Te kiraati n te reirei n taabati

Ibukiia Taan Kairiiri—Buokiia Taan Reirei n Tokanikai

Te Reitaki Temanna nakon Temanna

Ni katoa tai te kawai ae tamaroa ni kaitara kainanon te tia reirei ae onoti bon rinanon te reitaki temanna nakon temanna. Te katooto, ngkai te tia kairiiri ngkoe, ko kona ni karekea am tai ni marooro ae uarereke ma te tia reirei imwaain ke imwiin te kiraati ni maroroakin tuua n Reirei n Ana Kawai te Tia Kamaiu,. Ko kona ni katauraoiko nakon te marooro aei man matakuakinan te tia reirei ngkana e angareirei. Ukorii aanga ni kamataatako raoi iaon korakoran te tia reirei ao kakaei kawai are ko kona n anga iai te boutoka.

Boutokaan te korakora are iroun te tia reirei e bon rangi ni kakawaki ngkai ko noorii taai ibukin te rikirake. E bon ibuobuoki moanakin te marooro ma taan reirei man tuangakiia bwa a na iangoia i bon ibukiia bwa tera ae nakoraoi irouia ao iia te tabo ae a namakinna bwa e kainanoa karikirakeana.

Ngkai ko reitaki ma taan reirei, iangoi kawai ake a na kakorakoraia ao ni kaungaia ma te akoi ao te kakaitau ibukin te ibuobuoki ake aanga.

Aia Boowi Kauntira n Tia Reirei

Uoote n tatabeua nako a riai ni karaoi boowi ni kauntira ibukiia tia reirei ni katoa kuata ni kaai ni maroroakin tuua iaon te angareirei n aron Kristo. Aia boowi kauntira n tia reirei e kona naba ni booaki ibukiia kaaro (taraa Te Aeniboki ni Kabuta: Te Beku n Ana Ekaretia Iesu Kristo Ibukiia Aika Itiaki ni Boong aika Kaitira, 13.5, ChurchofJesusChrist.org).

Nningai ae e Riai ni Karaoaki iai Boowi Aikai?

Aia bowi taan reirei a kakaraoaki n tain te 50 ni miniti ni kiraati n te Tabati.

• Taan reirei n te Nakoanibonga, Bootaki n Aine, ao Kairake n Ataeinaine a na kona ni iria tao n te moan ke n te kateniua n Tabati, n aron baireana irouia taan kairiiri n te tabo.

• Taan reirei n te Reirei n Tabati a kona ni iria tao n te kauoua ke n te kaaua n Tabati, n aron baireana irouia taan kairiiri n te tabo.

• Taan reirei n te Moanrinan ana kona n iria n Tabati ake a bon rineia, n aron baireana man te beretitentii n te Moanrinan ao te Reirei n Tabati. Ngkana a tangiria, a kona taan reirei n te Moanrinan ni bootaki n te tai ae kaokoro ma taan reirei ake tabeman ni maroroakina aron te anga reirei ae e onoti ibukin aron nako te angareirei nakoia ataei. Aio e kona ni karaoaki n tain te 20 ni miniti n tain te anene, imwaain ke imwiin bootaki ake a kakaraoaki n te Tabati ke n te bong teuana i nanon te wiki. E riaon teuana aia boowi kauntira n tia reirei ae e na karaoaki inanon te kuata ibukiia taan reirei n te Moanrinan bwa aonga n aki bane ni kitani aia kiraati n te Moanrinan n te tai ae tii teuana. (Bwaai aika ana taraaki: Ngkana e kainanoaki, beretitentii n te Moanrinan a karekea te tia onomwi n tia reirei, taian kiraati ake a ikotaki, ke karaoi babaire tabeua ni kariaia taan reirei n te Moanrinan ni ira te boowi ni kauntira ibukiia taan reirei.)

• Te boowi ni kauntira n tia reirei ibukiia kaaro e kona ni karaoaki n te Tabati teuana, n aron are e baireaki man kauntiran te uoote.

Antai Aika a Kona n Iria?

Ni kabane tia reirei n te kooram ke n te kiraati inanon uoote a riai n iria, ni ikotaki ma temanna mai ibuakoia taan kairiiri n te nakoanibonga ke bootaki nako ake iai katabeaia iaoia kooram ao kiraati akanne. Ngkana e riai, taan iria a kona ni kamaenakoaki inanon kurubu ni kaineti ma kainanoia naake a reireiniia. Te katooto, taan reirei ibukiia kairake ke ataei a kona ni karekea ae bati riki ngkana a maenako ni boowi n taai tabetai ni maroroakin kangaanga aika a onoti n reiakinaia kairake ke ataei.

Ibukin te boowi ni kauntira n tia reirei ibukiia kaaro, kauntiran te uoote e na baireia ngkana a na kaoiia tabeman kaaro ke ni kauka te roko nakoia naake a kan iria.

Antai ae E Kairii Bootaki Aikai?

Te kauntira n te uoote, ma te tia ibuobuoki n te beretitentii n te Reirei n Taabati, a tararua te boowi ni kauntira n tia reirei. A na uaia ni marooro i aon kainnanoia taan reirei ao taan reiakinaki ae boboto iaon te bwai are atia n nooria inanon kiraati ke bootaki. A uaia ni mwakuri ni baireia bwa e ngaa te tua ao te mwakuri man Reirei n ana Kawai te Tia Kamaiu ae e na nakoraoi riki ni kaitarai kainnano ake a tia n noorii.

Ni bon arona, te beretitenti n te Reirei n Tabati e kaira te boowi ni kauntira n tia reirei. Ma, kaain te uoote ake tabeman a kona ni mwiokoaki ni kairi boowi n taai tabetai. Beretitentii ni kooram ao ni bootaki a kamatoaa ma aia taan reirei tuua ao mwakuri ake a maroroakinaki n tain te boowi.

Tera ae Karaoaki ni Boowi ni Kauntira n Tia Reirei?

Boowi ni kauntira n tia reirei a riai n irii waaki aikai:

• Tibwatibwa ao uaia ni marooro. Kaoiia taan reirei bwa a na tibwaua te bwai are a tibwa tia n rinanona, anga titiraki aika a kaineti nakon te angareirei, ao tibwai iango n taobarai taian kakaewenako. Te mwakoro aei n tain te boowi iai inanona rinanoan taian tua ake a maroroakinaki n te boowi ae nako.

• Te uaia n reirei. Kaoiia taan reirei bwa a na marooro iaon teuana te tua are e kaotaki inanon te boki n reirei aei: kabanea nanom iaon Iesu Kristo, tangiria naake ko reireiniia, reirei mairoun te Tamnei, ao kaoa te botumwaaka n ukora te rabakau. Tuua aikai a kona ni kanakoaki nakon are e tangiraki, ma ti ngkana e baireaki bwa e na karinanaki ni kanakoaki mai irouia kaain te kauntira n te uoote, taan ira te boowi a kona n rinea te tua ae a na marooro iaona nakon te boowi are imwiina. Ko kona ni kabanea ae riaon teuana tain te boowi iaon teuana te tua ngkana e kainnanoaki.

• Karaoan mwakuriana ao kakao. Buokiia taan reirei ni baireia bwa a na kanga ni kamwakura te tua are a tia ni maroroakinna. Ngkana e riai, ko kona naba n uaia ni katea aron karaoan te rabakau are kama tia ni maroroakinna. Kaoiia bwa a na korea mwiia ao ni karaoa nanon te bwai are a namakinna bwa a na kanga ni kamwakura te tua anne n aia angareirei—ni ikotaki ma aia kekeiaki n reirei inanon mweengaia. Kaungaia bwa a na moana kamatebwaian te tua are imwiina are e na maroroakinaki.

Ngkana e kona ni karaoaki, boowi ni kauntira n tia reirei e riai n kaota te banna iaon taian tua ake a maroroakinaki.

ataeinnaine ngke a inga

E kona te boowi ni kauntira n tia reirei ni buokiia taan reirei ni mataata raoi ao ni kamwakurii tuua n te angareirei n aron Kristo.

Kinakiia Taan Reirei aika Boou

Ngkai te tia kairiiri ngkoe, iai katabeam ni “kaitibo ma taan reirei aika a boou” inanon am bootaki ao “ni buokiia n tauraoi nakon weteaia” (Aeniboki ni Kabuta, 17.3, ChurchofJesusChrist.org). Boowi aikai bon taai ni katerea nakoia taan reirei aika boou te wewete ae tabu aio ao n anga te kairi mai iroun te tamnei n noria bwa tera ae nanonaki n reirei n ana Kawai te Tia Kamaiu. Ngkai te tia kairiiri, ko kona ni buokiia taan reirei aika boou n tauraoi ni beku man karaoan bwaai aikai:

• Kaota nanom ni kakoauaa bwa te Tia Kamaiu e na buokiia inanon tibwangaia (taraa Reirei ao Berita aika Tabu 88:78).

• Anganiia taan reirei aika boou kaobiin te boki aei, ao kaungaiia bwa ana kakaai kawai ni kamwakurii tuua ake inanona n aia angareirei.

• Tibwaia ma taan reirei aika boou rongorongon am bootaki are e na rangi ni ibuobuoki nakoia.

• Ngkana e kainanoaki, tuangiia taan reirei aika boou te ruu are a na angareirei iai ao tera te reirei ae a na moana mai iai. Katauraoi riki rongorongo ake a kainanoi iaon aia kiraati ao kaaina.

• Kabwarabwaraa nakoia taan reirei aika boou ae ko kona ni buokiia ni weteakiia. Aanga te boutoka inanon te kiratiruum ao ni karekean bwaai ni ibuobuoki n te angareirei ngkana e kainanoaki.

• Tuangiia ae n taai tabetai ko na mamataku irouia tia reirei ma aia kiraati, ao n anga mwiin te bwai are ko nooria man ana kairi te Tamnei.

• Kaoiia taan reirei n iriira buakon te boowi ni kauntira n tia reirei ni katoa kuata.