Lēsoni 7 Naunau ʻa e Faiakó

Ko e Ivi Fakamālohia ʻo Sīsū Kalaisí

ʻOku fakalahi ʻe he Tohi ʻa Molomoná ʻetau mahino ki hono maʻongoʻonga mo e loloto ʻo e Fakalelei ʻa e Fakamoʻuí. ʻOku tau ako mei ai ʻoku ʻikai ngata pē hono ʻomi ʻe Sīsū Kalaisi maʻatautolu ʻa e faingamālie ke fakamaʻa mei he angahalá, ka te Ne lava foki ʻo fakafiemālieʻi mo tokoniʻi kitautolu ʻi hotau ngaahi tūkiaʻangá mo e vaivaiʻangá. ʻE maʻu ʻe he kau akó ha faingamālie ʻi he lēsoni ko ʻení ke fakamatalaʻi mo fakamoʻoni ki he tokāteline ko ʻení. ʻE ʻoange foki ki he kau ako ko ʻení ha faingamālie ke ʻiloʻi ʻa e meʻa te nau lava ʻo fai ke hokohoko atu ai ʻenau fakaafeʻi e ʻaloʻofa ʻa e ʻEikí ki heʻenau moʻuí.

Ngaahi Fokotuʻu ki hono Akoʻí

Ko Hono Fakatupulaki ʻEtau Founga Akoʻí mo e Akó

Kamata ʻaki haʻo fakakaukau ki he kau akó. ʻOku omi e kau akó ki he kalasí mo ha aʻusia kuo nau maʻu, ko ha ʻilo mo ha ngaahi fehuʻi. Te tau lava ʻo fakaʻaongaʻi e mahino ʻoku lolotonga maʻu ʻe he kau akó ko e kamataʻangá ia ʻi heʻetau tataki kinautolu ʻi he hokohoko atu ʻenau akó. ʻI he toenga ʻo e kalasi ko ʻení ʻi he kamata hoʻo kalasí pe kamata ke talanoa fekauʻaki mo ha ngaahi meʻa pau, fakakaukau ki he founga te ke lava ai ʻo ilo pe ko e hā e ngaahi fehuʻi mo e ngaahi fakakaukau ʻoku ʻamanaki e kalasí ke aleaʻí, pea liliu leva hoʻo ngaahi palaní ʻo fakatatau mo e tataki ʻa e Laumālié.

Ko e akonaki ʻa ʻAlamā ko e Siʻí ki he kakai ʻi Kitioné ʻe tokoniʻi ʻe he ʻEikí Hono kakaí.

Fakakaukau ke fakaʻaliʻali ha ngaahi ʻīmisi hangē ko ʻení mo fehuʻi, “ko e hā ha ngaahi faingataʻa, mamahi pe ʻahiʻahi te tau ala aʻusia ʻoku ʻikai ko ha ola ia ʻo ha ngaahi fili angahalaʻia?” (Lisi e ngaahi tali ʻa e kau akó ʻi he palakipoé.)

ʻOange ki he kau akó ha kiʻi taimi ke nau fakalaulauloto (pe tohi) ha niʻihi ʻo e ngaahi faingataʻa kuó ne fakatupu ha mamahi pe faingataʻaʻia ʻiate kinautolu pe kakai ʻoku nau ʻofa aí.

Fakamanatu ki he kau akó ʻi he taimi ne ngāue fakafaifekau ai ʻa ʻAlamā ko e Siʻí ki he kakai faivelenga ʻi Kitioné, naʻá ne akoʻi kinauotlu ʻi he founga ʻe lava ai ʻe he mamahi ʻo e Fakamoʻuí ʻo tokoniʻi kitautolu ʻi hotau ngaahi mamahi mo e faingataʻaʻia ne ʻikai tupu he angahalá. Fakaafeʻi e kau akó ke toe vakaiʻi ʻa e ʻAlamā 7:11–12 ʻo kumi ha faʻahinga kupuʻi lea pē ʻoku mahuʻingamālie kiate kinautolu. Fakaafeʻi kinautolu ke fakamatalaʻi ʻa e ʻuhinga ʻo e meʻa ne nau maʻú mo e ʻuhinga ʻoku mahuʻinga ai kiate kinautolú.

Ke tokoni ke fakaloloto e mahino ʻa e kau akó kau ki hono ʻafioʻi ʻe he Fakamoʻuí e founga ke tokoniʻi ʻaki Hono kakaí, ʻe lava ke ke vahevahe e fakamatala ko ʻeni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Ma Uá:

ʻOku faʻa fakaʻaongaʻi ʻa e[tokoniʻí] ʻi he folofolá ke fakamatalaʻi e tokanga mai ʻa Kalaisi kiate kitautolú. ʻOku ʻuhinga moʻoni ia “ke lele ki ai.” Ko ha founga fakaʻofoʻofa moʻoni ia ke fakamatalaʻi ai e ngāue fakavavevave ʻa e Fakamoʻuí maʻa kitautolú. Naʻa mo e taimi ʻokú Ne ui mai ai ke tau haʻu pea muimui kiate Iá, ʻokú Ne lele ke tokoniʻi kitautolu. (“Come unto Me” [Church Educational System fireside for young adults, Mar. 2, 1997], 9, speeches.byu.edu)

Hili hono aleaʻi e ngaahi akonaki mei he ʻAlamā 7:11–12, tokoni ki he kau akó ke nau ʻilo ha tefitoʻi moʻoni tatau mo ʻení: Naʻe toʻo ʻe he Fakamoʻuí kiate Ia ʻa ʻetau mamahí, mahamahakí, mo e ngaahi ʻahiʻahí kae lava ke Ne tokoniʻi kitautolu ʻi heʻetau fehangahangai mo e ngaahi faingataʻa ʻo e matelié.

• Ko e hā ʻoku mahuʻinga ai ke mahino e tafaʻaki ko ʻeni ʻo e tokāteline ʻo e Fakalelei ʻa e Fakamoʻuí?

• Ko e hā ʻoku akoʻi atu ʻe he foʻi moʻoni ko ʻení fekauʻaki mo e natula mo e ʻulungaanga ʻo Sīsū Kalaisí?

• ʻE lava fēfē ʻe he tui ki he foʻi moʻoni ko ʻení ʻo tokoniʻi koe pe ko ho ngaahi ʻofaʻangá ʻi ha ngaahi faingataʻa fakataautaha?

Lau fakakalasi pe ʻi ha fanga kiʻi kulupu iiki e fakamatala ʻa ʻEletā Petinā mei he konga 1 ʻo e naunau teuteú, pea aleaʻi e fehuʻi ko ʻení mei he naunau teuteú:

• Ko e fē ha taimi naʻá ke ongoʻi ai ha alanima atu ʻa e Fakamoʻuí ke fakafiemālieʻi pe fakamālohia koe ʻi haʻo aʻusia ha ngaahi faingataʻa ʻi hoʻo moʻuí?

Ko e akoʻi ʻe he ʻEikí ʻa Molonai fekauʻaki mo e mālohi ʻo ʻEne ʻaloʻofá.

Fakaʻaliʻali e fakatātā ʻoku ʻoatu heni, pea fakaafeʻi ha tokotaha ako ke ne fakamatalaʻi e ongo ʻa Molonai fekauʻaki mo hono tuʻunga malava ke hiki e folofola toputapú. (ʻO ka fie maʻu, toe vakaiʻi mo e kau akó ʻa e ʻEtā 12:23–25 .)

ʻE lava ke ke fakaafeʻi e kau akó ke nau fakaʻaongai ha kiʻi taimi ke tohi pe fakalaulauloto ai fekauʻaki mo ha niʻihi ʻo ʻenau ngaahi tōnounoú mo e vaivaiʻangá.

Lau fakataha ʻa e ʻEta 12:27 pea fakaafeʻi e kau akó ke kumi e ngaahi tefitoʻi moʻoni te ne lava ʻo tokoniʻi kitautolu ke fehangahangai mo hotau ngaahi vaivaí ʻi he founga ʻa e ʻEikí. ʻE lava ke maʻu ʻe he kau akó ha ngaahi moʻoni hangē ko ʻení: ʻI heʻetau haʻu ki he ʻEikí, ʻokú Ne tokoniʻi kitautolu ke ʻiloʻi hotau ngaahi vaivaiʻangá. ʻE lava ke tokoni ʻetau ʻiloʻi hotau ngaahi vaivaiʻangá ke tau loto-fakatōkilalo ai. ʻI he taimi ʻoku tau fakavaivaiʻi ai kitautolu mo tui ki he Fakamoʻuí, ʻe lava ke liliu ʻe Heʻene ʻaloʻofá hotau ngaahi vaivaiʻangá ki ha ngaahi mālohinga. Fakaʻaliʻali e ngaahi moʻoni ne maʻu ʻe he kau akó ke nau lava ʻo fakaʻaongaʻi ʻi he ʻekitivitī ko ʻení.

Ko Hono Fakatupulaki ʻEtau Founga Akoʻí mo e Akó

Tokoni ke ʻilo mo mahino ki he kau akó e ngaahi tefitoʻi moʻoní mo e tokāteliné. Hili hono ʻilo ʻe he kau akó e ngaahi tefitoʻi moʻoní mo e tokāteliné mei he folofolá mo e ngaahi lea ʻa e kau palōfitá, tokoni ke mahino kiate kinautolu e ʻuhinga mo e heliaki ʻo e ngaahi moʻoni ko ʻení pea mo e founga ʻe lava ke liliu ai ʻe he ngaahi moʻoni ko ʻení ʻenau moʻuí. ʻE lava ke tau maʻu e ʻilo mo e mahino ko ʻení ʻi hono fakamatalaʻi ʻe he kau akó ha fakamatala ʻo e tokāteliné pe ha tefitoʻi moʻoni mo vahevahe ha ngaahi sīpinga mo ha ngaahi aʻusia ʻoku fekauʻaki mo ia. Lotua ha tokoni ke ʻeke ha ngaahi fehuʻi te ne fakaava e fakakaukau mo e loto ʻo e kau akó ki he mahuʻinga ʻo e ngaahi tefitoʻi moʻoni ʻoku nau ʻiló.

Fakaafeʻi e kau akó ke fakamatalaʻi, fakakalasi pe ʻi ha kulupu iiki, e ʻuhinga ʻo e ngaahi tefitoʻi moʻoni ko ʻení kiate kinautolú.

Ke tokoni ki he kau akó ke nau fakakaukau mo ongoʻi loloto ange e ngaahi tefitoʻi moʻoni ko ʻení, ʻe lava ke ke fakaʻaliʻali ha niʻihi ʻo e ngaahi fehuʻi ko ʻení pea tuku ke fili ʻe ha tokotaha ako pe ko e fehuʻi fē ke aleaʻi fakatahá. Mahalo he ʻikai ha taimi feʻunga ke aleaʻi kotoa ai kinautolu.

• Ko e hā ha ngaahi founga ʻe lava ke hoko ai ha vaivaiʻanga ko ha tāpuaki ki ha taha? (ʻO ka fie maʻu, lau e fakamatala ʻa Sisitā Misela D. Keleki ʻi he konga 2 ʻo e naunau teuteú.)

• Te ke fakamatalaʻi fēfē e angaʻofa ʻa e ʻEikí ki ha tokotaha naʻá ne ongoʻi taʻemalava ke siʻaki ha angahala pe tōʻonga moʻui?

• Ko e hā kuó ke ako fekauʻaki mo e Fakamoʻuí ʻi hoʻo foua e hala ki hono fakavaivaiʻi koé mo e falala ki Heʻene ʻaloʻofa ʻi hoʻo moʻuí?

• Ko e hā te tau lava ʻo fai ke fakaafeʻi kakato ange ai e ʻaloʻofa ʻa e ʻEikí ki heʻetau moʻuí? (ʻE lava ke ke toe vakaiʻi ʻa e 2 Nīfai 25:23, 29 pea mo e ngaahi fakamatala ʻa e kau taki ʻo e Siasí ʻi he vahe 3 ʻo e naunau teuteú.)

Fakamoʻoni (pe fakaafeʻi ha tokotaha ako ke fakamoʻoni) ki he Fakalelei ʻa e Fakamoʻuí, tautautefito ki Hono mālohi ke tokoniʻi kitautolu ke ikunaʻi hotau faingataʻaʻiá, mamahí, vaivaiʻangá mo e tōnounoú.

ʻOange ki he kau akó ha taimi ke nau fakalaulauloto pe lekooti ai e ngaahi ongo fakataautaha ne nau ongoʻi lolotonga e lēsoni ʻo e ʻaho ní. ʻE lava ke ke fakaafeʻi kinautolu ke fakakaukau ki he ongo fehuʻi ko ʻení: ʻOkú ke pehē ko e hā ne mei fie maʻu ʻe he ʻEikí ke ke fai ke maʻu lahi ange ai ʻEne ʻaloʻofá. Ko e hā te ke lava ʻo fai ke fehangahangai mo ha vaivaiʻanga ʻokú ke lolotonga fefaʻuhi mo ia ʻi ha loto-fakatōkilalo ʻoku lahi angé mo ha tui kia Kalaisi?

Ki he Kalasi Hokó

Kole ki he kau akó ke fakakaukau pe ko e hā ha ngaahi fehuʻi ʻoku nau maʻu fekauʻaki mo e maama tataliʻanga ʻo e ngaahi laumālié, Toetuʻú pe Fakamaau Fakaʻosí. ʻI heʻenau teuteu ki he kalasi hokó, fakaafeʻi kinautolu ke fakakaukau ki he meʻa ʻoku nau fai ke teuteu ai ki he moʻui hili ʻa e maté.