Lēsoni 9 Naunau ʻa e Faiakó

Tui kia Sīsū Kalaisi

ʻOku fakaʻatā kitautolu ʻe he tokāteline ʻo Kalaisí ke tau liliu, hoko ʻo hangē ko hotau Fakamoʻuí, mo maʻu e ngaahi tāpuaki kotoa kuó Ne teuteu ʻo fakafou ʻi Heʻene Fakaleleí. ʻE aleaʻi ʻe he kau akó ʻi he lēsoni ko ʻeni ʻa e ʻuluaki ʻelemēniti ʻo e tokāteline ʻa e ʻEikí: tui kia Sīsū Kalaisí Te nau maʻu ha faingamālie ke kumi e ngaahi tāpuaki ʻo e tuí mo fakamatalaʻi e founga ke fakatupulaki ai ʻa e tui kia Sīsū Kalaisí. ʻE fakapapauʻi foki ʻe he kau akó ʻa e meʻa te nau lava ʻo fai ke fakamālohia ʻenau tui ki he ʻEikí.

Ngaahi Fokotuʻu ki hono Akoʻí

Ko hono akoʻi ʻe ʻAlamā ki he kakai Sōlamí e founga ke fakatupulaki ai ʻenau tui kia Sīsū Kalaisí.

ʻE lava ke ke kamataʻi e kalasí ʻaki hono fakaʻaliʻali e palakalafi talateu ʻi he naunau teuteú pea kole ki ha tokotaha ako ke ne lau leʻolahi ia. Te ke lava ʻo fakamoʻoniʻi ʻe lava ke hanga ʻe he tuí, fakatomalá, papitaisó, ko e meʻafoaki ʻo e Laumālie Māʻoniʻoní mo e kātaki ki he ngataʻangá ʻo fakaava ʻa e matapā kia Sīsū Kalaisi ke ne liliu moʻoni kitautolu ki ha kakai ʻoku māʻoniʻoni mo fiefia ange. Lolotonga e fealēleaʻaki ko ʻeni ʻa e kalasí, fakaafeʻi e kau akó ke nau fakakaukau ki he founga ʻe lava ke fakatupulaki ai ʻenau tui kia Sīsū Kalaisí mo Hono mālohi ke liliu, fakamoʻui mo tokoniʻi kinautolú.

Fakaafe‘i ha tokotaha ako ʻoku loto fiemālie ke vahevahe e founga te ne fakamatala ai ko e hā ʻa e tui mo e ʻuhinga ʻoku mātuʻaki mahuʻinga ai ʻa e tui kia Sīsū Kalaisí.

Fakaʻaliʻali mo lau fakataha ʻa e tūkunga ko ʻení:

Naʻe tupu hake ho kaungāmeʻa ko ʻeni he kolisí, Vikatōlia, ʻi ha ʻapi Kalisitiane. Ne ʻikai te ne teitei fehuʻia e fakalangi ʻo Sīsū Kalaisí kae ʻoua kuo fakahaaʻi ʻe ha taha ʻo ʻene kau palōfesá ʻene veiveiua he tuʻunga moʻoni ʻo ʻEne ngaahi maná, Fakaleleí mo e Toetuʻú. Ne tetetete ʻa Vikatōlia ʻi he meʻa naʻá ne fanongo ki aí. Koeʻuhí ʻokú ne ʻilo ko e tokotaha lotu koe mo tui kia Sīsū Kalaisi, ʻokú ne ʻeke atu e founga ʻokú ke ʻilo ai ko Sīsuú ko e ʻAlo moʻoni ia ʻo e ʻOtuá mo e Fakamoʻui ʻo e māmaní. ʻOkú ne ʻeke atu foki e founga ʻe lava ke ne maʻu ai ha tui lahi ange kiate Ia.

• Te ke tali fēfē e ngaahi fehuʻi ʻa Vikatōliá?

ʻI he tali ʻa e kau akó, ʻe lava ke ke fakaʻaongaʻi e ngaahi potufolofola mo e fehuʻi ko ʻení ke tokoni ke fakaloloto ʻa e fealēleaʻakí, ʻo fakatatau mo e ngaahi fie maʻu hoʻo kau akó.

Ko Hono Fakatupulaki ʻEtau Founga Akoʻí mo e Akó

Vakaiʻi, fanongo pea ʻiloʻi. ʻOku ʻikai ke faitatau ha ongo tamaiki ako pe kalasi. ʻI hoʻo vakai mo fanongo ki hoʻo kau akó, fekumi ke ke ʻiloʻi ʻenau ngaahi fie maʻu fakalaumālié. ʻEke ange ha ngaahi fehuʻi ʻoku taimi totonu mo mahuʻinga pea ʻe iku ki ha ngāue ʻoku māʻoniʻoní. ʻE lava ke tataki, fakahinohino mo ueʻi koe ʻe he ngaahi fehuʻi he lēsoni ko ʻení ʻi hoʻo tataki e fealēleaʻaki fakakalasí. Mahalo ko ha niʻihi ʻo hoʻo ngaahi fehuʻi loloto tahá ʻa kinautolu ko ia ʻoku haʻu ki hoʻo fakakaukaú lolotonga hoʻo faiakó. Ka ke manatuʻi foki ʻoku ʻikai fie maʻu ia ke ke ʻeke e ngaahi fehuʻí kotoa. ʻE lava foki ke fakahoko ʻe he kau akó ha ngaahi fehuʻi ʻokú ne fakahaaʻi ha fakakaukau loloto kau ki he ngaahi moʻoni ʻo e ongoongoleleí.

ʻO ka fie maʻu, fakamanatu ki he kau akó naʻe akoʻi ʻe ʻAlamā ha kulupu ʻo ha kakai Sōlami masivesiva kau ki he founga ʻe lava ke fakamālohia ai ʻetau tuí ʻi heʻetau ngāue ʻi he tui ʻo fakatatau mo e folofola ʻa e ʻOtuá. ʻE lava ke ke fakaafeʻi e kau akó ke nau toe vakaiʻi ʻa e ʻAlamā 32:21, 27–30, 41–43, ʻo kumi e ngaahi tefitoʻi moʻoni ʻe ala lava ʻo tokoni kia Vikatōliá. ʻI hono vahevahe ʻe he kau akó e ngaahi tefitoʻi moʻoni naʻe akoʻi ʻe ʻAlamaá, ʻe lava ke ke fakahoko ha niʻihi ʻo e ngaahi fehuʻi ko ʻení:

• Te ke fakamatalaʻi fēfē e ʻuhinga ʻo e fakaʻuhinga ʻa ʻAlamā ki he tuí ʻi ha founga ʻe lava ke mahino ai ki ha kiʻi tamasiʻi? (Vakai, ʻAlamā 32:21.)

• Fakatatau ki he ʻAlamā 32:27–30, ʻe lava fēfē ke iku ʻa e ngāue ʻi he tuí ki ha tui ʻoku tupulekiná? (Mahalo ʻe maʻu ʻe he kau akó ha tefitoʻi moʻoni hangē ko ʻení: ʻI he taimi ʻoku tau ngāueʻi ai ʻa e tuí mo ʻahiʻahi fakahoko e folofola ʻa e ʻOtuá, te tau maʻu ha fakapapau fakalaumālie pea ʻe fakamālohia foki ʻetau tuí. ʻE lava ke ke hiki ʻi he palakipoé e tefitoʻi moʻoni ko ʻení, pe ko ha tefitoʻi moʻoni meimei tatau kae fakaʻaongaʻi e ngaahi lea ʻa e kau akó.) Ko e fē ha taimi kuó ke moʻui ʻaki ai e tefitoʻi moʻoni ko ʻení peá ke ongoʻi hono fakamālohia hoʻo tuí? Ko e hā ha faleʻi te ke ala fakahoko ki ha tokotaha ʻoku loto-foʻi koeʻuhí naʻá ne ngāue ʻi he tui ka naʻá ne ongoʻi ʻoku teʻeki ke ne aʻusia ʻe ia e ngaahi fua ʻo e tuí? (ʻE ala ʻaonga ke toe vakaiʻi e fakamatala ʻa Palesiteni Tieta F. ʻUkitofa ʻi he konga 1 ʻo e naunau teuteú.)

• Fakatatau ki he ʻAlamā 32:28, ʻe lava fēfē ke tau ʻilo ʻoku lelei e folofolá ʻi hono ʻahiʻahiʻi ʻetau tuí? (Mahalo ʻe maʻu ʻe he kau akó ha ngaahi kupuʻi lea hangē ko e “tupulaki ʻi hoku lotó,” “langaki hake hoku laumālié,” “fakamaama hoku ʻatamaí,” mo e “melie ia kiate au.”) Kapau kuó ke aʻusia ha taha ʻo e ngaahi liliú ni, te ke fakamatalaʻi fēfē hoʻo aʻusiá ki ha taha kehe?

• Ko e hā naʻe akoʻi ʻe ʻEletā Sefilī R. Hōlani fekauʻaki mo Sīsū Kalaisi mo ʻEne felāveʻi mo e tengaʻi ʻakaú, ko e fuá, mo e fuʻu ʻakaú? (Vakai, konga 2 ʻo e naunau teuteú.) Kuo takiekina fēfē hoʻo fakamoʻoní mo e uluí ʻe he ngāue ʻi he tuí mo hono tō ʻa Sīsū Kalaisi mo ʻEne ongoongoleleí ʻi ho lotó? Ko e hā te ke lava ʻo fai ke tauhi e fuʻu ʻakaú ʻi he tokanga lahi koeʻuhí ke loloto ange hono aká ʻi ho lotó?

• Ko e hā kuó ke ʻilo fekauʻaki mo e Fakamoʻuí ʻokú ne fakatupulaki hoʻo loto-falala mo e falala kiate Iá?

ʻOku akonaki ʻa Molomona ʻo kau ki he mālohi mo e ngaahi tāpuaki ʻo hono ngāue ʻaki e tui kia Sīsū Kalaisí.

Fakaafeʻi e kau akó ke nau toe vakaiʻi ʻa e Molonai 7:25–26, 33, mo fakamoʻoni ʻi heʻetau ngāue ʻaki ʻa e tui kia Sīsū Kalaisí, te tau maʻu ʻa e mālohi ke fakahoko ʻa ia ʻoku ʻaonga kia Kalaisí. (ʻE lava ke ke fakamatalaʻi ange ʻoku fakamatalaʻi ʻe he foʻi lea ʻaongá ha meʻa te ne tāpuekina kitautolu ʻa ia ʻoku fenāpasi mo e finangalo ʻo e ʻOtuá.) Fakamanatu ki he kau akó naʻe fakaafeʻi kinautolu ʻi he naunau teuteú ke kumi ha kakai ʻi he Tohi ʻa Molomoná ne nau maʻu ha ngaahi tāpuaki pe aʻusia ha ngaahi mana ʻi heʻenau ngāue ʻaki ʻenau tui kia Sīsū Kalaisí (vakai, konga 3). Fakaafeʻi e kau akó ko ha kalasi pe ʻi ha fanga kiʻi kulupu fealēleaʻaki iiki ke vahevahe ʻenau ngaahi sīpingá. ʻE ala tokoni e ngaahi fehuʻi ko ʻení ke fakaloloto ange ʻenau fealēleaʻakí:

• Naʻe ngāue ʻaki fēfē ʻe he kakai ko ʻení ʻenau tui kia Sīsū Kalaisí?

• Ko e hā ha ngaahi tāpuaki pe mana ʻe niʻihi ne nau maʻu ʻi hono ngāue ʻaki e tui kia Sīsū Kalaisí?

• Ko e hā ha ngaahi tāpuaki pe mana kuó ke maʻu ʻi hono ngāue ʻaki hoʻo tui kia Sīsū Kalaisí? (Mahalo te ke fie toe vakaiʻi e fakamatala ʻa ʻEletā Lisiate G. Sikoti ʻi he konga 3 ʻo e naunau teuteú.)

ʻOange ki he kau akó ha taimi ke nau fakalaulauloto ki he tui ʻoku nau maʻu kia Sīsū Kalaisí mo fakakaukau pe ko e hā ʻoku totonu ke nau fai ke fakamālohia mo nau ngāue ʻaki ʻenau tui kiate Iá.

Ki he Kalasi Hokó

Fakamatalaʻi ange ʻoku faʻa iku maʻu pē ʻetau tui kia Sīsū Kalaisí ki he fakatomalá, ko e tefitoʻi moʻoni mahuʻinga fika ua ia ʻi he tokāteline ʻa Kalaisí (vakai, Hilamani 14:13). Fakaafeʻi e kau akó ke ako e naunau teuteú mo fakalaulauloto ki he ʻuhinga ʻoku totonu ke vakai ai ki he fakatomalá ko ha meʻaʻofa fakalangi ke tali lelei kae ʻikai ko ha kavenga mafasia ke fakaʻehiʻehi mei ai.