Lēsoni 19 Naunau ʻa e Faiakó

Moʻui Angatonu ʻi ha Kuonga ʻo e Fai Angahalá

Naʻe pehē ʻe Palesiteni Lāsolo M. Nalesoni, “ʻOku fakatou fakamaʻalaʻala ʻe he Tohi ʻa Molomoná e ngaahi akonaki ʻa e ʻEikí mo fakahaaʻi e ngaahi founga ʻa e filí” (“Ko e Tohi ʻa Molomoná: Naʻe Mei Fēfē Nai Hoʻo Moʻuí Ka Ne ʻIkai Ia?” Ensign pe Liahona, Nōvema 2017, 62; vakai foki, 2 Nīfai 26–33). ʻE tokoni ʻa e‘Iuniti 6 ke ʻiloʻi lelei ange ai ʻe he kau akó ʻa e ngaahi founga ʻa e filí pea fakapapauʻi pe ko e hā e meʻa te nau fai ke maluʻi ai kinautolu mei heʻene ngaahi faʻufaʻu koví. ʻE ʻiloʻi ʻe he kau akó mei he lēsoni ko ʻení ʻa e meʻa te nau lava ke fai ke nau tuʻu ʻaliʻaliaki ai ʻi he taimi te nau fehangahangai ai mo e fakatangá mo e meʻa te nau lava ke fai ke moʻui angatonu ai ʻi ha māmani ʻoku fonu angahalá.

Ngaahi Fokotuʻu ki hono Akoʻí

Ko Hono Fakatupulaki ʻEtau Founga Akoʻí mo e Akó

Faka‘aongaʻi ha ngaahi meʻa moʻoni ne hoko. ʻI he taimi ʻoku fakatokangaʻi ai ʻe he kau akó ʻa e fekauʻaki ʻo ʻenau moʻuí mo e meʻa ʻoku nau ako mei he folofolá, ʻo nau mateuteu lelei ange leva ke fakahoungaʻi ʻa e mahuʻinga e folofola ʻa e ʻOtuá mo sio ki he anga ʻene tākiekina ke fai ha meʻa ʻoku ola lelei, mo anga māʻoniʻoní. ʻOku lava ke tokoni ki he kau akó ʻa e ngaahi meʻa ʻoku ʻi ai ha ngaahi tūkunga moʻoni ʻo e moʻuí mo tali e ngaahi fehuʻi moʻoni, hohaʻa, mo e ngaahi faingataʻa ʻoku fehangahangai mo e kau akó ke nau fakafekauʻaki ai ʻenau moʻuí ki he tokāteliné mo e ngaahi tefitoʻi moʻoni ne maʻu mei he folofola ʻa e ʻOtuá. ʻOku toe lava foki ke tokoni ki he kau akó e ngaahi meʻa moʻoni ʻoku hokó ke nau ʻiloʻi maʻanautolu ʻoku ʻi ai e taimi ʻe faingataʻaʻia ai e moʻuí pea ʻoku ʻikai ke faingofua maʻu pē hono maʻu ʻo e talí.

ʻOku fakamālohia e kau muimui angatonu ʻo Sīsū Kalaisí ʻi he uhouhonga ʻo e fakatangá.

Fakakaukau ke vahevahe e ngaahi meʻa ko ʻeni ne hoko pe ko ha meʻa mahuʻinga e taha ne hoko ʻokú ke fakakaukau ki ai, ke kamata ʻaki e kalasí.

Ko ʻĀkalí, ko ha mēmipa ʻo e Siasí ne toki papi mai. Naʻe tukuange ia ʻe heʻene ongo mātuʻá he taimi naʻe papitaiso aí. ʻI he kamata maí, naʻe anga fakakaumeʻa e taha kotoa ʻi he uōtí kiate ia. Neongo iá, ne fai ʻe ha kau mēmipa ʻe niʻihi kimuí ni mai ha ngaahi lea taʻeʻofa ʻo kau ki he kuohili ʻo ʻĀkalí mo manukiʻi ia koeʻuhi ko ʻene loto-vēkeveke ke moʻui ʻaki e ongoongoleleí. ʻOkú ne fie hoko ko ha mēmipa faivelenga ʻo e Siasí ka ʻokú ne ongoʻi loto-foʻi ʻaupito.

• Ko e hā nai ʻoku fuʻu faingataʻa moʻoni ai kia ʻĀkali hono fakatangaʻi ia ʻe hono kaungāmēmipa ʻo e Siasí?

• Kapau ʻe kumi tokoni atu ʻa ʻĀkali kiate koe, ko e hā te ke lea ʻakí pe fakahokó?

Fakamanatu ki he kau akó naʻa tau lau ʻi he Hilamani 3:24–34 ʻa e kau ʻa e kakai ʻe lauafe ki he Siasí pea toe tuʻumālie lahi e kakaí. Neongo iá, ne faifai atu pē pea hū mai e loto-hīkisiá ki he loto ʻo ha kau mēmipa ʻe niʻihi ʻo e Siasí, ʻo nau kamata ke fakatangaʻi kinautolu ne kei loto-fakatōkilalo mo faivelengá.

Fakaafe‘i e kau akó ke nau toe vakaiʻi ʻa e Hilamani 3:33–35 pea kumi ki he meʻa naʻá ne tokoniʻi e kau mēmipa loto-fakatōkilalo ʻo e Siasí ke nau kei maʻu ha mālohi fakalaumālie ʻi he uhouhonga ʻo e fakatangá. Fakakaukau pe ko fē ʻi he ngaahi fehuʻi ko ʻení te ke lava ke ʻeke ke fakatupulaki e ako lelei taha hoʻo kau akó:

• Ko e hā ha ngaahi akonaki mei he ngaahi veesi ko ʻení te ne lava ʻo tokoniʻi ʻa ʻĀkali pe ko ha taha ʻoku ʻi ha tūkunga tatau? (Te ke ala hiki ha ngaahi moʻoniʻi meʻa ʻe niʻihi ne ʻilo ʻe he kau akó, hangē ko e ngaahi meʻa ko ʻení: ʻI heʻetau ʻaukai, lotu, mo fakavaivaiʻi hotau lotó ki he ʻOtuá, ʻoku toe mālohi ange leva ʻetau loto-fakatōkilaló mo e tui kia Sīsū Kalaisí, pea fakamāʻoniʻoní hotau lotó—neongo e tōʻonga kovi ʻa e niʻihi kehé.)

• Ko e hā ha ngaahi founga kuo kaunga ai hoʻo tui kia Sīsū Kalaisí ʻi hono fakahoko ʻo e ʻaukaí, lotú, mo fakavaivaiʻi ho lotó ki he ʻOtuá? (vakai, Hilamani 3:35). Kuo tokoniʻi fēfē koe ʻe he ngaahi anga māʻoniʻoni ko ʻení ʻi hoʻo fehangahangai mo e tōʻonga fakamamahi ‘a e niʻihi kehé?

Fakakaukau ke fakaʻaliʻali e ngaahi fehuʻi ko ʻení pea tuku ha taimi fakafoʻituitui ki he kau akó ke nau vakavakaiʻi ai ha fehuʻi ʻe taha pe lahi ange mo faʻu ha palani ki ha founga te nau tali ʻaki ha faʻahinga ueʻi te nau maʻu:

• ʻOku fēfē ʻa e anga hoʻo talitali mo fakafeohi ki he niʻihi kehé ʻi he Siasi ʻo Sīsū Kalaisí?

• ʻOku fēfē hoʻo fakavaivaiʻi ho lotó ki he ʻOtuá?

• Te ke lava fēfē ʻo fakatupulaki hoʻo tui kia Sīsū Kalaisí, neongo ai pē ko e hā ha faʻahinga tōʻonga fakamamahi ʻa e niʻihi kehé?

Vahevahe hoʻo fakamoʻoní pe fakaafeʻi ha taha ʻo e kau akó ke fakamoʻoni ki he mālohi ʻoku maʻu ʻi heʻetau ngāue ʻi he tuí mo fakavaivaiʻi hotau lotó ki he ʻOtuá.

ʻI he tupulaki e fai angahala ʻa e kau Nīfaí, ne kei tauhi faivelenga pē ʻa Molomona ia mo Molonai ki he ʻEikí.

Fakaafeʻi e kau akó ke nau vahevahe ha ngaahi talanoa mei he ongoongó, ākenga fakafonua lolotonga, mo e ngaahi tefito ʻoku tālangaʻi ʻi he mītia fakasōsialé te ne lava ke fakafaingataʻaʻiaʻi hono moʻui ʻaki ʻo e ongoongoleleí ʻi hotau kuongá ni.

• Ko e hā e ngaahi tūkunga ne faingataʻa ai hono moʻui ʻaki e ongoongoleleí ʻi he kuonga ʻo Molomona mo hono foha ko Molonaí? (Kapau ʻe fie maʻu, pea fakaafe‘i e kau akó ke nau toe vakaiʻi e konga 2 ‘o e naunau teuteú pe lau fakatovave ʻa e ngaahi ʻuluʻi fakamatala ‘o e Molomona 1–6 mo e Molonai 9.)

• Ko e hā haʻo fakakaukau ki he anga ʻo e moʻuí ʻi he taimi ʻo Molomona mo Molonaí?

Fakaafeʻi e kau akó ke nau toe vakaiʻi e Molomona 1:1–2, 15 mo e Molonai 9:25–26, pea kumi e ngaahi ʻuhinga ne malava ke tauhi faivelenga ai ʻa Molomona mo Molonai ki he ʻEikí ʻi heʻena fehangahangai mo ha sosaieti ne fonu ʻi he fai angahalá.

• Ko e hā ha tefitoʻi moʻoni te tau lava ke ako mei he ngaahi veesi ko ʻení ʻo kau ki he founga ke kei faivelenga ai ki he ʻEikí ʻi he ngaahi taimi ʻo e fai angahalá? (Tokoniʻi e kau akó ke nau ʻiloʻi ha tefitoʻi moʻoni ʻoku faitatau mo ʻení: Te tau lava ʻo ikunaʻi e angahala ʻa e māmani ko ʻení ʻi heʻetau aʻusia e angalelei ʻa Sīsū Kalaisí mo tauhi faivelenga kiate Iá.)

• Ko e hā ʻene ʻuhinga kiate koe hono aʻusia e angalelei ʻa Sīsū Kalaisí?

• ʻE tokoniʻi fēfē kitautolu ʻe he ofi kia Sīsū Kalaisi mo maʻu ʻEne angaleleí ke tau kei moʻui angatonu ʻi he taimi ʻoku ʻākilotoa ai kitautolu ʻe he fai angahalá? (Mahalo te ke fie fakaafeʻi e kau akó ke nau toe vakaiʻi e lea ʻa Palesiteni Soi D. Sōnasi mo ʻEletā Niila L. ʻEnitaseni ʻi he konga 2 ʻo e naunau teuteú.)

• Kuo tokoniʻi fēfē koe ʻe hoʻo fakamoʻoni ki he angalelei ʻa Sīsū Kalaisí ke ke fai e ngaahi fili māʻoniʻoni he kuó ke ʻosi fehangahangai mo e fai angahalá?

Fakamanatu ki he kau akó naʻe fakaafeʻi kinautolu ʻi he konga 2 ‘o e naunau teuteú, ke nau feinga ke ʻiloʻi ha taha pe falukunga kakai ʻi he Tohi ʻa Molomoná pe ko ha taha pē ʻoku nau ʻilo fakataautaha kuo fehangahangai mo e fai angahalá ka naʻe kei faivelenga pē. (Kapau ʻe fie maʻu, pea tuku ange ha taimi ki he kau akó ke nau toe vakaiʻi ai e meʻa ne nau tohí.) Fakatatau ki he tokolahi ho‘o kalasí, fili ha founga te ne ʻoange ki he tokotaha ako takitaha ha faingamālie ke vahevahe mai ʻene tā sīpingá.

Fakaʻaliʻali e fehuʻi ko ʻení:

• Makatuʻunga mei he meʻa kuó ke ako mo ongoʻi ʻi he ʻaho ní, ko e hā te ke fai ke fakatupulaki ai hoʻo malava ke tuʻu maʻu ʻi hoʻo tukupā ki he ʻEikí ʻi hoʻo fehangahangai mo e fai angahala ʻa e māmaní? (Poupou‘i e kau akó ke nau hiki ha ngaahi ueʻi naʻa nau maʻu mei he Laumālie Māʻoniʻoní pea nau fakahoko ia.)

Ki he Kalasi Hokó

Vahevahe ʻa e lea ko ʻeni mei he Palōfita ko Siosefa Sāmitá: “Ko e ʻofa ʻi he tauʻatāiná ʻokú ne ueʻi hoku lotó—ʻa e tauʻatāina ko ia ʻa e kakaí pea mo e tui fakalotu ʻa e faʻahinga kotoa ʻo e tangatá” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 398). ‘I hono ako ʻe he kau akó ʻa e naunau teuteu ki he kalasi hokó, fakaafeʻi ke nau fakalaulauloto ki he ʻuhinga ʻo e tauʻatāina fakalotú ke nau haʻu mateuteu ke aleaʻi e meʻa te nau lava ke fai ke tokoni ki hono paotoloaki pe fakatolonga e tauʻatāina ko iá.