Lēsoni 6 Naunau ʻa e Faiakó

Ko e Fakalelei Taʻe-Fakangatangata ʻa Sīsū Kalaisí

Ko e Tohi ʻa Molomoná ko ha fakamoʻoni mālohi ia ʻo Sīsū Kalaisi mo e huhuʻi ʻoku fakafou mai ʻiate Iá. ʻE tokoni e lēsoni ko ʻení ki he kau akó ke nau fakamatalaʻi e founga ʻoku huhuʻi ai kitautolu mei he Hingá ʻo fakafou ʻia Sīsū Kalaisi mo ʻEne Fakaleleí. ʻE fakapapauʻi foki ʻe he kau akó ʻa e meʻa te nau lava ʻo fakahoko ke nau toe falala ange ai ki he Fakamoʻuí mo tokoniʻi kinautolu ke ikunaʻi ʻenau ngaahi fakahehema ki he tangata pe fefine fakakakanó.

Ngaahi Fokotuʻu ki hono Akoʻí

Ko Hono Fakatupulaki ʻEtau Founga Akoʻí mo e Akó

Fakamatalaʻi e ngaahi ola ʻo e ako ʻa e fānau akó. Ko e ngaahi ola ʻo e akó ko ha ngaahi fakamatala ia ʻokú ne fakamatalaʻi e ʻilo mo e taukei ʻoku totonu ke fakatupulaki ʻe he kau akó lolotonga ha aʻusia fakaako. ʻE lava ke ke vahevahe mo e kau akó e ngaahi taumuʻa ʻo e akó ʻoku lisi ʻi he talateu ʻo e lēsoni takitaha. ʻE lava ke tokoni e ngaahi ola ʻoku ʻoatu ko ʻení ki he kau faiakó mo e kau akó ke fakafuofuaʻi fakataha e ola lelei ʻo ʻenau akó mo e ngaahi fealēleaʻakí.

ʻOku fakamoʻoni e kau palōfita ʻo e Tohi ʻa Molomoná ki hono fie maʻu ʻo e Fakalelei ʻa Sīsū Kalaisí.

Fakaʻaliʻali e fehuʻi taʻe kakato ko ʻení: Naʻe mei fēfē nai ʻeku moʻuí ka ne taʻeʻoua …?

Ke tokoni ki he kau akó ke fakakaukau ki ha ngaahi founga ʻe lava ke nau fakakakato ai e fehuʻi ko ʻení, fakaʻaliʻali ha ngaahi fakatātā pe ngaahi lea ʻe niʻihi. Fakaafeʻi e kau akó ke aleaʻi nounou mo hanau hoa e founga te nau tali ai e fehuʻi ki he meʻa pe fakakaukau takitaha. ʻE lava ke ke fakaʻaongaʻi e fakatātā ʻoku ʻoatu hení pe fakatātā ʻokú ke fili pē ʻe koe. Fakapapauʻi ʻoku fakafofongaʻi ʻe he fakatātā fakaʻosí e fakalelei huhuʻi ʻa Sīsū Kalaisí koeʻuhí ke lava ʻe he kau akó ʻo aleaʻi e tuʻunga ne mei ʻi ai ʻenau moʻuí kapau ne ʻikai ʻa Sīsū Kalaisi mo ʻEne Fakaleleí.

Hiki e fakamatala taʻe kakato ko ʻení ʻi he palakipoé: Ka ne taʻeʻoua e Fakamoʻuí mo ʻEne Fakaleleí, te tau …

Fakamanatu ki he kau akó naʻe fakahoko ʻe Sēkope mo ʻAmuleki ha ngaahi malanga mahuʻinga fekauʻaki mo e Fakalelei ʻa Sīsū Kalaisí. Kole ki he kau akó ke nau toe vakaiʻi ʻa e 2 Nīfai 9:6–10 mo e ʻAlamā 34:9, ʻo kumi e ngaahi kupuʻi lea te nau lava ʻo fakaʻaongaʻi ke fakakakato ʻaki e fakamatala ʻi he palakipoé.

• Ko e hā ha ngaahi kupuʻi lea ʻe niʻihi mei he ngaahi potufolofola ko ení te tau lava ʻo fakaʻaongaʻi ke fakakakato e fakamatala ʻi he palakipoé? (ʻI hono vahevahe ʻe he kau akó e ngaahi founga ke fakakakato ʻaki e fakamatalá, lekooti ʻenau ngaahi talí ʻi lalo ʻi he palakipoé. Mahalo ʻe maʻu ʻe he kau akó ha foʻi moʻoni hangē ko ʻení: Ka ne taʻeʻoua e Fakamoʻuí mo ʻEne Fakaleleí, te tau ʻauha moʻoni. Ko ha foʻi moʻoni ʻe taha te nau ala maʻu ko e: Ka ne taʻeʻoua e Fakamoʻuí mo ʻEne Fakaleleí, ʻe motuhi kitautolu mei he ʻao ʻo e ʻEikí, ʻikai ke tau toe tuʻu, hoko ʻo moʻulaloa ki he tēvoló, hoko ʻo hangē ko e tēvoló, tofanga maʻu ai pē ʻi he mamahí, pea moʻulaloa ki he fuʻu meʻa fakamanavahē ʻo e maté mo heli. Fakaafeʻi e kau akó ke fakamatalaʻi e meʻa ʻoku nau pehē ʻoku ʻuhinga ki ai e ngaahi kupuʻi lea ko ʻení.)

• Ko e hā ʻa e “fuʻu meʻa fakamanavahē” naʻe fakamatalaʻi ʻe Sēkope ʻi he 2 Nīfai 9:10? Ko e hā ʻoku fakamanavahē aí? (ʻO ka fie maʻu, tokoni ke mahino ki he kau akó ʻa e ʻuhinga ʻe taʻofi ai kitautolu ʻe ha mate fakaesino mo fakaematelie taʻengata mei heʻetau hoko ʻo hangē ko e Tamai Hēvaní. Fakatokangaʻi ange ʻoku tupu ʻa e mate fakalaumālié mei he Hingá mo ʻetau talangata‘a fakatāutahá fakatouʻosi. [Vakai, “Mate Fakalaumālie” mo e “Mate Fakatuʻasino,” Ngaahi Tefito ʻo e Ongoongoleleí, topics.ChurchofJesusChrist.org.])

• ʻOku tokoniʻi fēfē kitautolu ʻe heʻetau ʻilo e ngaahi ola ʻo e Hingá ke mahino kiate kitautolu e ʻuhinga ʻoku tau fie maʻu ai ʻa Sīsū Kalaisí?

Lau fakataha ʻa e 2 Nīfai 9:11–12, 19–22 , pea fakaafeʻi e kau akó ke nau kumi e ngaahi founga ʻoku huhuʻi ai kitautolu ʻe Sīsū Kalaisi mei he “fuʻu meʻa fakamanavahē ko ʻeni” (veesi 10) ʻo e maté mo helí.

• ʻOku ʻomi fēfē ʻe Sīsū Kalaisi maʻatautolu ha hala ke tau hao ai mei he “fuʻu meʻa fakamanavahē” ko ʻeni ʻo e maté mo helí?

• Ko e hā e ongo ʻokú ke maʻu ki he Fakamoʻuí, ʻi hoʻo ʻilo ʻokú Ne fakatou finangalo lelei mo malava ke fakahaofi kitautolu mei he maté mo helí?

Fakamanatu ki he kau akó naʻe fakatou fakamatalaʻi ʻe Sēkope mo ʻAmuleki ʻa e fie maʻu ki ha fakalelei pe feilaulau “taʻefakangatangata ke fakahokó (vakai, 2 Nīfai 9:7; ʻAlamā 34:10). Fakaafeʻi e kau akó ke nau toe vakaiʻi e ngaahi fakamatala ʻa Palesiteni Lāsolo M. Nalesoni mo Palesiteni Tati R. Kalisitā ʻi he konga 1 ʻo e naunau teuteú, ʻo kumi e ngaahi founga ʻoku taʻefakangatangata ai e Fakalelei ʻa e Fakamoʻuí.

• ʻOkú ke pehē ko e hā ʻoku mahuʻinga ai ke mahino ʻoku taʻefakangatangata e Fakalelei ʻa e Fakamoʻuí?

• ʻOku liliu fēfē ʻe he ʻilo ʻoku taʻefakangatangata e Fakalelei ʻa e Fakamoʻuí e anga hoʻo mahino mo e tali ki hoʻo ngaahi faingataʻaʻia mo e hohaʻa fakataautahá?

• Ko e hā te ke lava ʻo fakahoko ke fakahaaʻi ki he ʻEiki ʻokú ke tui ʻe lava ʻe Heʻene Fakalelei taʻefakangatangatá ʻo fakahaofi koé? (ʻE lava ke ke tukuange ki he kau akó ha taimi ke lekooti ʻenau ngaahi fakakaukaú.)

Ko e akoʻi ʻe he Tuʻi ko Penisimaní hono kakaí ʻe lava ke nau siʻaki ʻa e tangata pe fefine fakakakanó ʻo fakafou ʻi he Fakalelei ʻa Sīsū Kalaisí.

Fakaʻaliʻali e fakamatala ko ʻení: “Ko e tangata fakakakanó ko e fili ia ki he ʻOtuá, pea kuo pehē ai pē ia talu mei he hinga ʻa ʻĀtamá” (Mōsaia 3:19). Fakamanatu ki he kau akó naʻe akoʻi ʻe he Tuʻi ko Penisimaní e foʻi moʻoni ko ʻení.

• Te ke fakamatalaʻi fēfē e ʻuhinga ʻo e “tangata fakakakanó” ki ha tokotaha ʻoku ʻikai feangai mo e foʻi lea ko ʻení? (ʻE lava ke ke poupouʻi e kau akó ke nau toe vakaiʻi e fakamatala ʻa ʻEletā Tēvita A. Petinā ʻi he konga 2 ʻo e naunau teuteú.)

Lau ʻa e Mōsaia 3:19 ko ha kalasi pea fakaafeʻi e kau akó ke fakasio e meʻa naʻe akoʻi ʻe he Tuʻi ko Penisimaní ki hono kakaí fekauʻaki mo hono ikunaʻi ʻo e tangata fakakakanó.

• Ko e hā ha tefitoʻi moʻoni te tau lava ʻo ako mei he ngaahi akonaki ʻa e Tuʻi ko Penisimaní te ne lava ʻo tokoniʻi kitautolu ke ikunaʻi ʻa e tangata mo e fefine fakanatula ʻiate kitautolú? (Mahalo ʻe maʻu ʻe he kau akó ha foʻi moʻoni hangē ko ʻení: ʻI heʻetau talangofua ki he ngaahi fakahinohino ʻa e Laumālie Māʻoniʻoní, ʻe tokoniʻi kitautolu ʻe Sīsū Kalaisi ke siʻaki ʻa e tangata pe fefine fakakakanó pea hoko ko ha kau māʻoniʻoni ʻo fakafou ʻi Heʻene Fakaleleí.)

Ke tokoni ki he kau akó ke fakaloloto ʻenau mahino ki he tefitoʻi moʻoni ko ʻení, ʻe lava fakahoko ha taha ʻo e ngaahi fehuʻi ko ʻení pe fakahoko kotoa ʻo fakatatau mo e ngaahi fie maʻu ʻa e kau akó:

• Ko e hā ʻene ʻuhinga kiate koe ke “[talangofua] ki he ngaahi fakahinohino ʻa e Laumālie Māʻoniʻoní”? Kuo tokoniʻi fēfē nai koe ʻe he Laumālie Māʻoniʻoní ke ke ikunaʻi e ngaahi fakahehema ʻa e tangata pe fefine fakakakanó?

• Ko e hā ʻoku toki lava ai pē hono siʻaki ʻo e tangata pe fefine fakakakanó ʻi heʻetau falala kia Sīsū Kalaisi mo ʻEne Fakaleleí?

• Kuo tokoniʻi fēfē koe ʻe he falala ki he Fakalelei ʻa e Fakamoʻuí ʻi hoʻo feinga ke hoko ko ha tokotaha māʻoniʻoni—ko ha tokotaha kuo fakamāʻoniʻoní mo anga faka-Kalaisi?

• ʻE lava fēfē ke ʻomi ʻe he ngaahi akonaki ʻi he Mōsaia 3:19 ha ʻamanaki lelei mo ha mālohi kiate kitautolu ʻi he taimi ʻoku tau ongoʻi ai hangē he ʻikai ke tau lava ʻo mapuleʻi pe ikunaʻi e ngaahi uʻa mo e ongo ʻo e tangata pe fefine fakakakanó?

ʻE lava ke ke fakaafeʻi e kau akó ke nau fakakaukau ki ha tafaʻaki ʻenau moʻuí te nau ala faingataʻaʻia ai ʻi he ngaahi uʻa, holi, mo e ngaahi ongo ʻo e tangata pe fefine fakakakanó. Fakaʻaliʻali e ngaahi fehuʻi ko ʻení pea fakaafeʻi e kau akó ke nau fakalaulauloto mo lekooti ʻenau ngaahi fakakaukaú mo e ongó:

• Ko e hā ʻokú ne taʻofi koe mei hoʻo talangofua ki he Laumālie Māʻoniʻoní?

• Ko e fē ʻi he ngaahi ʻulungaanga faka-Kalaisi ʻoku fakamatalaʻi ʻi he Mōsaia 3:19 ʻoku fie maʻu ke u fakatupulaki kakato angé?

• Ko e hā ha ngaahi ngāue te u fakahoko ke u lava ai ʻo maʻu ha tokoni lahi ange mei he Fakamoʻuí ʻi heʻeku faifeinga ke fakatupulaki e ʻulungaanga faka-Kalaisi ko ʻení?

Fakaʻosi ʻaki hano vahevahe hoʻo fakamoʻoní kuo huhuʻi kitautolu ʻe Sīsū Kalaisi mei he Hingá pea te Ne lava ʻo huhuʻi kitautolu mei heʻetau ngaahi angahala fakatāutahá mo liliu kitautolu ke tau hoko ʻo hangē ko Ia mo ʻetau Tamai Hēvaní.

Ki he Kalasi Hokó

Fakaafeʻi e kau akó ke nau fakakaukau ki ha faingataʻa fakatuʻasino, fakaeʻatamai, fakaeloto pe fakalaumālie ʻoku nau ala aʻusia. Poupouʻi kinautolu ʻi heʻenau ako e naunau teuteu ki he kalasi hokó ke fakakaukau ki he founga ʻe lava ke tokoniʻi ai kinautolu ʻe Sīsū Kalaisi ʻi honau faingataʻaʻiá.