Elmakot ko n̄an Elōn̄ Jekjek in Katakin ko im Rūkkatak ro

Pedped in katak ko n̄an katakin ilo wāween eo an Rilo̧mo̧o̧r eo maron̄ kōjerbali n̄an jabdewōt iien em̧m̧an n̄an katakin—ilo m̧weo, ilo m̧ōn jar eo, im ijōko jet. Ijo wōt ke, aolep iien ko rem̧m̧an rej itok kōn jekjek eo an make ejej uwaan. Jekjōn in ej letok elōn̄ļo̧k elmakot ko me rejenolo̧k n̄an elōn̄ rūkkatak ko im jekjek in katakin ko.

M̧weo im Baam̧ļe

M̧weo ej Jikin eo Em̧m̧antata n̄an Katakin im Ekkatak Gospel eo

Būreejtōn Russell M. Nelson ekar katakin bwe m̧weo ej aikuj “juon jikin ekkatak gospel eo,” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Liaona, Nob. 2018, 113). Katakin eo me ej waļo̧k ilo m̧ōnjar eo ak ilo jemerere ej aorōk im menin aikuj, bōtaab ej aikuj in kein jipan̄ katakin eo me ej kōm̧m̧an ilo m̧weo. Jikin eo aorōk tata—jikin eo em̧m̧an tata—n̄an ekkatak gospel eo, jimōr n̄an kōj make im baam̧le ko aer, ej ilo m̧weo.

Bōtaab ejjab meļeļe in bwe ijo em̧m̧an ekkatak gospel ej make waļo̧k ilo m̧weo, ebōk juon kijejeto ejjab m̧ūjkōk. Būreejtōn Nelson ekar elmakote bwe kwomaron̄ aikuj in “ukōt” ak “bar kōkāāl m̧weo im̧ōmi”—ejjab meļeļe in n̄an rupe dāpdep ko ak kobaiktok juon būļoor kāāl ak bōlen jān ļōn̄aj lōn̄ļo̧k jetōb eo ilo m̧weo im̧ōm̧, ekoba ijo kuņam̧ n̄an jetōb jab eo (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” 113). N̄an waanjon̄ak, ļōmņak kōn al ko, pija in alwoj ko, im media ko jet ilo m̧weo; pija ko ilo dipin m̧weo; im wāween an membōr ro ilo baam̧le eo am̧ ej kōnono n̄an im kōm̧m̧an n̄an doon. Men kein rej ke karuwaineneiktok kareel eo an Jetōb Kwojarjar? Kwōj ke kōjeno̧ļo̧k iien n̄an ekkatak gospel eo, make iaam im āinwōt juon baam̧le? Membōr ro ilo baam̧le eo rej ke en̄jake iakwe, kōjparok, im epaake Anij n̄e rej pād ilo m̧weo im̧ōm̧?

Kwomaron̄ en̄jake an ejjeļo̧k am̧ maron̄ ilo mejatoto eo ilo jetōb ilo m̧weo im̧ōm. N̄e ej jekjek eo in, kōm̧m̧an bwe kwon kareel eo em̧m̧an tata kwomaron̄ in im kajjitōk ippān Irooj kōn jipan̄. E enaaj kautiej kijejeto ko am̧ rejim̧we. N̄e kwoj kajjieon̄ n̄an katakin im ekkatak gospel eo, jekdo̧o̧n eļan̄n̄e kwojjab lo tōprak ko rōkaikdeelel ilo iien eo em̧ōkaj tata, kwe kwoj eddōkļo̧k

Ekkatak ilo Mweo Ej Loe ilo Jemjera ko

“Iakwe ro kwoj katakin er” kōjerbali n̄an aolep jekjek ko n̄an katakin gospel eo, bōtaab ilo m̧weo, iakwe ej aikuj in make itok eļap tata im en̄jake m̧wilaļ tata. Jekdo̧o̧n eļan̄n̄e m̧weo im̧ōm̧ ejjab kanooj em̧m̧an, ej aikuj meļeļe en erom jikin ekkatak an gospel eo kōnke ej ijo jemjerā ko ad eļap tata aer aitok kitier rej ekkal. Rūkaki ro itulikin m̧weo remaron̄ in ļapļo̧k aer tijem̧ļo̧k ak kaminene āinwōt rūkaki ro, bōtaab remaron̄ jamin kwaļo̧k kōjatdikdik eo kōn jemjerā ko rej indeeo, iakwe me rej waļo̧k ilo m̧weo. Kōn menin kōjparok jemjerā ko. Jolo̧k iien im kijejeto eo emenin aikuj n̄an ron̄jake ro uwaan baam̧le eo am̧ im kalōk lōke eo im meļeļe eo ippāer. Menin enaaj jipan̄ ejake juon pedped edim kōn kijejeto ko am̧ n̄an katakin im ekkatak gospel eo im m̧weo.

Ekkatak ilo M̧weo Maron̄ Karōke ak Barāinwōt Make Waļo̧k

Enan̄in aolep kūlaaj ko in Kabun̄ in rej kōm̧m̧an juon alen juon wiik, kōn juon ijjino im juon jem̧ļo̧k eo kar jikejuuļi, bōtaab menin ejjab iien otemjej jekjek eo ilo m̧weo. Emaron̄ wōr juon am̧ katak an nokon in jota kar jekijuuļi ak ekkatak jeje ko rekwojarjar an baam̧le, bōtaab iien ko rem̧m̧an an katakin ilo baam̧le eo emakijkij aer waļo̧k ilo jotak wōt, iien ko ilo raan otemjej—ilo juon iien m̧ōn̄ā, kōm̧m̧ani jerbal ko, ikkure juon ikkure, etal n̄an jerbal ak jikuuļ, riiti juon bok, ak alooje juon pija in alooj ippān doon. Juon lan̄ in wōt emaron̄ in juon iien kōnono kōn ekōjkan an Rilo̧mo̧o̧r eo kōjparok kōj jān lan̄ ko an jetōb. Juon jodikdik kōn juon jokāālet epen n̄an kōm̧m̧ane emaron̄ in pojak n̄an ekkatak kōn revelesōn an juon make. Āinwōt juon ajri eo me eleļn̄o̧n̄ emaron̄ in jeraam̧m̧an jāņ naan in kam̧ool eo am̧ kōn Riaenōm̧m̧an eo. Ajri ro enana m̧wilier ak nana kōm̧man n̄an doon maron̄ in katakin kōn ukwļo̧k im jeorļo̧k bōd.

Kōnke kain iien rōt kein rej jab karōki, kwojjab maron̄ pojak n̄an i ilo wāween eo kwon kōņaan kōppopo n̄an juon katak iMminene kake. Mekarta, komaron̄ kepooj kwe make kōn jedmatmat n̄an Jetōb eo im kajjieon̄ in “pojak iien otemjej” (1 Piter 3:15). Jabdewōt iien emaron̄ erom̧ juon iien katakin ak ekkatak.

Ekkatak ilo M̧weo Ekitbuuj Kijejeto ko Reddik, Ļam Waan, im Jokkun Wōt Juon

Jet iien ro jinen im jemen rej ebbweer n̄e aer kajjieon̄ n̄an katakin gospel eo il m̧weo ejjab āinwōt tōprak. Bōke kajjojo, juon nokon in jota, iien ekkatak jeje ko rekwojarjar, ak ekōnono kōn gospel eo emaron̄ jab lukkun lōn̄ tōprak. Bōtaab men dikdik ko, kijejeto ko reļem waan, āliji eo ejjab bōjrak ilo iien ko, emaron̄ in erom kajoor im kijin̄en̄e jān iien ekanooj ļap ej waļo̧k jejjo iien ak juon katak eo ekanooj ļap. “Ak men otemjeļo̧k reaikuj kūrm̧ool ilo iien eo aer,” Irooj ekar ba. “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” (Katak im Bujen Ko 64:32–33; lale barāinwōt Alma 37:6–7). Kōn menin jab ebweer, im jab inepata kōn kōtōparaki juon men eļap aolep iien. Ej jab jokod kiejejto ko am̧.

Ilo Mweo, Ekkatak im Mour Rej Jab Jeno̧ļo̧k

Gospel eo ebōk āinjuon eo em̧ōkaj ilo m̧weo. Ijo armej ro kwoj katak gospel eo ipper rej armej ro kwonaaj mour kake—aolep raan. Ilo mool, aolep iien, mour kōn gosepl eo ej wāween eo jej ekkatak kōn gospel eo. Kōn menin ilo am ekkatak im katakin gospel eo ilo m̧weo, kapukōt wāween ko n̄an kobaik ta eo kwoj ekkatak kake ippān ta eo kwoj kōm̧m̧ane. Ilo m̧weo im̧ōm̧, kōm̧m̧an bwe gospel eo en juonmen eo kwoj kajjieon̄ mour kake, en jab baj juon men eo kwoj kōnono kake.

Iien ko rem̧m̧an an katakin ilo baam̧le emakijkij aer waļo̧k ilo jab karōke, iien ko ilo raan otemjej.

Katakin Ajri ro

Ajri ro Raikuji Elōn̄ Men ko

Aolep ajri rooktak, im ilo aer eddōkļo̧k, aikuj ko aer renaaj oktak. Ukukōt jekjek in katakin ko am̧ naaj jipan̄ eok tōpar aikuj ko aer rooktak jān doon. N̄an waanjon̄ak, ļōmņak n̄an kōjerbale men kein elaajrak:

• Bwebwenato ko. Bwebwenato ko rejipan̄ ajri ro lo ekōjkan an gospel eo jerbal n̄an mour aolep raan. Kōjerbal bwebwenato ko jān jeje ko rekwojarjar, jān mour eo am̧ make, jān menmenbwij an baam̧le eo am̧, ak jān māākjin ko an Kabun̄ in, eļap tata bwebwenato ko kōn Rilo̧mo̧o̧r. Karōk wāween ko n̄an kobaik ajri ro ilo bwebwenato eo—jān jibwi pija ko, āliji eoon ko, ak kōm̧m̧ani kōl ko.

• Kein alooj ko. Pija ko, pija in alooj ko, ak kein katak ko maron̄ jipan̄ ajri ro meļeļe im keememej pedped ko an gospel eo. Elōn̄ pija im pija in alwoj ko maron̄ loi ilo Media Library ilo ChurchofJesusChrist.org.

• Al. Al in jar ko ak al ko jet rekwojarjar remaron̄ jipan̄ ajri ro en̄jake iakwe eo an Anij, en̄jake Jetōb eo, im ekkatak mool ko an gospel eo. Toņ ko, piit ko, im anikien ko reļem waan remaron̄ jipan̄ ajri ro keememej mool ko ilo gospel eo ilo iiō rej itok. Ilo am̧ al ippān ajri ro, jipan̄ er loe im meļeļe pedped in katak ko kar katakin ilo al ko.

Eitōn aolep ajri ro em̧m̧an tata aer ekkatak n̄en elōn̄ļo̧k jān juon en̄jake ko rej jerbal Kappukōt wāween ko n̄an jipan̄ ajri ro kōjerbal en̄jake ko aer an lo, ron̄, im an̄ur ilo aer ekkatak. Ilo jet jekjek ko, em̧ool kwomaron̄ lo wāween ko n̄an kobaik en̄jake ko aer an kāātet im nemak

Ajri Ro Rekapāāl

N̄e kwoj kajjitōk ippān ajri ro n̄an jipan̄, ekkal, kōļar, ak je juon men eiookļo̧k juon pedped an gospel eo, kwoj jipan̄ er em̧m̧anļo̧k aer meļeļe pedped in katak eo im kwoj leļo̧k n̄an er juon kein kakeememej maron̄ loe kōn ta eo kōm kar ekkatak. Rej maron̄ barāinwōt kōjerbal ta eo raar ejake n̄an kwaļo̧k ta eo raar ekkatak kake ippān ro jet. Kajjojo bok ko an Eo Jera maakijiin eo ekoba makūtkūt ko reoktak n̄an ajri ro.

Ajri ro Rōkajnet

N̄e ajri ro rej kajjitōk kajjitōk ko, loi erāinwōt iien ko rem̧m̧an, rejjab āinwōt kein kōm̧ad ko. Kajjitōk ko an ajri ro rej juon kakōļļe bwe rej pojak n̄an ekkatak, im kajjitōk ko aer rej lewaj kōļmenļo̧kjeņ ko raorōk n̄an ta eo rej ļōmņak kake im en̄jake. Jipan̄ er lo bwe uwaak ko n̄an kajjitōk in jetōb ko aer maron̄ loi ilo jeje ko rekwojarjar im naan ko an rikanaan ro remour.

Ajri Ro Raikuj Iakwe Men̄e Rōkabūņōņō

Jet iien kōm̧m̧an ko an juon ajri ilo wāween ko ekakkure ekkatak eo an ro jet. Enan̄in aolep m̧wil in kakkure ko rej waļo̧k jān aikuj eo ejjab tōprak. N̄e menin ej waļo̧k, kijenmej, iakwe, im meļeļe kōn apan̄ ko an ajri eo emaron̄ jelm̧ae. Ļaddik eo ak leddk emaron̄ in aikuji elōn̄ļo̧k iien ko rem̧m̧an n̄an bōk koņan ilo katak eo ilo wāween ko rem̧m̧an—n̄an waanjon̄ak, jān jibwe juon pija, jin̄aik juon men, ak riiti juon eon.

N̄e juon ajri ej waanmaanļo̧k n̄an kōm̧m̧an poktak, emaron̄ in jipan̄ n̄an kōnono ippān makeļo̧k. Ilo juon jetōb in iakwe im kijenmej, kōmeļeļeik kōtmene ko am̧ im am ļōke bwe e emaron̄ tōpari. Nōbar ajri eo n̄e ej kōm̧m̧ani kāālet ko rem̧m̧anļo̧k.

Ajri ro Eļap Ijo Ippāer n̄an Kwaļo̧k

N̄e ajri ro rej ekkatak juon men ekāāl, ej make waļo̧k aer kōņaan kwaļo̧ke ippān ro jet. Kōketak ikdeelel in kōn leļo̧k n̄an ajri ro iien ko rem̧m̧an n̄an katakin pedped ko an gospel eo n̄an doon, ro uwaan baam̧le eo aer, im ro m̧ōttaer. Barāinwōt kajjitōk ippāer n̄an kwaļo̧k n̄an eok ļōmņak ko, en̄jake ko, im jeļā ko aer reiookļo̧k pedped in katak ko kwoj katakin. Kwonaaj lo bwe ewōr ippāer kōļmenļo̧kjeņ ko me reļem waan, erreo, im kanooj kajoor.

Ajri ro Remaron̄ En̄jake Jetōb eo bōtaab Maron̄ Aikuj Jipan̄ Kile Kareel eo An

Jekdo̧o̧n ajri ro me rejjan̄in de bōk menin letok eo an Jetōb Kwojarjar maron̄ en̄jake kareel eo An, eļap tata n̄e rej ekkatak kōn Jisōs Kraist im gospel eo An. N̄e rej kōm̧m̧ani kāālet ko rejim̧we, remaron̄ en̄jake kōmālim eo an Rilo̧mo̧o̧r kōn Jetōb eo. Katakin ajri ro kōn wāween ko reoktak Jetōb eo ej ekōnono ippāer. Jipan̄ er kile Anikien ilo An ekōnono n̄an er. Menin enaaj jipan̄ er eddōkļo̧k kōn juon imenene n̄an kapukōt im jerbale revelesōn eo an juon make ilo mour ko aer.

Katakin Jodikdik ro

Jodikdik ro Ewōr Ippāer Kōjatdikdik Eļap

Jodikdik ro ewōr ippāer kōjatdikdik eo n̄an kōm̧m̧ani men ko rekabwilōn̄lōn̄ ilo jerbal in jipan̄ eo an Irooj. Elōn̄ en̄jake ko kar rekooti ilo jeje ko rekwojarjar rej kwaļo̧k bwe Anij wōr an lōke ilo maron̄ ko ilo jetōb an jodikdik ro. Eļan̄n̄e jodikdik ro ej en̄jake bwe kwoj lōke er, aer lōke ilo kōjatdikdik eo aer ekwojarjar naaj eddōkļo̧k im renaaj kailbōk eok kōn ta eo remaron̄ kōttōprake. Ilo iakwe ejipan̄ er lo ta eo Jemed Ilan̄ ej kōņaan bwe ren maron̄ erom. Loore waanjon̄ak eo an Rilo̧mo̧o̧r eo ilo am waanmaanļo̧k n̄an iakwe im rōjan̄ er, kijenmej jerbal ipper, im jab ebweer jān er.

Jodikdik ro Rej Ekkatak kōn Er Make

Jodikdik ro kwoj katakin er rej ejake pedped ko an naan in kam̧ool eo aer. Rej pād ilo jekjek eoa n lo tōmak ko im lōke ko aer. Rej kōm̧m̧ani jokāālet ko me enaaj jelet ial in mour ko aer. N̄an mour ilo jetōb ilo raan kein āliktata im n̄a kakū mool mijen eo an Irooj n̄an er, jodikdik ro kwoj katakin enaaj aikuj in jelā elmen n̄an kapukōt kajoor ilo iien melijon̄ ko aer, uwaak n̄an kajjitōk ko aer, im beran n̄an “jutak āinwōt rikam̧ool ro an Anij” (Mosaia 18:9).

Jodikdik ro ewōr ippāer ikdeelel eo n̄an ekkatak men ko jān ļōmņak im en̄jake ijello̧kin jān baj jiron̄ er men ko. Menin ej meļeļe in bwe katakin jodikdik ro enaaj aikuji kapeel in ron̄jake ko. N̄e jodikdik ro rej en̄jake remeļeļe, renaaj en̄jake an ļapļo̧k m̧ōņōņō in ļoor kapilōk im tōl eo. Kam̧ool n̄an er bwe Irooj ejeļā er im enaaj jipan̄ er ilo aer kakkōt kōn kajjitōk ko im mālijjon̄ ko. Remaron̄ jerbale tōmak eo aer ilo E jān aer ejake juon iminene in jar raan otemjej im ekkatak jeje ko rekwojarjar im kōn jerbal n̄an ro jet. Kōketak jodikdik ro n̄an bōk koņaer ilo kūlaaj ko an Kabun̄ in im ekkatak kōn er make emaron̄ jipan̄ er ewōr en̄jake ko an juon make me enaaj kalōk naan in kam̧ool eo aer kōn jolet kwojarjar eo aer.

Elōn̄ Jodikdik Ekoņ Aer Kōjerbal Technology

Eļan̄n̄e jodikdik ro kwoj katakin er ewōr nejier make electronic device ko, keememej bwe device kein rej kein jerbal ko n̄an kōkōm̧anm̧anļo̧k ekkatak. Katakin er ekōjkan kōjerbal jeje ko rekwojarjar rej pād ilo electronic eo aer im kein jipan̄ ko jet loi ilo Gospel Library eo. Kwomaron̄ barāinwōt jilkinļo̧k ennaan ko im link ko n̄an jodikdik ro n̄an jipan̄ er m̧aanjabpopo n̄an katak ko rej itok wōt.

Jodikdik ro rej aikuj meļeļe ta eo Jemed Ilan̄ ejeļā remaron̄ erom.

Katakin Rūtto ro

Rūtto ro Remaron̄ Bōk Eddo in Ekkatak eo Aer

Rūtto rūkkatak ro rekeke mo̧o̧j n̄an jerbal n̄an er make ilo jekjek ko an ekkatak gospel eo (lale 2 Nipai 2:26). Kajjitōk ippāer n̄an m̧aanjabpopotok n̄an iien ekōnono ko an gospel eo jān ekkatak juon men m̧oktaļo̧k, im kōketak er n̄an kwaļo̧k ta eo rej ekkatak jān Jetōb. Kwomaron̄ barāinwōt kajjitōk ippāer ewi wōt pedped in katak ko an gospel eo rej kōņaan joļo̧k iien ekkatak kake ippān doon.

Rūttor ro rej Pedped ioon En̄jake ko Aer N̄e Ekkatak

Job ekar ba, “Ippān rūtto raṇ ewor mālōtlōt; im ilo iiō ko relōñ ewor jeḷāḷọkjeṇ” (Job 12:12). Eitōn aolep iien, māletlet im meļeļe eo ilo jetōb ej itok ālkin iiō in en̄jake ko. Ilo am̧ katakin rūtto ro, kajjitōk ippāer n̄an kwaļo̧k en̄jake ko me rekar kalōk tōmak eo aer ilo Jemed Ilan̄ im Jisōs Kraist. Menin enaaj leļo̧k n̄an er iien ko rem̧m̧an n̄an kam̧ool kōn ekōjkan aer kar itok n̄an jeļā bwe pedped ko an gospel eo rej ekkatak rej m̧ool. Kwaļo̧k en̄jake ko enaaj barāinwōt kalōk jemjera ko ikōtaan ro kwoj katakin er, jipan̄ “aolep … ren maron̄ ketak jān aolep,” (Katak im Bujen Ko 88:122).

Rūtto ro rej Pukōt Jerbal in Kaminene

Rūttoro kwoj katakin er emaorn̄ lōn̄ jerbal ko im eddo ko aer ilo jerbal ko aer, jukjuk in pād ko, kūr ko an Kabun̄ in, im baam̧le ko. N̄e rej ekkatak gosepl eo, ekkā aer ļōmņak kōņ elmen an ta ko rej ekkatak maron̄ jipan̄ er ilo jerbal ko aer. Karuwainene er n̄an loe elmen an naan eo an Anij ekkar n̄an wāween ko aer rein juon. Kwomaron̄ kōm̧m̧ane menin kōn kajjitōk ippāer ekōjkan an pedped ko an gospel eo ļap meļeļeier im jerbal n̄an mour ko aer.

Rūtto ro Remaron̄ Ļōmņak ilo Wāween ko Rōkapokpok

Kōnke kōn en̄jake eo im jeļā eo aer, rūtto ro rejeļā bwe ejjab aolep iien uwaak ko repidodo n̄an kajjitōk ko an gospel eo. Remaron̄ kam̧m̧oolol bwe juon eoon in jeje ko rekwojarjar emaron̄ wōr elōn̄ļo̧k meļeļe ko an, im remaron̄ kōjerbal juon pedped in katak kan gospel eo n̄an elōn̄ jekjek ko an mour. Kajjitōk ippāer n̄an kōļmenļo̧kjeņ kōn ekōjkan an pedped in katak ko an gospel eo iookļo̧k doon im n̄an ta eo ej waļo̧k ilo mour ko aer. Kōketa bōk koņaan im ekōnono bwe ren maron̄ ekkatak jān kōļmenļo̧kjeņ ko an doon rejej uwaer.

Rūtto ro remaron̄ kwalo̧k elōn̄ en̄jake ko rekar kalōk tōmak eo aer ilo Jemedwōj Ilan im Jisōs Kraist.

Katakin Armej ro ewōr Nan̄inmej in Ānbwin ko

Jipan̄ Kajjojo Armej Eddōkļo̧k im Wōnm̧aanļo̧k.

Joseph Smith ekar katakin, “Aolep kōļmenļo̧kjeņ ko im jetōb ko me Anij ekar jilkintok n̄an laļ in rej maron̄ kareel eļapļo̧k” (Teachings of Presidents of the Church: Joseph Smith [2007], 210). Lōmņak bwe aolep ajri ro nejin Anij rej ekeke n̄an ļapļo̧k ilo jeļāļo̧kjeņ im eddōkļo̧k. Kajjitōk ippān Irooj n̄an jipan̄ eok jeļā kilen jipan̄ kajjjojo armej.

Katak kōn Aikuj ko Rejenolo̧k

Kōnono n̄an rūkkatak ro ak ro jinier im jemeer ak rikōjparok ro. Kappukōt ekōjkan an kajjojo armej em̧m̧an tata ekkatak im ta ļam̧lam̧ ko rejipan̄ tata. Kwomon̄ barāinwōt ko̧o̧njeļ ippān ritōl ro jet im rūkaki ro me ewōr aer iminene im ļōmņak ko n̄an kwaļo̧k. Kōn ļam̧lam̧ ko rejipan̄ an katakin, lale disabilities.ChurchofJesusChrist.org.

Ejaake juon Mejatoto Em̧m̧an

Ejaake juon mejatoto eo em̧m̧an ijo aolep rej en̄jake jokne im iakwe. Jab kajju ļōmņak bwe aolep rūkkatak ro ewōr nan̄inmej in ānbwin ko rej eier wōt juon, im kōm̧m̧an n̄an kajjojo armej kōn iakwe im kautie. Rōjan̄ ro jet n̄an jouj im meļeļe.

Lale Bwe Aolep Ren Bōk Kwonaer

Oktak jiddik maron̄ kōm̧m̧ani n̄an m̧akūtkūt ko n̄an lale bwe aolep rūkkatak ro remaron̄ ekkatak, ekoba ro ewōr ippāer jon̄an ko an ānbwin ak epen aer ekkatak. N̄an waanjon̄ak, eļan̄n̄e juon m̧akūtkūt ej elmakot kwaļo̧k juon pija, kwomaron̄ al juon al eo eiookļo̧k ijello̧kin kobaiktok rūkkatak ro ejjab em̧m̧an aer loļo̧kjeņ.

Ejaki Jon̄ak ko im Ļamļam eo Ejjab Oktak

Juon wāween n̄an ejake juon jon̄ak ej n̄an kōm̧m̧ane juon peba ekilep kōn juon jikejuuļ. Jikejuuļ eo am̧ emaron̄ koba jar ko, iien katakin, im iien m̧akūtkūt. Loore juon jikejuuļ emaron̄ kadikļo̧k en̄jake ko rej make itok im eddodo n̄an jet rikatak.

Meļeļe Etke Mwiļ ko Reppen Rej Waļo̧k

Ekkatak kōn utam̧we ak jekjek ko me emaron̄ in im̧we juon armej n̄an kwaļo̧k m̧wiļ eo ejjab em̧m̧an. Lukkuun lale ta eo ej waļo̧k n̄e m̧wiļ ko rejjab em̧m̧an rej waļo̧k. Lukkuun jar im ļōmņake wāween n̄an jerbale jekjek in n̄an jipan̄ eļapļo̧k rikatak ro.

Kōn meļeļe ko reļapļo̧k kōn katakin armej ro ewōr nan̄inmej in anbwin ko, lale disabilities.ChurchofJesusChrist.org.

Rūkaki ro remaron̄ ejaake juon mejatoto em̧m̧an n̄an katakin ijo aolep rej en̄jake bōke im iakwe.

Katakin ilo Online

Jino Jeļā kōn Technology

M̧okta jān kūlaaj eo ak kweilo̧k eo am̧, joļo̧k jet iien jeļā kōn technology eo kwonaaj kōjerbale. Lale jet iaan men ko kobban, āinwōt kilen kwaļo̧ke juon pijaan alwoj ak pija ko. Ļōmņak in kōm̧m̧ane juon iien “teej” ippān ro uwaan baam̧le eo am̧ ak ro m̧ōttam̧.

Elōn̄ wōt iaan ward ko im stake ko ewōr juon aer technology ņakņōk. Emaron̄ wōr barāinwōt ro kojela ewōr aer meļeļe kōn kweiļo̧k ko ilo online. Kajjitōk kōn kōkapilōklōk eo aer ak tōl.

Joļo̧k Kein Mad Ko Ewōr

Eļan̄n̄e emaron̄, pukwōt juōn jikin eo eļur n̄an kōm̧m̧ane kweilo̧k eo ie. Ekeroro ko ilo itulik remaron̄ erom kein kōm̧ad. Kōketak rūkkatak ro n̄an kōm̧m̧ane ejja āinwōt ak n̄an dāpij wōt an kein ekōnono eo aer pād ilo an jeļo̧k ainikien eļan̄n̄e rejjab ekōnono.

Kōjerbal Kemera

Eļan̄n̄e emaron̄, kōjo̧ wōt kemera eo nejūm bwe rūkkatak ro ren maron̄ lo turin mejam̧. Kajjitōk (bōtaab ejjab menin aikuj) ippān rūkkatak ro n̄an kōjo̧ kemera ko nejier barāinwōt. Menin emaron̄ jipan̄ kōm̧m̧ane juōn jitibōn ippendoon im koba ippān doon n̄an jipan̄.

Kōjerbale Jikin Jeje eo

Elōn̄ būrookraam̧ in kweilo̧k ko ilo online rej kōm̧m̧an an ro rej bōk koņaer je kajjitōk ko ak kakobaba ko ilo juon jikin bwebwenato (chat window). Jet rej kōtlo̧k bwe ro rej bōk kunaer ren kotak peier ilo online. Kwaļo̧k bwe rūkkatak ro rej Jeļā kōn jekjek kein. Komaron̄ kōņaan kappeik juon n̄an lali pā ko kajutaki ak kakobaba ko ilo chat eo bwe kwon maron̄ kōmatļo̧k am̧ ilo tōl iien ekōnono eo.

Kapukōt Wāween ko n̄an Kobaik Rikatak ro

Ekkatak ko online jet iien ej kōm̧m̧an bwe en pen n̄an armej n̄an loe im ron̄. Kōm̧m̧ane juon kijejeto eo ealikkar n̄an kobaik ro rekōņaan kobatok. Jet iien menin meļeļein kwoj aikuj kōm̧m̧an kurup ko redik (n̄an waanjon̄ak, kajeņōļo̧k juon kilaaj in Jabōt Jikuuļ eo eļap uwaan). Jet iien ej n̄an kajjitōk ippān rikatak ro m̧oktaļo̧k n̄an bōk kwonaer ilo jet wāween ko. Jab kōm̧m̧an an jon̄an ko an technology kōm̧m̧an bwe kwon meļo̧kļo̧k kōn ak likjab in lali armej ro me rej kijooror im m̧ōņōņō in ekkatak.