Lēsoni 24 Naunau ʻa e Faiakó

Ko e Mālohi Fai Fakahaofi ʻo e ʻEikí

ʻOku fakatou fakahaaʻi ʻe he ngaahi aʻusia ʻa e kakai ʻo Limihaí mo e kakai ʻo ʻAlamaá ʻa e malava ke tokoni e ʻEikí mo fakahaofi kinautolu ʻoku tafoki kiate Ia ʻi honau ngaahi faingataʻaʻiá. ʻI he lēsoni ko ʻení, ʻe fakalahi e mahino ʻa e kau akó ki he founga te nau lava ai ʻo fakatupulaki ha fakakaukau taʻengata ki he mālohi ʻo e ʻEikí ke fakahaofíá. ‘E toe fakaafeʻi e kau akó ke fakapapau‘i e meʻa te nau lava ke fai ke maʻu ai e mālohi ʻo e ʻEikí ʻi heʻenau fehangahangai mo honau ngaahi faingataʻá.

Ngaahi Fokotuʻu ki hono Akoʻí

Naʻe hanga ʻe he kau Leimaná ʻo fakapōpulaʻi e kakai ʻo ʻAlamā mo Limihaí.

Fakaafe‘i e kau akó ke nau vahevahe haʻanau ngaahi sīpinga pe kakai ʻoku nau ʻiloʻi ʻoku nau lolotonga fehangahangai mo ha ngaahi faingataʻa.

• Ko e hā ha ngaahi ʻuhinga kehekehe ki heʻetau ngaahi faingataʻá? (‘E ala tokoni hano toe vakaiʻi e ngaahi sīpinga ʻi he konga 1 ‘o e naunau teuteú.)

• Ko e hā ha ngaahi fehuʻi, hohaʻa, pe ongo angamaheni ʻe maʻu ʻe he kakaí he taimi ʻoku nau fehangahangai ai mo e ngaahi faingataʻá?

Ko Hono Fakatupulaki ʻEtau Founga Akoʻí mo e Akó

Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá. ʻE lava ke fokotuʻutuʻu ʻe he kau akó ha ngaahi palopalema mo e fehuʻi ʻoku nau fanongo ai he akó pe ngāué pe mītia fakasōsialé. ʻOku faʻa ʻomi ʻe he ngaahi maʻuʻanga tokoni ko ʻení ha fakakaukau fakaeʻatamai, ʻa ia ʻoku ʻikai ke tali ia ʻi he ngaahi akonaki ʻo e ongoongoleleí. Kumi ha ngaahi faingamālie ke tokoni ki he kau akó ke nau akoako ki hono fokotuʻutuʻu ha ngaahi palopalema mo e ngaahi fehu‘i “ʻi he fakaikiiki ‘o e palani ʻo e fakamoʻuí mo e ngaahi akonaki ʻa e Fakamoʻuí” (Doctrinal Mastery Core Document [2018], “Acquiring Spiritual Knowledge,” palakalafi 8).

Ko e Kakai ʻo ʻAlamaá

Toe fakamanatu nounou ‘a e ngaahi tūkunga naʻá ne tataki e kakai ʻo ʻAlamaá ki hono fakapōpulaʻi ʻe he kau Leimaná. ‘E lava ke ke fakaafeʻi e kau akó ke nau fakakaukau ki he anga e ongo ʻa e kakai moʻui angatonu ʻo ʻAlamaá, ʻi he mole fakafokifā ʻenau tauʻatāiná mo fakamālohiʻi ke tauhi ki he kau Leimaná.

Fakaafeʻi e kau akó ke nau toe vakaiʻi e Mōsaia 23:21–24, ‘o sio ki ha ngaahi ʻuhinga naʻe ngalingali ke fakaʻatā ai ʻe he ʻEikí ke hoko mai e ngaahi faingataʻá ki he kakai ʻo ʻAlamaá.

• Fakatatau ki he ngaahi veesi ko ʻení, ko e hā e taumuʻa ʻa e ʻEikí ʻi hono fakaʻatā e kakai ʻo ʻAlamaá ke nau foua e ngaahi faingataʻa ko ʻení?

• Ko e hā ha ngaahi founga mei he fekumi ke mahino e fakakaukau taʻengata ʻa e ʻEikí ʻi he ngaahi faingataʻá ʻoku tokoni kiate kitautolu ke ne liliu ʻa e anga ʻetau vakai ki hotau ngaahi faingataʻá?  

Poupou‘i e kau akó ke nau kumi ha ngaahi moʻoniʻi meʻa mei he lēsoni ko ʻení ʻe lava ke ne tokoniʻi kinautolu ke nau maʻu ha fakakaukau taʻengata ki honau ngaahi faingataʻaʻiá.

Kakai ʻo Limihaí

Fakamanatu ki he kau akó na‘e nofo pōpula foki mo e kakai ʻo Limihaí. Fakamatala‘i fakanounou ʻa e ngaahi tūkunga ʻo ʻenau nofo pōpulá. Fakaafe‘i e kau akó ke nau vakaiʻi e Mōsaia 21:6–12, ‘o sio ki he founga naʻe fakahoko ʻe he kakai ʻo Limihaí ke nau hola ai mei he nofo pōpulá. Fakakaukau ke fehuʻi ange ʻa e ngaahi fehuʻi ko ʻení:

• Ko e hā naʻe hoko ki he kakai ʻo Limihaí ʻi heʻenau feinga ke fakahaofi kinautolu mei he nofo pōpulá?

• Ko e hā ha ngaahi palopalema ‘e lava ke tau fetaulaki mo ia ʻi heʻetau feinga ke ikunaʻi hotau ngaahi faingataʻá kae ʻikai ke fekumi ki he tokoni ʻa e ʻEikí? Ko e hā te ne taʻofi ʻetau kole tokoni mei he ʻEikí ʻi hotau ngaahi faingataʻaʻiá?

Fakaafe‘i e kau akó ke nau toe vakaiʻi e Mōsaia 21:13–16, pe kole ki ha tokotaha ako ke ne fakamatala‘i fakanounou ʻa e meʻa naʻe fai ʻe he kakai ʻo Liminaí hili ʻenau fakatokangaʻi hake he ʻikai ke nau lava ʻo fakahaofi kinautolu mei he nofo pōpulá. Hili iá pea fakaafe‘i ha tokotaha ako ke ne fakamatalaʻi fakanounou e founga naʻe faifai pea fakahaofi ai e kakai ʻo Limihaí. Fakakaukau ke ʻeke ha taha pe lahi ange ʻo e ngaahi fehuʻi ko ʻení ke tokoni ki he kau akó ke fakatupulaki ha fakakaukau taʻengata ki honau ngaahi faingataʻaʻiá:

• Ko e hā naʻá ke ako mei he meʻa ne aʻusia ʻe he kakai ʻo Limihaí ki he anga e tokoni ʻa e ʻOtuá pe ko hono fakahaofi ʻa kinautolu ʻoku kole tokoni kiate Ia ʻi heʻenau ngaahi faingataʻaʻiá? (Tānaki atu ki he ngaahi mo‘oni naʻe vahevahe ʻe he kau akó, tokoniʻi ke nau ʻiloʻi ha tefitoʻi moʻoni tatau hangē ko ʻení: ʻI heʻetau fakavaivaiʻi kitautolu pea ui ki he ʻOtuá, te Ne fanongoa mai ki heʻetau lotú pea fakahaofi kitautolu mei heʻetau ngaahi faingataʻaʻiá ʻi he taimi pē ʻAʻana.)

• ʻE anga fēfē haʻatau falala ki he taimi ʻa e ʻEikí kae ʻikai ko haʻatautolú ʻi heʻetau fehangahangai mo e ngaahi faingataʻá? (‘E ala tokoni ke toe vakaiʻi e lea ʻa Palesiteni Tāleni H. ʻOakesi ʻi he konga 2 ʻo e naunau teuteú.)

• Ko e hā ha ngaahi tāpuaki kuó ke maʻu ʻi hoʻo muimui ki he finangalo ʻo e ʻEikí mo falala ki Heʻene taimi ki hoʻo moʻuí?

Te ke lava ke ʻoange ha kiʻi taimi ki he kau akó ke nau fakakaukau ki ha faingataʻa ʻoku nau lolotonga fehangahangai mo ia pea fakakaukau ki he founga te nau lava ke liliu ia ʻaki ha fakakaukau ʻoku taʻengatá.

ʻOku fakamālohia ʻe he ʻEikí e kakai ʻo ʻAlamaá mo fakahaofi kinautolu mei he nofo pōpulá.

Fakamanatu ki he kau akó na‘e nofo pōpula foki mo e kakai ʻo ʻAlamaá ki he kau Leimaná. ʻOange ha kiʻi taimi ki he kau akó ke nau toe vakaiʻi e Mōsaia 24:10–16, ʻo sio ki ha ngaahi faitatau mo ha ngaahi faikehekehe ʻi he ngaahi faingataʻa ne foua ʻe he kakai ʻo ʻAlamaá mo e kakai ʻo Limihaí.

• Ko e hā ʻa e ngaahi faitatau naʻá ke maʻú? Naʻe kehekehe fēfē e ngaahi aʻusia ʻa e ongo kulupú ni? (ʻE lava ke kau ʻi he ngaahi talí ʻa e meʻá ni: Naʻe tokoniʻi mo fakahaofi lōua e ongo falukunga kakaí ʻe he ʻEikí; naʻe hoko e nofo pōpula ʻa e kakai ʻo ʻAlamaá ko hano ʻahiʻahiʻi ia ʻo ʻenau tuí lolotonga ʻenau feinga ke muimui ki he ʻEikí, ka ko e nofo pōpula ʻa e kakai ʻo Limihaí naʻe tupu ia mei heʻenau faiangahalá; naʻe tafoki vave e kakai ʻo ʻAlamaá ki he ʻOtuá, ka naʻe toki tafoki e kakai ia ʻo Limihaí kiate Ia hili ʻenau ʻuluaki feinga ʻiate kinautolu pē ke fakahaofi kinautolú.)

• Ko e hā ha fakamoʻoni ki he ʻofa ʻa e ʻOtuá ʻokú ke vakai ki ai mei he ongo fakamatala ko ʻení?

• Ko e hā mo ha toe ngaahi lēsoni te tau lava ‘o ako mei he meʻa ne foua ʻe he kakai ʻo ʻAlamaá ki he anga e tokoni ʻa e ʻOtuá pe fakahaofi kinautolu ʻoku tafoki kiate Ia ʻi honau ngaahi faingataʻaʻiá? (‘I hono vahevahe ʻe he kau akó ʻa e ngaahi moʻoni ne nau maʻú, tokoniʻi ke nau ʻiloʻi ha tefitoʻi moʻoni tatau hangē ko ʻení: ʻI heʻetau ngāue ʻaki e tuí mo e kātakí ʻi hotau ngaahi faingataʻaʻiá pea ui ki he ʻOtuá, te Ne lava ke fakamālohia kitautolu ke fua lelei ange ‘etau ngaahi kavengá. Fakatokangaʻi ange: ‘Oku akoʻi ʻe ʻAlamā ko e Siʻi ha tefitoʻi moʻoni tatau ʻi he ‘Alamā 36:3, 27.)

Vahevahe fakakulupu e kalasí ke nau tautau toko ua pe toko tolu, pea fakaafeʻi kinautolu ke nau toe vakaiʻi e lea ʻa ʻEletā Tēvita A. Petinā ʻi he konga 3 ʻo e naunau teuteú. Fakaʻaliʻali e ngaahi fehuʻi ko ʻení pea fakaafeʻi e kau akó ke nau aleaʻi ia ʻi heʻenau ngaahi kulupú:

• ʻE lava ke tokoni fēfē ʻa hono ʻiloʻi ʻoku ʻikai ke toʻo maʻu pē ʻe he ʻEikí hotau ngaahi faingataʻaʻiá ʻi he taimi pē ko iá?

• Fakatatau kia ʻEletā Petinā, te tau maʻu fēfē ha ivi lahi ange ʻi heʻetau fehangahangai mo e ngaahi faingataʻá mei hono tauhi ʻetau ngaahi fuakavá ?

• Kuo tokoniʻi mo fakamālohia fēfē koe ʻe he ʻEikí, pe ko ha taha ʻokú ke ʻilo, ʻi hoʻo kātekina ha faingataʻa pe fuesia ha kavenga? Ko e hā ha ngaahi tāpuaki naʻe maʻu mei he ʻikai ke fakahaofi leva he taimi pē ko iá mei he faingataʻá?

Fakaafeʻi ha tokotaha ako ʻe taha pe ua ke vahevahe e meʻa naʻe makehe mei heʻenau fealēleaʻaki fakakulupú. ‘Oange ha kiʻi taimi ki he kau akó ke lekooti ai ha faʻahinga ongo ne nau maʻu ki he anga haʻanau fakalahi ʻenau falala ki he ʻEikí ʻi heʻenau fehangahangai mo e ngaahi faingataʻá.

Ki he Kalasi Hokó

ʻEke ki he kau akó pe ʻoku ʻi ai haʻanau ngaahi fehuʻi ʻoku nau loto ke tali mai ʻe he ʻEikí. Poupou‘i ke nau ako fakalelei e Tohi ‘a Molomoná pea mo e naunau teuteú ki he kalasi hokó ke sio ki he meʻa ʻe lava ke nau ako ʻo kau ki hono maʻu e ngaahi tali mei he ʻEikí.