karaunano. Ataei aika aki ongotaeka ke n aki karaoa ae raoiroi i bon imarenaia a kona n reireiaki taekan te rairannano ao te kakabwarabure.

Ibukina bwa taai akanne aki baireaki bwa a na karaoaki, ko aki kona ni katauraoiko nako iai n aron ae ko katauraoiko ibukin reirei ake ko bon angaanga. Ni kaitaraana, ko kona ni katauraoiko man arom ni butimwaea te tamnei ao ni kekeiaki bwa kam aonga “ni kona ni kaeka” (1 Betero 3:15). Taai aika a reke a kona n riki bwa taai n reirei ke taai n reiakinaki.

Te Kamatebwai n te Mweenga e Raonaki n te Kekeiaki ae Teimatoa, Uarereke, Bebete

Kaaro n tabetai e bwara nanoia ngkana te bwai are a waakinna n reiakina te euangkerio n te mweenga e aki taraa n nakoraoi. Karaoakina ni kaokoroaki, teuana te tairiki n te mweenga, te tai ni kamatebwaian koroboki aika tabu, ke maroroakinan te euangkerio kanga e taraa n akea te bwai ae riki mai iai. Ma bobotakin baika a uarereke, te kekeiaki ae bebete, ae okioki karaoakina n te tai ae maan, e kona n rangi ni mwaaka ao n anga te kakorakora n tabetai nakon te tai ae mwaitike katiaakin reirei aika onoti ma ni kakawaki. “Ma bwaai ni kabane a roko n aia tai,” e taku te Uea. “Ma ngaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora” (Reirei ao Berita aika Tabu 64: 32–33; taraa naba Aramwa 37:6–7). Ngaia are tai bwarannano, ao tai raraoma ni katiaan te bwai ae e rangi ni bubura ni katoa tai. Ti teimatoa n am kekeiaki.

N te Mweenga, te Reirei ao Maiuakinana Aki Maenako

Te euangkerio e a riki bwa te bwai ae kaineti nakon te mweenga. Ikanne aomata ake ko reirei ma ngaiia n te euangkerio bon aomata ake ko na maiuakinna ma ngaiia—ni katoa bong. Ni koauana, angiin te tai, maiuakinan te euangkerio bon arora bwa ti kanga n reiakina te euangkerio. Ngaia are ngkai ko reiakinna ao n reirei te euangkerio ni mweengam, kakaei kawai ni kairekerekei baike ko reiakin ma te bwai ae ko karaoia. Ni mweengam, karika te euangkerio bwa te bwai ae ko kekeiaki ni maiuakinna, tiaki te bwai ae ko tii taekinna.

Taai n angareirei n te utu a katoatai n riki n akea taina ae baireaki, te tai ae riki ni katoa bong.

Reiakinaia Ataei

A Kakaokoro Kainanoia Ataei

Ni kabane ataei a kakaokoro, ao inanon rikirakeia, e na bitaki kainanoia. Kabatiaan am anga n angareirei e na buokiko ni kaitarai kainanoia aika a kakaokoro. Te katooto, iangoia ni kabonganai waaki aikai:

• Karaki. Taian karaki e buokiia ataei n nooria bwa e kanga te euangkerio ni mwakuri nakon te maiu ni katoa bong. Kabonganai karaki man booki aika a tabu, man maium, man rongorongon am utu, ke man ana maekatiin te Ekaretia, riki karaki iaon te Tia Kamaiu. Bairei kawai ae kona kairekerekeia ataei n te karaki—n tauii booki aika tabu, kaokioka taekinan kiibu n taeka, ke karao te kaotioti.

• Bwaai n ibuobuoki aika a nooraki. Tamnei, witeo, ao bwai aika a kona n tauaki a kona ni buokiia ataei ni mataata ao n uringi tuua n te euangkerio. A mwaiti tamnei ao witeo ae a kona n reke n te Media Library iaon ChurchofJesusChrist.org.

• Katangitang. Anene n taromauri ao tabeua kuuna aika tabu a kona ni buokiia ataei n namakina Ana tangira te Atua, n namakina te Tamnei, ao n reiakinii koaua n te euangkerio. Tangin bwanaa, aron biriia, ao kuuna aika bebete a kona ni buokiia ataei n uring koaua n te euangkerio inanon ririki nako. Ngkai ko anene ma ataei, buokiia bwa a na kunea ao ni mataata iaon tuua ake a reiakinaki n te anene.

Angiia ataei e nakoraoi te bwai ae a reiakinna ngkana e kaairaki ma bwaai n namakin aika mwaiti. Kakaai anga ni buokiia ataei ni kabonganai aia taratara, kakauongo, ao namakin ngkai a reirei. N tabetai, ko konaa naba n kakaea anga n ae aia aroboi ao n katoonga!

A Tangiria ni Karaoi Bwaai Ataei

Ngkana ko kaoiia ataei bwa a na karotamnei, kateitei, ni kara, ke ni korea te bwai ae e irekereike ma te tua n te euangkerio, ko buokiia n rangi ni mataata raoi iaon te tua ao ko anganiia te bwai ae a na ururinga ae iai rabwatana n te bwai are a reiakinna. A kona naba ni kabonganai baike a karaoi n tibwa te bwai are a reiakinna ma tabeman. Inanon nako te boki ae te Rao maeketiin iai inanona waaki ni kakukurei ni karaoan bwaai ibukiia ataei.

Ataei a Rangi ni Kan Atatai

Ngkana a titiraki ataei, iangoia bwa te tai ae tamaroa, tiaki te kamangao. Aia titiraki ataei boni kaotan ae a tauraoi n reiakinaki, ao aia titiraki e anganiko te nonoori ae tamaroa nakon te bwai are a iangoia ao n namakinna. Buokiia bwa a na ataia ae kaekaan aia titiraki ae kaineti ma te tamnei e kona ni kuneaki inanon booki aika tabu ao n aia taeka burabeti aika maiu.

Ataei a Kainanoa te Tangira e Ngae Ngkana a Rangi ni Kakeru

N tabetai te ataei e karaoi waaki ni kakeru ake e na uruana iai aia reirei tabeman. Angiin anua aika a kakeru a riki mai imwiin aki rinanoakin kainanoia. Ngkana e riki aei, bwaina te taotaonannano, tangira, ao n ota ni kakaewenako ake e na kaitarai te ataei. Teuanne ke neienne tao e ti tangira riki te tai ae e na ira te waaki n tain te reirei n aanga aika tamaroa—te katooto, man tauakin te tamnei, korean te bwai teuana, ke warekan koroboki aika tabu.

Ngkana e teimatoa te ataei ni kakeru, e na ibuobuoki ngkana ko taetae ma te teei anne n tii ngaiia. N te nano n tangira ao n taotaonakinnano, kabwarabwaraa te bwai ae ko kantaningaia ao nanom ae ko ataia bwa teuanne ke neienne a kona ni karaoia. Kamoamoaiia ataei ngkana teuanne ke neienne a karaoi rinerine aika a tamaroa.

E Bati te Bwai ae Ana Tibwaia Ataei

Ngkana a reiakina te bwai teuana ae boou ataei, a bon tangiria ni kan tibwaia ma tabeman. Kaungaa te nano aei man anganakiia ataei te tai n reirei tuan te euangkerio imarenaia, ma kaain aia utu, ao raraoia. Tuangiia naba bwa a na tibwa aia iango ma ngkoe, namakin, ao aia taneiai ae e irekereke nakon tuua ake ko reirei iaona. Ko na kunea bwa iai aia nonoori aika a bebete, itiaki, ao ni korakora.

A Kona Ataei n Namakina te Tamnei ma A Riai ni Buokaki ni Kinaa Namakinana

Ni kabane ataei ake a tuai ni karekea ana bwai n tutuaraoi te Tamnei ae Raoiroi a kona ni karekea Namakinana, riki ngkana a reirei iaon Iesu Kristo ao Ana euangkerio. Ngkana a karaoi rinerine aika eti, a kona n namakina Ana kariaia te Tia Kamaiu rinanon te Tamnei. Reiakinaia ataei iaon kakaokoron kawai ae e reireitaki iai te Tamnei ma ngaira. Buokiia bwa a na kinaa Bwanaana ngkana E taetae nakoia. Aio e na buokiia ni karikirakea te anua n ukora ao ni mwakuri iaon oin aia kaotioti rinanon nako maiuia.

Reiakinaia Kairake

E Korakora Konabwaia Kairake

Iai konabwai kairake ni karaoi bwaai aika a kamiimi n ana mwakuri te Uea. A mwaiti taneiai aika a tauaki mwiia inanon booki aika tabu are e kaotia bwa te Atua iai onimakinan aia konabwai n tamnei aomata aika kairake. Ngkana kairake a namakina are ko onimakiniia, aia koaua raoi n aia konabwai ae mairoun te Atua e na rikirake, ao a na kakubako ma te bwai are a konaa ni katiaa. Buokiia ma te nano n tangira n nooria bwa Tamara are i Karawa e ataia ae a kona n riki nako iai. Ira Ana banna ni katooto te Tia Kamaiu man reitinako n tangiriia ao ni kaungaia, mwakuri ma ngaiia ma te taotaonakinnano, ao na aki bwara nanom mai irouia.

Kairake a Reiakin Aroia

Kairake ake ko reireiniia a katea aan aia koaua. A mena ngkai inanon te waaki ni kunea aia kakoaua ao rairakiia. A bon karaoi babaire are e na roota waakin maiuia. Ni kona ni maiu n te maiu n tamnei inanon taai aika a kakamaaku aikai ao ni kakoroa nanon ana mition te Uea ibukiia, kairake ake ko reireiniia a na riai n ataia bwa a na kanga ni kunea te korakora inanon tain katakiia, kaeka nakon aia titiraki, ao kaungaia bwa a na “tei bwa taan kakoaua ibukin te Atua” (Motiaea 18:9).

Iai nanoia Kairake ni kan rikirake n reiakin bwaai man ataakin bukin bwaai nako ao n rinanon taneiai nakon ae a tii tuangaki aron bwaai. E nanonaki n aei bwa reiakinaia kairake e kainanoa te rabakau ni kakauongo. Ngkana a mataata kairake, a na namakina ae a kan butimwaei riki taeka n reirei ao kairiiri. Kakoauaa nakoia bwa te Uea e kinaiia ao e na buokiia ngkai a rinanon kaewenakoaia ma titiraki ao kakatai. A kona ni kamwakura aia onimaki Irouna man karikirakean aroia ni katoa bong n tataro ao ni kamatebwai koroboki aika tabu ao man buokaia tabeman. Kaungakiia kairake n iriiri taian kiraati n te Ekaretia ao ni kamatebwai i bon irouia e kona ni buokiia ni karekei oin aia taneiai are e na katea aia koaua n rikiia ae mai iroun te Atua.

A Mwaiti Kairake ae a Mwengaraoi ni Kabonganakin Bwaai n Rabakau aika Boou

Ngkana kairake ake ko reireiniia iai aia bwai ni mwakuri ae e maiu man te iti, uringa bwa bwaai aikai bon bwaai ni mwakuri ni karababa reiakinaia. Reireiniia bwa a na kanga ni kabonganai koroboki aika tabu iaon aia bwai ae e maiu man te iti ao tabeua riki bwaai ni ibuobuoki aika a kuneaki inanon te Gospel Library. Ko kona naba ni kanakoi rongorongo ao n toma ma kairake ni buokiia n tauraoi imwaain te reirei are imwiina.

A riai kairake ni mataata bwa tera ae ataia Tamara are i Karawa ae a kona n riki nako iai.

Reiakinaia Ikawai

Ikawai a Boni Kona ni Katabeia Ibukin Reiakinaia

Taan reiakinaki aika ikawai a kona ni bon mwakuri ibukin reiakinaia n te euangkerio n aanga nako (taraa 2 Nibwaai 2:26). Kaoiia bwa a na katauraoi ni maroroakina te euangkerio man kamatebwaian bwaai tabeua imwain taina, ao kaungaiia bwa a na tibwa te bwai are a reiakinna mai iroun te Tamnei. Ko na bae naba n tuangiia bwa e ngaa tuan te euangkerio ae a tangiria ni kabanea riki aia tai iaona ni uaia n reiakinna.

Ikawai a Uringii Baike a Reiakin man te Taneiai are a Rinanona

E taekinna Iobi, “E mena te rabakau irouia uniwaane, ao ngkana a kabatiaaki bongin te maiu ao iai te ataibwai” (Iobi 12:12). N ae ataaki, te wanawana ao te mataata n te maiu n tamnei e roko imwiin ririki n rinanon taneiai. Ngkai ko reireiniia ikawai, kaoiia bwa a na tibwai taneiai ake a tia ni kamatoa aia onimaki iroun Tamara are i Karawa ao Iesu Kristo. Aio e kona n anganiia te tai n taekinii koaua iaon ae a kanga n tia n atai tuua n te euangkerio ake a kamatebwai bwa a koaua. Tibwaan te bwai ae ko rinanona e kona naba ni katei reitaki imarenaia naake ko reireiniia, ni buokiia “ni bane … ni karikirakeaki mai irouia ni kabane” (Reirei ao Berita aika Tabu 88:122).

Ikawai A Ukori Baika a Kona ni Karaoaki

Te ikawai are ko reireina tao e na mwaiti mwiokoana ao tabena inanon aia mwakuri, kaawa, weteaia n te Ekaretia, ao aia utu. Ngkana a kamatebwaia te euangkerio, aki toki ni iangoia bwa a kanga baike a reiakin ni kona ni buokiia ni mwiokoaia akanne. Kaoiia bwa a na nooria bwa e kanga ana taeka te Atua ni kaineti nakon te bwai are a rinanona. Ko kona ni karaoa aei man titirakinaia bwa a kanga tuua n te euangkerio ni iai nanona ae kakawaki ao ni bon kaineti nakon maiuia.

Ikawai A Kona ni Iango n Aanga aika Kakaokoro

Ibukin aia taneiai ao aia atatai, ikawai ataia ae bon akea n tainako te kawai ae bebete ni kaekaan titiraki n te euangkerio. A kona ni kakaitau bwa rongorongo ni koroboki aika tabu a kona ni iai nanoia aika mwaiti, ao a kona ni kabonganai tuua n te euangkerio nakon bwaai nako aika a riki n te maiu. Kaoiia bwa a na iangoia bwa a kanga tuua n te euangkerio n irekereke i bon imarenaia ao tera ae e riki nakon maiuia. Kaunga irirakin te waaki ao te marooro bwa aonga ni kona n reirei man aia taratara ae e onoti i bon imarenaia.

Ikawai a kona n tibwai taneiai aika mwaiti ake a tia ni kamatoa aia onimaki iroun Tamara are i Karawa ao Iesu Kristo.

Reiakinaia Aomata aika Aki Toamau

Buokiia Aomata n Tatabmeniia bwa a Na Rikirake ao ni Waaki Nako

Iotebwa Timiti e reirei, “Aia iango ao tamneia aomata ni kabane are e na karuoi te Atua nakon te aonaaba a kona n rikirake n tamaroa” (Teachings of Presidents of the Church: Joseph Smith [2007], 210). Iangoia bwa ni kabane natin te Atua iai konabaia n rikirake n te ataibwai ao n rikirakeia. Bubutiia te Uea bwa e na buokiko n ataia bwa kona kanga ni buokiia aomata n tatabemaniia.

Reirei iaon Kainano aika Onoti

Marooro ma taan reiakinaki ke aia karo ke taan tararuaia. Kakaea bwa te aro raa ae a na reiakinaki raoi iai ao tera anga aika a rangi ni ibuobuoki. Ko kona naba ni marooro ma taan kairiri ake tabeman ao taan reirei ake iai aia atatai ao aia nonori iaon aei. Ibukin waaki ni ibuobuoki n angareirei, taraa disabilities.ChurchofJesusChrist.org.

Karika te Tabo ae Reke iai te Iango ae Tamaroa

Karaoa te tabo ae reke iai te iango ae tamaroa are aomata nako a na namakina ae a mano no n tangiraki. Tai iangoia ae ni kabane taan reiakinaki aika aki toamau titebo aroia, ao buokiia n tatabemaniia ma te tangira ao te karinerine. Kaungaiia tabeman bwa ana akoi ao ni bubutimwaai.

Kakoaua bwa Ni Kabane a Kona n Ira te Waaki

Bitaki aika uarereke a kona ni karaoaki nakon taian waaki ni kakoauaa bwa ni kabane taan reiakinaki a kona n reirei, n ikotaki ma ake aki toamau ke iai aia kangaanga n te reirei. Te katooto, ngkana karaoan te waaki e tangira kaotan te tamnei, kam kona n onea mwiina n anenea te kuna ae irekereke ma ngaia ni kairia taan reiakinaki ake iai aia kangaanga n aia taratara.

Karaoi Waakinan Bwaai ao Aroia ae Teimatoa

Teuana te kawai ni kaota aron kairan te waaki bon katean te boutita are e kaota bairean taina. Bairean am tai are ko kateia e kona ni iai tain te tataro, tain te reirei, ao tain waaki ni kakukurei. Iriiran bairean te tai e kona ni buoka kauarerekean te namakin ni bwaai aika aki rangmataata ao te nakonnano irouia tabeman taan reiakinaki.

Ataia bwa Bukin Tera a Riki Anua aika Kangaanga Aroia

Reiakina rongorongon te aki toamau ke bwaai aika riki are e na roota aron te aomata ni karaoi mwakuri aika aki raoiroi. Taraia raoi bwa tera ae e riki n te tai are a kaoti iai anua aika a kangaanga aroia. Tataromwaaka bwa ko na kanga ni kanakoraoi kangaanga bwa ko aonga n riki ni boutokaiia taan reiakinaki.

Ibukin rongorongo iaon reiakinaia aomata aika aki toamau, taraa disabilities.ChurchofJesusChrist.org.

Taan reirei a kona n karaoa te tabo ae reke iai te iango ae tamaroa are aomata nako a na namakina ae a mano no n tangiraki.

Te Anga Reirei ae Maiu n te Kombiuta

Atai Raoi Aron Bwaai n Rabakau aika Boou

Imwain am kiraati ke bootaki, kabanea tabeua am tai ni atai raoi bwaai n rabakau aika boou are ko na kabongana. Tuoi nako tabeua bwaina, n aron ae ko na kanga n tibwa te witeo ke te tamnei. Iangoia bwa ko na karaoa te bootaki n “ukeuke” ma kaain te utu ke raraom.

Angiia uoote ao titeiki iai aia tia rabakau iaon bwaai n rabakau aika boou. Ko na bae n ataia tabeman ake iai aia taneiai iaon te boowi ae maiu n te kombiuta. Bubuti ibukin aia ibuobuoki ke kairiri.

Kararoai Katabeaianga aika a Kona n Riki

Ngkana e riai, kakaea te tabo ae rau ni kaean am boowi. Karongoa mai itinaniku e kona ni kamangaongao. Kaungaiia taan reiakinaki ni karaoa naba anne ke ni kamatei aia maiki ngkana aki taetae.

Kabongana te Bwai n Rawetamnei

Ngkana e riai, kamaeua am kaemera n te aro bwa taan reiakinaki a konaa n nooriko. Kaoiia (ma tai tuangiia) taan reiakinaki bwa a na kamaeu aia kaemera naba. Aio are e na kona ni karika te katiteunaaki n tamnei ao ni boutokaa te iwawaaki.

Kabongana te Bwai ni Koroboki n Reitaki n ae Maiu iaon te Kombiuta

A mwaiti burokuraem n te reitaki ae maiu iaon te kombiuta aika a kona iai naake a iria n taibinii taian titiraki ke aia kaoti inanon te wintoo ni marooro. Tabeua a kona naba ni kariaia naake a kaaina te marooro ae maiu iaon te kombiuta ni katei baia. Anganiia taan reiakinaki n atai taekan aroaro aikai. Kona bae n tangiria n mwiokoa temanna n taraa are e katea baina ke are e kanakoa ana taeka inanon te tabo ni marooro n te aro bwa ko aonga ni kabanea am tai iaon te marooro.

Kakaai Kawai ni Kairekerekeia Taan Reiakinaki

Tein te marooro n ae maiu iaon te kaombiuta n tabetai e karika te kangaanga nakoia aomata ni kona n nooraki ao n ongo teaba bwanaaia. Kataia keiaki n ataia bwa ko na kairiia naake a tangiria ni kaaina. N taai tabetai aio e nanonaki bwa ko na karaoa te kurubu ae uarereke (te katooto, kamaenakoia te kiraati n te Reirei n Tabati). N taai tabetai e nanonaki bwa ko na tuangiia taan reiakinaki imwaain te tai bwa ana anga aia kabwarabwara n te kawai ae onoti. Tai kariaia aki nakoraoin bwaai n rabakau aika boou ni karika ae ko na mwaninga ke n tarariaoia aomata ake a rangi ni ingainga ao n tangiria ni kan reirei.