lallaki a mangisursuro iti pamilia

Dagiti Singasing para iti Nadumaduma a Disso a Pangisuruan ken dagiti Agad-adal

Dagiti pagbatayan ti panangisuro iti wagas ti Mangisalakan ket mayaplikar iti ania man a gundaway iti panangisuro—iti pagtaengan, iti simbaan, ken iti sadino man. Nupay kasta, umay ti tunggal gundaway iti bukod a naidumduma a kasasaad. Mangted daytoy a benneg kadagiti nayon a singasing a nalawag kadagiti nadumaduma nga agad-adal ken disso a pangisuruan.

Pagtaengan ken Pamilia

Ti Pagtaengan ti Kasayaatan a Lugar a Pangisuruan ken Pagsursuruan iti Ebanghelio

Insuro ni President Russell M. Nelson a nasken a ti pagtaengan ti “sentro ti pagsursuruan iti ebanghelio” (“Becoming Exemplary Latter-day Saints,” Liahona, Nob. 2018, 113). Napateg ken kasapulan ti panangisuro a mapasamak iti simbaan wenno iti seminary, ngem nairanta daytoy a mangsuporta iti panangisuro a mapasamak iti pagtaengan. Ti kangrunaan a disso—ken ti kasayaatan a disso—a pagsursuruan iti ebanghelio, para iti agpada a bagbagitayo ken dagiti pamiliatayo, isu ti pagtaengan.

Ngem saan a kaipapanan dayta a ti nasayaat a panagsursuro iti ebanghelio ket mapasamak a madagdagus iti pagtaengan; agkasapulan iti napasnek a panagkagumaan. Insingasing ni President Nelson a mabalin a kasapulanyo ti “mangbalbaliw” wenno “i-remodel ti pagtaenganyo”—saan a nasken a dadaelen dagiti pader wenno mangnayon iti baro a suelo ngem nalabit a babaen ti panangamiris iti kadagupan nga espiritu iti pagtaenganyo, agraman ti tulongyo iti dayta nga espiritu (“Becoming Exemplary Latter-day Saints,” 113). Kas pagarigan, ibilangyo ti musika, video, ken dadduma pay a media iti pagtaenganyo; dagiti ladawan iti pader; ken ti wagas a pannakisao dagiti miembro ti pamiliayo ken panangtratoda iti tunggal maysa. Mangyawis kadi dagitoy a banag iti impluensia ti Espiritu Santo? Mangilatangkayo kadi iti oras para iti panagsursuro iti ebanghelio, agmaymaysa ken kas sangapamiliaan? Marikna kadi dagiti miembro ti pamilia a maay-ayat, natalged, ken asideg iti Dios no addada iti pagtaenganyo?

Mabalin a diyo marikna nga addaankayo iti kontrol iti naespirituan nga aglawlaw iti pagtaenganyo. No dayta ti kaso, agbalinkayo a kasayaatan nga impluensia agingga a kabaelanyo ken agpatulongkayo iti Apo. Dayawenyonto dagiti nalinteg a panagkagumaanyo. No padasenyo nga isuro ken sursuruen ti ebanghelio, nupay diyo makita a dagus dagiti tinarigagayan a resulta, dakayo ket agbalballigin.

Nabangon kadagiti Relasion ti Panagsursuro iti Pagtaengan

“Ayatem dagiti sursuruam” ket mayaplikar iti amin a disso a pangisuruan iti ebanghelio, ngem iti pagtaengan, gagangay unay a sumangbay ti ayat ken marikna unay iti kaunggan. Nupay saan a pagulidanan ti pagtaenganyo, nairanta daytoy nga agbalin a sentro a pangisuruan iti ebanghelio gapu ta ditoy ti lugar a pakabangonan dagiti kapapautan a relasion. Mabalin nga ad-adu ti padas wenno training dagiti mannursuro iti ruar ti pagtaengan kas mannursuro, ngem dida kabaelan a tuladen ti potensial para iti panagayat, agnanayon a relasion nga agtaud iti pagtaengan. Ngarud taraonantayo dagita a relasion. Bubosenyo ti oras ken panagkagumaan a kasapulan a dumngeg kadagiti miembro ti pamilia ken mangbangon iti panagtalek ken pannakaawat kadakuada. Daytoyto ti mangtulong a mangparnuay iti natibker a pundasion para kadagiti panagkagumaanyo a mangisuro ken agsursuro iti ebanghelio iti pagtaengan.

Mabalin a Maplano ti Panagsursuro iti Pagtaengan ngem Kasta Met a Madagdagus

Mapasamak iti maminsan iti makalawas ti kaaduan a klase iti Simbaan, nga addaan iti naiskediul a rugi ken gibus, ngem saan a kanayon a daytoy ti kaso iti pagtaengan. Mabalin nga addaankayo iti naiskediul a lesson iti home evening wenno sangapamiliaan a panagadal iti nasantuan a kasuratan, ngem dagiti gundaway iti panangisuro iti pamilia ket masansan a mapasamak kadagiti saan a pormal, inaldaw a kanito—kabayatan ti pannangan, panagtrabaho iti balay, panagay-ayam, panagbiahe a mapan iti trabaho wenno pagadalan, panagbasa iti libro, wenno panagbuya iti sine nga aggigiddan. Ti maysa a bagyo ket mabalin a maysa a gundaway tapno pagsasaritaan no kasano ti panangaywan kadatayo ti Mangisalakan manipud kadagiti naespirituan a bagyo. Maysa a tin-edyer nga addaan iti narigat a pangngeddeng nga aramiden ket mabalin a nakasagana nga agsursuro maipapan iti no kasano ti umawat iti bukod a paltiing. Mabalin a mangted pagimbagan iti maysa a mabutbuteng nga ubing manipud iti pammaneknek maipapan iti Mangliwliwa. Dagiti ubbing a nasukir wenno natangsit iti tunggal maysa mabalinda a masuruan maipapan iti panagbabawi ken pannakapakawan.

Gapu ta saan a naplano dagiti kasta a kanito, saanka a makapagsagana para kadagitoy kas iti wagas a panagsaganam para iti maysa a lesson a mainaig iti tradision. Nupay kasta, mabalin nga isagana ti bagim babaen ti panagbalin a sensitibo iti Espiritu ken panangikarigatan ti “agbalin a nakasagana a kanayon” (1 Pedro 3:15). Aniaa man a kanito ket nalabit nga agbalin a kanito iti panangisuro wenno panagsursuro.

Ti Panagsursuro iti Pagtaengan Buklen dagiti Babassit, Simple, ken Agtultuloy a Panagkagumaan

No dadduma maupay dagiti nagannak no kasla saan a naballigian dagiti gandatda a mangisuro iti ebanghelio iti pagtaengan. Aramiden a saggaysa, mabalin a kasla saan a maipatpatungpal a nasayaat ti maysa a home evening, sesion iti panagadal iti nasantuan a kasuratan, wenno panagsasarita maipapan iti ebanghelio. Ngem ti panagtitipon dagiti babassit, simple a panagkagumaan, nga agtultuloy a maulit iti panaglabas ti panawen, mabalin a nabilbileg ken mangpappapapigsa ngem iti masansan a dakkel a kanito wenno pagilasinan nga adalen. “Lumabas amin a banag iti panawenda,” kinuna ti Apo. “Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan” (Doktrina ken Katulagan 64:32–33; kitaen met iti Alma 37:6–7). Ngarud dika sumuko, ket dika agdanag maipapan iti panangileppas iti dakkel a maysa a banag iti tunggal oras. Agtultuloyka laeng kadagiti panagkagumaanmo.

Iti Pagtaengan, Saan a Mapagsina ti Panagsursuro ken Panagbiag

Madagdagus nga adda pakainaigan ti ebanghelio iti pagtaengan. Idiay dagiti tao a pakasursuruam iti ebanghelio ket dagiti tao a kaduam nga agbiag iti daytoy—iti inaldaw. Kinapudnona, kaaduan ti panawen, ti panagbiag iti ebanghelio ket no kasano a masursurotayo ti ebanghelio. Ngarud bayat ti panagsursurom ken panangisurom iti ebanghelio iti pagtaengan, sapulem dagiti wagas a pakaikonektaan no ania ti masursurom iti no ania ti ar-aramidem. Iti pagtaengam, pagbalinem ti ebanghelio a maysa a banag nga ikarigatam a pagbiagan, saan laeng a maysa a banag nga isaritam.

babai a mangisursuro kadagiti ubbing

Dagiti gundaway iti panangisuro iti pamilia masansan a mapasamak iti saan a pormal, inaldaw a kanito.

Panangisuro kadagiti Ubbing

Kasapulan dagiti Ubbing ti Panagdumaduma

Agduduma ti amin nga ubbing, ken bayat ti panagdakkelda, agbalbaliwto dagiti kasapulanda. Ti panamagdudumam kadagiti pamay-an iti panangisurom ti mangtulongto kenka a maited dagiti agduduma a kasapulanda. Kas pagarigan, ibilangmo ti panangusar iti sumaganad:

• Dagiti estoria. Dagiti estoria ti tumulong kadagiti ubbing a mangkita no kasano a mayaplikar ti ebanghelio iti inaldaw a panagbiag. Usarem dagiti estoria manipud kadagiti nasantuan a kasuratan, manipud iti biagmo, manipud iti pakasaritaan ti pamiliam, wenno manipud kadagiti magasin ti Simbaan, nangruna dagiti estoria maipapan iti Mangisalakan. Planuem dagiti wagas a mangiraman kadagiti ubbing iti estoria—babaen ti panangpaiggem kadagiti ladawan, panangulit kadagiti ragup ti balikas, wenno panagyakem kadagiti paset.

• Dagiti visual aid. Makatulong kadagiti ubbing dagiti ladawan, video, ken banag tapno maawatan ken malagipda dagiti pagbatayan ti ebanghelio. Masarakan ti adu a ladawan ken video iti Media Library iti ChurchofJesusChrist.org.

• Musika. Makatulong kadagiti ubbing dagiti himno ken dadduma pay a sagrado a kanta tapno mangrikna iti ayat ti Dios, mangrikna iti Espiritu, ken masursuruan kadagiti kinapudno ti ebanghelio. Makatulong kadagiti ubbing dagiti melodia, ritmo, ken simple a rhyme tapno manglagip kadagiti kinapudno ti ebanghelio kadagiti sumangbay a tawen. No makipagkantaka kadagiti ubbing, tulongam ida a mangtakuat ken mangawat kadagiti pagbatayan a naisuro kadagiti kanta.

Kaaduan kadagiti ubbing ti kasayaatan a makasursuro no mairaman dagiti adu a panagrikna. Mangsapul kadagiti wagas a pakatulongan dagiti ubbing a mangusar kadagiti panagriknada iti panagkita, panagdengngeg, ken panagsagid kabayatan ti panagsursuroda. Iti sumagmamano a situasion, mabalin a mangsapulka kadagiti wagas a mairaman dagiti panagrikna iti panagangot ken panagramanda!

Managpartuat dagiti ubbing

No awisem dagiti ubbing nga agdrowing, agbangon, agkolor, wenno agsurat iti maysa a banag nga adda pakainaiganna iti maysa a pagbatayan ti ebanghelio, tulongam ida a makaawat a nasaysayaat iti pagbatayan ket ikkam ida iti maigganan a palagip ti no ania ti nasursurodan. Mabalinda pay nga usaren no ania ti napartuatda tapno ibinglay no ania ti nasursuroda kadagiti dadduma. Mairaman iti tunggal isyu ti magasin a Friend dagiti aktibidad iti panagpartuat para kadagiti ubbing.

Gagangay a Managusisa dagiti Ubbing

No agsaludsod dagiti ubbing, kitaem ida kas gundaway, saan a pannakasinga. Dagiti saludsod dagiti ubbing ti pakakitaan a nakasaganada a masursuruan, ken dagiti saludsodda ti mangted kadagiti napapateg a nalawag a pannakaammo ken pannakaawat iti no ania ti pampanunoten ken marikriknada. Tulongam ida a mangkita a dagiti sungbat kadagiti naespirituan a saludsodda ket masarakan kadagiti nasantuan a kasuratan ken balikas dagiti sibibiag a propeta.

Kasapulan dagiti Ubbing ti Ayat Uray Pay No Makasingada

No dadduma agtignay ti maysa nga ubing iti wagas a pakasingaan ti panagsursuro dagiti dadduma. Kaaduan a pannakasinga ti nagtaud iti saan a naited a kasapulan. No mapasamak daytoy, agbalin a naanus, managayat, ken mannakaawat maipapan dagiti karit a mabalin a sangsanguen ti ubing. Mabalin a kasapulanna laeng ti ad-adu pay a gundaway a makiraman iti lesson iti positibo a wagas—kas pagarigan, babaen ti panangiggem iti maysa a ladawan, panagdrowing iti maysa a banag, wenno panagbasa iti nasantuan a kasuratan.

No ituloy ti maysa nga ubing ti mangriribuk, mabalin a makatulong a kasarita isuna iti nalimed. Iti pudno a kaipapanan ti ayat ken anus, ilawlawagmo dagiti namnamaem ken panagtalekmo a kabaelanna nga ipaay kadagitoy. Dayawem ti ubing no agaramid kadagiti nasaysayaat a pili.

Adu ti Maibinglay dagiti Ubbing

No masursuruan dagiti ubbing iti maysa a baro a banag, gagangay a kayatda nga ibinglay daytoy kadagiti dadduma. Yallukoy daytoy a tarigagay babaen ti panangted kadagiti ubbing kadagiti gundaway a mangisuro kadagiti pagbatayan ti ebanghelio iti tunggal maysa, dagiti miembro ti pamiliada, ken dagiti gagayyemda. Dawatem pay kadakuada a mangibinglay kenka dagiti pampanunoten, marikrikna, ken padpadasda nga adda pakainaiganna kadagiti pagbatayan nga isursurom. Maammuamto nga addaanda kadagiti nalawag a pannakaammo ken pannakaawat [insights] a simple, natarnaw, ken nabileg.

Marikna dagiti Ubbing ti Espiritu ngem Mabalin a Kasapulan ti Pannakabigbigda iti Impluensiana

Tunggal ubing a saan pay a nakaawat iti sagut ti Espiritu Santo makarikna iti impluensiana, nangnangruna no agsursuroda maipapan ken ni Jesucristo ken ti ebangheliona. No agaramidda kadagiti nalinteg a pili, mariknada ti pananganamong ti Mangisalakan babaen ti Espiritu. Suruam dagiti ubbing maipapan iti nadumaduma a wagas a makisao ti Espiritu kadatayo. Tulongam ida a mangbigbig iti timekna bayat ti pannakisaona kadakuada. Daytoy ti mangtulongto kadakuada a mangpadur-as iti ugali a panagsapul ken panagtignay iti bukod a paltiing iti unos ti biagda.

Panangisuro kadagiti Agtutubo

Addaan dagiti Agtutubo iti Dakkel a Potensial

Addaan dagiti agtutubo iti potensial nga agaramid kadagiti nakaskasdaaw a banag iti panagserbi ti Apo. Nailadawan kadagiti adu a padas a nailista kadagiti nasantuan a kasuratan nga adda panagtalek ti Dios iti naespirituan a kabaelan dagiti agtutubo. No marikna dagiti agtutubo nga adda panagtalekmo kadakuada, dumur-asto ti panagtalekda iti nadiosan a potensialda ket masdaawdanto iti kabaelanda nga ipatungpal. Siaayat a tulongam ida a mangkita nga ammo ti Nailangitan nga Ama ti kabaelanda a pagbalinan. Surotem ti pagwadan ti Mangisalakan babaen ti panangituloy nga ayaten ken allukoyen ida, siaanus a tulongan ida, ket saan a sumuko kadakuada iti kaano man.

Masursuruan dagiti Agtutubo maipapan iti Bagbagida

Mangibangbangon dagiti agtutubo a sursuruam kadagiti pundasion ti pamaneknekda. Addada iti proseso ti panangtakuat kadagiti pammati ken kumbiksionda. Agar-aramidda kadagiti pangngeddeng a mangapektonto iti turongen ti biagda. Tapno makapagbiag a naespirituan kadagitoy napeggad a panawen ken tapno maipatungpal ti mision ti Apo para kadakuada, nasken a maammuanto dagiti agtutubo a sursuruam no kasano ti mangsapul iti pigsa kabayatan dagiti pannubokda, mangsungbat kadagiti saludsodda, ken tured nga “agtakder kas saksi ti Dios” (Mosiah 18:9).

Addaan dagiti agtutubo iti dumakdakkel a tarigagay nga agsursuro kadagiti banag babaen ti panagrason ken panagpadas imbes a babaen ti panangisaw-an kadagiti banag. Kayat a sawen daytoy a ti panangisuro kadagiti agtutubo agkasapulanto kadagiti nasayaat a kabaelan iti panagdengngeg. No marikna dagiti agtutubo a naawatan ida, mariknadanto nga ad-adda a dumngegda iti balakad ken pannarabay. Ipanamnamam kadakuada nga am-ammo ti Apo ida ken tulongannanto ida bayat ti pannakidangadangda kadagiti saludsod ken pannubok. Maaramatda ti pammatida Kenkuana babaen ti panangpadur-as iti inaldaw nga ugali a panagkararag ken panagadal iti nasantuan a kasuratan ken panagserbi kadagiti dadduma. Ti panangallukoy kadagiti agtutubo a makiraman kadagiti klase iti Simbaan ken agadal iti bukodda kaet makatulong kadakuada a maaddaan kadagiti bukodda a padas a mangbukelto ti pammaneknekda iti nadiosan a tawidda.

Komportable ti Adu nga Agtutubo iti Panagusar iti Teknolohia

No addaan iti bukod nga electronic device dagiti agtutubo a sursuruam, laglagipem a ramit dagitoy a mangpadur-as iti panagsursuro. Suruam ida no kasano nga usaren dagiti electronik a nasantuan a kasuratanda ken dadduma pay a resources a masarakan iti Gospel Library. Mabalinmo pay ti mangipatulod kadagiti mensahe ken links kadagiti agtutubo tapno matulongan ida nga agsagana para kadagiti sumangbay a lesson.

Klase iti Sunday School

Nasken a maawatan dagiti agtutubo no ania ti ammo ti Nailangitan nga Ama a kabaelanda a pagbalinan.

Panangisuro kadagiti Nataengan

Makaawat dagiti Nataengan iti Pangrebbengan para iti Panagsursuroda

Kabaelan dagiti agad-adal a nataengan ti agtignay para iti bagbagida kadagiti disso a pangisuruan iti ebanghelio (kitaen iti 2 Nephi 2:26). Awisem ida nga agsagana para kadagiti panaglilinnawag iti ebanghelio babaen ti panangadal iti maysa a banag a nasapsapa, ken allukoyem ida a mangibinglay no ania ti masursuroda babaen ti Espiritu. Mabalinmo pay a saludsoden kadakuada no ania dagiti pagbatayan ti ebanghelio a kayatda a pagbubosan ti orasda nga aggigiddan nga agsursuro.

Agusar dagiti Nataengan iti Padpadasda No Agsursuro

Kinuna ni Job, “Kadagiti lallakay adda sirib; ken kadagiti kinaatiddog dagiti aldaw ti pannakaawat” (Job 12:12). Iti sapasap, sumangbay ti sirib ken naespirituan a pannakaawat kalpasan dagiti tawen ti panagpadas. No mangisuroka kadagiti nataengan, awisem ida a mangibinglay kadagiti padasda a nangbukel iti pammatida iti Nailangitan nga Ama ken ni Jesucristo. Daytoyto ti mangted kadakuada kadagiti gundaway a mangipaneknek maipapan no kasano a naammuanda a pudno dagiti pagbatayan ti ebanghelio nga ad-adalenda. Ti panangibinglay kadagiti padas ti mangbangonto pay kadagiti relasion iti nagbabaentan dagiti sursuruam, a mangtultulong iti “amin …a maitandudo ti amin” (Doktrina ken Katulagan 88:122).

Agkalikagum dagiti Nataengan iti Maaramat a Panagyaplikar

Mabalin a dagiti nataengan a sursuruam ket aduan iti akem ken pagrebbengan iti propesion, komunidad, ken takem iti Simbaan, ken pamilia. No adalenda ti ebanghelio, masansan a pampanunotenda maipapan no kasano a makatulong kadakuada kadagita nga akem ti masursuroda. Awisem ida a mangkita no kasano a mainiag ti balikas ti Dios kadagiti naidumduma a kasasaadda. Maaramidmo daytoy babaen ti panangsaludsod kadakuada no kasano a napnuan kaipapanan ken mayaplikar iti biagda dagiti pagbatayan ti ebanghelio.

Makapagpanunot dagiti Nataengan iti Naririkut a Wagas

Gapu iti padas ken pannakaammoda, ammo dagiti nataengan a saan a kanayon nga adda dagiti nalaka a sungbat kadagiti saludsod iti ebanghelio. Mabigbigda a ti maysa a binatog ti nasantuan a kasuratan mabalin nga aduan iti kaipapanan, ken mayaplikarda ti maysa a pagbatayan ti ebanghelio iti nadumaduma a kasasaad ti biag. Awisem ida a mangutob no kasano a mainiag dagiti pagbatayan ti ebanghelio iti tunggal maysa ken iti mapaspasamak iti biagda. Yallukoy ti pannakiraman ken panaglilinnawag tapno makasursuroda iti naidumduma a pannirigan ti tunggal maysa.

babai a mangisursuro iti klase

Mabalin nga ibinglay dagiti nataengan ti adu a padas a mangbukel iti pammatida iti Nailangitan nga Ama ken ni Jesucristo.

Panangisuro kadagiti tao nga Addaan iti Pagkurangan

Tulongam ti Tunggal Tao a Dumur-as ken Rumang-ay

Insuro ni Joseph Smith, “Amin a panunot ken espiritu nga imbaon ti Dios iti lubong ket nalaka a mapatanor” (Teachings of Presidents of the Church: Joseph Smith [2007], 210). Ipapanmo a kabaelan ti amin nga annak ti Dios ti dumur-as iti pannakaammo ken rumang-ay. Kiddawem iti Apo a tulongannaka a mangammo no kasano a matulongam ti tunggal tao.

Sursuruem maipapan kadagiti Naipangruna a Kasapulan

Kasaom dagiti agad-adal wenno dagiti nagannak wenno agay-aywan kadakuada. Ammuem no kasano ti kasayaatan a pakasursuruan ti tunggal indibidual ken no ania ti kasayaatan a pamay-an a kangrunaan a makatulong. Mabalinmo met iti makiinnuman kadagiti dadduma a lider ken mannursuro nga addaan kadagiti padas ken nalawag a pannakaammo ken pannakaawat [insights] nga ibinglay. Para kadagiti makatulong a pamay-an iti panangisuro, kitaen iti disabilities.ChurchofJesusChrist.org.

Mangparnuay iti Napintas ken Makaay-ayo nga Aglawlaw

Mangparnuay iti napintas ken makaay-ayo nga aglawlaw a pakariknaan ti tunggal maysa a natalged ken maipatpateg. Saanmo nga ipapan nga agpapada ti amin nga agad-adal, ken tratuem ti tunggal tao iti ayat ken respeto. Allukoyem dagiti dadduma nga agbalin a naasi ken managawat.

Siguraduen a Makaraman ti Amin

Mabalin a maaramid dagiti babassit a panagbalbaliw kadagiti aktibidad tapno maipanamnama a makasursuro ti amin nga agad-adal, agraman dagidiay addaan kadagiti pisikal a limitasion wenno addaan kadagiti pagrigatan nga agsursuro. Kas pagarigan, no isingasing ti maysa nga aktibidad a mangipakita iti ladawan, mabalinmo ti agkansion iti adda pakainaiganna a kanta a mangiraman kadagiti agad-adal nga addaan iti pagkurangan iti panagkita.

Mangipasdek kadagiti Agtultuloy a Naipaugali nga Aramiden ken Istruktura

Maysa a wagas tapno mangipasdek iti maysa a naipaugali nga aramiden ket mangaramid iti maysa a poster a nasuratan iti iskediul. Mabalin nga iraman iti iskediulmo dagiti panagkararag, oras ti panangisuro, ken oras ti aktibidad. Ti panangsurot iti maysa nga iskediul ti makatulong a mangpabassit iti rikna ti panagduadua ken panagdandanag para iti sumagmamano nga agad-adal.

Maawatam No Apay a Mapasamak dagiti Mapangkarit nga Ugali

Sursuruem maipapan kadagiti pagkurangan wenno kasasaad a makaimpluensia iti maysa a tao nga agtignay iti saan a maitutop. Ikasom a naimbag no ania ti mapaspasamak no adda rumsua a parikut iti ugali. Sikakararag nga ibilangmo no kasano a balbaliwam ti kasasaad tapno nasaysayaat a matulongam dagiti agad-adal.

Para iti ad-adu pay nga impormasion maipapan iti panangisuro kadagiti tao nga addaa kadagiti pagkurangan, kitaen iti disabilities.ChurchofJesusChrist.org.

klase ti Young Women

Makapagparnuay dagiti mannursuro iti napintas ken makaay-ayo nga aglawlaw a pakariknaan ti tunggal maysa a natalged ken maipatpateg.

Virtual a Panangisuro

Agbalin a Pamiliar iti Teknolohia

Sakbay ti klasem wenno mitingmo, mangbubos iti sumagmamano nga oras a panangammo iti teknolohia nga usaremto. Sukisokem ti sumagmamano a sagudayen daytoy, kas iti no kasano ti mangibinglay kadagiti video ken ladawan. Ibilangmo ti panangangay iti maysa a “test” miting kadagiti miembro ti pamilia wenno gagayyem.

Kaaduan a ward ken stake ti addaan iti espesialista iti teknolohia. Mabalin met nga adda dagiti dadduma nga addaan iti padas kadagiti virtual a miting. Agkiddawka iti balakad wenno pannarabayda.

Ikkatem dagiti Mabalin a Makasinga

No mabalin, mangsapul iti naulimek a lugar a pakaangayan ti mitingmo. Mabalin a makasinga dagiti ariwawa iti aglawlaw. Allukoyem dagiti agad-adal nga aramidenda met ti kasta wenno pagtalinaedenda dagiti mikroponoda a naka-mute no saanda nga agsasao.

Usarem ti Kamera

No mabalin, pagtalinaedem a nakalukat ti kameram tapno makita dagiti agad-adal ti rupam. Awisem (ngem saanmo nga ipilit) kadagiti agad-adal a nakalukat met dagiti kamerada. Makatulong daytoy a mangparnuay iti espiritu ti panagkaykaysa ken panagsisinnuporta.

Usarem ti Virtual Chat Feature

Adu a programa ti virtual a miting ti mangipalubos kadagiti makiraman a mangisurat kadagiti saludsod wenno komento iti chat window. Adda met dagiti mangpalugod kadagiti makiraman a mangingato kadagiti imada a virtual. Bay-am dagiti agad-adal a maammuanda ti maipapan kadagitoy a sagudayen [feature]. Mabalin a kayatmo ti mangdutok iti maysa a tao a mangkita kadagiti naitag-ay nga ima tapno mabalinmo nga ipamaysa ti atensionmo iti panangidaulo iti panaglilinnawag.

Mangsapul kadagiti Wagas a Mairamanmo dagiti Agad-adal

No dadduma dagiti disso a pangisuruan iti virtual ti mangparigat a makita ken mangngegan dagiti tao. Agpasnek a mangikarigatan a mangiraman kadagiti agtarigagay a makiraman. No dadduma kaipapanan daytoy ti panangparnuay iti babbabassit a grupo (kas pagarigan, babaen ti pananggudua iti maysa a dakkel a klase ti Sunday School). No dadduma kaipapanan daytoy ti panangidawat a nasapsapa kadagiti agad-adal tapno makiraman iti nalawag a wagas. Saanmo nga ipalubos a dagiti limitasion ti teknolohia ti mangigapu kenka tapno lipatem wenno dimo ikankano dagiti tao nga aggagar ken agtallugod a masursuruan.