Lēsoni 28 Naunau ʻa e Faiakó

Haʻu kia Kalaisi

Kimuʻa pea fakaʻosi ʻe he palōfita ko Molonaí ʻene lekōtí, naʻá ne fakaafeʻi e kau laukongá ke nau “haʻu kia Kalaisi, pea hoko ʻo haohaoa ʻiate ia” (Molonai 10:32). ʻI he lēsoni ko ʻení, ʻe maʻu ai ʻe he kau akó ha faingamālie ke fakamatalaʻi ʻa e ʻuhinga ʻoku mahuʻinga ai ke langa ʻenau moʻuí ʻi he tuʻunga ʻo Sīsū Kalaisí pea mo fakakaukau ki he meʻa te nau lava ʻo fakahoko ke nau haʻu kakato ange ai kiate Iá. Te nau maʻu foki ha faingamālie ke vahevahe e founga kuo tokoniʻi ai kinautolu ʻe heʻenau ako e Tohi ʻa Molomoná he kalasi ko ʻení ke nau haʻu kia Sīsū Kalaisí.

Ngaahi Fokotuʻu ki hono Akoʻí

Ko Hono Fakatupulaki ʻEtau Founga Akoʻí mo e Akó

Poupouʻi e kau akó ke hokohoko atu ʻenau kau ki he ʻinisititiutí. Naʻe pehē ʻe ʻEletā D. Toti Kulisitofasoni ʻi ha fakataha lotu fakaemāmani lahi maʻá e kakai lalahi kei talavoú, “ʻOku ou ʻofa ʻi he ʻinisititiutí. ʻOku ou fakaʻamu ko kimoutolu kotoa ne maʻu e faingamālie ke lesisitá kuo ʻikai ngata ʻi hoʻomou maʻu kalasí ka ʻoku mou kau atu ki he ʻInisititiutí. Ko e taha ia ʻo e ngaahi meʻa lelei taha ʻoku tau fai ʻi he Siasí” (“Filí mo e Tukupaá” [12 Sānuali, 2020], broadcasts.ChurchofJesusChrist.org). Poupouʻi e kau akó ke fakakakato e ngaahi fiemaʻu ki he kalasi ko ʻení pea ke hokohoko atu ʻenau kau ki he ʻinisititiutí.

Ko e akoʻi ʻe Hilamani hono ongo fohá ke langa hona tuʻungá ʻia Sīsū Kalaisi.

Fakaʻaliʻali mo lau e fakamatala ko ʻeni ʻa ʻEletā Niila L. ʻEnitasení. Fakaafeʻi e kau akó ke nau fakakaukau ki he founga ʻoku felāveʻi ai e ngaahi akonaki ʻa ʻEletā ʻEnitasení mo honau ngaahi tūkunga makehe takitahá.

Siʻoku kaungāmeʻa kei talavou, he ʻikai aʻu fiemālie atu ʻa e māmaní ki he Hāʻele ʻAnga Ua Mai ʻa e Fakamoʻuí. ʻOku fakahā ʻi he folofolá “ʻe moveuveu ʻa e ngaahi meʻa kotoa pē” [Tokāteline mo e Ngaahi Fuakava 88:91]. …

Ko e meʻa ʻoku toe fakahohaʻa lahi ange ʻi he ngaahi mofuiké mo e ngaahi tau kuo kikiteʻí [vakai, Dallin H. Oaks, “Preparation for the Second Coming,” Liahona, May 2004, 7–10] ko e ngaahi matangi fakalaumālie ʻoku mālohi feʻunga ke ʻave koe mei ho fakavaʻe fakalaumālié mo lava ke ʻave ho laumālié ki ha ngaahi feituʻu naʻe ʻikai te ke teitei fakakaukau ki ai, pea ʻi he taimi ʻe niʻihi ʻoku ʻikai ke ke faʻa fakatokangaʻi hono ʻave koé.

Ko e ngaahi faingataʻa kovi tahá ko e ngaahi ʻahiʻahi ʻa e filí. Kuo hoko maʻu pē ʻa e faiangahalá ko e konga ʻo e māmaní, ka kuo teʻeki ai ha taimi ʻe maʻungofua, faingataʻa ke fakatōliaʻi, pea faingofua pehē ai hono talí. (“Ngaahi Faingataʻa Fakalaumālié,” Liahona, Mē 2014, 18)

• Ko e hā ha “ngaahi faingataʻa fakalaumālie” ʻoku fehangahangai mo e kakai lalahi kei talavou ʻi he ʻaho ní? (Mahalo te ke fie tohi ʻa e ngaahi tali ʻa e kau akó ʻi he palakipoé.)

• Te ke lava fēfē ʻo teuteu ʻi he lelei taha te ke lavá ki he ngaahi faingataʻa fakalaumālie te ke fehangahangai mo iá? (ʻE lava ke ke fakamahinoʻi ange naʻe fakahoko ʻe ʻEletā ʻEnitaseni ʻa e fehuʻi tatau ʻi heʻene leá peá ne lau ʻa e Hilamani 5:12.)

Lau fakataha e Hilamani 5:12, pea fakaafeʻi e kau akó ke kumi ha tefitoʻi moʻoni ʻe lava ʻo tokoni kiate kinautolu ke matuʻuaki honau ngaahi faingataʻa fakalaumālié. (ʻI hono fakaʻaongaʻi e ngaahi tali ʻa e kau akó, ʻe lava ke ke hiki ha tefitoʻi moʻoni hangē ko ʻení ʻi he palakipoé: Kapau te tau langa hotau tuʻungá ʻia Sīsū Kalaisi, he ʻikai maʻu ʻe Sētane ha mālohi ke fakaʻauha kitautolu.)

• ʻE uesia fēfē nai ʻe he ngaahi faingataʻa fakalaumālié ʻa e kakai kuo langa honau tuʻungá ʻi he ngaahi meʻa mahuʻinga pe poto ʻo e māmaní?

• Ko e hā ʻokú ne ʻai ʻa Sīsū Kalaisi ke hoko ko e tuʻunga pau pē ia ʻe taha ke langa ai ʻetau moʻuí? (Mahalo te ke fie fakaafeʻi e kau akó ke nau toe vakaiʻi e fakamatala ʻa Sisitā Seli L. Tiu ʻi he konga 1 ʻo e naunau teuteú.)

• Ko e hā te ne ala taʻofi kitautolu mei hono langa pe pukepuke hotau tuʻungá ʻia Sīsū Kalaisí? Te tau lava fēfē ʻo ikunaʻi e ngaahi faingataʻa ko ʻení?

Fakaafeʻi e kau akó ke vahevahe ha ngaahi ngāue pau kuo nau fakahoko ke langa ʻenau moʻuí ʻia Sīsū Kalaisi. (ʻE lava ke ke lisi ʻenau ngaahi talí ʻi he palakipoé.) Hili hono vahevahe ʻe he kau akó ʻenau ngaahi aʻusiá, ʻoange ha taimi ke nau lekooti ai ha ngāue te nau lava ʻo fakahoko ke langa kakato ange ai ʻenau moʻuí ʻi he ʻEikí.

Ne fakaʻosi ʻe Molonai e Tohi ʻa Molomoná ʻaki ʻene fakaafeʻi e tokotaha kotoa ke haʻu kia Sīsū Kalaisi.

  ʻE lava ke ke vahevahe ha aʻusia fekauʻaki mo e moʻui ʻa ha tokotaha ʻi heʻene fili ke haʻu kia Kalaisí. Fakaafeʻi e kau akó ke nau aleaʻi e meʻa te nau lava ʻo ako mei he aʻusiá.

Lau fakataha ʻa e Molonai 10:32–33 pea fakaafeʻi e kau akó ke nau aleaʻi e ʻuhinga ʻoku lelei ai e hoko ʻa e fakaafe ko ʻení ko e vahe fakaʻosi ʻo e Tohi ʻa Molomoná. Tokoni ki he kau akó ke nau kumi mei he ngaahi vēsí ni ha tefitoʻi moʻoni hangē ko ʻení: ʻI heʻetau haʻu kia Sīsū Kalaisí, ʻe lava ke fakamaʻa mo fakahaohaoaʻi ai kitautolu ʻo fakafou ʻi Heʻene ʻaloʻofá.

• Te ke fakamatalaʻi fēfē nai e ʻuhinga ʻo e “haʻu ʻo muimui ʻia Kalaisí” ki ha tokotaha ko ʻene toki fanongo ia he fakaafé? (ʻE ala ʻaonga ke kole ki he kau akó ke nau toe vakaiʻi ʻa e fakamatala ʻa ʻEletā D. Toti Kulisitofasoni ʻi he konga 2 ʻo e naunau teuteú.)

• ʻOku ʻuhinga ki he hā ʻa e “fakafisi ʻa kitautolu mei he anga taʻe-māʻoniʻoni kotoa pē”? (Molonai 10:32).

• Ko e hā ʻoku tau fie maʻu ai e ʻaloʻofa ʻa Sīsū Kalaisí ka tau toki haohaoá? Ko e hā te tau lava ʻo fakahoko ke fakaafeʻi ai e mālohi pe ʻaloʻofa ʻa e ʻEikí ki heʻetau moʻuí? (Poupouʻi e kau akó ke nau toe vakaiʻi e fakamatala ʻa Palesiteni Teti R. Kalisitaá ʻi he konga 2 ʻo e naunau teuteú.)

Poupouʻi e kau akó ke vahevahe e founga kuo tokoniʻi ai kinautolu ʻe he ʻaloʻofa ʻa e ʻEikí ke nau haʻu kia Sīsū Kalaisí.

Lau fakataha e fakaafe ʻa Molonai ʻi he ʻEta 12:41 pea fakamanatu ki he kau akó naʻe fakaafeʻi kinautolu ke nau fakakaukau ki he founga kuo nau tali ai ʻa e fakaafe ko ʻení. Fakaafeʻi e kau akó ke nau vakai ki he vahe 3 ʻo e naunau teuteú mo toe vakaiʻi e ngaahi meʻa ʻe tolu ke fili mei ai ʻi lalo ʻi he ʻuluʻi tohi “Lekooti Hoʻo Ngaahi Fakakaukaú.” ʻOange ki he kau akó ha taimi ke toe vakaiʻi ai ʻa e meʻa ne nau tohí, pe, kapau ne teʻeki ke nau maʻu ha taimi ke teuteu ai, poupouʻi kinautolu ke fili ha taha ʻo e ngaahi meʻa ke fili mei aí pea teuteu ha ngaahi meʻa ke vahevahe.

Hili ha taimi feʻunga, fakaafeʻi e kau akó ke vahevahe ʻa e meʻa kuo nau hikí. (Kapau ʻokú ke maʻu ha kalasi tokolahi, ʻe lava ke ke vahevahe e kau akó ki ha ngaahi kulupu kae lava ke maʻu ʻe he tokotaha kotoa ha faingamālie ke vahevahe.)

ʻI hoʻo fakaʻosi e lēsoni mo e kalasi ko ʻení, ʻe lava ke ke fakamoʻoni ki he founga kuo tokoniʻi ai koe ʻe he Tohi ʻa Molomoná ke ke haʻu kia Kalaisí. Poupouʻi e kau akó ke hokohoko atu ʻenau haʻu kia Kalaisí ʻaki hono ako fakaʻaho e Tohi ʻa Molomoná.