Lēsoni 12 Naunau ʻa e Faiakó: Ko e Fie Maʻu ke Fanauʻi Foʻou Fakalaumālie Kitautolú
“Lēsoni 12 Naunau ʻa e Faiakó,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 12 Naunau ʻa e Faiakó,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 12 Naunau ʻa e Faiakó
Ko e Fie maʻu ke Fanauʻi Foʻou Fakalaumālie Kitautolú
ʻI hotau tuʻunga hingá, ʻoku tau taʻetaau ai ke nofo ʻi he ʻao ʻo e ʻOtuá. Koeʻuhí ko Sīsū Kalaisi pea fakafou ʻi Hono mālohi fakaleleí, ʻe lava ke fanauʻi foʻou kitautolu ko ʻEne fānau fuakavá mo fakafeʻungaʻi kitautolu ki he nāunau fakasilesitialé. ʻE maʻu ʻe he kau akó ʻi he lēsoni ko ʻení ha faingamālie ke fakaloloto ʻenau mahino ki he fanauʻi foʻou fakalaumālié mo fakamatalaʻi e founga ʻe lava ke liliu ai ʻe Sīsū Kalaisi hotau ngaahi lotó. ʻE fakapapauʻi foki ʻe he kau akó ʻa e meʻa te nau lava ʻo fai ke lelei ange ai ʻenau moʻui ʻaki e tokāteline ʻo Kalaisí kae lava ke fakaloloto ʻenau uluí.
Ngaahi Fokotuʻu ki hono Akoʻí
Ko Hono Fakatupulaki ʻEtau Founga Akoʻí mo e Akó
Tokoni ki he kau akó ke nau fatongia ʻaki ʻenau akó. “Kuo pau ke fakahoko ʻe he [tokotaha akó] ʻa e akó. ʻI heʻene peheé, ko e [tokotaha akó] ʻoku fie maʻu ke ne fakahoko ʻa e ngāué” (Teaching the Gospel: A Handbook for CES Teachers and Leaders [1994], 14). Naʻe pehē ʻe Sisitā Vesinia H. Piesi, ko ha tokoni mālōlō ʻi he Kau Palesitenisī Lahi ʻo e Kau Finemuí: “ʻOku ʻikai fakakaukau e faiako taukeí ia ʻo pehē, ʻKo e hā te u fai ʻi he kalasí he ʻaho ní?’ ka ʻokú ne fehuʻi, ʻKo e hā ʻe fai heʻeku fānau akó he kalasí he ʻaho ní?’ kae ʻikai, ʻKo e hā te u akoʻi he ʻaho ní?’ ka ko e, ʻTe u tokoni fēfē ki heʻeku fānau akó ke nau ʻilo ʻa e meʻa ʻoku fie maʻu ke nau ʻiló?’ [Teaching the Gospel: A Handbook for CES Teachers and Leaders, 13]” (“The Ordinary Classroom—a Powerful Place for Steady and Continued Growth,” Ensign, Nov. 1996, 12).
Ko e aʻusia ʻe he kakai ʻo e Tuʻi ko Penisimaní ʻa e fanauʻi foʻou fakalaumālié.
Fakaʻaliʻali e fakamatala ko ʻeni meia Palesiteni Tāleni H. ʻOakesi: “ʻOku ʻikai … feʻunga pē ʻetau tui ki he ongoongoleleí; kuo pau ke tau ngāue mo fakakaukau koeʻuhí ke tau ului ki ai” (“The Challenge to Become,” Ensign, Nov. 2000, 32).
Fakamanatu ki he kau akó te nau lau ʻi he vahe 1 ʻo e naunau teuteú ha fakamatala ʻo e fanauʻi foʻou fakalaumālie ʻa e kakai ʻo e Tuʻi ko Penisimaní. ʻO ka fie maʻu, ʻe lava ke toe vakaiʻi ʻe he kau akó ʻa e Mōsaia 4:2–3 mo e Mōsaia 5:2–7, ʻo kumi e fehokotaki ʻi he vahaʻa ʻo e tokāteline ʻo Kalaisí mo e uluí. ʻE lava ke ke fakahoko ha niʻihi ʻo e ngaahi fehuʻi ko ʻení pe ko ha konga pē ke fakaloloto e mahino ʻa e kau akó ki he ngaahi moʻoni ʻoku nau ʻiló.
Ko e hā ha ngaahi tafaʻaki ʻo e tokāteline ʻo Kalaisí naʻe fakaʻaongaʻi ʻe he kakai ʻo e Tuʻi ko Penisimaní, pea naʻá ne takiekina fēfē ʻenau fanauʻi foʻou fakalaumālié? (Tokoni ki he kau akó ke nau ʻiloʻi ha tefitoʻi moʻoni hangē ko ʻení: ʻI heʻetau faifeinga ke moʻui ʻaki e tokāteline ʻo Kalaisí, ʻe liliu ʻe he Fakamoʻuí hotau ngaahi lotó mo tokoniʻi kitautolu ke tau fanauʻi foʻou fakalaumālie.)
Ko e hā ʻoku mahuʻinga ai ke ke ʻiloʻi e fatongia ʻo e Fakamoʻuí ʻi hoʻo fanauʻi foʻou fakalaumālié mo e uluí?
Ko e hā ʻokú ke ʻilo fekauʻaki mo Sīsū Kalaisí ʻokú ne ueʻi koe ke ke tafoki kiate Ia mo liliu ho lotó?
Kuo liliu fēfē nai ʻe Sīsū Kalaisi ho lotó? Ko e hā ʻokú ke ongoʻi fekauʻaki mo Ia ʻi hono tokoniʻi koe ke fakahoko ʻa e liliú ni? Poupouʻi e kau akó ke vahevahe ha ngaahi aʻusia ʻoku ʻikai fuʻu fakataautaha, pe fakaafeʻi kinautolu ke lekooti ha aʻusia ʻi heʻenau ngaahi tohinoá.
Ko e hā ha ngaahi founga ʻoku fakaava ai ʻe he ngaahi ʻelemēniti takitaha ʻo e tokāteline ʻo Kalaisí (tuí, fakatomalá, papitaisó, ko e meʻafoaki ʻo e Laumālie Māʻoniʻoní, mo e kātaki ki he ngataʻangá) ʻa e matapā ki he Fakamoʻuí ke liliu ho lotó?
Fakaafeʻi e kau akó ke nau fakakaukau ki ha founga liliu ʻo e lotó ʻoku nau fie aʻusia, pea fehuʻi ange:
Ko hono tanu ʻe he kakai ʻAnitai-Nīfai-Līhaí ʻenau meʻataú.
Fakamatalaʻi ange naʻa mo e taimi ʻoku ʻosi ai hano aʻusia ʻe ha taha ha liliu lahi ʻo e lotó, ʻe malava pē ke mole atu ʻene moʻui līʻoá. Fakaʻaliʻali e fakamatala ko ʻeni meia ʻEletā Teili G. Lenilani:
ʻĪmisi
ʻEletā Teili G. Lenilani
ʻOku tau ʻilo kotoa ha niʻihi fakafoʻituitui ne nau aʻusia e liliu lahi ko ʻeni ʻo e lotó ka ne nau iku ʻo tukulolo ki he tangata fakakakanó. Naʻe kamata ke nau taʻetokanga ʻi heʻenau moihū mo e mateaki ki he ʻOtuá, ne fakafefeka honau lotó, pea nau uesia ai honau fakamoʻui taʻengatá. (“Tauhi ke Tolonga ʻa e Fuʻu Liliu Lahi ʻo e Lotó,” Liahona, Nōvema 2009, 98)
Ko e hā ka taʻetokanga ai ha tokotaha kuó ne aʻusia ha liliu lahi ʻo e lotó ki heʻene moihū mo e mateaki ki he ʻOtuá?
Ke fakafehoanaki e niʻihi fakafoʻituitui naʻe fakamatalaʻi ʻe ʻEletā Lenilaní, fakakaukau ke fakaʻaliʻali e fakatātā ko ʻení. Fakaafeʻi e fānau akó ke nau fakamatalaʻi e talanoa ʻo e kakai ʻAnitai-Nīfai-Līhaí pea ke fakamatalaʻi e meʻa naʻá ne fakatupu e kakai ʻAnitai-Nīfai-Līhaí ke tanu ʻenau ngaahi meʻataú.
ʻI hono vahevahe ʻe he kau akó ʻa e meʻa ʻoku nau ʻilo fekauʻaki mo e kakai ʻAnitai-Nīfai-Līhaí, ʻe lava ke ke fakaʻaongaʻi ha niʻihi ʻo e ngaahi potufolofola ko ʻení ke tokoni ke ʻiloʻi ʻe he kau akó e fakamātoato ʻo e liliu mo e ului ʻa e kakaí kia Sīsū Kalaisí: ʻAlamā 23:6–7; ʻAlamā 24:9–11, 15; mo e ʻAlamā 27:27.
Ko e hā naʻá ne taʻofi e kakai ʻAnitai-Nīfai-Līhaí mei heʻenau fakavaʻivaʻinga ʻi heʻenau moihuú mo e mateaki ki he ʻOtuá?
Ko e hā ha ngaahi lēsoni mei he ngaahi potufolofola ko ʻení ʻe lava ʻo tokoni atu ke fakatupulaki hoʻo feinga ke “tuʻu maʻu ʻi he tui kia Kalaisí, ʻo aʻu ki he ngataʻangá” (ʻAlamā 27:27)?
ʻE lava ke ke fakaafeʻi e kau akó ke nau fakalaulauloto pe ko e hā ha ngaahi meʻatau ʻo e fakafepakí ʻokú ne ala taʻofi kinautolu mei hono aʻusia fakataautaha ha liliu lahi ʻo e lotó.
Ke tokoni ki he kau akó ke fakaʻaongaʻi e meʻa kuo nau ako ʻi he lēsoni mo e ʻiuniti ko ʻení, vahevahe e kau akó ki ha ngaahi kulupu iiki pea fokotuʻu mo ha taki fealēleaʻaki maʻá e kulupu takitaha. ʻOange ʻa e laʻipepa tufa ko ʻení ki he kulupu takitaha, pea fakapapauʻi ʻoku maʻu ʻe he kau akó ha taimi feʻunga ke fakahoko ha fealēleaʻaki ʻoku ʻuhingamālié. Fakatatau ki he lahi ʻo e taimí, fakaafeʻi e kau akó ke vahevahe mo e kalasí ʻa e meʻa ne nau aleaʻí.
Fealēleaʻaki Fakakulupu Iiki ki he Fanauʻi Foʻou Fakalaumālié
Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó—Lēsoni 12
Fakahinohino maʻá e taki fealēleaʻakí: Kātaki ʻo tataki ha fealēleaʻaki mo e kau mēmipa hoʻo kulupú fekauʻaki mo e tūkunga ko ʻení. Poupouʻi e kau mēmipa kotoa hoʻo kulupú ke nau kau atu. Neongo ia, ʻoku ʻikai totonu ke ongoʻi ʻe ha taha ʻoku fakakounaʻi ke vahevahe ʻenau ngaahi fakakaukaú.
Naʻe saiʻia ʻa Papilou ʻi he ngāue fakafaifekaú peá ne ongoʻi e fakatōkakano ʻa e ongoongoleleí ʻi hono lotó. Naʻá ne foki ki ʻapi mei he ngāue fakafaifekaú ʻi he fiefia mo ha ngaahi ʻamanaki lelei lahi ki hono kahaʻú. Hili ʻene ʻi ʻapi ʻi ha ngaahi uike siʻí, naʻe kamata ke ne ongoʻi tuenoa mo hē. Naʻá ne faʻa ongoʻi taʻelata. ʻI haʻane feinga ke ikunaʻi e ngaahi ongo ko ʻení, naʻá ne kau ʻi ha ngaahi ʻekitivitī mo ha ngaahi ngāue kehekehe. Naʻe kamata māmālie ke taʻetokanga ki hono fakahoko ʻene lotu fakataautahá mo e ako folofolá. Naʻe fakaʻau ke siʻi ʻene maʻu lotú, pea kimuí ni naʻe ʻahiʻahiʻi ia ke foki ki ha ngaahi tōʻonga moʻui motuʻa naʻá ne maʻu kimuʻa pea ʻalu ʻo ngāue fakafaifekaú.
Ngaahi Fehuʻi ke Aleaʻí:
Ko e hā ha ngaahi moʻoni fekauʻaki mo e fanauʻi foʻou fakalaumālié mo e liliu ʻo e lotó ʻe fenāpasi lelei taha mo e tūkunga ʻo Papiloú?
Kapau ko hao kaungāmeʻa ʻa Papilou, ko e hā te ke vahevahe mo ia fekauʻaki mo Sīsū Kalaisi ʻe ala tokoni kiate ia ke ne toe aʻusia ha liliu ʻo e lotó?
Ko e hā ha ngaahi lēsoni ʻe lava ke ako ʻe Papilou mei he kakai ʻAnitai-Nīfai-Līhaí?
ʻE lava ke ke ʻoange maʻá e fānaú ha taimi siʻi ke nau lipooti atu e meʻa ne nau ako ʻi heʻenau fealēleaʻaki fakakulupú. Te ke lava foki ʻo ʻoange kiate kinautolu ha taimi ke fakalaulauloto ki he meʻa ʻoku ueʻi kinautolu ke fakahokó koeʻuhí ko e meʻa ne nau ako mo ongoʻi he ʻaho ní. ʻE lava ke ke fakaafeʻi kinautolu ke vahevahe e founga kuo fakatupulaki ai ʻenau mahino mo e fakamoʻoni ki he tokāteline ʻo Kalaisí ʻi heʻenau ako e ʻiuniti ko ʻení.
Ki he Kalasi Hokó
ʻI hoʻo teuteu ke fakaʻosi e kalasí, ʻe lava ke ke fakaʻaliʻali e lea ko ʻeni ʻa Palesiteni Lāsolo M. Nalesoni: “ʻOku mau fie talanoa mo kimoutolu fekauʻaki mo e tukupā kāfakafa taha, ko e meʻa mahuʻinga taha , mo e ngāue maʻongoʻonga taha ʻi he māmaní. Pea ʻokú ma loto ke fakaafeʻi kimoutolu ke mou kau mai!” (Russell M. Nelson mo Wendy Nelson, “ʻAmanakiʻanga ʻo ʻIsilelí” [fakataha lotu fakamāmanilahi ʻa e toʻu tupú, 3 Sune, 2018), ko ha tānaki atu ki he New Era mo e Ensign,3, HopeofIsrael.ChurchofJesusChrist.or). ʻI hono ako ʻe he kau akó e naunau teuteu ki he kalasi hokó, poupouʻi kinautolu ke nau fakakaukau ki honau fatongia ʻi he ngāue mahuʻingá ni: ko hono tānaki ʻo ʻIsilelí.